Lakuyenda kwa Djuda
1 Ine Djuda, m’bale wace wa Tiyago, kapolo wa Jezu Kristu, ndikunembera anyakucemeredwa omwe ambafunidwa na Mulungu Baba wathu, omwe adatsonkhanisidwa kuti adzakhale na Jezu Kristu:
2 Nimbapemba kuti Mulungu athumizire ntsisi zace, mtendere na lufoyi lace kwa imwepo.
3 Abale wangu wakufunidwa, napo ndikhacita nyongo ikulu kuti ndikunembereni bza cipulumuso comwe tentsenefe tinaco, ndawona kuti bziri bwino kukulimbikisani kuti mumenye nkhondo ikulu ya cikhulupiro comwe cidaperekedwa kabodzi kokha kwa anyakucena mpaka kale-kale. 4 Ndikukunemberani thangwe rakuti pana wanthu winango, omwe apita pakati panu mwakabise-bise, omwe akhadalewedweratu m’Bzinembo kuti an’dzatambira cirango cimweci; iwo ni wanthu wakuipa, omwe ambawona kudeka mtima kukulu kwa Mulungu wathu ninga thangwe lakucitira bzinthu bzakupasa manyazi,* ndipo iwo akhala wakusaya kukhulupirika kwa Mbuya wathu Jezu Kristu.
5 Napo mukudziwa kale bzentsenebzi, nin’funa kukukumbusani kuti Yahova adapulumusa wanthu wace mwakuwacosa m’dziko la Edjipito, ndipo patsogolo pace, adadzapha wale omwe alibe kulatiza cikhulupiro. 6 Ndipo anjo omwe alibe kukhala m’mbuto zawo zakuyambirira, omwe adathawa m’mbuto zawo caizo zakukhala, Mulungu adawamanga na makorenti* yakusaya kumala mu mdima wadzawoneni kuti adzawalange pa ntsiku ikulu. 7 Mwa njira ibodzi-bodziyi, wanthu wa mizinda ya Sodoma na Gomora pabodzi na mizinda ya pafupi, adapfudzidwa na moto wakusaya kumala thangwe iwo akhacita upombo ayai uputa,* ndipo adatewera bzikhumbo bza thupi mu njira yakusaya kuthemera ndipo iwo ni cenjezo kwa ifepano.
8 Napo bziri tenepo, wanthu amwewa nthawe zentse ambakumbuka bzinthu bzakuipa, makhalidwe yomwe yambapswipiza mathupi yawo, ambanyoza atongi na kumbalewa mafala yakunyoza wanthu wakulemekezedwa na Mulungu. 9 Pomwe Migeli, mkulu wa anjo, adapitana makumbukidwe na Dyabu acinesana pakulewa bza thupi la Mozeji, iye alibe kumutonga na mafala yakutukwana, koma adamuuza kuti: “Yahova akulange.” 10 Na tenepo, wanthu amwewa ambanyoza bzinthu bzentse bzomwe ambadziwa lini bwino cadidi cace. Ndipo bzinthu bzentse bzomwe iwo ambabvesesa mwacibadwa ninga momwe bzirombo bzimbacitira, iwo ambapitiriza kubziipisa.
11 Tsoka kwa iwo, thangwe adatewera njira ya Kaini na kutewezera bzicito bzakuphonyeka bza Balamu kuti atambire mabaibai, ndipo iwo adaphedwa thangwe akhalewalewa mwakupanduka ninga Kora! 12 Wanthu amwewa ni minyala mikulu-mikulu yakubisika m’madzi, pomwe akudya namwe pabodzi pa phwando lapaubale; abusa omwe ambabzidyesa okha mwakusaya mantha; mitambo yakusaya nvula yomwe imbatengeka-tengeka na mphepo; miti ya cirimo yomwe imbabala lini bzisapo thangwe rakuti imbakhala yaumiratu* ikazulidwa na mizi yace; 13 wanthu amwewa ali ninga mabimbi yamphanvu ya m’nyanza yomwe yambacosera kunja bzinthu bzakupswipa bzomwe bzimbawacitisa manyazi; ali ninga nyenyezi zakusocera zomwe zakoyedwera mdima wadzawoneni mpaka kale-kale.
14 Inoki munthu waci 7 mu mzere wa Adamu, adaleweratumbo bza iwo pomwe adati: “Onani! Yahova wabwera na bzulu na bzulu bza anjo wace wakucena, 15 kuti apereke cirango kwa wentse na kupasa mulandu wanthu wentse wakusaya kugopa Mulungu thangwe ra bzicito bzawo bzakuipa na bzinthu bzentse bzakuipisisa bzomwe adamulewa.”
16 Wanthu amwewa ambang’ung’udzika, ambadandaula pa bzinthu bzizinji bzomwe anabzo pa moyo, ambacita bzakufuna bzawo, ambalewalewa mwakusamwa ndipo ambatumbiza wanthu kuti agumane phindu.
17 Tsono imwepo abale wangu wakufunidwa, kumbukirani mafala yomwe yadalewedwa kale-kale* na apostolo wa Mbuya wathu Jezu Kristu, 18 omwe akhakuuzani kuti: “Mu ntsiku zakumalizira, kun’dzakhala na wanthu wakunyoza omwe an’dzacita bzakufuna bzawo bzakulatiza kusaya kugopa Mulungu.” 19 Wanthu amwewa ambayambisa magawano, ambacita bzinthu ninga bzirombo ndipo ambatsogoleredwa lini na mzimu wa Mulungu. 20 Tsono imwepo abale wangu wakufunidwa, limbisani cikhulupiro canu cakucena ndipo mbapembani mwa mzimu wakucena, 21 kuti mupitirize kufunidwa na Mulungu, pomwe mukudikhirira ntsisi za Mbuya wathu Jezu Kristu kuti mudzagumane moyo wakusaya kumala. 22 Ndipo pitirizani kulatiza ntsisi kwa wale omwe akupenukira; 23 apulumuseni mwa kuwacosa pa moto. Ndipo pitirizani kubvera ntsisi winango, koma citani bzimwebzo mwatceru kwene-kwene kuti pikado zawo zileke kukutokonyani.* Mbawengani pikado zawozo.
24 Mulungu angakwanise kukukhotcererani kuti muleke kukhukhumudwa na kukucitisani kukhala wakusaya cirema mu ulemerero bwace na cikondweso cikulu. 25 Kwa Mulungu m’bodzi yekhayo, Mpulumusi wathu mwa Jezu Mbuya wathu kukhale na ulemerero, ulemu, mphanvu na utongi kuyambira kale-kale, tsapano mpaka kuyenda na kuyenda. Ameni.