Ekisodo
15 Pa nthawe imweyo Mozeji na Ajirayeri adaimbira Yahova nyimbo iyi:
“Nin’imbira Yahova, thangwe iye watumbizidwa kwene-kwene.
Iye wamiza m’nyanza makavalo na anyakupakira pa makavaloyo.
2 Yahova ni mphanvu yangu, thangwe iye wakhala mpulumusi wangu.
Iye ni Mulungu wangu ndipo inepano nin’dzamutumbiza; iye ni Mulungu wa abereki wangu ndipo inepano nin’dzamupasa ulemerero.
3 Yahova ni mcikunda wamphanvu. Dzina lace ni Yahova.
4 Iye wamiza m’nyanza ngolo za Farawo na anyankhondo wace,
Acikunda wace wakumenya bwino nkhondo amira m’Nyanza Ifuira.
5 Mabimbi ya m’nyanza yawamiza; iwo amira ninga mwala mpaka pantsi.
6 Imwe Yahova, boko lanu lamadidi ndamphanvu kwene-kwene;
Imwe Yahova, boko lanu lamadidi lingagwate-gwate nyamadulanthaka.
7 Mphanvu zanu n’zikulu kwene-kwene ndipo zingagwese wale omwe ambanesana namwe;
Ukali bwanu buli ninga moto ndipo bungawatenthe ninga mauswa.
8 Na mphuwe ya m’mphuno mwace madzi yaphatana;
Madzi yakuyerera yaima ninga nkhomole;
Madzi yamphanvu yaima pakati pa nyanza.
9 Nyamadulanthakayo adati: ‘Nin’dzawatewera ndiciwaphata!
Nin’dzawatengera bzinthu bzawo ndipo nin’dzawatengera bzomwe nin’funa!
Nin’dzasolola xipada yangu! Boko langu lin’dzawapfudza.’
10 Mwawafulizira mphuwe yanu ndipo nyanza yawamiza;
Amira ninga xumbu m’madzi yakuzika.
11 Imwe Yahova, ni Mulungu uponi omwe angandendemerane namwe?
Mbani omwe ngwakucena kwene-kwene ninga imwepo?
Ndimwe wakuthemera kugopedwa na kuimbiridwa nyimbo zacitumbizo, imwe omwe mumbacita bzinthu bzakudabwisa.
12 Mwafuthula boko lanu lamadidi, ndipo dziko la pantsi lawameza.
13 Na lufoyi lanu lacadidi mwatsogolera wanthu omwe mwawalombola;
Na mphanvu zanu mwawatsogolera ku mbuto yanu yakucena yomwe mumbakhala.
14 Wanthu an’dzabva bzimwebzi ndipo an’dzatetemera;
Wanthu wa ku Filistiya an’dzabva mantha.*
15 Pa nthawe imweyo, atsogoleri* wa dzinza la Edomu an’dzabva mantha kwene-kwene,
Atongi wamphanvu wa ku Mowabe an’dzatetemera.
Wanthu wentse wa ku Kanani an’dzasunama.
16 Iwo an’dzabva mantha ndipo an’dzacita thupo.
Thangwe ra mphanvu za boko lanu iwo an’dzakhala ninga mwala
Ndipo an’dzatekenyeka lini mpaka wanthu wanu kupita, imwe Yahova,
Mpaka kupita wanthu omwe imwepo mudawasankhula.
17 Mun’dzawabweresa muciwakhazikisa m’phiri lomwe ni utaka bwanu,
Mbuto yakukhazikika yomwe mwawakonzera kuti mukhale, imwe Yahova.
Mbuto yakucena yomwe manja yanu yadakhazikisa, imwe Yahova.
18 Yahova an’dzatonga ninga mambo mpaka kale-kale.
19 Pomwe makavalo ya Farawo, ngolo zace za nkhondo
Na anyakupakira pa makavaloyo adapita m’nyanza,
Yahova adabweza madzi m’mbuto mwace yaciwamiza,
Tsono wana wa Jirayeri adafamba pa mataka yakuuma pakati pa nyanzayo.”
20 Pamwepo Miriyamu mprofeta wacikazi, omwe akhali mpfumakazi ya Aroni adatenga kang’oma kang’ono m’manja mwace. Iye na akazi wentse adayamba kuimba pabodzi acimbabzina. 21 Miriyamu adapitiriza kuwatawira acimbaimba kuti:
“Imbirani Yahova, pakuti iye watumbizidwa kwene-kwene.
Iye wamiza m’nyanza makavalo na anyakupakira pa makavaloyo.”
22 Patsogolo pace Mozeji adatsogolera Ajirayeri kucoka pa Nyanza Ifuira, aciyenda ku dambo la Suri. Iwo adafamba ntsiku zitatu m’dambomo, koma alibe kugumana madzi. 23 Iwo adafika ku Mara, tsono alibe kukwanisa kumwa madzi ya kumweko thangwe yakhawawa. Ndipopa iwo adapasa mbuto imweyi dzina lakuti Mara. 24 Tenepo wanthu adayamba kudandaulira Mozeji acimbati: “Kodi tinimwa ciyani?” 25 Mozeji adakumbira Yahova kuti amuthandize ndipo Yahova adamulatiza kamuti. Pomwe iye adathusa kamutiko m’madzimo, madziyo yadakhala yabwino.
Iye adawapasa malamulo ndipo adawalatiza bzomwe akhafunikira kucita. Mulungu adacita bzimwebzi kuti awone penu iwo angadamubvera ayai ne. 26 Mulungu adati: “Mukabvera na mtima wentse mafala ya Yahova Mulungu wanu na kucita bzomwe mpsabwino pamaso pace, kubvera malamulo yace na kuyateweza, nin’dzakubwereserani lini matenda yomwe ndidaboneresa nayo Aedjipito, thangwe ine Yahova ndine omwe nin’dzakupozani.”
27 Pomwe iwo adacoka kumweko, adakafika ku Elimu. Kumweko kukhana micera 12 ya madzi na miti 70 ya kanjedza. Kumweko iwo adamanga misasa yawo pafupi na madzi.