EZEKIYELI

1 Mu gole laci 30, mwezi wacinai, pa ntsiku yacixanu ya mweziyo, pomwe ndikhali pabodzi na wanthu omwe akhali ku ukapolo pafupi na mkulo wa Kebari, kudzulu kudafunguka ndipo ndidayamba kuwona masomphenya ya Mulungu. 2 Pa ntsiku yacixanu ya mweziyo, mu gole lacixanu kucokera pomwe mambo Jewoyakini adayendesedwa ku ukapolo, 3 Ezekiyeli,* mwana wa Buzi omwe akhali wantsembe, adauzidwa mafala na Yahova pomwe akhali pafupi na mkulo wa Kebari mu dziko la Akalideya. Kumweko boko la Yahova lidamufikira.

4 M’masomphenyamo ndidawona conzi camphanvu cakucokera ku norte, ndipo ndidawonambo mtambo ukulu na mpheni ndipo mtamboyo ukhadazunguliridwa na ceza. Pakati pa motoyo pakhana cinthu comwe cikhawoneka ninga simbi.* 5 Ndipo ndidawonambo ninga anjo anai* ndipo anjowo akhana mawonekedwe ninga ya wanthu. 6 Anjo ali-wentse akhana nkhope zinai na maphaphidwe manai. 7 Nzayo zawo zikhafunyika lini, ndipo kuntsi kwa nzayo zawozo kukhali ninga kwa mphulu, ndipo zikhayetima ninga kobre* wakupukutidwa bwino. 8 Kuntsi kwa maphaphidwe yawo kukhana manja ya wanthu m’mbali zentse zinai, ndipo iwo akhana nkhope na maphaphidwe. 9 Maphaphidwe yawoyo yakhakhuyana. Akambafamba akhazungunuka lini; ali-wentse akhambandoyenda kutsogolo.

10 Ndipo nkhope zawo zikhana mawonekedwe aya: Anjo anaiwa akhana nkhope ya munthu, nkhope ya mphondolo kumadidi, nkhope ya ng’ombe kumadzere na nkhope ya mphungu. 11 Umu ni momwe nkhope zawo zikhaliri. Maphaphidwe yawo akhadayafuthulira m’dzaulu. Anjo ali-wentse akhana maphaphidwe mawiri yomwe yakhakhuyana, ndipo manango mawiri yakhampsinkha mathupi yawo.

12 Ali-wentse akhambandoyenda kutsogolo, kuli-kwentse komwe mzimu ukhafuna kuti ayende. Akambafamba, akhazungunuka lini. 13 Anjowo akhawoneka ninga masimbe ya moto, ndipo pakati pawo pakhana cinthu comwe cikhawoneka ninga mibvuniko yomwe ikhayenda uku na uku. Ndipo pamotopo pakhacoka mpheni. 14 Anjowo akhambafamba uku na uku, ndipo akambafamba akhawoneka ninga mpheni.

15 Pomwe ndikhanyang’anisisa anjowo, ndidawona roda lomwe likhali pantsi pafupi na anjo omwe akhana nkhope zinaiwo. 16 Mawonekedwe ya marodayo yakhayetima ninga mwala wa krizolito, ndipo maroda manaiyo yakhali yakundendemerana. Marodayo yakhawoneka ninga kuti roda libodzi liri mkati mwa linzace.* 17 Marodayo yakafamba, yakhakwanisa kuyenda ku mbali zentse zinai mwakusaya kugonyola pakufambapo. 18 Maroda yawo yakhali matali kwene-kwene mwakuti yakhadabwisa, ndipo maroda ya anjo wentse anai yakhadadzala na maso. 19 Anjowo akambafamba, marodayo yakhafambambo ndipo anjowo akambakwira, marodayo yakhakwirambo. 20 Iwo akhambayenda komwe mzimu ukhawatsogolera, ndipo akhayenda komwe mzimuyo ukhafuna kuti ayende. Ndipo nthawe zentse pomwe anjowo akhakwira, marodayo yakhakwirambo, pakuti mzimu omwe ukhatsogolera anjowo ukhalimbo m’marodamo. 21 Pomwe anjowo akhafamba, marodayo yakhafambambo; akaima, marodayo yakhaimambo; ndipo nthawe zentse pomwe anjowo akhakwira, marodayo yakhakwirambo, pakuti mzimu omwe ukhatsogolera anjowo ukhalimbo m’marodamo.

22 Pa msolo pa anjowo pakhana cinthu comwe cikhawoneka ninga mtambo ndipo cikhayetima ninga jelo ndipo cikhali cakudabwisa. 23 Pantsi pa mtamboyo, maphaphidwe ya anjowo yakhadafuthuka ndipo phaphidwe liri-lentse likhakhuyana na la anjo munango. Anjo ali-wentse akhana maphaphidwe mawiri yomwe yakhampsinkha mbali ibodzi ya thupi lace ndipo manango mawiri yakhampsinkha mbali inangoyo. 24 Pomwe ndidabva baludya la maphaphidwe yawo, likhali ninga kuunga kwa madzi yamphanvu, ninga Fala la Wamphanvu-zentse. Pomwe iwo akhafamba, baludyalo likhabveka ninga mdjintci wa acikunda. Ndipo akaima, akhangwesa maphaphidwe yawoyo.

25 Padzaulu pa mtambo omwe ukhali padzaulu pa misolo yawo pakhabveka mafala. (Akaima, akhagwesa maphaphidwe yawoyo.) 26 Pa mtambo omwe ukhali pamisolo yawoyo pakhana cinthu cakundendemerana na mwala wa safira, comwe cikhawoneka ninga mpando wa umambo. Pa mpando wa umambopo pakhadakhala cinthu comwe cikhawoneka ninga munthu. 27 Ndidawonambo cinthu cinango ninga simbi yakuyetima, comwe cinkhawoneka ninga kuti mkati mwace mukhagaka moto. Ndipo kucokera m’ciuno kuyenda kudzulu na kucokera m’ciunomo kuyenda pantsi, munthuyo akhawoneka ninga moto. Ndipo pa mbuto pomwe pakhana munthuyo pakhana ceza 28 ninga ca citaleza,* comwe cimbawoneka mu mtambo pa ntsiku ya nvula yamphanvu. Cimweci ni ceza comwe cikhawoneka pa mbutopo. Cikhawoneka ninga ulemerero bwa Yahova. Pomwe ndidawona bzimwebzi, ndidagodama ndicitsulimisa mkhope yangu mpaka pantsi. Ndipo ndidayamba kubva mafala ya munthu munango akulewalewa.

2 Patsogolo pace iye adandiuza kuti: “Iwe mwana wa munthu,* lamuka kuti ndilewelewe nawe.” 2 Pomwe iye adalewalewa nande, mzimu wa Mulungu udapita mwa ine ucindicitisa kuti ndiime kuti nditetekere Ule omwe akhalewalewa nandeyo.

3 Iye adapitiriza kundiuza kuti: “Iwe mwana wa munthu, nin’kutumiza kwa Ajirayeri, mitundu yakupanduka yomwe idandipandukira. Iwo na makolo yawo ambandipandukira mpaka lero. 4 Ndikukutumiza kwa wana omwe ana makiriyado na omwe ana makani, ndipo ukawauze kuti: ‘Ibzi ni bzomwe Yahova Mbuya Mkululetu walewa.’ 5 Penu an’kabva ayai ne, an’dzadziwa kuti pakati pawo pakhana mprofeta, pakuti iwo ni nyumba yakupanduka.

6 “Tsono iwe mwana wa munthu, leka kuwagopa ndipo leka kucita mantha na mafala yawo, napo wazunguliridwa na minga ndipo ukukhala pakati pa mphiriri.* Leka kugopa mafala yawo, ndipo leka kucita mantha na nkhope zawo, pakuti iwo ni nyumba yakupanduka. 7 Ukawauze mafala yanguya, bziribe basa penu an’kabva ayai ne, pakuti iwo ni wanthu wakupanduka.

8 “Tsono iwe mwana wa munthu, tetekera bzomwe nin’kuuza. Leka kupanduka ninga nyumba yakupandukayi. Fungula mulomo ndipo dyaya bzomwe nin’kupasa.”

