Ekisodo

21 “Malamulo yomwe un’funika kuyapereka kwa iwo ngaya:

2 “Ukagula kapolo omwe ni Mhebereu, iye an’dzakuphatira basa ninga kapolo kwa magole 6, tsono m’gole laci 7, iye an’dzatsudzuka mwakusaya kupagali cinthu. 3 Penu iye adabwera yekha, an’dzacokambo yekha, tsono penu adabwera na mkazace, an’dzacokambo na mkazaceyo. 4 Penu mbuya waceyo ndiye omwe adamupasa mkazi ndipo mkaziyo adamuberekera wana, mkaziyo na wanawo an’dzakhala wa mbuya waceyo ndipo iye an’dzacoka yekha. 5 Tsono kapoloyo akangingimira acilewa kuti: ‘Inepano nimbafuna mbuya wangu, mkazi wangu na wana wangu ndipo nin’funa lini kucoka,’* 6 mbuya waceyo an’funika kuyenda naye pamaso pa Mulungu wacadidi. Patsogolo pace, akamutsamirise pa msuwo ayai pa aro ya msuwoyo acimubowola khutu na ntculo,* ndipo iye an’dzakhala kapolo wace kwa moyo wace wentse.

7 “Munthu akagulisa mwana wace wacikazi ninga kapolo, mwana waceyo an’dzacoka lini ninga momwe ambacokera kapolo wacimuna. 8 Penu mbuya waceyo alibe kukomedwa naye, ndipo an’funa lini kuti akhale mkazi wace mng’ono, koma an’funa kumugulisa kwa munthu munango,* mbuya waceyo alibe ufulu bwa kumugulisa kwa wanthu wa mtundu munango, thangwe wamucitira bzinthu mwacinyengo. 9 Penu an’mupereka kwa mwana wace wacimuna, amupase ugo bwentse bomwe bumbaperekedwa kwa mwana wacikazi. 10 Mwamunayo akalowola mkazi munango, iye an’funika kupitiriza kumbapasa mkazi wakuyambayo cakudya, bzakubvala na kumbagona naye ninga mkazi wace.* 11 Tsono mwamunayo akasaya kumucitira bzinthu bzitatubzi, mkaziyo angacoke mwakusaya kupagali kobiri iri-yentse.

12 “Munthu akamenya mwanzace acimupha, iye an’funikambo kuphedwa. 13 Tsono penu alibe kucita utowa bzimwebzi, ndipo Mulungu wacadidi walekerera kuti bzimwebzi bzicitike, nin’dzakusankhulirani mbuto yakuti iye athawire. 14 Munthu akakalipa kwene-kwene na mwanzace acimupha utowa, munthuyo an’funikambo kuphedwa, napo penu wathawira pa guwa langu la ntsembe, mukamucose mucikamupha. 15 Munthu akamenya pai wace ayai mai wace, an’funika kuphedwa.

16 “Munthu akaba munthu mwanzace aciyenda kukamugulisa, ayai akaphatidwa naye an’funika kuphedwa.

17 “Munthu omwe an’temberera* pai wace ayai mai wace an’funika kuphedwa.

18 “Munthu akamenyana na mwanzace, ndipo m’bodzi akamenya mwanzaceyo na mwala ayai na faiti* ndipo mwanzaceyo acileka kufa koma acipwetekeka kwene-kwene mpaka kugona pa kama, mumbacite ibzi: 19 Nyakupwetekedwayo akakwanisa kulamuka acibula panja na mpsimbo, nyakum’pwetekayo an’pasidwa lini nyathwa, koma iye an’funika kum’pagali nthawe yentse yomwe an’phata lini basayo mpaka iye kupola bwino-bwino.

20 “Munthu akamenya kapolo wace wacimuna ayai wacikazi na muti ndipo kapoloyo n’kumufera, munthu umweyo an’funika kupasidwa nyathwa. 21 Tsono penu kapoloyo an’pitiriza kukhala na moyo kwa ntsiku ibodzi ayai ziwiri patsogolo pace n’kufa, mbuya waceyo an’funika lini kupasidwa nyathwa, thangwe kapoloyo adamugula na kobiri zace.

