EKISODO

1 Aya ni madzina ya wana wa Jirayeri ayai Djakobo, omwe adayenda nawo ku Edjipito ali-wentse na banja lace: 2 Rubeni, Simiyoni, Levi, Djuda, 3 Isakari, Zebuloni, Benjamini, 4 Dani, Nafitali, Gadi na Aseri. 5 Dzinza lentse la Djakobo* akhalipo wanthu wakukwana 70. Tsono Zuze akhali kale ku Edjipitoko. 6 Na kupita kwa nthawe Zuze adadzafa, ndipo azibale wace wentse pabodzi na m’badwo wawo wentse, udadzafambo. 7 Ajirayeri* adaberekana ndipo adawanda kwene-kwene m’dzikomo. Iwo adapitiriza kuwanda mwakamfulumize acikhalambo wamphanvu kwene-kwene mwakuti adadzala m’dzikomo.

8 Na kupita kwa nthawe mambo munango omwe akhamudziwa lini Zuze adayamba kutonga dziko la Edjipito. 9 Tenepo, mamboyo adauza wanthu wace kuti: “Onani! Ajirayeri akuwanda kwene-kwene ndipo mbamphanvu kuposa ifepano. 10 Tin’funika kucita bzinthu mwakucenjera. Tikasaya kucita tenepo, iwo anipitiriza kuwanda ndipo pa nthawe ya nkhondo, iwo angadzaphatane na anyamadulanthaka wathu acimenyana nafe patsogolo pace acicoka m’dziko lino.”

11 Tenepo, iwo adasankhula atsogoleri kuti ambawapase mabasa ya ukapolo kuti ambawabonerese na mabasa yamphanvu. Ndipo Ajirayeri adamangira Farawo mizinda ya Pitomu na Ramisesi kuti ikhale yakukoyera bzinthu. 12 Tsono pomwe iwo akhawaboneresa kwene-kwenepo ni pomwembo iwo akhawandiratu kwene-kwene, acibalalikambo kwene-kwene, mwakuti Aedjipito adayamba kubva mantha thangwe ra Ajirayeriwo. 13 Tenepo, Aedjipito adanyanyiratu kuboneresa Ajirayeri na ukapolo bwakuwawa kwene-kwene. 14 Iwo adacitisa moyo wa Ajirayeri kukhala wakunesa kwene-kwene thangwe ra mabasa yamphanvu yakumunya na kumbaumba matijolo. Iwo adawaboneresa na mtundu uli-wentse wa ukapolo m’munda. Inde, iwo akhawaboneresa kwene-kwene ndipo adawaphatisa basa la ukapolo la mtundu uli-wentse.

15 Patsogolo pace, mambo wa ku Edjipito adakalewalewa na adaya* Wacihebereu omwe madzina yawo yakhali Sifra na Puwa, 16 ndipo iye adawauza kuti: “Mukakhala mukuthandiza mkazi Wacihebereu kubereka, ndipo mukawona kuti mwana omwe wabadwayo ni mwamuna, mumuphe, tsono akakhala mkazi musiyeni na moyo.” 17 Tsono adayawo akhagopa Mulungu wacadidi, ndipo alibe kucita bzomwe mambo wa Edjipito adawauza. M’mbuto mwace, iwo akhasiya na moyo wana wacimuna. 18 Na kupita kwa nthawe, mambo wa ku Edjipito adacemera adaya wale aciwabvunza kuti: “Thangwe ranyi mukusiya wana wacimuna na moyo?” 19 Adayawo adatawira Farawo kuti: “Akazi Wacihebereu ali lini ninga akazi wa ku Edjipito kuno. Iwo ana mphanvu kwene-kwene, ndipo ambakhala abereka kale okha daya akanati kufika.”

20 Tenepo Mulungu adasimba adayawo, ndipo Ajirayeri adapitiriza kuwanda acikhalambo wamphanvu kwene-kwene. 21 Pakuti adayawo akhagopa Mulungu wacadidi, na kupita kwa nthawe iye adawasimba mwa kuwapasa wana wawo caiwo. 22 Pakumalizira pace, Farawo adauza wanthu wace wentse kuti: “Mwana ali-wentse wacimuna omwe anibadwa kwa Ahebereu mumuthuse mu mkulo wa Nilo, koma wana wentse wacikazi muwasiye na moyo.”

2 Pakhana mwamuna munango wa m’dzinza la Levi omwe adalowola mkazi omwe akhalimbo wa m’dzinza la Levi. 2 Mkaziyo adakhala na pathupi ndipo adabereka mwana wacimuna. Pomwe iye adawona momwe mwanayo akhadadekera adamubisa kwa minyezi mitatu. 3 Pomwe iye adawona kuti angadakwanisa lini pomwe kubisa mwanayo, adatenga kasesto kakukonzedwa na nzire acikamata na phula. Patsogolo pace adaikha mwanayo m’kasestoko acikakabisa m’mitete, m’mphepete mwa Mkulo wa Nilo. 4 Tsono mpfumakazi yace idaima na patali kuti iwone bzomwe bzingadamucitikira.

5 Pomwe mwana wacikazi wa Farawo adapolika kuti akasambe mu mkulo wa Nilo, anyabasa wace akhafamba m’mphepete mwa mkuloyo. Iye adawona kasesto komwe kakhali pakati pa mitete ndipo pa nthawe imweyoletu adatuma anyabasa wace kuti akakatenge. 6 Pomwe iye adafungula, adawona kamwana kacimuna ndipo kamwanako kakhalira. Iye adakabvera ntsisi, koma adati: “Umweyu ni m’bodzi mwa wana wa Ahebereu.” 7 Tenepo, mpfumakazi ya Mozeji ire idabvunza mwana wacikazi wa Farawoyo kuti: “Kodi mun’funa ndiyende kukacemera mkazi Wacihebereu kuti ambakumamisireni mwanayu?” 8 Mwana wacikazi wa Farawoyo adamutawira kuti: “Ndoko!” Pa nthawe imweyoletu mtsikanayo adayenda kukacemera mai wace wa mwanayo. 9 Mwana wa Farawoyo adauza mkaziyo kuti: “Tenga mwanayu ukandimamisire ndipo inepano nin’dzakupagali.” Tenepo, mkaziyo adatengadi mwanayo acikamumamisa. 10 Pomwe mwanayo adakula, mai wacewo adakamupereka kwa mwana wacikazi wa Farawo ndipo iye adakhala mwana wace. Ndipo mwana wacikazi wa Farawoyo, adamupasa dzina lakuti Mozeji* ndipo adati: “Ni thangwe rakuti ndamunula m’madzi.”

11 Pomwe Mozeji adakula, iye adayenda kukazungira abale wace kuti akawone basa lamphanvu lomwe iwo akhaphata. Iye adawona m’bale wace Wacihebereu akumenyedwa na m’Edjipito. 12 Tenepo, iye adanyang’anisa uku na uku ndipo adawona kuti palibe munthu omwe akuwona; iye adapha m’Edjipitoyo acimubisa mu mcenga.

13 Mangwana yace, iye adayenda pomwe kumwekule ndipo adakawona Ahebereu awiri akumenyana. Tenepo, iye adabvunza omwe akhadaphonyayo kuti: “Thangwe ranyi ukumenya m’bale wako?” 14 Iye adatawira kuti: “Mbani wakusankhula kuti ukhale mtsogoleri na mtongi pakati pathu? Kodi un’funa kundipha ninga momwe udaphera m’Edjipito ule?” Tenepo, Mozeji adabva mantha ndipo adati: “Mwakusaya kupenukira nkhaniyi yadziwika!”

15 Patsogolo pace, Farawo adabva bza nkhaniyi ndipo akhafuna kupha Mozeji; tsono Mozeji adathawa Farawo aciyenda kukakhala ku dziko la Midiyani ndipo pomwe adafika kumweko, iye adakakhala pafupi na mcera. 16 Wantsembe wa ku dziko la Midiyani, akhana wana 7 wacikazi; ndipo iwo adabwera pa mcerapo kuti adzatunge madzi acidzaza bzombo bzawo bzakumwesera bzifuwo kuti akamwese mabira ya pai wawo. 17 Ninga mwa ntsiku zentse, kudabwera amakabusa acithotha atsikanawo. Tsono Mozeji adamuka acithandiza atsikanawo, ndipo adapasa madzi mabira yawoyo. 18 Pomwe iwo adafika kumui, pai wawo Reweli* adadabwa ndipo adawabvunza kuti: “Bzakwanisika tani kuti lero mufike kweru kumui kuno?” 19 Iwo adatawira kuti: “M’Edjipito munango, watipulumusa m’manja mwa amakabusa ndipo iye watunga madzi acimwesambo mabiraya.” 20 Iye adabvunza wana wacewo kuti: “Tsono iye ali kuponi? Thangwe ranyi mwamusiya? Kamucemereni kuti tidzadye naye pabodzi.” 21 Patsogolo pace, Mozeji adabvuma kukhala pamui pa mwamunayo ndipo iye adamupasa mwana wace Zipora kuti akhale mkazi wace. 22 Patsogolo pace, Zipora adabereka mwana wacimuna ndipo Mozeji adamupasa dzina lakuti Gerisomu,* pakuti adati: “Ndakhala mulendo mu dziko lacirendo.”

23 Pomwe padapita magole mazinji,* mambo wa ku Edjipito adadzafa; tsono Ajirayeri adapitiriza kubuula thangwe ra ukapolo acimbalira mwakudandaula. Tenepo, kulira kwawo kwakukumbira thandizo thangwe ra ukapolo, kudafika kwa Mulungu wacadidi. 24 Mulungu adabva kubuula kwawoko ndipo iye adakumbukira mpangano omwe akhadaucita na Abulahamu, Izaki na Djakobo. 25 Tenepo, Mulungu adanyang’anisa Ajirayeri ndipo adawona kubonera kwawoko.

3 Mozeji adakhala makabusa wa mabira ya amibzala wace Jetro, wantsembe wa ku Midiyani. Pomwe akhausa mabira kumadokero kwa dambo, adafika ku phiri la Mulungu wacadidi, ku Horebi. 2 Patsogolo pace, anjo wa Yahova adawonekera kwa iye pakati pa citsongodza ca minga comwe cikhagaka moto. Pomwe adacinyang’anisisa, adawona kuti citsongodzaco cikhagaka koma cikhapsa lini. 3 Tenepo Mozeji adati: “Ndifendere pafupi kuti ndikawonesese cakudabwisaci, ndicikawona kuti thangwe ranyi citsongodza cire cikugaka koma cikupsa lini.” 4 Pomwe Yahova adawona kuti Mozeji akhafendera pafupi kuti awonesese cakudabwisaci, adamucemera kucokera pakati pa citsongodzapo aciti: “Mozeji! Mozeji!” iye adatawira kuti: “Ndiri pano ine.” 5 Ndipo Mulungu adati: “Leka kufendera pafupi. Khundula xango zomwe ziri kunzayo kwakozo, pakuti mbuto yomwe waimayi njakucena.”

6 Ndipo adapitiriza kulewa kuti: “Ine ndine Mulungu wa pai wako, Mulungu wa Abulahamu, Mulungu wa Izaki na Mulungu wa Djakobo.” Tenepo Mozeji adampsinkha nkhope yace thangwe akhagopa kuwona Mulungu wacadidi. 7 Ndipo Yahova adalewa pomwe kuti: “Inepano ndayawona matsautso ya wanthu wangu ku Edjipito; ndabva kulira kwawo thangwe ra wale omwe akuwaphatisa basa mwamphamvu ndipo inepano ndikukudziwa bwino kubonera kwawo. 8 Tenepo, nin’buluka kuti ndikawapulumuse m’manja mwa Aedjipito. Nin’kawacosa m’dziko limwelire, ndiciwayendesa ku dziko labwino na likulu; dziko lakuyerera mkaka na uci, dziko la Akanani, Ahiti, Aamori, Aperizi, Ahivi na Ajebusi. 9 Tsapano, ndabva kulira kwa wana wa Jirayeri ndipo ndawonambo kuwaboneresa komwe Aedjipito akuwacita. 10 Ndipo tsapano, nin’kutuma kuti uyende kwa Farawo, ndipo iwepo, un’kacosa wanthu wangu, Ajirayeri ku Edjipito.”

11 Tsono Mozeji adatawira Mulungu wacadidiyo kuti: “Kodi ndine yani ine kuti ndiyende kwa Farawo ndicikacosa Ajirayeri ku Edjipito?” 12 Tenepo, Mulungu adati: “Nin’dzakhala nawe ndipo cizindikiro cakulatiza kuti ndakutuma ndine n’cici: Ukakawacosa wanthuwo ku Edjipito, imwepo mun’dzatumikira* Mulungu wacadidi pa phiri lino.”

13 Tsono Mozeji adauza Mulungu wacadidi kuti: “Tiyezezere kuti ndayenda kwa Ajirayeri ndicikawauza kuti: ‘Mulungu wa makolo yanu wandituma kwa imwepo,’ ndipo iwo acikandibvunza kuti: ‘Dzina lace ni yani?’ Nin’kawatawira tani?” 14 Mulungu adati kwa Mozeji: “Inepano Nin’dzakhala Bzomwe Ndidzafune* Kukhala.”* Ndipo adalewa pomwe kuti: “Bzimwebzi ndibzo bzomwe ukauze Ajirayeri, ‘Inepano Nin’dzakhala Bzomwe Ndidzafune Kukhala, wandituma kwa imwepo.’” 15 Mulungu adauza pomwe Mozeji kuti:

“Ukauze Ajirayeri kuti: ‘Yahova Mulungu wa makolo yanu yakale, Mulungu wa Abulahamu, Mulungu wa Izaki na Mulungu wa Djakobo, ndiye omwe wandituma kwa imwepo.’ Limweri ndiro dzina langu mpaka kale-kale ndipo nin’dzadziwika* na dzina limweri ku mibadwo na mibadwo. 16 Ndoko ukatsonkhanise akulu-akulu wa Jirayeri ucikawauza kuti: ‘Yahova Mulungu wa makolo yanu yakale, Mulungu wa Abulahamu, wa Izaki na Djakobo, wawonekera kwa inepano acindiuza kuti: “Nimbakuwonani, ndipo nimbawonambo bzentse bzomwe Aedjipito akukucitirani. 17 Tenepo, ndikupicira kuti nin’dzakupulumusani m’manja mwa Aedjipito omwe akukuboneresani, ndicikuyendesani m’dziko la Akanani, Ahiti, Aamori, Aperizi, Ahivi na Ajebusi; dziko lakuyerera mkaka na uci.”’

18 “Iwo an’dzabvera mafala yako ndipo iwepo pabodzi na akulu-akulu wa Jirayeri mudzayende kwa mambo wa ku Edjipito mucikamuuza kuti: ‘Yahova Mulungu wa Ahebereu walewalewa nafe. Tenepo, taphata minyendo, tibvumizeni kucita ulendo bwa ntsiku zitatu bwa kuyenda ku dambo kuti tikapereke ntsembe kwa Yahova Mulungu wathu.’ 19 Tsono inepano ndikudziwiratu kuti mambo wa ku Edjipito, an’dzakubvumizani lini kuyenda mpaka boko lamphanvu lidzamungingimize kucita bzimwebzi. 20 Tenepo, inepano nin’dzafuthula boko langu, ndicipasa nyathwa Edjipito na mabasa yangu yentse yakudabwisa yomwe nin’dzayacita kumweko, pamwepo iye an’dzakubvumizani kucoka. 21 Ndipo nin’dzacitisa kuti Aedjipito adekere mtima wanthu wangu ndipo pomwe mun’dzacoka, mun’dzacoka lini cimanja-manja. 22 Mkazi ali-wentse an’funika kudzakumbira vizinya wace ayai mulendo wace wacikazi bzinthu bza prata,* bza oro na bzakubvala ndipo bzinthubzo mudzabvazike wana wanu wacimuna na wacikazi ndipo imwepo mun’dzatenga bzinthu bzizinji bza Aedjipito.”

4 Na tenepo Mozeji adatawira kuti: “Tiyezezere kuti alibe kundikhulupira ndipo alibe kutetekera mafala yangu acilewa kuti: ‘Yahova alibe kuwonekera kwa iwepo.’” 2 Tsono Yahova adamubvunza kuti: “N’ciyani comwe ciri m’manja mwakoci?” Mozeji adatawira kuti: “Ni mpsimbo.” 3 Mulungu adati: “Ithuse pantsi.” Iye adaithusa pantsi, ndipo iyo idasanduka nyoka; ndipo Mozeji adaithawa. 4 Yahova adauza Mozeji kuti: “Fendera ndipo uiphate kumcirako.” Tenepo Mozeji adaiphatadi kumcirako ndipo nyokayo idasanduka pomwe mpsimbo m’manja mwace. 5 Patsogolo pace Mulungu adati: “Ukacite bzimwebzi kuti akakhulupire kuti Yahova Mulungu wa makolo yawo yakale, Mulungu wa Abulahamu, Mulungu wa Izaki na Mulungu wa Djakobo, wawonekera kwa iwepo.”

6 Ndipo Yahova adamuuza pomwe kuti: “Pitisa bokolo n’cakubvala cako pankhombepo.” Tenepo Mozeji adapitisa boko lacero n’cakubvalaco. Tsono pomwe adalicosa, bokolo likhadacita mapere ndipo likhali mbuu ninga pfulere! 7 Mulungu adamuuza pomwe kuti: “Pitisa pomwe boko lakolo n’cakubvalaco.” Tenepo Mozeji adapitisa boko lacero n’cakubvalaco ndipo pomwe adalicosa, iro likhali bwino-bwino ninga momwe likhaliri pakuyamba! 8 Mulungu adapitiriza kuti: “Iwo akakasaya kukhulupira ayai kubvera cizindikiro cakuyambaci, an’kakhulupira cizindikiro caciwirici. 9 Tsono napo akakasaya kukhulupira bzizindikiro bziwiribzi acileka kubvera mafala yako, ukatunge madzi mu mkulo wa Nilo ucikayathululira pa mataka yakuuma. Ndipo madzi yomwe un’kayatunga mu mkuloyo, yan’dzasanduka mulopa pantsipo.”

10 Tsono Mozeji adauza Yahova kuti: “Ndilekerereni Yahova, inepano nimbaneseka kulewalewa bwino-bwino kuyambira kale-kale, napo pomwe imwepo mwalewalewa na mtumiki wanune, thangwe nimbacedwa kulewalewa ndipo lirime langu ndakulemera.” 11 Tenepo Yahova adamubvunza kuti: “Mbani omwe adapasa munthu mulomo, ayai mbani omwe ambamucitisa kuti akhale bewewe, nkhuthu, kukwanisa kuwona ayai kukhala zimola? Kodi ndinepano lini Yahova? 12 Tenepo ndoko tsapanopapa, inepano nin’dzakhala nawe pakulewalewa, ndipo nin’dzakuuza* bzomwe ukalewe.” 13 Tsono Mozeji adati: “Ndilekerereni Yahova; tumizani munango omwe mungafune kumutumiza.” 14 Tenepo Yahova adakalipa kwene-kwene na Mozeji acimuuza kuti: “M’bale wako Aroni Mlevi ambakwanisa kulewalewa bwino. Pa nthawe ino iye ali mu njira akubwera kudzagumana nawe ndipo akakuwona, iye an’dzakomedwa kwene-kwene mu mtima mwace. 15 Tenepo lewalewa naye ndipo muuze mafala yomwe an’funika kukalewa; nin’dzakhala namwe ndipo nin’dzakuuzani* bzomwe mun’funika kucita. 16 Iye ndiye omwe an’kalewalewa m’mbuto mwa iwepo. Tenepo iye an’dzakhala nyakukulewalewera ndipo iwepo un’dzakhala ninga Mulungu kwa iye.* 17 Ndipo mpsimboyi ikakhale m’manja mwako ndipo umbakaiphatise basa pakucita bzizindikiro.”

18 Tenepo Mozeji adabwerera kwa amibzala wace Jetro, acikawauza kuti: “Ndaphata minyendo, ndikufuna kuyenda kwa abale wangu ku Edjipito kuti ndikawone penu iwo akana moyo.” Jetro adauza Mozeji kuti: “Ndoko mwa mtendere.” 19 Patsogolo pace, Yahova adauza Mozeji ku Midiyani kuti: “Ndoko, bwerera ku Edjipito, thangwe wanthu wentse omwe akhafuna kukupha adafa.”

20 Patsogolo pace, Mozeji adatenga mkazi wace na wana wace aciwapakiza pa bulu ndipo adayamba ulendo bwakubwerera ku Edjipito. Ndipo Mozeji adatengambo mpsimbo ya Mulungu wacadidi m’manja mwace. 21 Patsogolo pace, Yahova adauza Mozeji kuti: “Ukakafika ku Edjipito, ukawonesese kuti wacita bzakudabwisa bzentse bzomwe ndakupasa mphanvu kuti ukacite pamaso pa Farawo. Tsono inepano nin’dzamusiya kuti aumise mtima wace ndipo iye an’dzabvumiza lini kuti wanthu wangu acoke. 22 Ukauze Farawo kuti: ‘Yahova walewa kuti: “Jirayeri ni mwana wangu, mwana wangu wakuyamba kubadwa. 23 Ndikukuuza kuti, bvumiza mwana wangu kuyenda kukanditumikira. Tsono ukalamba kucita bzimwebzo, inepano nin’dzapha mwana wako wacimuna, wakuyamba kubadwa.”’”

24 Ali pa ulendobo, iwo adafika pa mbuto yomwe adagona. Anjo wa Yahova adagumana na Mozeji* ndipo akhafuna kupha mwana wace. 25 Pakumalizira pace, Zipora adatenga mwala wa ntsongolobwe* acicita mgwatidwe* mwana waceyo, ndipo adacitisa kuti kakhanda ka kumaso komwe adagwatako kakhuye nzayo za anjoyo* acilewa kuti: “Ndacita bzimwebzi thangwe kwa inepano, iwepo ndiwe namwali wacimuna wa mulopa.” 26 Tenepo anjoyo adamusiya kuti ayende. Pamwepo Zipora adati: “Namwali wacimuna wa mulopa” thangwe ra mgwatidwe.

27 Patsogolo pace Yahova adauza Aroni kuti: “Ndoko ku dambo kuti ukagumane na Mozeji.” Tenepo Aroni adayenda acikagumana naye pa phiri la Mulungu wacadidi ndipo adamumusa mwakucita kumumpsompsona. 28 Mozeji adauza Aroni mafala yentse ya Yahova na bzizindikiro bzentse bzomwe akhadamuuza kuti acite. 29 Patsogolo pace, Mozeji na Aroni adatsonkhanisa akulu-akulu wentse wa Jirayeri. 30 Aroni adawauza mafala yentse yomwe Yahova akhadauza Mozeji, ndipo Mozeji adacita bzizindikiro pamaso pa wanthuwo. 31 Na tenepo wanthuwo adakhulupira Mozeji. Pomwe iwo adabva kuti Yahova akufuna kuthandiza Ajirayeri ndipo akuwona mabvuto yomwe akugumana nayo, iwo adagodama acitsulimisa nkhope zawo mpaka pantsi.

5 Patsogolo pace, Mozeji na Aroni adayenda kwa Farawo acikamuuza kuti: “Yahova Mulungu wa Jirayeri walewa kuti: ‘Bvumiza wanthu wangu kuyenda ku dambo kuti akandicitire phwando.’” 2 Tsono Farawo adati: “Kodi Yahova ni mbani kuti ndimubvere mwa kubvuma kuti Ajirayeri ayende? Ine nimbamudziwa lini Yahova napang’onopo ndipo nin’bvumiza lini kuti Ajirayeri ayende.” 3 Tsono iwo adati: “Mulungu wa Ahebereu walewalewa nafe. Taphata minyendo, tin’funa kucita ulendo bwa ntsiku zitatu m’dambo kuti tikapereke ntsembe kwa Yahova Mulungu wathu; pakuti tikasaya kucita bzimwebzo, iye an’dzacitisa kuti tife na matenda ayai na xipada.” 4 Mambo wa ku Edjipito adawatawira kuti: “Mozeji na Aroni, thangwe ranyi imwepo mun’funa kusiisa wanthu basa lawo? Bwererani ku mabasa yanu.” 5 Ndipo Farawo adapitiriza kulewa kuti: “Wanthuwa mbaazinji m’dziko lino ndipo imwepo mun’funa kuwasiisa basa lawo?”

6 Pa ntsiku ibodzi-bodziyo, Farawo adauza omwe akhambacitisa wanthu kuphata basa lamphanvu na anyakunyang’anira mabasayo kuti: 7 “Lekani kuwapasa pomwe mauswa wanthuwa kuti ambaumbire matijolo. Ati ambakanyang’ane okha mauswayo. 8 Koma muwauze kuti ambakonze mulewengo ubodzi-bodzi wa matijolo ninga wa pakuyamba ule. Ndipo lekani kuwacepesera mulewengo wa matijoloyo, pakuti iwo akuyamba kukhala atofu. Ndipopa akulira acimbati: ‘Tin’funa kuyenda, tin’funa kukapereka ntsembe kwa Mulungu wathu!’ 9 Apaseni basa lizinji kwene-kwene kuti aleke kukhala na nthawe yakumbabvera bzakunama.”

10 Tenepo, wale omwe akhacitisa wanthuwo kuphata basa mwamphanvu na omwe akhanyang’anira mabasayo adayenda kukauza wanthuwo kuti: “Farawo walewa kuti, ‘ine nin’kupasani lini pomwe mauswa. 11 Ndokoni mukanyang’ane mwekha mauswa kuli-kwentse komwe mungafune, tsono basa lanu lin’cepesedwa lini.’” 12 Tenepo, wanthuwo adabalalika m’dziko lentse la Edjipito kuti akanyang’ane mapesi m’mbuto mwa mauswa. 13 Tsono wale omwe akhacitisa wanthu kuphata basa mwamphanvu adapitiriza kumbawauza kuti: “Ntsiku zentse, ali-wentse an’funika kumaliza basa lace ninga momwe akhacitira pa nthawe yomwe akhabwereseredwa mauswa.” 14 Anyakunyang’anira basa wa Ajirayeri omwe akhadasankhulidwa na akulu-akulu wa Farawo akhambamenyedwa ndipo akhambabvunzidwa kuti: “Thangwe ranyi dzulo na lero mulibe kuumba matijolo yomwe mudauzidwa ninga momwe mukhacitira pakuyamba?”

15 Tenepo, anyakunyang’anira wa Ajirayeri adayenda kwa Farawo acikamudandaulira kuti: “Thangwe ranyi mukucita bzimwebzi na atumiki wanufe? 16 Atumiki wanufe tikupasidwa lini mauswa, koma tikuuzidwa kuti: ‘Umbani matijolo!’ Ifepano tikumenyedwa napo kuti omwe akuphonya ni wanthu wanu.” 17 Tsono iye adati: “Imwepo mukukhala atofu, mukukhala atofu! Ndipopa mukulewa kuti: ‘Tin’funa kuyenda, tin’funa kukapereka ntsembe kwa Yahova.’ 18 Tenepo ndokoni, bwererani ku mabasa yanu! Mun’pasidwa lini mauswa, koma muumbe mulewengo ubodzi-bodzi wa matijolo ninga momwe mukhacitira pakuyamba.”

19 Pamwepo anyakunyag’anira wa Ajirayeriwo adawona kuti bzinthu bzikhadaipa kwene-kwene thangwe ra bzomwe akhadauzidwa kuti: “Lekani kucepesa mulewengo wa matijolo yomwe ali-wentse an’funikira kuumba ntsiku iri-yentse.” 20 Pomwe iwo adacoka pamaso pa Farawo, adakagumana na Mozeji pabodzi na Aroni omwe akhawadikhirira. 21 Pa nthawe imweyoletu iwo adalewa kuti: “Yahova awone ndipo akutongeni thangwe ra bzomwe mwacitabzi, pakuti mwatiipisa* kwa Farawo na kwa atumiki wace ndipo mwaikha xipada m’manja mwawo kuti atiphe.” 22 Pamwepo Mozeji adapemba kwa Yahova aciti: “Yahova, thangwe ranyi mukulekerera wanthuwa kubonera? Thangwe ranyi mudandituma? 23 Kucokera pa ntsiku yomwe ndidayenda kwa Farawo kukalewalewa m’dzina lanu, iye akucitira wanthuwa bzinthu bzakuipa kwene-kwene ndipo imwepo mukupulumusa lini wanthu wanu.”

6 Tenepo Yahova adauza Mozeji kuti: “Tsapano uti uwone bzomwe ndimucite Farawo. Na boko langu lamphanvu nin’mucitisa kuti iye awasiye ayende ndipo na boko langu lamphanvu nin’mungingimiza kuti awathothe m’dziko lace.”

2 Patsogolo pace Mulungu adauza Mozeji kuti: “Ine ndine Yahova. 3 Inepano ndikhawonekera kwa Abulahamu, Izaki na Djakobo ninga Mulungu Wamphanvu-zentse, tsono ndiribe kuwadziwisa dzina langu lakuti Yahova. 4 Ndipo ndidacita nawo mpangano wakuti nin’dzawapasa dziko la Kanani, dziko lomwe iwo adakhala ninga alendo. 5 Tsapano, inepano ndabva kubuula kwa wana wa Jirayeri, omwe akuphatisidwa basa la ukapolo na Edjipito ndipo ndakumbukira bza mpangano wangu.

6 “Tenepo, uza Ajirayeri kuti: ‘Ine ndine Yahova, nin’kucosani pa basa lamphanvu lomwe Aedjipito akukuboneresani nalo ndipo nin’kucosani pa ukapolo. Nin’dzaphatisa basa mphanvu zangu ndiciwapasa nyathwa kuti ndikupulumuseni. 7 Imwepo mun’dzakhala wanthu wangu ndipo inepano nin’dzakhala Mulungu wanu. Ndipo kulewa cadidi, imwepo mun’dzadziwa kuti ine ndine Yahova Mulungu wanu, omwe an’dzakucosani pa basa lamphanvu lomwe Aedjipito ambakuboneresani nalo. 8 Nin’dzakuyendesani ku dziko lomwe ndidalumbira kupasa Abulahamu, Izaki na Djakobo ndipo nin’dzakupasani dziko limwero ninga utaka bwanu. Ine ndine Yahova.’”

9 Patsogolo pace Mozeji adauza bzimwebzi Ajirayeri, tsono iwo alibe kufuna kumutetekera, thangwe akhawawidwa mu mtima na basa lamphanvu lomwe Aedjipito akhawaboneresa nalo.

10 Patsogolo pace, Yahova adauza Mozeji kuti: 11 “Ndoko kwa Farawo, mambo wa Edjipito ukamuuze kuti abvumize Ajirayeri kucoka mu dziko lace.” 12 Tenepo Mozeji adauza Yahova kuti: “Ajirayeri alibe kunditetekera; kodi Farawo angakanditetekere tani pakuti nimbaneseka kulewalewa bwino-bwino?” 13 Tenepo, Yahova adauza pomwe Mozeji na Aroni mafala yomwe akhafunika kukauza Ajirayeri na Farawo, mambo wa ku Edjipito kuti acose Ajirayeri mu dziko la Edjipitomo.

14 Madzina ya wanthu omwe akhali atsogoleri wa madzinza ni aya: Rubeni, mwana wakuyamba kubadwa wa Jirayeri, wana wace akhali awa: Hanoki, Palu, Eziromu na Karmi. Yamweya ndiyo mabanja ya dzinza la Rubeni.

15 Wana wa Simiyoni akhali awa: Jemuyeli, Jamini, Ohadi, Jakini, Zowari na Xauli mwana omwe adamubereka na mkazi wa ku Kanani. Yamweya ndiyo yakhali mabanja ya dzinza la Simiyoni.

16 Madzina ya wana wa Levi mwakubverana na mabanja yawo yakhali aya: Jerisoni, Kowati na Merari. Levi adafa pomwe akhana magole 137 yakubadwa.

17 Wana wa Jerisoni akhali Libini na Simei mwakubverana na mabanja yawo.

18 Wana wa Kowati akhali Amiramu, Izari, Hebroni na Uziyeli. Kowati adafa pomwe akhana magole 133 yakubadwa.

19 Wana wa Merari akhali Mali na Musi

Yamweya yakhali mabanja ya Alevi mwakubverana na madzinza yawo.

20 Amiramu adalowola Jokebedi, mpfumakazi ya pai wace. Ndipo Jokebediyo adamuberekera Aroni na Mozeji. Amiramu adafa pomwe akhana magole 137 yakubadwa.

