Masomphenya ya Juwau
7 Pomwe bzimwebzi bzidamala, ndidawona anjo anai omwe akhadaima mu mbali zinai za pa dziko la pantsi. Iwo akhadaphatirira mphepo zinai za dziko la pantsi kuti zileke kumenya dzikolo, nyanza ayai muti uli-wentse. 2 Ndipo ndidawona anjo munango akukwira kudzulu kucokera kumabvadzuwa, ndipo iye akhana cizindikiro ca Mulungu wamoyo; iye adakuwira anjo anai wale omwe akhadapasidwa mphanvu yakupfudza dziko na nyanza, 3 kuti: “Lekani kupfudza dziko la pantsi, nyanza ayai miti, mpaka tikamaliza kuikha cizindikiro pamikuma ya akapolo wa Mulungu wathu.”
4 Ndipo ndidabva mulewengo wa omwe adaikhidwa cizindikiroco. Wanthu wakukwana 144 000 wakucokera m’dzinza liri-lentse la wana wa Jirayeri:
5 Wa mu dzinza la Djuda adaikhidwa cizindikiro wanthu wakukwana 12 000;
wa m’dzinza la Rubeni 12 000;
wa m’dzinza la Gadi 12 000;
6 wa m’dzinza la Aseri 12 000;
wa m’dzinza la Nafitali 12 000;
wa m’dzinza la Manase 12 000;
7 wa m’dzinza la Simiyoni 12 000;
wa m’dzinza la Levi 12 000;
wa m’dzinza la Isakari 12 000;
8 wa m’dzinza la Zebuloni 12 000;
wa m’dzinza la Zuze 12 000;
ndipo wa m’dzinza la Benjamini adaikhidwa cizindikiro wanthu wakukwana 12 000.
9 Patsogolo pace, ndidawona thimu likulu la wanthu lomwe palibe munthu omwe angadakwanisa kulilewenga. Iwo akhali wakucokera ku mitundu yentse, madzinza yentse, mbumba zentse na bzirewedwe bzentse. Iwo akhadaima pamaso pa mpando wa umambo na pamaso pa Mwana wa Bira, ndipo akhadabvala bzakubvala bzicena. M’manja mwawo akhadatakula nthambi za kanjedza. 10 Iwo adapitiriza kukuwa acimbalewa kuti: “Cipulumuso cathu cacokera kwa Mulungu wathu, omwe adakhala pa mpando wa umambo na kwa Mwana wa Bira.”
11 Pamwepo, anjo wentse, akulu-akulu pabodzi na anjo anai wale, adaima mwakuzungulira mpando wa umambo. Ndipo iwo adagodama acitsulima patsogolo pa mpando wa umamboyo acinamata Mulungu, 12 acimbati: “Ameni! Citumbizo, ulemerero, nzeru, kutenda, ulemu, utongi na mphanvu bziyende kwa Mulungu wathu mpaka kale-kale. Ameni.”
13 Ndipo m’bodzi wa akulu-akulu wale adandibvunza kuti: “Kodi mbani omwe adabvala bzakubvala bzicenawa ndipo akucokera kuponi?” 14 Pa nthawe imweyoletu ndidatawira kuti: “Mbuya wangu, imwepo ndimwe mun’dziwa.” Ndipo iye adandiuza kuti: “Amwewa ni omwe acokera ku citsautso cikulu, iwo afula bzakubvala bzawo bzitali acibzicenesa na mulopa wa Mwana wa Bira. 15 Ndipopa iwo ali pamaso pa mpando wa umambo wa Mulungu, acimbaphata mabasa yakupambulika mu templo mwace usiku na masikati; ndipo Ule omwe adakhala pa mpando wa umambo an’dzakonza tendi kuti awakhotcerere. 16 Iwo an’dzabva lini pomwe njala ne nyota, ndipo an’dzapsa lini pomwe na dzuwa ne kutentha kuli-kwentse, 17 thangwe Mwana wa Bira omwe adakhala pakati pa mpando wa umambo, an’dzawausa aciwatsogolera ku ntsantsa* ya madzi ya moyo. Ndipo Mulungu an’dzapukuta misozi yentse m’maso mwawo.”