Oku Yehova Arikwirira Haihi Naitwe

1. Abantu baine kyetengo ki, kandi n’oha orikubaasa kuhaazya ekyetengo ekyo?

ABANTU baine ekyetengo ky’okwirira haihi na bagyenzi baabo. Abantu nibairirana haihi baaba nibakundana munonga kandi barikumanyana gye. Nitushemererwa twaba twine abanyabuzaare n’abanywani abarikutukunda, abarikutuha ekitiinisa kandi abarikutwetegyereza. Kwonka okukira munonga, Omuhangi waitu niwe twine kugira nawe omukago guhami.​—Mub. 12:1.

2. Yehova naaturaganisa ki, kwonka ahabw’enki abantu baingi batarikukiikiriza?

² Yehova kurabira omu Kigambo kye naatuhiga ‘kumwirira haihi,’ kandi naaturaganisa ngu twamwirira haihi, naija ‘kutwirira haihi.’ (Yak. 4:8) Ekyo ka nikitugaruramu amaani! Kwonka, baingi nibagira ngu tiky’oburyo kuteekateeka ngu Ruhanga naayenda kubairira haihi. Nibagira ngu tibashemereire kumwirira haihi kandi ngu ari hare munonga tibarikubaasa kumuhika. Nikibaasika kwirira haihi Yehova?

3. Yehova naatuhamiza ki?

³ Buzima Yehova tari “hare n’omuntu weena” orikumusherura, kandi nikibaasika kumumanya. (Shoma Ebyakozirwe 17:26, 27; Zaaburi 145:18.) N’ekigyendererwa kya Ruhanga ngu abantu abatahikiriire bamwirire haihi, kandi ayeteekateekire kuba munywani waabo. (Isa. 41:8; 55:6) Omuhandiiki wa zaaburi akahandiika ati: ‘Iwe ohurira okushaba, abantu boona baryaija ah’ori. Aine omugisha ou otoorana, okamwiriza haihi.’ (Zab. 65:2, 4) Omugabe Asa owa Yuda akairira haihi Ruhanga kandi Ruhanga nawe yaamwirira haihi.a

YEGYERA AHA KY’OKUREEBERAHO KYA IRA

4. Asa akateeraho abantu ba Yuda ky’okureeberaho ki?

⁴ Omugabe Asa akooreka ngu ainiire omujinya okuramya okw’amazima, yaihaho hekalu y’okuramya kw’ebishuba okwabaire kutsimbire emizi omuri Yuda. (1 Bag. 15:9-13) Aine omutima ogutarikumushinja, akahiga abantu kusherura Yehova “Ruhanga wa baishenkurubo, n’okworobera ebiragiro n’ebyatairweho.” Yehova akaha Asa emigisha omu myaka ikumi ey’okubanza ey’obutegyeki bwe yoona yaabamu obusingye. Obusingye obwo Asa akabubarira oha? Akagira abantu ati: “Ensi ekiri eyaitu, ahabw’okuba tusherwire MUKAMA Ruhanga waitu; tumusherwire, nawe yaatuha obusingye embaju zoona.” (2 Bus. 14:1-7) Yetegyereze ekyakuratsireho.

5. Niki ekirikworeka ngu Asa akaba naayesiga Ruhanga, kandi hakarugamu ki?

⁵ Teeraho kweta omu bigyere bya Asa. Zeera owa Esiopia yaataahirira Yuda aine abashaija 1,000,000 n’ebigaari 300. (2 Bus. 14:8-10) Iwe oine abaserukare 580,000 bonka. Zeera aine abaserukare baingi abarikukira abaawe emirundi nk’ebiri. Noija kutwaza ota? Mbwenu shi noija kubuuza Ruhanga ahabw’enki atarikuzibira okutaahirira okwo? Noija kwesiga obwengye bwawe? Nari noija kwesiga Yehova ngu naija kukurinda? Oku Asa yaatwarize nikworeka ngu akaba aine omukago murungi na Yehova kandi arikumwesigira kimwe. Akamweshengyereza ati: “MUKAMA Ruhanga waitu, otuhe emikono, ahabw’okuba niiwe turikwesiga, kandi omu iziina ryawe twizire kurwanisa omutwe ogu muhango munonga ogw’engabo. Ai MUKAMA, niiwe Ruhanga waitu, otaikiriza omuntu kukusingura.” Yehova akagarukamu ata okweshengyereza kwa Asa? Yehova akasingura “Abaesiopia.” Tihaine n’omwe aha bazigu owaahonokireho omu rugamba orwo!​—2 Bus. 14:11-13.