9 Pomwe ndidanyang’anisa, ndidawona munthu akundifuthulira boko ndipo bokolo likhadaphatirira mpukutu wakunembedwa.* 10 Iye adandifuthulira mpukutuyo ndipo ukhadanembedwa mbali zentse. Ndipo mafala yomwe yakhadanembedwa mu mpukutuyo, yangadacitisa wanthu kulira na kudandaula.

3 Tenepo iye adandiuza kuti: “Iwe mwana wa munthu, dyaya bzomwe bziri patsogolo pakobzi.* Dyaya mpukutuyu, ndipo ukamala uyende ukalewelewe na nyumba ya Jirayeri.”

2 Ndidafungula mulomo ndipo iye adandipasa mpukutuyo kuti ndidye. 3 Iye adandiuza pomwe kuti: “Iwe mwana wa munthu, dyaya mpukutu omwe ndikukupasayu ndipo ukhute.” Ndidayamba kudya mpukutuyo ndipo ukhatapira ninga uci.

4 Iye adandiuza kuti: “Iwe mwana wa munthu, pita pakati pa nyumba ya Jirayeri ndipo uwauze mafala yangu. 5 Pakuti iwepo ukutumidwa lini kwa wanthu omwe ambalewalewa cirewedwe cakunesa kubva ayai cacirendo, koma ukutumidwa kwa wa m’nyumba ya Jirayeri. 6 Iwepo ukutumizidwa lini kwa mitundu mizinji ya wanthu omwe ambalewalewa cirewedwe cakunesa kubva ayai cacirendo, omwe mafala yawo ungayabvesese lini. Inepano ningadakutumiza kwa iwo, iwo angadakutetekera. 7 Tsono Ajirayeri an’kakutetekera lini, thangwe iwo an’funa lini kundibvera. Ajirayeri wentse adauma msolo ndipo ana makani. 8 Tsono ndacitisa nkhope yako kukhala yakulimba ninga nkhope zawo, ndipo ndacitisambo mkuma wako kukhala wakulimba ninga mikuma yawo. 9 Ndacitisa mkuma wako kukhala ninga diyamante yakulimba kwene-kwene kuposa mwala. Leka kuwagopa ndipo leka kucita mantha na nkhope zawo, pakuti iwo ni nyumba yakupanduka.”

10 Iye adapitiriza kundiuza kuti: “Iwe mwana wa munthu, bvuma mu mtima mwako ndipo tetekera mafala yentse yomwe ninkuuza. 11 Ndoko pakati pa wanthu* omwe aphatidwa ku ukapolo, ndipo ukalewelewe nawo. Napo iwo akabve ayai ne, ukawauze kuti: ‘Bzimwebzi ndibzo bzomwe Yahova Mbuya Mkululetu walewa.’”

12 Tenepo mzimu* udanditenga ndipo ndidabva mafala yamphanvu m’mbuyo mwangu ninga kugunda yomwe yakhati: “Ulemerero bwa Yahova butumbizike pa mbuto yace.” 13 Ndidabvambo baludya la maphaphidwe ya bzakulengedwa bzamoyo yomwe yakhakhuyana-khuyana na baludya la maroda yomwe yakhali kumbali kwa bzakulengedwabzo na kugunda kukulu. 14 Mzimuyo udandilamusa ucindicosa pamwepo, ndipo inepano ndidayenda ndiri wakusunama na wakukalipa mu mtima. Ndipo ndidabva mphanvu ya Yahova ikuphata basa kwene-kwene mwa inepano. 15 Tenepo ndidayenda kwa wanthu omwe adaphatidwa ku ukapolo omwe akhakhala ku Teli-abibe pafupi na mkulo wa Kebari, ndipo ndidakhala komwe iwo akhakhalako. Ndidakhala pakati pawo ntsiku 7 ndiri wakuviringizika m’makumbukidwe.

16 Pomwe ntsiku 7 zire zidamala, ndidatambira mafala ya Yahova yakuti:

17 “Iwe mwana wa munthu, inepano ndakuikha kuti ukhale mulindiri pa nyumba ya Jirayeri. Ukabva mafala yakucokera pamulomo pangu, ukawacenjeze wanthuwo. 18 Inepano ndikauza munthu wakuipa kuti: ‘Kulewa cadidi iwepo un’dzafa,’ tsono iwepo ucisaya kumucenjeza na kuuza munthu wakuipayo mwa kumucenjeza kuti asiye bzicito bzace bzakuipa acipitiriza kukhala na moyo, pakuti iye ngwakuipa, an’dzafa thangwe ra kuphonya kwaceko, tsono mulopa wace nin’dzasunda iwepo.* 19 Koma iwepo ukacenjeza munthu wakuipa, iye acipitiriza kucita bzakuipa na khalidwe lace lakuipalo, an’dzafa thangwe ra kuphonya kwaceko, tsono iwepo un’dzapulumusa moyo wako. 20 Tsono munthu wakulungama akasiya kucita bzinthu bzabwino, aciyamba kucita bzinthu bzakuipa, nin’dzamuikhira patsogolo pace mwala wakukhukhumudwisa ndipo iye an’dzafa. Iwepo ukasaya kumucenjeza, iye an’dzafa thangwe ra pikado yace ndipo bzicito bzace bzakulungama bzin’dzakumbukiridwa lini, tsono mulopa wace nin’dzasunda iwepo.* 21 Koma ukacenjeza munthu wakulungama kuti aleke kucita pikado, ndipo iye acisaya kucita pikadoyo, kulewa cadidi iye an’dzapitiriza kukhala na moyo thangwe ra kumucenjezako. Ndipo iwepo un’dzapulumusa moyo wako.”

22 Kumweko boko la Yahova lidabwera pa ine, ndipo iye adandiuza kuti: “Lamuka, ndoko ku cigwa* ndipo kumweko inepano ninkalewalewa nawe.” 23 Tenepo ndidamuka ndiciyenda ku cigwa, ndipo kumweko ndidawona ulemerero bwa Yahova bwakundendemerana na ulemerero bomwe ndikhadabuwona kale pafupi na mkulo wa Kebari, ndipo ndidagodama ndicitsulimisa nkhope yangu mpaka pantsi. 24 Patsogolo pace, mzimu wa Mulungu udapita mwa ine ucindicitisa kuti ndiime ndipo Iye adandiuza kuti:

“Ndoko kumui ndipo ukabzifungire m’nyumba mwako. 25 Iwe mwana wa munthu, iwo an’dzakumanga na bzingwe kuti uleke kuyenda pakati pawo. 26 Nin’dzacitisa kuti lirime lako liphatirire kudzaulu kwa mkamwa mwako,* ndipo un’dzakhala bewewe, ucitazira kuwatsimula, pakuti iwo ni nyumba yakupanduka. 27 Tsono inepano ndikadzalewalewa nawe nin’dzakufungula mulomo wako, ndipo iwepo un’dzawauza kuti: ‘Bzimwebzi ni bzomwe Yahova Mbuya Mkululetu walewa.’ Omwe an’funa kubva mbabve, omwe an’funa lini kubva mbaleke, pakuti iwo ni nyumba yakupanduka.

4 “Iwe mwana wa munthu, tenga tijolo uikhe patsogolo pako, ndipo unembe pamwepo cithunzi-thunzi ca mzinda wa Jeruzalemu. 2 Zungulira mzindayu, konza litsito kuzungulira mzindayu, konza mtunthu wakuti umenyere nkhondo, manga matendi ya anyakhondo ndipo ikha bzimiti bzakulemera bzakugumulira muro.* 3 Tenga fijidera ya simbi* ndipo uikhe pakati pa iwepo na mzindayo kuti ikhale ninga muro wa simbi. Patsogolo pace, nkhope yako inyang’anise mzindayo ndipo udzalatize bzomwe anyamadulanthaka an’dzacita pakuzungulira mzindayo. Cimweci cin’dzakhala cizindikiro kwa nyumba ya Jirayeri.

4 “Patsogolo pace ugonere ku mbali yako ya madzere* ndipo unyamule bzakuphonya bza nyumba ya Jirayeri. Iwepo un’dzanyamula bzakuphonya bzawobzo ntsiku zentse zomwe un’dzakhala udagona ku mbali yako ya madzere. 5 Ndipo nin’dzakupasa ntsiku 390 zomwe zikubverana na magole ya bzakuphonya bzawo ndipo un’dzanyamula bzakuphonya bza nyumba ya Jirayeri. 6 Iwepo un’funika kudzamaliza ntsiku zimwezo.