21 Wana wa Izari akhali Kora, Nefegi na Zikiri.

22 Wana wa Uziyeli akhali Misayeli, Elizafani na Sitiri.

23 Aroni adalowola Eliseba, mwana wacikazi wa Aminadabi, mpfumakazi ya Nasoni. Eliseba adaberekera Aroni wana awa: Nadabi, Abihu, Eliyazari na Itamari.

24 Wana wa Kora akhali Asiri, Elikana na Abiyazafi. Yamweya yakhali mabanja ya wana wa Kora.

25 Eliyazari, mwana wa Aroni, adalowola m’bodzi mwa wana wa Putiyeli ndipo mkaziyo adamuberekera mwana wakucemeredwa Fineya.

Amwewa akhali atsogoleri wa m’dzinza la Levi, mwakubverana na mabanja yawo.

26 Yahova adauza Aroni na Mozeji kuti: “Cosani Ajirayeri mu dziko la Edjipito m’mathimu yakulinganizidwa.” 27 Mozeji na Aroni ndiwo omwe adakalewalewa na Farawo, mambo wa ku Edjipito kuti abvumize Ajirayeri kucoka mu Edjipito.

28 Pa ntsiku yomwe Yahova adalewalewa na Mozeji ku dziko la Edjipito, 29 Yahovayo adauza Mozeji kuti: “Ine ndine Yahova. Ukauze Farawo, mambo wa Edjipito, bzentse bzomwe nditi ndikuuze.” 30 Tenepo, Mozeji adauza Yahova kuti: “Inepano bzimbandinesa kulewalewa bwino-bwino, tsono Farawo angakanditetekere tani?”

7 Patsogolo pace, Yahova adauza Mozeji kuti: “Ona! Iwepo un’dzakhala ninga Mulungu* kwa Farawo ndipo m’bale wako Aroni an‘dzakhala mprofeta wako. 2 Umbakamuuze bzentse bzomwe nditi nimbakuuze ndipo m’bale wako Aroni an’kalewalewa na Farawo, ndipo iye an’dzabvumiza kuti Ajirayeri acoke m’dziko lace. 3 Tsono inepano nin’dzasiya Farawo kuti aumise mtima wace, ndipo nin’dzacita bzakudabwisa bzizinji m’dziko la Edjipito. 4 Tsono Farawo an’kakutetekerani lini. Tenepo inepano nin’dzaphatisa basa mphanvu zangu mu dziko la Edjipito ndicicosa bzulu na bzulu bza wanthu* wangu omwe ni Ajirayeri, mwakupasa nyathwa ikulu Aedjipito. 5 Ndipo Aedjipito an’dzadziwa kuti ine ndine Yahova, ndikadzafuthula boko langu ndicipasa nyathwa Aedjipitowo na kucosa Ajirayeri pakati pawo.” 6 Mozeji na Aroni adacitadi ndendende ninga momwe Yahova akhadawauzira; iwo adacitadi tenepo. 7 Mozeji akhana magole 80 yakubadwa ndipo Aroni akhana magole 83 pomwe iwo adayenda kukalewalewa na Farawo.

8 Yahova adauza Mozeji na Aroni kuti: 9 “Farawo akakakuuzani kuti: ‘Citani cakudabwisa,’ iwepo ukauze Aroni kuti: ‘Tenga mpsimbo ndipo uithuse pantsi pamaso pa Farawo.’ Mpsimboyo in’kasanduka cinyoka cikulu.” 10 Tenepo Mozeji na Aroni adayenda kwa Farawo acikacita ndendende ninga momwe Yahova akhadawauzira. Aroni adathusa mpsimbo yace patsogolo pa Farawo na atumiki wace ndipo mpsimboyo idasanduka cinyoka cikulu. 11 Tenepo Farawo adacemerambo amuna wace wanzeru, anyamatsenga na antsembe wakucita bzamatsenga wa ku Edjipito, ndipo iwo adacitambo bzibodzi-bodzibzo na matsenga yawoyo. 12 Ali-wentse wa iwo adathusambo mpsimbo yace pantsi ndipo mpsimbozo zidasaduka nyoka zikulu-zikulu, tsono mpsimbo ya Aroni idakhudyula mpsimbo zawozo. 13 Napo bzikhali tenepo, Farawo adapitiriza kuumisa mtima wace ndipo iye alibe kuwatetekera ninga momwe Yahova akhadawauzira.

14 Patsogolo pace Yahova adauza Mozeji kuti: “Farawo waumisa mtima wace. Iye walamba kuti Ajirayeri ayende. 15 Mangwana macibese-bese, uyende kuna Farawo. Iye an’dzakhala akuyenda ku Mkulo wa Nilo, ndipo iwepo ukamudikhirire m’mphepete mwa mkuloyo; ndipo udzanyamule mpsimbo yomwe idasanduka nyoka ire. 16 Ndipo ukamuuze kuti: ‘Yahova Mulungu wa Ahebereu wandituma kwa imwepo, ndipo wandiuza kuti: “Bvumiza wanthu wangu kuti ayende kukanditumikira m’dambo,” tsono imwepo mukanati kubvera mpaka pano. 17 Yahova walewa kuti: “Iwepo un’dzadziwa kuti ine ndine Yahova thangwe ra bzinthu bzomwe nin’funa kucitabzi. Nin’menya madzi ya mu Mkulo wa Nilo na mpsimbo yomwe iri m’manja mwanguyi ndipo madziyo yanisanduka mulopa. 18 Ntsomba za mu Mkulo wa Nilo zinifa ndipo mkuloyo un’nunkha mwakuti Aedjipito an’dzakwanisa lini kumwa pomwe madzi ya mu mkuloyo.”’”

19 Patsogolo pace Yahova adauza Mozeji kuti: “Uza Aroni kuti atenge mpsimbo yace acilata madzi ya mu dziko la Edjipito, mikulo yentse, tumikulo* twentse, mathawale yentse na mbuto zentse zakukoyera madzi kuti zisanduke mulopa. M’dziko lentse la Edjipito mun’dzakhala na mulopa, napo m’bzombo bzawo bzakukonzedwa na miti na minyala.” 20 Pa nthawe imweyoletu, Mozeji na Aroni adacita bzomwe Yahova akhadawauzabzo. Aroni adatenga mpsimbo yace acimenya madzi ya mu Mkulo wa Nilo, Farawo na atumiki wace akuwona, ndipo madzi yentse ya mu mkuloyo yadasanduka mulopa. 21 Tenepo ntsomba za mu Mkulo wa Nilo zidafa, ndipo mkuloyo udayamba kununkha. Aedjipito alibe kukwanisa kumwa madzi ya mu Mkulo wa Niloyo ndipo m’dziko lentse la Edjipito mukhana mulopa okha-okha.

22 Tsono antsembe wakucita bzamatsenga wa ku Edjipito adacitambo bzibodzi-bodzi na matsenga yawo, bzomwe bzidacitisa Farawo kupitiriza kuumisa mtima wace ndipo alibe kubvera Mozeji na Aroni ninga momwe Yahova akhadawauzira. 23 Patsogolo pace Farawo adabwerera kumui kwace, ndipo akhalibe nabzo basa bzomwe akhadawona bzire. 24 Tenepo Aedjipito wentse akhafukula micera m’mphepete mwa Mkulo wa Nilo kuti agumane madzi yakumwa, thangwe angadakwanisa lini kumwa madzi ya mu mkuloyo. 25 Padapita ntsiku 7 kucokera pomwe Yahova adasandusa madzi ya mu mkulo wa Nilo kukhala mulopa.

8 Patsogolo pace Yahova adauza Mozeji kuti: “Ndoko kwa Farawo ndipo ukamuuze kuti: ‘Yahova walewa kuti: “Bvumiza wanthu wangu kuti ayende kukanditumikira. 2 Tsono ukapitiriza kulamba kuti iwo ayende, nin’dzabweresa muliri wa acule m’dziko lako lentse. 3 Mkulo wa Nilo un’dzadzala na acule ndipo iwo an’dzapita m’nyumba mwako, m’cipinda cako, pa kama pako, m’nyumba za atumiki wako, za wanthu wako, m’maforno mwako na m’bzombo bzako bzakumunyira* tirigu. 4 Aculewo an’dzabwera kwa iwepo, kwa wanthu wako na atumiki wako wentse.”’”

5 Patsogolo pace Yahova adauza Mozeji kuti: “Uza Aroni kuti: ‘Tenga mpsimbo yako ndipo ulate mikulo, tumikulo twa mkulo wa Nilo na mathawale, kuti acule wentse omwe ali m’mwemo ayende m’dziko la Edjipito.’” 6 Tenepo Aroni adafuthula boko lace acilata madzi ya mu Edjipito, ndipo acule adacoka m’mwemo acimpsinkha dziko lentse la Edjipito. 7 Antsembe wakucita bzamatsenga adacitambo matsenga yawo acibweresa acule mu dziko la Edjipito. 8 Tenepo Farawo adacemera Mozeji na Aroni aciwauza kuti: “Kumbirani Yahova kuti acose aculewa kwa inepano na kwa wanthu wangu; pakuti inepano ndikufuna kubvumiza wanthu wanu akapereke ntsembe kwa Yahova.” 9 Tenepo Mozeji adauza Farawo kuti: “Lewani ndimwepo ntsiku yomwe mukufuna kuti ndikakukumbirireni kwa Mulungu kuti acose acule kwa imwepo, atumiki wanu, wanthu wanu na m’nyumba zanu. Tsono aculewo an’dzandosala mu mkulo wa Nilo basi.” 10 Tenepo Farawo adatawira kuti: “Mangwana.” Ndipo Mozeji adati: “Bzikhale ninga momwe mwaleweramu kuti mudziwe kuti palibe wakundendemerana na Yahova Mulungu wathu. 11 Aculewo an’dzacoka kwa imwepo, m’nyumba zanu, kwa atumiki wanu na kwa wanthu wanu. Iwo an’dzandosala mu mkulo wa Nilo basi.”

12 Tenepo Mozeji na Aroni adacoka pamaso pa Farawo, ndipo Mozeji adakakumbira Yahova kuti acose acule omwe akhadabweresera Farawo. 13 Tenepo, Yahova adacitadi ninga momwe Mozeji adakumbirira; ndipo acule omwe akhali m’nyumba, m’makintale na m’minda adayamba kufa. 14 Aedjipitowo adayamba kugwezeka midu mikulu-mikulu ya aculewo ndipo dziko lentsenelo lidayamba kununkha. 15 Pomwe Farawo adawona kuti muliri wa aculewo wamala, iye adaumisa mtima wace ndipo adalamba kubvera Mozeji na Aroni ninga momwe Yahova akhadalewera.

16 Yahova adauza Mozeji kuti: “Uza Aroni kuti: ‘Tenga mpsimbo yako ucimenya pfumbi la pantsi ndipo pfumbiro lin’dzasanduka mbudu m’dziko lentse la Edjipito.’” 17 Iwo adacitadi bzimwebzo. Tenepo Aroni adafuthula boko lace acimenya pfumbi la pantsi na mpsimbo yace, ndipo pfumbiro lidasanduka mbudu ziciyamba kuluma wanthu na bzifuwo. Pfumbi lentse la m’dziko la Edjipito lidasanduka mbudu. 18 Antsembe wakucita bzamatsenga adayezera kucitambo bzibodzi-bodzibzo, tsono adatazira ndipo mbuduzo zidayamba kuluma wanthu na bzifuwo. 19 Tenepo antsembe wakucita bzamatsengawo adauza Farawo kuti: “Cimweci ni cala ca Mulungu!” Tsono Farawo adapitiriza kuumisa mtima wace ndipo alibe kubvera Mozeji na Aroni ninga momwe Yahova akhadalewera.

20 Patsogolo pace Yahova adauza Mozeji kuti: “Udzalamuke mangwana macibese-bese ndipo udzayende kukagumana na Farawo! Iye an’dzakhala akuyenda ku mkulo! Ndipo ukamuuze kuti: ‘Yahova walewa kuti: “Bvumiza wanthu wangu kuti ayende kukanditumikira. 21 Tsono ukasaya kubvumiza kuti wanthu wangu ayende, Inepano nin’dzatumiza abulula* kwa iwepo, kwa atumiki wako, kwa wanthu wako na m’nyumba zanu; ndipo m’nyumba za Aedjipito mun’dzadzala na abululawo ndipo an’dzagumanika pa mbuto iri-yentse yomwe ina wanthu.* 22 Pa ntsiku imweyo nin’dzapambula mphimpha ya Goseni komwe kumbakhala wanthu wangu. Kumweko kun’dzakhala kulibe bulula ne na m’bodziyo; ndikadzacita bzimwebzi, un’dzadziwa kuti ine Yahova ndiri mu dziko lino. 23 Nin’dzacitisa kuti pawoneke kusiyana pakati pa wanthu wangu na wanthu wako. Bzimwebzi bziti bzidzacitike mangwana.”’”

24 Tenepo Yahova adacitadi bzimwebzi, abulula azinji adayamba kupita m’nyumba mwa Farawo, m’nyumba za atumiki wace na m’dziko lentse la Edjipito. Dziko lentsenero lidasakazidwa na abululawo. 25 Pakumalizira pace, Farawo adacemera Mozeji na Aroni aciwauza kuti: “Ndokoni, kaperekeni ntsembe kwa Mulungu wanu, koma mucite bzimwebzo m’dziko lino.” 26 Tsono Mozeji adalewa kuti: “Mpsakuthemera lini kwa ifepano kucita bzimwebzo m’dziko lino; pakuti ntsembe zomwe tikufuna kupereka kwa Yahova Mulungu wathu n’zakunyantsa kwa Aedjipito. Tikapereka ntsembe zomwe Aedjipito ambaziwona kuti n’zakunyantsa, kodi iwo an’dzatithusira lini minyala? 27 Ifepano tin’dzacita ulendo bwa ntsiku zitatu kuyenda ku dambo ndipo kumweko tin’kapereka ntsembe kwa Yahova Mulungu wathu ninga momwe iye adatiuzira.”

28 Tsono Farawo adati: “Inepano nin’kubvumizani kuti muyende ku dambo kuti mukapereke ntsembe kwa Yahova Mulungu wanuyo, koma lekani kuyenda kutali kwene-kwene. Tsono ndikumbirire kwa Mulungu wanu kuti acose abululawa.” 29 Tenepo Mozeji adalewa kuti: “Inepano ndikucoka pano, ndikuyenda kukakukumbirirani kwa Yahova ndipo mangwana, abululawa an’dzacoka kwa imwepo a Farawo, atumiki wanu na wanthu wanu. Tsono imwepo a Farawo lekani kutinyengeza pomwe mwakusaya kubvumiza wanthu kuti ayende kukapereka ntsembe kwa Yahova.” 30 Mozeji adacoka pamaso pa Farawo ndipo adayenda kukadandaulira Yahova. 31 Yahova adacitadi bzomwe Mozeji adakumbira ndipo abululawo adacoka kwa Farawo, kwa atumiki wace na kwa wanthu wace. Ndipo palibe kusala bulula ne na m’bodziyo. 32 Tsono Farawo adaumisa pomwe mtima wace, ndipo alibe kubvumiza wanthuwo kucoka.

9 Tenepo Yahova adauza Mozeji kuti: “Ndoko kwa Farawo ukamuuze kuti: ‘Yahova Mulungu wa Ahebereu walewa kuti: “Bvumiza wanthu wangu kuti ayende kukanditumikira. 2 Tsono ukalamba kuwabvumiza kuti ayende ucipitiriza kuwaletsa, 3 dziwa kuti boko la Yahova lin’dzapha bzifuwo bzanu. Pan’dzakhala na cisi comwe cin’dzapha makavalo yanu, mabulu yanu, ngamira zanu, ng’ombe zanu na mabira yanu. 4 Tsono Yahova an’dzasiyanisa pakati pa bzifuwo bza Ajirayeri na bzifuwo bza Aedjipito, ndipo palibe cifuwo na cibodzico ca Ajirayeri comwe cin’dzafa.”’” 5 Kuthumizira bzimwebzi, Yahova adaikhiratu nthawe yomwe an’dzacita bzimwebzi mwakulewa kuti: “Mangwana Yahova an’dzacita bzimwebzi m’dziko lino.”

6 Mangwana yace Yahova adacitadi bzimwebzi ndipo bzifuwo bza mtundu uli-wentse bza Aedjipito bzidayamba kufa, koma palibe cifuwo ne na cibodzico ca Ajirayeri comwe cidafa. 7 Pomwe Farawo adatuma atumiki wace kuti akawone, iwo adakawona kuti palibe cifuwo ne na cibodzico ca Ajirayeri comwe cikhadafa. Napo bzikhali tenepo, Farawo adapitiriza kuumisa mtima wace ndipo alibe kubvumiza kuti Ajirayeri ayende.

8 Yahova adauza Mozeji na Aroni kuti: “Dzazani m’manja mwanu dotha la mu uvuni, ndipo Mozeji akalimwaze m’dzaulu pamaso pa Farawo. 9 Dothalo lin’kasanduka pfumbi m’dziko la Edjipito, ndipo lin’dzabweresa mapute ya mafinya kwa wanthu na bzifuwo m’dziko lentse la Edjipito.”

10 Tenepo iwo adatenga dotha pa uvuni aciyenda kwa Farawo, ndipo Mozeji adamwaza dothalo m’dzaulu licibweresa mapute yomwe yakhana mafinya kwa wanthu na kwa bzifuwo. 11 Antsembe wakucita bzamatsenga adatazira kuyenda kukawonana na Mozeji thangwe iwo pabodzi na Aedjipito wentse akhana mapute. 12 Tsono Yahova adalekerera Farawo kuumisa mtima wace ndipo alibe kuwatetekera ninga momwe Yahova akhadauzira Mozeji.

13 Patsogolo pace Yahova adauza Mozeji kuti: “Umuke mwangwana ku macibese-bese, uyende kwa Farawo ndipo ukamuuze kuti: ‘Yahova Mulungu wa Ahebereu walewa kuti: “Bvumiza wanthu wangu kuti ayende kukanditumikira. 14 Pakuti ukalamba nin’bweresa muliri kwa iwepo, kwa atumiki wako na kwa wanthu wako, kuti iwepo udziwe kuti palibe munango wakundendemerana na inepano pa dziko lentse la pantsi. 15 Pakuti inepano ningadafuthula kale boko langu ndicipasa nyathwa na muliri iwepo na wanthu wako, ndipo ungadakhala wapfudzidwa kale pa dziko la pantsi. 16 Tsono inepano ndakusiya na moyo mpaka lero kuti ndilatize mphanvu zangu nakuti dzina langu lidziwike pa dziko lentse la pantsi. 17 Kodi iwepo ukadapitiriza kucita bzinthu mwakubzikuza na wanthu wangu mwakulamba kuwabvumiza kuti ayende? 18 Mangwana pa nthawe ninga ino nin’dzabvumbisa cinvula camphanvu ca matalala, comwe cikanati kucitika kale m’dziko lentse la Edjipito. 19 Tenepo tuma wanthu wako kuti akacose bzifuwo na bzinthu bzako bzentse bzomwe bziri kunja, pakuti munthu ali-wentse na bzifuwo bzomwe bzin’dzagumanika kunja sikuti m’nyumba, bzin’dzafa na matalalayo.”’”

20 Ali-wentse omwe akhagopa Yahova pakati pa atumiki wa Farawo adabweresa mwakamfulumize bzifuwo bzace na atumiki wace aciwapitisa m’nyumba. 21 Tsono ali-wentse omwe alibe kubvera mafala ya Yahova adasiya atumiki wace na bzifuwo bzace kunja.

22 Tenepo Yahova adauza Mozeji kuti: “Futhula boko lako ucilata kudzulu, kuti matalala yabvumbe mu dziko lentse la Edjipito kuti yagwere wanthu, bzifuwo na bzakumera bzentse mu dziko lentse la Edjipito.” 23 Tenepo Mozeji adalata kudzulu na mpsimbo yace ndipo Yahova adacitisa kuti kugunde, kugwe matalala na moto.* Yahova adabvumbisa nvula ya matalala m’dziko la Edjipito. 24 Matalalayo yadayamba kubvumba ndipo bziphaliwali bzikhacetumambo pakati pa matalalayo. Cinvula ca matalalaco cikhali camphanvu kwene-kwene mwakuti cikhanati kale kucitika mu Edjipito. 25 Matalalayo yadadzonga bzinthu bzentse bza m’dzikolo. Yadapha wanthu, bzifuwo ndipo yadadzongambo bzakumera bzentse bza m’minda na miti yentse ya m’dzikolo. 26 Tsono ku Goseni komwe Ajirayeri akhakhala kulibe kubvumba matalala.

27 Tenepo Farawo adacemeresa Mozeji na Aroni aciwauza kuti: “Tsapano ndazindikira kuti ndaphonya, Yahova ngwakulungama. Inepano na wanthu wangu ndife wakuphonya. 28 Ndidandaulireni kwa Yahova kuti amalise kugundaku na matalalaya. Inepano nin’kubvumizani kuti muyende ndipo ne mun’dzakhala lini pomwe kuno.” 29 Tenepo Mozeji adati: “Ndikandocoka mu mzinda muno, nin’kafuthula manja yangu kwa Yahova ndipo kugunda na matalalaya bzinimala, kuti imwepo mudziwe kuti dziko la pantsi nda Yahova. 30 Tsono napo bzimwebzi bzicitike, ndikudziwa kuti imwepo pabodzi na atumiki wanu mun’dzagopa lini basi Yahova Mulungu.”

31 Linyo* na sevada bzidadzongeka, thangwe sevada ikhadakhuma kale ndipo linyo ikhadacita kale maluwa. 32 Tsono tirigu na sipelita* bziribe kudzongeka thangwe bzimbacedwa kukhuma. 33 Tenepo Mozeji adacoka pamaso pa Farawo acibula mu mzindamo, iye adafuthula manja yace kwa Yahova ndipo kugunda na matalala bzidaima ndipo nvula idakasa pa dziko la pantsi. 34 Pomwe Farawo adawona kuti nvula yakasa ndipo matalala na kugunda bzaima, adacita pomwe pikado ndipo iye pabodzi na atumiki wace adaumisa mitima yawo. 35 Farawo adapitiriza kuumisa mtima wace ndipo alibe kubvumiza kuti Ajirayeri ayende ninga momwe Yahova akhadauzira Mozeji.

10 Tenepo Yahova adauza Mozeji kuti: “Ndoko kwa Farawo, pakuti ndamusiya kuti iye pabodzi na atumiki wace aumise mitima yawo kuti ndicite bzakudabwisa bzangu pamaso pace, 2 nakuti imwepo mudzauzembo wana wanu na azukulu wanu bza nyathwa yomwe ndidabweresera Aedjipito na bzakudabwisa bzomwe ndacita pakati pawo; na bzimwebzi imwepo mun’dzadziwa kuti ine ndine Yahova.”

3 Tenepo Mozeji na Aroni adayenda kwa Farawo acikamuuza kuti: “Yahova Mulungu wa Ahebereu walewa kuti: ‘Kodi iwepo un’pitiriza kusaya kundibvera mpaka lini? Bvumiza wanthu wangu kuti ayende kukanditumikira. 4 Pakuti ukapitiriza kuletsa wanthu wangu kuti ayende, mangwana nin’dzabweresa bziwala m’dziko lako. 5 Bziwalabzo bzin’dzampswinkha dziko lentse mwakuti mun’dzakwanisa lini kuwona pantsi. Ibzo bzin’dzadya bzinthu bzentse bzomwe bziribe kupfudzidwa na matalala, ndipo bzin’dzadyambo miti yentse yomwe ikuyamba kumera. 6 Bziwalabzo bzin’dzadzala m’nyumba mwako, m’nyumba mwa atumiki wako na m’nyumba zentse za Aedjipito, mwakuti azibereki wako ne aziyavu wako akanati awona kale bzimwebzi kuyambira pa ntsiku yomwe adabadwa mu dziko lino mpaka lero.’” Patsogolo pace Mozeji adacoka pamaso pa Farawo.

7 Atumiki wa Farawo adamuuza kuti: “Kodi munthuyu an’pitiriza kutiboneresa* mpaka lini? Asiyeni wanthuwa ayende akatumikire Yahova Mulungu wawo. Imwepo mukuwona lini kuti dziko la Edjipito ladzongeka?” 8 Tenepo Mozeji na Aroni adayendesedwa pomwe kwa Farawo, ndipo iye adawauza kuti: “Ndokoni, katumikireni Yahova Mulungu wanuyo. Tsono mbani maka-maka omwe aniyendawo?” 9 Mozeji adatawira kuti: “Tiniyenda na maswaka yathu, nkhalamba zathu, wana wathu wacimuna, wana wathu wacikazi, mabira yathu na ng’ombe zathu, thangwe tikufuna kukacitira phwando Yahova.” 10 Farawo adawauza kuti: “Ndikakubvumizani kuti muyende pabodzi na wana wanu, kulewa cadidi Yahova anamwedi! Thangwe ndikudziwa kuti mukufuna kucita cinthu cakuipa. 11 Nee! Amuna okha ndiwo omwe angayende kukatumikira Yahova, thangwe ndibzo bzomwe imwepo mudakumbira.” Tenepo, iwo adathothedwa pamaso pa Farawo.

12 Yahova adauza Mozeji kuti: “Futhula boko lako ucilata dziko la Edjipito kuti bziwala bzibwere m’dzikolo bzicidya bzakumera bzentse m’dzikolo, bzentse bzomwe bzidasiidwa na matalala.” 13 Nthawe imweyoletu, Mozeji adalata dziko la Edjipito na mpsimbo yace, ndipo Yahova adabweresa conzi kucokera kumabvadzuwa cicimenya dziko la Edjipito masikati yentse na usiku bwentse. Pomwe kudacena, conzi ca kumabvadzuwaco cidabweresa bziwala. 14 Bziwalabzo bzidabwera m’dziko lentse la Edjipito, bzicibalalika m’mphimpha zentse za mu Edjipitomo. Umweyu ukhali muliri wakugopswa kwene-kwene; bzikhanati bzacitika kale kuwoneka bziwala bzizinji tenepa ndipo bzin’dzacitika lini pomwe. 15 Bziwalabzo bzidampsinkha pantsi pentse, mwakuti dzikolo lidakhala biii* na bziwalabzo; ibzo bzidadya bzakumera bzentse bza m’dzikolo na bzisapo bza miti yomwe iribe kupfudzidwa na matalala. Ndipo mu dziko lentse la Edjipito mulibe kusala tsamba ne na libodziro liwisi m’miti ne cakumera ciri-centse ciwisi.

16 Tenepo Farawo adacemeresa Mozeji na Aroni mwakamfulumize aciwauza kuti: “Ndaphonyera Yahova Mulungu wanu ndipo ndaphonyerambo imwepo. 17 Tsapano ndaphata minyendo, lekererani pikado yangu ulendo buno bokha, ndipo kumbirani Yahova Mulungu wanu kuti acose muliri wakuphayu.” 18 Tenepo Mozeji adacoka pamaso pa Farawo acikadandaulira Yahova. 19 Yahova adacinja komwe kukhacoka mphepo aciyambisa conzi camphanvu kucokera kumadokero. Conzico cidatenga bziwala bzentse cicikabzithusa mu Nyanza Ifuira. Ndipo mu Edjipito mwentse mulibe kusala ciwala ne na cibodzico. 20 Tsono Yahova adalekerera kuti Farawo aumise mtima wace, ndipo iye alibe kubvumiza Ajirayeri kucoka.

21 Patsogolo pace Yahova adauza Mozeji kuti: “Futhula boko lako ucilata kudzulu kuti dziko lentse la Edjipito likhale na mdima, mdima wakuti bwerani mudzawone.” 22 Pa nthawe imweyoletu Mozeji adafuthula boko lace acilata kudzulu, ndipo kudabwera mdima wakuti bwerani mudzawone m’dziko lentse la Edjipito kwa ntsiku zitatu. 23 Iwo akhakwanisa lini kuwonana ndipo palibe omwe adacoka pa mbuto yomwe akhali kwa ntsiku zitatu; tsono komwe Ajirayeri akhakhala kukhana ceza. 24 Farawo adacemera Mozeji acimuuza kuti: “Ndokoni, katumikireni Yahovayo. Ndokoni pabodzi na wana wanu, tsono mabira yanu na ng’ombe zanu bzisale.” 25 Tsono Mozeji adati: “Imwepo mutipase* bzifuwo kuti tikaphe, ticikapereka ntsembe zakucita kutentha kwa Yahova Mulungu wathu. 26 Bzifuwo bzathu bzentse tiniyenda nabzo. Palibe cifuwo ne na cibodzico comwe cin’sala, thangwe ifepano tin’kaphatisa basa bzinango mwa bzifuwobzo pakunamata Yahova Mulungu wathu. Ndipo tikudziwa lini kuti ni bzifuwo bziponi bzomwe tin’kaphatisa basa pa kunamata Yahova tikakafika kumweko.” 27 Tenepo Yahova adalekerera kuti Farawo aumise mtima wace ndipo iye alibe kuwabvumiza kucoka. 28 Farawo adamuuza kuti: “Coka pamaso pangu! Ndipo leka kuyezera kudzabwera pomwe kudzagumana nande, thangwe pa ntsiku imweyo, un’dzaferatu.” 29 Tenepo Mozeji adati: “Nin’cita ninga momwe mwaleweramu, nin’bwera lini pomwe kudzawonana namwe.”

11 Yahova adauza Mozeji kuti: “Nin’bweresa pomwe muliri munango kwa Farawo na kwa Aedjipito. Patsogolo pace iye an’dzakusiyani kuti muyende. Akadzakubvumizani kuyenda, iye an’dzacita kukuthothani. 2 Tsapano uza wanthuwa, amuna na akazi wentse kuti akumbire azivizinyu wawo bzinthu bza prata* na bza oro.” 3 Ndipo Yahova adacitisa Aedjipito kudekera mtima Ajirayeri. Kuthumizira bzimwebzi, Mozeji akhalemekezedwa kwene-kwene m’dziko la Edjipito, kuyambira atumiki wa Farawo pabodzi na wanthu wentse.

4 Tenepo Mozeji adati: “Yahova walewa kuti: ‘Pakati pa usiku nin’dzapita mu Edjipito, 5 ndipo mwana ali-wentse wakuyamba kubadwa mu dziko la Edjipito an’dzafa, kuyambira mwana wakuyamba kubadwa wa Farawo omwe adakhala pa mpando wace wa umambo mpaka mwana wakuyamba kubadwa wa mtumiki wacikazi omwe akuphata basa na mwala wakupeyera wa m’manja na mwana wakuyamba kubadwa wa bzifuwo bzentse. 6 M’dziko lentse la Edjipito wanthu an’dzalira kwene-kwene, kulira komwe kukanati kale kucitika ndipo kun’dzacitika lini pomwe. 7 Tsono palibe cinthu ciri-centse comwe cin’dzacitikira Ajirayeri ne bzifuwo bzawo. Napo mbwaya in’dzauta lini kuti iwagopswe, kuti imwepo mudziwe kuti Yahova ambakwanisa kusiyanisa Aedjipito na Ajirayeri.’ 8 Atumiki wako wentse an’dzabwera kwa ine ndipo an’dzagodama pamaso pangu acilewa kuti: ‘Ndoko, iwepo pabodzi na wanthu wako wentse.’ Bzimwebzi bzikadzamala kucitika, nin’dzacoka.” Tenepo, Mozeji adacoka pamaso pa Farawo adakalipa kwene-kwene.

9 Yahova adauza Mozeji kuti: “Farawo an’dzakutetekera lini, kuti bzakudabwisa bzangu bzithumizirike mu dziko la Edjipito.” 10 Mozeji na Aroni adacita bzakudabwisa bzentsenebzi pamaso pa Farawo, koma Yahova adalekerera kuti Farawoyo aumise mtima wace, mwakuti iye alibe kubvumiza Ajirayeri kucoka m’dziko lace.

12 Yahova adauza Mozeji na Aroni mu dziko la Edjipito kuti: 2 “Mwezi uno unikhala mwezi wanu wakuyamba wa pa gole.* Gole lanu liniyamba na mwezi uno. 3 Uza Ajirayeri wentse kuti: ‘Pa ntsiku yacikhumi ya mwezi uno, munthu ali-wentse asankhulire banja lace mwana m’bodzi wa bira. Mui uli-wentse atenge mwana wa bira m’bodzi. 4 Tsono penu wanthu wa pamuipo mbang’ono-ng’ono mwakuti an’kwanisa lini kumala kudya bira wentseneyo, acemere avizinyu wawo kuti adzadye nawo pabodzi m’nyumba mwawo, mwakubverana na kuwanda kwa wanthuwo. Tsono mukanati kuwacemera, yambani mwadziwa kuwanda kwa wanthuwo nakuti ali-wentse angadye nyama yakuwanda tani. 5 Birayo an’funika kukhala wacimuna wa gole libodzi acileka kukhala wakupunduka. Mungasankhule mwana wa bira ayai wa mbuzi. 6 Mumukoye mpaka pa ntsiku yaci 14 ya mwezi uno. Banja liri-lentse la Ajirayeri lidzaphe birayo kumaulo dzuwa likandomira. 7 Iwo an’funika kudzatenga mulopa wace pang’ono, aciupalangira m’mphepete na padzulu pa aro ya pa msuwo pa nyumba yomwe an’dzadyera birayo.