6. Nitubaasa kutooreza tuta Asa?

⁶ Niki ekyabaasiise Asa kwesiga Ruhanga ngu naija kumuha oburinzi n’obuhabuzi? Baibuli neegira ngu “Asa ogwo akakora ebirikusiimwa” Yehova kandi ‘omutima gwe gukaguma guri ogw’amazima ahari’ Yehova. (1 Bag. 15:11, 14) Naitwe twine kuheereza Ruhanga n’omutima gwaitu gwona. Buzima, ekyo nituba twine kukikora twaba turi ab’okugira omukago murungi nawe hati n’ebiro by’omumaisho. Ka nikitushemeza kumanya ngu Yehova naafayo munonga kutweyiriza haihi, kandi akatuhwera kuguma twine omukago murungi nawe! Yetegyereze emiringo ebiri ei Ruhanga akoziremu ekyo.

YEHOVA ATWEYIRIIZE HAIHI KURABIRA OMU KITAMBO

7. (a) Yehova akozire ki kubaasa kutweyiriza haihi? (b) Ni muringo ki omukuru ogu Ruhanga atweyiriizemu haihi?

⁷ Yehova akooreka rukundo ei ainiire abantu arikuhanga ensi nungi kuba eka yaabo. Kandi naayoreka ngu naatukunda arikutuha eby’okurya ebirikutubaisaho. (Byak. 17:28; Kush. 4:11) Ekirikukira obukuru, Yehova naatureeberera omu by’omwoyo. (Luk. 12:42) Kandi naatuhamiza ngu omuntu ku arikumushaba omu muringo oguhikire naamuhurira. (1 Yoh. 5:14) Kwonka, omuringo mukuru ogu Ruhanga arikutweyiriza haihi n’okurabira omu kitambo eki yaahaireyo ahabwa rukundo ei atwiniire. (Shoma 1 Yohaana 4:9, 10, 19.) Yehova akoohereza “Omwana we omwe nyamunegyere” omu nsi ngu tubaase kucungurwa kuruga omu kibi n’okufa.​—Yoh. 3:16.

8, 9. Yesu aine mwanya ki omu kigyendererwa kya Yehova?

⁸ Yehova akataho entebeekanisa kugira ngu n’abantu abaabaire bariho ira Kristo atakabaireho babaase kugasirwa omu kitambo. Kuruga obu Yehova yaagamba aha kubaho kw’Omujuni oraajune abantu omu biro by’omumaisho, ekitambo kikaba kiri nk’ekyaheebwayo, ahabw’okuba akaba naamanya ngu tihaine ekirikubaasa kuremesa ekigyendererwa kye kuhikiirira. (Kut. 3:15) Bwanyima y’ebyasha bingi, entumwa Paulo akasiima Ruhanga ‘ahabw’okucungurwa okuri omuri Yesu Kristo.’ Paulo akongyeraho ngu Ruhanga akeetsiza “ebibi ebyakozirwe ira, ebi yaagumisiririize.” (Rom. 3:21-26) N’ahabw’ekyo titurikubaasa kwirira haihi na Ruhanga ahatari Yesu.

⁹ Yesu niwe wenka ou abantu abacureezi barikubaasa kurabiramu kumanya Yehova n’okugira omukago murungi nawe. Ebyahandiikirwe nibyoreka bita amazima aga? Paulo akahandiika ati: “Ruhanga ayoreka okukunda kwe oku atukunda, ahakuba ku twabaire tukiri abanyabibi, Kristo yaatufeera.” (Rom. 5:6-8) Ekitambo kya Yesu kikaheebwayo tihabw’okugira ngu kikaba kitushemereire, beitu n’ahabw’okukundwa munonga. Yesu akagira ati: ‘Tihariho orikubaasa kwija ahariinye, Tata owaantumire yaaba atamwiriize haihi.’ Kandi obundi akagira ati: “Tihariho oija ahari Isheboona, atarabire muriinye.” (Yoh. 6:44; 14:6) Yehova arikukoresa omwoyo gurikwera naayeyiriza abantu haihi kurabira omuri Yesu kandi abahwera kuguma omu kukunda Kwe baine amatsiko g’okutunga amagara agatahwaho. (Shoma Yuda 20, 21.) Yetegyereza omuringo ogundi ogu Yehova arikutweyiriza haihi.

