Ya m’Bukhu la Luka

4 Tenepo Jezu adadzalidwa na mzimu wakucena, ndipo adacoka ku Jordano acitsogoleredwa na mzimuyo kuyenda ku dambo 2 kwa ntsiku 40. Mu ntsiku zimwezi iye alibe kudya cinthu, ndipo pomwe adamaliza ntsikuzo, iye adabva njala, tenepo Dyabu adabwera kudzamuyeza. 3 Dyabuyo adamuuza kuti: “Penu iwepo ndiwedi mwana wa Mulungu, sandusa mwalayu kuti ukhale pau.” 4 Tsono Jezu adamutawira kuti: “Bzidanembedwa kuti: ‘Munthu ambakhala lini na moyo na cakudya cokha.’”

5 Tenepo iye adamutenga aciyenda naye pa phiri litali kwene-kwene, ndipo adamulatiza maumambo yentse ya pa dziko la pantsi mu kamphindi kakucepa. 6 Patsogolo pace Dyabu adamuuza kuti: “Nin’kupasa mphanvu yakutonga maumambo yentseneya na ulemerero bwace, thangwe maumambo yentseneya njangu, ndipo ningapase ali-wentse omwe nin’funa. 7 Na tenepo, ucindondinamata kabodzi kokha, bzinthu bzintsenebzi bzin’dzakhala bzako.” 8 Tsono Jezu adamutawira kuti: “Bzidanembedwa kuti: ‘Yahova Mulungu wako, ndiye omwe un’funika kumunamata, ndipo ndiye yekha omwe un’funika kumutumikira.’”

9 Patsogolo pace, Dyabu adamutenga aciyenda naye ku Jeruzalemu ndipo adakamuimisa padzaulu* pa mpanda wa templo acimuuza kuti: “Penu iwepo ndiwedi mwana wa Mulungu, bzithusire pantsi kucokera pano, 10 pakuti bzidanembedwa kuti: ‘Iye an’dzatumiza anjo wace kuti adzakukhotcerere,’ 11 ndipo ‘iwo an’dzakunyamula m’manja mwawo kuti minyendo yako ileke kumenya pa mwala.’” 12 Pakumutawira, Jezu adati: “Bzidanembedwa pomwe kuti: ‘Leka kuyeza Yahova Mulungu wako.’” 13 Tenepo, pomwe Dyabu adamala kumuyezako, adamusiya mpaka pa nthawe inango yakuthemera.

14 Jezu adabwerera ku Galileya, atadzalidwa na mphanvu ya mzimu wakucena. Ndipo mbiri ya bzinthu bzabwino bzomwe akhacita idabvekera mphimpha zentse za pafupi. 15 Ndipo iye adayamba kupfunzisa m’nyumba zawo zakunamatira* ndipo akhalemekezedwa na wentse.

16 Iye adayenda ku Nazareti, mzinda omwe adabadwira. Mwakubverana na cizolowezi cace, pa ntsiku ya Sabudu iye adapita mu nyumba yakunamatira,* ndipo iye adaima kuti awerenge bzinembo. 17 Tenepo adamupasa bukhu* la mpolofeta Zaiya, ndipo iye adafungula bukhulo pa mbuto pomwe pakhadanemba kuti: 18 “Mzimu wa Yahova uli pa ine, ndipo iye wandisankhula kuti ndipalizire mafala yabwino kwa anyakusauka. Iye wandituma kuti ndidziwise bza kutsudzulidwa kwa omwe akhadatengedwera ku ukapolo nakuti azimola ayambe pomwe kuwona, kudzatsudzula wanthu wakuponderezedwa kuti akhale na ufulu, 19 na kudzadziwisa gole lakubvumizika la Yahova.” 20 Pomwe adamaliza kuwerengako, iye adafunga bukhulo acilipereka kwa mtumiki wa nyumba yakunamatirayo acikakhala pantsi; ndipo wanthu wentse omwe akhali m’mwemo adamunyang’anisisa. 21 Na tenepo, iye adayamba kuwauza kuti: “Cinembo comwe mwamala kubva leroci, cakwanisika.”