8 “‘Iwo adzadye nyamayo usiku bwa ntsiku imweyo. An’funika kudzaiwotca pamoto acidzaidya na pau zakusaya fermento na masamba yakuwawa. 9 Nyamayo lekani kudzaidya iwisi ayai yakuphika na madzi. Koma mudzaiwotce ipulumira kuphatanidza na msolo wace, minyendo yace na bza m’mimba. 10 Lekani kudzaisiya mpaka ku macibese. Tsono iri-yentse yomwe inisala mpaka macibese mudzaitenthe pamoto. 11 Mun’funika kudzaidya mudamanga bande m’ciuno mwanu, mudabvala xango kunzayo zanu ndipo mudaphatirira mpsimbo m’manja mwanu; ndipo mun’funika kudzaidya mwakamfulumize. Imweyi ni Paskwa ya Yahova. 12 Pakuti usiku bumwebo nin’dzapita mu dziko la Edjipito ndipo nin’dzapha wana wentse wakuyamba kubadwa m’dzikolo, kuyambira wanthu mpaka bzifuwo; ndipo nin’dzanyazisa mirungu yentse ya mu Edjipito. Ine ndine Yahova. 13 Mulopayo un’dzakhala cizindikiro pa nyumba zomwe mukukhala; ndipo inepano ndikadzawona mulopayo nin’dzakupitirirani ndipo muliriyo un’dzakugwerani lini ne kukupfudzani pomwe nin’dzakhala ndikupasa nyathwa dziko la Edjipito.

14 “‘Imwepo mun’funika kumbakumbukira ntsiku imweyi, ndipo mumbacitire phwando Yahova ku mibadwo yanu yentse. Mumbasekerere ntsiku imweyi, pakuti limweri ni lamulo mpaka kale-kale. 15 Mun’funika kudzadya pau zakusaya fermento kwa ntsiku 7. Pa ntsiku yakuyamba, mun’funika kudzacosa fermento zentse m’nyumba mwanu, pakuti munthu ali-wentse omwe an’dzadya cinthu comwe cina fermento kuyambira pa ntsiku yakuyamba mpaka pa ntsiku yaci 7, munthu umweyo an’funika kudzaphedwa. 16 Pa ntsiku yakuyamba mun’funika kudzacita mtsonkhano wakupambulika. Ndipo pa ntsiku yaci 7 mudzacite pomwe mtsonkhano wakupambulika. Ndipo mun’funika lini kudzaphata basa liri-lentse pa ntsiku zimwezi, comwe ali-wentse angadzacite ni kuphika cakudya cakuti adzadye pa ntsiku imweyo basi.

17 “‘Mumbacite phwando la pau zakusaya fermento, pakuti pa ntsiku imweyi inepano nin’dzakucosani mwentse mu dziko la Edjipito. Ndipo m’badwo wanu wentse un’funikambo kumbakumbukira ntsiku imweyi, limweri ni lamulo mpaka kale-kale. 18 Pa ntsiku yaci 14 ya mwezi wakuyamba dzuwa likandomira, imwepo mun’funika kudzadya pau zakusaya fermento mpaka pa ntsiku yaci 21 ya mweziyo, dzuwa likandomira. 19 M’nyumba mwanu mun’funika lini kudzagumanika fermento kwa ntsiku 7. Pakuti munthu ali-wentse omwe an’dzadya cinthu comwe cina fermento kuyambira mulendo mpaka Mjirayeri, munthu umweyo an’funika kudzaphedwa. 20 Imwepo mun’funika lini kudya cinthu ciri-centse comwe cina fermento. M’nyumba zanu zentse mun’funika kudya pau zakusaya fermento.’”

21 Pa nthawe imweyoletu Mozeji adacemeresa akulu-akulu wa Ajirayeri aciwauza kuti: “Ndokoni, ndipo banja liri-lentse likasankhule cifuwo* cibodzi ndipo aciphe ninga ntsembe ya Paskwa. 22 Mukamala mun’funika kubvuika msumbu wa isopo m’mulopa omwe uli m’basiya, mucipalangira mulopayo padzulu na m’mphepete mwa aro ya pa msuwo; ndipo munthu ali-wentse aleke kucoka panja mpaka kucena. 23 Tenepo Yahova akadzapita kuti adzaphe Aedjipito na muliri, akadzawona mulopa omwe uli padzulu na m’mphepete mwa aro ya pa msuwo, Yahova an’dzapitirira msuwo umweyo ndipo an’dzalekerera lini kuti muliriyu uphe ali-wentse omwe ali m’nyumba mwanu.

24 “Mbaikumbukirani ntsiku imweyi ndipo limweri ni lamulo mpaka kale-kale kwa imwepo na kwa wana wanu. 25 Mukakapita mu dziko lomwe Yahova an’dzakupasani ninga momwe iye adalewera, mukapitirize kucita msinda umweyu. 26 Ndipo wana wanu akadzakubvunzani kuti: ‘Thangwe ranyi ifepano timbacita msinda umweyu?’ 27 Mudzawatawire kuti: ‘Ni msinda wakupereka ntsembe ya Paskwa kwa Yahova, pomwe adamoga nyumba za Ajirayeri mu Edjipito pomwe akhapha Aedjipitowo na muliri, acipulumusa mabanja yathu.’”

Patsogolo pace, wanthuwo adagodama acitsulimisa nkhope zawo mpaka pantsi. 28 Tenepo Ajirayeri adacitadi ninga momwe Yahova adauzira Mozeji na Aroni. Iwo adacitadi ndendende ninga momwe adauzidwira.

29 Tenepo, pakati pa usiku Yahova adapha wana wentse wakuyamba kubadwa wa mu Edjipito, kuyambira mwana wakuyamba kubadwa wa Farawo omwe akhadakhala pa mpando wace wa umambo mpaka mwana wakuyamba kubadwa wa akapolo omwe akhali m’kawoko* kuphatanidzambo wana wakuyamba kubadwa wa bzifuwo bzentse. 30 Farawo adalamuka pakati pa usiku bumwebo pabodzi na atumiki wace wentse kuphatanidzambo Aedjipito wentse. Aedjipito akhalira kwene-kwene, thangwe nyumba iri-yentse ikhana munthu omwe akhadafa. 31 Usiku bumweboletu, Farawo adacemeresa Mozeji na Aroni mwakamfulumize aciwauza kuti: “Lamukani, cokani pakati pa wanthu wangu, imwepo pabodzi na Ajirayeri anzanu. Ndokoni, katumikireni Yahova ninga momwe mukhadalewera. 32 Tenganimbo mabira yanu na ng’ombe zanu muyende ninga momwe mudalewera. Tsono ndikumbirirenimbo kwa Mulungu wanuyo kuti andisimbe.”

33 Ndipo Aedjipito adayamba kungingimiza Ajirayeri kuti acoke mwakamfulumize mu dziko lawo, thangwe iwo akhalewa kuti: “Tentsenefe tafa kale!” 34 Tenepo Ajirayeri adanyamula ufa bwakumunya-munya bwakusaya fermento. Iwo adanyamulambo mabasiya yakumunyira ufabo yomwe akhadayafunyizira pa bzakubvala bzawo aciyanyamula m’mapewa mwawo. 35 Ajirayeri adacitadi ninga momwe Mozeji akhadawauzira ndipo iwo adakumbira Aedjipito bzinthu bza prata, bza oro na bzakubvala. 36 Yahova adacitisa kuti Aedjipito adekere mtima Ajirayeri mwakuti adawapasadi bzomwe iwo adakumbirabzo. Ndipo Ajirayeriwo adatenga bzinthu bzizinji bza Aedjipito.

37 Patsogolo pace, Ajirayeri adaguduka kucoka ku Ramisesi kuyenda ku Sukoti. Akhalipo amuna wakukwana pafupi-fupi 600 000 omwe akhafamba na minyendo, mwakusaya kulewenga wana. 38 Ndipo wanthu winango azinji omwe akhali lini Ajirayeri adayendambo nawo pabodzi, kuphatanidzambo mabira ng’ombe na bzifuwo bzizinji. 39 Iwo adayamba kukonza pau za bololindo zakusaya fermento mwakuphatisa basa ufa bwakumunya bomwe adacoka nabo ku Edjipito bule. Ufabo bukhalibe fermento thangwe adauzidwa kuti acoke mu Edjipito mwakamfulumize kwene-kwene, ndipo alibe kukwanisa kukonza cakudya ciri-centse pakucoka.

40 Ajirayeri adakhala ku Edjipito magole yakukwana 430. 41 Pa ntsiku yomwe yadakwana magole 430, wanthu* wentse wa Yahova adacoka m’dziko la Edjipito. 42 Bumwebu ni usiku bomwe iwo ati ambadzacite phwando lakukumbukira ntsiku yomwe Yahova adawacosa m’dziko la Edjipito. Bumwebu ni usiku bomwe Ajirayeri wentse an’dzacitira phwando Yahova ku mibadwo yawo yentse.

43 Yahova adauza Mozeji na Aroni kuti: “Iri ni lamulo la Paskwa: Palibe mulendo ali-wentse omwe an’funika kudya namwe Paskwa. 44 Tsono munthu akakhala na kapolo omwe adacita kumugula na kobiri, an’funika kumucita mgwatidwe.* Akacitidwa mgwatidweyo, angadye namwe Paskwa. 45 Koma mulendo na munthu wakucita ganya, aleke kudya namwe Paskwayo. 46 Nyamayo, in’funika kudzadyedwera m’nyumba ibodzi. Ndipo mun’funika lini kugwata mbali iri-yentse ya nyamayo mucibula nayo panja, ndipo ne mun’funika lini kuswa mafupa yace. 47 Ajirayeri wentse an’funika kucita phwando la Paskwali. 48 Penu pana mulendo omwe akukhala pakati panu ndipo akufunambo kucita namwe Paskwa ya Yahova, amuna wentse omwe akukhala pamui pace an’funika kucitidwa mgwatidwe. Akacita bzimwebzo, iye angadzacite namwe Paskwayo, ndipo an’dzakhalambo ninga Mjirayeri caiye. Tsono munthu omwe alibe kucitidwa mgwatidwe an’funika lini kudya namwe Paskwa. 49 Lamulo libodzi-bodziri, lin’phata basa kwa Ajirayeri caiwo pabodzi na wale omwe ni Ajirayeri lini omwe akukhala pakati panu.”

50 Tenepo, Ajirayeri wentse adacita bzomwe Yahova adauza Mozeji na Aroni. Iwo adacitadi ndendende ninga momwe akhadauzidwira. 51 Pa ntsiku imweyi Yahova adacosa Ajirayeri* wentse m’dziko la Edjipito.

13 Yahova adauza pomwe Mozeji kuti: 2 “Ndipambulire* mwana ali-wentse wakuyamba kubadwa wacimuna pakati pa Ajirayeri. Wana wentse wakuyamba kubadwa wacimuna* wa wanthu na bzifuwo, mbangu.”

3 Patsogolo pace Mozeji adauza wanthuwo kuti: “Mbakumbukirani ntsiku ya lero ino yomwe mudacoka mu Edjipito, dziko lomwe mukhali akapolo, thangwe Yahova adakucosani m’mwemo na boko lace lamphanvu. Tenepo, lekani kumbadya cinthu ciri-centse cakuikhidwa fermento. 4 Imwepo mukucoka lero, m’mwezi wa Abibe.* 5 Yahova akadzakupitisani mu dziko la Akanani, Ahiti, Aamori, Ahivi na Ajebusi, dziko lakuyerera mkaka na uci, dziko lomwe iye adalumbirira makolo yanu ya kale kuti angadadzakupasani, mudzakumbukire ntsiku ya lero m’mwezi ninga uno. 6 Mu ntsiku 7 mun’funika kudzadya pau zakusaya fermento ndipo pa ntsiku yaci 7 mun’funika kudzacitira phwando Yahova. 7 Mun’funika kudzadya pau zakusaya fermento kwa ntsiku 7; pakati panu paleke kudzagumanika cinthu ciri-centse cakuikhidwa fermento ndipo m’dziko lanu lentse* mulekembo kudzagumanika fermento. 8 Ndipo pa ntsiku imweyo mudzauze wana wanu kuti: ‘Tikucita bzimwebzi thangwe ra bzomwe Yahova adaticitira pakucoka mu dziko la Edjipito.’ 9 Bzimwebzi bzin’dzakhala ninga cizindikiro cakunembedwa pa boko lanu na mkumbuso pa mkuma panu, kuti mumbalewe bza lamulo la Yahova, thangwe Yahova adakucosani mu dziko la Edjipito na boko lace lamphanvu. 10 Gole liri-lentse, mun’funika kucita bzomwe lamuloli limbalewa pa nthawe yace yakuikhidwiratu.

11 “Yahova akadzakupitisani m’dziko la Kanani, dziko lomwe iye adalumbirira makolo yanu ya kale kuti angadakupasani, 12 mun’funika kupereka kwa Yahova wana wentse wakuyamba kubadwa wacimuna* kuphatanidzambo cifuwo ciri-centse cacimuna cakuyamba kubadwa comwe munaco. Bzentse mpsa Yahova. 13 Mwana ali-wentse wakuyamba kubadwa wa bulu mumulombole na bira, tsono mukasaya kumulombola, mumuphe mwakucita kumutcola khosi. Ndipo mun’funika kulombola wana wanu wentse wakuyamba kubadwa wacimuna.

14 “Tsono kutsogoloku wana wanu akadzakubvunzani kuti: ‘Thangwe ranyi ifepano tikucita bzimwebzi?’ Mudzawatawire kuti: ‘Yahova adaticosa mu dziko la Edjipito na boko lace lamphanvu, mu dziko lomwe tikhali akapolo. 15 Pomwe Farawo adaumisa mtima wace acilamba kutibvumiza kucoka, Yahova adapha wana wentse wacimuna* wakuyamba kubadwa m’dziko la Edjipito, kuyambira wana wacimuna wakuyamba kubadwa wa wanthu mpaka wa bzifuwo. Ndipopa bzifuwo bzentse bzakuyamba kubadwa timbabzipereka ninga ntsembe kwa Yahova, ndipo wana wathu wentse wacimuna wakuyamba kubadwa timbawalombola.’ 16 Msinda umweyu un’dzakhala ninga cizindikiro cakunembedwa pa boko lanu na pa mkuma panu, pakuti Yahova adaticosa mu dziko la Edjipito na boko lace lamphanvu.”

17 Pomwe Farawo adabvumiza Ajirayeri kucoka, Mulungu alibe kuwayendesa na njira ya m’dziko la Afilisteu napo kuti ikhali yacigwatira. Pakuti Mulunguyo adati: “Wanthuwa angacinje nzeru zawo akagumana na nkhondo ndipo angabwerere ku Edjipito.” 18 Tenepo Mulungu adacitisa kuti Ajirayeri apite na njira itali yomwe ikhagwata na m’dambo pafupi na Nyanza Ifuira. Ndipo iwo adacoka m’dziko la Edjipito mwakulinganizika ninga acikunda wa nkhondo. 19 Mozeji adanyamulambo mafupa ya Zuze, thangwe Zuzeyo akhadalumbirisa wana wa Jirayeri kuti: “Kulewa cadidi, Mulungu an’dzakuthandizani, tenepo dzanyamuleni mafupa yangu pakucoka kuno.” 20 Iwo adacoka ku Sukoti acikamanga msasa ku Etamo, m’malire mwa dambo.

21 Yahova akhayenda patsogolo pawo; masikati iye akhaphatisa basa mtambo kuti awatsogolere mu njira, ndipo usiku akhaphatisa basa mtambo wa moto kuti awabvunikire. Tenepo iwo akhakwanisa kucita ulendo masikati na usiku. 22 Mtamboyo ukhacoka lini kutsogolo kwa wanthuwo ku masikati, ndipo usiku mtambo wa motoyo ukhacokambo lini patsogolo pawo.

14 Yahova adauza Mozeji kuti: 2 “Uza Ajirayeri kuti abwerere, amange msasa wawo patsogolo pa Pihayiroti pakati pa Migidoli na nyanza. Mun’funika kumanga msasa wanu pafupi na nyanza, kutsogolo kwa Baala-zefoni. 3 Ndipo Farawo an’dzalewa kuti: ‘Ajirayeri adzungaira ndipo akundofamba-famba m’dziko lathu, iwo asocera m’dambo.’ 4 Nin’dzalekerera kuti Farawo aumise mtima wace, iye an’dzakutewerani, ndipo inepano nin’dzapasa ulemerero dzina langu thangwe ra Farawo na acikunda wace wentse; ndipo Aedjipito an’dzadziwa kuti ine ndine Yahova.” Tenepo Ajirayeri adacitadi bzimwebzo.

5 Patsogolo pace, mambo wa ku Edjipito adauzidwa kuti Ajirayeri athawa. Pa nthawe imweyoletu, Farawo na atumiki wace adacinja nzeru pakulewa bza Ajirayeriwo ndipo adati: “Thangwe ranyi tabvumiza Ajirayeri omwe akhali akapolo wathu kucoka?” 6 Tenepo iye adakonzekeresa ngolo zace za nkhondo acitengambo acikunda wace. 7 Iye adasankhula ngolo zakupambulika zakukwana 600 na ngolo zinango za mu Edjipito, ndipo ngolo iri-yentse ikhana acikunda. 8 Tenepo Yahova adalekerera Farawo mambo wa ku Edjipito kuumisa mtima wace, ndipo iye adatewera Ajirayeri pomwe iwo akhacoka m’dzikomo mwakusaya mantha. 9 Aedjipitowo adatewera Ajirayeri ndipo ngolo zentse za Farawo zakupfuwidwa na makavalo, anyakupakira pa makavaloyo na acikunda wace, adagumana Ajirayeriwo pomwe akhadamanga misasa yawo pafupi na nyanza ku Pihayiroti patsogolo pa Baala-zefoni.

10 Pomwe Farawo adafendera pafupi, Ajirayeri adawona kuti Aedjipito akhawatewera. Tenepo Ajirayeriwo adabva mantha kwene-kwene ndipo adayamba kulirira Yahova kuti awathandize. 11 Iwo adabvunza Mozeji kuti: “Kodi ku Edjipito kulibe thenje kuti iwepo utibwerese kuti tidzafere ku dambo kuno? Thangwe ranyi waticitira bzimwebzi? Thangwe ranyi waticosa ku Edjipito? 12 Kodi tiribe kukuuza ife pomwe tikhali ku Edjipito kuti: ‘Tisiye titumikire Aedjipito’? Pakuti bziri bwino kutumikira Aedjipitowo kusiyana na kufera ku dambo kuno.” 13 Tenepo Mozeji adauza wanthuwo kuti: “Lekani kucita mantha. Khwimikani ndipo onani momwe Yahova an’kupulumusirani lero. Thangwe Aedjipito omwe mukuwawona lerowa mun’dzawawona lini pomwe mpaka kale-kale. 14 Yahova an’dzakumenyerani nkhondo ndipo imwepo mun’dzacita lini cinthu ciri-centse, mun’dzandokhala phee.”

15 Tsono Yahova adauza Mozeji kuti: “Thangwe ranyi iwepo ukupitiriza kudandaulira inepano? Uza Ajirayeri kuti apitirize na ulendo bwawo. 16 Ndipo iwepo tenga mpsimbo yako ulate nyanza ndipo nyanzayo in’gawanika kuti Ajirayeri apite na pakati pa nyanzayo pa mataka yakuuma. 17 Tsono inepano, nin’lekerera kuti Aedjipito aumise mitima yawo mwakuti an’dzatewera Ajirayeri pa nyanzapo; nin’dzacita bzimwebzi kuti ndidzapase ulemerero dzina langu pakukunda Farawo, thimu lace lentse la anyankhondo, ngolo zace za nkhondo na acikunda wace wakupakira pa makavalo. 18 Ndipo Aedjipito an’dzadziwadi kuti ine ndine Yahova ndikadzabzilemekezesa pakukunda Farawo, ngolo zace za nkhondo na acikunda wace wakupakira pa makavalo.”

19 Pamwepo, anjo wa Mulungu wacadidi omwe akhali kutsogolo kwa Ajirayeri adacoka aciyenda m’mambuyo mwawo, ndipo mtambo omwe ukhali kutsogolo kwawo udacokambo ucikakhala m’mambuyo mwawo. 20 Mtamboyo udaima pakati pa Aedjipito na Ajirayeri. Mbali ibodzi ukhacitisa mdima ndipo mbali inangoyi ukhacitisa ceza, mwakuti usiku bwentsenebo Aedjipito alibe kukwanisa kufenderera Ajirayeri.

21 Mozeji adafuthula boko lace acilata nyanzayo ndipo Yahova adacitisa kuti mphepo ya kumabvadzuwa igawe nyanzayo usiku bwentse na kuumisa pantsi pace, ndipo madziyo yadagawanika. 22 Tenepo Ajirayeriwo adapita na pakati pa nyanzayo pa mataka yakuuma pomwe madziyo yakhadacita nkhomole kumadidi na kumadzere kwawo. 23 Aedjipito adayamba kuwatewera ndipo makavalo yentse ya Farawo, ngolo zace za nkhondo na anyakupakira pa makavaloyo adayamba kutewera Ajirayeri pakati pa nyanzapo. 24 Kumadandakweca,* Yahova adanyang’anisa anyankhondo wa Aedjipito kucokera mu mtambo na mu mtambo wa moto ule, ndipo iye adacitisa kuti anyankhondo wa Edjipito acite phiringu. 25 Iye adacitisa kuti maroda ya ngolo zawo yatsudzuke mwakuti zikhaneseka kufamba. Tenepo Aedjipitowo adayamba kulewa kuti: “Mbatiwathaweni Ajirayeriwa, thangwe Yahova akuwamenyera nkhondo pakumenyana na Aedjipito.”

26 Patsogolo pace, Yahova adauza Mozeji kuti: “Futhula boko lako ucilata nyanzayi kuti madzi yaphatane, yacimiza Aedjipito, ngolo zawo za nkhondo na anyakupakira pa makavalo.” 27 Pa nthawe imweyoletu Mozeji adalata nyanzayo, ndipo pomwe kukhacena, nyanzayo idayamba kubwerera m’mbuto mwace. Aedjipito adayezera kuthawa madziyo, tsono Yahova adawamiza pakati pa nyanzayo. 28 Madziyo yadabwerera m’mbuto mwace ndipo yadamiza ngolo za nkhondo, anyakupakira pa makavalo na acikunda wentse wa Farawo omwe adapita na pakati pa nyanza kutewera Ajirayeri. Palibe kupulumuka ne na m’bodziyo.

29 Tsono Ajirayeri adafamba pa mataka yakuuma pakati pa nyanzayo ndipo madzi yakhadacita nkhomole kumadidi na kumadzere kwawo. 30 Tenepo pa ntsiku imweyi Yahova adapulumusa Ajirayeri m’manja mwa Aedjipito, ndipo Ajirayeriwo adawona Aedjipito wakufawo m’mphepete mwa nyanzayo. 31 Ajirayeri adawonambo mphanvu* zikulu zomwe Yahova adaziphatisa basa kuti akunde Aedjipito. Ndipo wanthuwo adayamba kugopa Yahova na kukhulupira Yahova pabodzi na mtumiki wace Mozeji.

15 Pa nthawe imweyo Mozeji na Ajirayeri adaimbira Yahova nyimbo iyi:

“Nin’imbira Yahova, thangwe iye watumbizidwa kwene-kwene.

Iye wamiza m’nyanza makavalo na anyakupakira pa makavaloyo.

 2 Yahova ni mphanvu yangu, thangwe iye wakhala mpulumusi wangu.

Iye ni Mulungu wangu ndipo inepano nin’dzamutumbiza; iye ni Mulungu wa abereki wangu ndipo inepano nin’dzamupasa ulemerero.

 3 Yahova ni mcikunda wamphanvu. Dzina lace ni Yahova.

 5 Mabimbi ya m’nyanza yawamiza; iwo amira ninga mwala mpaka pantsi.

 9 Nyamadulanthakayo adati: ‘Nin’dzawatewera ndiciwaphata!

Nin’dzawatengera bzinthu bzawo ndipo nin’dzawatengera bzomwe nin’funa!

Nin’dzasolola xipada yangu! Boko langu lin’dzawapfudza.’

11 Imwe Yahova, ni Mulungu uponi omwe angandendemerane namwe?

Mbani omwe ngwakucena kwene-kwene ninga imwepo?

Ndimwe wakuthemera kugopedwa na kuimbiridwa nyimbo zacitumbizo, imwe omwe mumbacita bzinthu bzakudabwisa.

12 Mwafuthula boko lanu lamadidi, ndipo dziko la pantsi lawameza.

Wanthu wentse wa ku Kanani an’dzasunama.

16 Iwo an’dzabva mantha ndipo an’dzacita thupo.

18 Yahova an’dzatonga ninga mambo mpaka kale-kale.

20 Pamwepo Miriyamu mprofeta wacikazi, omwe akhali mpfumakazi ya Aroni adatenga kang’oma kang’ono m’manja mwace. Iye na akazi wentse adayamba kuimba pabodzi acimbabzina. 21 Miriyamu adapitiriza kuwatawira acimbaimba kuti:

“Imbirani Yahova, pakuti iye watumbizidwa kwene-kwene.

Iye wamiza m’nyanza makavalo na anyakupakira pa makavaloyo.”

22 Patsogolo pace Mozeji adatsogolera Ajirayeri kucoka pa Nyanza Ifuira, aciyenda ku dambo la Suri. Iwo adafamba ntsiku zitatu m’dambomo, koma alibe kugumana madzi. 23 Iwo adafika ku Mara, tsono alibe kukwanisa kumwa madzi ya kumweko thangwe yakhawawa. Ndipopa iwo adapasa mbuto imweyi dzina lakuti Mara. 24 Tenepo wanthu adayamba kudandaulira Mozeji acimbati: “Kodi tinimwa ciyani?” 25 Mozeji adakumbira Yahova kuti amuthandize ndipo Yahova adamulatiza kamuti. Pomwe iye adathusa kamutiko m’madzimo, madziyo yadakhala yabwino.

Iye adawapasa malamulo ndipo adawalatiza bzomwe akhafunikira kucita. Mulungu adacita bzimwebzi kuti awone penu iwo angadamubvera ayai ne. 26 Mulungu adati: “Mukabvera na mtima wentse mafala ya Yahova Mulungu wanu na kucita bzomwe mpsabwino pamaso pace, kubvera malamulo yace na kuyateweza, nin’dzakubwereserani lini matenda yomwe ndidaboneresa nayo Aedjipito, thangwe ine Yahova ndine omwe nin’dzakupozani.”

27 Pomwe iwo adacoka kumweko, adakafika ku Elimu. Kumweko kukhana micera 12 ya madzi na miti 70 ya kanjedza. Kumweko iwo adamanga misasa yawo pafupi na madzi.

16 Pomwe adacoka ku Elimu, Ajirayeri wentse adafika ku dambo la Sini, lomwe liri pakati pa Elimu na Sinai, pa ntsiku yaci 15 ya mwezi waciwiri, kucokera pomwe adacoka m’dziko la Edjipito.

2 M’dambomo, Ajirayeri wentse adayamba kudandaulira Mozeji na Aroni. 3 Ndipo Ajirayeriwo akhambawauza kuti: “Bzingadakhala bwino kuphedwa na boko la Yahova m’dziko la Edjipito, pomwe tikhakhala pafupi na mapoto ya nyama na kudya pau ticikhuta. Tsono imwepo mwatibweresa ku dambo kuno kuti muphese wanthu wentsenewa na njala.”

4 Yahova adauza Mozeji kuti: “Nin’kubvumbisirani cakudya kucokera kudzulu. Ali-wentse alokote cakudya comwe an’kwana kudya pa ntsikuyo. Nin’cita bzimwebzi kuti ndiwayeze kuti ndiwone penu an’bvera malamulo yangu ayai ne. 5 Pa ntsiku yaci 6, iwo an’dzafunika kuphika cakudya comwe alokota ndipo an’funika kudzalokota cakudya cakukwana ntsiku ziwiri.”

6 Tenepo Mozeji na Aroni adauza Ajirayeri wentse kuti: “Kumaulo kuno imwepo mun’dziwadi kuti Yahova ndiye omwe adakucosani m’dziko la Edjipito. 7 Mangwana kumacibese imwepo mun’dzawona ulemerero bwa Yahova, thangwe Yahova wabva kudandaula komwe mwacita kwa iye. Kodi ife ndife yani kuti mutidandaulire?” 8 Mozeji adapitiriza kuti: “Yahova akakupasani nyama kuti mudye kumaulo kuno ndipo mangwana macibese akadzakupasani pau kuti mudye mucikhuta, imwepo mun’dzawona kuti Yahova wabva kudandaula komwe mukucita kwa iye. Kodi ndifembo yani ife? Imwepo mukudandaulira lini ifepano, koma mukudandaulira Yahova.”

9 Patsogolo pace Mozeji adauza Aroni kuti: “Uza Ajirayeri wentse kuti: ‘Bwerani pamaso pa Yahova, pakuti iye wabva kudandaula kwanu.’” 10 Pomwe Aroni adamala kulewalewa na Ajirayeri wentse, iwo adazungunuka acinyang’anisa ku dambo. Pamwepo ulemerero bwa Yahova budawonekera mu mtambo.

11 Ndipo Yahova adalewalewa pomwe na Mozeji kuti: 12 “Ndabva kudandaula kwa Ajirayeri. Uwauze kuti: ‘Kumaulo dzuwa likandomira imwepo mun’dya nyama. Mangwana kumacibese mun’dzadya pau mucikhuta, ndipo imwepo mun’dzadziwadi kuti ine ndine Yahova Mulungu wanu.’”

13 Kumaulo kwa ntsiku imweyo, msasa wentse udadzala na ntsenzetsi, ndipo mangwana yace kumacibese, msasa wentse udacita mame 14 Pomwe mameyo yadauma pa mataka ya m’dambomo, padasala tubzinthu tung’ono-tung’ono ninga mbeu ndipo tukhadacena ninga matalala. 15 Pomwe Ajirayeri adawona bzimwebzo, adayamba kumbabvunzana kuti: “Kodi cimweci n’ciyani?” Pakuti iwo akhadziwa lini kuti cikhali ciyani. Mozeji adawauza kuti: “Cimweci ni cakudya comwe Yahova wakupasani. 16 Yahova walewa kuti: ‘Ali-wentse atenge cakudya mwakubverana na momwe iye ambadyera. Munthu ali-wentse atenge cakudya cakukwana homeri* ibodzi, mwakubverana na mulewengo wa wanthu omwe ali mu tendi mwace.’” 17 Ajirayeri adayamba kulokota cakudyaco. Winango adalokota cizinji ndipo winango adalokota cing’ono-ng’ono. 18 Pomwe iwo adakapima na mphimo ya homeri, omwe adalokota cizinji ciribe kumuwandira, ndipo omwe adalokota cing’ono-ng’ono ciribe kumucepera. Ali-wentse adalokota mwakubverana na momwe ambadyera.

19 Patsogolo pace Mozeji adati: “Munthu ali-wentse aleke kukoya cakudyaci mpaka mangwana macibese.” 20 Tsono iwo alibe kumutetekera Mozeji ndipo wanthu winango adakoya cakudyaco mpaka mangwana yace macibese. Tsono cakudyaco cidacita nkhonye ndipo cikhanunkha. Bzimwebzi bzidamuipira kwene-kwene Mozeji. 21 Iwo akhalokota cakudyaco ntsiku zentse kumacibese ndipo ali-wentse akhalokota mwakubverana na momwe ambadyera. Tsono dzuwa likapsa, cakudyaco cikhambasungunuka.