YEHOVA NAATWEYIRIZA HAIHI KURABIRA OMU KIGAMBO KYE

10. Baibuli neetuhwera kwega ki ekirikutuhwera kwirira haihi na Ruhanga?

¹⁰ Omu kicweka eki, twaherize kworeka nari kujuriza ebyahandiikirwe 14 kuruga omu bitabo bya Baibuli bitarikushushana. Ku ogire ngu titwine Baibuli titukaamanyire ngu nitubaasa kwirira haihi n’Omuhangi waitu. Titwakubaasize kwega ebirikukwata aha kitambo n’oku turikubaasa kwirira haihi Yehova kurabira omuri Yesu. Yehova akahwera abaahandiikire Baibuli arikukoresa omwoyo gwe ogurikwera, kandi kurabira omu Baibuli nitubaasa kumanya emitwarize ye hamwe n’ebigyendererwa bye ebikuru. Nk’eky’okureeberaho, omu Okuruga 34:6, 7, Yehova akeegambira Musa ati: “Ruhanga ow’okusaasira n’embabazi, otarahuka kugira ekiniga, oijwire embabazi n’amazima, ogirira abantu embabazi enkumi n’enkumi, osaasira okutahikiirira n’okushiisha n’ekibi.” N’oha otarikwenda kwirira haihi na Ruhanga nk’ogwo? Yehova naamanya ngu ku turikweyongyera kwega ebirikumukwataho kurabira omu Baibuli, nitweyongyera kumureeba nk’owaabuzima n’okuhurira turi haihi nawe.

11. Ahabw’enki twine kuteeraho kwega aha mitwarize hamwe n’emihanda ya Ruhanga? (Reeba ekishushani aha kutandika.)

¹¹ Enturukiriro y’akatabo Draw Close to Jehovah erikushoboorora oku turikubaasa kwirira haihi Ruhanga, neegira eti: “Omukago gwona ogu turikugira n’omuntu, niguba nigurugiirira aha kumumanya, okumukunda n’okumuha ekitiinisa ahabw’emitwarize ye. N’ahabw’ekyo, emitwarize n’emihanda ya Ruhanga, nk’oku erikworekwa omu Baibuli, ni kikuru kugyegaho.” Ka twine okushemererwa ahabw’okugira ngu Yehova akahandiikisa Ekigambo kye omu muringo ogu turikubaasa kwetegyereza!

12. Ahabw’enki Yehova yaakoreise abantu kuhandiika Baibuli?

¹² Yehova akaba naabaasa kukoresa baamaraika kuhandiika Baibuli, ahabw’okuba nibatufaho n’ebi turikukora. (1 Pet. 1:12) Hatariho kubanganisa, baamaraika bakaba nibabaasa kuhandiikira abantu obutumwa bwa Ruhanga. Kwonka shi bakaabaasize kureeba ebintu nk’oku abantu barikubireeba? Mbwenu shi bakaabaasize kumanya ebyetengo byaitu, obweremwa bwaitu, n’ebigyendererwa byaitu? Ngaaha, Yehova akamanya ngu baine obugarukiro. Yehova ahabw’okukoresa abantu kuhandiika Baibuli, neeshusha nk’ehandiikiirwe itwe. Nitubaasa kwetegyereza emiteekateekyere n’enyehurira z’abo abaahandiikire Baibuli n’abandi abarikugambwaho omu Byahandiikirwe. Bakaba baine obusaasi, okubangaanisa, okutiina, n’obweremwa nk’ebyaitu, kandi twasingura nitubaasa kushemererwa nkabo. Nka nabi Eliya, boona abaahandiikire Baibuli bakaba bari abantu “nkaitwe.”​—Yak. 5:17.

13. Okushaba kwa Yona nikukukwataho kuta?

¹³ Teekateeka aha ky’okureeberaho eki, noogira ngu maraika akaba naabaasa kwetegyereza gye enyehurira za Yona obu yaahunga obujunaanizibwa obu yaahairwe Ruhanga? Ka kyabaire kiri kirungi Yehova kwikiriza Yona kuhandiika ebirikumukwataho, otwariiremu n’okushaba kwe obu yaabaire ari omu nyanja! Yona akagira ati: “Omutima gwangye ku gwagwire enshazi, naakwijuka, MUKAMA.”​—Yon. 1:3, 10; 2:1-9.

14. Ahabw’enki turikubaasa kwetegyereza ebi Isaaya yaayehandiikireho?

¹⁴ Kandi yetegyereze ebi Yehova yaahweraire Isaaya kwehandiikaho. Nabi Isaaya ku yaaherize kureeba ekitiinisa kya Ruhanga omu kworekwa, kikamureetera kugamba aha bweremwa bwe ati: “Ai bambe! Mbwenuho naahitsya, ahakuba ndi omuntu w’eminwa etashemeire, kandi ntuura omu bantu abaine eminwa etashemeire ahabw’okuba amaisho gangye gaareeba Mukama, MUKAMA ow’amahe!” (Isa. 6:5) Mbwenu shi maraika akaba naabaasa kugamba ebigambo nk’ebyo? Kwonka we Isaaya akaba naabaasa kubigamba kandi buzima akakikora, kandi naitwe nitubaasa kubigamba.

