MALIRO
א [Alefi]*
1 Kodi wakhala tani yekha-yekha mzinda omwe ukhadadzala na wanthu?
Kodi iye wakhala tani mamsiwa pomwe akhana wanthu azinji kuposa mitundu inango?
Ule omwe akhali dona pakati pa bzigawo bzinango wakhala kapolo.
ב [Beti]
2 Iye ambalira kwene-kwene usiku ndipo misozi imbayerera m’maputu mwace.
Pa akwende wace wentse, palibe ne na m’bodzi omwe adasala kuti amutsangalaze.
Anzace wentse amuphindukira ndipo akhala anyamadulanthaka wace.
ג [Gimeli]
3 Djuda watengedwa kuyenda ku ukapolo pomwe ali pa matsautso na pa basa la ukapolo bwadzawoneni.
Iye wakhala pakati pa mitundu inango ya wanthu ndipo alibe kugumana mbuto yakupumira.
Wentse omwe akhamuzunza adamugumana pomwe iye akhatsautsika.
ד [Daleta]
4 Miseu yakuyenda ku Ziyoni ikulira thangwe palibe munthu omwe akuyenda ku maphwando.
Misuwo yace yentse yasiyidwa ndipo antsembe wace akubuula.
Madende* yace yakulamba kutsangalazidwa ndipo iye akubonera kwene-kwene.
ה [Hei]
5 Anyamadulanthaka wace ndiwo omwe akumutonga; anyakumuwenga tsapano akucita lini naye thupo.
Pakuti Yahova wamubweresera msunamo thangwe ra kuwanda kwa pikado zace.
Wana wace aphatidwa aciyendesedwa ku ukapolo na nyamadulanthaka wace.
ו [Vav]
6 Ulemerero bwentse bwacoka kwa mwana wacikazi wa Ziyoni.
Nduna zace ziri ninga abawala omwe akusaya mauswa.
Ndipo akufamba wakuneta pamaso pa nyakuwazunza.
ז [Zayini]
7 Mu ntsiku za matsautso yace na zomwe akhasaya pakukhala, Jeruzalemu adakumbukira
Bzinthu bzace bzentse bzabwino bzomwe akhanabzo kale-kale.
Pomwe wanthu wace adaphatidwa na anyamadulanthaka ndipo iye akhalibe nyakumuthandiza,
Anyamadulanthaka wacewo adamuwona, acimuseka thangwe ra kugwa kwace.
ח [Heti]
8 Jeruzalemu wacita pikado ikulu
Ndipopa iye wakhala cinthu cakunyantsa.
Wentse omwe akhamulemekeza adayamba kumuwona ninga cinthu capezi-pezi thangwe adamuwonera.
Iye akubuula ndipo akubisa nkhope yace thangwe ra manyazi.
ט [Teti]
9 Bzakubvala bzace mpsakupswipa.
Iye alibe kukumbukira bzakutsogolo.
Iye wagwa mwakudabwisa ndipo alibe nyakumutsangalaza.
Imwe Yahova, onani kutsautsika kwangu, pakuti nyamadulanthaka wangu akubzikuza.
י [Yodi]
10 Nyamadulanthaka wapamba cuma cace centse,
Pakuti Jeruzalemu wawona mitundu ya wanthu ikupita m’mbuto yace yakucena,
Mitundu yomwe mudailetsa kupita m’gwere lanu.
כ [Kafi]
11 Wanthu wace wentse akubuula, iwo akunyang’ana cakudya.
Iwo apereka bzinthu bzawo bzakufunika kuti apasidwe cakudya, kuti apitirize kukhala na moyo.
Nyang’anisani muwone, imwe Yahova, momwe ndakhalira mkazi* wapezi-pezi.
ל [Lamedi]
12 Imwepo mwentse omwe mukupita na m’njira, kodi bzimwebzi mulibe nabzo basa?
Nyang’anisani muwone!
Kodi kulipo kuwawa komwe kungandendemerane na kuwawa komwe ndatambira,
Kuwawa komwe Yahova wandicitisa kubva pa ntsiku ya ukali bwace bukulu?
מ [Memi]
13 Iye watumiza moto kucokera kudzulu ucidzatentha mafupa yangu yentse.
Iye wamwaza bwazi m’minyendo mwangu ndipo wandingingimiza kubwerera m’mbuyo.
