Ya m’Bukhu la Juwau
17 Pomwe Jezu adamala kulewa bzimwebzi, iye adanyang’anisa kudzulu acilewa kuti: “Baba, nthawe yafika, lemekezani mwana wanu kuti iye akulemekezenimbo, 2 ninga momwe mudam’pasira mphanvu yakutonga wanthu wentse, kuti iye apereke moyo wakusaya kumala kwa wentse omwe mudamupasa. 3 Kuti wanthu adzakhale na moyo wakusaya kumala, an’funika kudziwa imwepo Mulungu m’bodzi yekha wacadidi, na Jezu Kristu, ule omwe imwepo mudamutuma. 4 Inepano ndakulemekezani pa dziko la pantsi, ndipo ndamaliza basa lomwe mudandipasa kuti ndicite. 5 Tsapano Baba, ndipaseni ulemerero bomwe ndikhanabo kumbali kwanu pomwe dziko likhanati kulengedwa.
6 “Ndadziwisa dzina lanu kwa wanthu omwe mudandipasa pa dziko. Iwo akhali wanu ndipo imwepo mudawapereka kwa ine, ndipo iwo ambabvera mafala yanu. 7 Tsapano, iwo akudziwa kuti bzinthu bzentse bzomwe mudandipasa bzidacokera kwa imwepo; 8 thangwe inepano ndidawauza mafala yomwe mudandiuza, iwo adayabvuma ndipo adadziwa kuti inepano ndidabwera ninga muimikiri wanu, ndipo iwo adakhulupira kuti ndimwe omwe mudandituma. 9 Tenepo inepano ndikuwakumbirira, ndikukumbirira lini dzikoli, koma wale omwe imwe mudandipasa thangwe iwo ni wanu; 10 ndipo bzinthu bzangu bzentse mpsanu, ndipo bzinthu bzanu mpsangu. Tenepo, ndalemekezeka pamaso pawo.
11 “Inepano ndikucoka m’dzikoli ndipo ndikubwera kwa imwe, tsono iwo akali m’dzikoli. Baba wakucena, anyang’anireni thangwe ra dzina lanu lomwe mudandipasa, kuti iwo akhale wakubverana ninga momwe ifepano tiriri wakubverana. 12 Pomwe ndikhanawo pabodzi, inepano ndikhawanyang’anira thangwe ra dzina lanu lomwe mudandipasa; inepano ndawakhotcerera ndipo palibe ne na m’bodzi wa iwo omwe wataika, kupambula mwana omwe an’dzapfudzidwa, kuti bzikwanisike bzomwe bzidanembedwa. 13 Koma tsapano inepano ndikubwera kwa imwe ndipo ndikulewa bzimwebzi pa dziko, kuti iwo adzale na cikondweso cangu. 14 Inepano ndawapasa fala lanu, tsono dziko limbawawenga, thangwe iwo ambacita lini mbali ya dziko, ninga momwe inepano nimbacitambo lini mbali ya dziko.
15 “Inepano ndikukumbira lini kuti muwacose m’dzikoli, koma muwanyang’anire thangwe ra nyakuipayo. 16 Iwo ambacita lini mbali ya dziko ninga momwe ine nimbacitambo lini mbali ya dziko. 17 Aceneseni na cadidi; fala lanu ni cadidi. 18 Ninga momwe imwepo mudanditumira pa dziko, inembo ndawatuma pa dzikoli. 19 Ndipo inepano ndabzicenesa thangwe ra iwo, kuti iwombo abzicenese na cadidi.
20 “Inepano ndikupempherera lini iwo okha, koma ndikupemphererambo ali-wentse omwe an’ndikhulupira akapfunzisidwa na iwo, 21 kuti wentse akhale wakubverana ninga momwe imwe Baba mudabverana na inepano, ndipo inepano ndidabverana na imwe, kuti iwo akhalembo wakubverana na ifepano, nakuti dziko likhulupire kuti imwepo mudanditumadi. 22 Inepano ndawapasa ulemerero bomwe imwepo mudandipasa, kuti iwo akhale wakubverana ninga momwe ifembo tiriri wakubverana. 23 Inepano ndine wakuphatana na iwo, ndipo imwepo ndimwe wakuphatana na ine, kuti iwo akhale wakuphatana kwene-kwene ndipo dziko lin’dzadziwa kuti ndimwepo omwe mudandituma, nakuti mumbawafuna ninga momwe mumbandifunira. 24 Baba, ndikufuna kuti wale omwe mudandipasa adzakhale nande komwe inepano nin’dzakhala, kuti iwo adzawone ulemerero bomwe mudandipasa, thangwe rakuti mudandifuna pomwe dziko likhanati kulengedwa. 25 Baba wakulungama, kulewa cadidi, dzikoli limbakudziwani lini, tsono inepano nimbakudziwani ndipo awa ambadziwa kuti imwepo mudandituma. 26 Inepano ndawadziwisa dzina lanu, ndipo nin’pitiriza kulidziwisa, kuti lufoyi lomwe mudandifuna nalo likhalembo pa iwo, ndipo inepano ndikhalembo wakubverana nawo.”