Ekisodo

20 Patsogolo pace Mulungu adalewa mafala yentseneya kuti:

2 “Ine ndine Yahova Mulungu wako, omwe ndidakucosa m’dziko la Edjipito, nyumba ya ukapolo. 3 Leka kunamata mirungu inango, koma ine ndekha basi.

4 “Leka kubzikonzera cifanikiso cakusema, ne cinthu ciri-centse cakundendemerana na bzinthu bzomwe bziri kudzulu, bzomwe bziri pantsi pano ayai m’madzi. 5 Leka kubzigodamira ne kupumpsika kuti ubzitumikire, thangwe ine Yahova Mulungu wako, ndine Mulungu omwe nimbafuna kuti wanthu anamate ine ndekha basi. Ndipo nimbapasa nyathwa wana thangwe ra bzakuphonya bza abereki wawo, kufikira m’badwo wacitatu na wacinai kwa wale omwe ambandiwenga. 6 Koma nimbalatiza lufoyi lacadidi kwa mibadwo bzulu na bzulu ya wale omwe ambandifuna na kubvera bzakutonga bzangu.

7 “Leka kuphatisa basa dzina la Yahova Mulungu wako papezi, thangwe Yahova an’dzaleka lini kupasa nyathwa munthu ali-wentse omwe an’phatisa basa dzina lace papezi.

8 “Mbakumbukira kuti ntsiku ya Sabudu ni ntsiku yakupambulika. 9 Umbaphate basa na kucita bzinthu bzako bzentse mu ntsiku zitanthatu. 10 Tsono ntsiku yaci 7, ni Sabudu la Yahova Mulungu wako. Leka kumbaphata basa liri-lentse, kuyambira iwepo, mwana wako wacimuna, mwana wako wacikazi, kapolo wako wacimuna, kapolo wako wacikazi, cifuwo cako ne nyakubwera omwe akukhala m’mizinda mwako.* 11 Pakuti mu ntsiku 6, Yahova adalenga kudzulu, dziko la pantsi, nyanza na bzentse bzomwe bziri m‘mwemo, ndipo pa ntsiku yaci 7 iye adapuma. Ndipopa Yahova adasimba ntsiku ya Sabudu aciicitisa kukhala yakupambulika.

12 “Mbalemekeza mai wako na pai wako kuti ukhale na moyo utali m’dziko lomwe Yahova Mulungu wako akukupasa.

13 “Leka kupha munthu.

14 “Leka kucita upombo ayai uputa.

15 “Leka kuba.

16 “Leka kuperekera mwanzako umboni bwakunama.

17 “Leka kusirira nyumba ya mwanzako. Leka kusirira mkazi wa mwanzako, kapolo wacimuna ayai wacikazi wa mwanzako, ne ng’ombe yace, ne bulu wace ayai cinthu ciri-centse comwe n’ca mwanzako.”

18 Wanthu wentsenewo adabva kugunda, bziphaliwali, kulira kwa nyanga na kuwona utsi m’phirimo. Pakuwona bzimwebzi, iwo adayamba kutetemera na mantha ndipo adaima patali. 19 Ndipopa iwo adauza Mozeji kuti: “Iwepo umbalewelewe nafe ndipo ifepano tin’kutetekera, tsono Mulungu aleke kulewalewa nafe, thangwe tikugopa kuti tingafe.” 20 Tenepo Mozeji adauza wanthuwo kuti: “Lekani kugopa, pakuti Mulungu wacadidi wabwera kwa imwepo kuti adzakuyezeni kuti mupitirize kumugopa nakuti muleke kucita pikado.” 21 Wanthuwo adapitiriza kuima patalipo, tsono Mozeji adafendera pa mtambo upswipa ule, pomwe pakhana Mulungu.

22 Patsogolo pace Yahova adauza Mozeji kuti: “Ukauze Ajirayeri kuti: ‘Imwepo mwawona mwekha kuti inepano ndalewalewa namwe kucokera kudzulu. 23 Lekani kubzikonzera mirungu ya prata* na ya oro kuti muinamate, koma mumbanamate inepano ndekha basi. 24 Iwepo un’funika kundikonzera guwa la ntsembe la mataka. Pamwepo udzapereke ntsembe zakucita kutentha, ntsembe za mbverano,* mabira yako na ng’ombe zako. Ku mbuto iri-yentse yomwe nin’citisa dzina langu kukumbukiridwa, nin’dzabwera kwa iwepo ndicikusimba. 25 Iwepo ukandimangira guwa la ntsembe la minyala, leka kulimanga na minyala yakucita kusema, thangwe ukaphatisa basa tcezo pakusema minyalayo, ungapswipize guwalo. 26 Ndipo leka kumbakwira pa guwa langu la ntsembe na ntsikada, kuti uleke kuwoneredwa.’