Ya m’Bukhu la Mateu
15 Pa nthawe imweyo, padafika Afarizeu na Anembi omwe akhacokera ku Jeruzalemu, ndipo iwo adabvunza Jezu kuti: 2 “Thangwe ranyi anyakupfunza wanuwa ambateweza lini miyambo ya makolo yathu yakale? Mwa ciratizo, iwo ambasamba lini m’manja* akafuna kudya.”
3 Pakuwatawira Jezu adati: “Thangwe ranyi imwepo mumbabvera lini malamulo ya Mulungu thangwe ra miyambo yanu? 4 Mwa ciratizo, Mulungu adalewa kuti: ‘Mbalemekeza pai wako na mai wako,’ ndipo ‘Ali-wentse omwe anilewa kuipa* pai wace ayai mai wace an’funika kuphedwa.’ 5 Tsono imwepo mumbalewa kuti: ‘Munthu ali-wentse omwe aniuza pai wace ayai mai wace kuti: “Bzentse bzomwe ndinabzo, bzomwe ningadakuthandizani nabzo, ni mphaso yakuperekedwa kwa Mulungu,” 6 iye ne an’funika lini kulemekeza pai wace.’ Mwa njira imweyi, imwepo mwacitisa fala la Mulungu kukhala lakusaya basa thangwe ra miyambo yanu. 7 Wanthu wacinyengomwe! Zaiya akhadaleweratu bwino-bwino bza imwepo pomwe adati: 8 ‘Wanthuwa ambandilemekeza na miromo yawo basi, koma mitima yawo iri kutali na inepano. 9 Iwo ambandinamata papezi, thangwe ambapfunzisa malamulo ya wanthu ninga kuti ni bzipfunziso bza Mulungu.’” 10 Pamwepo iye adacemera thimu la wanthu kuti lifendere pafupi, ndipo adawauza kuti: “Tetekerani mucibvesesa thandauzo lace: 11 Comwe cimbapita na pa mulomo, cimbapswipiza lini munthu, koma comwe cimbacoka pa mulomo ndico comwe cimbapswipiza munthu.”
12 Tenepo anyakupfunza wace adabwera acimubvunza kuti: “Kodi mun’dziwa kuti Afarizeu aipidwa na bzomwe mwalewa bzire?” 13 Pakuwatawira iye adati: “Muti uli-wentse omwe Baba wangu wakudzulu alibe kuubzala, un’dzazulidwa. 14 Ndowasiyani tenepo. Iwo mbazimola, koma akutsogolera anzawo. Tsono zimola akatsogolera zimola mwanzace, wentse ambagwera m’dindi.” 15 Pedru adakumbira kuti: “Tifotokozereni thandauzo la ciratizoci.” 16 Tenepo Jezu adati: “Kodi imwepo mukanatimbo kubvesesa? 17 Kodi mumbadziwa lini kuti cinthu ciri-centse comwe cimbapita na pa mulomo cimbayenda m’mimba ndipo patsogolo pace cimbakatayidwa kuthengo? 18 Tsono ciri-centse comwe cimbacoka na pa mulomo cimbacokera mu mtima, ndipo bzimwebzo ndibzo bzomwe bzimbaipisa munthu. 19 Mwa ciratizo, nzeru zakuipa, kupha munthu, upombo ayai uputa, kugonana kwakusaya kubvumizika,* kuba, umboni bwakunama, na kunyoza Mulungu bzimbacokera mu mtima. 20 Bzinthu bzimwebzi ndibzo bzomwe bzimbapswipiza munthu, koma kudya ne kusamba m’manja* kumbapswipiza lini munthu.”
21 Tenepo, Jezu adacoka kumweko aciyenda m’cigawo ca Tiro na Sidoni. 22 Tsono kudabwera mkazi wa ku Fenisiya kucokera m’bzigawo bzimwebzo, ndipo iye adakuwa aciti: “Ndibverenimbo ntsisi Mbuya, Mwana wa Davide. Mwanangu wacikazi ana ciwanda comwe cikumuzunza kwene-kwene.” 23 Tsono iye alibe kumutawira ciri-centse. Tenepo anyakupfunza wace adabwera acimukumbira kuti: “Muuzeni ayende, thangwe iye akundokuwakuwa m’mbuyo mwathumu.” 24 Iye adatawira kuti: “Mulungu alibe kundituma kwa wanthu wentse, koma kokha kwa mabira yakutaika ya mtundu wa Jirayeri.” 25 Koma mkaziyo adabwera kudzamugodamira acimukumbira kuti: “Mbuya, ndithandizenimbo!” 26 Pakumutawira iye adati: “Bziri lini bwino kutengera wana cakudya mucithusira tunkhanda.”* 27 Tsono mkaziyo adati: “Mwalewa cadidi Mbuya, tsono tunkhandato tumbadya nvululu zomwe zimbagwa pa meza ya mbuya wawo.” 28 Tsono Jezu adamuuza kuti: “Mkaziwe, cikhulupiro cako n’cikulu kwene-kwene; bzicitike ninga momwe ukufunira.” Pa nthawe imweyoletu mwanaceyo adalimba.
29 Pomwe adacoka kumweko, Jezu adayenda pafupi na Nyanza ya Galileya, ndipo adakwira m’phiri acikakhala m’mwemo. 30 Tenepo, mathimu ya wanthu yadayenda komwe kukhana iyeko. Wanthuwo adamubweresera anyakupunduka, anyakulemala, azimola, abewewe, na atenda winango azinji, iwo adawayendesa kuna Jezu mwakamfulumize ndipo iye adawapoza. 31 Ndipo thimu la wanthulo lidadabwa pakuwona kuti abewewe akulewalewa, anyakupunduka akufamba, azimola akuwona, ndipo iwo adatumbiza Mulungu wa Jirayeri.
32 Tsono Jezu adacemera anyakupfunza wace aciwauza kuti: “Ndina ntsisi na wanthuwa, thangwe iwo akhala nande ntsiku zitatu ne kudya cinthu. Nin’funa lini kuti ayende na njala, thangwe angalenguke mu njira.” 33 Na tenepo, anyakupfunza wace adamubvunza kuti: “Kodi tingazigumane kuponi pau zakuti wanthu wentsewa adye acikhuta ku mbuto yakusaya wanthu kuno?” 34 Tenepo Jezu adawabvunza kuti: “Kodi muna pau zingasi?” Iwo adatawira kuti: “Tina pau 7 na tuntsomba tung’ono-ng’ono.” 35 Na tenepo, iye adauza thimu la wanthulo kuti likhale pantsi, 36 ndipo adatenga pau 7 pabodzi na ntsomba zire, pomwe adamala kupemba, adazibedula-bedula acipereka kwa anyakupfunza wace ndipo iwo adaperekambo kwa mathimuyo. 37 Wanthu wentse adadya acikhuta, ndipo adakhongobza madengu* makulu-makulu 7 yakudzala pau zakusala. 38 Ndipo omwe adadya akhalipo amuna wakukwana 4000, mwakusaya kulewenga akazi na wana. 39 Pakumalizira pace, adauza wanthuwo kuti ayende, ndipo iye adapakira mwadiya aciyenda m’cigawo ca Magadani.