Iye wandicitisa kukhala mkazi wakusiyidwa.
Ndikuduwala ntsiku yentse.
נ [Nuni]
14 Pikado zangu zamangidwa ninga djoki ndipo iye wazimanga.
Zidaikhidwa pa khosi langu ndipo mphanvu zangu zidamala.
Yahova wandipereka m’manja mwa wale omwe ningakwanise lini kuwakunda.
ס [Samekhi]
15 Yahova wathusira kutali acikunda wangu wentse wamphanvu omwe akhali pakati pangu.
Iye wacemeresa thimu la wanthu kuti lipfudze maswaka yangu.
Yahova waponda-ponda dende, mwana wa Djuda, pa mbuto yakupsinyira uva.
ע [Ayini]
16 Ndikulira thangwe ra bzinthu bzimwebzi ndipo misozi ikuyerera m’maso mwangu.
Pakuti wale omwe angadanditsangalaza na kundilimbikisa ali kutali na inepano.
Wana wangu asiyidwa okha-okha pakuti nyamadulanthaka wangu wakunda.
פ [Pe]
17 Ziyoni wafuthula manja yace ndipo alibe nyakumutsangalaza.
Yahova watonga kuti wentse omwe ali pafupi na Djakobo akhale nyamadulanthaka wace.
Jeruzalemu wakhala cinthu cakunyantsa kwa iwo.
צ [Tsade]
18 Yahova ngwakulungama, pakuti ndine omwe ndiribe kubvera malamulo* yace.
Tetekerani wanthu mwentsenemwe ndipo onani kuwawidwa kwangu.
Madende* na alumbwana wangu ayendesedwa ku ukapolo.
ק [Kofi]
19 Ndidacemera akwende wangu, tsono iwo adandicitira bzinthu mwacinyengo.
Antsembe wangu na akulu-akulu wangu afa mu mzinda,
Pomwe iwo akhanyang’ana cakudya kuti akhale na moyo.
ר [Rexi]
20 Imwe Yahova, onani kuti ndiri pa mabvuto makulu.
M’mimba mwangu mukumonya.
Mtima wangu ukundiwawa kwene-kwene pakuti ndapanduka mwakuti bwerani mudzawone.
Kunja xipada ikupha wana wangu ndipo m’nyumba wanthu akufambo.
ש [Xini]
21 Wanthu adabva kubuula kwangu ndipo palibe omwe adanditsangalaza.
Anyamadulanthaka wangu wentse adabva bza tsoka langu.
Iwo akomedwa thangwe ndimwe omwe mwacitisa bzimwebzi.
Tsono ntsiku yomwe imwepo mudalewa in’dzafika, ntsiku yomwe iwo an’dzakhala ninga ine.
ת [Tavu]
22 Kuipa kwawo kwentse kuwonekere pamaso panu ndipo muwalange kwene-kwene,
Muwalange kwene-kwene ninga momwe mudandilangira thangwe ra pikado zangu zentse.
Pakuti kubuula kwangu n’kukulu ndipo mtima wangu ukuduwala.
א [Alefi]
2 Yahova wampsinkha mwana wacikazi wa Ziyoni na ukali bwace ninga momwe umbacitira mtambo.
Iye wathusa kudeka kwa Jirayeri kucokera kudzulu mpaka pantsi.
Pa ntsiku ya ukali bwace, iye alibe kukumbukira cakupondera nzayo zace.
ב [Beti]
2 Yahova wapfudza mbuto zentse zakukhala za Djakobo.
Na ukali bwace iye adapfudza mbuto zakukhotcerereka za mwana wacikazi wa Djuda.
Iye wagwesera pantsi umambo na nduna zace mwakucitisa manyazi.
ג [Gimeli]
3 Na ukali bwace bukulu wacitisa Jirayeri kukhala alibe mphanvu.*
Pomwe anyamadulanthaka wathu akhafendera, iye alibe kutithandiza.
Ukali bwace bwapitiriza kugakira Djakobo ninga moto omwe watentha bzentse bzomwe bziri pafupi.
ד [Daleta]
4 Iye watamula* uta bwace ninga nyamadulanthaka; boko lace lamadidi lakonzeka kumenya nafe nkhondo ninga nyamadulanthaka.