“Patsogolo pace udzagonere pomwe ku mbali yako ya madidi, ndipo un’dzanyamula bzakuphonya bza nyumba ya Djuda kwa ntsiku 40. Ntsiku ibodzi yomwe ndakupasa ikuimira gole libodzi, ntsiku ibodzi gole libodzi. 7 Ndipo nkhope yako idzanyang’anise Jeruzalemu pomwe azunguliridwa na acikunda, udzakwinye cakubvala cako kuti boko lako lidzakhale padeca, ndipo udzalewe profesiya ya kupfudzidwa kwa Jeruzalemu.

8 “Bvaya! Inepano nin’dzakumanga na bzingwe kuti uleke kuzungunukira uku na uku, mpaka pomwe udzamalize ntsiku zako zakukhalirira* mzindayo.

9 “Ndipo utenge tirigu, sevada, cimbamba cikulu-cikulu, kamphodza, mapira na sipelita,* ucibziikha mu combo cibodzi kuti bzikhale cakudya cako. Iwepo un’dzadya bzimwebzi ntsiku zentse zomwe un’dzakhala udagonera ku mbali yako ibodzi, kwa ntsiku zakukwana 390. 10 Un’dzapima ndipo un’dzadya cakudya cakukwana masiklo* 20 pa ntsiku. Ndipo un’dzadya cakudya cimweci mu nthawe zakusankhulidwa.

11 “Ndipo iwepo un’dzamwa madzi yakucita kupima, yakukwana metade ya litru.* Ndipo un’dzamwa madzi yamweyo mu nthawe zakuikhidwiratu.

12 “Un’dzadya cakudya cako ninga kuti ukudya pau ya bololindo ya sevada; udzaciphike mwakuphatisa basa ndowe zakuuma za wanthu ninga nkhuni wentse akuwona.” 13 Ndipo Yahova adalewa pomwe kuti: “Mwa njira ibodzi-bodziyi Ajirayeri an’dzadya pau yakupswipisidwa pakati pa mitundu ya wanthu komwe nin’dzawabalalisira.”

14 Tenepo ine ndidati: “Bzimwebzi ne, Yahova Mbuya Mkululetu! Kuyambira ndiri mwana mpaka pano, ndikanati kupswipisidwa mwa kudya nyama yakufa yokha, ayai yakuphedwa na cirombo ne mkamwa mwangu mukanati kupita nyama yakupswipisidwa.”*

15 Tenepo iye adandiuza kuti: “Bziri bwino, ungaphatise basa ndowe za ng’ombe ninga nkhuni kuti uphikire cakudya cako, m’mbuto mwa ndowe za wanthu.” 16 Patsogolo pace iye adandiuza kuti: “Iwe mwana wa munthu, nin’dzacitisa kuti cakudya* cileke kufika mu Jeruzalemu, wanthu an’dzadya cakudya cakucita kupima uko ana thupo, ndipo an’dzamwa madzi yakucita kupima uko ana mantha. 17 Bzimwebzi bzin’dzacitika kuti mwakusaya cakudya na madzi, iwo adzanyang’anisane mwakulatiza kuti amalidwa nzeru, aciwonda thangwe ra bzakuphonya bzawo.

5 “Iwe mwana munthu, tenga xipada yakuthwa ndipo uiphatise basa ninga cakusengera* tsisi. Senga tsisi lako na ndebvu zako, ndipo ukamala uikhe tsisiro na ndebvuzo pa balantsa ndipo uligawe-gawe. 2 Ndipo ntsiku zako zakukhalirira mzindayo zikamala, udzatenthe pa moto mbali ibodzi pa mbali zitatu za tsisiro mkati mwa mzindayo. Udzatenge mbali yaciwiri ya tsisiro ndipo udzalimenye na xipanda kuzungulira mzinda wentseneyo. Mbali yacitatu ya tsisiro udzaimbuluse na mphepo ndipo inepano nin’dzasolola xipada ndicilitewera.

3 “Ndipo utengembo tsisiro pang’ono ucilikoya pa cakubvala cako. 4 Ndipo tenga pomwe pang’ono tsisi linango ucilithusa pamoto kuti lipse. Ndipo motoyo un’dzamwazikira nyumba yentse ya Jirayeri.

5 “Yahova Mbuya Mkululetu walewa kuti: ‘Umweyu ni Jeruzalemu. Inepano ndamuikha pakati pa wanthu wa mitundu na pakati pa madziko manango. 6 Tsono iye wapandukira malamulo yangu na bzakutonga bzangu, ndipo akucita bzinthu bzakuipa kuposa wanthu wa mitundu na madziko yakumuzungulira. Pakuti iwo alamba malamulo yangu, ndipo alibe kufamba mwakubverana na bzakutonga bzangu.’

7 “Tenepo Yahova Mbuya Mkululetu walewa kuti: ‘Pakuti imwepo mwakhala wakuipa kwene-kwene kuposa wanthu wa mitundu yakukuzungulirani ndipo mulibe kufamba mwakubverana na bzakutonga bzangu ne kubvera malamulo yangu, m’mbuto mwace mwatewera malamulo ya wanthu wa mitundu yakukuzungulirani, 8 Yahova Mbuya Mkululetu walewa kuti: “Inepano ndikubwera kudzamenyana nawe, iwe mzindawe, ndipo nin’dzakulanga pamaso pa mitundu ya wanthu. 9 Thangwe ra bzicito bzako bzentse bzakunyatsa, inepano nin’dzakucitira bzinthu bzomwe ndikhanati kubzicita kale, ndipo ne nin’dzabzicita lini pomwe.

10 “‘“Abereki an’dzadya wana wawo caiwo pakati pako ndipo wanambo an’dzadya abereki wawo. Inepano nin’dzakulanga ndipo wanthu omwe an’dzasala pakati pako nin’dzawabalalisira ku mbali zentse.”’*

11 “Yahova Mbuya Mkululetu walewa kuti: ‘Pana ine Mulungu wamoyo ndikulumbira kuti: Pakuti wapswipiza templo yangu yakucena na bzifanikiso bzako bzentse bzakunyantsa, pabodzi na bzicito bzako bzentse bzakunyantsa, inepano nin’dzakulamba; diso langu lin’dzakubvera lini ntsisi. Ndipo nin’dzakhala ndiribe nawe basa. 12 Mbali ibodzi pa mbali zitatu za wanthu wako an’dzafa na cisi* ayai an’dzamala pakati pako thangwe ra njala. Ndipo mbali inango ya wanthu wako in’dzaphedwa na xipada m’mbali mwako. Ndipo mbali yakumalizira yomwe njacitatu nin’dzaibalalisira ku mbali zentse* ndipo nin’dzasolola xipada ndiciwatewera. 13 Tenepo ukali bwangu bun’dzamala ndipo ciya cangu kwa iwo cin’dzamalambo, ndipo mtima wangu un’dzaderekha. Ndikadzamaliza kuwakhuthulira ciya cangu, iwo an’dzadziwa kuti ine Yahova, ndalewa bzimwebzi thangwe nimbafunisisa kuti wanthu ambanamate ine ndekha basi.

14 “‘Nin’dzakucitisa kuti ukhale matere. Nin’dzakucitisambo kuti ukhale cinthu cakunyozedwa na mitundu ya wanthu wakukuzungulira na pamaso pa wentse omwe an’dzapita na pamwepo. 15 Iwepo un’dzakhala cinthu cakunyozedwa na cakusinjiriridwa, ciratizo cako cin’dzakhala cenjezo ndipo cin’dzacitisa mantha wanthu wa mitundu yakukuzungulira ndikadzatonga na kukulanga na ukali pabodzi na ciya. Ndinepano Yahova omwe ndalewa bzimwebzi.

16 “‘Nin’dzawathusira misewe yakupha ya njala kuti ndiwapfudze. Misewe yomwe nin’dzaithusayo in’dzakupfudzani. Nin’dzamalisa cakudya canu kuti njala yanu ikule.* 17 Nin’dzakutumizirani njala na bzirombo bzaukali bzomwe bzin’dzakupherani wana wanu. Cisi* na xipada bzin’dzakuphani. Ndinepano Yahova omwe ndalewa bzimwebzi.’”