22 Pa ntsiku yaci 6, iwo akhambalokota cakudya ca ntsiku ziwiri. Munthu ali-wentse akhalokota homeri ziwiri, ndipo akulu-akulu wa Jirayeri adayenda kukauza bzimwebzo Mozeji. 23 Mozeji adawauza kuti: “Bzimwebzi ndibzo bzomwe Yahova adalewa. Mangwana in’dzakhala ntsiku yakupuma, yomwe ni Sabudu la Yahova. Wotcani bzomwe bzin’funika kuwotcedwa, phikani bzomwe bzin’funika kuphikidwa ndipo bzomwe bzin’salabzo bzikoyeni mpaka mangwana macibese.” 24 Iwo adakoyadi cakudyaco mpaka macibese, ninga momwe Mozeji akhadawauzira ndipo cakudyaco ciribe kununkha ne kucita nkhonye. 25 Patsogolo pace Mozeji adati: “Mudye cakudyaci lero, thangwe lero ni Sabudu la Yahova. Lero mun’kacigumana lini cakudyaco kunja kwa msasa 26 Imwepo mumbalokote cakudyaci mkati mwa ntsiku 6. Pa ntsiku yaci 7 kun’dzakhala kulibe, pakuti ni Sabudu.” 27 Pa ntsiku yacinomweyo, Ajirayeri winango adayenda kuti akalokote cakudya, tsono alibe kukagumana cinthu.

28 Yahova adauza Mozeji kuti: “Mpaka lini imwepo mun’pitiriza kulamba kucita bzomwe nimbakuuzani na kubvera malamulo yangu? 29 Lekani kuyebwa kuti Yahova adakupasani ntsiku ya Sabudu. Ndipopa pa ntsiku yaci 6 iye ambakupasani cakudya ca ntsiku ziwiri. Pa ntsiku yaci 7 ali-wentse an’funika kukhala pa mbuto yomwe ali.” 30 Pa ntsiku imweyi, palibe munthu omwe an’funika kucoka pa mbuto yomwe ali. Tenepo Ajirayeri akhaphata lini basa* pa ntsiku ya Sabudu.

31 Ajirayeri adapasa cakudyaco dzina lakuti “mana.”* Cakudyaco cikhali cicena ninga mbeu ya mapira* ndipo cikhakoma ninga pau zakuphikidwa na uci. 32 Tenepo Mozeji adawauza kuti: “Yahova walewa kuti: ‘Tengani manaya ndipo muyapime mu mphimo ibodzi ya homeri kuti yakoyedwe kwa mibadwo yanu yentse, kuti wana wanu adzawonembo cakudya comwe ndidakupasani m’dambo pomwe ndidakucosani ku Edjipito.’” 33 Na tenepo, Mozeji adauza Aroni kuti: “Tenga jaro ndipo uikhe m’mwemo mana yakukwana mphimo ibodzi ya homeri ndipo uyaikhe pamaso pa Yahova kuti yakoyedwe kwa mibadwo yanu yentse.” 34 Aroni adaikha jaroyo patsogolo pa Thungwa la Umboni kuti ikoyedwe, ninga momwe Yahova akhadauzira Mozeji. 35 Ajirayeri adadya mana kwa magole 40 mpaka kufika ku dziko lomwe likhana wanthu. Iwo adadya mana mpaka kufika ku malire ya dziko la Kanani. 36 Homeri ibodzi ikhali mphimo khumi za efa.*

17 Thimu lentse la Ajirayeri lidacoka m’dambo la Sini licipitiriza na ulendo bwawo, ndipo akhaima m’mbuto zakusiyana-siyana kuti apume mwakubverana na momwe Yahova akhadawauzira; iwo adafika ku Refidimu acimanga msasa. Tsono kumweko kukhalibe madzi yakumwa.

2 Wanthuwo adayamba kunesana na Mozeji acimbalewa kuti: “Tipase madzi yakumwa.” Tsono Mozeji adawatawira kuti: “Thangwe ranyi mukunesana nande? Thangwe ranyi mukupitiriza kumuyeza Yahova?” 3 Wanthuwo akhana nyota kwene-kwene ndipo akhafuna madzi yakumwa, ndipopa akhambadandaulira Mozeji acimbalewa kuti: “Thangwe ranyi udaticosa ku Edjipito kuti udzatiphe kuno na nyota, ifepano, wana wathu na bzifuwo bzathu?” 4 Pakumalizira pace, Mozeji adadandaulira Yahova kuti: “Kodi nin’cita nawo ciyani wanthuwa? Ndikandocedwa, wanthuwa an’malizira kundithusira minyala!”

5 Yahova adauza Mozeji kuti: “Ndoko patsogolo pa wanthuwo ndipo utenge akulu-akulu winango wa Jirayeri na mpsimbo yomwe udamenya nayo mkulo wa Nilo. Tenga mpsimboyo uyende. 6 Tetekera! Inepano nin’dzakhala nawe pa tsendwa la ku Horebi. Ukamenye tsendwalo ndipo madzi yan’kacoka kuti wanthuwo amwe.” Tenepo Mozeji adacitadi bzimwebzo pamaso pa akulu-akulu wa Jirayeri. 7 Ndipo iye adapasa mbutoyo dzina lakuti Masa* na Meriba* thangwe Ajirayeri adanesana na Mozeji ndipo adayeza Yahova mwakulewa kuti: “Kodi Yahova ali pakati pathu ayai ne?”

8 Patsogolo pace Aamaleki adabwera kudzamenyana na Ajirayeri ku Refidimu. 9 Tenepo Mozeji adauza Djoswa kuti: “Sankhula amuna kuti uyende kukamenyana na Aamaleki. Mangwana inepano nin’dzakaima pa ntsonga ya phiri ndidaphatirira mpsimbo ya Mulungu wacadidi.” 10 Djoswa adayendadi kukamenyana na Aamaleki ninga momwe Mozeji adamuuzira. Ndipo Mozeji, Aroni na Hur adakwira pa ntsonga ya phiri.

11 Pomwe Mozeji akhapitiriza kuimisa manja yace m’dzaulu, Ajirayeri akhakunda; tsono akayagwesa, Aamaleki ndiwo omwe akhakunda. 12 Pomwe manja ya Mozeji yadaneta, Aroni na Hur adatenga mwala aciuikha pantsi ndipo iye adaukhalira. Patsogolo pace, Aroni adaphata boko libodzi la Mozeji ndipo Hur adaphata boko linangolo kuti manja yace yapitirize kukhala m’dzaulu mpaka dzuwa kumira. 13 Tenepo Djoswa adakunda Aamaleki wentse na xipada.

14 Patsogolo pace Yahova adauza Mozeji kuti: “Nemba bzimwebzi m’bukhu kuti bzimbakumbukiridwe ndipo uza Djoswa kuti: ‘Nin’dzapfudza Aamaleki wentse pa dziko la pantsi ndipo an’dzakumbukiridwa lini pomwe.’” 15 Pamwepo, Mozeji adamanga guwa la ntsembe ndipo adalipasa dzina lakuti Yahova-nisi,* 16 ndipo adati: “Pakuti boko la Aamaleki likunesana na mpando wa umambo wa Yahova, Yahova an’dzamenya nkhondo na Amaleki ku mibadwo na mibadwo.”

18 Jetro, amibzala wace wa Mozeji omwe akhali wantsembe wa ku Midiyani, adabva bzentse bzomwe Mulungu adacitira Mozeji na wanthu wace Ajirayeri na momwe Yahova adacosera Ajirayeriwo ku Edjipito. 2 Mozeji adatumiza mkazi wace Zipora kwa amibzala wace Jetro ndipo Jetro adatenga mkazi wa Mozejiyo acikhala naye, 3 pabodzi na wana wace awiri. M’bodzi mwa wana wace akhacemeredwa Gerisomu,* pakuti Mozeji adati: “Ndakhala mulendo mu dziko lacirendo.” 4 Ndipo munangoyo adamupasa dzina lakuti Eliyezeri,* pakuti iye adati: “Mulungu wa pai wangu ndiye mthandizi wangu omwe adandipulumusa kwa Farawo omwe akhafuna kundipha.”

5 Tenepo Jetro, amibzala wace wa Mozeji, mkazi wace wa Mozeji pabodzi na wana wace, adayenda kukagumana na Mozejiyo m’dambo. Iye akhadamanga msasa wace pafupi na phiri la Mulungu wacadidi. 6 Tenepo iye adatumiza mafala kwa Mozeji yakuti: “Ine mibzala wako Jetro ndikubwera kudzagumana nawe, ndiri pabodzi na mkazi wako na wana wako awiri.” 7 Pa nthawe imweyoletu, Mozeji adayenda kukagumana na amibzala wace ndipo adagodama aciwampsompsona. Iwo adamusana ndipo patsogolo pace adapita mu tendi.

8 Mozeji adauza amibzala wace bzentse bzomwe Yahova adacitira Farawo na Aedjipito thangwe ra Ajirayeri na mabvuto yentse yomwe adagumana nayo mu njira na momwe Yahova adawapulumusira. 9 Jetro adakomedwa kwene-kwene na bzinthu bzentse bzabwino bzomwe Yahova adacitira Ajirayeri pakuwapulumusa ku Edjipito.* 10 Patsogolo pace Jetro adati: “Atumbizidwe Yahova omwe adakupulumusani kwa Aedjipito na m’manja mwa Farawo, omwe adapulumusambo wanthuwa kwa Aedjipito omwe akhawaboneresa. 11 Tsapano ndadziwa kuti Yahova ni mkulu kuposa mirungu inango yentse, thangwe ra bzomwe iye adacitira wale omwe adacita bzinthu mwakubzikuza kwa wanthu wace.” 12 Patsogolo pace Jetro, amibzala wa Mozeji, adabweresa ntsembe zakucita kutentha na ntsembe zinango kwa Mulungu, ndipo Aroni na akulu-akulu wa Ajirayeri adayenda kukadya pabodzi na amibzala wa Mozeji pamaso pa Mulungu wacadidi.

13 Mangwana yace, Mozeji adakhala pantsi ninga mwa cizolowezi kuti atumikire wanthu ninga nyakutonga mirandu, ndipo wanthuwo akhapitiriza kubwera acimbaima patsogolo pa Mozeji, kuyambira kumacibese mpaka kumaulo. 14 Pomwe amibzala wa Mozeji adawona bzentse bzomwe akhacitira wanthuwo adamubvunza kuti: “Thangwe ranyi ukucita bzimwebzi? Thangwe ranyi ukukhala ucimbatonga wanthu wentsenewa wekha-wekha pomwe iwo adaima kuyambira macibese mpaka kumaulo?” 15 Mozeji adatawira amibzala wacewo kuti: “Ni thangwe rakuti wanthuwa ambabwera kwa inepano kuti adzabve malango ya Mulungu. 16 Wanthu awiri akanesana iwo ambabwera kwa ine acindiuza nkhaniyo. Tenepo inepano nimbatonga nkhaniyo, ndiciwadziwisambo bzomwe Mulungu wacadidi watonga na malamulo yace.”

17 Amibzala wacewo adamuuza kuti: “Bzomwe ukucitabzi bziri lini bwino. 18 Kulewa cadidi, bzimwebzi bzin’netesa iwepo pabodzi na wanthu omwe unawowa, thangwe umweyu ni mtolo ukulu kwene-kwene omwe un’kwanisa lini kuunyamula wekha. 19 Tsapano tetekera bzomwe ndikuuze. Nin’kupasa malango ndipo Mulungu an’dzakhala nawe. Iwepo umbalewelewe na Mulungu wacadidi m’mbuto mwa wanthuwa na kumbayendesa mirandu yawo kwa Mulungu wacadidi. 20 Iwepo un’funika kumbawapfunzisa bzakutonga bza Mulungu na malamulo yace. Ndipo un’funikambo kuwadziwisa njira yomwe an’funika kufamba na basa lomwe an’funika kuphata. 21 Koma pakati pa mbumbayi, usankhule amuna wakuthemera omwe ambagopa Mulungu, wakuthembeka na omwe ambafuna lini kugumana phindu mwakusaya cirungamo, ndipo uwaikhe kuti akhale atsogoleri wa wanthu 1000, atsogoleri wa wanthu 100, atsogoleri wa wanthu 50 na atsogoleri wa wanthu 10. 22 Ndipo amuna amwewa, an’funika kutonga wanthuwa pakawoneka mirandu.* Tsono nkhani iri-yentse yomwe njakunesa kwene-kwene ambaibwerese kwa iwepo, koma nkhani yomwe njakunesa lini ambaitonge ndiwo. Cepesa mtolo wako mwakubvuma kuti iwo akuthandize. 23 Ukacita bzimwebzi ndipo penu mpsakubverana na kufuna kwa Mulungu, basali lin’dzakhala lini cimtolo kwa iwepo ndipo wanthuwa an’dzabwerera m’mii mwawo wakukondwa.”

24 Pa nthawe imweyoletu Mozeji adabvera bzomwe amibzala wace adamuuza ndipo adacita bzentse bzomwe adamuuzabzo. 25 Mozeji adasankhula amuna wakuthemera pakati pa Ajirayeri wentse ndipo adawaikha kuti akhale atsogoleri wa wanthu 1000, atsogoleri wa wanthu 100, atsogoleri wa wanthu 50 na atsogoleri wa wanthu 10. 26 Tenepo iwo akhambatonga wanthu pakagumanika mulandu. Nkhani iri-yentse yakunesa akhambaiyendesa kwa Mozeji, koma nkhani yakusaya kunesa akhambaitonga ndiwo. 27 Patsogolo pace Mozeji adagonekana na amibzala wace ndipo iwo adabwerera ku dziko lawo.

19 Pa mwezi wacitatu, kucokera pomwe Ajirayeri adacoka ku Edjipito, pa ntsiku imweyo iwo adafika ku dambo la Sinai. 2 Iwo adaguduka ku Refidimu acikafika ku dambo la Sinai ndipo adamanga misasa yawo m’dambomo. Ajirayeri adamanga msasa wawo pamwepo pafupi na phiri.

3 Patsogolo pace Mozeji adakwira pa phiripo kuti akawonane na Mulungu wacadidi, ndipo Yahova adamucemera na pa phiripo acimuuza kuti: “Ukauze nyumba ya Djakobo, wana wa Jirayeri kuti: 4 ‘Imwepo mudawona mwekha bzomwe ndidacitira Aedjipito kuti ndikunyamuleni ninga momwe mphungu imbanyamulira wana wace, ndipo ndakubweresani kwa ine. 5 Imwepo mukabvera na mtima wentse mafala yangu na kuteweza mpangano wangu, kulewa cadidi mun’dzakhala cuma cangu cakupambulika pakati pa wanthu wentse, pakuti dziko lentse ndangu. 6 Imwepo mun’dzakhala mtundu wangu wakucena na antsembe omwe an’dzatonga ninga amambo.’* Yamweya ni mafala yomwe ukauze Ajirayeri.”

7 Tenepo Mozeji adapolika ndipo adacemeresa akulu-akulu wentse wa Ajirayeri aciwauza mafala yentse yomwe Yahova akhadamuuza. 8 Patsogolo pace wanthu wentse adatawirira pabodzi kuti: “Tin’dzacita bzentse bzomwe Yahova walewa.” Pa nthawe imweyoletu Mozeji adabwerera kwa Yahova acikamuuza bzomwe wanthuwo akhadatawira. 9 Ndipo Yahova adauza Mozeji kuti: “Tetekera! Ndikubwera kwa iwepo mu mtambo upswipa kuti wanthu abve pomwe ndikulewalewa nawe, kuti iwo akukhulupire nthawe zentse.” Patsogolo pace Mozeji adauza Yahova bzomwe wanthuwo adalewa.

10 Patsogolo pace Yahova adauza Mozeji kuti: “Ndoko ndipo ukacenese wanthuwo lero na mangwana, ndipo iwo an’funika kufula bzakubvala bzawo. 11 Iwo an’funika kukhala wakukonzeka pa ntsiku yacitatu, thangwe pa ntsiku yacitatuyo Yahova an’dzabwera pa Phiri la Sinai pamaso pa wanthu wentse. 12 Wanthuwo uwaikhire malire kuzungulira phiri lentsenelo ndipo uwauze kuti: ‘Citani mphole kuti muleke kukwira m’phirimu ayai kukhuya m’mphepete mwace. Ali-wentse omwe an’khuya phiriri kulewa cadidi an’dzaphedwa. 13 Munthu ali-wentse aleke kudzakhuya nyakuphonyayo koma adzamubome na minyala ayai kumulasa.* Bziribe basa penu ni cifuwo ayai munthu, an’dzafunika kuphedwa.’ Tsono nyanga ya bira ikadzalira, wanthu wentse adzafendere pa phiripo.”

14 Tenepo Mozeji adabuluka m’phirimo ndipo adayenda komwe kukhana wanthuko aciyamba kuwacenesa, ndipo iwo adafulambo bzakubvala bzawo. 15 Ndipo iye adauza wanthuwo kuti: “Pakufika ntsiku yacitatu mukhale mudakonzeka. Lekani kucita malume ya pamphasa.”*

16 Pa ntsiku yacitatuyo ku macibese, kukhabveka kugunda na bziphaliwali, ndipo phiri lentsenelo likhadampsinkhidwa na mtambo upswipa. Kudabvekambo kulira kwamphanvu kwa nyanga ndipo wanthu wentse mu msasamo adayamba kutetemera na mantha. 17 Mozeji adatenga wanthuwo aciyenda nawo kunja kwa msasa kuti akagumane na Mulungu wacadidi, ndipo iwo adakaima m’mphepete mwa phiriro. 18 Phiri lentse la Sinai likhacoka utsi, thangwe Yahova adabulukira pa phiripo ninga cirambi-rambi ca moto; utsibo bukhakwira kudzulu ninga utsi bwa pa uvuni ndipo phiri lentsenelo likhatekenyeka kwene-kwene. 19 Muwira wa nyangayo udayenda ucithumizirika, Mozeji adalewalewa ndipo Mulungu wacadidi adamutawira.

20 Tenepo Yahova adafika pa ntsonga ya Phiri la Sinai. Patsogolo pace Yahova adacemera Mozeji kuti akwire pa ntsonga ya phiriro, ndipo Mozeji adakwiradi. 21 Yahova adauza Mozeji kuti: “Polika kuti ukacenjeze wanthuwo kuti aleke kupitirira malire kuti awone Yahova, pakuti akacita bzimwebzo an’dzafa. 22 Ndipo antsembe omwe nthawe zentse ambafenderera Yahova, an’funika kubzicenesa kuti Yahova aleke kuwapha.” 23 Patsogolo pace Mozeji adauza Yahova kuti: “Wanthuwa an’kwira lini pa Phiri la Sinai, thangwe imwepo mudaticenjeza kale pomwe mudandiuza kuti: ‘Uikhe malire kuzungulira phiriri ndipo mumbaliwone kuti ndakucena.’” 24 Tsono Yahova adamuuza kuti: “Polika ndipo ukabwere pomwe pabodzi na Aroni, tsono leka kulekerera kuti antsembe pabodzi na wanthu apitirire malire kuyenda kuna Yahova, kuti iye aleke kuwapha.” 25 Tenepo Mozeji adapolika aciyenda kuna wanthuwo ndipo adakawauza bzimwebzi.

20 Patsogolo pace Mulungu adalewa mafala yentseneya kuti:

2 “Ine ndine Yahova Mulungu wako, omwe ndidakucosa m’dziko la Edjipito, nyumba ya ukapolo. 3 Leka kunamata mirungu inango, koma ine ndekha basi.

4 “Leka kubzikonzera cifanikiso cakusema, ne cinthu ciri-centse cakundendemerana na bzinthu bzomwe bziri kudzulu, bzomwe bziri pantsi pano ayai m’madzi. 5 Leka kubzigodamira ne kupumpsika kuti ubzitumikire, thangwe ine Yahova Mulungu wako, ndine Mulungu omwe nimbafuna kuti wanthu anamate ine ndekha basi. Ndipo nimbapasa nyathwa wana thangwe ra bzakuphonya bza abereki wawo, kufikira m’badwo wacitatu na wacinai kwa wale omwe ambandiwenga. 6 Koma nimbalatiza lufoyi lacadidi kwa mibadwo bzulu na bzulu ya wale omwe ambandifuna na kubvera bzakutonga bzangu.

7 “Leka kuphatisa basa dzina la Yahova Mulungu wako papezi, thangwe Yahova an’dzaleka lini kupasa nyathwa munthu ali-wentse omwe an’phatisa basa dzina lace papezi.

8 “Mbakumbukira kuti ntsiku ya Sabudu ni ntsiku yakupambulika. 9 Umbaphate basa na kucita bzinthu bzako bzentse mu ntsiku zitanthatu. 10 Tsono ntsiku yaci 7, ni Sabudu la Yahova Mulungu wako. Leka kumbaphata basa liri-lentse, kuyambira iwepo, mwana wako wacimuna, mwana wako wacikazi, kapolo wako wacimuna, kapolo wako wacikazi, cifuwo cako ne nyakubwera omwe akukhala m’mizinda mwako.* 11 Pakuti mu ntsiku 6, Yahova adalenga kudzulu, dziko la pantsi, nyanza na bzentse bzomwe bziri m‘mwemo, ndipo pa ntsiku yaci 7 iye adapuma. Ndipopa Yahova adasimba ntsiku ya Sabudu aciicitisa kukhala yakupambulika.

12 “Mbalemekeza mai wako na pai wako kuti ukhale na moyo utali m’dziko lomwe Yahova Mulungu wako akukupasa.

13 “Leka kupha munthu.

14 “Leka kucita upombo ayai uputa.

15 “Leka kuba.

16 “Leka kuperekera mwanzako umboni bwakunama.

17 “Leka kusirira nyumba ya mwanzako. Leka kusirira mkazi wa mwanzako, kapolo wacimuna ayai wacikazi wa mwanzako, ne ng’ombe yace, ne bulu wace ayai cinthu ciri-centse comwe n’ca mwanzako.”

18 Wanthu wentsenewo adabva kugunda, bziphaliwali, kulira kwa nyanga na kuwona utsi m’phirimo. Pakuwona bzimwebzi, iwo adayamba kutetemera na mantha ndipo adaima patali. 19 Ndipopa iwo adauza Mozeji kuti: “Iwepo umbalewelewe nafe ndipo ifepano tin’kutetekera, tsono Mulungu aleke kulewalewa nafe, thangwe tikugopa kuti tingafe.” 20 Tenepo Mozeji adauza wanthuwo kuti: “Lekani kugopa, pakuti Mulungu wacadidi wabwera kwa imwepo kuti adzakuyezeni kuti mupitirize kumugopa nakuti muleke kucita pikado.” 21 Wanthuwo adapitiriza kuima patalipo, tsono Mozeji adafendera pa mtambo upswipa ule, pomwe pakhana Mulungu.

22 Patsogolo pace Yahova adauza Mozeji kuti: “Ukauze Ajirayeri kuti: ‘Imwepo mwawona mwekha kuti inepano ndalewalewa namwe kucokera kudzulu. 23 Lekani kubzikonzera mirungu ya prata* na ya oro kuti muinamate, koma mumbanamate inepano ndekha basi. 24 Iwepo un’funika kundikonzera guwa la ntsembe la mataka. Pamwepo udzapereke ntsembe zakucita kutentha, ntsembe za mbverano,* mabira yako na ng’ombe zako. Ku mbuto iri-yentse yomwe nin’citisa dzina langu kukumbukiridwa, nin’dzabwera kwa iwepo ndicikusimba. 25 Iwepo ukandimangira guwa la ntsembe la minyala, leka kulimanga na minyala yakucita kusema, thangwe ukaphatisa basa tcezo pakusema minyalayo, ungapswipize guwalo. 26 Ndipo leka kumbakwira pa guwa langu la ntsembe na ntsikada, kuti uleke kuwoneredwa.’

21 “Malamulo yomwe un’funika kuyapereka kwa iwo ngaya:

2 “Ukagula kapolo omwe ni Mhebereu, iye an’dzakuphatira basa ninga kapolo kwa magole 6, tsono m’gole laci 7, iye an’dzatsudzuka mwakusaya kupagali cinthu. 3 Penu iye adabwera yekha, an’dzacokambo yekha, tsono penu adabwera na mkazace, an’dzacokambo na mkazaceyo. 4 Penu mbuya waceyo ndiye omwe adamupasa mkazi ndipo mkaziyo adamuberekera wana, mkaziyo na wanawo an’dzakhala wa mbuya waceyo ndipo iye an’dzacoka yekha. 5 Tsono kapoloyo akangingimira acilewa kuti: ‘Inepano nimbafuna mbuya wangu, mkazi wangu na wana wangu ndipo nin’funa lini kucoka,’* 6 mbuya waceyo an’funika kuyenda naye pamaso pa Mulungu wacadidi. Patsogolo pace, akamutsamirise pa msuwo ayai pa aro ya msuwoyo acimubowola khutu na ntculo,* ndipo iye an’dzakhala kapolo wace kwa moyo wace wentse.

7 “Munthu akagulisa mwana wace wacikazi ninga kapolo, mwana waceyo an’dzacoka lini ninga momwe ambacokera kapolo wacimuna. 8 Penu mbuya waceyo alibe kukomedwa naye, ndipo an’funa lini kuti akhale mkazi wace mng’ono, koma an’funa kumugulisa kwa munthu munango,* mbuya waceyo alibe ufulu bwa kumugulisa kwa wanthu wa mtundu munango, thangwe wamucitira bzinthu mwacinyengo. 9 Penu an’mupereka kwa mwana wace wacimuna, amupase ugo bwentse bomwe bumbaperekedwa kwa mwana wacikazi. 10 Mwamunayo akalowola mkazi munango, iye an’funika kupitiriza kumbapasa mkazi wakuyambayo cakudya, bzakubvala na kumbagona naye ninga mkazi wace.* 11 Tsono mwamunayo akasaya kumucitira bzinthu bzitatubzi, mkaziyo angacoke mwakusaya kupagali kobiri iri-yentse.

12 “Munthu akamenya mwanzace acimupha, iye an’funikambo kuphedwa. 13 Tsono penu alibe kucita utowa bzimwebzi, ndipo Mulungu wacadidi walekerera kuti bzimwebzi bzicitike, nin’dzakusankhulirani mbuto yakuti iye athawire. 14 Munthu akakalipa kwene-kwene na mwanzace acimupha utowa, munthuyo an’funikambo kuphedwa, napo penu wathawira pa guwa langu la ntsembe, mukamucose mucikamupha. 15 Munthu akamenya pai wace ayai mai wace, an’funika kuphedwa.

16 “Munthu akaba munthu mwanzace aciyenda kukamugulisa, ayai akaphatidwa naye an’funika kuphedwa.

17 “Munthu omwe an’temberera* pai wace ayai mai wace an’funika kuphedwa.

18 “Munthu akamenyana na mwanzace, ndipo m’bodzi akamenya mwanzaceyo na mwala ayai na faiti* ndipo mwanzaceyo acileka kufa koma acipwetekeka kwene-kwene mpaka kugona pa kama, mumbacite ibzi: 19 Nyakupwetekedwayo akakwanisa kulamuka acibula panja na mpsimbo, nyakum’pwetekayo an’pasidwa lini nyathwa, koma iye an’funika kum’pagali nthawe yentse yomwe an’phata lini basayo mpaka iye kupola bwino-bwino.

20 “Munthu akamenya kapolo wace wacimuna ayai wacikazi na muti ndipo kapoloyo n’kumufera, munthu umweyo an’funika kupasidwa nyathwa. 21 Tsono penu kapoloyo an’pitiriza kukhala na moyo kwa ntsiku ibodzi ayai ziwiri patsogolo pace n’kufa, mbuya waceyo an’funika lini kupasidwa nyathwa, thangwe kapoloyo adamugula na kobiri zace.

22 “Amuna awiri akamenyana acipweteka mkazi omwe ana pathupi, ndipo mkaziyo n’kubereka pomwe nthawe ikanati kukwana koma pacileka kufa munthu,* ule omwe wapweteka mkaziyo an’funika kupagali kobiri iri-yentse yomwe mwamuna wace wa mkaziyo an’mutcadja, ndipo iye an’funika kupagali kobiriyo pamaso pa anyakutonga mirandu. 23 Tsono pakafa munthu, nyakuphayo an’funikambo kuphedwa, 24 akamupweteka diso, apwetekedwembo diso, akamugulula dzino, agululidwembo dzino, akamutcola boko, atcoledwembo boko, akamutcola mwendo, atcoledwembo mwendo. 25 Ndipo munthu omwe an’tentha mwanzace na moto, kumupweteka ayai kumumenya, munthu umweyo an’funika kucitidwambo bzibodzi-bodzibzo.

26 “Munthu akamenya kapolo wace wacimuna ayai wacikazi pa diso n’kukhala zimola, kapoloyo an’funika kusiidwa kuti ayende ninga pagamento ya diso lace lomwe lapwetekekalo. 27 Ndipo akagulula dzino la kapolo wace wacimuna ayai wacikazi, kapoloyo an’funika kusiidwa kuti ayende, ninga pagamento ya dzino lacero.

28 “Ng’ombe ikasuntha mwamuna ayai mkazi ndipo munthuyo n’kufa, ng’ombeyo iphedwe mwakucita kuthusiridwa minyala ndipo nyama yace in’funika lini kudyedwa; tsono mwenekaciro wa ng’ombeyo an’funika lini kupasidwa nyathwa. 29 Tsono penu ng’ombeyo ikhana kale msambo wakumbasuntha wanthu ndipo mwenekaciroyo akhadacenjezedwa kale koma akhambailekerera ndipo ng’ombeyo n’kupha munthu, iyo in’funika kuphedwa mwakucita kuthusiridwa minyala ndipo mwenekaciro ng’ombeyo an’funikambo kuphedwa. 30 Penu mwenekaciro ng’ombeyo an’kumbiridwa kupereka kobiri kuti alombole moyo wace, iye an’funika kupereka kobiri iri-yentse yomwe an’kumbiridwa kuti alombole moyo waceyo. 31 Penu ng’ombeyo in’suntha mwana wacimuna ayai wacikazi, mwenekaciro ng’ombeyo an’funika kutongedwa mwakubverana na lamulo limweri. 32 Penu ng’ombeyo yasuntha kapolo wacimuna ayai wacikazi, mwenekaciroyo apagali kobiri zakukwana masiklo* 30 kwa mbuya wace wa kapoloyo, ndipo ng’ombeyo iphedwe mwakucita kuthusiridwa minyala.

33 “Munthu akasiya mcera wakusaya kufunga ayai akacera mcera n’kusaya kuugwanankhira, ndipo ng’ombe ayai bulu acigwera m’mwemo, 34 mwenekaciro mcerayo an’funika kupagali ndipo pagamentoyo aipereke kwa mwenekaciro cifuwoco, ndipo cifuwo cakufaco cin’khala cace. 35 Penu ng’ombe ya munthu in’pweteka ayai kupha ng’ombe ya mwanzace, ng’ombe yamoyoyo in’funika kugulisidwa acigawana kobirizo ndipo an’funikambo kugawana ng’ombe yakufayo. 36 Tsono penu ng’ombeyo ikhadziwika kuti ikhana msambo wakumbasuntha zinzace tsono mwenekaciroyo akhambailekerera, iye an’funika kupagalisidwi. Penu yapha ng’ombe inzace, iye an’funikambo kupagali ng’ombe, ndipo ng’ombe yakufayo in’khala yace.

22 “Munthu akaba ng’ombe ayai bira acipha ayai kugulisa, apagali ng’ombe zixanu pa yomwe waba ire ndipo apagali mabira manai pa bira m’bodzi omwe waba ule.

2 (“Mbava ikaphatidwa ikutcola m’nyumba kuti ibe, ndipo yamenyedwa icifa, omwe waiphayo alibe mulandu wa mulopa. 3 Tsono penu bzimwebzi bzacitika pomwe dzuwa lacoka kale, omwe waiphayo ana mulandu wa mulopa.)

“Mbavayo ipagali, ndipo penu iribe cinthu ciri-centse, igulisidwe kuti ipagali bzinthu bzomwe yababzo. 4 Penu bzomwe yababzo bzagumanika na moyo ndipo bzina iye, bziribe basa penu ni ng’ombe, bulu ayai bira, iye an’funika kupagali bzifuwo bziwiri pa cibodzi comwe iye akhadabaco.

5 “Penu munthu an’tenga bzifuwo bzace acikabzidyesa m’munda mwace mwa uva ayai mwa bzinthu bzinango, tsono n’kubzilekerera bziciyenda kukadya m’munda mwa munthu munango, mwenekaciro bzifuwobzo an’funika kupagali na phoso labwino kwene-kwene la m’munda mwace ayai na uva bwabwino bwa m’munda mwace.

6 “Penu munthu wagasa moto ndipo motoyo wayenderera uciphata miti ya minga, ucitentha misumbu ya bzinthu bza m’munda bzakubvunidwa ayai tirigu yomwe ikanati kubvunidwa ayai munda wentse, omwe wagasa motoyo an’funika kupagali bzomwe bzadzongedwabzo.

