Ya m’Bukhu la Mateu

27 Pomwe kudacena, atsogoleri wa antsembe wentse pabodzi na akulu wa mbumba adatsonkhana pabodzi kuti apangane momwe angadaphera Jezu. 2 Pomwe adamala kumumanga, iwo adakamupereka kwa Pirato, mtongi wa cigawo ca Djudeya.

3 Tsono Djuda, omwe adamupereka ule, pomwe adawona kuti Jezu atongedwa kuti aphedwe, iye adakhumbula ndipo adatenga kobiri 30 za prata* zire, acikazibwezera kwa atsogoleri wa antsembe na akulu, 4 acikawauza kuti: “Ndacita pikado pakupereka munthu wakusaya mulandu.”* Tsono iwo adamutawira kuti: “Tinabzo basa lanyi ife bzimwebzo? Mpsako ibzo!”* 5 Tenepo, iye adathusa kobiri za prata zire mu templo acicoka, ndipo adayenda kukabzimangirira. 6 Tsono atsogoleri wa antsembe adatenga kobiri za pratazo acilewa kuti: “Mpsakubvumizika lini kuikha kobirizi m’mbuto yakukoyera cuma ca mu templo, thangwe zimwezi ni kobiri za mulopa.” 7 Pomwe adamala kucezerana, iwo adatenga kobirizo acikagulira munda wa nyakuumba bzikalango kuti ukhale thenje la wanthu wakucokera ku madziko yanango. 8 Na tenepo, mundayo udacemeredwa Munda wa Mulopa mpaka ntsiku zino. 9 Na bzimwebzi, yadakwanisika mafala ya mpolofeta Jeremiya yakuti: “Iwo adatenga kobiri 30 za prata zire, mtsengwa* yomwe wana winango wa Jirayeri adapangana kuti amugulisire nayo, 10 acikagulira munda wa nyakuumba bzikalango mwakubverana na momwe Yahova adandiuzira.”

11 Jezu akhali pamaso pa Pirato, mtongi wa cigawo, ndipo Piratoyo adamubvunza kuti: “Kodi iwepo ndiwe Mambo* wa Adjuda?” Jezu adatawira kuti: “Imwepo mukulewa kale mwekha.” 12 Tsono pomwe atsogoleri wa antsembe na akulu akhamupasa mulandu, iye alibe kutawira cinthu ciri-centse. 13 Patsogolo pace, Pirato adamubvunza kuti: “Kodi ukubva lini bzinthu bzentse bzomwe akukulewabzi?” 14 Tsono iye adandokhala zii, ndipo alibe kulewa fala na libodziro, tenepo Pirato adadabwa kwene-kwene.

15 Pa phwando liri-lentse la Paskwa, cikhali cizolowezi ca Pirato kutsudzula nyam’kawoko m’bodzi omwe akhasankhulidwa na thimu la wanthu. 16 Tsono pa nthawe imweyi, pakhana nyam’kawoko munango waciwembo, omwe akhadziwika kwene-kwene, ndipo dzina lace akhali Baraba. 17 Tenepo, pomwe akhadatsonkhana pabodzi, Pirato adawabvunza kuti: “Kodi mun’funa kuti ndikutsudzulireni yani, Baraba ayai Jezu wakucemeredwa Kristu?” 18 Pakuti Pirato akhadziwa kuti iwo akhadapereka Jezu thangwe ra njiru. 19 Kuthumizira bzimwebzi, pomwe iye akhadakhala pa mpando wa mphala, mkazi wace adamutumizira mafala yakuti: “Lekani kupitira nkhani ya munthu wakulungamayo, thangwe lero ndabonera kwene-kwene na maloto thangwe ra iye.” 20 Tsono atsogoleri wa antsembe na akulu, adanyengerera wanthuwo kuti asankhule Baraba kuti atsudzulidwe ndipo Jezu aphedwe. 21 Tenepo, Pirato adawabvunza kuti: “Mbani pa awiriwa omwe mun’funa kuti ndikutsudzulireni?” Iwo adati: “Baraba!” 22 Pirato adawabvunza kuti: “Tsono ndicite ciyani na Jezu, wakucemeredwa Kristu?” Wentse adati: “Akamanikidwe pa muti!”* 23 Tsono iye adati: “Thangwe ranyi? Waphonya ciyani munthuyu?” Wanthuwo adathumiziriratu kukuwako acimbati: “Akamanikidwe pa muti!”

