Ya m’Bukhu la Juwau
13 Pomwe phwando la Paskwa likhanati kuyamba, Jezu akhadziwiratu kuti ikhadafika nthawe yakuti acoke pa dziko la pantsi aciyenda kwa Baba wace. Pakuti iye akhafuna ateweri wace wa pa dziko la pantsi, iye adapitiriza kuwafuna mpaka kuphampha kwa moyo wace. 2 Pomwe akhalalira, Dyabu akhadaikha kale mu mtima mwa Djuda Sikaliyoti, mwana wa Simau, makumbukidwe yakupereka Jezu. 3 Tenepo, Jezu pakudziwa kuti Baba akhadaikha bzinthu bzentse m’manja mwace, nakuti akhadacokera kwa Mulungu ndipo angadabwerera kwa Mulunguyo, 4 iye adalamuka pa mezapo acicosa cakubvala cace cakunja ndipo adatenga tuwadya, aciimangirira m’nciuno mwace. 5 Patsogolo pace, iye adaikha madzi m’basiya, ndipo adayamba kutsuka minyendo ya anyakupfunza wace, acimbaipukuta na tuwadya yomwe akhadaimangirira m’nciunoyo. 6 Tenepo, iye adafika pomwe pakhana Simau Pedru. Tsono Pedruyo adamubvunza kuti: “Mbuya, imwepo mukufuna kutsuka minyendo yanguyi?” 7 Jezu adamutawira kuti: “Bzomwe ndikucitabzi, iwepo un’bzibvesesa lini tsapanopa koma un’dzabzibvesesa kutsogolo.” 8 Pedru adati: “Kulewa cadidi, imwepo cipo mucitsuka minyendo yanguyi.” Jezu adamuuza kuti: “Ndikasaya kutsuka minyendo yako, iwepo uli lini ku mbali yangu.” 9 Simau Pedru adati kwa iye: “Mbuya lekani kundotsuka minyendo yangu yokha, koma tsukanimbo manja yangu pabodzi na msolo wangu.” 10 Jezu adamuuza kuti: “Ali-wentse omwe wasamba m’thupi, ambandofunika kusamba m’minyendo basi thangwe thupi lentse lidacena kale, ndipo imwepo ndimwe wakucena, koma sikuti mwentsenemwe.” 11 Pakuti iye akhadziwa munthu omwe angadadzamupereka ndipopa iye adalewa kuti: “Sikuti mwentsenemwe ndimwe wakucena.”
12 Pomwe adamala kutsuka minyendo yawo, iye adabvala cakubvala cace cakunja acikhala pomwe pa mezapo ndipo adawabvunza kuti: “Kodi mukudziwa thangwe ranyi ndatsuka minyendo yanuyi? 13 Imwepo mumbandicemera ‘Mpfunzisi’ na ‘Mbuya,’ ndipo mumbalewa cadidi, pakuti ndinedi. 14 Tenepo, penu ine Mbuya na Mpfunzisi ndatsuka minyendo yanu, imwepo mun’funikambo kumbatsukana minyendo. 15 Pakuti ine ndakupasani ciratizo kuti mucitembo ndendende ninga momwe ine ndacitiramu. 16 Cadidi ndikukuuzani kuti, nyabasa ni mkulu lini kuposa mbuya wace, ndipo nyakutumidwa ni mkulu lini kuposa nyakumutumayo. 17 Penu imwepo mukudziwa bzimwebzi, ndimwe wakukondwa mukambabzicita. 18 Inepano ndikulewa lini bzimwebzi kwa mwentsenemwe, pakuti ndikudziwa omwe ndawasankhula. Tsono ndalewa bzimwebzi kuti bzinembo bzikwanisike, pakuti bzimbati: ‘Ule omwe akhadya pau yangu adandiphindukira.’* 19 Ndikukuuzani bzimwebzi pomwe bzikanati kucitika, kuti bzikadzacitika imwepo mudzakumbukire kuti cinembo cikhalewa bza inepano. 20 Cadidi ndikukuuzani kuti ali-wentse omwe an’tambira ule omwe inepano ndamutuma, watambirambo inepano ndipo ali-wentse omwe an’tambira inepano, watambirambo Ule omwe adandituma.”
21 Pomwe adamala kulewa bzimwebzi, Jezu adaneseka kwene-kwene mu mtima ndipo adalewa padeca kuti: “Cadidi ndikukuuzani kuti m’bodzi wa imwepo an’dzandipereka.” 22 Anyakupfunzawo adayamba kunyang’anisana ndipo akhadziwa lini kuti ni mbani wa iwo omwe akhalewedwa. 23 M’bodzi wa anyakupfunza omwe Jezu akhamufuna kwene-kwene akhadakhala pafupi* na Jezuyo. 24 Tenepo, Simau Pedru adanyang’anisisa nyakupfunzayo ndipo adati: “Tiuze, kodi umweyu akulewa bza yani?” 25 Tenepo nyakupfunzayo adatsamira pa cifuwa pa Jezu, acimubvunza kuti: “Mbuya, kodi ni mbani?” 26 Jezu adatawira kuti: “Omwe nimusaizira pau yakunyedza ndicim’pasa, ngumweyoletu.” Pomwe adamala kusaiza pauyo adapasa Djuda, mwana wa Simau Sikaliyoti. 27 Pomwe Djuda adatambira pauyo, Sathani adapita mwa iye. Tenepo, Jezu adamuuza kuti: “Bzomwe ukucita, bzicite mwakamfulumize.” 28 Tsono omwe akhadya naye pamezawo alibe kudziwa thangwe ranyi Jezu adalewa mafala yamweya kwa iye. 29 Pakuti Djuda ndiye omwe akhakoya kaxa ya kobiri, winangowo akhakumbuka kuti Jezu akumuuza kuti: “Kagule bzakufunikira pa phwando,” ayai kuti akapase bzinthu anyakusauka. 30 Pomwe Djuda adatambira pauyo, adacokeratu pa nthawe imweyo ndipo bukhali usiku.
31 Pomwe Djuda adabula, Jezu adati: “Tsapano Mwana wa munthu an’lemekezedwa, ndipo Mulungu an’lemekezedwambo thangwe ra Mwanayo. 32 Mulungu caiyeyo an’dzamupasa ulemerero ndipo an’dzacita bzimwebzo mwakamfulumize. 33 Wana wangu wakufunidwa, nin’khala namwe mu kanthawe kakucepa ndipo imwepo mun’dzandinyang’ana tsono ninga momwe ndidauzira Adjuda, tsapano ndikuuzambo imwepo kuti komwe inepano ndikuyenda, imwepo mungakufike lini. 34 Ndikukupasani lamulo lipsa lakuti mumbafunane ninga momwe inepano nimbakufunirani, imwepombo mbafunanani. 35 Na bzimwebzi, wentse an’dzadziwa kuti ndimwe anyakupfunza wangu mukambafunana.”
36 Simau Pedru adamubvunza kuti: “Mbuya, kodi mukuyenda kuponi?” Jezu adamutawira kuti: “Komwe inepano ndikuyenda, iwepo unganditewere lini tsapanopapa, koma un’dzanditewera kutsogoloku.” 37 Pedru adamubvunza pomwe kuti: “Mbuya, thangwe ranyi ningakutewereni lini tsapanopapa komwe mukuyendako? Ndine wakukonzeka kupereka moyo wangu thangwe ra imwepo.” 38 Jezu adamutawira kuti: “Ndiwe wakukonzeka kupereka moyo wako thangwe ra ine? Cadidi ndikukuuza kuti congwe akanati kulira, iwepo un’ndilamba katatu.”