Genesesi
3 Nyoka ikhali yakucenjera kwene-kwene kuposa bzirombo bzentse bza m’thengo bzomwe Yahova Mulungu akhadalenga. Tenepo nyokayo idabvunza mkaziyo kuti: “Kodi n’cadidi kuti Mulungu adalewa kuti muleke kudya cisapo ca muti uli-wentse wa m’zundemu?” 2 Mkaziyo adatawira nyokayo kuti: “Bzisapo bza miti yentse ya m’zundemu, adatiuza kuti timbadye. 3 Tsono pakulewa bza cisapo ca muti omwe uli pakati pa zundeli, Mulungu adatiuza kuti: ‘Lekani kudya bzisapo bzace ne na kubzikhuyako, thangwe mukacita bzimwebzo mun’dzafa.’” 4 Nyokayo idauza mkaziyo kuti: “Cipo mun’dzafa lini. 5 Pakuti Mulunguyo akudziwiratu kuti pa ntsiku yomwe mun’dzadya cisapo ca muti umweyu, maso yanu yan’dzafunguka ndipo mun’dzakhala ninga Mulungu, mucidziwa bzabwino na bzakuipa.”
6 Tenepo, mkaziyo adawona kuti cisapo ca mutiyo cikhali cabwino kucidya na cakupasa kaso, inde, mutiyo ukhali wakudeka kuuwona. Tenepo, iye adatca cisapoco acidya, patsogolo pace adapasambo mwamuna wace pomwe akhanaye pabodzi, ndipo iye adadyambo. 7 Pamwepo maso yawo yadafunguka, ndipo iwo adazindikira kuti akhali pezi. Ndipopa iwo adapakasa masamba ya mkuyu acibvala.
8 Patsogolo pace, iwo adabva fala ya Yahova Mulungu pomwe iye akhambafamba-famba mu zundemo kumaulo, pa nthawe yomwe dzuwa likhadapepa. Tenepo, mwamuna na mkaziyo adabisalika pakati pa miti ya mu zundemo kuti Yahova Mulungu aleke kuwawona. 9 Ndipo Yahova Mulungu akhacemera mwamunayo kuti: “Kodi uli kuponi?” 10 Pakumalizira pace, mwamunayo adatawira kuti: “Ndabva fala lanu mu zundemu, tsono ndabva mantha pakuti ndikhali pezi, ndipopa ndabisalika.” 11 Na tenepo Mulungu adamubvunza kuti: “Mbani wakuuza kuti ukhali pezi? Kodi iwepo wadya cisapo ca muti omwe ndidakuuza kuti uleke kudya ule?” 12 Mwamunayo adatawira kuti: “Mkazi omwe mudandipasayu ndiye omwe wandipasa cisapo ca mutiyo, ndipopa ndadya.” 13 Tenepo, Yahova Mulungu adabvunzambo mkaziyo kuti: “N’ciyani comwe wacita?” Mkaziyo adatawira kuti: “Nyoka ndiyo yomwe yandipumpsa, ndipopa ndadya.”
14 Patsogolo pace, Yahova Mulungu adauza nyokayo kuti: “Thangwe ra bzomwe wacitabzi, un’khala wakutembereredwa pakati pa bzifuwo bzentse na bzirombo bzentse bza m’thengo. Un’dzafamba na mimba yako ndipo cakudya cako cin’dzakhala pfumbi ntsiku zentse za moyo wako. 15 Ndipo nin’dzaikha ciwengo pakati pa iwepo na mkaziyo na pakati pa wana* wako na wana* wace. Iye an’dzakutsotola msolo ndipo iwepo un’dzamuluma katende wace.”
16 Kwa mkaziyo iye adati: “Nin’dzathumizira kuwawa kwa pathupi pomwe un’dzakhala napo ndipo un’dzabva kuwawa pakubala wana. Un’dzafunisisa kukhala pafupi na mwamuna wako tsono iye an’dzakutonga.”
17 Ndipo kwa Adamu* iye adati: “Thangwe rakuti wabvera mkazi wako na kudya cisapo ca muti omwe ndidakuuza kuti uleke kuudya, mataka yakhale yakutembereredwa thangwe ra iwepo. Un’dzadya mwakubonerera bzomwe matakayo yan’dzakupasa m’ntsiku zentse za moyo wako. 18 Matakayo yan’dzamera mtundu uli-wentse wa minga, ndipo iwepo un’dzadya bzakumera pa matakayo. 19 Un’dzadya cakudya mwakucita kucokera kaluma, mpaka udzabwerere ku mataka pakuti ndiko komwe udacokera. Pakuti ndiwe pfumbi, kupfumbiko un’dzabwerera.”
20 Patsogolo pace, Adamu adapasa mkazi wace dzina lakuti Eva* thangwe angadadzakhala mai wa wanthu wentse wamoyo. 21 Ndipo Yahova Mulungu adakonzera Adamu na mkazace bzakubvala bzitali-bzitali bza khanda, aciwabvazika. 22 Patsogolo pace, Yahova Mulungu adati: “Tsapano munthu wakhala ninga ife thangwe wadziwa bzabwino na bzakuipa. Tenepo, nin’funika kucita cinthu cinango kuti iye aleke kutcolambo na kudya cisapo ca muti wa moyo, acikhala na moyo wakusaya kumala.” 23 Ndipopa Yahova Mulungu adamuthotha mu zunde la Edenimo kuti akalime mataka yomwe iye adakonzedwa nayo. 24 Tenepo iye adathotha munthuyo, aciikha kumabvadzuwa kwa zunde la Edenilo akerubi na xipada yakugaka moto yomwe ikhazungulira mwakusaya kulekeza kuti iphingize njira yakuyenda ku muti wa moyo.