Ya m’Bukhu la Juwau
20 Pa ntsiku yakuyamba ya Mdzinga,* Mariya Madalena adayenda ku thenje macibese-bese pomwe kukhana mdima, ndipo iye adawona kuti cimwala comwe cikhadafunga nthutu cikhadacosedwa kale. 2 Tenepo, iye adabwerera acithamanga kuyenda kukhana Simau Pedru na nyakupfunza omwe akhafunidwa kwene-kwene na Jezu ule, ndipo adakawauza kuti: “Iwo acosa mtembo wa Mbuya mu nthutu, ndipo tikudziwa lini komwe akawuikha.”
3 Tenepo, Pedru na nyakupfunza munangoyo adathamanga aciyenda ku thenjeko. 4 Anyakupfunza awiriwo adayambira pabodzi kuthamanga, tsono nyakupfunza munangoyo adathamanga kwene-kwene kuposa Pedru, ndipo ndiye omwe adayamba kufika ku thenjeko. 5 Iye adasonzokera mu nthutumo ndipo adandowona nguwo zomwe zikhadasala m’mwemo, tsono alibe kupita mkatimo. 6 Patsogolo pace, Simau Pedru omwe akhabwera m’mbuyo mwace adafika acipitiratu mu nthutumo. Ndipo iye adandowona nguwo zomwe zikhadasiyidwa m’mwemo. 7 Tsono nguwo yomwe ikhadampsinkha msolo wa Jezu, ikhali lini pabodzi na nguwo zinangozo, koma ikhadavunyiziridwa pambali. 8 Ndipo nyakupfunza omwe adayamba kufika ule, adapitambo mu nthutumo, ndipo adawona acikhulupira. 9 Pakuti iwo akhabvesesa lini cinembo comwe cikhalewa kuti iye akhafunikira kulamusidwa kwa anyakufa. 10 Tenepo, anyakupfunzawo adabwerera m’mii mwawo.
11 Tsono Mariya adasala kunja, pafupi na nthutuyo akulira. Pomwe akhalirapo, iye adasonzokera kuti awone mkati mwa nthutuyo. 12 Ndipo iye adawona anjo awiri omwe akhadabvala bzakubvala bzicena akhadakhala pa mbuto yomwe mtembo wa Jezuyo ukhadaikhidwa. Ndipo m’bodzi akhadakhala ku msolo ndipo munangoyo akhadakhala ku minyendo. 13 Iwo adamubvunza kuti: “Thangwe ranyi ukulira?” Iye adati: “Iwo atenga Mbuya ndipo ndikudziwa lini komwe akamuikha.” 14 Pomwe adamala kulewa bzimwebzi, iye adazungunuka ndipo adawona Jezu adaima. Tsono alibe kuzindikira kuti akhali Jezu. 15 Tenepo Jezu adati kwa iye: “Kodi ukulira ciyani ndipo ukunyang’ana yani?” Pakukumbuka kuti akhali munthu omwe akhasamalira dimbalo, iye adamutawira kuti: “Pai, penu mwamucosa ndimwepo, ndiuzeni komwe mwakamuikha ndipo inepano nin’kamutenga.” 16 Jezu adati kwa iye: “Mariya!” Mariyayo adazungunuka ndipo adalewa Mucihebereu kuti: “Raboni!” (bzomwe bzimbathandauza kuti “Mpfunzisi!”) 17 Jezu adati kwa iye: “Leka kundiphatirira, pakuti ndikanati kuyenda kwa Baba. Tsono ndoko kwa azibale wangu ndipo kawauze kuti: ‘Ndikuyenda kuna Baba wangu, omwe ni Baba wanumbo ndipo kwa Mulungu wangu, omwe ni Mulungu wanumbo.’” 18 Mariya Madalena adayenda kukadziwisa nkhani yabwinoyi kwa anyakupfunzawo, iye adati: “Inepano ndawona Mbuya!” Ndipo iye adawauza bzentse bzomwe Jezu akhadamuuza.
19 Pa ntsiku imweyo, yomwe ikhali ntsiku yakuyamba ya Mdzingayo, anyakupfunzawo adatsonkhana pabodzi kumaulo. Iwo akhadakhiya nyumba yomwe akhadatsonkhanayo thangwe ra kugopa Adjuda. Jezu adafika, aciima pakati pawo ndipo adawauza kuti: “Mtendere ukhale namwe.” 20 Pomwe adamala kulewa bzimwebzi, iye adawalatiza m’manja mwace, na pa mbali pomwe akhadabowoledwa na dipa. Ndipo anyakupfunzawo adakomedwa kwene-kwene kuwona Mbuyayo. 21 Jezu adawauza pomwe kuti: “Mtendere ukhale namwe. Ninga momwe Baba adanditumira, inembo ndikukutumani.” 22 Pomwe adamala kulewa bzimwebzi, iye adawafuliza, aciwauza kuti: “Tambirani mzimu wakucena. 23 Mukalekerera munthu omwe wacita pikado, ndiye kuti Mulungu wamulekererambo kale; tsono mukasaya kulekerera munthu omwe wacita pikado, ndiye kuti Mulungu alibembo kumulekerera.”
24 Tsono Thomasi omwe akhacemeredwambo Mamphase, omwe akhali m’bodzi wa anyakupfunza 12 wale, pakhalibe pomwe Jezu adawonekera. 25 Tenepo anyakupfunza winangowo adakamuuza kuti: “Ifepano tawona Mbuya!” Tsono iye adati: “Ndikasaya kuwona bzipsazi bza perego m’manja mwace na kuikha cala cangu pa bzipsazipo, ndipo ndikasaya kuikha boko langu pa mbali yomwe adabowoledwa ire, nin’dzakhulupira lini na pang’onopo.”
26 Pomwe padapita ntsiku 8, anyakupfunza wacewo adatsonkhana pomwe pabodzi ndipo Thomasi akhalipombo. Napo kuti misuwo ikhadafunga, Jezu adawonekera pakati pawo, aciwauza kuti: “Mtendere ukhale namwe.” 27 Patsogolo pace iye adauza Thomasi kuti: “Ikha cala cako apa ndipo ona manja yangu, futhula boko lako ndipo phata pa mbali yomwe ndidabowoledwa na dipa, leka kupenukira koma khulupira.” 28 Pakutawira Thomasi adati kwa iye: “Mbuya wangu na Mulungu wangu!” 29 Jezu adamuuza kuti: “Kodi ukukhulupira thangwe wandiwona? Wakukondwa mbale omwe anikhulupira napo alibe kuwona.”
30 Kulewa cadidi, Jezu adacita bzakudabwisa bzinango bzizinji pamaso pa anyakupfunzawo, bzomwe bziribe kunembedwa m’bukhu* lino. 31 Tsono bzimwebzi bzidanembedwa kuti imwepo mukhulupire kuti Jezu ni Kristu Mwana wa Mulungu, ndipo thangwe ra kukhulupira kwanu, mukhale na moyo wakusaya kumala m’dzina lace.