7 “Penu munthu wapasa mwanzace kobiri ayai bzinthu kuti amukoyere ndipo bzinthubzo n’kubedwa m’nyumba mwace, mbavayo ikagumanidwa ipagali kawiri bzinthu bzomwe ikhadababzo. 8 Penu mbavayo iribe kugumanika, mwenekaciro nyumbayo abweresedwe pamaso pa Mulungu wacadidi kuti bzidziwike penu iye ndiye omwe waba bzinthu bza mwanzaceyo ayai ne. 9 Munthu akakhala na cinthu cakutaika ciri-centse ninga, ng’ombe, bulu, bira ayai cakubvala tsono munango acilewa kuti: ‘Cinthu cimweci n’cangu!’ Awiriwo aitenge nkhaniyo aciyenda nayo pamaso pa Mulungu wacadidi. Omwe Mulungu an’tonga kuti ni nyakuphonya, iye an’funika kupagali kawiri cinthu comwe akhalewa kuti n’caceco.

10 “Penu munthu an’pasa mwanzace bulu, ng’ombe, bira ayai cifuwo ciri-centse kuti afuwe, ndipo cifuwoco n’kufa ayai kupwetekedwa, ayai cicitengedwa mwakusaya kuwonedwa na munthu ali-wentse, 11 omwe akhadakoya bzinthuyo alumbire kwa mwanzaceyo pamaso pa Yahova kuti alibe kumutengera bzinthu bzacebzo. Mwenekaciro bzinthuyo abvume lumbirolo ndipo aleke kumupagalisi mwanzaceyo. 12 Tsono penu cifuwoco cabedwa m’manja mwa omwe akhafuwayo, iye an’funika kupagali mwenekaciro wa cifuwoyo. 13 Penu cifuwoco caphedwa na cirombo, abwerese cifuwo cakufaco ninga umboni. Iye an’funika lini kupagali penu cifuwoco caphedwa na cirombo.

14 “Tsono penu munthu wakumbira cifuwo kwa mwanzace ndipo ico capwetekeka kwene-kwene ayai cafa pomwe mwenekaciroyo palibe, nyakukumbirayo apagali. 15 Penu mwenekaciro alipo, nyakukumbirayo anipagali lini. Tsono penu akhadapereka kobiri kuti amukumbize cifuwoco, an’dzandopereka kobiriyo ninga pagamento.

16 “Mwamuna akanyengerera dende lomwe likanati kubvunziridwa acicita nalo malume ya pamphasa, iye an’funika kupagali lobolo* acilitenga kuti likhale mkazi wace. 17 Tsono penu pai wa mtsikanayo an’lamba kupereka mwana wawoyo kwa mwamunayo, mwamunayo apereke basi kobiri zakundendemerana na kobiri za lobolo.

18 “Leka kusiya kuti mpfiti* ipitirize kukhala na moyo.

19 “Munthu ali-wentse omwe an’fambizana na cifuwo, kulewa cadidi an’funika kuphedwa.

20 “Munthu ali-wentse omwe an’pereka ntsembe kwa mirungu inango sikuti kwa Yahova yekha, kulewa cadidi an’funika kuphedwa.

21 “Lekani kuboneresa ayai kupenyerera anyakubwera omwe akukhala pakati panu, pakuti imwepo mukhalimbo alendo m’dziko la Edjipito.

22 “Leka kuboneresa mamsiwa ayai nkhungwa.* 23 Iwepo ukam’boneresa mu njira zakusiyana-siyana ndipo iye acindilirira, mwakusaya kupenukira inepano nin’dzabva kulira kwaceko. 24 Inepano nin’dzakalipa kwene-kwene ndipo nin’dzakuphani na xipada. Azikazanu an’dzakhala amamsiwa ndipo wana wanu an’dzakhala nkhungwa.

25 “Ukafiyalisi kobiri munthu ali-wentse wakusauka pakati pa wanthu wangu, munthu ali-wentse omwe ukukhala naye pabodzi, leka kucita bzimwebzo na cakulinga cakuti ugumane phindu, leka kumukumbira kuti adzakubwezere na juro.*

26 “Munthu akakufiyali cinthu ndipo iwepo ucimuphatira cakubvala, un’funika kumubwezera cakubvalaco dzuwa likanati kumira. 27 Thangwe cimweco ndico cakufunika cace ndipo ni nguwo yomwe ambampsinkhira nayo thupi lace, tsono kodi an’funika ciyani pakugona? Iye akandilirira, mwakusaya kupenukira nin’dzabva thangwe ndine wantsisi.

28 “Leka kutemberera* Mulungu ayai mtsogoleri* omwe ali pakati pa wanthu wako.

29 “Lekani kuzeza kundipasa ntsembe kucokera ku bzakubvuna bzanu bzizinji na kucokera ku vinyu na mafuta yanu yomwe n’mazinji. Wana wanu wacimuna wakuyamba kubadwa mun’funika kuwapereka kwa inepano. 30 Bzomwe mun’funika kucita na mwana wakuyamba kubadwa wa ng’ombe na bira mpsibzi: Mwanayo ambakhale na mai wace kwa ntsiku zinomwe, tsono pa ntsiku yacisere mumbam’pereke kwa ine.

31 “Mukhale wakucena pamaso pangu ndipo lekani kudya nyama iri-yentse yakuphedwa na cirombo ca m’thengo. Nyamayo mun’funika kupasa mbwaya.

23 “Leka kumwaza nkhani zakunama. Leka kubverana na munthu wakuipa mwa kukhala mboni yakukonzera winango bzakuipa. 2 Leka kucita bzinthu bzakuipa thangwe rakuti azinji akucita bzimwebzo. Pomwe ukupereka umboni, leka kulewa bzinthu bzomwe mpsacadidi lini* kuti azinji akomedwe, thangwe ukacita tenepo un’dzakhala ukutazisa cirungamo. 3 Ukakhala kuti ukutonga mulandu wa munthu wakusauka, leka kumuthandiza kokha thangwe rakuti ngwakusauka.

4 “Ukawona ng’ombe ayai bulu wa nyamadulanthaka wako wasocera, un’funika kumuyendesa kwa mwenekaciro. 5 Ukawona bulu wa munthu omwe umbawengana naye wagwa pantsi thangwe ra kulemedwa na mitolo, leka kuyenda ucisaya kumuthandiza. Un’funika kumuthandiza kutsudzula buluyo.

6 “Pakutonga munthu wakusauka omwe ambakhala pakati panu, leka kumutonga mwakusaya cirungamo.

7 “Leka kubverana na wanthu omwe akunamizira mulandu anzawo, ndipo leka kupha munthu wakusaya mulandu na wakulungama, thangwe munthu wakuipa nin’dzamuwona lini kuti ngwakulungama*

8 “Leka kubvuma kutambira bobobo, thangwe boboboyo ambapumpsa munthu omwe ambatonga mwanzeru ndipo ambacitisa munthu wakulungama kucinja bzomwe akhafuna kucita pa mulanduyo.

9 “Lekani kuboneresa anyakubwera omwe akukhala pakati panu. Imwepo mukudziwa kuti kukhala mulendo n’ciyani,* thangwe mudakhalambo alendo m’dziko la Edjipito.

10 “Mumbabzale na kubvuna m’minda mwanu kwa magole matanthatu. 11 Tsono mu gole laci 7 lekani kuulima, mumbausiye tenepoyo kuti anyakusauka omwe ali pakati panu ambadye bzomwe bzinimera m’mundamo ndipo bzomwe iwo anisiya bzirombo bza m’thengo bzidyembo. Mumbacite bzimwebzi na minda yanu ya uva na ya maolivera.

12 “Mbaphata basa lako kwa ntsiku 6; pa ntsiku yaci 7 leka kumbaphata basa liri-lentse, kuti ng’ombe yako, bulu wako, mwana wa kapolo wako wacikazi na nyakubwera omwe akukhala pakati panu apumembo.

13 “Muwonesese kuti mukucita bzentse bzomwe ndakuuzanibzi, lekani kumbaguma madzina ya mirungu inango, ndipo madzina yawoyo yan’funika lini kubveka pa mulomo panu.

14 “Mumbandicitire phwando katatu pa gole liri-lentse. 15 Mumbacite phwando la pau zakusaya fermento. Mumbadye pau zakusaya fermento kwa ntsiku 7 pa nthawe yace yakuikhidwiratu, m’mwezi wa Abibe, ninga momwe ndidakuuzirani, thangwe umweyu ni mwezi omwe mudacoka m’dziko la Edjipito ndipo palibe munthu omwe an’funika kubwera kudzawonekera kwa ine cimanja-manja. 16 Mumbacite Phwando Lakubvuna* bzisapo bzakuyamba bza basa lanu lakubzala m’minda ndipo kuphampha kwa gole mumbacitembo Phwando Lakumaliza Kubvuna* bzinthu bza m’munda mwanu. 17 Amuna wentse pakati panu an’funika kumbawonekera pamaso pa Mbuya wacadidi Yahova katatu pa gole.

18 “Mukapereka mulopa wa ntsembe yangu, lekani kumbaupereka pabodzi na cinthu ciri-centse comwe cina fermento, ndipo ntsembe za mafuta zomwe mwazipereka m’maphwando yangu lekani kumbazigonesa mpaka mangwana.

19 “Un’funika kumbayendesa ku nyumba ya Yahova Mulungu wako bzinthu bzabwino kwene-kwene bzakuyambirira kukhuma bza m’munda mwako.

“Leka kuphika ntcere mu mkaka wa mai wace.

20 “Nin’kutumizirani anjo patsogolo panu kuti akukhotcerereni mu njira nakuti akakupitiseni m’dziko lomwe ndakukonzerani. 21 Mumbamubvere na kucita bzomwe an’lewa, lekani kumupandukira thangwe an’dzalekerera lini bzakuphonya bzanu, pakuti dzina langu liri mwa iye. 22 Tsono mukabveradi mafala yace na kucita bzentse bzomwe an’dzakuuzani, nin’dzakhala nyamadulanthaka wa anyamadulanthaka wanu ndipo nin’dzaboneresa omwe an’dzakuboneresani. 23 Thangwe anjo wangu an’dzakutsogolerani, acikakupitisani m’dziko la Aamori, Ahiti, Aperizi, Akanani, Ahivi na Ajebusi, ndipo ine nin’dzawapfudza. 24 Lekani kudzagodamira mirungu yawo ayai kupumpsika kudzaitumikira, ndipo lekani kukatewezera bzomwe iwo ambacita. M’mbuto mwace, dzapfudzeni bzifanikiso bzawobzo pabodzi na mapilare yawo yakupambulika. 25 Mutumikire Yahova Mulungu wanu ndipo iye an’dzakusimbani na cakudya pabodzi na madzi. Inepano nin’dzacosa matenda pakati panu. 26 M’dziko lanu mun’dzagumanika lini mkazi omwe an’dzabereka mwana wakufa, ayai kukhala wakusaya kubereka, ndipo nin’dzacitisa kuti mukhale na moyo magole mazinji.

27 “Imwepo mukanati kufika, nin’dzacitisa kuti andigope. Nin’dzaviringiza wanthu wentse omwe an’dzafuna kumenyana namwe ndipo nin’dzacitisa kuti mukunde anyamadulanthaka wanu acithawa.* 28 Nin’dzacitisa wanthuwo kubva mantha imwepo mukanati kufika ndipo Ahivi, Akanani na Ahiti an’dzathawiratu pamaso panu. 29 Nin’dzawathotha lini wentsenewo kwa gole libodzi basi, kugopera kuti dzikolo lingadzakhale lakusaya wanthu, ndipo bzirombo bza m’thengo bzingadzawande bzicidzakudyani. 30 Nin’dzawathotha pamaso panu pang’ono-pang’ono mpaka imwepo kudzakhala azinji mucidzatenga dzikolo.

31 “Dziko lomwe nin’dzakupasani lin’dzayambira ku Nyanza Ifuira mpaka ku nyanza ya Afilisteu, ndipo lin’dzayambirambo ku dambo mpaka ku Mkulo,* pakuti nin’dzapereka wanthu wakukhala m’dzikolo m’manja mwanu ndipo imwepo mun’dzawathamangisa pamaso panu. 32 Lekani kucita nawo mpangano ayai kupicira kunamata mirungu yawo. 33 Iwo aleke kukhala m’dziko lanu, kuti aleke kudzakucitisani kuti mundiphonyere. Mukadzatumikira mirungu yawo, kulewa cadidi lin’dzakhala diwa kwa imwepo.”

24 Patsogolo pace Mulungu adauza Mozeji kuti: “Kwira m’phiri uyende kuna Yahova, iwepo, Aroni, Nadabi, Abihu na akulu-akulu 70 wa Jirayeri ndipo mukagodame na patali. 2 Mozeji yekha ndiye omwe akafendere kwa Yahova, tsono winangowo aleke kukafendera ndipo Ajirayeri aleke kukwira namwe pabodzi m’phirimo.”

3 Patsogolo pace Mozeji adakauza wanthuwo mafala yentse ya Yahova na bzakutonga bzace bzentse, ndipo iwo adatawira wentse pabodzi kuti: “Tin’dzacita bzentse bzomwe Yahova walewa.” 4 Tenepo Mozeji adanemba mafala yentse ya Yahova. Patsogolo pace iye adamuka macibese-bese acimanga guwa la ntsembe m’mphepete mwa phiri, ndipo guwalo adalimanga na minyala 12 yomwe ikhaimira madzinza 12 ya Jirayeri. 5 Patsogolo pace Mozeji adasankhula alumbwana ndipo iwo adapereka ntsembe zakucita kutentha na ng’ombe kuti zikhale ntsembe za mbverano* kwa Yahova. 6 Patsogolo pace Mozeji adatenga kati na kati ya mulopa aciuikha m’tijela, ndipo mulopa munangoyo adauwazira pa guwa la ntsembepo. 7 Patsogolo pace Mozeji adatenga bukhu la mpangano, aciwerengera wanthuwo mwakukuwa. Tenepo wanthuwo adati: “Tin’dzacita bzentse bzomwe Yahova walewa ndipo tin’dzamubvera.” 8 Mozeji adatenga mulopayo aciwazira wanthuwo, ndipo adati: “Umweyu ni mulopa wa mpangano omwe Yahova wacita namwe mwakubverana na mafala yentseneya.”

9 Mozeji, Aroni, Nadabi, Abihu na akulu-akulu 70 wa Jirayeri wale adakwira m’phirimo, 10 ndipo iwo adawona Mulungu wa Jirayeri. Nzayo zace zikhadaponda cinthu comwe cikhawoneka ninga mwala wa safira na cakucena ninga kudzulu. 11 Iye alibe kupweteka akulu-akulu wa Jirayeri wale. Iwo adawona Mulungu wacadidi m’masomphenya ndipo adadya na kumwa.

12 Tenepo Yahova adauza Mozeji kuti: “Kwira m’phiri muno ubwere kwa ine ndipo ukhale mom’muno. Inepano nin’dzakupasa minyala yakusema yomwe nin’dzanemba malamulo na mitemo kuti ukapfunzise wanthuwo.” 13 Tenepo Mozeji na Djoswa omwe akhali mtumiki wace adayenda, ndipo Mozeji adakwira m’phiri la Mulungu wacadidi. 14 Tsono iye adauza akulu-akulu wale kuti: “Tidikireni pano mpaka ifepano kubwerera. Aroni na Hur anamwe. Ali-wentse omwe an’khala na mulandu omwe un’funa kutongedwa angayende kwa iwo.” 15 Tenepo Mozeji adakwira m’phirimo, pomwe mtambo ukhadampsinkha phiriro.

16 Ulemerero bwa Yahova budapitiriza kukhala pa Phiri la Sinai ndipo mtambo ukhadampsinkha phiriro kwa ntsiku 6. Pa ntsiku yaci 7, Mulungu adacemera Mozeji kucokera pakati pa mtamboyo. 17 Kwa Ajirayeri omwe akhawona bzimwebzi, ulemerero bwa Yahova bukhawoneka ninga moto wamphanvu omwe ukhagaka pa ntsonga ya phiriro. 18 Patsogolo pace Mozeji adapita mu mtambomo acikwira m’phirimo, ndipo iye adakhala m’mwemo ntsiku 40, usiku na masikati.

25 Patsogolo pace Yahova adauza Mozeji kuti: 2 “Uza Ajirayeri kuti acite bzakupereka kwa ine. Utambire bzakupereka bzangu kwa munthu ali-wentse omwe akufunisisa kuperekako. 3 Bzakupereka bzomwe un’funika kutambira kwa iwo mpsibzi: Oro, prata,* kobre,* 4 usalu bwa azuli, usalu bwa roxo, usalu bufuira kwene-kwene, usalu bwabwino kwene-kwene, ukuse bwa mbuzi, 5 makanda ya bvululume yakupalangiridwa na mtoto ufuira, makanda ya foka,* matabwa ya muti wa mkexa, 6 mafuta yakuikha m’makandiyero, balsamo yakukonzera mafuta yakudzozera, bzakununtcirisa, 7 minyala ya onekisi na minyala inango yakuikha pa efodi na pa cakubvala pankhombe. 8 Mundikonzere tabernakulo ndipo inepano nin’dzakhala pakati panu. 9 Ukonze tabernakuloyo na bzombo bzentse, uciteweza ndendende bzomwe ndakulatizabzi.

10 “Mukonze thungwa na matabwa ya muti wa mkexa, ndipo mtali mwace mukhale mwa makovado* mawiri na meya, khwankhwa lace likhale la kovado ibodzi na meya ndipo kutalimpha kwace kukhale kwa kovado ibodzi na meya. 11 Ulipalangire oro caiyo mkati na kunja. Muikhembo bzakudekesera bza oro m’mphepete mwentse mwa thungwalo. 12 Ukonze tubzinthu tunai twaardondo twa oro ndipo utuikhe m’mbali zinai za minyendo ya thungwalo, tuwiri mbali iyi, tuwiri mbali inangoyo. 13 Ukonzembo muti yakunyamulira na muti wa mkexa ndipo uipalangire oro. 14 Uikhe mitiyo m’tubzinthu twaardondo tomwe tuli m’mbali mwa thungwa tule kuti mumbanyamulire thungwalo. 15 Miti yakunyamulirayo in’dzakhala m’mphepete mwa thungwalo ndipo in’funika lini kudzacosedwa. 16 Mkati mwa thungwalo udzaikhe minyala miwiri yakusema yomwe nin’kupasa, yomwe iri ninga Umboni.

17 “Ukonze cakugwanankhirira na oro caiyo. Mtali mwace cikhale ca kovado ibodzi na meya ndipo khwankhwa lace likhale la kovado ibodzi na meya. 18 Ukonze akerubi awiri wa oro, uwasule na martelo ndipo uwaikhe m’maponta mawiri mwa cakugwanankhiriraco. 19 Kerubi m’bodzi akhale ku ponta ibodzi ndipo kerubi munangoyo akhalembo ku ponta inangoyo. 20 Akerubiwo an’funika kufuthula maphaphidwe yawo m’dzaulu, acimpsinkha cakugwanankhiriraco na maphaphidweyo. Iwo an’funika kudzanyang’anisana ndipo nkhope zawo zidzatsulimire cakugwanankhiriraco. 21 Udzagwanankhire Thungwalo na cakugwanankhiriraco ndipo mkatimo udzaikhe minyala yakusema yomwe nin’kupasa yomwe iri ninga Umboni. 22 Inepano nin’dzabwera kwa iwepo ndicilewalewa nawe kucokera padzulu pa cakugwanankhiriraco, ndipo inepano nin’dzakudziwisa mitemo yentse yomwe un’funika kuuza Ajirayeri kucokera pakati pa akerubi awiri omwe ali padzulu pa thungwa la Umboni.

23 “Ukonzembo meza na matabwa ya muti wa mkexa ya makovado mawiri mtali mwace, khwankhwa lace likhale la kovado ibodzi ndipo kutalimpha kwace kukhale kwa kovado ibodzi na meya. 24 Uipalangire oro caiyo ndipo ukonze bzakudekesera bza oro m’mphepete mwace. 25 Ukonze cakudekesera m’mphepete mwa mezayo ndipo khwankhwa lace likhale la masentimetro 7 ndipo m’malire mwace uikhembo bzakudekesera bza oro. 26 Ukonze tubzinthu twa oro twaardondo tunai ndipo utuikhe m’maponta manai ya mezayo momwe muna minyendo yace. 27 Tubzinthu twaardondoto tukhale pafupi na bzakudekesera bzire kuti mumbapitise miti yakunyamulira mezayo. 28 Mitiyo ikhale ya mkexa ndipo uipalangire oro kuti mumbanyamulire mezayo.

29 “Mukonzembo mapalato, makopo, majaro na matijela kuti bzimbaphatisidwe basa pakupereka ntsembe za vinyu. Bzombobzo mubzikonze na oro caiyo. 30 Ndipo nthawe zentse mumbaikhe pau zakuwonesedwa, pa meza yomwe iri pamaso pangu.

31 “Ukonzembo cakuikhira kandiyero ndipo ucikonzembo na oro caiyo. Cakuikhira kandiyeroco cikhale cakusulidwa na martelo. Tsinde lace, mwendo wace, mthambi zace, tumasamba twa m’nyantsi mwa maluwa twace, ndingo zace na maluwa yace bziphatane kuti cikhale cinthu cibodzi. 32 Cakuikhira kandiyeroco cikhale na mthambi 6. Mbali ibodzi ikhale na mthambi zitatu ndipo mbali inangoyo ikhalembo na mthambi zitatu. 33 Mthambi iri-yentse ya mbali ibodzi ikhale na tumasamba tutatu twa m’nyantsi mwa maluwa, ndipo tukonzedwe ninga maluwa ya muti wa amendwa ndipo tumasambato tutewerane ndingo na maluwa, ndingo na maluwa. Mthambi iri-yentse ya mbali inangoyo ikhalembo na tumasamba tutatu twa m’nyantsi mwa maluwa, ndipo tukonzedwe ninga maluwa ya muti wa amendwa ndipo tumasambato tumbateweranembo ndingo na maluwa, ndingo na maluwa. Umu ni momwe zin’funika kukhalira mthambi 6 pa mwendo wa cakuikhira kandiyeroco. 34 Mwendo wa cakuikhira kandiyeroco ukhale na tumasamba tunai twa m’nyantsi mwa maluwa twakukonzedwa ninga maluwa ya muti wa amendwa, ndipo tumasambato tumbatewerane ndingo na maluwa, ndingo na maluwa. 35 Ndingo ibodzi ikhale pantsi pa mthambi ziwiri zakuyambirira, ndipo ndingo inango ikhale pantsi pa mthambi ziwiri za pakati ndipo ndingo yacitatu ikhale pantsi pa mthambi ziwiri zakumalizira. Umu ni momwe zin’funika kukhalira mthambi 6 za mwendo wa cakuikhira kandiyeroco. 36 Cakuikhira kandiyeroco kuphatanidzambo ndingo na mthambi zace bzin’funika kukhala cinthu cibodzi cakukonzedwa na oro caiyo, cakusulidwa na martelo. 37 Ukonze makandiyero 7 uciyaikha pa cakuikhira kandiyeroco, kuti makandiyeroyo yakagaka, yambabvunike kutsogolo kwa cakuikhira kandiyeroco. 38 Bzakuthimisira tubzingwe twa m’makandiyeroyo na tumapalato twakuikhira dotha la tubzingweto bzikhale bza oro caiyo. 39 Cakuikhira kandiyeroco pabodzi na bzombo bzace bzentse bzikonzedwe na oro caiyo yakulemera talento* ibodzi. 40 Ubzikonze ndendende ninga momwe ndakulatizira m’phiri muno.

26 “Iwepo un’funika kukonza tabernakulo na nguwo 10 zakukonzera tendi zakulukidwa bwino, za usalu bwa azuli, usalu bwa roxo na usalu bufuira kwene-kwene. Ndipo pa nguwozo ubordari akerubi. 2 Nguwo iri-yentse italimphe makovado* 28 ndipo khwankhwa lace likhale la makovado manai. Nguwo zentsenezo zikhale na mphimo ibodzi-bodzi. 3 Nguwo zixanu uziphatanidze kuti zikhale nguwo ibodzi ikulu, ndipo zixanu zinangozo uziphatanidzembo kuti zikhale nguwo ibodzi ikulu. 4 Kuphampha kwa nguwo zixanu zomwe waphatanidzazo usonerere magango ya tubzingwe twa azuli. Ucitembo bzibodzi-bodzi na nguwo inangoyo kuti nguwo ziwiri zikulu-zikuluzi ziphatanidzidwe. 5 Usonerere magango 50 pa nguwo ibodzi ndipo nguwo inangoyo usonererembo magango 50 kuphampha kwace, ndipo magangoyo yanyang’anisane m’mbuto zomwe un’kaphatanidza nguwo ziwiri zikulu-zikuluzo. 6 Ukonze bzakupanira bza oro 50 bzaardondo kuti uphatanidzire nabzo nguwo ziwiri zikulu-zikulu zire. Tenepo in’dzandokhala nguwo ibodzi basi ikulu ya tabernakulo.

7 “Ukonze nguwo za ukuse bwa mbuzi kuti uswimphire tabernakuloyo. Ukonze nguwo zakukwana 11. 8 Nguwo iri-yentse italimphe makovado 30 ndipo khwankhwa lace likhale la makovado manai. Nguwo zentse 11 zikhale za mphimo ibodzi-bodzi. 9 Uphatanidze nguwo zixanu pabodzi ndipo uphatanidze pomwe nguwo zinango 6 pabodzi. Ukamala ufunye nguwo yacitanthatuyo kutsogolo kwa tabernakulo. 10 M’mphepete mwa nguwo yakuphatanidzidwa yakuyamba, uikhe magango 50 ndipo kuphampha kwa nguwo yakuphatanidzidwa yaciwiri uikhembo magango yakukwana 50 m’mbuto zomwe nguwo ziwirizo zin’phatanidzidwa. 11 Ukonze bzakupanira 50 bza kobre* ucibziikha m’magango mule kuti uphatanidze nguwo ziwiri zikulu-zikuluzo. Tenepo nguwo ziwirizo zin’khala nguwo ibodzi basi yakupswimphira nayo tabernakulo. 12 Kumbuyo kwa tabernakulo kusale nguwo, ndipo metade ya nguwo yakusalayo ilerembe mpaka pantsi. 13 Ndipo m’mbali iri-yentse, mtali mwa nguwo ikuluyo musale nguwo ya kovado ibodzi, ndipo nguwo yakusalayo ilerembe mpaka pantsi kuti impsinkhe tabernakuloyo.

14 “Ukonze cakuswimphirira tabernakulo na makanda ya bvululume* yakupalangiridwa na mtoto ufuira, ndipo padzulu pace uswimphire na khanda la foka.*

15 “Ukonze aro zakuimisira tabernakuloyo na matabwa ya muti wa mkexa. 16 Aro iri-yentse italimphe makovado 10, ndipo khwankhwa lace likhale la kovado ibodzi na meya. 17 Aro iri-yentse ikhale na bzakulumikidzira bziwiri ndipo cakulumikidzira ciri-centse cikhale pafupi na cinzace. Aro zentse za tabernakulo zikonzedwe tenepoyo. 18 Ukonze aro 20 uciziimisa kumbali ya ku suli kwa tabernakuloyo.

19 “Ukonze matsinde 40 ya prata uciyabowola kuti upitise aro 20 zire. Matsinde mawiri yapite pantsi pa aro ibodzi ndipo ubowole tsinde liri-lentse kuti mupite bzakulumikidzira bziwiri bzomwe bziri mu arozo. 20 Ukonze aro 20 ku mbali inango ya tabernakuloyo yomwe ni mbali ya ku norte 21 na matsinde yace 40 ya prata, ndipo pantsi pa aro iri-yentse papite matsinde mawiri. 22 Ukonzembo aro 6 uciziikha kumbuyo kwa tabernakuloyo, ku mbali ya kumadokero. 23 Ukonzembo aro ziwiri kuti zikhale midjirikiro m’maponta mawiri ya kumbuyo kwa tabernakuloyo. 24 Aro zentsenezi zikhale na matabwa mawiri kuyambira kudzulu mpaka pa kacinthu kaardondo kakuyamba ka pantsi, ndipo ucitembo bzibodzi-bodzibzo na aro ziwiri zakudjirikira zomwe ziri kumbuyo kwa tabernakulo. 25 Pakhale aro 8 na matsinde yace ya prata 16 yakuikhira arozo. Matsinde mawiri yapite pantsi pa aro ibodzi.

26 “Ukonze mbaliro na muti wa mkexa. Mbaliro zixanu zikhale ku aro za mbali ibodzi ya tabernakuloyo, 27 ndipo mbaliro zixanu zikhale ku aro za mbali inango ya tabernakulo, ndipo zinango zixanu zikhale ku aro za kumadokero kumbuyo kwa tabernakuloyo. 28 Mbaliro ya pakati yomwe in’khala pakati pa arozo in’funika kucokera ku ponta ibodzi mpaka ku ponta inangoyo.

29 “Arozo uzipalangire oro ndipo ukonze tubzinthu twaardondo twa oro kuti mbalirozo zidzapite m’mwemo, ndipo mbalirozo uzipalangirembo oro. 30 Ukonze tabernakuloyo ndendende ninga momwe ndakulatizira m’phiri muno.

31 “Ukonze kortina na usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene bwakulukidwa bwino. Pa kortinapo ubordari akerubi. 32 Kortinayo uimanike pa pilare zinai zakukonzedwa na muti wa mkexa zakupalangiridwa oro. Tungoloweko twakumanikira kortinayo tukhale twa oro ndipo mapilareyo yakhale padzulu pa matsinde manai ya prata. 33 Kortinayo uimanike m’nyantsi mwa bzakupanira bzakuphatanidzira nguwo za padzulu pa tabernakulo, ndipo uikhe thungwa la Umboni kukhonde kwa kortinayo. Kortinayo in’dzagawa Mbuto Yakucena na Yakucenesesa. 34 Uikhe cakugwanankhirira pa thungwa la Umboni lomwe liri mu Mbuto Yakucenesesa.

35 “Uikhe meza kunja kwa kortinayo, ndipo uikhembo cakuikhira kandiyero mwakunyang’anisana na mezayo. Cakuikhira kandiyeroco cikhale ku mbali ya ku suli ndipo mezayo ikhale ku mbali ya ku norte kwa tabernakuloyo. 36 Ukonze kortina ya pa msuwo pa tabernakulo ndipo kortinayo uikonze na usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene bwakulukidwa bwino. 37 Ukonze pilare zixanu na muti wa mkexa ucizipalangira oro kuti umanikire kortina ya pa msuwo pa tabernakuloyo. Ngoloweko zakumanikira kortinazo zikhale za oro ndipo ukonze matsinde maxanu ya kobre* yomwe yana tumibowo.

27 “Ukonze guwa la ntsembe na muti wa mkexa. Guwalo likhale la makovado* maxanu mtali mwace ndipo khwankhwa lace likhalembo la makovado maxanu. Guwalo likhale la kwadrado, lakutalimpha makovado matatu. 2 Ukonze nyanga zinai m’maponta mwace; nyangazo zin’cita mbali ya guwalo ndipo guwa lentsenero ulipalangire kobre.* 3 Ukonze bzombo bzakucosera dotha* kuphatanidzambo mafoxolo, matijela, magarfu na bzakuikhira dotha. Bzombo bzentse bza pa guwa la ntsembe bzikonzedwe na kobre.* 4 Pa guwa la ntsembepo ukonze gredya ya kobre ndipo ukonzembo tubzinthu twaardondo tunai twa kobre ucituikha m’maponta manai ya guwa la ntsembero. 5 Uikhe gredyayo pakati pa guwalo, pafupi na bara yomwe iri m’dzaulu, m’mphepete mwa guwalo. 6 Ugwate miti ya mkexa yakunyamulira guwalo uciipalangira kobre. 7 Mitiyo uipitise mu tubzinthu twaardondo tomwe tuli m’mbali ziwiri za guwalo pakufuna kulinyamula. 8 Guwalo ulikonze na mawonekedwe ya kaxa ndipo uleke kufunga pantsi. Ulikonze ndendende ninga momwe ndidakulatizira m’phiri.

