Ya m’Bukhu la Luka

11 Tsapano, Jezu akhapemba pa mbuto inango. Pomwe adamaliza kupembako, m’bodzi wa anyakupfunza wace adamuuza kuti: “Mbuya, tipfunziseni kupemba ninga momwe Juwau adapfunzisira anyakupfunza wace.”

2 Tenepo, iye adawauza kuti: “Pakupemba, mbalewani kuti: ‘Baba, dzina lanu licenesedwe.* Umambo bwanu bubwere. 3 Tipaseni cakudya cathu ca lero mwakubverana na bzakufunikira pa moyo wathu wa ntsiku na ntsiku. 4 Tilekerereni pikado zathu, pakuti ifepano timbalekererambo ali-wentse omwe anafe mangawa;* ndipo lekani kulekerera kuti tiyezedwe.’”

5 Patsogolo pace, iye adawauza kuti: “Tiyezezere kuti m’bodzi wa imwepo ana xamwali wace, ndipo wayenda kwa iye pakati pa usiku acikamuuza kuti: ‘Xamwali, ndikumbizembo pau zitatu, 6 thangwe mwanzangu wafika kumui kwangu kucokera pa ulendo, ndipo ndiribe cakumupasa.’ 7 Tsono omwe ali m’nyumbayo mkumutawira kuti: ‘Leka kundinesa. Ndafunga kale msuwo, ndipo ine na wana wangu tagona kale. Ningamuke lini kuti ndidzakupase ciri-centse.’ 8 Ndikukuuzani kuti, iye an’dzamuka acimupasa bzomwe akufunabzo, sikuti thangwe ni xamwali wace, koma thangwe ra kungingimira kwace. 9 Tenepo, ndikukuuzani kuti: Pitirizani kukumbira, ndipo mun’dzapasidwa, pitirizani kunyang’ana, ndipo mun’dzagumana, pitirizani kugogodza, ndipo mun’dzafunguliridwa. 10 Pakuti munthu ali-wentse omwe an’kumbira an’dzapasidwa, ali-wentse omwe aninyang’ana an’dzagumana, ndipo ali-wentse omwe an’gogodza an’dzafunguliridwa. 11 Kulewa cadidi, ni pai uponi omwe mwana wace acimukumbira ntsomba, angamupase nyoka m’mbuto mwa ntsombayo? 12 Ayai acimukumbira dzai, angamupase mphiriri?* 13 Tenepo, penu imwepo, napo ndimwe wanthu wakuipa mumbadziwa kupasa bzinthu bzabwino wana wanu, ndiye tani Baba wanu wa kudzulu! Iye an’dzapereka mzimu wakucena kwa wale omwe ambamukumbira.”

14 Patsogolo pace, iye adacosa dimonyo omwe akhacitisa munthu kukhala bewewe. Pomwe dimonyoyo adacosedwa, munthuyo adayamba kulewalewa ndipo thimu la wanthu lidadabwa kwene-kwene. 15 Tsono winango akhambalewa kuti: “Umweyu ambacosa bziwanda na mphanvu ya Belezebu,* omwe ni mtongi wa bziwandabzo.” 16 Ndipo winango pakufuna kumuyeza, adayamba kumukumbira kuti awalatize cizindikiro cakucokera kudzulu. 17 Pakudziwa bzomwe akhakumbuka, iye adawauza kuti: “Umambo buli-bwentse bukagawanika bokha, bumbapfudzika, ndipo nyumba iri-yentse yakugawanika, imbagwa. 18 Mwa njira ibodzi-bodziyi, penu Sathani wagawanika yekha, kodi umambo bwace bungapitirize tani? Pakuti imwepo mukulewa kuti inepano nimbacosa bziwanda na mphanvu ya Belezebu. 19 Penu inepano nimbacosa bziwanda na mphanvu ya Belezebu, kodi wana wanu ambayacosa na mphanvu ya yani? Ndipopa iwo an’dzakuyeruzani. 20 Tsono penu inepano nimbacosa bziwanda na cala ca Mulungu, ndiye kuti Umambo bwa Mulungu, bwakufikirani. 21 Munthu wamphanvu akakhala na bzifuzo bzakukwanira acilindira nyumba yace, cuma cace cimbakhotcerereka. 22 Tsono munthu wamphanvu kuposa iye akabwera kudzamukunda, ambamutengera bzifuzo bzace bzentse bzomwe akhathemba, ndipo bzentse bzomwe ambamutengerabzo ambagawana na winango. 23 Ali-wentse omwe ali lini kumbali yangu, ni nyamadulanthaka wangu, ndipo ali-wentse omwe an’phata lini nande basa lakuthandiza wanthu kubwera kwa ine, ambawamwaza.