6 Yahova adalewalewa nande pomwe kuti: 2 “Iwe mwana wa munthu, zungunuka ucinyang’anisa mapiri ya Jirayeri ndipo ulewe maprofesiya ya bzomwe bziniwacitikira. 3 Ulewe kuti: ‘Imwe mapiri ya Jirayeri, bvani mafala ya Yahova Mbuya Mkululetu yakuti: Yahova Mbuya Mkululetu akulewa kuna mapiri, tumapiri tung’ono-tung’ono, mikulo na bzigwa kuti: “Ndikukubwereserani anyankhondo kuti adzamenyane namwe na xipada ndipo nin’dzapfudza mbuto zanu za padzulu. 4 Maguwa yanu ya ntsembe yan’dzagumulidwa, mbuto zanu zakutenthera bzakununtcirisa zin’dzapfudzidwa, ndipo nin’dzathusa wanthu wanu wakufa pamaso pa bzifanikiso bzanu bzakunyantsa.* 5 Nin’dzathusa anyakufa wa Jirayeri pamaso pa bzifanikiso bzawo bzakunyantsa, ndipo nin’dzamwaza mafupa yawo m’mbali mwa maguwa yawo ya ntsembe. 6 Mizinda in’dzapfudzidwa m’mbuto zentse zomwe mumbakhala, ndipo maguwa ya ntsembe yan’dzagumulidwa yaciphwanyidwa. Maguwa yanu ya ntsembe yan’dzagumulidwa yacipfudzidwa, bzifanikiso bzanu bzakunyantsa bzin’dzapfudzidwa, maguwa yanu yakutenthera bzakununtcirisa yan’dzagumulidwa, ndipo bzinthu bzomwe mudakonza na manja yanu bzin’dzapfudzidwa. 7 Wanthu omwe an’dzaphedwa an’dzagwa pakati panu, ndipo imwepo mun’dzadziwa kuti ine ndine Yahova.

8 “‘“Tsono nin’dzasiya winango, ndipo winango wa imwepo an’dzapulumuka ku xipada pakati pa mitundu ya wanthu mukadzabalalisidwa pa dziko la pantsi. 9 Ndipo wale omwe an’dzapulumuka an’dzandikumbukira pakati pa mitundu yomwe an’dzatengedwera ku ukapolo. Iwo an’dzazindikira momwe ndidasunamira thangwe ra mtima wawo wakusaya kukhulupirika* omwe udandipandukira na thangwe ra maso yawo yomwe yadafuna kwene-kwene* bzifanikiso bzawo bzakunyantsa. Iwo an’dzabva manyazi ndipo an’dzabva mseru na bzinthu bzentse bzakuipa na bzakunyantsa bzomwe adacita. 10 Iwo an’dzadziwa kuti ine ndine Yahova ndipo pomwe ndidawauza kuti nin’dzawabweresera tsoka ndiribe kundolewa papezi.”’

11 “Yahova Mbuya Mkululetu walewa kuti: ‘Womberani m’manja, menyani pantsi na nzayo zanu ndipo dandaulani bzinthu bzentse bzakuipa na bzakunyantsa bzomwe nyumba ya Jirayeri yacita, pakuti iwo an’dzafa na xipada, njala na cisi.* 12 Omwe an’dzakhala kutali an’dzafa na cisi, omwe an’dzakhala pafupi an’dzafa na xipada ndipo omwe an’dzaphonyedwa na bzinthu bzentsenebzi acisala, an’dzafa na njala; ndipo ciya cangu centse nin’dzatulira iwo. 13 Iwo an’dzadziwa kuti ine ndine Yahova, wanthu wawo wakufa akadzakhala pakati pa bzifanikiso bzawo bzakunyantsa, m’mbali mwa maguwa yawo ya ntsembe, mu tumapiri twentse tung’ono-tung’ono, pa ntsonga za mapiri yentse, pantsi pa miti yentse yakupswipirira na pantsi pa miti yomwe ina mthambi zikulu-zikulu pomwe iwo akhaperekera ntsembe zakununtcirisa, kuti aderekhese mitima ya bzifanikiso bzawo bzakunyantsa. 14 Nin’dzawafuthulira boko langu kuti ndiwalange ndipo dziko lawo lin’dzakhala matere, mbuto zentse zomwe iwo ambakhala zin’dzakhala matere kuposa dambo lomwe liri pafupi na Dibla. Ndipo iwo an’dzadziwa kuti ine ndine Yahova.’”

7 Yahova adalewalewa nande pomwe kuti: 2 “Iwe mwana wa munthu, Yahova Mbuya Mkululetu akuuza dziko la Jirayeri kuti: ‘Cimaliziro! Cafika cimaliziro ca mbali zinai za dzikoli. 3 Cimaliziro cako cafika. Nin’dzakukhuthulira ciya cangu, nin’dzakutonga mwakubverena na bzicito bzako ndipo nin’dzakulanga thangwe ra bzinthu bzentse bzakunyantsa bzomwe udacita. 4 Nin’dzakubvera lini ntsisi* ne kukusamalira. Nin’dzakubwezera mwakubverana na bzicito bzako ndipo un’dzabonera thangwe ra bzicito bzako bzakunyantsa. Ndipo un’dzadziwa kuti ine ndine Yahova.’

5 “Yahova Mbuya Mkululetu walewa kuti: ‘Tsoka! Tsoka lomwe likanati kucitika likubwera. 6 Cimaliziro cikufika; cimaliziro cin’dzafika; ico cin’dzafika mwadzidzidzi kwa iwepo ndipo cikufika. 7 Imwe anyakukhala m’dziko, yafika nthawe yanu. Nthawe ikufika ndipo ntsiku ikufendera. M’mapiri mukubveka baludya, sikuti kukuwa kwakukondwa.

8 “‘Tsapanopapa nin’kukhuthulira ciya cangu ndipo ukali bwangu bun’dzamalira iwepo. Nin’dzakutonga mwakubverana na bzicito bzako ndipo nin’dzakulanga thangwe ra bzinthu bzentse bzakunyantsa bzomwe udacita. 9 Nin’dzakubvera lini ntsisi, ne kukusamalira. Pakuti nin’dzakubwezera mwakubverana na bzicito bzako, ndipo un’dzabonera thangwe ra bzicito bzako bzakunyantsa. Ndipo un’dzadziwa kuti omwe akukupha ndine Yahova.

10 “‘Onani, ntsiku ikubwera! Yafika nthawe yanu. Mpsimbo yaphukira maluwa ndipo kubzikuza kwaphukirambo. 11 Ciwembo cathumuzirika ndipo cakhala ninga mpsimbo yakucitira bzakuipa. Iwo, cuma cawo, mathimu yawo ne kubvekera kwawo bzin’dzapulumuka lini. 12 Nthawe in’dzafika ndipo ntsiku in’dzafikambo. Nyakugula aleke kukomedwa ndipo nyakugulisa aleke kudandaula, pakuti ukali bwangu bun’fikira wanthu wentse.* 13 Nyakugulisa an’dzabwerera lini pomwe ku mbuto yace yomwe adagulisa, napo moyo wace ucipulumusidwa, pakuti bzomwe bzidalewedwa m’masomphenya bzin’dzacitikira wanthu wentse. Palibe ne na m’bodziyo omwe an’dzapulumuka pa tsokali, ndipo palibe nyakucita bzakuipa omwe an’dzapitiriza kukhala na moyo.

14 “‘Iwo aliza cimbututu ndipo wentse mbakukonzeka, koma palibe omwe akuyenda ku nkhondo. Pakuti ndakalipa na wanthu wentse. 15 Panja pana xipada ndipo mkati muna cisi* na njala. Omwe an’dzakhala kunja kwa mzinda an’dzafa na xipada, ndipo omwe an’dzakhala mu mzinda an’dzafa na njala na cisi. 16 Omwe an’dzayenda kumapiri an’dzapulumuka. Ninga njiwa za m’cigwa,* ali-wentse an’dzabuula thangwe ra bzakuphonya bzace. 17 Manja yawo yentse yan’dzatepa,* ndipo mabondo yawo yentse yan’dzagoga madzi.* 18 Iwo adabvala magundiri ndipo adayamba kutetemera. Wentse an’dzabva manyazi ndipo misolo yentse in’dzametedwa mipala.*

19 “‘Iwo an’dzathusa prata yawo mu mseu ndipo oro yawo an’dzaipidwa nayo. Ne prata yawo ne oro yawo bzin’dzawapulumusa lini pa ntsiku ya ukali bwa Yahova. Iwo an’dzakomedwa lini ne an’dzakhuta lini, pakuti prata* na oro yawo bzin’dzakhala ninga mwala wakukhukhumudwisa omwe un’dzawacitisa kuti aphonye. 20 Iwo adabzikuza na bzinthu bzawo bzakubzidekesera ndipo adabziphatisa* basa kukonzera bzifanikiso na bzinthu bzawo bzakunyantsa. Ndipopa nin’dzacitisa kuti aipidwe na prata yawo pabodzi na oro yawo. 21 Nin’dzabzipereka* m’manja mwa alendo kuti bzikhale bzawo ninga bzinthu bzakupambidwa m’manja mwa wanthu wakuipa wa pa dziko la pantsi, ndipo iwo an’dzabzidzonga.