9 “Udzakonze kintale ya tabernakulo. Ku mbali ya ku suli idzakhale na litsito la nguwo yakulukidwa bwino kwene-kwene, ndipo kutalimpha kwace idzakhale ya makovado 100. 10 Ku mbali imweyi kudzakhale na mapilare 20 na matsinde 20 ya kobre yomwe yana mibowo yakulumikidzira. Ngoloweko zakumanikira nguwo zomwe zin’dzakhala pa mapilareyo na bzakuphatanidzira* nabzo, bzin’funika kukhala bza prata. 11 Ku mbali ya ku norte kudzakhalembo na nguwo yakutalimpha makovado 100, ndipo kudzakhalembo na mapilare 20 na matsinde 20 ya kobre yomwe yana mibowo yakulumikidzira, ndipo ngoloweko na bzakulumikidzira nabzo mapilareyo bzin’funika kukhala bza kobre. 12 Mu khwankhwa mwa kintale ya tabernakulo ku mbali ya kumadokero, mudzakhale na litsito la nguwo ya makovado 50, ndipo mudzakhalembo na mapilare 10 na matsinde 10 yomwe yana mibowo yakulumikidzira. 13 Khwankhwa la kintaleyo ku mbali ya kumabvadzuwa likhale la makovado 50. 14 Ku mbali ya ku msuwo kudzakhale na litsito la nguwo zakutalimpha makovado 15, mapilare matatu na matsinde matatu yomwe yana mibowo yakulumikidzira. 15 Ndipo ku mbali inangoyo kudzakhalembo na litsito la nguwo zakutalimpha makovado 15, mapilare matatu na matsinde matatu yomwe yana mibowo yakulumikidzira.

16 “Pa msuwo wa litsitolo padzakhale na kortina yakulukidwa na usalu bwa azuli, usalu bwa roxo, usalu bufuira kwene-kwene na usalu bwakulukidwa bwino kwene-kwene, ndipo khwankhwa lace lidzakhale la makovado 20. Padzakhalembo na mapilare manai na matsinde manai yomwe yana mibowo yakulumikidzira. 17 Mapilare yentse kuzungulira litsitolo, yakhale na bzakupanira na ngoloweko za prata, tsono matsinde yace yakhale ya kobre. 18 Litsitolo lidzakhale la makovado 100 mtali mwace, khwankhwa lace lidzakhale la makovado 50 ndipo kutalimpha kwace kudzakhale kwa makovado maxanu. Lidzakonzedwe na nguwo yabwino ndipo lidzakhale na matsinde ya kobre. 19 Bzombo bzentse bzakuphatisidwa basa pa tabernakulo, bzakupanira bzace bzentse kuphatanidzambo bzakupanira litsito, bzidzakhale bza kobre.

20 “Uza Ajirayeri kuti abwerese mafuta ya maolivera yabwino kwene-kwene, kuti makandiyero yambakhale yadagaka nthawe zentse. 21 Mu tendi la mtsonkhano, kunja kwa kortina yomwe iri pafupi na thungwa la Umboni, Aroni na wana wace an’funika kumbasiya makandiyero yadagaka pamaso pa Yahova usiku bwentse mpaka macibese. Limweri ni lamulo lomwe Ajirayeri an’funika kumbaliteweza ku mibadwo yawo yentse mpaka kale-kale.

28 “Pakati pa Ajirayeri ucemere m’bale wako Aroni pabodzi na wana wace kuti anditumikire ninga antsembe. Ucemere Aroni na wana wace awa: Nadabi, Abihu, Eliyazari na Itamari. 2 Ukonzere m’bale wako Aroni bzakubvala bzakupambulika kuti bzimupase ulemerero na kumudekesa. 3 Ndipo uza wanthu wentse omwe ana luso,* omwe ndawadzaza na mzimu wanzeru kuti akonzere Aroni bzakubvala bzakumucenesa kuti iye anditumikire ninga wantsembe.

4 “Bzakubvala bzomwe an’funika kukonza mpsibzi: Cakubvala pankhombe, efodi, cakubvala citali cakusaya manja, cakubvala citali ca xadreji, duku na mceka wa pa mimba. Iwo akonzere m’bale wako Aroni na wana wace bzakubvala bzakupambulikabzi kuti iwo anditumikire ninga antsembe. 5 Wanthu walusowo adzaphatise basa oro, usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene.

6 “Iwo an’funika kukonza efodi na oro, usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene ndipo aikonze mwakucita kuluka. 7 Efodiyo ikhale na tunguwo tuwiri m’mapewa ndipo atuphatanidze kutsogolo na kumbuyo. 8 Bande lakulukidwa la efodi, lomwe lin’dzacitisa kuti efodiyo ikhale pa mbuto yace, lin’funika kudzakonzedwa na bzinthu ibzi: oro, usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene.

9 “Utenge minyala miwiri ya onekisi ucinemba pa minyalayo madzina ya wana wa Jirayeri. 10 Pa mwala m’bodzi unembe madzina 6, ndipo pa mwala munangoyo unembe pomwe madzina 6 kuyambira mkulu mpaka wakumalizira. 11 M’misiri wakunemba minyala, an’dzanemba madzina ya wana wa Jirayeri pa minyala miwiri ninga momwe ambagobera karimbo. Patsogolo pace aikhe m’tubzinthu twaardondo twa oro tomwe tun’dzakhala m’mapewa. 12 Uikhe minyala miwiriyo m’mapewa mwa efodi kuti ikhale minyala ya mkumbuso kwa wana wa Jirayeri ndipo Aroni an’dzanyamula madzina yawo m’mapewa pamaso pa Yahova ninga mkumbuso. 13 Ukonze tubzinthu twaardondo twa oro kuti uikhire minyalayo 14 na tumakorenti tuwiri twa oro caiyo twakuposedwa ninga bzingwe, ndipo utumangirire ku tubzinthu tuwiri twa oro twakuikhira minyala tule.

15 “Uuze nyakukonza nguwo kuti akonze cakubvala pankhombe cakutongera mirandu. Cakubvala pankhombeco cikonzedwe ninga efodi ndipo cikonzedwe na oro, usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene. 16 Ukacifunya pakati, mbali zentse zinai zindendemerane. Mtali mwace cikhale na masentimetro* 22 ndipo m’fupi mwace cikhalembo na masentimetro 22. 17 Uciikhe minyala ndipo cikhale na mizere minai. Mzere wakuyamba ukhale na mwala wa rubi, topaziyo na esmeralda. 18 Mzere waciwiri ukhale na mwala wa turkeza, safira na jaspe. 19 Mzere wacitatu ukhale na mwala wa lexemu, agata na ametista. 20 Mzere wacinai ukhale na mwala wa krizolito, onekisi na jade, ndipo uiikhe m’bzakuikhira minyala bza oro. 21 Minyalayo ikhale 12 mwakubverana na madzinza ya wana wa Jirayeri. Unembe mwala uli-wentse ninga momwe umbagobera karimbo. Dzina liri-lentse lin’dzaimira dzinza libodzi pa madzinza 12 ya Jirayeri.

22 “Ukonze tumakorenti twakucita kuposa ninga cingwe twa oro caiyo, ndipo utuikhe pa cakubvala pankhombe. 23 Ukonze tubzinthu tuwiri twaardondo twa oro ucituikha pa cakubvala pankhombe. Tubzinthu tuwiri twaardondoto utuikhe m’maponta mawiri ya cakubvalaco. 24 Upitise tubzingwe twa oro tule m’tubzinthu tuwiri twaardondo tomwe tuli m’maponta mwa cakubvala pankhombeco. 25 Uikhe tubzingwe tuwirito m’bzinthu bzakuikhira minyala bziwiri bzomwe bziri m’mapewa kutsogolo kwa efodi. 26 Ukonze tubzinthu tuwiri twaardondo twa oro ndipo utuikhe m’maponta mawiri ya cakubvala pankhombe ku mbali ya mkati yakuphatana na efodi. 27 Ukonze pomwe tubzinthu tuwiri twaardondo twa oro ndipo utuikhe kutsogolo kwa efodi, pantsi pa makorenti mawiri yomwe yakupita na m’mapewa, pafupi na pakulumikidzira, padzulu pa bande lakuluka la efodi. 28 Cakubvala pankhombeco acimange na kamceka ka azuli, mwakupitisa kamcekako m’tubzinthu twaardondo twa cakubvala pankhombe na m’tubzinthu twaardondo twa efodi. Bzimwebzi bzin’dzathandiza kuti cakubvala pankhombeco cileke kucoka pa mbuto yace, koma cin’dzakhala padzulu pa bande lakuluka la efodi.

29 “Aroni ambanyamule madzina ya wana wa Jirayeri pa mtima pace pa cakubvala pankhombe cakutongera mirandu akambapita pa Mbuto Yakucena, kuti ukhale mkumbuso pamaso pa Yahova nthawe zentse. 30 Iwepo udzaikhe Urimu na Tumimu* pa cakubvala pankhombe cakutongera mirandu, ndipo bzimwebzi bziti bzimbadzakhale pa mtima pa Aroni pomwe akuyenda kukawonekera kwa Yahova. Ndipo Aroni an’funika kumbanyamula bzinthu bzimwebzi nthawe zentse pomwe akuyenda kukawonekera kwa Yahova ndipo bzin’dzamuthandiza kumbatonga mirandu ya Ajirayeri.

31 “Ukonze cakubvala citali cakusaya manja ca efodi ndipo centse cikhale ca usalu bwa azuli. 32 Pa kati na kati pa cakubvala cakusaya manjaco, ukonze khosi ndipo m’mphepete mwace usonerere nguwo inango. Khosiro lin’funika kukhala ninga khosi la cakubvala comwe cimbabvalidwa ku nkhondo kuti paleke kung’ambika. 33 M’mphepete mwa cakubvalaco uikhe bzakudekesera bzakundendemera na cisapo ca romaa* kuzungulira cakubvala centseneco. Ubzikonze na usalu bwa azuli, usalu bwa roxo na usalu bufuira kwene-kwene, ndipo ukonzembo tusino twa oro ucituikha pakati pa bzakudekeserabzo. 34 Uikhe sino ya oro patsogolo pace cakudekesera, sino ya oro, cakudekesera, kuzungulira m’nyantsi mwentse mwa cakubvala cakusaya manjaco. 35 Aroni an’funika kudzabvala cakubvalaci pomwe akucita mabasa yace ya untsembe, ndipo kulira kwa masinoyo kun’dzabveka pomwe iye akupita m’mbuto yakucena pamaso pa Yahova na pakubula kuti aleke kufa.

36 “Ukonze kalata kakuyetima ka oro caiyo, ndipo ukanembe mwakucita kugoba ninga momwe ambagobera karimbo, mafala yakuti: ‘Kucena n’kwa Yahova.’ 37 Kalatako ukamangirire pa duku na tubzingwe twa azuli ndipo iko kan’funika kukhala kutsogolo kwa dukulo. 38 Kalataka kan’dzakhala pa mkuma wa Aroni, ndipo iye ndiye omwe an’dzatawira munthu akaphonya mitemo yakulewa bza bzinthu bzakucena bzomwe Ajirayeri ambabzicenesa pakubzipereka kuti zikhale mphaso zakucena. Kalatako kan’dzakhala pa mkuma wa Aroni nthawe zentse kuti iwo abvumidwe na Yahova.

39 “Ukonze cakubvala citali ca xadreji na usalu bwabwino kwene-kwene ndipo ukonzembo duku na usalu bwabwinobo na kukonzambo mceka wa pamimba.

40 “Ukonzerembo wana wa Aroni bzakubvala bzitali-bzitali, miceka na maduku yakumpsinkhira mu msolo kuti bziwapase ulemerero na kuwadekesa. 41 Ubvazike Aroni m’bale wako pabodzi na wana wace bzinthu bzimwebzi, ndipo uwadzoze, uwacenese, uciwaikha* kuti anditumikire ninga antsembe. 42 Uwakonzerembo makabudula na nguwo yabwino kwene-kwene kuti ampsinkhe thupi lawo. Makabudula yamweya yan’funika kuyambira m’ciuno mpaka kumpsinkha ntcafu. 43 Aroni na wana wace an’funika kumbabvala makabudulayo akakhala akupita mu tendi kukawonekera pamaso pa Mulungu, ayai akakhala akuyenda pa guwa la ntsembe yomwe ni mbuto yakucena kukacita mabasa yawo, kuti aleke kukhala na mulandu omwe ungawacitise kuti afe. Limweri ni lamulo mpaka kale-kale kwa iye na kwa wana wace omwe ati adzabadwe kutsogolo.

29 “Ibzi ni bzomwe un’funika kucita kuti uwacenese kuti anditumikire ninga antsembe: Utenge ng’ombe ing’ono, mabvululume* mawiri yomwe yalibe kupunduka, 2 utengembo pau zakusaya fermento, pau zabololindo zakubowola pakati zakukonzedwa na mafuta zakusaya fermento na pau zakuthathanya zakusaya fermento zakupalangiridwa mafuta. Un’funika kuzikonza na ufa bwa tirigu bwakunyodoka, 3 uziikhe mu citundu, ucikazipereka pomwe ziri m’citundumo pabodzi na ng’ombe na mabvululume mawiri yale.

4 “Ubwerese Aroni na wana wace pa msuwo wa tendi la mtsokhano ndipo uwasambike na madzi. 5 Patsogolo pace ubvazike Aroni bzakubvala bzire. Umubvazike cakubvala citali, cakubvala citali cakusaya manja ca efodi, efodi, cakubvala pankhombe ndipo umumangembo bande lakuluka la efodi m’ciuno mwace. 6 Umubvazike duku mu msolo mwace, ndipo padukupo uikhe cizindikiro cakupambulika ca kubzipereka kwace kwa Mulungu. 7 Utenge mafuta yakudzozera ndipo uyathululire mu msolo mwace ucimudzoza.

8 “Patsogolo pace ubwerese wana wa Aroni, uciwabvazika bzakubvala bzitali 9 ndipo umange Aroni na wana wace mceka wa pamimba, ndipo wana wacewo uwabvazike duku lakumpsinkha mu msolo ndipo basa la untsembe lin’dzakhala lawo ninga lamulo mpaka kale-kale. Ucite bzimwebzi kuti uikhe Aroni na wana wace kuti anditumikire ninga antsembe.*

10 “Ukamala ubwerese ng’ombe pa tendi la mtsonkhano, ndipo Aroni na wana wace adzaikhe manja yawo pa msolo wa ng’ombeyo. 11 Uphe ng’ombeyo pamaso pa Yahova, pa msuwo wa tendi la mtsonkhanolo. 12 Ubvuike cala cako m’mulopa wa ng’ombeyo ucikaupalangira pa nyanga za guwa la ntsembe, ndipo mulopa wakusalayo uukhuthulire pantsi pa guwa la ntsembepo. 13 Utenge mafuta ya m’mautumbo, mafuta ya pa ciropa, impso ziwiri na mafuta yace ndipo ubzitenthe kuti bzicoke utsi pa guwa la ntsembe. 14 Tsono nyama ya ng’ombeyo, khanda lace na ndowe zace, ukabzitenthere kunja kwa msasa. Imweyi ni ntsembe ya pikado.

15 “Tenga bvululume m’bodzi ndipo Aroni na wana wace aikhe manja yawo pa msolo wa bvululumeyo. 16 Uphe bvululumeyo ndipo utenge mulopa wace uciuwazira m’mbali zentse za guwa la ntsembero. 17 Ugwate-gwate bvululumeyo, utsuke mautumbo yace na minyendo yace, ndipo patsogolo pace undandalise mbali zomwe wagwata-gwatazo pabodzi na msolo wace. 18 Un’funika kutentha bvululume wentseneyo, ucicitisa kuti acoke utsi pa guwa la ntsembe. Imweyi ni ntsembe yakucita kutentha kwa Yahova, ya mnuntci wabwino.* Ni ntsembe yakutentha pamoto yakuperekedwa kwa Yahova.

19 “Patsogolo pace utenge bvululume munango ule, ndipo Aroni na wana wace aikhe manja yawo pa msolo wa bvululumeyo. 20 Uphe bvululumeyo ndipo utenge pang’ono mulopa wace ucikauikha ku khutu lamadidi la Aroni na ku makutu yamadidi ya wana wace, uwaikhembo ku cala cawo cikulu ca boko lamadidi na cala cawo cikulu ca kumwendo wamadidi, ndipo uwazire mulopayo mbali zentse za guwa la ntsembero. 21 Patsogolo pace, utengembo pang’ono mulopa omwe uli pa guwa la ntsembe na mafuta yakudzozera kuti uwazire Aroni na bzakubvala bzace ndipo uwazirembo wana wace na bzakubvala bzawo, kuti iye na bzakubvala bzace pabodzi na wana wace na bzakubvala bzawo akhale wakucena.

22 “Utenge mafuta ya bvululumeyo, mafuta ya ku mcira kwace, mafuta ya m’mautumbo, mafuta ya pa ciropa, impso ziwiri na mafuta yace na mwendo wamadidi, pakuti umweyu ni bvululume wakuwaikha kuti akhale antsembe. 23 Mu citundu ca pau zakusaya fermento zomwe ziri pamaso pa Yahova zire, utenge pau zabololindo, pau zabololindo zakubowola pakati zakukonzedwa na mafuta na pau zakuthathanya. 24 Zentsenezi uziikhe m’manja mwa Aroni na mwa wana wace ndipo uziyendese kutsogolo na m’mbuyo ninga ntsembe yakucita kufambisa-fambisa pamaso pa Yahova. 25 Patsogolo pace uzitenge m’manja mwawo, ucikazitentha pa guwa la ntsembe, padzulu pa ntsembe yakucita kutentha ire, ya mnuntci wabwino* kwa Yahova. Imweyi ni ntsembe yakutentha pamoto yakuperekedwa kwa Yahova.

26 “Tenga nkhombe ya bvululume wakuikhira Aroni kuti akhale wantsembe ndipo uyendese kutsogolo na m’mbuyo ninga ntsembe yakucita kufambisa-fambisa pamaso pa Yahova, ndipo imweyi in’dzakhala mbali yako yomwe un’dzatambira. 27 Pa bvululume wakuikhira Aroni na wana wace kuti akhale antsembe, upambule nkhombe ya ntsembe yakucita kufambisa-fambisa na mwendo omwe udaperekedwa ninga mbali yakupambulika. 28 Zimwezi ni mbali zakupambulika ndipo zin’dzakhala za Aroni na wana wace ninga lamulo lomwe Ajirayeri an’funika kubvera mpaka kale-kale. Zimwezi ni mbali zakupambulika zomwe Ajirayeri an’funika kumbapereka ndipo zimwezi zin’dzakhalambo mbali zawo zakupambulika zakuti apereke ntsembe za mbverano* kwa Yahova.

29 “Bzakubvala bzakupambulika bza Aroni bzin’dzaphatisidwa basa na wana wace omwe an’dzabadwa kutsogolo, akadzadzozedwa aciikhidwa kuti akhale antsembe. 30 Wantsembe omwe an’dzapita m’mbuto mwace pakati pa wana wace, omwe an’dzapita mu tendi la mtsonkhano kukatumikira m’mbuto yakucena, an’funika kudzabvala bzakubvalabzo kwa ntsiku 7.

31 “Utenge bvululume omwe wamupereka pakuwaikha kuti akhale antsembe ndipo uphike nyama yace m’mbuto yakucena. 32 Aroni na wana wace adzadye nyama ya bvululumeyo na pau zomwe ziri mu citundu pa msuwo wa tendi la mtsonkhano. 33 Adye bzinthu bzimwebzi bzomwe bzaphatisidwa basa pakumpsinkha pikado zawo kuti aikhidwe* ninga antsembe na kuwacenesa, tsono munthu wakusaya kubvumizidwa* an’funika lini kudya bzinthu bzimwebzi thangwe ni bzinthu bzakucena. 34 Tsono nyamayo na pauzo bzikasala mpaka macibese, bzitenthedwe pamoto, bzin’funika lini kudyedwa thangwe ni bzinthu bzakucenesedwa.

35 “Ucite bzentse bzomwe ndakuuzabzi kwa Aroni na wana wace. Un’dzamala ntsiku 7 kuti uwaikhe* kukhala antsembe. 36 Ntsiku zentse umbapereke ng’ombe kuti ikhale ntsembe yakumpsinkhira pikado. Cakulinga ca ntsembeyi n’cakukumbira kulekereredwa pikado na kucitisa kuti guwa la ntsembe likhale lakucena. Kuthumizira bzimwebzi, un’funika kuthululira mafuta pa guwalo kuti licenesedwe. 37 Un’dzamala ntsiku 7 ukupereka ntsembe zakucenesa pikado za guwa la ntsembe. Un’funika kulicenesa kuti likhale guwa lakucena kwene-kwene. Ali-wentse omwe an’khuya guwa la ntsembero an’funika kukhala wakucena.

38 “Ntsembe zomwe un’funika kumbapereka pa guwa ni izi: Ntsiku zentse umbapereke wana awiri wa bira wa gole libodzi. 39 Umbapereke mwana wa bira m’bodzi macibese ndipo munangoyo umbapereke kumaulo dzuwa likandomira. 40 Pakupereka mwana wa bira wakuyambayo, umbapereke pabodzi na kilu ziwiri* za ufa bwakunyodoka bwino bwakusanganiza na mafuta yabwino kwene-kwene pabodzi na litru ibodzi* ya ntsembe ya vinyu. 41 Udzapereke mwana wa bira waciwiri kumaulo dzuwa likandomira ndipo udzapereke na bzinthu bzinango bza m’munda pabodzi na ntsembe ya vinyu ninga momwe wacitira macibese. Uzipereke kuti zikhale mnuntci wabwino,* ntsembe zakucita kutentha zakuperekedwa kwa Yahova. 42 Imweyi ni ntsembe yakucita kutentha yomwe imwepo mun’dzacita ku mibadwo yanu yentse pa msuwo wa tendi la mtsonkhano pamaso pa Yahova, pomwe nin’dzawonekera kwa imwepo kuti ndilewelewe namwe.

43 “Nin’dzawonekera pamwepo kwa Ajirayeri, ndipo mbuto imweyo in’dzacenesedwa na ulemerero bwangu. 44 Nin’dzacenesa tendi la mtsonkhano na guwa la ntsembe, ndipo nin’dzacenesambo Aroni na wana wace kuti anditumikire ninga antsembe. 45 Nin’dzakhala pakati pa Ajirayeri, ndipo inepano nin’dzakhala Mulungu wawo. 46 Ndipo iwo an’dzadziwa kuti ine ndine Yahova Mulungu wawo, omwe ndidawacosa m’dziko la Edjipito kuti ndikhale pakati pawo. Ine ndine Yahova Mulungu wawo.

30 “Ukonze guwa la ntsembe lakutenthera bzakununtcirisa; ulikonze na matabwa ya muti wa mkexa. 2 Guwalo likhale la kwadrado, likhale na kovado ibodzi mtali mwace, khwankhwa lace likhale la kovado ibodzi ndipo litalimphe makovado mawiri. Nyanga zace na guwalo bzikhale cinthu cibodzi. 3 Ulipalangire oro caiyo padzulu pace, m’mbali mwace mwentse na nyanga zentse, ndipo ukonze bzakudekesera bza oro m’mphepete mwace. 4 M’nyantsi mwa bzakudekesera guwa la ntsembero, uikhe tubzinthu twaardondo twa oro tuwiri mbali ibodzi na tunango tuwiri ku mbali inangoyo. M’tubzinthu tumweto ni momwe mun’dzapita miti yakunyamulira guwalo. 5 Ukonze miti yakunyamulira na muti wa mkexa ndipo uipalangire oro. 6 Uikhe guwalo patsogolo pa kortina yomwe iri pafupi na thungwa la Umboni patsogolo pa cakugwanankhirira thungwa la Umboni, pomwe inepano nin’dzawonekera kwa iwepo.

7 “Aroni an’dzatentha bzakununtcirisa kuti paguwapo pakhale na utsi macibese yali-yentse pomwe akukasamalira makandiyero. 8 Ndipo Aroni an’funikambo kumbatentha bzakununtcirisabzo kumaulo dzuwa likandomira pakukagasa makandiyero. Imweyi in’dzakhala ntsembe ya bzakununtcirisa, yomwe in’funika kuperekedwa kwa Yahova nthawe zentse ku mibadwo yanu yentse. 9 Paguwapo lekani kupereka bzakununtcirisa bzakusaya kubvumizika ne ntsembe zakucita kutentha, ntsembe za bzinthu bza m’munda ndipo lekanimbo kuthululira ntsembe za vinyu pamwepo. 10 Aroni ambadzapereke ntsembe yakumpsinkhira pikado pa nyanga za guwa limweri kabodzi pa gole. Iye an’dzatenga mulopa pang’ono wa ntsembe za pikado omwe umbaphatisidwa basa pakumpsinkha pikado, ndipo iye adzapereke ntsembe yakumpsinkha pikado ya guwa kabodzi pa gole ku mibadwo yawo yentse. Guwalo lin’dzakhala lakucena kwene-kwene kwa Yahova.

11 Patsogolo pace Yahova adauza Mozeji kuti: 12 “Mukambacita kanembera na kulewenga Ajirayeri, ali-wentse an’funika kumbapereka cakulombolera moyo wace kwa Yahova pa nthawe ya kanemberayo, kuti aleke kugwedwa na tsoka akacita kanemberayo. 13 Ali-wentse omwe an’bzinembesa, an’funika kupereka kati na kati ya siklo mwakubverana na siklo* ya pa mbuto yakucena,* yomwe ni majera* 20. Kati na kati ya sikloyi ni cakupereka kwa Yahova. 14 Wentse omwe an’bzinembesa, omwe ana magole 20 yakubadwa ayai kupitirira, an’dzacita cakuperekaci kwa Yahova. 15 Mukambapereka kwa Yahova cakupereka cakumpsinkhira pikado kuti mulombole moyo wanu, wanthu wakudala an’funika lini kumbapereka bzizinji ndipo anyakusauka an’funikambo lini kupereka bzing’ono-ng’ono bzomwe bzin’kwana lini kati na kati ya siklo.* 16 Iwepo un’funika kutambira kwa Ajirayeri kobiri ya prata yomwe njakumpsinkhira pikado, ndipo uipereke kuti iphatisidwe basa pa mabasa ya tendi la mtsonkhano. Kobiriyo ikhale mkumbuso pamaso pa Yahova, yomwe in’dzapasa phindu Ajirayeri kuti mulombole moyo wanu.”

17 Yahova adauza pomwe Mozeji kuti: 18 “Ukonze basiya la kobre* na cakukhazikira cace ca kobre. Ukamala ukaliikhe pakati pa tendi la mtsonkhano na guwa la ntsembe ndipo uikhe madzi m’mwemo. 19 Aroni na wana wace ambadzasambe m’manja na m’minyendo na madzi ya m’basiyamo. 20 Akambadzapita m’tendi la mtsonkhano ayai akambadzayenda kukatumikira pa guwa la ntsembe pakukapereka ntsembe zakucita kutentha kwa Yahova, ambadzasambe kuti aleke kufa. 21 An’funika kumbasamba m’manja na m’minyendo mwawo kuti aleke kufa. Limweri ni lamulo kwa iwo mpaka kale-kale ndipo likhale lamulo kwa Aroni na wana wace ku mibadwo yawo yentse.”

22 Yahova adauza pomwe Mozeji kuti: 23 “Ubwerese mafuta yakununtcira kwene-kwene aya: Makilu 6 ya mafuta yakuuma ya mira, makilu matatu ya mafuta yakununtcira kwene-kwene ya kanela, makilu matatu ya mafuta yakununtcira ya kalamusi 24 na makilu 6 ya kasiya pabodzi na malitru* matatu na meya ya mafuta ya azeite.* 25 Na bzinthu bzimwebzi ukonze mafuta yakupambulika yakudzozera. Iyo yan’funika kusanganizidwa mwaluso kwene-kwene ndipo yan’funika kukhala mafuta yakupambulika yomwe yan’dzaphatisidwa basa pakudzozera.

26 “Na mafutayo udzoze tendi la mtsonkhano, thungwa la Umboni, 27 meza na bzombo bzace, cakuikhira kandiyero na bzombo bzace, guwa la ntsembe lakutenthera bzakununtcirisa, 28 guwa la ntsembe zakucita kutentha na bzombo bzace na basiya pabodzi na cakukhazikira cace. 29 Un’funika kubzicenesa kuti ibzo bzikhale bzakupambulika. Ali-wentse omwe an’bzikhuya an’funika kukhala adacena. 30 Udzoze Aroni na wana wace ndipo uwacenese kuti anditumikire ninga antsembe.

31 “Uuze Ajirayeri kuti: ‘Mafutaya yan’funika kupitiriza kukhala mafuta yakupambulika yakudzozera kwa inepano ku mibadwo yanu yentse. 32 Palibe munthu omwe an’funika kudzola mafutaya ndipo mun’funika lini kukonza mafuta manango mwakuphatisa basa bzinthu bzomwe bzaphatisidwa basa pakukonza mafutaya, thangwe ni cinthu cakupambulika ndipo yan’funika kupitiriza kukhala cinthu cakupambulika kwa imwepo. 33 Ali-wentse omwe an’konza mafuta yakundendemerana na yamweya acidzola munthu wakusaya kubvumizidwa* an’funika kuphedwa.’”

34 Patsogolo pace Yahova adauza Mozeji kuti: “Tenga mphimo zakundendemerana za mafuta yakununtcira aya: Estorake, onika, galibano na ntsonono zakununtcira. 35 Sanganiza bzinthu bzimwebzi kuti ukonze cakununtcirisa ndipo ucikonze mwaluso.* Uikhe munyu ndipo cikhale cakucena na cakupambulika. 36 Iwepo un’funika kupeya mbali inango ya cakununtcirisaco mpaka kunyodoka ndipo upambule pang’ono ucikaikha patsogolo pa thungwa la Umboni mu tendi la mtsonkhano, pa mbuto yomwe nin’dzawonekera kwa iwepo, ndipo cikhale cakupambulika kwene-kwene kwa imwepo. 37 Lekani kukonza bzakununtcirisa bzanu mwakuphatisa basa bzinthu bzomwe mun’konzera cakununtcirisaci kuti muphatisembo basa. Imwepo mun’funika kumbawona cakununtcirisaci kukhala cinthu cakupambulika kwa Yahova. 38 Ali-wentse omwe an’konza cakununtcirisa ninga cimweci kuti ambapfatse na mnuntci wace, an’funika kuphedwa acicosedwa pakati pa mtundu wace.”

31 Yahova adapitiriza kuuza Mozeji kuti: 2 “Ndasankhula Bezaleli, mwana wa Uri, mzukulu wa Hur wa m’dzinza la Djuda. 3 Nin’dzamupasa mzimu wa Mulungu kuti akhale wanzeru, wakuzindikira na wakudziwa kucita bzinthu mwaluso pa basa liri-lentse, 4 kuti alinganize kakonzedwe ka bzinthu, kuti aphate basa na oro, prata na kobre,* 5 aseme na kugoba minyala na kudziwa kukonza cinthu ciri-centse na matabwa. 6 Kuthumizira bzimwebzi, ndasankhula Ooliyabe, mwana wa Ahisamaki wa m’dzinza la Dani kuti amuthandize, ndipo nin’pasa nzeru* wanthu wentse waluso* kuti acite bzentse bzomwe ndakuuzabzi: 7 tendi la mtsonkhano, thungwa la Umboni na cakugwanankhirira cace, bzombo bzentse bza mu tendi, 8 meza na bzombo bzace, cakuikhira kandiyero ca oro caiyo na bzombo bzace bzentse, guwa lakutenthera bzakununtcirisa, 9 guwa lakuperekera ntsembe zakucita kutentha na bzombo bzace bzentse, basiya na cakukhazikira cace, 10 bzakubvala bzakulukidwa bwino, bzakubvala bzakupambulika bza mkulu wa antsembe Aroni, bzakubvala bza wana wace kuti ambabvale pakutumikira ninga antsembe, 11 mafuta yakudzozera na bzakununtcirisa bzakucita kutentha bza m’mbuto yakucena. Iwo an’dzacita bzentse bzomwe ndakuuzabzi.”

12 Yahova adauza pomwe Mozeji kuti: 13 “Uza Ajirayeri kuti: ‘Muwonesese kuti mukuteweza lamulo langu lakulewa bza ntsiku ya Sabudu, pakuti ni cizindikiro pakati pa ine na imwepo ku mibadwo yanu yentse, kuti mudziwe kuti ine Yahova, ndakusankhulani kuti mukhale wakupambulika. 14 Mun’funika kumbateweza lamulo lakulewa bza ntsiku ya Sabudu, pakuti njakupambulika kwa imwepo. Ali-wentse omwe an’teweza lini lamuloli an’funika kuphedwa. Munthu ali-wentse omwe an’phata basa pa ntsikuyi, an’funika kuphedwa acicosedwa pakati pa mtundu wace. 15 Mumbaphate basa kwa ntsiku 6, tsono ntsiku yaci 7 ikhale ntsiku ya Sabudu, ntsiku yakupuma pa mabasa yentse. Imweyi ni ntsiku yakupambulika kwa Yahova. Ali-wentse omwe an’phata basa pa ntsiku ya Sabudu an’funika kuphedwa. 16 Ajirayeri an’funika kumbabvera lamulo lakulewa bza ntsiku ya Sabudu, ndipo an’funika kumbaikumbukira ku mibadwo yawo yentse. Umweyu ni mpangano mpaka kale-kale. 17 Cimweci ni cizindikiro pakati pa ine na Ajirayeri mpaka kale-kale, pakuti ine Yahova ndidamala ntsiku 6 ndikulenga kudzulu na dziko la pantsi, ndipo pa ntsiku yaci 7 ndidapuma ndicikomedwa na mabasa yangu.’”

