Ezekiyeli

2 Patsogolo pace iye adandiuza kuti: “Iwe mwana wa munthu,* lamuka kuti ndilewelewe nawe.” 2 Pomwe iye adalewalewa nande, mzimu wa Mulungu udapita mwa ine ucindicitisa kuti ndiime kuti nditetekere Ule omwe akhalewalewa nandeyo.

3 Iye adapitiriza kundiuza kuti: “Iwe mwana wa munthu, nin’kutumiza kwa Ajirayeri, mitundu yakupanduka yomwe idandipandukira. Iwo na makolo yawo ambandipandukira mpaka lero. 4 Ndikukutumiza kwa wana omwe ana makiriyado na omwe ana makani, ndipo ukawauze kuti: ‘Ibzi ni bzomwe Yahova Mbuya Mkululetu walewa.’ 5 Penu an’kabva ayai ne, an’dzadziwa kuti pakati pawo pakhana mprofeta, pakuti iwo ni nyumba yakupanduka.

6 “Tsono iwe mwana wa munthu, leka kuwagopa ndipo leka kucita mantha na mafala yawo, napo wazunguliridwa na minga ndipo ukukhala pakati pa mphiriri.* Leka kugopa mafala yawo, ndipo leka kucita mantha na nkhope zawo, pakuti iwo ni nyumba yakupanduka. 7 Ukawauze mafala yanguya, bziribe basa penu an’kabva ayai ne, pakuti iwo ni wanthu wakupanduka.

8 “Tsono iwe mwana wa munthu, tetekera bzomwe nin’kuuza. Leka kupanduka ninga nyumba yakupandukayi. Fungula mulomo ndipo dyaya bzomwe nin’kupasa.”

9 Pomwe ndidanyang’anisa, ndidawona munthu akundifuthulira boko ndipo bokolo likhadaphatirira mpukutu wakunembedwa.* 10 Iye adandifuthulira mpukutuyo ndipo ukhadanembedwa mbali zentse. Ndipo mafala yomwe yakhadanembedwa mu mpukutuyo, yangadacitisa wanthu kulira na kudandaula.