Iye adapitiriza kupha wanthu wentse omwe akhatidekera m’maso mwathu.
Iye wakhuthula ukali bwace ninga moto pa tendi la mwana wacikazi wa Ziyoni.
ה [He]
5 Yahova wakhala ninga nyamadulanthaka,
Iye wakhudyula Jirayeri.
Iye wakhudyula ntsanza zace zentse,
Iye wapfudza mbuto zace zentse zakukhotcerereka.
Ndipo wacitisa kuti kulira na kusunama kuwande kwa mwana wacikazi wa Djuda.
ו [Vav]
6 Iye wagwesa tendi lace ninga ntsaka ya m’munda.
Iye wamalisa* maphwando.
Yahova wacitisa kuti maphwando na ntsiku ya sabudu bziyebwedwe mu Ziyoni,
Ndipo na ukali bwace bukulu iye akulemekeza lini mambo na wantsembe.
ז [Zayini]
7 Yahova walamba guwa lace la ntsembe;
Iye wanyoza mbuto yace yakucena.
Iye wapereka maparede ya ntsanza zakulimba za Ziyoni m’manja mwa anyamadulanthaka wace.
Iwo akuwa m’nyumba ya Yahova ninga pa ntsiku ya phwando.
ח [Heti]
8 Yahova wakonza bza kupfudza muro* wa mwana wacikazi wa Ziyoni.
Iye wafuthula cingwe cakupimira.
Iye alibe kubweza boko lace kuti lileke kupfudza.*
Iye wacitisa muro na mitunthu kulira,
Ndipo bzentse pabodzi wabzicitisa kukhala bzakusaya mphanvu.
ט [Teti]
9 Misuwo yace yagwa pantsi.
Iye wapfudza, acigwata-gwata mipiringidzo yace.
Mambo wace na nduna zace ali pakati pa mitundu ya wanthu.
Kulibe lamulo* ndipo napo apolofeta wace akutambira lini masomphenya kucokera kwa Yahova.
י [Yodi]
10 Akulu-akulu wa mwana wacikazi wa Ziyoni akhala pantsi adanyamala.
Iwo aikha pfumbi mu msolo mwawo ndipo abvala magundiri.
Madende ya ku Jeruzalemu yatsulimisa misolo yawo mpaka pantsi.
כ [Kafi]
11 Maso yangu yaneta na kulira kwene-kwene.
M’mimba mwangu mukumonya.
Ciropa cangu cakhuthulidwa pantsi thangwe ra kugwa kwa mwana wacikazi* wa wanthu wangu,
Thangwe ra tuwana na tumatcece tomwe tukukomoka m’miseu ya mu mzinda.
ל [Lamedi]
12 Iwo akubvunza azimai wawo kuti: “Kodi cakudya na vinyu bziri kuponi?”
Pomwe akukomoka ninga munthu wakupwetekeka m’miseu ya mu mzinda,
Na pomwe iwo* akumalizika m’manja mwa azimai wawo.
מ [Memi]
13 Kodi ningaphatise basa ciyani ninga umboni,
Ayai kodi ningakundendemezere na ciyani iwe mwana wacikazi wa Jeruzalemu?
Kodi ningakundendemezere na ciyani kuti ndikutsangalaze iwe dende, mwana wa Ziyoni?
Pakuti kupfudzidwa kwako n’kukulu ninga nyanza. Mbani omwe angakupoze?
נ [Nuni]
14 Masomphenya yomwe apolofeta wako adawona, yakhali yakunama na yakusaya basa,
Ndipo iwo alibe kuzimbula bzakuphonya bzako kuti uleke kuyendesedwa ku ukapolo,
Koma adapitiriza kumbakuuza masomphenya yakunama na yakupumpsa.
ס [Samekhi]
15 Wentse omwe an’dzapita mu njira pafupi na iwepo, an’dzamenya m’manja mwakunyoza.
Iwo an’dzaliza muluzi mwakudabwa, acikwetedza msolo thangwe ra mwana wacikazi wa Jeruzalemu, acilewa kuti:
“Kodi ngumweyu mzinda omwe iwo akhalewa kuti ngwakudeka kwene-kwene ndipo umbakondwesa wanthu wentse wa pa dziko la pantsi?”
פ [Pe]
16 Anyamadulanthaka wako wentse afungula miromo yawo acikunyoza.
Iwo akuimba muluzi na kukeketa mano acimbalewa kuti: “Ifepano tamupfudza.