18 Pomwe adamala kulewalewa na Mozeji m’Phiri la Sinai, Mulungu adapasa Mozeji minyala miwiri ya Umboni, minyala yakunembedwa na boko la* Mulunguyo.

32 Wanthu adawona kuti Mozeji akhacedwa kubuluka m’phirimo, tenepo, iwo adatsonkhana kwa Aroni acimuuza kuti: “Tikonzere mulungu kuti atitsogolere, pakuti tikudziwa lini bzomwe bzacitika na Mozeji, munthu omwe adaticosa m’dziko la Edjipito.” 2 Tenepo Aroni adawauza kuti: “Katengeni mphete za oro zomwe ziri m’makutu mwa azikazanu, wana wanu wacimuna na wana wanu wacikazi ndipo muzibwerese kuno.” 3 Tenepo wanthu wentse adayamba kucosa mphete za oro zomwe akhadabvala, acizipereka kwa Aroni. 4 Iye adatambira oroyo kucokera kwa wanthuwo, ndipo adakonza cifanikiso* ca kamphulu mwakuphatisa basa tcezo. Patsogolo pace iye adalewa kuti: “Uyu ndiye Mulungu wanu, imwe Ajirayeri, omwe adakucosani m’dziko la Edjipito.”

5 Pomwe Aroni adawona bzimwebzi, iye adamanga guwa la ntsembe patsogolo pa cifanikisoco. Patsogolo pace Aroni adalewa mwakukuwa kuti: “Mangwana kuna phwando la Yahova.” 6 Mangwana yace wanthuwo adamuka macibese, aciyamba kupereka ntsembe zakucita kutentha na ntsembe za mbverano.* Iwo adakhala pantsi, acidya na kumwa. Patsogolo pace, iwo adamuka aciyamba kupfatsa.

7 Patsogolo pace Yahova adauza Mozeji kuti: “Ndoko, polika, pakuti wanthu omwe udawatsogolera kucoka m’dziko la Edjipito acita bzinthu bzakuipa kwene-kwene. 8 Iwo apambuka mwakamfulumize mu njira yomwe ndidawauza kuti ambafambe. Iwo abzikonzera cifanikiso ca kamphulu, ndipo akucigodamira, acipereka ntsembe kwa cifanikisoco, acimbalewa kuti: ‘Uyu ndiye Mulungu wanu, imwe Ajirayeri, omwe adakucosani m’dziko la Edjipito.’” 9 Yahova adapitiriza kuuza Mozeji kuti: “Ndawona kuti wanthuwa ana mtimbo kwene-kwene. 10 Ndikubva ciya kwene-kwene, tenepo leka ndiwapfudze, ndicikonza mtundu munango kucokera kwa iwepo.”

11 Tsono Mozeji adadandaulira Yahova Mulungu wace acilewa kuti: “Imwe Yahova, thangwe ranyi mun’funa kuti ukali bwanu bugakire wanthu wanu omwe mudawacosa ku Edjipito na mphanvu zanu zikulu? 12 Imwepo mukacita bzimwebzi, Aedjipito an’lewa kuti: ‘Iye adawacosa kuno kuti awacite kuipa. Adawacosa m’dziko lino kuti akawaphe m’mapiri na kuwamaliziratu wentsenewo kuti aleke kugumanika pomwe pa dziko la pantsi.’ Ndaphata minyendo, bwezani ukali bwanu bukulu ndipo abvereni ntsisi wanthu wanu kuti muleke kuwabweresera tsoka. 13 Kumbukirani atumiki wanu Abulahamu, Izaki na Jirayeri, omwe imwepo mudawalumbira mwakuwauza kuti: ‘Nin’dzacitisa kuti wana wanu* awande ninga nyenyezi za kudzulu, ndipo dziko lentseneli lomwe ndidalisankhula nin’dzalipereka kwa wana wanu kuti likhale lawo mpaka kale-kale.’”

14 Tenepo Yahova adabweza ukali bwace, ndipo alibe kupfudza wanthuwo ninga momwe akhadalewera.

15 Patsogolo pace Mozeji adazungunuka acibuluka m’phirimo na minyala miwiri yakusema ya Umboni m’manja mwace. Minyalayo ikhadanemba mbali zentse ziwiri, kutsogolo na kumbuyo. 16 Mulungu caiyeyo ndiye omwe akhadasema minyalayo acinemba mafala yace pamwepo. 17 Pomwe Djoswa adabva kukuwa kwa wanthuwo, adauza Mozeji kuti: “Kukubveka ciwowo ca nkhondo ku msasa.” 18 Tsono Mozeji adati:

19 Tenepo pomwe Mozeji adafika pafupi na msasayo, aciwona kamphuluko na wanthu akubzina, adakalipa kwene-kwene ndipo iye adathusa pantsi minyala yomwe ikhali m’manja mwaceyo ndipo iyo idabaduka-baduka m’mphepete mwa phirilo. 20 Iye adatenga kamphulu komwe iwo akhadakonzako acikatentha pamoto. Patsogolo pace adakapeya mpaka kukhala mufu, ndipo adamwaza mufuyo m’madzi aciuza Ajirayeri kuti amwe. 21 Patsogolo pace Mozeji adabvunza Aroni kuti: “Thangwe ranyi wacitisa wanthu kucita pikado ikulu tenepa?” 22 Aroni adatawira kuti: “Lekani kukalipa mbuya wangu. Imwepo mumbawadziwa bwino wanthuwa kuti ambafuna kucita bzakuipa. 23 Iwo andiuza kuti: ‘Tikonzere mulungu kuti atitsogolere, pakuti tikudziwa lini bzomwe bzacitikira Mozeji, munthu omwe adaticosa m’dziko la Edjipito.’ 24 Ndipopa ndidawauza kuti: ‘Omwe wabvala bzinthu bza oro, acose acindipasa.’ Ndipo ndidathusa oroyo pamoto icikhala kamphuluka.”

25 Mozeji adawona kuti wanthuwo akhacita bzinthu bzomwe akhafuna, thangwe Aroni akhawalekerera kucita bzomwe akhafunabzo, ndipo iwo adacita bzinthu bzakupasa manyazi pamaso pa anyamadulanthaka wawo. 26 Patsogolo pace Mozeji adakaima pa msuwo wa msasayo acilewa kuti: “Mbani ali kumbali ya Yahova? Abwere kuna ine.” Ndipo wana wentse wa Alevi adayenda pomwe pakhana iyepo. 27 Ndipo adawauza kuti: “Yahova Mulungu wa Jirayeri walewa kuti, ‘ali-wentse wa imwepo amangirire xipada m’ciuno mwace ndipo mupite mu msasa wentseneyu kuyambira pa cipata ici mpaka pa cipata cinango, ndipo ali-wentse aphe m’bale wace, vizinyu na xamwali wace wa pamtima.’” 28 Aleviwo adacita bzomwe Mozeji adawauza, ndipo ntsiku imweyo, amuna pafupi-fupi 3000 adaphedwa. 29 Patsogolo pace Mozeji adati: “Bziceneseni kuti mutumikire Yahova lero, pakuti imwepo mwamenyana na wana wanu caiwo pabodzi na abale wanu, ndipopa Mulungu an’kusimbani lero.”

30 Mangwana yace Mozeji adauza wanthuwo kuti: “Imwepo mwacita pikado ikulu kwene-kwene. Tsapano lekani ndikwire kwa Yahova kuti ndikamudandaulire, pinango iye angakulekerereni pikado yanu.” 31 Mozeji adabwerera kwa Yahova acilewa kuti: “Wanthuwa acita pikado ikulu kwene-kwene, pakuti abzikonzera mulungu wa oro. 32 Tsono mukafuna, alekerereni pikado yawo, koma mukasaya kucita bzimwebzo, ndaphata minyendo, ndipfudzeni m’bukhu lanu lomwe mumbanemba.” 33 Tenepo Yahova adauza Mozeji kuti: “Nin’dzapfudza m’bukhu langu munthu ule omwe an’ndiphonyera. 34 Tsapano ndoko, tsogolera wanthuwa ku mbuto yomwe ndidakuuza. Anjo wangu an’dzakhala patsogolo pako. Pa ntsiku yomwe nin’dzawatonga, nin’dzawapasa nyathwa thangwe ra pikado yawo.” 35 Tenepo Yahova adayamba kuwabweresera muliri wanthuwo, thangwe ra kamphulu komwe Aroni akhadakakonza.

33 Yahova adauza pomwe Mozeji kuti: “Ndoko, ukapitirize ulendo pabodzi na wanthu omwe udawatsogolera kucoka m’dziko la Edjipito, ndipo muyende ku dziko lomwe ndidalumbirira Abulahamu, Izaki na Djakobo kuti: ‘Nin’dzapereka dzikoli kwa wana* wanu.’ 2 Nin’dzatumiza anjo patsogolo panu ndipo nin’dzathotha Akanani, Aamori, Ahiti, Aperezi, Ahivi na Ajebusi. 3 Ndokoni ku dziko lakuyerera mkaka na uci, tsono inepano nin’khala lini pakati panu thangwe ndimwe wanthu wa mtimbo* ndipo ningakupfudzeni mu njira.”

4 Pomwe wanthuwo adabva mafala yakusunamisaya, adayamba kulira, ndipo palibe munthu omwe adabvala bzakubzidekesera. 5 Yahova adauza Mozeji kuti: “Uza Ajirayeri kuti: ‘Imwepo ndimwe wanthu wa mtimbo.* Ningadapita pakati panu ndicikupfudzani mu kanthawe kakucepa. Tenepo lekani kubvala bzakubzidekesera bzanu, pomwe ine ndikukumbuka bzomwe ningacite namwe.’” 6 Tenepo Ajirayeri alibe kubvala* pomwe bzakubzidekesera kuyambira pomwe adacoka pa Phiri la Horebi.

7 Patsogolo pace Mozeji adatenga tendi lace acikalimanga kunja kwa msasa, patali pang’ono na msasayo, ndipo tendiro adalipasa dzina lakuti tendi la mtsonkhano. Ali-wentse akafuna kukumbira malango kwa Yahova akhayenda ku tendi la mtsonkhanoko, lomwe likhali kunja kwa msasa. 8 Mozeji akambayenda ku tendi la mtsonkhano, munthu ali-wentse akhambaima pa msuwo wa tendi lace, ndipo akhamuperekeza Mozejiyo na maso mpaka iye kupita m’tendimo. 9 Mozeji akapita m’tendimo, mtambo ukhabuluka uciima pa msuwo wa tendiro pomwe Mulungu akulewalewa na Mozeji. 10 Wanthu wentse akawona mtamboyo udaima pa msuwo wa tendiro, ali-wentse akhagodama pa msuwo wa tendi lace. 11 Yahova akhalewalewa na Mozeji maso na maso, ninga momwe munthu ambalewalewera na munthu mwanzace. Mozeji akabwerera ku msasa, mtumiki wace Djoswa mwana wa Nuni akhacoka lini pa tendiro.

12 Mozeji adauza Yahova kuti: “Imwepo mukundiuza kuti: ‘Tsogolera wanthuwa,’ koma mulibe kundiuza omwe mun’dzamutuma kuti ndiyende naye. Ndipo mwandiuzambo kuti: ‘Nimbakudziwa bwino na dzina lako kubodzi, ndipo ndakudekera mtima.’ 13 Ndaphata minyendo, penu mwandidekeradi mtima, ndidziwiseni njira zanu kuti inepano ndikudziweni nakuti imwepo mupitirize kundidekera mtima. Kumbukiranimbo kuti mtunduyu ni wanthu wanu.” 14 Tenepo Mulungu adalewa kuti: “Inepano ndine omwe nin’dzayenda nawe, ndipo nin’dzakupasa mtendere.” 15 Patsogolo pace Mozeji adati: “Penu imwepo muniyenda lini nafe, tisiyeni tikhale pompano. 16 Tsono imwepo mukasaya kuyenda nafe, kodi wanthu an’dzadziwa tani kuti ine pabodzi na wanthu wanuwa mwatidekeradi mtima? Tsono mukayenda nafe, bzin’latiziratu kuti ine na wanthu wanuwa mwatisiyanisa na wanthu wentse wa pa dziko la pantsi.”

17 Yahova adauza Mozeji kuti: “Nin’citambo bzomwe wakumbirabzi, thangwe ndakudekera mtima ndipo nimbakudziwa bwino na dzina lako kubodzi.” 18 Patsogolo pace Mozeji adati: “Ndaphata minyendo, ndiwoneseni ulemerero bwanu.” 19 Tsono Mulungu adati: “Nin’dzakuwonesa ubwino bwangu bwentse, ndipo nin’dzadziwikisa dzina langu lakuti Yahova kwa iwepo. Omwe nin’funa kumudekera mtima, nin’dzamudekera mtima, ndipo omwe nin’funa kumubvera ntsisi, nin’dzamubvera ntsisi.” 20 Ndipo iye adalewa pomwe kuti: “Iwepo ungawone lini nkhope yangu, thangwe palibe munthu omwe angandiwone acipitiriza kukhala na moyo.”

21 Yahova adalewa pomwe kuti: “Pafupi na inepano pana mbuto. Ndoko ukaime pafupi na tsendwalo. 22 Ulemerero bwangu bukakhala bukupita pafupi na iwepo, nin’dzakuikha ku mphako ya tsendwalo, ndipo nin’dzakumpsinkha na boko langu mpaka inepano kupita. 23 Patsogolo pace nin’dzacosa boko langulo, ndipo iwepo un’dzawona kumbuyo kwangu, koma nkhope yangu ingawonedwe lini.”

34 Patsogolo pace Yahova adauza Mozeji kuti: “Sema pomwe minyala miwiri ninga yakuyamba ire, ndipo inepano nin’dzanemba mafala yomwe yakhali pa minyala yakuyamba, yomwe iwepo waswa ire. 2 Konzeka kuti mangwana macibese-bese iwepo udzakwire m’Phiri la Sinai ucidzawonekera pamaso pangu pa ntsonga ya phiriro. 3 Tsono un’funika lini kudzakwira na munthu ali-wentse ndipo paleke kudzagumanika munthu pa mbuto iri-yentse m’phirimo. Napo mabira ayai ng’ombe bzin’funika lini kudyeseredwa pafupi na phiriro.”

4 Tenepo Mozeji adasema minyala minango miwiri ninga yakuyamba ire, ndipo adamuka macibese-bese acikwira m’Phiri la Sinai ninga momwe Yahova akhadamuuzira, ndipo iye adanyamula minyala miwiriyo m’manja mwace. 5 Tenepo Yahova adabuluka mu mtambo aciima pafupi na Mozeji, acimudziwisa dzina lace lakuti Yahova. 6 Yahova adapita patsogolo pa Mozeji acimbalewa kuti: “Yahova, Yahova, Mulungu wantsisi na wakudeka mtima, omwe ambakalipa lini kamangu, walufoyi likulu na wacadidi,* 7 omwe ambalatiza lufoyi lacadidi kwa mibadwo bzulu na bzulu, acilekerera bzakuphonya na pikado, koma cipo acidzaleka kulanga anyamulandu acibweresa nyathwa kwa wana, azukulu, m’badwo wacitatu na wacinai thangwe ra bzakuphonya bza azibereki wawo.”

8 Pa nthawe imweyoletu Mozeji adagodama acitsulimisa msolo wace mpaka pantsi. 9 Tenepo iye adati: “Imwe Yahova, penu mwandidekeradi mtima, ndaphata minyendo Yahova, fambani nafe ndipo khalani pakati pathu napo kuti ndife wanthu wakusaya kubva. Tilekerereni bzakuphonya bzathu na pikado zathu ndipo tibvumeni ninga wanthu wanu.” 10 Mulungu adamutawira kuti: “Inepano ndikucita namwe mpangano uyu: Nin’dzacita bzinthu bzakudabwisa pamaso pa wanthu wako wentse, bzinthu bzomwe ndikanati kale kucita pa dziko lentse la pantsi ayai pakati pa mitundu yentse, ndipo wanthu wentse wakukuzungulirani an’dzawona mabasa ya Yahova, pakuti nin’dzakucitirani bzinthu bzakupasa mantha kwene-kwene.

11 “Tetekerani bwino-bwino bzomwe ndikukuuzani lero. Nin’dzathamangisa pamaso panu Aamori, Akanani, Ahiti, Aperezi, Ahivi na Ajebusi. 12 Citani mphole kuti muleke kukacita mpangano na wanthu wa m’dziko lomwe mukuyendalo, kugopera kuti angakakusocereseni. 13 Mukapfudze maguwa yawo ya ntsembe, mukaswe mapilare yawo yakupambulika ndipo mukagwate-gwate maposto yawo yakupambulika. 14 Mun’funika lini kugodamira mulungu munango, pakuti Yahova ambadziwika na kufuna kunamatidwa iye yekha basi. Inde, iye ni Mulungu omwe ambafuna kunamatidwa iye yekha basi. 15 Citani mphole kuti muleke kukacita mpangano na wanthu wa m’dzikolo, thangwe akambakacita upombo na mirungu yawo na kupereka ntsembe kwa mirungu yawoyo, winango angadzakucemereni mucikadya ntsembe zawozo. 16 Ndipo imwepo mungadzatenge wana wawo wacikazi kuti akhale akazi wa wana wanu wacimuna, ndipo wana wawowo angambadzacite uputa na mirungu yawo acicitisambo wana wanu kucita upombo na mirungu yawoyo.

17 “Lekani kukonza bzifanikiso bza simbi yakucita kusungunusa.

18 “Mun’funika kumbacita Phwando la Pau Zakusaya Fermento. Mumbadye pau zakusaya fermentozo ninga momwe ndidakuuzirani ndipo mumbacite bzimwebzo kwa ntsiku 7 pa nthawe yomwe ndidaikhazikisa, m’mwezi wa Abibe,* thangwe umweyu ni mwezi omwe mudacoka m’dziko la Edjipito.

19 “Mwana ali-wentse wacimuna wakuyamba kubadwa* ni wangu, kuphatanidzambo mwana wakuyamba kubadwa wa bzifuwo bzanu bzentse, napo mwana wakuyamba kubadwa wa ng’ombe ayai bira. 20 Mwana ali-wentse wakuyamba kubadwa wa bulu mumbamulombole na bira. Tsono mukasaya kumulombola, mumbamuphe mwakucita kumutcola khosi ndipo mun’funika kumbalombola wana wanu wentse wakuyamba kubadwa wacimuna. Palibe munthu omwe an’funika kubwera kudzawonekera kwa ine cimanja-manja.

21 “Mumbaphate basa kwa ntsiku 6, tsono pa ntsiku yaci 7 mun’funika kupuma. Napo icikhala nthawe yakulima ayai yakubvuna, mun’funika basi kumbapuma.

22 “Mumbacite Phwando la Masumana, ndipo pakucita phwando limweri, mumbapereke tirigu yakuyamba kukhuma yomwe mwabvuna, ndipo kuphampha kwa gole mumbacitembo Phwando Lakumaliza Kubvuna* bzinthu bza m’munda.

23 “Amuna wentse pakati panu an’funika kumbawonekera pamaso pa Mbuya wacadidi, Yahova, Mulungu wa Jirayeri katatu pa gole. 24 Pakuti nin’dzathamangisira mitundu ya wanthu kutali na imwepo ndipo nin’dzakuza dziko lanu, ndipo palibe omwe an’dzasirira dziko lanu mukayenda kukawonekera kwa Yahova Mulungu wanu katatu pa gole.

25 “Ukapereka mulopa wa ntsembe yangu, leka kupereka pabodzi na bzinthu bzomwe bzina fermento. Ntsembe ya phwando la Paskwa in’funika lini kukoyedwa mpaka mangwana yace.

26 “Mun’funika kumbayendesa ku nyumba ya Yahova Mulungu wanu bzinthu bzabwino kwene-kwene bzakuyambirira kukhuma bza m’munda mwanu.

“Lekani kuphika ntcere mu mkaka wa mai wace.”

27 Yahova adapitiriza kuuza Mozeji kuti: “Unembe mafalaya pakuti inepano ndikucita mpangano na imwepo pabodzi na Jirayeri mwakubverana na mafala yamweya.” 28 Mozeji adapitiriza kukhala m’phirimo kwa ntsiku 40, usiku na masikati. Iye alibe kudya cinthu ne kumwa madzi. Ndipo Mulungu adanemba mafala ya mpanganoyo pa minyalayo, yomwe ni Malamulo Khumi.*

29 Patsogolo pace Mozeji adabuluka m’Phiri la Sinai na minyala miwiri ya Umboni m‘manja mwace. Pomwe Mozeji adabuluka m’phirimo, iye akhadziwa lini kuti nkhope yace ikhayetima pakuti akhadalewalewa na Mulungu. 30 Pomwe Aroni na Ajirayeri wentse adanyang’anisa Mozeji, adawona kuti nkhope yace ikhayetima ndipo adabva mantha kumufenderera.

31 Tsono Mozeji adawacemera, ndipo Aroni na atsogoleri wentse wa mbumba ya Jirayeri adayenda komwe kukhana iyeko, ndipo iye adayamba kulewalewa nawo. 32 Patsogolo pace Ajirayeri wentse adamufenderera ndipo iye adawauza malamulo yentse yomwe Yahova akhadamuuza m’Phiri la Sinai. 33 Mozeji akamala kulewalewa na wanthuwo akhambampsinkha nkhope yace na nguwo. 34 Tsono Mozeji akapita mu tendi la mtsonkhano kukawonekera pamaso pa Yahova kuti akalewelewe naye, iye akhacosa nguwoyo mpaka kucoka m’mwemo. Patsogolo pace iye akhabula aciyenda kuna Ajirayeri acikawauza malamulo yomwe wapasidwa. 35 Ndipo Ajirayeri adawona kuti nkhope ya Mozeji ikhayetima, tenepo Mozeji adampsinkha pomwe nkhope yace mpaka kubwerera kukalewalewa na Mulungu.

35 Patsogolo pace Mozeji adatsonkhanisa Ajirayeri wentse aciwauza kuti: “Yahova walewa kuti ticite bzinthu ibzi: 2 Mumbaphate basa kwa ntsiku 6, tsono ntsiku yaci 7, yomwe ni Sabudu, mumbapume ndipo njakupambulika kwa Yahova. Ali-wentse omwe an’phata basa pa ntsiku imweyi an’dzaphedwa. 3 Mun’funika lini kuphatiza moto pa mbuto iri-yentse yomwe mukukhala pa ntsiku ya Sabudu.”

4 Patsogolo pace Mozeji adauza thimu lentse la Ajirayeri kuti: “Yahova walewa kuti: 5 ‘Citani bzakupereka kwa Yahova. Ali-wentse omwe ana mtima wakufunisisa apereke kwa Yahova bzinthu ninga oro, prata na kobre,* 6 usalu bwa azuli, usalu bwa roxo, usalu bufuira kwene-kwene, usalu bwabwino kwene-kwene, ukuse bwa mbuzi, 7 makanda ya bvululume yakupalangiridwa na mtoto ufuira, makanda ya foka,* matabwa ya muti wa mkexa, 8 mafuta yakuikha m’makandiyero, balsamo yakukonzera mafuta yakudzozera na bzakununtcirisa, 9 minyala ya onekisi na minyala inango yakuikha pa efodi na pa cakubvala pankhombe.

10 “‘Wanthu wentse waluso* pakati panu abwere kuti adzakonze bzinthu bzentse bzomwe Yahova wakuuzani. 11 Akonze tabernakulo na tendi lace, cakupswimphirira cace, bzakupanira bzace, aro zace, mbaliro zace, mapilare yace, matsinde yace, 12 thungwa na miti yace yakunyamulira, cakugwanankhirira, kortina, 13 meza na miti yace yakunyamulira pabodzi na bzombo bzace bzentse, pau zakuwonesedwa pamaso pa Mulungu, 14 cakuikhira kandiyero pabodzi na bzombo bzace, makandiyero, mafuta yakuikha m’makandiyeromo, 15 guwa la ntsembe lakutenthera bzakununtcirisa na miti yace yakunyamulira, mafuta yakudzozera na bzakununtcirisa bzace, kortina ya pa msuwo pa tabernakulo, 16 guwa la ntsembe zakucita kutentha pabodzi na gredya yace ya kobre, miti yace yakunyamulira na bzombo bzentse, basiya na cakukhazikira cace, 17 nguwo zakukonzera litsito, mapilare na matsinde yace, kortina ya pa msuwo pa kintale, 18 bzakupanira tabernakulo, bzakupanira litsito na tubzingwe twace, 19 bzakubvala bzakulukidwa bwino bzomwe bzin’dzabvalidwa pakutumikira pa mbuto yakucena, bzakubvala bzakupambulika bza mkulu wa antsembe Aroni na bzakubvala bza wana wace kuti ambabvale pakutumikira ninga antsembe.’”

20 Tenepo Ajirayeri wentse adacoka pamaso pa Mozeji. 21 Ali-wentse omwe akhafunisisa kucita bzakupereka, adabweresa bzakupereka bzace kwa Yahova kuti bziphatisidwe basa pa tendi la mtsonkhano na pa mabasa yentse na kukonzera bzakubvala bzakupambulika. 22 Amuna, akazi na wentse omwe akhafunisisa kucita bzakupereka, adapitiriza kubweresa bzakupereka* bzawo. Iwo adabweresa maphini yakudekesera bzakubvala, mphete za m’makutu, aneli, bzakubzidekesera bzinango na bzinthu bzakusiyana-siyana bza oro. Wentse adapereka bzakupereka bzawo bza oro kwa Yahova. 23 Ndipo wentse omwe akhana usalu bwa azuli, usalu bwa roxo, usalu bufuira kwene-kwene, usalu bwabwino kwene-kwene, ukuse bwa mbuzi, makanda ya bvululume yakupalangiridwa mtoto ufuira na makanda ya foka,* adabzibweresa. 24 Wentse omwe adapereka prata* na kobre* adapereka bzakuperekabzo kwa Yahova, ndipo wentse omwe akhana matabwa ya mkexa adayabweresa kuti yaphatisidwe basa pakumanga tabernakulo.

25 Akazi wentse waluso adaluka bzinthu na manja yawo ndipo adabweresa bzomwe adalukabzo. Iwo adabweresa usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene. 26 Ndipo akazi wentse waluso omwe akhana mtima wakufunisisa adaluka maukuse ya mbuzi.

27 Atsogoleri wa mbumba adabweresa minyala ya onekisi na minyala inango kuti iikhidwe pa efodi na pa cakubvala pankhombe. 28 Adabweresambo balsamo, mafuta yakuikha m’kandiyero, mafuta yakudzozera na bzakununtcirisa. 29 Amuna na akazi wentse omwe akhafunisisa adapereka bzinthu kuti athandizire pa basa lomwe Yahova adauza Mozeji. Ajirayeri adabweresa bzinthu bzimwebzi ninga ntsembe yakucita kufuna yakuperekedwa kwa Yahova.

30 Patsogolo pace Mozeji adauza Ajirayeri kuti: “Onani, Yahova wasankhula Bezaleli mwana wa Uri, mzukulu wa Hur wa m’dzinza la Djuda. 31 Iye wapasidwa mzimu wa Mulungu, kuti akhale wanzeru, wakuzindikira na wakudziwa kucita bzinthu mwaluso pa basa liri-lentse, 32 kuti alinganize kakonzedwe ka bzinthu, kuti aphate basa na oro, prata na kobre, 33 aseme na kugoba minyala na kudziwa kukonza cinthu ciri-centse na matabwa. 34 Ndipo Mulungu waikha luso lakupfunzisa mu mtima mwa Bezaleli na Ooliyabe, mwana wa Ahisamaki wa m’dzinza la Dani. 35 Iye adawapasa luso lakucita basa liri-lentse. Basa la kubordari, lakuluka mwakuphatisa basa usalu bwa azuli, usalu bwa roxo, usalu bufuira kwene-kwene, usalu bwabwino kwene-kwene pabodzi na basa liri-lentse lakuluka. Amuna amwewa an’dzacita basa liri-lentse na kulinganizambo mabasa ya mtundu uli-wentse.

36 “Bezaleli an’dzaphata basa na Ooliyabe pabodzi na amuna wentse waluso* omwe Yahova adawapasa nzeru na luso lakubvesesa bzinthu kuti akwanise kuphata basa lentse lakupambulikali mwakubverana na bzomwe Yahova adalewa.”

2 Patsogolo pace Mozeji adacemera Bezaleli, Ooliyabe na mwamuna ali-wentse waluso omwe Yahova akhadamupasa nzeru na wentse omwe akhana mitima yakufunisisa kubzipereka pa basalo. 3 Tenepo iwo adatambira kwa Mozeji bzakupereka bzentse bzomwe Ajirayeri akhapereka kuti bziphatisidwe basa pa basa lakupambulika. Tsono Ajirayeri akhapitiriza kubweresa basi bzakuperekabzo macibese yali-yentse.

4 Tenepo pomwe basa lakupambulikalo lidayamba, anyabasa wentse waluso adayamba kubwera m’bodzi-m’bodzi 5 aciuza Mozeji kuti: “Wanthuwa akubweresa bzizinji kwene-kwene kuposa bzomwe bzikhafunikira pa basa lomwe Yahova walewa kuti licitidweli.” 6 Tenepo Mozeji adauza wanthu kuti akapereke cidziwiso mu msasa wentseneyo cakuti: “Imwe Ajirayeri mwentse, lekani kubweresa pomwe bzinthu kuti bziphatisidwe basa pakumanga tendi la Mulungu.” Tenepo, wanthuwo alibe kubvumizidwa kubweresa pomwe bzinthu. 7 Bzinthubzo bzingadakwana pa basa lomwe akhafuna kucita ndipo bzikhali bzizinji kwene-kwene kuposa bzomwe bzikhafunikira.

8 Tenepo wanthu wentse walusowo adakonza tabernakulo na nguwo 10 zakukonzera tendi zakulukidwa bwino na usalu bwa azuli, usalu bwa roxo na usalu bufuira kwene-kwene, ndipo panguwopo adabordari akerubi. 9 Nguwo iri-yentse ikhadatalimpha makovado* 28 ndipo khwankhwa lace likhali la makovado manai. Nguwo zentsenezi zikhana mphimo ibodzi-bodzi. 10 Iye* adaphatanidza nguwo zixanu kuti zikhale nguwo ibodzi ikulu, ndipo zixanu zinangozo adaziphatanidzambo kuti zikhale nguwo ibodzi ikulu. 11 Patsogolo pace, kuphampha kwa nguwo zomwe adaphatanidzazo, adasonerera magango ya tubzingwe twa azuli. Adacitambo bzibodzi-bodzi na nguwo inangoyo, kuti nguwo ziwiri zikulu-zikuluzi ziphatanidzidwe. 12 Iye adasonerera magango 50 pa nguwo ibodzi ndipo pa nguwo inangoyo adasonererambo magango 50 kuphampha kwace, ndipo magangoyo yakhadanyang’anisa mbuto zomwe zingadaphatanidza nguwo ziwiri zikulu-zikulu zire. 13 Pakumalizira pace, iye adakonza bzakupanira bza oro 50 bzaardondo kuti apanire nabzo nguwo ziwiri zikulu-zikulu zire, kuti ikhale nguwo ibodzi ikulu ya tabernakulo.

14 Patsogolo pace iye adakonza nguwo na ukuse bwa mbuzi kuti aswimphire tabernakuloyo. Iye adakonza nguwo zakukwana khumi na ibodzi. 15 Nguwo iri-yentse ikhadatalimpha makovado 30 ndipo khwankhwa lace likhali la makovado manai. Nguwo zentse 11 zikhali za mphimo ibodzi-bodzi. 16 Patsogolo pace iye adaphatanidza nguwo zixanu pabodzi ndipo adaphatanidza pomwe nguwo zinango 6 pabodzi. 17 Kuphampha kwa nguwo yakuphatanidza yakuyamba, adaikha magango 50, ndipo kuphampha kwa nguwo yakuphatanidzidwa yaciwiri, adaikhambo magango 50 m’mbuto zomwe nguwo ziwirizo zikhaphatanidzidwa. 18 Ndipo adakonzambo bzakupanira bza kobre* 50 acibziikha m’magango mule kuti aphatanidze nguwo ziwiri zikulu-zikuluzo kuti zikhale ibodzi.

