Genesesi
8 Tsono Mulungu adakumbukira Nowa pabodzi na bzirombo bzentse bza m’thengo bzomwe bzikhanaye pabodzi m’cingalawamo, tenepo Mulungu adacitisa cimphepo pa dziko la pantsi ndipo madzi yadayamba kuphwa. 2 Tenepo madzi mazinji ya kudzulu yadafunga ndipo misuwo ya madzi ya kudzuluko idafungambo, ndipo nvula idakata* kudzulu. 3 Tenepo madziyo yadayamba kuphwa pang’ono-pang’ono pa dziko la pantsi. Kuphampha kwa ntsiku 150 madziyo yakhadaphwa kwene-kwene. 4 M’mwezi wacinomwe, pa ntsiku yaci 17 ya mweziyo, cingalawaco cidatsama pa mapiri ya Ararati. 5 Madziyo yadapitiriza kuphwa m’mpaka m’mwezi waci 10. Pa ntsiku yakuyamba ya mwezi wacikhumiyo, ntsonga za mapiri zidayamba kuwonekera.
6 Tenepo pomwe padapita ntsiku 40, Nowa adafungula janera ya cingalawaco. 7 Ndipo iye adatumiza khungubwe, tsono khungubweyo akhambandombuluka acimbabwerera m’cingalawamo mpaka pomwe madzi yadaphwa pa dziko la pantsi.
8 Patsogolo pace, Nowa adatumiza njiwa kuti awone penu madzi yakhadaphwa pa dziko la pantsi. 9 Tsono njiwayo iribe kugumana mbuto iri-yentse kuti imbuthe, tenepo, idabwerera kwa iye m’cingalawamo thangwe madzi yakhanati kuphwa pa dziko lentse la pantsi. Tenepo, iye adacosa boko lace kunja ndipo adaphata njiwayo aciipitisa mkati mwa cingalawamo. 10 Iye adadikhirira pomwe ntsiku zinomwe, ndipo adadzatumiza pomwe njiwa ire kucokera m’cingalawamo. 11 Pomwe njiwayo idabwerera kumaulo, idabweresa tsamba liwisi la muti wa maolivera kumulomo kwace. Tenepo Nowa adadziwa kuti madzi yaphwa pa dziko la pantsi. 12 Iye adadikhira pomwe ntsiku zinomwe. Patsogolo pace, adatumiza njiwa ire tsono iyo iribe kubwerera pomwe kwa iye.
13 Mu gole lomwe Nowa adapfitsa magole 601 yakubadwa, m’mwezi wakuyamba, pa ntsiku yakuyamba ya mweziyo, madzi yakhadaphweratu pa dziko la pantsi; iye adakundula ntsodzi ya cingalawaco ndipo adawona kuti pantsi pakhauma. 14 M’mwezi waciwiri, pa ntsiku yaci 27 ya mweziyo, madzi yakhadaumiratu pa dziko la pantsi.
15 Tenepo Mulungu adauza Nowa kuti: 16 “Bula m’cingalawamo, iwepo, mkazi wako, wana wako na azilowola wako. 17 Ubule pabodzi na bzamoyo bza mtundu uli-wentse, bzakulengedwa bzakumbuluka m’dzaulu, bzirombo na bzakukwawa bzentse bza pa dziko la pantsi kuti bzibalane bziciwanda pa dziko la pantsi.”
18 Tenepo, Nowa adabula pabodzi na wana wace, mkazace na azilowola wace. 19 Ndipo bzamoyo bzentse, bzirombo bzentse bzakukwawa, bzakulengedwa bzentse bzakumbuluka m’dzaulu na bzentse bzomwe bzimbafamba-famba pa dziko la pantsi bzidabulambo m’cingalawamo mwakubverana na mtundu wace. 20 Patsogolo pace, Nowa adamangira Yahova guwa la ntsembe ndipo adatenga bzinango mwa bzirombo bzentse bzakucena na bzinango mwa bzakulengedwa bzentse bzakumbuluka m’dzaulu bzakucena acibzipereka ntsembe yakucita kutentha pa guwa la ntsembero. 21 Ndipo Yahova adayamba kubva mnuntci wabwino* kwene-kwene. Tenepo Yahova adalewa mu mtima mwace kuti: “Nin’dzatemberera lini pomwe mataka thangwe ra bzakucita bza wanthu, pakuti makumbukidwe ya wanthu njakuipa kuyambira ali wana, ndipo nin’dzapha lini pomwe bzamoyo bzentse ninga momwe ndacitiramu. 22 Kuyambira lero mpaka kutsogolo, kubzala mbeu na kubvuna kun’dzamala lini pa dziko la pantsi, ndipo nyengo yakudjedjera na yakupsa, cirimo na mainza, usiku na masikati bzin’dzamala lini.”