Ekisodo

23 “Leka kumwaza nkhani zakunama. Leka kubverana na munthu wakuipa mwa kukhala mboni yakukonzera winango bzakuipa. 2 Leka kucita bzinthu bzakuipa thangwe rakuti azinji akucita bzimwebzo. Pomwe ukupereka umboni, leka kulewa bzinthu bzomwe mpsacadidi lini* kuti azinji akomedwe, thangwe ukacita tenepo un’dzakhala ukutazisa cirungamo. 3 Ukakhala kuti ukutonga mulandu wa munthu wakusauka, leka kumuthandiza kokha thangwe rakuti ngwakusauka.

4 “Ukawona ng’ombe ayai bulu wa nyamadulanthaka wako wasocera, un’funika kumuyendesa kwa mwenekaciro. 5 Ukawona bulu wa munthu omwe umbawengana naye wagwa pantsi thangwe ra kulemedwa na mitolo, leka kuyenda ucisaya kumuthandiza. Un’funika kumuthandiza kutsudzula buluyo.

6 “Pakutonga munthu wakusauka omwe ambakhala pakati panu, leka kumutonga mwakusaya cirungamo.

7 “Leka kubverana na wanthu omwe akunamizira mulandu anzawo, ndipo leka kupha munthu wakusaya mulandu na wakulungama, thangwe munthu wakuipa nin’dzamuwona lini kuti ngwakulungama*

8 “Leka kubvuma kutambira bobobo, thangwe boboboyo ambapumpsa munthu omwe ambatonga mwanzeru ndipo ambacitisa munthu wakulungama kucinja bzomwe akhafuna kucita pa mulanduyo.

9 “Lekani kuboneresa anyakubwera omwe akukhala pakati panu. Imwepo mukudziwa kuti kukhala mulendo n’ciyani,* thangwe mudakhalambo alendo m’dziko la Edjipito.

10 “Mumbabzale na kubvuna m’minda mwanu kwa magole matanthatu. 11 Tsono mu gole laci 7 lekani kuulima, mumbausiye tenepoyo kuti anyakusauka omwe ali pakati panu ambadye bzomwe bzinimera m’mundamo ndipo bzomwe iwo anisiya bzirombo bza m’thengo bzidyembo. Mumbacite bzimwebzi na minda yanu ya uva na ya maolivera.

12 “Mbaphata basa lako kwa ntsiku 6; pa ntsiku yaci 7 leka kumbaphata basa liri-lentse, kuti ng’ombe yako, bulu wako, mwana wa kapolo wako wacikazi na nyakubwera omwe akukhala pakati panu apumembo.

13 “Muwonesese kuti mukucita bzentse bzomwe ndakuuzanibzi, lekani kumbaguma madzina ya mirungu inango, ndipo madzina yawoyo yan’funika lini kubveka pa mulomo panu.

14 “Mumbandicitire phwando katatu pa gole liri-lentse. 15 Mumbacite phwando la pau zakusaya fermento. Mumbadye pau zakusaya fermento kwa ntsiku 7 pa nthawe yace yakuikhidwiratu, m’mwezi wa Abibe, ninga momwe ndidakuuzirani, thangwe umweyu ni mwezi omwe mudacoka m’dziko la Edjipito ndipo palibe munthu omwe an’funika kubwera kudzawonekera kwa ine cimanja-manja. 16 Mumbacite Phwando Lakubvuna* bzisapo bzakuyamba bza basa lanu lakubzala m’minda ndipo kuphampha kwa gole mumbacitembo Phwando Lakumaliza Kubvuna* bzinthu bza m’munda mwanu. 17 Amuna wentse pakati panu an’funika kumbawonekera pamaso pa Mbuya wacadidi Yahova katatu pa gole.

18 “Mukapereka mulopa wa ntsembe yangu, lekani kumbaupereka pabodzi na cinthu ciri-centse comwe cina fermento, ndipo ntsembe za mafuta zomwe mwazipereka m’maphwando yangu lekani kumbazigonesa mpaka mangwana.

19 “Un’funika kumbayendesa ku nyumba ya Yahova Mulungu wako bzinthu bzabwino kwene-kwene bzakuyambirira kukhuma bza m’munda mwako.

“Leka kuphika ntcere mu mkaka wa mai wace.

20 “Nin’kutumizirani anjo patsogolo panu kuti akukhotcerereni mu njira nakuti akakupitiseni m’dziko lomwe ndakukonzerani. 21 Mumbamubvere na kucita bzomwe an’lewa, lekani kumupandukira thangwe an’dzalekerera lini bzakuphonya bzanu, pakuti dzina langu liri mwa iye. 22 Tsono mukabveradi mafala yace na kucita bzentse bzomwe an’dzakuuzani, nin’dzakhala nyamadulanthaka wa anyamadulanthaka wanu ndipo nin’dzaboneresa omwe an’dzakuboneresani. 23 Thangwe anjo wangu an’dzakutsogolerani, acikakupitisani m’dziko la Aamori, Ahiti, Aperizi, Akanani, Ahivi na Ajebusi, ndipo ine nin’dzawapfudza. 24 Lekani kudzagodamira mirungu yawo ayai kupumpsika kudzaitumikira, ndipo lekani kukatewezera bzomwe iwo ambacita. M’mbuto mwace, dzapfudzeni bzifanikiso bzawobzo pabodzi na mapilare yawo yakupambulika. 25 Mutumikire Yahova Mulungu wanu ndipo iye an’dzakusimbani na cakudya pabodzi na madzi. Inepano nin’dzacosa matenda pakati panu. 26 M’dziko lanu mun’dzagumanika lini mkazi omwe an’dzabereka mwana wakufa, ayai kukhala wakusaya kubereka, ndipo nin’dzacitisa kuti mukhale na moyo magole mazinji.

27 “Imwepo mukanati kufika, nin’dzacitisa kuti andigope. Nin’dzaviringiza wanthu wentse omwe an’dzafuna kumenyana namwe ndipo nin’dzacitisa kuti mukunde anyamadulanthaka wanu acithawa.* 28 Nin’dzacitisa wanthuwo kubva mantha imwepo mukanati kufika ndipo Ahivi, Akanani na Ahiti an’dzathawiratu pamaso panu. 29 Nin’dzawathotha lini wentsenewo kwa gole libodzi basi, kugopera kuti dzikolo lingadzakhale lakusaya wanthu, ndipo bzirombo bza m’thengo bzingadzawande bzicidzakudyani. 30 Nin’dzawathotha pamaso panu pang’ono-pang’ono mpaka imwepo kudzakhala azinji mucidzatenga dzikolo.

31 “Dziko lomwe nin’dzakupasani lin’dzayambira ku Nyanza Ifuira mpaka ku nyanza ya Afilisteu, ndipo lin’dzayambirambo ku dambo mpaka ku Mkulo,* pakuti nin’dzapereka wanthu wakukhala m’dzikolo m’manja mwanu ndipo imwepo mun’dzawathamangisa pamaso panu. 32 Lekani kucita nawo mpangano ayai kupicira kunamata mirungu yawo. 33 Iwo aleke kukhala m’dziko lanu, kuti aleke kudzakucitisani kuti mundiphonyere. Mukadzatumikira mirungu yawo, kulewa cadidi lin’dzakhala diwa kwa imwepo.”