22 “‘Nin’dzanyang’anisa kumbali kuti ndileke kuwawona; iwo an’dzadzonga mbuto yangu yakubisika,* ndipo mbava zin’dzapita m’mwemo ziciba.

23 “‘Konzani makorenti,* pakuti dziko ladzala na ciyeruzo ca mulopa ndipo mzinda wadzala na ciwembo. 24 Nin’dzawabweresera wanthu wakuipa wa mitundu inango ndipo iwo an’dzapamba nyumba zawo, nin’dzamalisa kubzikuza kwa wanthu wamphanvu ndipo mbuto zawo zakucena zin’dzaipisidwa. 25 Akadzakhala na thupo, an’dzanyang’ana mtendere koma an’dzauwona lini. 26 Mabvuto yan’dzatewerana ndipo kun’dzabvekambo nkhani zakutewerana. Wanthu an’dzalinga mprofeta kuti awauze bzakutsogolo, ndipo malamulo ya antsembe na malango ya akulu-akulu yan’dzathandiza lini. 27 Mambo an’dzalira, mtsogoleri an’dzakhala na mantha ndipo manja ya wanthu wa m’dzikolo yan’dzatetemera na mantha. Nin’dzawacitira bzinthu mwakubverana na bzicito bzawo ndipo nin’dzawatonga ninga momwe iwo adatongera anzawo. Ndipo iwo an’dzadziwa kuti ine ndine Yahova.’”

8 Mu gole laci 6, m’mwezi waci 6, pa ntsiku yacixanu ya mweziyo pomwe ndikhadakhala pamui pangu ndipo akulu-akulu wa Djuda akhadakhala kutsogolo kwangu, boko la Yahova Mbuya Mkululetu lidandifikira. 2 Pomwe ndikhanyang’anisa, ndidawona cinthu comwe cikhawoneka ninga munthu cakundendemerana na moto. Kucokera m’ciuno mwace kuyenda pantsi, cikhawoneka ninga moto ndipo kucokera m’ciuno mwace kuyenda m’dzaulu, cikhayetima ninga simbi.* 3 Iye adafuthula cinthu comwe cikhawoneka ninga boko, aciphata tsisi langu. Mzimu udandinyamula m’masomphenya ya Mulungu, ucindiyendesa kudzaulu ndipo udandifikisa ku Jeruzalemu, pa msuwo wa mkati omwe ukhanyang’ana kumbali ya ku norte, komwe kukhana cizindikiro ca cifanikiso ca ntcanje comwe cimbanyosa ntcanje. 4 Kumweko ndidawona ulemerero bwa Mulungu wa Jirayeri ninga bomwe ndidabuwona ku cigwa.*

5 Ndipo iye adandiuza kuti: “Iwe mwana wa munthu, ndaphata minyendo, nyang’anisa ku norte.” Tenepo ndidanyang’anisa ku norte, ndipo kumweko, ku norte kwa guwa la ntsembe pa msuwo, pakhana cizindikiro ca cifanikiso ca ntcanje. 6 Iye adandiuza kuti: “Iwe mwana wa munthu, kodi ukuwona bzinthu bzakuipa na bzakunyantsa bzomwe nyumba ya Jirayeri ikucitabzi, bzomwe bzikundicitisa kuti ndifunduke pa mbuto yangu yakucena? Tsono iwepo uniwona bzinthu bzakunyantsa kuposa bzimwebzi.”

7 Patsogolo pace, iye adanditenga acindiyendesa pa msuwo wa kintale ya mu templo ndipo pomwe ndidanyang’anisa, ndidawona buli pa parede. 8 Iye adandiuza kuti: “Iwe mwana wa munthu, ndaphata minyendo, thumizira buli lomwe liri pa paredeli.” Ndidathumizira buliro ndipo ndidawona msuwo. 9 Iye adandiuza kuti: “Pita ndipo ona bzinthu bzakuipa na bzakunyantsa bzomwe iwo akucita.” 10 Tenepo ndidapita ndicinyang’anisa, ndipo ndidawona mitundu yentse ya bzifanikiso bza bzirombo bzakukwawa, bzirombo bzakunyantsa pabodzi na bzifanikiso bzentse bzakunyantsa* bza nyumba ya Jirayeri. Ibzo bzikhadanembedwa* pa parede yentse. 11 Pakati pawo pakhana akulu-akulu 70 wa nyumba ya Jirayeri, ndipo m’bodzi wawo akhali Jaazaniya, mwana wa Safani. Ali-wentse akhana cakutenthera bzakununtcirisa m’manja mwace ndipo utsi bwa bzakununtcirisabzo bukhakwira kudzulu. 12 Iye adandiuza kuti: “Iwe mwana wa munthu, kodi wawona bzomwe akulu-akulu wa Jirayeri akucita pa mdima? Kodi wawonambo bzomwe ali-wentse akucita m’cipinda ca mkati momwe muna bzifanikiso bzawo? Iwo akulewa kuti: ‘Yahova akutiwona lini. Yahova wacoka m’dziko lino.’”

13 Iye adalewa pomwe kuti: “Uniwona bzinthu bzakunyantsa kwene-kwene kuposa bzomwe iwo akucitabzi.” 14 Tenepo iye adanditenga ndipo adandiyendesa pa msuwo wa nyumba ya Yahova, omwe uli kumbali ya ku norte ndipo kumweko ndidawona akazi adakhala pantsi, akulirira mulungu wakucemeredwa Tamuzi.

15 Iye adandiuza pomwe kuti: “Iwe mwana wa munthu, kodi ukuwona bzimwebzi? Uti uwone bzinthu bzakunyantsa kwene-kwene kuposa bzimwebzi.” 16 Tenepo iye adanditenga, acindiyendesa mkati mwa nyumba ya Yahova. Pa msuwo wa templo ya Yahova, pakati pa khonde la temployo na guwa la ntsembe, pakhana amuna wakukwana 25 omwe akhadalinza ngoto templo ya Yahova ndipo nkhope zawo zikhadanyang’ana kumabvadzuwa. Iwo akhadagodamira dzuwa, acimbanyang’ana kumabvadzuwako.

17 Iye adandiuza kuti: “Iwe mwana wa munthu, kodi ukuwona bzimwebzi? Kodi wa m’nyumba ya Djuda akuwona kuti mpsing’ono-ng’ono bzinthu bzakunyantsa bzomwe akucitabzi? Kodi akufuna kuti adzaze pomwe dzikoli na ciwembo acipitiriza kundikalipisa? Iwo akulata mphuno yangu na mthambi.* 18 Tenepo nin’dzacita nawo bzinthu mwaukali. Nin’dzawabvera lini ntsisi* ne kuwasamalira. Napo acindidandaulira tani mwakukuwa, ine nin’dzawabva lini.”

9 Patsogolo pace iye adakuwa m’makutu mwangu aciti: “Cemerani omwe an’dzabweresera nyathwa mzindayu, ali-wentse na cifuzo cace cakupfudzira m’manja.”

