Ekisodo

35 Patsogolo pace Mozeji adatsonkhanisa Ajirayeri wentse aciwauza kuti: “Yahova walewa kuti ticite bzinthu ibzi: 2 Mumbaphate basa kwa ntsiku 6, tsono ntsiku yaci 7, yomwe ni Sabudu, mumbapume ndipo njakupambulika kwa Yahova. Ali-wentse omwe an’phata basa pa ntsiku imweyi an’dzaphedwa. 3 Mun’funika lini kuphatiza moto pa mbuto iri-yentse yomwe mukukhala pa ntsiku ya Sabudu.”

4 Patsogolo pace Mozeji adauza thimu lentse la Ajirayeri kuti: “Yahova walewa kuti: 5 ‘Citani bzakupereka kwa Yahova. Ali-wentse omwe ana mtima wakufunisisa apereke kwa Yahova bzinthu ninga oro, prata na kobre,* 6 usalu bwa azuli, usalu bwa roxo, usalu bufuira kwene-kwene, usalu bwabwino kwene-kwene, ukuse bwa mbuzi, 7 makanda ya bvululume yakupalangiridwa na mtoto ufuira, makanda ya foka,* matabwa ya muti wa mkexa, 8 mafuta yakuikha m’makandiyero, balsamo yakukonzera mafuta yakudzozera na bzakununtcirisa, 9 minyala ya onekisi na minyala inango yakuikha pa efodi na pa cakubvala pankhombe.

10 “‘Wanthu wentse waluso* pakati panu abwere kuti adzakonze bzinthu bzentse bzomwe Yahova wakuuzani. 11 Akonze tabernakulo na tendi lace, cakupswimphirira cace, bzakupanira bzace, aro zace, mbaliro zace, mapilare yace, matsinde yace, 12 thungwa na miti yace yakunyamulira, cakugwanankhirira, kortina, 13 meza na miti yace yakunyamulira pabodzi na bzombo bzace bzentse, pau zakuwonesedwa pamaso pa Mulungu, 14 cakuikhira kandiyero pabodzi na bzombo bzace, makandiyero, mafuta yakuikha m’makandiyeromo, 15 guwa la ntsembe lakutenthera bzakununtcirisa na miti yace yakunyamulira, mafuta yakudzozera na bzakununtcirisa bzace, kortina ya pa msuwo pa tabernakulo, 16 guwa la ntsembe zakucita kutentha pabodzi na gredya yace ya kobre, miti yace yakunyamulira na bzombo bzentse, basiya na cakukhazikira cace, 17 nguwo zakukonzera litsito, mapilare na matsinde yace, kortina ya pa msuwo pa kintale, 18 bzakupanira tabernakulo, bzakupanira litsito na tubzingwe twace, 19 bzakubvala bzakulukidwa bwino bzomwe bzin’dzabvalidwa pakutumikira pa mbuto yakucena, bzakubvala bzakupambulika bza mkulu wa antsembe Aroni na bzakubvala bza wana wace kuti ambabvale pakutumikira ninga antsembe.’”

20 Tenepo Ajirayeri wentse adacoka pamaso pa Mozeji. 21 Ali-wentse omwe akhafunisisa kucita bzakupereka, adabweresa bzakupereka bzace kwa Yahova kuti bziphatisidwe basa pa tendi la mtsonkhano na pa mabasa yentse na kukonzera bzakubvala bzakupambulika. 22 Amuna, akazi na wentse omwe akhafunisisa kucita bzakupereka, adapitiriza kubweresa bzakupereka* bzawo. Iwo adabweresa maphini yakudekesera bzakubvala, mphete za m’makutu, aneli, bzakubzidekesera bzinango na bzinthu bzakusiyana-siyana bza oro. Wentse adapereka bzakupereka bzawo bza oro kwa Yahova. 23 Ndipo wentse omwe akhana usalu bwa azuli, usalu bwa roxo, usalu bufuira kwene-kwene, usalu bwabwino kwene-kwene, ukuse bwa mbuzi, makanda ya bvululume yakupalangiridwa mtoto ufuira na makanda ya foka,* adabzibweresa. 24 Wentse omwe adapereka prata* na kobre* adapereka bzakuperekabzo kwa Yahova, ndipo wentse omwe akhana matabwa ya mkexa adayabweresa kuti yaphatisidwe basa pakumanga tabernakulo.

25 Akazi wentse waluso adaluka bzinthu na manja yawo ndipo adabweresa bzomwe adalukabzo. Iwo adabweresa usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene. 26 Ndipo akazi wentse waluso omwe akhana mtima wakufunisisa adaluka maukuse ya mbuzi.

27 Atsogoleri wa mbumba adabweresa minyala ya onekisi na minyala inango kuti iikhidwe pa efodi na pa cakubvala pankhombe. 28 Adabweresambo balsamo, mafuta yakuikha m’kandiyero, mafuta yakudzozera na bzakununtcirisa. 29 Amuna na akazi wentse omwe akhafunisisa adapereka bzinthu kuti athandizire pa basa lomwe Yahova adauza Mozeji. Ajirayeri adabweresa bzinthu bzimwebzi ninga ntsembe yakucita kufuna yakuperekedwa kwa Yahova.

30 Patsogolo pace Mozeji adauza Ajirayeri kuti: “Onani, Yahova wasankhula Bezaleli mwana wa Uri, mzukulu wa Hur wa m’dzinza la Djuda. 31 Iye wapasidwa mzimu wa Mulungu, kuti akhale wanzeru, wakuzindikira na wakudziwa kucita bzinthu mwaluso pa basa liri-lentse, 32 kuti alinganize kakonzedwe ka bzinthu, kuti aphate basa na oro, prata na kobre, 33 aseme na kugoba minyala na kudziwa kukonza cinthu ciri-centse na matabwa. 34 Ndipo Mulungu waikha luso lakupfunzisa mu mtima mwa Bezaleli na Ooliyabe, mwana wa Ahisamaki wa m’dzinza la Dani. 35 Iye adawapasa luso lakucita basa liri-lentse. Basa la kubordari, lakuluka mwakuphatisa basa usalu bwa azuli, usalu bwa roxo, usalu bufuira kwene-kwene, usalu bwabwino kwene-kwene pabodzi na basa liri-lentse lakuluka. Amuna amwewa an’dzacita basa liri-lentse na kulinganizambo mabasa ya mtundu uli-wentse.