Jeremiya
20 Pasuri, mwana wa Imeri, omwe akhali wantsembe ndipo akhalimbo mkulu wakunyang’anira nyumba ya Yahova, akhatetekera pomwe Jeremiya akhalewa profesiya ya bzinthu bzimwebzi. 2 Pasuri adamenya mprofeta Jeremiya ndipo adamumangirira pa muti omwe ukhali pa Cipata ca pa Phiri ca Benjamini pa nyumba ya Yahova. 3 Tenepo, mangwana yace pomwe Pasuri adatsudzula Jeremiya pa muti pale, Jeremiyayo adamuuza kuti:
“Yahova wacinja dzina lako lakuti Pasuri ndipo un’cemeredwa kuti Cakupasa Mantha pa Dziko Lentse. 4 Pakuti Yahova walewa kuti: ‘Nin’dzakucitisa kukhala cinthu cakupasa mantha kwa iwepo na kwa axamwali wako wentse. Iwo an’dzaphedwa na xipada na anyamadulanthaka wawo ndipo iwepo un’dzawona bzimwebzo na maso yako. Nin’dzapereka kwa mambo wa ku Babiloniya wanthu wentse wa ku Djuda ndipo iye an’dzawayendesa ku ukapolo ku Babiloniya ndipo an’dzawapha na xipada. 5 Nin’dzapereka m’manja mwa anyamadulanthaka wako cuma centse ca mu mzindayu, bzentse bzomwe anabzo, bzinthu bzawo bzentse bzakufunika kwene-kwene na cuma centse ca amambo wa Djuda. Ndipo iwo an’dzapamba bzinthu bzentsenebzi, an’dzabzitenga kuti bzikhale bzawo ndipo an’dzabzinyamula aciyenda nabzo ku Babiloniya. 6 Tsono pakulewa bza iwepo Pasuri na wentse omwe ambakhala pamui pako, imwepo mun’dzayendesedwa ku ukapolo. Iwepo un’dzayenda ku Babiloniya ucikafera kumweko, ndipo un’dzapendesedwa pabodzi na axamwali wako thangwe ra kuwauza profesiya yakunama.’”
7 Mwandipumpsa, imwe Yahova ndipo inepano ndapumpsika.
Mwakhala wamphanvu kwene-kwene kuposa inepano ndipo mwaganyali.
Ndikundosekedwa ntsiku yentse;
Wentse akundisinjirira.
8 Nthawe zentse ndikambalewalewa, nin’funika kukuwa na kulewa kuti,
“Ciwembo na kupfudzidwa!”
Mafala ya Yahova yakundicitisa kuti nimbatukwanidwe na kunyozedwa ntsiku yentse.
9 Tenepo ndidati: “Ndiniyalewa lini pomwe,
Ine nin’lewa lini pomwe bza dzina lanu.”
Tsono mafala yanu yakhala ninga moto omwe ukugaka mu mtima mwangu,
Omwe udafungiriridwa m’mafupa yangu;
Bzidandinesa kuyabisa ndipo ndiribe kukwanisa kunyamala.
10 Ine ndabva bzinthu bzakuipa bzomwe wanthu azinji akulewa;
Bzinthu bzakugopswa bzandizungulira.
“Mulewereni, mbatiyendeni tikamulewere.”
Munthu ali-wentse omwe akhandifunira bzabwino, akhadikhirira kuti ndicite cinthu cakuipa mwa kulewa kuti:
“Pinango iye angapumpsike acicita cinthu cakuipa,
Ndipo ife tingamukunde ticimubwezera bzinthu bzakuipa bzomwe wacitabzo.”
11 Tsono Yahova akhanande ninga mcikunda wakugopswa.
Ndipopa anyakunditewera m’mbuyo an’dzakhukhumudwa ndipo an’dzakunda lini.
Pakuti bzinthu bzin’dzawafambira lini bwino, iwo an’dzabva manyazi kwene-kwene.
Kunyozedwa kwawo kun’dzakhala mpaka kale-kale ndipo kun’dzayebweka lini.
12 Tsono imwe Yahova wa anyankhondo, mumbafufudza munthu wakulungama,
Imwepo mumbawona mitima ya wanthu na makumbukidwe* yawo ya mkati.
Ndicitiseni kuti ndiwone pomwe mukuwalanga,
Thangwe mulandu wangu ndausiya m’manja mwanu.
13 Imbirani Yahova! Tumbizani Yahova!
Pakuti iye wapulumusa nyakusauka m’manja mwa wanthu wakuipa.
14 Itembereredwe ntsiku yomwe ndidabadwa!
Ntsiku yomwe mai wangu adandibereka, ileke kusimbidwa!
15 Atembereredwe munthu omwe adayenda kukauza pai wangu kuti:
“Mwana wanu wabadwa, iye ni mwamuna!”
Acicitisa paiyo kukondwa kwene-kwene.
16 Munthu umweyo akhale ninga mizinda yomwe Yahova waipfudza mwakusaya ntsisi.
Iye abve kulira kwa wanthu kumacibese, ndipo kumasikati abve ciwowo ca nkhondo.
17 Thangwe ranyi iye alibe kundipha m’mimba mwa mai wangu,
Kuti m’mimba mwa mai wangumo mukhale thenje langu
Nakuti iwo akhale na pathupi mpaka kale-kale?
18 Thangwe ranyi ndidabadwa?
Kodi ndidabadwa kuti ndidzawone mabvuto na kusunama,
Kuti ntsiku za moyo wangu zimale mwakupasa manyazi?