2 Ndidawona amuna 6 akubwera na ku cipata ca kuphiri kumbali ya ku norte. Ali-wentse akhana cifuzo cakupfudzira m’manja mwace ndipo pakati pawo pakhana mwamuna m’bodzi omwe akhadabvala bzakubvala bzabwino kwene-kwene, ndipo akhana kacombo ka tinta ka munembi m’ciuno mwace. Iwo adapita ndipo adaima pafupi na guwa la ntsembe la kobre.*

3 Patsogolo pace, ulemerero bwa Mulungu wa Jirayeri budacoka pomwe bukhali padzulu pa akerubi buciyenda padzulu pa templo, ndipo iye adayamba kucemera mwamuna omwe akhadabvala bzakubvala bzabwino ule, omwe akhana kacombo ka tinta ka munembi m’ciuno mwace. 4 Yahova adamuuza kuti: “Famba-famba mu mzinda wentse wa Jeruzalemu ndipo uikhe cizindikiro pa mikuma ya wanthu omwe akubonera na kuzunzika thangwe ra bzinthu bzentse bzakunyantsa bzomwe bzikucitika mu mzindayu.”

5 Ndipo iye adauza amuna winangowo ine ndikubva kuti: “Mutewereni ndipo mufambe-fambe mu mzindamu mucipha wanthu. Lekani kuwabvera ntsisi. 6 Muphe nkhalamba zentse, maswaka, madende, wana na akazi, tsono lekani kupha munthu ali-wentse omwe ana cizindikiro ndipo mun’funika kuyambira pa templo yangu.” Tenepo iwo adayamba na nkhalamba zomwe zikhali patsogolo pa temployo. 7 Patsogolo pace iye adawauza kuti: “Pswipizani templo ndipo dzazani panja pa temployo na wanthu wakufa. Ndokoni.” Tenepo iwo adayenda ndipo adayamba kupha wanthu wa mu mzindamo.

8 Pomwe iwo akhapha wanthuwo, ndinepano ndekha omwe ndidasala, tenepo, ndidagodama ndicitsulimisa nkhope yangu mpaka pantsi, ndicikuwa kuti: “Imwe Yahova Mbuya Mkululetu, kodi mun’pfudza wanthu wentse wakusala wa Jirayeri, pomwe mukukhuthulira ukali bwanu Jeruzalemu?”

9 Tenepo iye adanditawira kuti: “Kuphonya kwa nyumba ya Jirayeri na Djuda n’kukulu kwene-kwene. Dziko ladzala na mulandu wa mulopa ndipo mzinda wadzala na cinyengo, pakuti iwo akulewa kuti: ‘Yahova wasiya dzikoli. Yahova akuwona lini.’ 10 Tsono inepano nin’dzawabvera lini ntsisi ndipo nin’dzakhala ndiribe nawo basa. Nin’dzawabwezera mwakubverana na bzicito bzawo.”

11 Tenepo ndidawona mwamuna omwe akhadabvala cakubvala cabwino kwene-kwene ule, omwe akhana kacombo ka tinta m’ciuno mwace ndipo iye adalewa kuti: “Ndacita bzentse ninga momwe mwandiuzira.”

10 Pomwe ndikhanyang’anisisa, ndidawona cinthu cakundendemerana na mwala wa safira padzaulu pa akerubi, pa cinthu comwe cikhali padzaulu pa misolo yawo ndipo cikhawoneka ninga mpando wa umambo. 2 Tenepo iye adauza munthu omwe akhadabvala bzakubvala bzabwino kwene-kwene ule kuti: “Pita na pakati pa maroda, pantsi pa akerubi ndipo ukadzaze manja yako yentse mawiri na masimbe ya moto yomwe yali pakati pa akerubi ndipo uyathuse mu mzindamo.” Tenepo, iye adapitadi ine ndikuwona.

3 Akerubiwo akhali kumadidi kwa templo pomwe mwamunayo adapita, ndipo mtambo udadzala panja pentse. 4 Ndipo ulemerero bwa Yahova budacoka padzaulu pa akerubiwo buciyenda pa msuwo wa templo ndipo pang’ono na pang’ono mtamboyo udadzala mu templomo ndipo panja pentse padadzala na ceza ca ulemerero bwa Yahova. 5 Ndipo baludya la maphaphidwe ya akerubiwo likhabveka na mu kintale ninga fala la Mulungu Wamphanvu-zentse akakhala akulewalewa.

6 Patsogolo pace, iye adauza mwamuna omwe akhadabvala bzakubvala bzabwino kwene-kwene ule kuti: “Tenga moto pakati pa maroda na pakati pa akerubi.” Tenepo mwamunayo adapita, aciima kumbali kwa roda. 7 M’bodzi mwa akerubiwo adafuthulira boko lace ku moto omwe ukhali pakati pawo, aciutapa ndipo adauikha m’manja mwa mwamuna omwe akhadabvala bzakubvala bzabwino kwene-kwene ule. Tenepo mwamunayo adatambira motoyo, aciyenda. 8 Kuntsi kwa maphaphidwe ya akerubiwo kukhana cinthu comwe cikhawoneka ninga manja ya munthu.

9 Pomwe ndikhapitiriza kuwona masomphenyayo, ndidawona maroda manai kumbali kwa akerubi. Kumbali kwa kerubi ali-wentse kukhana roda libodzi, ndipo marodayo yakhayetima ninga mwala wa krizolito. 10 Maroda manaiyo yakhali yakundendemerana ndipo roda liri-lentse likhawoneka ninga kuti liri mkati mwa linzace. 11 Yakafamba, yangadakwanisa kuyenda mbali zentse zinai mwakusaya kugonyola, thangwe marodayo yakhayenda mwakusaya kugonyola komwe nkhope za akerubi zikhanyang’anisa. 12 Thupi lawo lentse, kumbuyo kwawo, manja yawo na maphaphidwe yawo, yakhadadzala na maso. Ndipo maroda manai ya akerubiwo yakhadadzalambo na maso kwentse-kwentse. 13 Ndipo ine ndidabva fala likuuza marodayo kuti: “Fambani!”

14 Ali-wentse* akhana nkhope zinai. Yakuyamba ikhali nkhope ya kerubi, yaciwiri ikhali nkhope ya munthu, yacitatu ikhali nkhope ya mphondolo ndipo yacinai ikhali nkhope ya mphungu.

15 Akerubiwo akhali bzakulengedwa bzamoyo bzire bzomwe ndidabziwona ku mkulo wa Kebari. Ndipo iwo akhambadzusika; 16 akerubiwo akafamba, maroda yakhafambambo pambali pawo; ndipo akambafuthula maphaphidwe yawo kuti ayende padzaulu pa dziko, marodayo yakhazungunuka lini ndipo ne yakhacoka lini pambali pawopo. 17 Iwo akaima, marodayo yakhaimambo, iwo akakwira, marodayo yakhakwira pabodzi na iwo, pakuti mzimu omwe ukhatsogolera anjowo ukhalimbo m’marodayo.

18 Ndipo ulemerero bwa Yahova budacoka padzaulu pa msuwo wa templo bucikakhala padzaulu pa akerubi. 19 Akerubiwo adafuthula maphaphidwe yawo acikwira m’dzaulu, ine ndikuwona. Pomwe iwo akhacoka, maroda yakhali pambali pawo. Iwo adaima pabodzi pa msuwo wa kumabvadzuwa wa nyumba ya Yahova ndipo padzaulu pawo pakhana ulemerero bwa Mulungu wa Jirayeri.

20 Iwo akhali abodzi-bodzi omwe ndikhadawawona pantsi pa mpando wa umambo wa Mulungu wa Jirayeri pafupi na mkulo wa Kebari, ndipopa ndidazindikira kuti iwo akhali akerubi. 21 Anjo wentse anai akhana nkhope zinai, maphaphidwe manai ndipo kuntsi kwa maphaphidweyo kukhawoneka ninga manja ya munthu. 22 Ndipo nkhope zawo zikhali zakundendemerana na zomwe ndikhadawona pafupi na mkulo wa Kebari. Ali-wentse akhambandoyenda kutsogolo.

11 Ndipo mzimu udandinyamula ucindiyendesa ku msuwo wa kumabvadzuwa wa nyumba ya Yahova omwe ukhadanyang’ana kumabvadzuwa. Pamsuwopo ndidawona amuna 25 omwe akhali nduna, ndipo pakati pawo pakhana Jaazaniya mwana wa Azuri na Pelatiya mwana wa Benaiya. 2 Tenepo iye adandiuza kuti: “Iwe mwana wa munthu, awa mbamuna omwe akupangana kucita bzakuipa ndipo ambapereka malango yakuipa mu mzindayu. 3 Iwo akulewa kuti: ‘Ino ndiyo lini nthawe yakumanga nyumba? Mzindayu* uli ninga poto, ndipo ife tiri ninga nyama.’