24 “Mzimu wakuipa ukacoka mwa munthu, umbayenda ku mbuto zakuuma kuti ukanyang’ane mbuto yakupumira, koma umbakaigumana lini. Tenepo umbati: ‘Nin’bwerera kumui komwe ndidacoka kule.’ 25 Ndipo ukafika, umbagumana kuti m’nyumbamo mudapsairidwa ndipo mudakonzedwambo bwino. 26 Tenepo, umbayenda kukatenga mizimu inango inomwe yakuipa kwene-kwene kuposa iye, ndipo ikapita mkati mwa munthu, imbakhala m’mwemo; ndipo bzakucita bza munthuyo bzimbaipiratu kuposa momwe akhaliri pakuyamba.”

27 Pomwe akhalewa mafala yamweya, mkazi munango omwe akhali pakati pa thimulo adakuwa aciti: “Wakusimbidwa ni mkazi omwe mimba yace idakunyamulani na ule omwe mudamama masuku yace!” 28 Tsono iye adati: “Ne. M’mbuto mwace, wakusimbidwa ngule omwe ambabva mafala ya Mulungu aciyakoya!”

29 Pomwe thimu la wanthu likhathumizirika, iye adayamba kulewa kuti: “M’badwo uyu ngwakuipa ndipo ukufunisisa kuwona cizindikiro. Tsono un’dzapasidwa lini cizindikiro ciri-centse, koma cizindikiro ca Djona cokha basi. 30 Ninga momwe Djona adakhalira cizindikiro kwa wanthu wa ku Ninive, Mwana wa munthu an’dzakhalambo cizindikiro kwa m’badwoyu. 31 Mambo wacikazi* wa ku Suli an’dzalamusidwa kwa anyakufa pabodzi na m’badwo uyu pa Ntsiku ya Kutongedwa. Ndipo iye an’dzalatiza kuti m’badwoyu una mulandu, thangwe iye adacoka kutali kwene-kwene kuti adzabve nzeru za Salomau. Tsono onani! Munthu mkulu kuposa Salomau ali pano. 32 Wanthu wa ku Ninive an’dzalamusidwa pabodzi na m’badwo uyu pa Ntsiku ya Kutongedwa, ndipo iwo an’dzalatiza kuti m’badwoyu una mulandu, thangwe wanthu wa ku Ninivewo adakungula pomwe Djona adawapalizira. Tsono onani! Munthu mkulu kuposa Djona ali pano. 33 Pambuyo pa munthu kugasa kandiyero, ambaiikha lini pa mbuto yakubisika ayai ambaigwanankhira lini na citundu,* koma ambaiikha pa mbuto yakuikhira kandiyero, kuti omwe an’pita awone ceza. 34 Ceza ca thupi ni diso. Penu diso lako lininyang’anisisa pa cinthu cibodzi, thupi lako lentse lin’dzakhala na ceza;* tsono penu diso lako ndanjiru,* thupi lako lentse lin’dzakhala na mdima. 35 Na tenepo, khalani tceru kuti ceza comwe munaco cileke kukhala mdima. 36 Tenepo, thupi lako lentse likakhala na ceza, licisaya kukhala na mbali iri-yentse ya mdima, thupi lentsero lin’dzagaka kwene-kwene ninga ceza ca kandiyero ikakhala ikugaka.”