Imweyi ni ntsiku yomwe tikhaidikhirira! Yafikadi ndipo tikuiwona!”
ע [Ayini]
17 Yahova wacita bzomwe akhafuna; mafala yace yakwanisika.
Mafala yace yomwe akhadayalewa kale-kale.
Iye wakupfudza mwakusaya ntsisi.
Iye wacitisa nyamadulanthaka wako kukomedwa thangwe ra bzomwe bzakucitikira; iye wathumizira mphanvu* za anyamadulanthaka wako.
צ [Tsade]
18 Iwe mwana wacikazi wa Ziyoni,* wanthu wako akulirira Yahova.
Misozi iyerere ninga mkulo usiku na masikati.
Leka kupuma ndipo diso* lako lipitirize kulira.
ק [Kofi]
19 Lamuka! Lira mwakukuwa usiku pa nthawe yakuyamba ya ulindiri.
Khuthula mtima wako ninga madzi pamaso pa Yahova.
Futhula manja yako thangwe ra moyo wa wana wako,
Omwe akukomoka na njala m’mphambano za m’miseu yentse.
ר [Rexi]
20 Imwe Yahova, onani wanthu wanu omwe mwawalanga mwaukali.
Kodi azimai an’funika kupitiriza kudya wana* wawo wathanzi omwe adawabereka?
Ayai kodi antsembe na apolofeta an’funika kuphedwa pa mbuto yakucena ya Yahova?
ש [Xini]
21 Alumbwana na acikulire afa, ndipo mitembo yawo iri pantsi m’miseu.
Madende yangu* na alumbwana wangu aphedwa na xipada.
Mwawapha pa ntsiku ya ukali bwanu ndipo mwawapha mwakusaya ntsisi.
ת [Tavu]
22 Mwacemera bzinthu bzakupasa mantha kucokera ku mbali zentse ninga kuti mukucemera wanthu pa ntsiku ya phwando.
Pa ntsiku ya ukali bwa Yahova, palibe omwe adathawa ne kupulumuka.
Wentse omwe ndidawabala na kuwalera adaphedwa na nyamadulanthaka wangu.
א [Alefi]
3 Ine ndine munthu omwe ndawona mabvuto thangwe ra mpsimbo ya ukali bwace.
2 Iye wandithamangisa ndipo wandicitisa kuti ndifambe pa mdima, sikuti pa ceza.
3 Kulewa cadidi, iye ambandimenya na boko lace mwakubwereza-bwereza ntsiku yentse.
ב [Beti]
4 Iye wacitisa kuti thupi langu na khanda langu bzidzongeke,
Iye watcola mafupa yangu.
5 Iye wandizungulira ndipo wacitisa kuti veneno yakuwawa* na mabvuto bzindizungulire.
6 Iye wandingingimiza kukhala m’mbuto za mdima ninga wanthu omwe adafa kale-kale.
ג [Gimeli]
8 Pomwe ndidacemera na kulira kukumbira thandizo, iye adalamba* kutetekera mpembo wangu.
9 Wafunga njira zangu na minyala yakugoba,
wacitisa njira zangu kukhala zakunesa kufamba.
ד [Daleta]
10 Iye wandibisalikira ninga urso* kuti andiphate, wandibisalikira ninga mphondolo.
11 Iye wandicosa pa njira zangu ndipo wandibwedza-bwedza;*
Iye wacitisa kuti ndikhale wakusaya cinthu.
12 Watamula* uta bwace ndipo wandicitisa kukhala cinthu cakulasira misewe yace.
ה [He]
13 Walasa impso zangu na misewe* yakucokera m’kabudu kace.
14 Ndakhala cinthu cakusekesa kwa wanthu wentse ndipo iwo ambandiimba m’nyimbo zawo, acimbandinyoza ntsiku zentse.
15 Iye wadzaza mimba yangu na bzinthu bzakuwawa ndipo wandikhutisa na msapani.*
ו [Vav]
16 Iye wagulula mano yangu na minyala
ndipo wandibvumbvunyiza pa dotha.