4 “Tenepo lewa profesiya ya bzinthu bzakuipa bzomwe bzin’dzawacitikira. Lewa profesiya, iwe mwana wa munthu.”

5 Patsogolo pace, mzimu wa Yahova udandibwerera ndipo iye adandiuza kuti: “Lewa kuti, ‘Yahova walewa kuti: “Iwe nyumba ya Jirayeri, bzomwe mukulewa bziri bwino ndipo ine ndikudziwa bzomwe imwepo mukukumbuka. 6 Imwepo mwaphesa wanthu azinji mu mzindayu ndipo mwadzaza m’miseu yace na wanthu wakufa.”’” 7 “Tenepo Yahova Mbuya Mkululetu walewa kuti: ‘Wanthu wakufa omwe mwawamwaza mu mzindamu ni nyama ndipo mzindayu ni poto. Tsono imwepo mun’dzacosedwa m’mwemo.’”

8 Yahova Mbuya Mkululetu walewa kuti: “‘Imwepo mukucita mantha na xipada, tsono ni xipada ibodzi-bodziyo yomwe nin’dzakulangani nayo.’ 9 ‘Inepano nin’dzakucosani mu mzindayu, ndicikuperekani m’manja mwa alendo ndipo nin’dzakulangani. 10 Imwepo mun’dzafa na xipada. Nin’dzakutongani m’malire mwa Jirayeri ndipo mun’dzadziwa kuti ine ndine Yahova. 11 Kwa imwepo mzindayo un’dzakhala lini poto ndipo imwepo mun’dzakhala lini nyama mkati mwace; nin’dzakutongani m’malire mwa Jirayeri, 12 ndipo imwepo mun’dzadziwa kuti ine ndine Yahova, pakuti mulibe kufamba mwakubverana na bzakutonga bzangu, ndipo mulibe kuteweza mitemo yangu, koma mwacita bzinthu mwakubverana na mitemo ya wanthu wa mitundu yakukuzungulirani.’”

13 Pelatiya mwana wa Benaiya adafa pomwe ndidandomaliza kulewa maprofesiyaya. Tenepo ndidagodama ndicitsulimisa nkhope yangu mpaka pantsi ndicikuwa kuti: “Imwe Yahova Mbuya Mkululetu, kodi munipfudza Ajirayeri wakusalawa?”

14 Yahova adalewalewa nande pomwe kuti: 15 “Iwe mwana wa munthu, abale wako omwe ana ugo bwakulomboledwa pabodzi na nyumba yentse ya Jirayeri, adauzidwa na anyakukhala mu Jeruzalemu kuti: ‘Khalani kutali na Yahova. Dzikoli ndathu, tidapasidwa kuti likhale utaka bwathu.’ 16 Tenepo uwauze kuti: ‘Yahova Mbuya Mkululetu walewa kuti: “Napo kuti ndidawacosa ndiciwayendesa pakati pa mitundu ya wanthu ndipo ndidawamwazira m’madziko yakusiyana-siyana, nin’dzakhala mbuto yakucena kwa iwo mu kanthawe kakucepa m’madziko yomwe adayendayo.”’

17 Tenepo uwauze kuti: ‘Yahova Mbuya Mkululetu walewa kuti: “Nin’dzakutsonkhanisani pakati pa wanthu na m’madziko yomwe ndidakubalalisirani ndipo nin’dzakupasani dziko la Jirayeri. 18 Iwo an’dzabwerera kumweko ndipo an’dzacosa bzifanikiso bzentse bzakunyantsa na bzicito bzakunyantsa. 19 Inepano nin’dzawapasa mtima m’bodzi ndipo nin’dzaikha mwa iwo makumbukidwe mapsa. Nin’dzacosa m’thupi mwawo mtima wakuuma ninga mwala ndipo nin’dzawapasa mtima wakufewa ninga nyama,* 20 kuti afambe mwakubverana na bzakutonga bzangu, acikoya malamulo yangu na kuyabvera. Tenepo iwo an’dzakhala wanthu wangu ndipo ine nin’dzakhala Mulungu wawo.”’

21 “‘“Tsono kwa wale omwe mtima wawo watsimikiza kupitiriza na bzinthu bzakunyantsa na kumbacita bzinthu bzakunyantsabzo, nin’dzawabwezera mwakubverana na bzicito bzawo,” walewa tenepo Yahova Mbuya Mkululetu.’”

22 Tenepo, akerubiwo adafuthula* maphaphidwe yawo ndipo maroda yakhali pafupi na iwo ndipo padzulu pawo pakhana ulemerero bwa Mulungu wa Jirayeri. 23 Ndipo ulemerero bwa Yahova budakwira kucokera mu mzindamo bucikaima m’phiri lomwe liri kumbali ya kumabvadzuwa kwa mzindayo. 24 Tenepo mzimu* udanditenga ucindiyendesa m’dziko la Kalideya, komwe kuna wanthu omwe adaphatidwa aciyendesedwa ku ukapolo. Bzimwebzi bzidacitika m’masomphenya yomwe ndidawonesedwa na mzimu wa Mulungu. Patsogolo pace masomphenya yomwe ndidawonayo yadacoka kwa ine. 25 Ndipo ndidayamba kufotokozera wanthu omwe akhadaphatidwa aciyendesedwa ku ukapolo wale bzinthu bzentse bzomwe Yahova adandiwonesa.

12 Yahova adalewalewa nande pomwe kuti: 2 “Iwe mwana wa munthu, ukukhala na wanthu wakupanduka. Iwo ana maso koma ambawona lini, ndipo ana makutu koma ambabva lini, pakuti ni wanthu wakupanduka. 3 Tsono iwe mwana wa munthu, konzekera mitolo yako kuti uyende ku ukapolo. Tenepo uyende ku ukapolo masikati pomwe iwo akuwona. Ndoko ku ukapolo, kucokera pamui pako kuyenda ku mbuto inango pomwe iwo akuwona. Pinango iwo an’dzakubvera pakuti ni wanthu wakupanduka. 4 Masikati pomwe iwo akuwona, bula na mitolo yako kunja kuti uyende ku ukapolo, ndipo kukadoka pomwe iwo akuwona, iwepo ubule ninga munthu omwe akuyendesedwa ku ukapolo.

5 “Ubowole parede pomwe iwo akuwona ndipo ubulise mitolo yako na pamwepo. 6 Pomwe iwo akuwona, nyamula mitolo yako paphewa ndipo ubule nayo kunja ku mdima. Mpsinkha nkhope yako kuti uleke kuwona pantsi, pakuti nin’dzacitisa iwepo kukhala cizindikiro kwa nyumba ya Jirayeri.”

7 Ndidacita ninga momwe adandiuzira. Masikati ndidacosa mitolo yangu ninga mitolo ya munthu omwe akuyendesedwa ku ukapolo. Pomwe kukhadoka, ndidaboola parede na manja. Usiku ndidanyamula bzinthu bzangu ndicibula nabzo kunja ndipo ndidabzinyamula paphewa pomwe iwo akuwona na maso yawo.

8 Macibese Yahova adalewalewa nande pomwe kuti: 9 “Iwe mwana wa munthu, kodi wanthu wakupanduka wa nyumba ya Jirayeri alibe kukubvunza kuti: ‘N’ciyani comwe ukucitaci?’ 10 Uwauze kuti: ‘Yahova Mbuya Mkululetu walewa kuti: “Mafalaya yakulewa bza akulu-akulu wa mu Jirayeri na nyumba yentse ya Jirayeri yomwe iri mu mzindayu.”’

11 “Uwauze kuti iwepo ndiwe cizindikiro. Ninga momwe bzacitikira na iwepo, bzin’dzacitikirambo iwo. Iwo an’dzayenda ku ukapolo ku dziko linango. 12 Ndipo mtsogoleri omwe ali pakati pawo an’dzanyamula mitolo yace paphewa mu mdima acibula. An’dzaboola muro ndipo an’dzatenga mitolo yace acibula nayo pamwepo, ndipo iye an’dzampsinkha nkhope yace kuti aleke kuwona pantsi. 13 Nin’dzamuthusira ukonde bwangu ndipo iye an’dzaphatidwa na ukonde bwangu bwa msodzi. Tenepo nin’dzamuyendesa ku Babiloniya, m’dziko la Akalideya, tsono iye an’dzaliwona lini ndipo an’dzafera kumweko. 14 Ndipo wentse omwe an’dzakhala ali m’mbali mwace, anyakuthandiza na acikunda wace, nin’dzawabalalisira m’mbali zentse ndipo nin’dzasolola xipada ndiciwatewera. 15 Ndipo iwo an’dzadziwa kuti ine ndine Yahova ndikadzawathothera ku mitundu inango na kuwabalalisira m’madziko yakusiyana-siyana. 16 Tsono nin’dzapulumusa winango wa iwo ku xipada, njala na cisi* kuti adzalewe ku mitundu ya wanthu yomwe iwo an’dzayendako bza bzicito bzawo bzentse bzakunyantsa, ndipo an’dzadziwa kuti ine ndine Yahova.”

