Genesesi

29 Patsogolo pace, Djakobo adapitiriza ulendo bwace ndipo adayenda ku dziko la wanthu wa Kumabvadzuwa. 2 Pomwe adafika pa mbuto inango, iye adawona mcera ndipo pafupi na mcerayo pakhadagona mathimu matatu ya mabira, thangwe ni pomwe wanthu akhambamwesera bzifuwo bzawo. Mcerayo ukhadafunga na cimwala cikulu. 3 Mabira yentse yakafika pambutopo, amakabusa akhambakunkhuliza cimwalaco ndipo akhambatunga madzi kuti mabirayo yamwe. Patsogolo pace iwo akhambakunkhuliza pomwe cimwalaco acifunga mcerayo.

4 Tenepo Djakobo adawabvunza kuti: “Abale wangu, kodi ndimwe wakuponi?” Iwo adamutawira kuti: “Ndife wa ku Harani.” 5 Iye adawabvunza pomwe kuti: “Kodi mumbamudziwambo Labani mzukulu wa Nawori?” Iwo adamutawira kuti: “Inde, timbamudziwa.” 6 Ndipo adawabvunza pomwe kuti: “Kodi iye ali bwino?” Iwo adamutawira kuti: “Inde, ali bwino. Ndipo ule omwe akubwera na mabira pale ule ni mwana wace Rakeli.” 7 Patsogolo pace iye adati: “Ikali midiya ndipo nthawe yakufungira bzifuwo ikanati kukwana. Bzipaseni madzi ndipo mukamala muyende kukabzidyesa.” 8 Tsono iwo adamutawira kuti: “Timbabvumizidwa lini kucita bzimwebzo mpaka mathimu yentse ya mabira yafike. Patsogolo pace, timbakunkhuliza cimwala ca pamceraci ticimwesa mabira yathu.”

9 Pomwe iye akhalewalewa nawo, Rakeli adafika na mabira ya pai wace, pakuti iye akhali makabusa. 10 Pomwe Djakobo adawona Rakeli, mwana wa Labani nkhoswe ya mai wace akubwera na mabira ya Labaniyo, iye adayenda mwakamfulumize pa mcera pale, acikakunkhuliza cimwala comwe cikhafunga mcerayo ndipo adatunga madzi acipasa mabira ya Labani nkhoswe ya mai wace. 11 Patsogolo pace Djakobo adampsompsona Rakeli, aciyamba kulira mwakukuwa. 12 Ndipo Djakobo adayamba kuuza Rakeli kuti iye akhali wadzinza* wa pai wace, mwana wa Rabeka. Tenepo Rakeliyo adathamanga acikauza pai wace bzimwebzo.

13 Pomwe Labani adandobva bza Djakobo mwana wa mpfumakazi yace, iye adathamanga kuti akagumane naye. Iye adamukumbatira acimumpsompsona ndipo adayenda naye kumui kwace. Tenepo Djakobo adayamba kuuza Labani bzentse bzomwe bzikhadacitikabzo. 14 Labani adamuuza kuti: “Iwepo ndiwedi m’bale wangu caiye.”* Tenepo Djakobo adakhala pamui pacepo mwezi wentse.

15 Labani adauza Djakobo kuti: “Iwepo ungandiphatire lini basa fovolo thangwe rakuti ndiwe wadzinza* wangu. Ndiuze, kodi un’funa kuti nimbakupagali ciyani?” 16 Labani akhana wana awiri wacikazi. Mkulu akhali Leya ndipo mng’ono akhali Rakeli. 17 Tsono Rakeli akhadadeka kwene-kwene kuposa mkulu wace Leya. 18 Djakobo akhafuna Rakeli. Tenepo adati: “Ndine wakukonzeka kukuphatirani basa magole 7 kuti mundipase mwana wanu mng’ono Rakeli.” 19 Tenepo Labani adamutawira kuti: “Bziri bwino kum’pereka kwa iwepo kuposa kum’pereka kwa mwamuna munango. Tenepo pitiriza kukhala nande.” 20 Djakobo adaphata basa magole 7 kuti alowole Rakeli, tsono iye adandoyawona ninga ntsiku zing’ono-ng’ono thangwe akhamufuna kwene-kwene mkaziyo.

21 Patsogolo pace Djakobo adauza Labani kuti: “Ndipaseni mwana wanu Rakeli kuti ndimulowole* pakuti nthawe yomwe tikhadapangana yamala.” 22 Na tenepo Labani adatsonkhanisa wanthu wentse wakumweko acicita phwando. 23 Tsono usiku, Labani adatenga mwana wace Leya acikam’pereka kwa Djakobo kuti agone naye. 24 Labani adatengambo nyabasa wace wacikazi Zilpa, acipasa mwana wace Leya kuti akhale nyabasa wace. 25 Pomwe kudacena, Djakobo adawona kuti akhali Leya. Tenepo iye adabvunza Labani kuti: “Thangwe ranyi mwandicitira bzimwebzi? Kodi ndiribe kukuphatirani basa kuti mundipase Rakeli? Thangwe ranyi mwandinamiza?” 26 Tenepo Labani adamutawira kuti: “Ni mwambo lini wathu kuno kulowoza mng’ono mkulu akanati kulowodwa. 27 Kondwa na mkaziyu sumana yentse ino. Patsogolo pace nin’dzakupasa mkazi munangoyu, tsono un’dzandiphatira pomwe basa magole manomwe.” 28 Tenepo Djakobo adakondwadi na Leya sumana yentseneyo kusekerera malowozi yace. Patsogolo pace Labani adadzamupasambo Rakeli kuti akhale mkazi wace. 29 Kuthumizira bzimwebzi, Labani adatengambo nyabasa wace wacikazi Bila acipasa mwana wace Rakeli kuti akhale nyabasa wace.

30 Djakobo adagona na Rakeli ndipo adafuna kwene-kwene Rakeliyo kuposa Leya. Ndipo adaphatira pomwe basa Labani magole manomwe. 31 Pomwe Yahova adawona kuti Leya akhafunidwa lini* kwene-kwene, adacitisa kuti iye akhale na pathupi.* Tsono Rakeli akhabereka lini. 32 Tenepo Leya adadzakhala na pathupi ndipo adabereka mwana wacimuna acimupasa dzina lakuti Rubeni.* Pakuti adati: “Ni thangwe rakuti Yahova wawona kutsautsika kwangu ndipo tsapano mwamuna wangu ati ayambe kundifuna.” 33 Iye adakhala pomwe na pathupi acibereka mwana wacimuna, ndipo adati: “Ni thangwe rakuti Yahova wanditetekera pakuti ndikhafunidwa lini, tenepo iye wandipasa pomwe mwana munangoyu.” Ndipopa Leya adapasa mwanayo dzina lakuti Simiyoni.* 34 Ndipo iye adakhala pomwe na pathupi acibereka mwana wacimuna, ndipo adati: “Tsapano mwamuna wangu ati andifune thangwe ndam’berekera wana wacimuna atatu.” Ndipopa iye adapasa mwanayo dzina lakuti Levi.* 35 Ndipo iye adakhala pomwe na pathupi acibereka mwana wacimuna, ndipo adati: “Ulendo buno nin’tumbiza Yahova.” Tenepo iye adapasa mwanayo dzina lakuti Djuda.* Kucokera pamwepo iye adaima kubereka.