17 Imwepo mwandicosera mtendere, mwakuti ndayebwa bzinthu bzabwino.
18 Tenepo nimbalewa kuti: “Ulemerero bwangu na cidikhiro cangu kwa Yahova bzamala.”
ז [Zayini]
19 Kumbukirani kuti ndikubonera ndipo ndiribe pakukhala. Kumbukiranimbo kuti nimbadya msapani na miti ya veneno yakuwawa.*
20 Kulewa cadidi, imwepo mun’dzandikumbukira ndipo mun’dzabwera kuti mudzandithandize.
21 Ndikukumbukira bzimwebzi mu mtima mwangu, ndipopa nin’dzadikhirira mwakupirira.
ח [Heti]
22 Tiribe kupfudzidwa tentse thangwe ra lufoyi lacadidi la Yahova,
Pakuti ntsisi zace zimbamala lini.
23 Ntsisizo zimbakhala zipsa macibese yali-yentse ndipo ndimwe wakukhulupirika kwene-kwene.
24 Ine ndalewa kuti: “Yahova ni utaka bwangu, ndipopa nin’dzamudikhirira mwakukhulupirika.”
ט [Teti]
25 Yahova ngwabwino kwa wale omwe akumudikhirira, kwa munthu omwe akupitiriza kumulinga.
26 Bziri bwino kudikhirira cipulumuso ca Yahova mwakupirira.
27 Bziri bwino kuti munthu atakule djoki pomwe akali tswaka.
י [Yodi]
28 Mulungu akamuikha djoki, iye akhale payekha acikhalambo adanyamala.
29 Iye akotame mpaka nkhope yace kukhuya pantsi; pinango pangakhale na cidikhiro.
30 Iye apereke phutu lace kwa munthu omwe akumumenya; atukwanidwe kwene-kwene.
כ [Kafi]
31 Yahova an’dzatisiya lini mpaka kale-kale.
32 Napo kuti iye waticitisa kuti tisuname, iye an’dzaticitirambo ntsisi thangwe ra lufoyi lace lacadidi lomwe ndikulu kwene-kwene.
33 Pakuti mu mtima mwace ambafuna lini kuboneresa ayai kusunamisa wana wa wanthu.
ל [Lamedi]
34 Mulungu ambabvuma lini kuti wanthu ambapundize anyam’kawoko wentse pa dziko la pantsi,
35 Ambalamba kucitira cirungamo munthu pamaso pa Wapadzulu Kwene-kwene,
36 Na kucitira munthu bzacinyengo pa mulandu wace.
Yahova ambakomedwa lini na bzinthu bzimwebzi.
מ [Memi]
37 Kodi mbani omwe angalewe bzinthu n’kucitika penu Yahova akufuna lini kuti bzimwebzo bzicitike?
38 Pakuti pamulomo pa Wapadzulu Kwene-kwene,
Pambacoka lini bzakuipa na bzinthu bzabwino pa nthawe ibodzi-bodziyo.
39 Thangwe ranyi munthu wamoyo akudandaula pa bzomwe akugumana nabzo thangwe ra pikado zace?
נ [Nuni]
40 Mbatikumbukireni bwino-bwino bzomwe tikucita pa moyo wathu ndipo tibwerere kwa Yahova.
41 Mbatikumbireni Mulungu wakudzulu na mtima wathu wentse na kulamusa manja yathu ticilewa kuti:
42 “Taphonya ticikupandukirani ndipo imwepo mulibe kutilekerera.
ס [Samekhi]
43 Mwatiphingiza na ukali bwanu kuti tileke kukufikirani;
Imwepo mwatitewera ndipo mwatipha mwakusaya ntsisi.
44 Mwakonza mtambo wakuphingiza, kuti mpembo wathu uleke kupita ucifika kuna imwepo.
45 Mwatisandusa bzinthu bzakupasa nyantsi na lixo pakati pa mitundu ya wanthu.
פ [Pe]
46 Anyamadulanthaka wathu wentse afungula miromo yawo acitinyoza.
47 Tikundokhala na mantha nthawe zentse ndipo tsoka latigwera, tapfudzidwa ndipo takhala matere.
48 Maso yangu yakucoka misozi ninga madzi yomwe yakuyerera thangwe ra kupfudzidwa kwa mwana wacikazi wa wanthu wangu.
ע [Ayini]