37 Pomwe adalewa mafala yamweya, Mfarizeu munango adamukumbira kuti akadye naye pabodzi. Tenepo iye adayendadi kukadya. 38 Tsono Mfarizeuyo adadabwa kuwona Jezu akudya ne kusamba m’manja. 39 Tsono Mbuya adati: “Imwe Afarizeu, mumbatsuka kunja kwa kopo na palato, koma mkati mwa mitima yanu mudadzala na kupamba pabodzi na bzakuipa. 40 Imwe wanthu wakusaya nzeru! Omwe adakonza kunja, ndiye adakonzambo mkati, ndibzo lini? 41 Tsono, perekani bzomwe bziri mkati mwanu ninga mphaso za ntsisi, ndipo mukacita bzimwebzo, mun’dzakhala wakucena pa bzinthu bzentse. 42 Tsoka kwa imwe Afarizeu thangwe mumbapereka cakhumi ca tumbeu twa menta,* aruda* na masamba yanango yentse ya m’dimba, koma mumbanyoza cirungamo na lufoyi la Mulungu. N’cadidi kuti imwepo mukhafunika kucita bzinthu bzimwebzi, mucisaya kunyozera bzinthu bzinangobzi. 43 Tsoka kwa imwe Afarizeu, thangwe mumbafuna kukhala m’mipando yakutsogolo m’nyumba zakunamatira,* na kumusidwa na wanthu m’misika! 44 Tsoka kwa imwe, thangwe muli ninga nthutu zakusaya kuwoneka* zomwe wanthu ambafamba padzaulu pace mwakusaya kudziwa!”

45 Pakutawira, mdziwi munango wa Malamulo adati: “Mpfunzisi, mafala mukulewaya, mukutukwanambo na ifepano kubodzi.” 46 Patsogolo pace Jezu adati: “Tsoka kwa imwe adziwi wa Malamulo, thangwe imwepo mumbasenzesa wanthu mitolo yakulemera kwene-kwene, tsono imwepo mumbaikhuya lini, ne na cala cokha.

47 “Tsoka kwa imwe, thangwe mumbakonza nthutu za apolofeta, koma makolo yanu yakale ndiyo yadawapha! 48 Mwakusaya kupenukira, imwepo ndimwe mboni pa bzomwe makolo yanu yakaleyo yadacita. Imwepo mukubverana na bzomwe iwo adacita, thangwe iwo adapha apolofeta ndipo imwepo mukukonza nthutu za apolofetawo. 49 Ndipopa Mulungu adalatiza nzeru zace mwa kulewa kuti: ‘Nin’dzawatumizira apolofeta na apostolo, koma iwo an’dzawapha na kuzunza winango wa iwo, 50 kuti m’badwo uyu ukhale na mulandu wa mulopa wa apolofeta wentse omwe udacosedwa kuyambira pa ciyambi ca dziko, 51 kuyambira mulopa wa Abeli mpaka mulopa wa Zakariya, omwe adaphedwa pakati pa guwa la ntsembe na templo.’ Inde, ndikukuuzani kuti, wanthu wa m’badwo uyu an’dzakhala na mulandu wa mulopa wa wanthu amwewa.

52 “Tsoka kwa imwe adziwi wa Malamulo, thangwe mumbatengera wanthu bzavi bza cidziwiso. Imwepo mun’funa lini kupita, ndipo mukuletsa wanthu omwe an’funa kupita!”

53 Tenepo, pomwe iye akhacoka kumweko, anembi na Afarizeu adayamba kumubvunza bzinthu bzizinji, 54 na cakulinga cakuti amutape mkamwa.