Jeremiya

7 Yahova adauza Jeremiya kuti: 2 “Ima pacipata ca nyumba ya Yahova ucidziwisa mafala yakuti: ‘Tetekerani mafala ya Yahova, imwe mwentse wa ku Djuda omwe mumbapita na pa bzipata ibzi kuti mugodamire Yahova. 3 Yahova wa anyankhondo omwe ni Mulungu wa Ajirayeri walewa kuti: “Lungamizani njira zanu na bzicito bzanu ndipo ine nin’dzakubvumizani kuti mupitirize kukhala pa mbuto ino. 4 Lekani kukhulupira mafala yakupumpsa ndipo lekani kulewa kuti: ‘Iyi ni* templo ya Yahova, templo ya Yahova, templo ya Yahova!’ 5 Pakuti penu munilungamizadi njira zanu na bzicito bzanu; ndipo penu munikhotcereradi cirungamo pa nkhani ya munthu ali-wentse na mwanzace; 6 mukasaya kuponderera alendo wakucokera ku dziko linango, nkhungwa* na akazi mamsiwa; mukasaya kupha wanthu wakusaya kuphonya m’dziko lino; ndipo mukasaya kutewera mirungu inango bzomwe bzingakubweresereni tsoka; 7 nin’dzakubvumizani kuti mupitirize kukhala m’dziko lino, dziko lomwe ndidapasa makolo yanu yakale kuti yakhale mpaka kale-kale.”’”

8 “Imwepo mumbakhulupira mafala yakupumpsa, tsono bzimwebzi bzin’dzakuthandizani lini ne napang’onopo. 9 Kodi imwepo mungabe, kupha, kucita upombo ayai uputa, kulumbira mwakunama, kupereka ntsembe* kwa Baala na kunamata mirungu yomwe mukhaidziwa lini, 10 ndipo patsogolo pace mucibwera mu nyumbayi yomwe imbadziwika na dzina langu mucilewa kuti: ‘Tin’pulumuka’ napo kuti mukhacita bzinthu bzentse bzakunyantsabzi? 11 Kodi nyumba yakudziwika na dzina languyi mumbaiwona ninga mbuto yakuthawira mbava? Dziwani kuti inepano ndikuwona bzimwebzi,” walewa tenepo Yahova.

12 “‘Tenepo, ndokoni pa templo yangu ku Silo, mbuto yakuyamba yomwe ndidacitisa kuti dzina langu likhale, ndipo onani bzomwe ndidacita kumweko thangwe ra uipi bwa wanthu wangu Ajirayeri. 13 Tsono imwepo mwapitiriza kucita bzinthu bzentsenebzi napo kuti inepano ndalewalewa namwe kazinji kentse, ndipo mulibe kundibva. Ine ndikhakucemerani mwakubwereza-bwereza, koma mukhanditawira lini,’ walewa tenepo Yahova. 14 Ndipopa nyumba yomwe imbadziwika na dzina langu, nyumba yomwe imwepo mumbaithemba, mbuto yomwe ndidapasa imwepo pabodzi na makolo yanu yakale, nin’cita nayo bzibodzi-bodzi na bzomwe ndidacita ku Silo. 15 Nin’dzakuthothani pamaso pangu ninga momwe ndidathothera azibale wanu wentse, mbadwe zentse za Efraimu.’

16 “Tsono iwepo, leka kupempherera wanthuwo. Leka kuwalirira, kuwapempherera ne kuwadandaulira, pakuti ine nin’dzakubva lini. 17 Iwepo ukuwona lini bzomwe iwo akucita m’mizinda ya Djuda na m’miseu ya Jeruzalemu? 18 Wana wacimuna akutcola nkhuni, azipai akugasa moto ndipo azikazi akumunya ufa bwakukonzera mabolo kuti apereke ntsembe kwa Mambo-wacikazi wa Kudzulu,* ndipo iwo akuthulula ntsembe ya vinyu kuti andikalipise. 19 ‘Kodi iwo akuboneresa ine? Kodi akubziboneresa lini okha kuti abzipasise manyazi?’ walewa tenepo Yahova. 20 Tenepo Yahova Mbuya Mkululetu walewa kuti: ‘Onani! Ciya cangu na ukali bwangu bzin’dzakhuthulidwa pa mbuto ino, kuna wanthu, bzirombo, miti ya m’thengo na bzisapo bza pa dziko la pantsi; ibzo bzin’dzagaka ndipo bzin’dzathimisiwa lini.’