22 Pamwepo wentse adayamba kumulewa bwino na kudabwa thangwe ra mafala yakutsangalaza yakucokera pamulomo pace, mwakuti akhambauzana kuti: “Kodi umweyu ni mwana lini wa Zuze?” 23 Na tenepo iye adawauza kuti: “Mwakusaya kupenukira, imwepo mundzalewa mafala aya kwa ine: ‘Dotolo, bzilape wekha. Citambo ku mzinda kwako kuno bzinthu bzomwe tidabva kuti udacita ku Kafarnau.’” 24 Tenepo iye adati: “Cadidi ndikukuuzani kuti palibe mpolofeta omwe ambalemekezedwa kumui kwace. 25 Tsono ndikukuuzani cadidi kuti: Mu ntsiku za Eliya, mu Jirayeri mukhana amamsiwa azinji, pomwe kudzulu kudafungidwa kwa magole matatu na minyezi 6 ndipo kudawoneka njala ikulu m’dziko lentsenelo. 26 Napo bzikhali tenepo, Eliya alibe kutumizidwa ne kwa m’bodzi wa akazi amwewa, koma adatumizidwa kwa mkazi mamsiwa wa ku Zarefati wa m’dziko la Sidoni. 27 Ndipo mu ntsiku za mpolofeta Elizeu, akhalipombo anyamapere azinji mu Jirayeri, napo bzikhali tenepo, palibe ne na m’bodzi omwe adapozedwa, koma kokha Naamani wa ku Siriya.” 28 Ndipo wentse omwe adabva bzimwebzi mu nyumba yakunamatiramo, adakalipa kwene-kwene, 29 mwakuti iwo adalamuka aciyenda naye kunja kwa mzindayo mwakamfulumize, ndipo iwo adayenda naye padzaulu pa phiri pomwe mzinda wawo ukhadamangidwira, kuti akamugwinyire kuciphompho. 30 Tsono Jezu adapsola na pakati pawo acicoka.

31 Iye adapolika ku Kafarnau, mzinda wa Galileya, acimbawapfunzisa pa Sabudu, 32 ndipo iwo adadabwa kwene-kwene na kapfunzisidwe kace, thangwe bzomwe iye akhapfunzisabzo, bzikhacokeradi kwa Mulungu.* 33 Ndipo m’nyumba yakunamatiramo mukhana munthu munango omwe akhana mzimu wakuipa, ndipo iye adakuwa mwamphanvu aciti: 34 “Aah! Mun’funa ciyani na ifepano, imwe Jezu wa ku Nazareti? Kodi mwabwera kudzatipha? Ine ndikukudziwani bwino kuti imwepo ndimwe wakucena wakutumidwa na Mulungu!” 35 Tsono Jezu adatsimula mzimuyo aciti: “Nyamala, ndipo coka mwa iye.” Tenepo pambuyo pa mzimuyo kugwesera pantsi munthuyo iwo akuwona, mzimuyo udacoka mwakusaya kumupweteka. 36 Na tenepo, wentse adadabwa ndipo adayamba kumbauzana kuti: “Kodi yamweya ni mafala ya mtundu wanyi? Iye ana mphanvu yakutonga mizimu yakuipa ndipo iyo ikucokadi!” 37 Tenepo, mbiri yace idapitiriza kubvekera ku mphimpha zentse za pafupi.

38 Pomwe adacoka m’nyumba yakunamatiramo, iye adakapita m’nyumba mwa Simau. Tsono amibzala wacikazi wa Simauyo akhadafesuka kwene-kwene ndipo iwo adamukumbira kuti awathandize. 39 Tenepo iye adakotama, pomwe pakhana iwopo aciwapoza. Ndipo pa nthawe imweyoletu iwo adalimba mwakuti adamuka aciyamba kuwaphikira cakudya.

40 Pomwe dzuwa likhamira, wentse omwe akhana wanthu omwe akhaduwala matenda yakusiyana-siyana, adawabweresa kwa iye. Iye adaikha manja yace pa iwo ndipo wentsenewo adalimba. 41 Jezu adacosa madimonyo wanthu azinji, ndipo iyo yakhakuwa yaciti: “Imwepo ndimwe Mwana wa Mulungu.” Tsono iye adayatsimula ndipo alibe kuyalekerera kuti yalewelewe, thangwe madimonyoyo yakhadziwa kuti iye ni Kristu.

42 Tenepo, pomwe kudacena, iye adayenda ku mbuto yomwe kukhalibe wanthu. Tsono wanthu adayamba kumunyang’ana acimubulukira komwe akhaliko ndipo iwo adamungingimira kuti aleke kuwasiya. 43 Na tenepo, iye adawauza kuti: “Nin’funika kukapalizirambo mafala yabwino ya Umambo bwa Mulungu ku mizinda inango, thangwe ndidatumizidwa kudzacita bzimwebzi.” 44 Tenepo, iye adayenda kukapalizira m’nyumba yakunamatira ya ku Djudeya.