EBIBUUZO KURUGA OMU BASHOMI
Mbwenu shi ebigambo bya Daudi ebiri omu Zaaburi 37:25 n’ebya Yesu ebiri omu Matayo 6:33 nibyoreka ngu Yehova tarikubaasa kureka Omukristaayo obumwe kuburwa eby’okurya ebirikumara?
Daudi akahandiika ngu takareebaga “ohikiriire atsigirweho, n’obu baakuba abaana be nibashaba ak’okurya.” Ebi akabigamba arikwihirira aha bi yaarabiremu. Akaba naamanya gye ngu Ruhanga naafayo aha bantu. (Zab. 37:25) Kwonka ebigambo bya Daudi tibirikworeka ngu omuheereza wa Ruhanga tarikubaasa kuburwa eby’okurya.
Hariho obwire obu Daudi yaabaire aba ari omu mbeera zigumire. Bumwe aharibwo, n’obu yaabaire naahunga Saulo. Obwire obwo Daudi akaba ataine by’okurya birikumara, kandi akashaba omugaati gw’okurya hamwe n’abu yaabaire aine. (1 Sam. 21:1-6) Omu bunaku obwo, Daudi akaba ‘naashaba eky’okurya.’ Kwonka, omu bunaku obwo obugumire, akaba naamanya ngu Yehova tamutsigireho. Amazima gari ngu, tihaine ahu turikushoma ngu Daudi akaba naashabiiriza kubaasa kutunga eby’okurya by’okumubaisaho.
Ebigambo bya Yesu ebiri omu Matayo 6:33, nibituhamiza ngu Ruhanga naaha abaheereza be abarikwebembeza eby’Obukama ebirikwetengyesa. Yesu akagira ngu “mubanze musherure obukama bwe n’okuhikiirira kwe; n’ebyo byona [otwariiremu eby’okurya, eby’okunywa, n’eby’okujwara] muryabyongyerwaho.” Kwonka, Yesu akooreka ngu ahabw’okuhiiganisibwa, “beene” ishe nibabaasa kugira enjara. (Mat. 25:35, 37, 40) Ekyo kikahika aha ntumwa Paulo. Obumwe akaba agira enjara n’eiriho.—2 Kor. 11:27.
Yehova naatugambira ngu nitwija kuhiiganisibwa omu miringo mingi. Naabaasa kutureka kutatunga ebintu birikumara ahabw’okwenda ngu tworekye ngu Sitaane n’omubeihi. (Yob. 2:3-5) Nk’eky’okureeberaho, bamwe aha Bakristaayo bagyenzi baitu abaabaire batairwe omu bihome omu bunaku bwa Nazi, bakeeshanga omu buremeezi bw’amaani ahabw’okuhiiganisibwa. Okutabaha eby’okurya birikumara, ni kamwe aha bukoryo obu baakoreise kugira ngu Abajurizi ba Yehova abo baremwe kuguma bari abeesigwa. Kwonka bakaguma bari abeesigwa ahari Yehova, kandi tarabatsigireho. Akabareka baagyezibwa nk’oku arikwikiriza Abakristaayo boona kugyezibwa omu miringo etari emwe n’emwe. Hatariho kubangaanisa, Yehova naahwera abo abarikubonabona ahabw’eiziina rye. (1 Kor. 10:13) Nitubaasa kuguma nitwijuka ebigambo ebiri omu Abafilipi 1:29 ebi: “Timurahairwe kwikiriza Kristo kwonka, kureka n’okubonabonesibwa ahabwe.”
Yehova naaraganisa kuhwera abaheereza be. Nk’eky’okureeberaho, Isaaya 54:17 nihagira hati: “Tihariho ky’okurwanisa, eki baheesire kukurwanisa, ekirikubaasa.” Okuraganisa oku n’okundi kwingi n’obuhame ngu Ruhanga naija kurinda abantu be nk’ekibiina. Kwonka omwe aha Bakristaayo, naabaasa kugyezibwa nangwa ahikye n’aha kufa.