“Tureebire Mesia”!

Haahingwireho ebyasha bina ebitabo bya Baibuli eby’Oruheburaayo biherize kuhandiikwa, obunabi bwa Miika oburikukwata ahari Mesia bukahikiirizibwa obu Yesu yaazaarirwa omuri Betelehemu. Bwanyima y’emyaka 30, omu gwa 29, ekicweka ky’okubanza eky’obunabi bwa Danieli ekirikukwata aha kwija kwa Mesia kikahikiirizibwa. Obu Yesu yaabatizibwa, nibwo na Ruhanga yaamushukaho omwoyo ogurikwera. Oruzaaro orwaraganisiibwe, niwe Mesia, akareebeka omu bunaku obuhikire!

Ahonaaho Yesu akatandika kubuurira “naagamba ebigambo ebirungi by’obukama bwa Ruhanga.” (Luka 8:1) Nk’oku kyarangirwe, Yesu akaba ari omunyambabazi, arikufayo n’aha bantu. Akaba naayegyesa omu muringo gwa rukundo, kandi akatamba endwara “n’obumuga bwona,” ekyo kyayoreka ngu Ruhanga akaba naamushagika. (Matayo 4:23) Abantu b’emyaka yoona ku baabaire baheza kureeba Yesu, bahamya ati: “Tureebire Mesia”!​—Yohaana 1:41.

Yesu akagira ngu Obukama bwe butakatandikire kutegyeka omu nsi, hakaabaireho engamba, emitsisa, n’oburemeezi obundi bwingi. Akahiga boona ati “mugume nimureeba.”​—Mako 13:37.

Yesu akaba ahikiriire kandi akaguma naayorobera Ruhanga, kwonka abazigu be bwanyima bakamwita. Okufa kwe kukaba ekitambo ekyabaire nikyetengyesa kugaruraho eki Adamu na Haawa baatufeerereize nigo magara agatahwaho omu paradiso.

Ruhanga okuzoora Yesu nk’ekyahangirwe ky’omwoyo bwanyima y’okumara ebiro bishatu afiire, kandi ekyo kikahikiiriza obunabi. Bwanyima, Yesu akabonekyera abakuratsi be abarikurenga 500. Atakagarukire mu iguru, akaragiira abakuratsi be kubuurira amakuru marungi agarikumukwataho n’aha Bukama bwe “omu mahanga goona.” (Matayo 28:19) Eki bakakihikiiriza bata omu bwijwire?

​​—Nibiihwa omu Matayo, Mako, Luka, Yohaana, 1 Abakorinso.