22 “Amuna awiri akamenyana acipweteka mkazi omwe ana pathupi, ndipo mkaziyo n’kubereka pomwe nthawe ikanati kukwana koma pacileka kufa munthu,* ule omwe wapweteka mkaziyo an’funika kupagali kobiri iri-yentse yomwe mwamuna wace wa mkaziyo an’mutcadja, ndipo iye an’funika kupagali kobiriyo pamaso pa anyakutonga mirandu. 23 Tsono pakafa munthu, nyakuphayo an’funikambo kuphedwa, 24 akamupweteka diso, apwetekedwembo diso, akamugulula dzino, agululidwembo dzino, akamutcola boko, atcoledwembo boko, akamutcola mwendo, atcoledwembo mwendo. 25 Ndipo munthu omwe an’tentha mwanzace na moto, kumupweteka ayai kumumenya, munthu umweyo an’funika kucitidwambo bzibodzi-bodzibzo.

26 “Munthu akamenya kapolo wace wacimuna ayai wacikazi pa diso n’kukhala zimola, kapoloyo an’funika kusiidwa kuti ayende ninga pagamento ya diso lace lomwe lapwetekekalo. 27 Ndipo akagulula dzino la kapolo wace wacimuna ayai wacikazi, kapoloyo an’funika kusiidwa kuti ayende, ninga pagamento ya dzino lacero.

28 “Ng’ombe ikasuntha mwamuna ayai mkazi ndipo munthuyo n’kufa, ng’ombeyo iphedwe mwakucita kuthusiridwa minyala ndipo nyama yace in’funika lini kudyedwa; tsono mwenekaciro wa ng’ombeyo an’funika lini kupasidwa nyathwa. 29 Tsono penu ng’ombeyo ikhana kale msambo wakumbasuntha wanthu ndipo mwenekaciroyo akhadacenjezedwa kale koma akhambailekerera ndipo ng’ombeyo n’kupha munthu, iyo in’funika kuphedwa mwakucita kuthusiridwa minyala ndipo mwenekaciro ng’ombeyo an’funikambo kuphedwa. 30 Penu mwenekaciro ng’ombeyo an’kumbiridwa kupereka kobiri kuti alombole moyo wace, iye an’funika kupereka kobiri iri-yentse yomwe an’kumbiridwa kuti alombole moyo waceyo. 31 Penu ng’ombeyo in’suntha mwana wacimuna ayai wacikazi, mwenekaciro ng’ombeyo an’funika kutongedwa mwakubverana na lamulo limweri. 32 Penu ng’ombeyo yasuntha kapolo wacimuna ayai wacikazi, mwenekaciroyo apagali kobiri zakukwana masiklo* 30 kwa mbuya wace wa kapoloyo, ndipo ng’ombeyo iphedwe mwakucita kuthusiridwa minyala.

33 “Munthu akasiya mcera wakusaya kufunga ayai akacera mcera n’kusaya kuugwanankhira, ndipo ng’ombe ayai bulu acigwera m’mwemo, 34 mwenekaciro mcerayo an’funika kupagali ndipo pagamentoyo aipereke kwa mwenekaciro cifuwoco, ndipo cifuwo cakufaco cin’khala cace. 35 Penu ng’ombe ya munthu in’pweteka ayai kupha ng’ombe ya mwanzace, ng’ombe yamoyoyo in’funika kugulisidwa acigawana kobirizo ndipo an’funikambo kugawana ng’ombe yakufayo. 36 Tsono penu ng’ombeyo ikhadziwika kuti ikhana msambo wakumbasuntha zinzace tsono mwenekaciroyo akhambailekerera, iye an’funika kupagalisidwi. Penu yapha ng’ombe inzace, iye an’funikambo kupagali ng’ombe, ndipo ng’ombe yakufayo in’khala yace.