Agai

2 Pa ntsiku 21 ya mwezi wacinomwe, Yahova adalewalewa na mpolofeta Agai kuti: 2 “Ndaphata minyendo, kabvunze Zerubabele mwana wa Selatiyeli, governadori wa Djuda, Djoswa mkulu wa antsembe mwana wa Jehozadaki na wanthu winango kuti: 3 ‘Pakati panu, kodi alipo omwe adawona kale ulemerero bwa nyumbayi* pakuyamba? Kodi tsapano mukuiwona tani? Kodi ikali cinthu pakuindendemezera na momwe ikhaliri pakuyamba?’

4 “‘Koma tsapano khwimika Zerubabele, khwimika Djoswa mkulu wa antsembe, mwana wa Jehozadaki,’ walewa tenepo Yahova.

“‘Khwimikani wanthu mwentse wa m’dziko lino ndipo phatani basa,’ walewa tenepo Yahova.

“‘Pakuti inepano ndinamwe,’ walewa tenepo Yahova wa anyankhondo. 5 ‘Kumbukirani bzomwe ndidakulumbirani pomwe mudacoka ku Edjipito, nakuti mzimu wangu un’dzapitiriza kukhala pakati panu.* Tenepo lekani kukhala na mantha.’”

6 “Pakuti Yahova wa anyankhondo walewa kuti: ‘Tsapanopapa nin’dzatekenyesa pomwe kudzulu, dziko la pantsi, nyanza na kunja.’

7 “‘Nin’dzatekenyesa mitundu yentse ya wanthu ndipo bzinthu bzakufunika bza mitundu yentse ya wanthuyo, bzin’dzabwera ndipo nin’dzadzaza nyumbayi na ulemerero,’ walewa tenepo Yahova wa anyankhondo.

8 “‘Prata njangu ndipo oro njangumbo,’ walewa tenepo Yahova wa anyankhondo.

9 “‘Ulemerero bwa nyumbayi bun’dzakhala bukulu kuposa bwa nyumba yakuyamba ire,’ walewa tenepo Yahova wa anyankhondo.

“‘Ndipo nin’dzakhazikisa mtendere pa mbutoyi,’ walewa tenepo Yahova wa anyankhondo.”

10 Pa ntsiku 24 ya mwezi wacipfemba, m’gole laciwiri la utongi bwa Dariyo, Yahova adalewalewa na mpolofeta Agai kuti: 11 “Yahova wa anyankhondo walewa kuti: ‘Bvunza antsembe pakulewa bza lamulo kuti: 12 “Penu munthu wanyamula nyama yakupambulika pa khanza la cakubvala cace, ndipo cakubvalaco cicikhuya pau, msuzi, vinyu, mafuta ayai mtundu uli-wentse wa cakudya, kodi bzinthu bzimwebzo bzingakhale bzakupambulika?”’”

Antsembewo adatawira kuti: “Ne!”

13 Tenepo Agai adabvunza pomwe kuti: “Penu munthu wapswipa thangwe ra kukhuya mtembo acidzakhuyambo cibodzi mwa bzakudyabzi, kodi cakudyaco cingakhale cakupswipa?”

Antsembewo adatawira kuti: “Inde, cingakhale cakupswipa.”

14 Tenepo Agai adalewa kuti: “‘Umu ni momwe wanthuwa aliri, ndipo ni momwe mtundu wa wanthuyu uliri kwa ine na ciri-centse comwe ambapereka ntsembe. Bzentse mpsakupswipa,’ walewa tenepo Yahova.

15 “‘Koma tsapano, ndaphata minyendo, kumbukirani bwino-bwino bzimwebzi kuyambira lero kuyenda kutsogolo. Kumbukirani momwe bzinthu bzikhaliri akanati kuikha mwala padzulu pa mwala unzace mu templo ya Yahova. 16 Kodi bzinthu bzikhali tani? Munthu akayenda pa mudu wa bzinthu bza m’munda, akhadikhira kucosa masakha 20, tsono akhacosa masakha yakukwana 10 basi. Munthu akhayenda pakupsinyira uva, acikumbuka kuti an’cosa mitsuko 50 ya vinyu, tsono akhandocosa 20 basi. 17 Ndidadzonga basa lentse la manja yanu na mphepo yakupsa, mkungwe na matalala, tsono palibe ne na m’bodzi wa imwepo omwe adabwerera kwa ine,’ walewa tenepo Yahova.

18 “‘Ndaphata minyendo, kumbukirani bwino-bwino ibzi, kuyambira lero pa ntsiku 24 ya mwezi wacipfemba, kuyambira pomwe aliserse ya templo ya Yahova idayamba, kumbukirani bwino-bwino ibzi: 19 Kodi cakudya cikalipo m’gwangwa? Kodi miti ya uva, miti ya mkuyu, miti ya romaa* na miti ya maolivera, ikubala bzisapo? Kuyambira lero nin’kusimbani.’”

20 Pa ntsiku 24 ya mweziyo, Yahova adalewalewa pomwe kaciwiri na Agai, acimuuza kuti: 21 “Uza Zerubabele governadori wa Djuda kuti: ‘Nin’tekenyesa kudzulu na dziko la pantsi. 22 Nin’dzapfudza mipando ya umambo ndipo nin’dzapfudzambo mphanvu za maumambo ya wanthu wa mitundu inango, nin’dzapfudza ngolo zawo za nkhondo na anyakukwira pa ngolozo, makavalo yawo na anyakupakira pa makavaloyo an’dzaphedwa. Ali-wentse an’dzaphedwa na xipada ya m’bale wace.’”

23 “‘Pa ntsiku imweyo,’ walewa tenepo Yahova wa anyankhondo, ‘nin’dzaphatisa basa iwepo Zerubabele mtumiki wangu, mwana wa Selatiyeli,’ walewa tenepo Yahova, ‘ndipo nin’dzakucitisa kukhala mphete yakudindira thangwe inepano ndasankhula iwepo,’ walewa tenepo Yahova wa anyankhondo.”