24 Pakuwona kuti bzikhathandiza lini, ndipo wanthuwo akhayamba phiringu, Pirato adatenga madzi acisamba m’manja pamaso pa thimu la wanthulo, aciti: “Inepano ndiribe mulandu pa infa ya munthuyu. Mun’dziwa mwekha bzakucita.” 25 Na bzimwebzi wanthu wentsewo adatawira kuti: “Mulandu wa infa yace ukhale wathu pabodzi na wana wathu.”* 26 Tenepo, iye adawatsudzulira Baraba, koma adatonga kuti Jezu akapfumbulidwe ndipo patsogolo pace adamupereka kuti akaphedwe pa muti.

27 Patsogolo pace, acikunda wa Pirato adatenga Jezu aciyenda naye ku nyumba ya mtongi wa cigawo, acikatsonkhanisa mathimu yentse ya acikunda, ndipo iwo adazungulira Jezu. 28 Patsogolo pace, iwo adamukhundula acimubvazika cakubvala cifuira kwene-kwene, 29 ndipo iwo adakonza nkhata ya minga acimubvazika mu msolo, acimuphatisambo mpsimbo ku boko lace lamadidi. Iwo akhambagodama patsogolo pace acimbamunyoza kuti: “Muli tani imwe, Mambo wa Adjuda!” 30 Iwo adamupsipira mata, ndipo adatenga mpsimbo ire aciyamba kumumenya nayo mu msolo. 31 Pomwe adamala kumunyozako, iwo adamukhundula cakubvala cifuira cire acimubvazika bzakubvala bzace bzakunja, ndipo adamutenga aciyenda kukamukhomerera pa muti.

32 Pomwe akhacoka, iwo adagumana na munthu munango wa ku Sirene wakucemeredwa Simau. Iwo adangingimiza munthu umweyo kunyamula muti wakuzunzidwira* wa Jezu. 33 Pomwe iwo adafika pa mbuto yakucemeredwa Gologota yomwe ni mbuto ya Nkhadzi za Misolo, 34 iwo adamupasa vinyu yomwe ikhadasanganizidwa na bzinthu bzakuwawa kuti amwe; tsono pomwe adalawidza iye adalamba kumwako. 35 Pomwe iwo adamukhomerera pa muti, adagawana bzakubvala bzace bzakunja mwakucita vima-vima, 36 ndipo adakhala pamwepo acimbamulindira. 37 Padzaulu pa msolo wace adaikhambo cikwangwali comwe cikhadanemba mulandu omwe akhadanamiziridwa, kuti: “Uyu ni Jezu, Mambo wa Adjuda.”

38 Pamwepo mbava ziwiri zidakhomereredwambo pabodzi na iye, ibodzi ku boko lace lamadidi ndipo inangoyo ku boko lace lamadzere. 39 Ndipo omwe akhagwata na pamwepo akhambamutukwana na kumbakwetedza misolo yawo 40 acimbati: “Iwepo omwe ukhambati ungadagwesa templo, uciimanga pomwe mu ntsiku zitatu, bzipulumuse wekha! Penu ndiwedi mwana wa Mulungu, buluka pa muti wakuzunzidwirapo.” 41 Mwa njira ibodzi-bodziyi, atsogoleri wa antsembe, anembi na akulu, adayambambo kumunyoza acimbati: 42 “Iye adakwanisa kupulumusa winango; koma akutazira kubzipulumusa yekha! Penu iye ni Mambodi wa Jirayeri, mbatimuwoneni penu angabuluke pa muti wakuzunzidwira* pale, ndipo ifepano tinimukhulupira. 43 Iye akhakhulupira Mulungu; musiyeni Mulungu waceyo amupulumuse penu ambamufunadi, pakuti akhambati: ‘Ine ndine Mwana wa Mulungu.’” 44 Ndipo napo mbava zomwe zikhadakhomereredwa naye pabodzi zire, zidayambambo kumunyoza.

