Jeremiya
10 Imwe wa m’nyumba ya Jirayeri, tetekerani cenjezo lomwe Yahova akukupasani. 2 Yahova akulewa kuti:
“Lekani kutewezera makhalidwe ya wanthu wa mitundu inango,
Ndipo lekani kugopa bzizindikiro bzakudzulu
Kokha thangwe rakuti mitundu inango imbabzigopa.
3 Pakuti miyambo ya wanthu njapezi-pezi,
Bzifanikiso bzawo ni miti basi yakugwatidwa m’thengo
Yakukonzedwa na manja ya misiri, mwakuphatisa basa bzinthu bzomwe ambakonzera.*
4 Iwo ambabzidekesa na prata* na oro,
Ndipo ambabzikhomerera perego na martelo kuti bzileke kugwa.
5 Ibzo bzimbalewalewa lini ninga djeke wakugopswera bzirombo m’munda wa makaka;
Ibzo bzimbacita kunyamulidwa thangwe bzimbafamba lini,
Lekani kubzigopa thangwe bzingacite lini cakuipa ciri-centse,
Ndipo ne bzingacitembo lini cabwino ciri-centse.”
6 Imwe Yahova, palibe munthu omwe angandendemerane na imwepo.
Imwepo ndimwe mkulu kwene-kwene, ndipo dzina lanu ndikulu na lamphanvu.
7 Kodi mbani omwe angakugopeni lini, imwe Mambo wa mitundu ya wanthu, ibzi ni bzomwe bzin’funika kucitidwa;
Pakuti pakati pa adziwi wentse wa mitundu ya wanthu na pakati pa maumambo yawo yentse,
Palibe munthu wakundendemerana na imwepo.
8 Iwo mbakusaya nzeru na atsiru.
Malango ya muti njapezi-pezi.
9 Prata* imbabweresedwa kucokera ku Tarisi, ndipo oro imbacokera ku Ufazi,
Ndipo bzimbaphatisidwa basa na amisiri, basa la manja ya amisiri omwe ambaphata basa na simbi.*
Bzakubvala bzawo mpsausalu bwa azuli na usalu bwa roxo.
Bzifanikiso bzentsenebzo bzimbakonzedwa na amisiri waluso.
10 Tsono Yahova ni Mulungu wacadidi.
Iye ni Mulungu wamoyo na Mambo wa nthawe zentse.
Dziko lin’dzatetemera thangwe ra ukali bwace,
Ndipo palibe mtundu uli-wentse wa wanthu omwe un’dzakwanisa kupirira ciya caceco.
11* Bzomwe mun’funika kukawauza ni ibzi:
“Mirungu yomwe iribe kukonza kudzulu na dziko la pantsi,
In’dzapfudzidwa pa dziko la pantsi.”
12 Iye ngule omwe adakonza dziko la pantsi na mphanvu zace,
Omwe adakhazikisa dziko la pantsi lomwe limbabala bzinthu mwakuphatisa basa nzeru zace
Ndipo adafuthula kudzulu mwakuphatisa basa luso lace.
13 Iye akacitisa fala lace kubveka,
Madzi yakudzulu yambatekenyeka mwamphanvu,
Ndipo ambacitisa mitambo kukwira kudzulu kucokera ku malire ya dziko la pantsi.
Ambacitisa mpheni* kuti nvula ibvumbe,
Ndipo ambacitisa mphepo kuti icoke ku mbuto yomwe ambaikoya.
14 Wanthu wentse akucita bzinthu mwakusaya kukumbuka bwino na mwakusaya nzeru.
Amisiri wentse omwe ambaphata basa na simbi,* an’dzacita manyazi thangwe ra bzifanikiso bzawo bzakucita kugoba;
Pakuti bzifanikiso bzawo bza simbi mpsakusaya basa,
Ndipo bziribe moyo.
15 Ibzo mpsapezi-pezi, mabasa yakuthemera kusinjiriridwa.
Ikadzafika ntsiku yakuti bzilangidwe, ibzo bzin’dzapfudzidwa.
16 Tsono Mulungu wa Djakobo* ngwakusiyana na bzinthu bzimwebzi,
Pakuti iye ndiye omwe adakonza bzentse,
Ndipo Jirayeri ni mpsimbo ya utaka bwace.
Yahova wa anyankhondo ndiro dzina lace.
17 Nyamula mitolo yako yomwe iri pantsi,
Iwe mkazi wakuzunguliridwa na anyamadulanthaka.
18 Yahova walewa kuti:
“Tsapano nin’thusira* kutali anyakukhala m’dzikoli,
Ndipo nin’dzacitisa kuti abonere mumtima.”
19 Tsoka kwa ine thangwe ra kupwetekeka kwangu!
Cironda cangu n’cakusaya kupola.
Ine ndidati: “Kulewa cadidi, yamweya ndiyo matenda yangu, ndipo nin’funika kuyapirira.
20 Tendi langu lapfudzidwa ndipo bzingwe bzentse bzabwedzeka.
Wana wangu andisiya ndipo kulibe.
Palibe kusala ne m’bodzi kuti amange tendi langu na kulamusa nguwo za tendi langu.
21 Pakuti amakabusa acita bzinthu mwakupusa,
Ndipo alibe kubvunza Yahova.
Ndipopa alibe kucita bzinthu mwanzeru
Ndipo mabira yawo yentse yamala kubalalika.”
22 Tetekerani! Yafika tsapanopa nkhani ipsa!
Kukubveka kugunda kukulu kucokera m’dziko la ku norte,
Kuti kudzacitise mizinda ya Djuda kukhala matere na mbuto yakuthawira mphumphi.
23 Imwe Yahova, ndikudziwa bwino kuti munthu alibe ugo bwakusankhula njira yace.
Iye alibe kupasidwa mphanvu zakutsogolera napo nzayo zace.
24 Imwe Yahova, ndilangeni mwacirungamo,
Koma sikuti na ukali bwanu, kuti muleke kundipfudza.
25 Khuthulirani ciya canu mitundu ya wanthu yomwe imbakubverani lini
Na madzinza yomwe yambacemera lini dzina lanu.
Pakuti iwo adapfudza Djakobo,
Inde, iwo adamupfudza mpaka kumumaliza,
Ndipo adapfudza dziko lace mpaka kusala liribe cinthu.