49 Maso yangu yan’dzapitiriza kucoka misozi,
50 Mpaka Yahova adzanyang’anise pantsi acitiwona kucokera kudzulu.
51 Maso yangu yakundicitisa kuti nditsautsike ndikawona bzomwe bzacitikira wana wacikazi wa mu mzinda mwangu.
צ [Tsade]
52 Anyamadulanthaka akundinyang’ana ninga mbalame mwakusaya mathangwe.
53 Iwo ayezera kundipha mwa kundithusa m’dindi ndipo akhandiboma na minyala.
54 Madzi yadandimiza ndipo ndidalewa kuti: “Bzamalira pano!”
ק [Kofi]
55 Ndidacemera dzina lanu, imwe Yahova, pomwe ndikhali m’dindi lakuzika.
56 Tetekerani fala langu, lekani kufunga makutu yanu pomwe ndikulira kukumbira thandizo na kutsangalazidwa.
57 Pa ntsiku yomwe ndidakucemerani, imwepo mudandifenderera ndipo mudalewa kuti: “Leka kugopa.”
ר [Rexi]
58 Imwe Yahova, mwandikhotcerera ku nyumba ya mphala ndipo mwalombola moyo wangu.
59 Imwe Yahova, mwawona kusaya cirungamo komwe ndacitiridwa; ndaphata minyendo, ndicitireni cirungamo.
60 Mwawona kundibwezera kwentse komwe andicitira na ciwembo centse comwe andikonzera.
ש [Sini] ayai [Xini]
61 Imwe Yahova, mwabva mafala yawo yakunyoza, mwawona bziwembo bzawo bzentse bzomwe andikonzera.
62 Mwabva mafala yakucokera pa mulomo pa anyakunditsutsa, mwabvambo bzomwe akundilewa mwakazewe-zewe ntsiku yentse.
63 Onani bzomwe akucita, pomwe an’khala na pomwe an’muka ambakhala acindiimba m’nyimbo zawo.
ת [Tavu]
64 Imwe Yahova, mun’dzawabwezera mwakubverana na bzicito bzawo.
65 Mun’dzaumisa mitima yawo ndipo bzimwebzi ni themberero lawo.
66 Imwe Yahova, mun’dzawatewera na ukali bwanu ndipo mun’dzawapfudza kuti aleke kugumanika pomwe pa dziko la pantsi.
א [Alefi]
4 Oro yomwe ikhayetima bwino, ikuyetima lini pomwe.
Minyala yakupambulika yamwazika m’mphambano zentse za m’miseu.
ב [Beti]
2 Wana wacimuna wakufunika wa Ziyoni, akhali wakupambulika ninga oro yabwino kwene-kwene.
Koma tsapano akuwonedwa ninga jaro za dongo.
Basa la manja ya nyakuumba bzinthu bza dongo.
ג [Gimeli]
3 Napo mphumphi zimbamamisa wana wace,
Koma mwana wacikazi wa wanthu wangu akhala wakuipa ninga nthiwatiwa m’dambo.
ד [Daleta]
4 Lirime la mwana wakumama laphatirira m’malaka-laka thangwe ra nyota.
Wana akukumbira cakudya, tsono palibe omwe akuwapasa.
ה [He]
5 Wale omwe akhadya bzakudya bzabwino ali kwankhwa m’miseu thangwe ra njala.*
Wale omwe akula acimbabvala bzakubvala bzabwino bzifuira, agona pa mudu wa dotha.
ו [Vav]
6 Nyathwa* yomwe mwana wacikazi wa wanthu wangu atambira, njikulu kwene-kwene kuposa nyathwa yomwe mzinda wa Sodoma udatambira thangwe ra pikado zace.
Mzinda umweyu udapfudzidwa kabodzi na kabodzi ndipo palibe boko lomwe lidawuthandiza.
ז [Zayini]
7 Anaziri wace akhali wakucena kuposa pfulere, wakucena kuposa mkaka.
Iwo akhadafuira kuposa minyala ya korali* ndipo akhadayetima ninga minyala ya safira.
ח [Heti]
8 Iwo adayamba kuwoneka wakupswipa kuposa masimbe,
Ndipo wanthu akhakwanisa lini kuwazindikira m’miseu.
Khanda lawo lidaphatirira ku mafupa ndipo liri gwaa ninga nkhuni.