15, 16. (a) Ahabw’enki turikubaasa kwetegyereza gye enyehurira z’abantu abandi? Ha eby’okureeberaho. (b) Niki ekirikwija kutuhwera kwirira haihi Yehova?

¹⁵ Mbwenu shi maraika akaba naabaasa kugira ngu “tinshemereire,” nk’oku Yakobo yaagizire, nari ngu “ndi omusiisi,” nk’oku Petero yaagizire? (Kut. 32:10; Luk. 5:8) Noogira ngu baamaraika bakaba nibabaasa ‘kutiina,’ nk’oku entumwa za Yesu zaatiinire, nari kikaba nikiija kubeetengyesa ‘kugira obumanzi’ bw’okubuurira obwo barikuhiiganisibwa nk’ou Paulo n’abandi baahiiganisiibwe? (Yoh. 6:19; 1 Tes. 2:2) Ngaaha, baamaraika bahikiriire omuri buri kimwe kandi baine amaani g’omutaano. Kwonka abantu ku barikworeka enyehurira nk’ezo, niturahuka kubeetegyereza ahabw’okuba n’abantu nkaitwe. Twaba nitushoma Ekigambo kya Ruhanga, nitubaasa, ‘kushemererwa hamwe n’abarikushemererwa; kandi tukarira hamwe n’abarikurira.’​—Rom. 12:15.

¹⁶ Twateekateeka munonga aha ku Ruhanga yaakoragaine n’abaheereza be abeesigwa ira, nitwega ebintu bingi munonga ahari Ruhanga waitu owairiire haihi n’abantu nk’abo abatahikiriire. Kandi ekyo nikituhwera kwetegyereza gye Yehova n’okumukundira kimwe. N’ekirikurugamu, nitumwirira haihi.​—Shoma Zaaburi 25:14.

GUMA OINE OMUKAGO GUHAMI NA RUHANGA

17. (a) Azaria akaha Asa buhabuzi ki oburungi? (b) Asa akeehuzya ata obuhabuzi bwa Azaria, kandi hakarugamu ki?

¹⁷ Bwanyima y’Omugabe Asa kusingura eihe ry’Abaesiopia, nabi Azaria akamugambira ebigambo by’obwengye hamwe n’abantu be. Azaria akagira ati: “Ruhanga ari hamwe naimwe, mwaba muri hamwe nawe. Ku murikumusherura, nimumuzoora; kwonka ku murikumutsigaho, nawe naabatsigaho.” (2 Bus. 15:1, 2) Kwonka bwanyima, Asa tarakuratiire obuhabuzi burungi obwo. Asa ku yaatiinatiinisiibwe obugabe bw’obukiizi-bwa-bumosho obwa Israeli obwabaire nibumuhakanisa, akacwamu kushaba Abasiria obuhwezi. Omu mwanya gw’okugaruka kweshengyereza Yehova kumuhwera, akashaba obuhwezi abakaafiire. N’ahabw’ekyo, Asa akagambirwa ati: “Okozire eby’obushema; n’ahabw’ekyo okuruga hati noija kuguma noogira obweme.” Emyaka yoona eya Asa eyaakuratsireho ekaba erimu entaro. (2 Bus. 16:1-9) Eki nitukyegaho ki?

18, 19. (a) Tushemereire kukora ki ku turaabe twiriire hare Ruhanga? (b) Nitubaasa kwongyera tuta kwirira haihi Yehova?

¹⁸ Titurikwenda kwirira hare Yehova. Ku turaabe tumwiriire hare, twine kugyendera aha bigambo bya Hosea 12:6, ebirikugira biti: “Ahabw’okuhwerwa Ruhanga waawe, garuka, ohamire kimwe aha mbabazi n’amazima, kandi ogume otegyereze Ruhanga waawe.” Ka tweyongyerere kimwe kwirira haihi na Yehova turikuteekateeka munonga aha kitambo kandi turikwega Ekigambo kye Baibuli.​—Shoma Eky’Ebiragiro 13:4.

¹⁹ Omuhandiiki wa zaaburi akahandiika ati: “Ekirungi ahariinye n’okwirira haihi Ruhanga.” (Zab. 73:28) Twena ka tuteereho kweyongyera kwega ebintu bisya ahari Yehova ekiratureetere kwongyera kumukunda. Kandi nitushaba ngu Yehova ayongyere kutwirira haihi hati n’ebiro byona!