Ebibuuzo Kuruga Omu Bashomi

Ekiragiro ekiri omu Abaleevi 19:16 okutaba ‘mushinja w’ebishuba kwitisa mutaahi waawe’ nikimanyisa ki, kandi nitubaasa kukyegyeraho ki?

▪ Yehova akahiga Abaisraeli kuba abarikwera. Kubahwera kuba abarikwera akabagira ati: ‘Otarigyendagyenda noogambuura abantu omu bantu b’owaanyu, kandi otariba mushinja w’ebishuba kwitisa mutaahi waawe. Niinye [Yehova].’—Lev. 19:2, 16.

Ebigambo okutaba ‘okwitisa mutaahi waawe’ nibyetegyerezibwa gye omu Ruheburaayo, kwonka shi buzima biine makuru ki? Ekitabo kimwe ky’Abaheburaayo nikigamba aha biri omu Abaleevi kiti: “Ekicweka ky’omushororongo ogu . . . kigumire kukishoboorora ahabw’okutamanya amakuru genyini ag’ebigambo by’Oruheburaayo ebirikumanyisa ‘okuteemerera aha muntu.’”

Abacondooza abamwe nibakwatanisa ebigambo ebyo n’ebiri omu mushororongo gwa 15 ogurikugira ngu, “otarikora ebitari by’oburyo omu kucwa emanja, otarigwera orubaju rw’omworo, n’obu kwakuba okweta aha kitiinisa ky’omukuru, kureka ocwere mutaahi waawe orubanja rw’oburyo.” (Lev. 19:15) N’ahabw’ekyo ekiragiro ekiri omu mushororongo gwa 16 ‘okutaitisa mutaahi waawe,’ kikaba nikimanyisa ngu abaheereza ba Ruhanga tibaine kukora kubi bataahi baabo omu icwero ry’emanja, omu by’obushuubuzi, nari omu nshonga z’eka, n’okutahindahindura enshonga ahabw’okweyendeza. Buzima titwine kukora ebintu ebyo, kwonka hariho omuringo murungi gw’okwetegyereza ebigambo ebiri omu mushororongo gwa 16.

Yetegyereze ebigambo by’okubanza omu mushororongo ogwo. Ruhanga tarikwenda ngu abaheereza be kugambuurana. Ijuka ngu okugambuura nikitwariramu okugamba ekishuba okigyendereire, ekirikubaasa kurugamu n’oburemeezi bw’amaani. (Enf. 10:19; Mub. 10:12-14; 1 Tim. 5:11-15; Yak. 3:6) Omuntu naabeiherera mugyenzi we arikukoresa ebigambo ebigyendereire kushiisha eiziina rye. Omubeihi naabaasa kuha obwamushinja bw’ekishuba, n’obu ekyo kirikubaasa kuta amagara ga mugyenzi we omu kabi. Ijuka ngu ababeihi nibo baahaire obujurizi bw’ebishuba ahari Nabosi, ekyamurugiiremu okuteerwa amabaare ataine rubanja. (1 Bag. 21:8-13) Eego, orikugambuura abandi nari akababeiherera naabaasa kuha obwamushinja bw’ebishuba nk’oku kirikworekwa omu kicweka kya kabiri ky’Abaleevi 19:16.

Kandi, orikubeiherera ondiijo naayoreka rwango y’ekika ky’ahaiguru. Omuri 1 Yohaana 3:15 nihagira ngu, “weena orikwanga mwene ishe n’omwitsi, kandi nimumanya ngu tihariho mwitsi oine amagara agatahwaho omuriwe.” Ni kikuru kumanya ngu Ruhanga akoongyera aha bigambo ebiri omu mushororongo gwa 16 ngu “otaryangira mwene waanyu aha mutima.”—Lev. 19:17.

N’ahabw’ekyo, Abaleevi 19:16 harimu obuhabuzi bw’amaani obwahandiikiirwe Abakristaayo. Twine kwetantara omuze gw’okugirirana ebiteekateeko bibi n’okubeihererana. Omu bugufu, waaba ‘mushinja w’ebishuba kwitisa mutaahi waawe’ ahabw’okugira ngu naakutama nari okamugirira eitima okamubeiherera, n’obuhame ngu noomwanga. Abakristaayo baine kwangira kimwe ekikorwa nk’ekyo.—Mat. 12:36, 37.