45 Kuyambira nthawe 12* za kumasikati, dziko lentse lire lidacita mdima mpaka nthawe zitatu* za kumaulo. 46 Pafupi-fupi nthawe zitatu za kumaulozo, Jezu adakuwa mwamphanvu aciti: “Eli, Eli, lama sabakitani?” kuthandauza kuti: “Mulungu wangu, Mulungu wangu, thangwe ranyi mwandisiya?” 47 Pakubva bzimwebzi, winango omwe akhali pamwepowo adayamba kulewa kuti: “Munthuyu akucemera Eliya.” 48 Pa nthawe imweyoletu m’bodzi wa iwo adathamanga acikatenga thonje,* ndipo adabviika thonjero mu vinyu yakuwawasa, ndipo adaliikha kucimuti acimupasa kuti amwe. 49 Tsono winango akhambati: “Musiyeni! Mbatiwoneni penu Eliyayo an’bwera kudzamupulumusa.” 50 Jezu adakuwa pomwe mwamphanvu, acifa.*

51 Pa nthawe imweyoletu, cinguwo comwe cikhagawa templo cidang’ambika kati na kati, kucokera padzaulu mpaka pantsi, ndipo pantsi padatekenyeka, minyala icipsweka. 52 Nthutu zidafunguka ndipo mitembo izinji ya anyakucena omwe akhadagona mu infa idabula kunja 53 ndipo wanthu azinji adaiwona. (Pambuyo pa kulamusidwa, wanthu winango wakucokera ku thenje adapita mu mzinda wakucena). 54 Tsono pomwe mkulu wa acikunda pabodzi na omwe akhanaye pakumulindira Jezu adawona citeketeke na bzentse bzomwe bzikhacitikabzo, iwo adabva mantha kwene-kwene, acilewa kuti: “Kulewa cadidi, umweyu akhalidi Mwana wa Mulungu.”

55 Ndipo akazi azinji akhambawona bzomwe bzikhacitikabzo na patali. Iwo akhaperekeza Jezu kucokera ku Galileya kuti ambamutumikire; 56 Pakati pawo pakhana Mariya Madalena, Mariya mai wace wa Tiyago na Djose, pabodzi na mai wace wa Tiyago na Juwau, omwe akhali mkazi wa Zebedeu.*

57 Kumaulo kwace, kudafika mwamuna munango wakudala wa ku Arimateya wakucemeredwa Zuze, omwe akhadadzakhalambo nyakupfunza wa Jezu. 58 Iye adayenda kwa Pirato kukakumbira mtembo wa Jezu. Ndipo Piratoyo adatonga kuti apasidwe mtemboyo. 59 Zuze adatenga mtemboyo, aciukulungira na nguwo icena yabwino kwene-kwene, 60 ndipo adakamuikha mu nthutu yace ipsa yomwe akhadagobesa pa mwala. Patsogolo pace, adakunkhuliza cimwala cikulu, acifunga pa msuwo wa nthutuyo, ndipo iye adayenda. 61 Tsono Mariya Madalena na Mariya munango adasala kumweko ndipo akhadakhala pafupi na thenjero.

62 Bzimwebzi bzidacitika pa ntsiku yomwe akhakonzekera Ntsiku ya Sabudu. Mangwana yace, atsogoleri wa antsembe na Afarizeu adatsonkhana pabodzi kwa Pirato, 63 acimuuza kuti: “Mbuya, ifepano tikukumbukira kuti pomwe nyakunama ule akhana moyo, adalewa kuti: ‘Pakadzapita ntsiku zitatu nin’dzalamusidwa.’ 64 Tenepo, tongani kuti pa thenje lace palindiridwe mpaka pa ntsiku yacitatu, kuti anyakupfunza wace aleke kudzamuba acimbauza wanthu kuti: ‘Iye walamusidwa kwa anyakufa!’ Thangwe kunama kwakumaliziraku kungakhale kwakuipiratu kuposa kwakuyamba kule.” 65 Pirato adawatawira kuti: “Imwepo munawo alindiri. Atengeni kuti akalindire thenjero ninga momwe mungakwanisire.” 66 Tenepo iwo adakafunga bwino-bwino pa thenjepo na mwalayo, aciikhambo alindiri.