ט [Teti]
9 Omwe adaphedwa na xipada ali bwino kuposa omwe adafa na njala.
Omwe adawofoka acifa thangwe ra kusaya cakudya ca m’munda, omwe adafa ninga kuti apfikidwa na xipada.
י [Yodi]
10 Manja ya azikazi wantsisi, yaphika wana wawo caiwo.
Iwo adakhala cakudya cawo* pa nthawe ya kupfudzidwa kwa mwana wacikazi wa wanthu wangu.
כ [Kafi]
11 Yahova walatiza ukali bwace,
Wakhuthula ukali bwace bwakugaka.
Iye wagasa moto mu Ziyoni omwe wanyekesa aliserse zace.
ל [Lamedi]
12 Amambo wa pa dziko la pantsi na wanthu wentse akhakhulupira lini kuti
Anyamadulanthaka angadadzapita na pa bzipata bza Jeruzalemu.
מ [Memi]
13 Bzimwebzi bzidacitika thangwe ra pikado za apolofeta wace na antsembe wace,
Omwe adacosa mulopa wa wanthu wakulungama pakati pace.
נ [Nuni]
14 Iwo akufamba-famba m’miseu ninga azimola.
Mulopa wawacitisa kukhala wakupswipa,
Mwakuti palibe omwe angakhuye bzakubvala bzawo.
ס [Samekhi]
15 Wanthu akuwakuwira kuti: “Cokani! Wanthu wakupswipa. Cokani! Cokani! Lekani kutikhuya.”
Pakuti iwo alibe pakukhala ndipo akundofamba-famba.
Wanthu wa mitundu inango akulewa kuti: “Tiniwabvumiza lini kuti iwo akhale nafe kuno.*
פ [Pe]
16 Yahova awabalalisa;
Iye an’dzakomedwa lini nawo pomwe.
Wanthu an’dzalemekeza lini pomwe antsembe ndipo an’dzabvera lini ntsisi akulu.”
ע [Ayini]
17 Napo tsapano, maso yathu yaneta kunyang’ana thandizo papezi.
Tidanyang’ana-nyang’ana thandizo kwa mtundu omwe ungadatipulumusa lini.
צ [Tsade]
18 Anyamadulanthaka wanthu akhatifambira m’mbuyo kuli-kwentse komwe tikhayenda,
Mwakuti tikhakwanisa lini kufamba wakutsudzuka m’miseu.
Cimaliziro cathu cafendera; ntsiku zathu zamala pakuti cimaliziro cathu cafika.
ק [Kofi]
19 Anyamadulanthaka wathuwo akhathamanga kwene-kwene kuposa mphungu kudzulu.
Iwo adatithamangisa m’mapiri; adatibisalikira m’dambo kuti atiphate.
ר [Rexi]
20 Nyakudzozedwa wa Yahova, omwe ni mphuwe yomwe imbacoka m’mphuno mwathu, waphatidwa m’dindi lawo likulu,
Pakulewa bza iye, ifepano tikhalewa kuti: “Tin’dzakhala mu mthunzi mwace pakati pa mitundu ya wanthu.”
ש [Sini]
21 Kondwa iwe mwana wacikazi wa Edomu omwe umbakhala ku dziko la Uzi.
Tsono iwepo, kopo ya tsoka in’dzakufikirambo. Un’dzaledzera ndipo un’dzakhundula ucikhala pezi.
ת [Tavu]
22 Iwe mwana wacikazi wa Ziyoni, nyathwa yomwe watambira thangwe ra pikado zako yafika kuphampha.
Mulungu an’dzakuyendesa lini pomwe ku ukapolo.
Tsono iye an’dzakumbukira bzakuphonya bzako, iwe mwana wacikazi wa Edomu.
Ndipo pikado zako an’dzaziikha padeca.
5 Imwe Yahova, kumbukirani bzomwe bzidaticitikira.
Tinyang’aniseni, muciwona momwe tikucitira manyazi.
2 Utaka bwathu bwaperekedwa kwa wanthu wacirendo ndipo nyumba zathu zaperekedwa kwa wanthu omwe acokera ku dziko linango.
3 Ifepano takhala wana wakusaya pai ndipo azimai wathu akhala ninga amamsiwa.
4 Tin’funika kupagali kuti timwe madzi yathu caiyo na kugula nkhuni zomwe n’zathu.
5 Anyamadulanthaka wathu asala pang’ono kutiphata;
Ifepano taneta ndipo tikusaya pakupumira.