21 “Yahova wa anyankhondo, Mulungu wa Ajirayeri, walewa kuti: ‘Pitirizani, sanganizani ntsembe zanu zakucita kutentha na ntsembe zinango, ndipo dyani nyama. 22 Pakuti pa ntsiku yomwe ndidacosa makolo yanu yakale mu dziko la Edjipito, ndiribe kuwauza ne kuwapasa lamulo liri-lentse pa nkhani ya ntsembe zakucita kutentha na ntsembe zinango. 23 Tsono lamulo lomwe ndidawapasa ndakuti: “Bverani fala langu, ine nin’dzakhala Mulungu wanu ndipo imwepo mun’dzakhala wanthu wangu. Nthawe zentse mbafambani mu njira yomwe nin’kuuzani, kuti bzinthu bzikufambireni bwino.”’ 24 Koma iwo alibe kubvera ne kutetekera, m’mbuto mwace akhacita bzomwe iwo akhafuna, acipitiriza kutewera mtima wawo wakuipa, iwo akhabwerera m’mbuyo sikuti kuyenda kutsogolo, 25 kucokera pa ntsiku yomwe makolo yawo yakale yadacoka ku Edjipito mpaka lero. Ndipopa ntsiku zentse ndikhawatumizira mwakubwereza-bwereza atumiki wangu wentse omwe ni aprofeta. 26 Tsono iwo alibe kufuna kundibvera ndipo adalamba kunditetekera. M’mbuto mwace adaumisa mitima yawo, acicita bzinthu bzakuipa kwene-kwene kuposa makolo yawo yakale!

27 “Iwepo un’kawauza mafala yentseneya, tsono iwo an’kakutetekera lini; un’kawacemera, koma an’kakutawira lini. 28 Ndipo iwepo un’kawauza kuti: ‘Uyu ni mtundu wa wanthu omwe udalamba kubvera fala la Yahova Mulungu wawo, ne kubvuma malango yace. Iwo asiya kukhala wakukhulupirika ndipo palibe munthu omwe ambalewa bza kukhulupirika pakati pawo.’

29 “Senga tsisi lako ucilitaya, imba nyimbo ya nkhawa m’tumapiri twakusaya mauswa, pakuti Yahova walamba ndipo anisiya m’badwo omwe wamukalipisayu. 30 ‘Pakuti wanthu wa ku Djuda acita bzinthu bzakuipa pamaso pangu. Iwo aikha bzifanikiso bzawo bzakunyantsa m’nyumba yomwe imbadziwika na dzina langu kuti aipswipize,’ walewa tenepo Yahova. 31 ‘Iwo amanga mbuto zapadzulu ku Tofeti, zomwe ziri m’cigwa ca Mwana wa Hinomu* kuti ambatenthere pamoto wana wawo wacimuna na wacikazi, bzinthu bzomwe ndiribe kuwauza kuti acite, ndipo ne ndikhanati kubzikumbukira kale mu mtima mwangu.’*

32 “‘Tenepo, zikufika ntsiku zomwe mbutoyi in’dzacemeredwa lini pomwe kuti Tofeti ayai cigwa ca Mwana wa Hinomu,* koma in’dzacemeredwa kuti Cigwa Cakuphera Wanthu. Iwo an’dzapendesa wanthu wakufa ku Tofeti mpaka kun’dzawoneka lini pomwe mbuto yakuikha wanthu wakufa,’ walewa tenepo Yahova. 33 ‘Ndipo mitembo ya wanthu amwewa in’dzakhala cakudya ca mbalame na bzirombo bza m’thengo ndipo palibe munthu omwe an’dzabzithotha. 34 Nin’dzamalisa baludya la kukomedwa na lakusekerera, fala la namwali wacimuna na fala la namwali wacikazi m’mizinda ya ku Djuda na m’miseu ya ku Jeruzalemu, pakuti dzikoli lin’dzasandusidwa matere.’”