19 Iye adakonza cakupswimphirira tabernakulo na makanda ya bvululume* yakupalangiridwa na mtoto ufuira, ndipo padzulu pace adapswimphira na makanda ya foka.*

20 Patsogolo pace iye adakonza aro zakuimisira tabernakulo na matabwa ya muti wa mkexa. 21 Aro iri-yentse ikhadatalimpha makovado 10 ndipo khwankhwa lace likhali la kovado ibodzi na meya. 22 Aro iri-yentse ikhana bzakulumikidzira bziwiri, ndipo cakulumikidzira ciri-centse cikhali pafupi na cinzace. Aro zentse za tabernakulo adazikonza tenepoyo. 23 Iye adakonza aro 20 aciziimisa ku mbali ya ku suli kwa tabernakuloyo. 24 Iye adakonzambo matsinde 40 ya prata, aciyabowola kuti apitise aro 20 zire. Matsinde mawiri yadapita pantsi pa aro ibodzi ndipo adabowola tsinde liri-lentse kuti bzakulumikidzira bziwiri bzomwe bzikhali mu arozo bzipite m’mwemo. 25 Kumbali inango ya tabernakuloyo, yomwe ni mbali ya ku norte, iye adakonza aro 20 26 na matsinde yace 40 ya prata, ndipo pantsi pa aro iri-yentse padapita matsinde mawiri.

27 Kumbuyo kwa tabernakuloyo ku mbali ya kumadokero, iye adakonza aro zitanthatu. 28 Iye adakonzambo aro ziwiri kuti zikhale midjirikiro m’maponta mawiri ya kumbuyo kwa tabernakuloyo. 29 Aro zentsenezi adazikonza na matabwa mawiri kuyambira kudzulu mpaka pa kacinthu kaardondo kakuyamba ka pantsi, ndipo adacitambo bzibodzi-bodzibzo na aro ziwiri zakudjirikira zomwe zikhali kumbuyo kwa tabernakulo. 30 Tenepo iwo adaikha aro 8 na matsinde yace 16 ya prata yakuikhira arozo, ndipo matsinde mawiri yadapita pantsi pa aro ibodzi.

31 Patsogolo pace adakonza mbaliro na muti wa mkexa. Mbaliro zixanu zikhali ku aro za mbali ibodzi ya tabernakuloyo, 32 zixanu zikhali ku aro za mbali inango ya tabernakulo ndipo zinango zixanu zikhali ku aro za kumadokero, kumbuyo kwa tabernakuloyo. 33 Ndipo adakonza mbaliro ya pakati, yomwe ikhakhala pakati pa arozo kucokera ku ponta ibodzi mpaka ku ponta inangoyo. 34 Arozo adazipalangira oro ndipo adakonza tubzinthu twaardondo twa oro kuti mbalirozo zipite m’mwemo, ndipo mbalirozo adazipalangirambo oro.

35 Iye adakonza kortina na usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene bwakulukidwa bwino. Pa kortinapo iye adabordari akerubi. 36 Patsogolo pace iye adakonza mapilare manai na muti wa mkexa ndipo adayapalangira oro. Adakonzambo tungoloweko twa oro twakumanikira kortinayo ndipo mapilareyo yadaikhidwa padzulu pa matsinde manai ya prata. 37 Patsogolo pace adakonza kortina ya pa msuwo pa tabernakulo, ndipo kortinayo adaikonza na usalu bwa azuli, usalu bwa roxo, usalu bufuira kwene-kwene na usalu bwakulukidwa bwino kwene-kwene. 38 Adakonzambo pilare zixanu na ngoloweko zace, kudzulu kwace na bzakupanira bzace adabzipalangira oro, tsono matsinde maxanu yakhali ya kobre.

37 Bezaleli adakonza Thungwa na matabwa ya muti wa mkexa, ndipo mtali mwace likhali la makovado* mawiri na meya, khwankhwa lace likhali la kovado ibodzi na meya ndipo kutalimpha kwace kukhali kwa kovado ibodzi na meya. 2 Iye adalipalangira oro caiyo kunja na mkati ndipo adaikhambo bzakudekesera bza oro m’mphepete mwa thungwalo. 3 Adakonzambo tubzinthu tunai twaardondo twa oro ndipo adatuikha m’mbali zinai za m’minyendo mwa Thungwalo, tuwiri mbali iyi, tuwiri mbali inangoyo. 4 Patsogolo pace, adakonza miti yakunyamulira Thungwalo na muti wa mkexa ndipo adaipalangira oro. 5 Iye adaikha mitiyo m’tubzinthu twaardondo tomwe tukhali m’mbali mwa Thungwalo kuti ambanyamulire Thungwalo.

6 Iye adakonza cakugwanankhirira Thungwalo na oro caiyo. Mtali mwace cikhali ca makovado mawiri na meya ndipo khwankhwa lace likhali la kovado ibodzi na meya. 7 Adakonza akerubi awiri na oro aciwasula na martelo, ndipo adawaikha m’maponta mawiri mwa cakugwanankhiriraco. 8 Kerubi m’bodzi akhali ku ponta ibodzi ndipo kerubi munango akhalimbo ku ponta inangoyo. Iye adakonza akerubiwo m’maponta mwa cakugwanankhiriraco. 9 Akerubi awiriwo akhadafuthula maphaphidwe yawo m’dzaulu acimpsinkha cakugwanankhiriraco na maphaphidweyo. Iwo akhadanyang’anisana ndipo nkhope zawo zikhadatsulimira cakugwanankhiriraco.

10 Iye adakonzambo meza na matabwa ya muti wa mkexa ya makovado mawiri mtali mwace, khwankhwa lace likhali la kovado ibodzi ndipo kutalimpha kwace kukhali kwa kovado ibodzi na meya. 11 Adalipalangira oro caiyo ndipo adakonza bzakudekesera bza oro m’mphepete mwace. 12 Patsogolo pace adakonza bzakudekesera m’mphepete mwa mezayo ndipo khwankhwa lace likhali la masentimetro 7, ndipo m’malire mwace adaikhambo bzakudekesera bza oro. 13 Adakonzambo tubzinthu tunai twaardondo twa oro ndipo adatuikha m’maponta manai ya mezayo, momwe muna minyendo yace. 14 Tubzinthu twaardondoto tukhali pafupi na bzakudekesera bzire kuti ambapitise miti yakunyamulira mezayo. 15 Iye adakonza miti yakunyamulira na muti wa mkexa ndipo adaipalangira oro kuti ambanyamulire mezayo. 16 Patsogolo pace iye adakonzambo na oro caiyo bzombo bza pa meza ibzi: Mapalato, makopo, majaro na matijela kuti ambaphatisire basa pakupereka ntsembe za vinyu.

17 Iye adakonza cakuikhira kandiyero na oro caiyo ndipo adacikonza mwakucita kucisula na martelo. Ndipo tsinde lace, mwendo wace, mthambi zace, tumasamba twace twa m’nyantsi mwa maluwa, ndingo zace na maluwa yace bzikhali cinthu cibodzi. 18 Mwendoyo ukhana mthambi 6. Mbali ibodzi ikhana mthambi zitatu ndipo mbali inangoyo ikhanambo mthambi zitatu. 19 Mthambi iri-yentse ya mbali ibodzi ikhana tumasamba tutatu twa m’nyantsi mwa maluwa tomwe tukhadakonzedwa ninga maluwa ya muti wa amendwa, ndipo tumasambato tukhatewerana ndingo na maluwa, ndingo na maluwa. Ndipo mthambi iri-yentse ya mbali inangoyo ikhanambo tumasamba tutatu twa m’nyantsi mwa maluwa tomwe tukhadakonzedwa ninga maluwa ya muti wa amendwa, ndipo tumasambato tukhatewerana ndingo na maluwa, ndingo na maluwa. Umu ni momwe zikhadakonzedwera mthambi 6 zomwe zikhali pa mwendo wa cakuikhira kandiyeroco. 20 Mwendo wa cakuikhira kandiyeroco ukhana tumasamba tunai twa m’nyantsi mwa maluwa tomwe tukhadakonzedwa ninga maluwa ya muti wa amendwa, ndipo tumasambato tukhatewerana ndingo na maluwa, ndingo na maluwa. 21 Ndingo ibodzi idaikhidwa pantsi pa mthambi ziwiri zakuyambirira, ndingo yaciwiri idaikhidwa pantsi pa mthambi ziwiri za pakati ndipo ndingo yacitatu idaikhidwambo pantsi pa mthambi ziwiri zakumalizira. Umu ni momwe zidakonzedwera mthambi 6 za mwendo wa cakuikhira kandiyeroco. 22 Cakuikhira kandiyeroco kuphatanidzambo ndingo na mthambi zace, bzikhali cinthu cibodzi, cakukonzedwa na oro caiyo, cakusulidwa na martelo. 23 Iye adakonzambo makandiyero 7, bzakuthimisira tubzingwe twa makandiyeroyo na tumapalato twakuikhira dotha la tubzingweto ndipo adabzikonza na oro caiyo. 24 Iye adakonza cakuikhira kandiyeroco pabodzi na bzombo bzace bzentse na oro caiyo yakulemera talento* ibodzi.

25 Iye adakonza guwa la ntsembe lakutenthera bzakununtcirisa na matabwa ya muti wa mkexa. Guwalo likhali la kwadrado la kovado ibodzi mtali mwace, khwankhwa lace likhali la kovado ibodzi ndipo kutalimpha kwace kukhali kwa makovado mawiri. Guwalo na nyanga zace bzikhali cinthu cibodzi. 26 Adalipalangira oro caiyo padzulu pace, m’mbali mwace mwentse na nyanga zentse, ndipo adakonza bzakudekesera bza oro m’mphepete mwace. 27 M’nyantsi mwa bzakudekesera guwa la ntsembero, iye adakonza tubzinthu twaardondo twa oro tuwiri ku mbali ibodzi na tunango tuwiri ku mbali inangoyo. M’tubzinthu tumweto ndimo momwe mungadapita miti yakunyamulira guwalo. 28 Patsogolo pace adakonza miti yakunyamulira na muti wa mkexa ndipo adaipalangira oro. 29 Iye adakonzambo mwaluso mafuta yakupambulika yakudzozera yabwino kwene-kwene na bzakununtcirisa.

38 Iye adakonza guwa la ntsembe zakucita kutentha na matabwa ya muti wa mkexa. Iro likhali la kwadrado ndipo likhana makovado maxanu mtali mwace, khwankhwa lace likhali la makovado* maxanu ndipo kutalimpha kwace likhali la makovado matatu. 2 Patsogolo pace iye adakonza nyanga zinai m’maponta mwace. Nyangazo zikhacita mbali ya guwalo ndipo adapalangira kobre* guwa lentsenero. 3 Patsogolo pace iye adakonza bzombo bzentse bza pa guwa la ntsembe ninga mafoxolo, matijela, magarfu na bzakuikhira dotha. Bzombo bzentsenebzi adabzikonza na kobre. 4 Iye adakonzambo gredya ya kobre pakati pa guwa la ntsembero, pafupi na cakudekesera comwe ciri m’dzaulu, m’mphepete mwa guwalo. 5 Iye adakonza tubzinthu twaardondo tunai acituikha m’maponta manai mwa guwa la ntsembero pafupi na gredya ya kobre ire, kuti ambaikhe miti yakunyamulira guwalo. 6 Patsogolo pace iye adakonza miti yakunyamulira na muti wa mkexa, aciipalangira kobre. 7 Iye adapitisa mitiyo m’tubzinthu twaardondo tomwe tukhali m’mbali ziwiri za guwalo kuti ambanyamulire guwalo. Guwalo adalikonza na mawonekedwe ya kaxa ndipo likhafunga lini pantsi.

8 Patsogolo pace iye adakonza basiya la kobre na cakukhazikira cace ca kobre. Iye adaphatisa basa supedyo* za akazi omwe akhadalinganizidwa kuti ambatumikire pa msuwo wa tendi la mtsonkhano.

9 Iye adakonzambo kintale ya tabernakulo ndipo ku mbali ya ku suli adakonza litsito la nguwo yakulukidwa bwino kwene-kwene yomwe ikhadatalimpha makovado 100. 10 Ku mbali imweyi kukhana mapilare 20 na matsinde yace 20 ya kobre yomwe yakhana mibowo yakulumikidzira. Ngoloweko zakumanikira nguwo za m’mapilareyo na bzakuphatanidzira bzace bzikhali bza prata. 11 Ku mbali ya ku norte kukhana nguwo yakutalimpha makovado 100, mapilare 20 na matsinde 20 ya kobre yomwe yakhana mibowo yakulumikidzira, ndipo ngoloweko na bzakulumikidzira nabzo mapilareyo bzikhalimbo bza kobre. 12 Ku mbali ya kumadokero kukhana litsito la nguwo ya makovado 50, ndipo kukhanambo mapilare 10 na matsinde yace 10 yomwe yakhana mibowo ndipo bzakupanira mapilareyo na bzakulumikidzira bzace bzikhali bza prata. 13 Khwankhwa la kintaleyo ku mbali ya kumabvadzuwa likhali la makovado 50. 14 Ku mbali ya ku msuwo kukhana litsito la nguwo zakutalimpha makovado 15, mapilare matatu na matsinde matatu yomwe yakhana mibowo yakulumikidzira. 15 Ndipo ku mbali inangoyo kukhana litsito la nguwo zakutalimpha makovado 15, mapilare matatu na matsinde matatu yomwe yakhana mibowo yakulumikidzira. 16 Nguwo zentse za litsitolo, zikhadalukidwa na usalu bwabwino kwene-kwene. 17 Matsinde ya mapilareyo yakhali ya kobre. Bzakupanira bza mapilare na bzakulumikidzira bzace bzikhali bza prata, ndipo padzulu pace pakhadapalangiridwa prata. Ngoloweko za mapilare yentse ya kintaleyo zikhali za prata.

18 Pa msuwo pa litsitolo pakhana kortina yakulukidwa na usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene. Khwankhwa lace likhali la makovado 20 ndipo kutalimpha kwace kukhali kwa makovado maxanu mwakubverana na kutalimpha kwa nguwo za pa litsito. 19 Mapilare yace manai na matsinde yace manai yadakonzedwa na kobre. Bzakupanira bzace bzikhali bza prata ndipo padzulu pace na bzakulumikidzira bzace bzikhadapalangiridwa prata. 20 Bzakupanira bzentse bza tabernakulo na bza litsito bzikhali bza kobre.

21 Mozeji adauza wanthu kuti alewenge bzinthu bzentse bzomwe bzidaphatisidwa basa pakukonza tabernakulo yomwe ikhana thungwa la Umboni. Alevi ndiwo omwe adacita bzimwebzi mwakutsogoleredwa na Itamari, mwana wa mkulu wa antsembe Aroni. 22 Bezaleli, mwana wa Uri, mzukulu wa Hur wa m’dzinza la Djuda, adacita bzentse bzomwe Yahova adauza Mozeji. 23 Iye akhali pabodzi na Ooliyabe, mwana wa Ahisamaki wa m’dzinza la Dani, omwe akhana luso lakucita basa liri-lentse, basa la kubordari na kuluka mwakuphatisa basa usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene.

24 Oro yentse yomwe idaphatisidwa basa pa mbuto yakucena, ikhali izinji ndipo ikhandendemerana na oro ya ntsembe yakucita kufambisa-fambisa. Mphimo yace ikhali ya matalento* 29 na masiklo* 730 mwakubverana na siklo ya pa mbuto yakucena.* 25 Ndipo prata yomwe idabweresedwa na wanthu omwe akhadanembedwa wa mbumba ya Jirayeri, ikhali ya matalento 100 na masiklo 1775 mwakubverana na siklo ya pa mbuto yakucena.* 26 Kati na kati ya siklo yomwe munthu ali-wentse omwe adanembedwa adabweresa, ikhali yakundendemerana na kati na kati ya siklo ya pa mbuto yakucena.* Amuna wentse wa magole 20 kuyenda kutsogolo omwe akhadanembedwa akhalipo wakukwana 603 550.

27 Matsinde ya aro ya mbuto yakucena na matsinde yomwe yakhali pafupi na kortina, yentsene pabodzi yakhalemera matalento 100 ya prata; ndipo matsinde 100 yakhalemera matalento 100. Bzimwebzi bzin’funa kulewa kuti tsinde libodzi likhalemera talento ibodzi. 28 Iye adatenga masiklo 1775 ya prata acikonzera bzakupanira bzomwe bzikhali pa mapilare. Padzulu pa mapilareyo adapalangira prata acibziphatanidza.

29 Kobre yomwe idaperekedwa ninga ntsembe* ikhali ya matalento 70 na masiklo 2400. 30 Iye adatenga kobreyo acikonzera matsinde ya pa msuwo pa tendi la mtsonkhano, guwa la ntsembe la kobre, gredya ya kobre pabodzi na bzombo bzentse bzakuphatisa basa pa guwapo, 31 matsinde ya litsito lakuzungulira kintale, matsinde ya pa msuwo pa litsito pabodzi na bzakupanira bzentse bza tabernakulo na bzakupanira bzentse bza litsitolo.

39 Mwakuphatisa basa usalu bwa azuli, usalu bwa roxo na usalu bufuira kwene-kwene, iwo adaluka bzakubvala bzabwino bzomwe bzingadabvalidwa pa mbuto yakucena. Iwo adakonzera Aroni bzakubvala bzakupambulika ninga momwe Yahova akhadauzira Mozeji.

2 Iye adakonza efodi na oro, usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene. 3 Iwo adasula oro, aciibvanya-bvanya icikhala itete kwene-kwene, ndipo adaigwata-gwata ninga tubzingwe kuti alukire pabodzi na usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene. 4 Iwo adakonza tunguwo tuwiri m’mapewa tomwe tukhaphatanidza kutsogolo na kumbuyo kwa efodiyo. 5 Bande lakulukidwa la efodi lomwe likhacitisa kuti efodiyo ikhale pa mbuto yace lidakonzedwa na bzinthu bzibodzi-bodzibzi, oro, usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene, ninga momwe Yahova akhadauzira Mozeji.

6 Patsogolo pace iwo adaikha minyala ya onekisi m’tubzinthu twaardondo twa oro ndipo adagoba m’minyalayo madzina ya wana wa Jirayeri ninga momwe ambagobera karimbo. 7 Iye adaikha minyalayo m’mapewa mwa efodi kuti ikhale mkumbuso kwa wana wa Jirayeri, ninga momwe Yahova akhadauzira Mozeji. 8 Patsogolo pace adakonza cakubvala pankhombe mwaluso kwene-kwene ninga momwe adakonzera efodi. Cakubvalaco cidakonzedwa na oro, usalu bwa azuli, usalu bwa roxo, usalu bufuira kwene-kwene na usalu bwabwino kwene-kwene. 9 Cikafunyidwa pakati cikhandendemerana mbali zentse zinai. Cakubvala pankhombeco adacikonza kuti cikafunyidwa pakati, mtali mwace cikhale na masentimetro* 22 ndipo mfupi mwace masentimetro 22. 10 Iwo adaikha mizere minai ya minyala. Mzere wakuyamba ukhana mwala wa rubi, topaziyo na esmeralda. 11 Mzere waciwiri adaikha mwala wa turkeza, safira na jaspe. 12 Mzere wacitatu adaikha mwala wa lexemu, agata na ametista. 13 Mzere wacinai adaikha mwala wa krizolito, onekisi na jade ndipo adaiikha m’bzakuikhira minyala bza oro. 14 Minyalayo ikhalipo 12 mwakubverana na madzina ya wana wa Jirayeri, ndipo madzinayo yadanembedwa mwakucita kugoba ninga momwe ambagobera karimbo. Dzina liri-lentse likhaimira dzinza libodzi pa madzinza 12 ya Jirayeri.

15 Patsogolo pace iwo adakonza tumakorenti twa oro caiyo twakucita kuposa ninga cingwe acituikha pa cakubvala pankhombeco. 16 Iwo adakonza twakuikhira minyala tuwiri twa oro na tubzinthu tuwiri twaardondo twa oro aciikha tubzinthu tuwirito m’maponta mawiri ya cakubvala pankhombeco. 17 Patsogolo pace iwo adapitisa tubzingwe tuwiri twa oro tule m’tubzinthu tuwiri twaardondo tomwe tukhali m’maponta mawiri ya cakubvala pankhombeco. 18 Ndipo adapitisa tubzingwe tuwirito pa bzakuikhira minyala bziwiri bzire. Patsogolo pace adatenga bzakuikhira minyalabzo acibziikha m’mapewa kutsogolo kwa efodi. 19 Patsogolo pace iwo adakonza tubzinthu tuwiri twaardondo twa oro, ndipo adatuikha m’maponta mawiri ya cakubvala pankhombe ku mbali ya mkati yakuphatana na efodi. 20 Iwo adakonza pomwe tubzinthu tuwiri twaardondo twa oro ndipo adatuikha kutsogolo kwa efodi, pantsi pa makorenti mawiri yomwe yakhapita na m’mapewa pafupi na pakulumikidzira, padzulu pa bande lakuluka la efodi. 21 Cakubvala pankhombeco adacimanga na kamceka ka azuli, mwakupitisa kamcekako m’tubzinthu tuwiri twaardondo twa cakubvala pankhombe na m’tubzinthu tuwiri twaardondo twa efodi, kuti cakubvala pankhombeco cileke kumbacoka pa mbuto yace, koma cipitirize kukhala padzulu pa bande lakuluka la efodi ninga momwe Yahova akhadauzira Mozeji.

22 Patsogolo pace iye adakonzambo cakubvala citali cakusaya manja, ndipo centse adacikonza na usalu bwa azuli. 23 Khosi la cakubvalaco likhali pa kati na kati ninga khosi la cakubvala comwe cikhabvalidwa ku nkhondo, ndipo adasonerera nguwo inango m’mphepete mwa khosiro kuti cireke kung’ambika. 24 Patsogolo pace iwo adakonza bzakudekesera m’mphepete mwa cakubvalaco bzakundendemerana na cisapo ca romaa,* ndipo adabzikonza na usalu bwa azuli, usalu bwa roxo na usalu bufuira kwene-kwene ndipo adabuluka pabodzi. 25 Patsogolo pace adakonzambo tusino twa oro caiyo acituikha pakati pa tubzisapo twa romaa tule m’mphepete mwentse mwa cakubvala cakusaya manjaco 26 ndipo adaikha sino ya oro patsogolo pace cakudekesera, sino ya oro, cakudekesera, m’nyantsi mwentse mwa cakubvala comwe cikhaphatisidwa basa pakuphata basa la untsembe, ninga momwe Yahova akhadauzira Mozeji.

27 Ndipo iwo adakonzera Aroni na wana wace bzakubvala bzitali bzabwino kwene-kwene. 28 Iwo adakonza maduku na nguwo zabwino kwene-kwene kuti Aroni na wana wace ambampsinkhire misolo yawo. Adakonzambo makabudula na nguwo zabwino kwene-kwene zakucita kuluka, 29 ndipo adakonzambo mceka wa pa mimba na nguwo yabwino kwene-kwene, usalu bwa azuli, usalu bwa roxo na usalu bwabwino kwene-kwene, ninga momwe Yahova akhadauzira Mozeji.

30 Pakumalizira pace, iwo adakonza kalata kakuyetima ka oro caiyo komwe kakhali cizindikiro cakupambulika ndipo adakanemba mwakucita kugoba ninga momwe ambagobera karimbo, mafala yakuti: “Kucena n’kwa Yahova.” 31 Iwo adamangirira kalatako na tubzingwe twa azuli kuti akaikhe pa duku ninga momwe Yahova akhadauzira Mozeji.

32 Tenepo basa lentse lakumanga tabernakulo, lomwe ni tendi la mtsonkhano lidamala, ndipo Ajirayeri adacitadi bzentse ninga momwe Yahova akhadauzira Mozeji. Iwo adacitadi bzimwebzo.

33 Patsogolo pace, iwo adayendesa kwa Mozeji tabernakulo yomwe ni tendi na bzombo bzace bzentse, bzakupanira bzace, aro zace, mbaliro zace, pilare zace, matsinde yace, 34 bzakuswimphirira bzace bza makanda ya bvululume bzakupalangiridwa mtoto ufuira, bzakuswimphirira bzace bza makanda ya foka, kortina,* 35 thungwa la Umboni, bzakunyamulira bzace na cakugwanankhirira cace, 36 meza na bzombo bzace bzentse pabodzi na pau zakuwonesedwa pamaso pa Mulungu, 37 cakuikhira kandiyero ca oro caiyo, makandiyero, mzere wa makandiyero na bzombo bzace bzentse pabodzi na mafuta yakuikha m’makandiyeromo, 38 guwa la ntsembe la oro, mafuta yakudzozera, bzakununtcirisa, kortina ya pa msuwo pa tendi, 39 guwa la ntsembe la kobre,* gredya yace ya kobre na bzakunyamulira bzace, bzombo bzace bzentse, basiya na cakukhazikira cace, 40 litsito la nguwo, mapilare yace, matsinde yace, kortina ya pa msuwo pa litsitolo, bzingwe bzace, bzakupanira bzace pabodzi na bzombo bzentse bzomwe bzikhaphatisidwa basa pa tabernakulo, yomwe ni tendi la mtsonkhano, 41 bzakubvala bzakulukidwa bwino bzomwe bzingadabvalidwa pa mbuto yakucena, bzakubvala bzakupambulika bza mkulu wa antsembe Aroni pabodzi na bzakubvala bza wana wace omwe angadatumikira ninga antsembe.

42 Ajirayeri adacita bzentsenebzi mwakubverana na momwe Yahova akhadauzira Mozeji. 43 Pomwe Mozeji adayenda kuti akawone basa lawolo, adakawona kuti iwo adacitadi ndendende ninga momwe Yahova akhadalewera, ndipo Mozeji adawasimba.

40 Patsogolo pace Yahova adauza Mozeji kuti: 2 “Pa ntsiku yakuyamba, ya mwezi wakuyamba, un’funika kudzamanga tabernakulo, yomwe ni tendi la mtsonkhano. 3 Udzaikhe m’mwemo thungwa la Umboni, ucidzampsinkha mbali yomwe ina Thungwalo na kortina. 4 Udzaikhe meza na bzinthu bzomwe bzin’dzaphatisidwa basa pa mezayo ndipo udzaikhembo cakuikhira kandiyero ucidzagasa makandiyeroyo. 5 Patsogolo pace udzaikhe guwa la ntsembe la oro la bzakununtcirisa patsogolo pa thungwa la Umboni ndipo udzaikhembo kortina pa msuwo pa tabernakulo.

6 “Udzaikhe guwa la ntsembe zakucita kutentha patsogolo pa msuwo wa tabernakulo, yomwe ni tendi la mtsonkhano, 7 ndipo udzaikhe basiya pakati pa tendi la mtsonkhano na guwa la ntsembe, ucidzaikha madzi m’mwemo. 8 Patsogolo pace udzakonze litsito la tabernakulo, ndipo udzaikhe kortina pa msuwo wa litsitolo. 9 Patsogolo pace, udzatenge mafuta yakudzozera ndipo udzadzoze tabernakulo na bzinthu bzentse bzomwe bziri m’mwemo, ndipo udzalicenesembo pabodzi na bzombo bzace bzentse kuti lidzakhale cinthu cakupambulika. 10 Udzadzozembo guwa la ntsembe zakucita kutentha na bzombo bzace bzentse ndipo udzacenese guwalo kuti likhale lakucena kwene-kwene. 11 Ndipo udzadzozembo basiya na cakukhazikira cace, ndipo udzalicenese.

12 “Patsogolo pace udzabwerese Aroni na wana wace pafupi na pa msuwo wa tendi la mtsonkhanolo ndipo udzawasambise na madzi.* 13 Ndipo udzabvazike Aroni bzakubvala bzakupambulika ucidzamudzoza na kumucenesa, ndipo iye an’dzanditumikira ninga wantsembe. 14 Patsogolo pace udzabwerese wana wace pafupi ucidzawabvazika bzakubvala bzitali-bzitali. 15 Udzawadzoze ninga momwe un’dzadzozera pai wawo kuti iwo adzanditumikire ninga antsembe, ndipo kudzozedwa kwawoko kun’dzawacitisa kuti iwo anditumikire ninga antsembe nthawe zentse ku mibadwo yawo yentse.”

16 Mozeji adacitadi bzentse ndendende ninga momwe Yahova akhadamuuzira. Iye adacitadi bzimwebzo.

17 M’mwezi wakuyamba, mu gole laciwiri, pa ntsiku yakuyamba ya mweziyo, tabernakulo idamala kukonzedwa. 18 Pomwe Mozeji adamaliza kukonza tabernakulo, iye adaikha matsinde yomwe yana mibowo yakulumikidzira pantsi, ndipo adaikha aro zace, mbaliro na mapilare. 19 Mozeji adafuthula nguwo acipswimphira tabernakulo ninga momwe Yahova akhadamuuzira.

20 Patsogolo pace, iye adatenga minyala ya Umboni acikaiikha mu Thungwa, ndipo adaikhambo bzakunyamulira Thungwalo m’mphepete mwace, aciligwanankhira na cakugwanankhirira cace. 21 Mozeji adapitisa Thungwa mu tabernakulo ndipo adaikha kortina pakati, acifunga mbali yomwe ikhana thungwa la Umboni ninga momwe Yahova akhadamuuzira.

22 Patsogolo pace iye adaikha meza mu tendi la mtsonkhano ku mbali ya ku norte ya tabernakuloyo, kunja kwa kortina. 23 Ndipo Mozeji adaikha pau padzulu pa meza pamaso pa Yahova ninga momwe Yahova akhadamuuzira.

24 Iye adaikha cakuikhira kandiyero mu tendi la mtsonkhano patsogolo pa meza, ku suli kwa tabernakulo. 25 Mozeji adagasa makandiyero pamaso pa Yahova ninga momwe Yahova akhadamuuzira.

26 Patsogolo pace iye adaikha guwa la ntsembe la oro mu tendi la mtsonkhano patsogolo pa kortina, 27 kuti ambatenthere bzakununtcirisa ninga momwe Yahova akhadauzira Mozeji.

28 Patsogolo pace iye adaikha kortina pa msuwo wa tabernakulo.

29 Iye adaikha guwa la ntsembe zakucita kutentha pa msuwo wa tabernakulo, yomwe ni tendi la mtsonkhano kuti ambaperekere ntsembe zakucita kutentha na ntsembe za bzinthu bza m’munda ninga momwe Yahova akhadauzira Mozeji.

30 Patsogolo pace, iye adaikha basiya pakati pa tendi la mtsonkhano na guwa la ntsembe, ndipo adaikha madzi m’mwemo kuti ambasambire m’manja na m’minyendo. 31 Mozeji, Aroni na wana wace akhasamba m’manja na m’minyendo na madzi ya m’basiyalo. 32 Iwo akhasamba nthawe zentse pakupita m’tendi la mtsonkhano ayai pomwe akhafendera pafupi na guwa la ntsembe, ninga momwe Yahova akhadauzira Mozeji.

33 Pakumalizira pace iye adamanga litsito m’mphepete mwa tabernakulo na guwa la ntsembe, ndipo adaikha kortina pa msuwo wa litsitolo.

Tenepo Mozeji adamala kucita basa lentse. 34 Mtambo udayamba kumpsinkha tendi la mtsonkhano ndipo ulemerero bwa Yahova budadzala mu tabernakulomo. 35 Mozeji akhakwanisa lini kupita mu tendi la mtsonkhanolo, thangwe mtambo ukhapitiriza kuima padzulu pa tendiro ndipo ulemerero bwa Yahova bukhadadzala mu tabernakulomo.

36 Mtamboyo ukadzusika padzulu pa tabernakuloyo, Ajirayeri akhanyamula misasa yawo acipitiriza na ulendo bwawo, ndipo iwo akhacita bzimwebzi pa ulendo bwawo bwentse. 37 Tsono mtamboyo ukasaya kudzusika, Ajirayeri akhacoka lini pa msasa wawo mpaka pa ntsiku yomwe mtamboyo ukhadzusika. 38 Ntsiku zentse za ulendo bwawo, wana wa Jirayeri akhambawona mtambo wa Yahova padzulu pa tabernakulo masikati, ndipo usiku akhambawona moto padzulu pa tabernakuloyo.