6 Tikuthemba Edjipito na Asiriya kuti tigumane cakudya cakukwanira.
7 Makolo yathu yakale yomwe yadaphonya yadafa, tsono ifepano ndife omwe tikubonera na bzakuphonya bzawobzo.
8 Tsapano tikutongedwa na anyabasa ndipo palibe omwe akutipulumusa m’manja mwawo.
9 Kuti tigumane cakudya, timbaikha moyo wathu pangozi thangwe ra wanthu omwe ana maxipada m’dambo.
10 Khanda lathu lapsa ninga forno thangwe ra kuwawa kwa njala.
11 Apasisa manyazi* azikazi wa mu Ziyoni na madende ya m’mizinda ya Djuda.
12 Nduna zathu zamanikidwa mwa kumangiriridwa boko libodzi ndipo akulu-akulu akulemekezedwa lini pomwe na wanthu.
13 Alumbwana atakula mwala wakupeyera wa m’manja ndipo tuwalumbwana tukudzedzereka na mitolo ya nkhuni.
14 Palibe pomwe akulu-akulu pa cipata ca mzinda ndipo alumbwana akuimba lini pomwe nyimbo.
15 Cikondweso camala mu mtima mwathu ndipo kubzina kwathu kwasanduka msunamo.
16 Korowa yagwa mu msolo mwathu. Tsoka kwa ife thangwe tacita pikado.
17 Thangwe ra bzimwebzi, mtima wathu waduwala
Ndipo maso yathu yacita khungu* thangwe ra bzinthu bzimwebzi.
18 Pakuti Phiri la Ziyoni lasanduka matere, tsapano nkhandwe zikufamba-famba m’mwemo.
19 Koma imwe Yahova, mun’dzakhala pa mpando wanu wa umambo mpaka kale-kale.
Mpando wanuyo un’dzakhala ku mibadwo na mibadwo.
20 Thangwe ranyi mwatiyebwa mpaka kale-kale na kutisiya kwa nthawe itali?
21 Imwe Yahova, tibwezereni kwa imwepo ndipo ifepano tin’bwerera kwa imwepo mwakamfulumize.
Citisani kuti bzinthu bzikhale pomwe ninga momwe bzikhaliri pakuyamba.
22 Tsono imwepo mwatilambiratu ndipo mukadakalipa nafe kwene-kwene.
Kapitulo 1-4 ni nyimbo za nkhawa zomwe zidanembedwa mwakuphatisa basa abesedariyo wa Cihebereu.
Ayai, “atsikana wace.”
Mkazi umweyu akuimira Jeruzalemu.
Mafala yace caiyo: “mulomo.”
Ayai, “atsikana.”
Mafala yace caiyo: “manyanga yentse.”
Mafala yace caiyo: “waponda.”
Ayai, “wapfudza.”
Ayai, “litsito la.”
Mafala yace caiyo: “kukhudyula.”
Ayai, “malango.”
Yamweya ni mafala manango yomwe pinango yakufuna kulewa bza kubvera munthu ntsisi.
Ayai, “moyo wawo ukumalizika.”
Mafala yace caiyo: “nyanga.”
Mafala yace caiyo: “muro wa mwana wacikazi wa Ziyoni.”
Mafala yace caiyo: “mwana wacikazi wa diso lako.”
Ayai, “bzisapo.”
Ayai, “atsikana wangu.”
Ayai, “ululu bwakuwawa.”
Ayai, “litsito.”
Ayai, “kobre.”
Ayai, “adaphingiza.”
Cimweci n’cirombo caukali kwene-kwene.
Ayai pinango, “wandicitisa kukhala ninga mbuto yakusaya kulimidwa.”
Mafala yace caiyo: “Waponda.”
Mafala yace caiyo: “wana.”
Umweyu ni muliwo omwe umbawawa ninga luni.
Ayai, “ululu bwakuwawa.”
Mafala yace caiyo: “alibe cinthu.”
Mafala yace caiyo: “kuphonya.”
Ni minyala yakufunika yomwe imbakhala m’nyanza.
Ayai, “cakudya cawo ca msunamo.”
Ayai, “akhale kuno ninga alendo.”
Ayai, “Apswitha.”
Ayai, “yacita ndima.”