Ya m’Bukhu la Mateu
1 Bukhu la mbiri ya* Jezu Kristu,* mwana wa Davide, mwana wa Abalahamu:
2 Abalahamu adabereka Izaki;
Izaki adabereka Djakobo;
Djakobo adabereka Djuda na azibale wace;
3 Djuda na Tamara adabereka Perezi na Zera;
Perezi adabereka Eziromu;
Eziromu adabereka Ramu;
4 Ramu adabereka Aminadabi;
Aminadabi adabereka Nasoni;
Nasoni adabereka Salimoni;
5 Salimoni na Rahabi adabereka Bowazi;
Bowazi na Rute adabereka Obedi;
Obedi adabereka Jese;
6 Jese adabereka mambo* Davide;
Davide na mkazi wa Uriya adabereka Salomau;
7 Salomau adabereka Robuwamu;
Robuwamu adabereka Abiya;
Abiya adabereka Asa;
8 Asa adabereka Jewosafati;
Jewosafati adabereka Jeworamu;
Jeworamu adabereka Uziya;
9 Uziya adabereka Jotamu;
Jotamu adabereka Ahazi;
Ahazi adabereka Ezekiya;
10 Ezekiya adabereka Manase;
Manase adabereka Amoni;
Amoni adabereka Josiya;
11 Josiya adabereka Jekoniya na wana winango pomwe Adjuda adayendesedwa ku Babiloniya.
12 Ku Babiloniyako, Jekoniya adabereka Selatiyeli,
Selatiyeli adabereka Zerubabele;
13 Zerubabele adabereka Abiyudi;
Abiyudi adabereka Eliyakimu;
Eliyakimu adabereka Azori;
14 Azori adabereka Zadoki;
Zadoki adabereka Akimu;
Akimu adabereka Eliyudi;
15 Eliyudi adabereka Eliyazari;
Eliyazari adabereka Matani;
Matani adabereka Djakobo;
16 Djakobo adabereka Zuze mwamuna wa Mariya, omwe adadzabereka Jezu wakucemeredwa Kristu.
17 Tenepo, mibadwo yentse kuyambira Abalahamu mpaka Davide ikhalipo 14; kucokera Davide mpaka pomwe Adjuda adayendesedwa ku Babiloniya ikhalipo mibadwo 14; kucokera pomwe Adjuda adayendesedwa ku Babiloniya mpaka Kristu ikhalipo mibadwo 14.
18 Tsono kubadwa kwa Jezu Kristu kudacitika tenepa: Pa nthawe yomwe Mariya, mai wace wa Jezu akhadabvunziridwa na Zuze, iye adagumanidwa na pathupi mwakucitisidwa na mzimu wakucena* pomwe akhanati kukhala pabodzi ninga banja. 19 Pakuti Zuze mwamuna wace akhali munthu wakulungama, alibe kufuna kum’pasisa manyazi, tenepo iye akhafuna kumulamba mwakabise-bise. 20 Tsono pambuyo pa kukumbuka bzimwebzi, anjo wa Yahova* adawonekera kwa iye kutulo acimuuza kuti: “Zuze mwana wa Davide, leka kugopa kutenga mkazako Mariya uciyenda naye kumui, pakuti pathupi pomwe anapopa pacitisidwa* na mzimu wakucena. 21 Iye an’dzabereka mwana wacimuna, ndipo udzam’pase dzina lakuti Jezu,* pakuti iye an’dzapulumusa wanthu wace ku pikado zawo.” 22 Bzentsenebzi bzidacitika kuti yakwanisike mafala yomwe Yahova adalewa mwakuphatisa basa mpolofeta wace, yakuti: 23 “Tetekerani! Dende lin’dzakhala na pathupi ndipo lin’dzabereka mwana wacimuna, ndipo an’dzamupasa dzina lakuti Emanuwere,” lomwe likasanduliziridwa limbathandauza kuti “Mulungu Anafe.”
24 Tenepo Zuze adamuka kutulo, ndipo adacita bzomwe anjo wa Yahova akhadamuuza. Iye adatenga mkazace aciyenda naye kumui. 25 Tsono iye alibe kugona naye mpaka pomwe mwanayo adabadwa, acim’pasa dzina lakuti Jezu.