17 Tenepo Yahova adalewalewa nande pomwe kuti: 18 “Iwe mwana wa munthu, iwepo un’funika kudya cakudya cako ukutetemera na kumwa madzi yako una mantha na thupo. 19 Kauze wanthu wa m’dzikolo kuti: ‘Yahova Mbuya Mkululetu walewa kwa wanthu omwe akukhala mu Jeruzalemu m’dziko la Jirayeri kuti: “Iwo an’dzadya cakudya cawo na thupo, ndipo an’dzamwa madzi yawo ana mantha pakuti dziko lawo lin’dzakhaliratu matere thangwe ra ciwembo comwe wanthu wentse omwe akukhala m’mwemo akucita. 20 Mizinda yakukhalidwa in’dzapfudzidwa ndipo dzikolo lin’dzakhalidwa lini na wanthu, ndipo imwepo mun’dzadziwa kuti ine ndine Yahova.”’”

21 Tenepo Yahova adalewalewa nande pomwe kuti: 22 “Iwe mwana wa munthu, kodi ni mwani uponi umweyu omwe ukulewedwa mu Jirayeriyu wakuti: ‘Ntsiku zikupita, tsono palibe masomphenya yomwe yakukwanisika’? 23 Tenepo uwauze kuti: ‘Yahova Mbuya Mkululetu walewa kuti: “Nin’malisa mwaniyu ndipo un’dzalewedwa lini pomwe mu Jirayeri.”’ Ndipo uwauze kuti: ‘Ntsiku zikufika ndipo masomphenya yentse yan’dzakwanisika.’ 24 Pakuti pa nyumba ya Jirayeri pan’dzawoneka lini pomwe masomphenya yakunama ne kuvima kwacinyengo. 25 ‘“Pakuti ine Yahova nin’dzalewa. Mafala yentse yomwe nin’dzalewa yan’dzakwanisika mwakusaya kucedwa. Imwe wanthu wakupanduka, nin’dzalewa mafala ndipo nin’dzacitisa kuti yakwanisike mu ntsiku zanu,” walewa tenepo Yahova Mbuya Mkululetu.’”

26 Yahova adalewalewa nande pomwe kuti: 27 “Iwe mwana wa munthu, wanthu wa mu Jirayeri* akulewa kuti: ‘Masomphenya yomwe iye akuwona yan’dzacitika kale-kale. Iye akulewa profesiya yomwe in’dzacitika kutsogolo caiko.’ 28 Tenepo uwauze kuti: ‘Yahova Mbuya Mkululetu walewa kuti: “‘Palibe fala langu ne na libodziro lomwe lin’dzacedwa kukwanisika. Bzentse bzomwe nin’dzalewa bzin’dzakwanisika,’ walewa tenepo Yahova Mbuya Mkululetu.”’”

13 Ndipo Yahova adalewalewa nande pomwe kuti: 2 “Iwe mwana wa munthu, lewa profesiya ya bzinthu bzomwe bzin’dzacitikira aprofeta wa Jirayeri. Auze wale omwe ambandolewa bza mu msolo mwawo* bzinthu bzomwe bzin’dzacitika kutsogolo kuti: ‘Tetekerani fala la Yahova. 3 Yahova Mbuya Mkululetu walewa kuti: “Tsoka kwa aprofeta wakusaya nzeru, omwe ambandotewera makumbukidwe yawo* pomwe alibe kuwona cinthu. 4 Iwe Jirayeri, aprofeta wako akhala ninga nkhandwe* zomwe ziri m’matere. 5 Imwepo mun’dzayenda lini m’mikhekhe ya muro wa minyala kuti mukamangire nyumba Jirayeri kuti Jirayeriyo adzakhale wakukhotcerereka pa ntsiku ya nkhondo ya Yahova.” 6 “Iwo akuwona masomphenya yakunama ndipo akulewa bzinthu bzakutsogolo bzakunama kuti: ‘Aya ni mafala ya Yahova,’ uko Yahova alibe kuwatuma, ndipo akudikhirira kuti mafala yawoyo yakwanisike. 7 Kodi masomphenya yomwe mukuwona njakunama lini? Ndipo bzinthu bzomwe mukulewa kuti bzin’dzacitika kutsogolo mpsakunamambo lini? Imwepo mukulewa kuti: ‘Aya ni mafala ya Yahova,’ uko inepano ndiribe kulewa cinthu.”’

8 “‘Tenepo Yahova Mbuya Mkululetu walewa kuti: “‘Pakuti imwepo mukulewa bzinthu bzakunama ndipo masomphenya yanu njakunamambo, inepano nin’malizana namwe,’ walewa tenepo Yahova Mbuya Mkululetu.” 9 Nin’dzaphatisa basa mphanvu zangu kuti ndilange aprofeta omwe akuwona masomphenya yakunama na kulewa bzinthu bzakunama bzakutsogolo. Iwo an’dzakhala lini pakati pa wanthu omwe nimbawafuna, an’dzanembedwa lini m’bukhu la nyumba ya Jirayeri ndipo ne an’dzabwerera lini m’dziko la Jirayeri. Ndipo imwepo mun’dzadziwa kuti ine ndine Yahova Mbuya Mkululetu. 10 Bzentsenebzi thangwe rakuti akusoceresa wanthu wangu mwakuwauza kuti: “Pana mtendere!” Uko mtendere palibe. Munthu akamanga parede yakusaya kulimba, iwo ambaipalangira mtoto.’*

11 “Uza omwe akupalangira mtoto pa paredeyo kuti paredeyo in’dzagwa. Kun’dzabvumba nvula yamphanvu na ya matalala ndipo conzi camphanvu cin’dzaigwesa. 12 Ndipo paredeyo ikadzagwa, wanthu an’dzakubvunzani kuti: ‘Kodi mtoto omwe mukhadapalangira ule uli kuponi?’

13 “Tenepo Yahova Mbuya Mkululetu walewa kuti: ‘Na ciya cangu nin’dzabweresa conzi camphanvu, na ukali bwangu nin’dzatumiza nvula yamphanvu ndipo na ciya cangu nin’dzabweresa nvula ya matalala. 14 Nin’dzapfudza parede yomwe mudaipalangira mtoto. Ine nin’dzaigwesa ndipo aliserse yace in’dzawonekera padeca. Mzindayo ukadzagwa, imwepo mun’dzafera m’mwemo ndipo imwepo mun’dzadziwa kuti ine ndine Yahova.’

15 “‘Ndikadzatulira ciya cangu centse paredeyo na omwe adaipalangira mtoto, nin’dzakuuzani kuti: “Parede ire kulibe, ndipo omwe adaipalangira mtoto kulibembo. 16 Mu Jirayeri mulibe aprofeta, wale omwe akhalewa bzinthu bzomwe bzin’dzacitika mu Jeruzalemu ndipo akhana masomphenya yakulewa bza mtendere pomwe mtendereyo pakhalibe,”’ walewa tenepo Yahova Mbuya Mkululetu.

17 “Tsono iwe mwana wa munthu, nkhope yako inyang’anise wana wacikazi wa wanthu wa mtundu wako omwe ambabzikonzera okha maprofesiya ndipo ulewe maprofesiya ya bzinthu bzakuipa bzomwe bziniwacitikira. 18 Uwauze kuti: ‘Yahova Mbuya Mkululetu walewa kuti: “Tsoka kwa akazi omwe akusonera wanthu wentse tumapulsera twa m’manja* na omwe ambakonzera wanthu wa misinkhu yentse nguwo zakumpsinkhira mu msolo kuti asodze wanthu ninga momwe ambasodzera mbalame. Kodi imwepo mukukumbuka kuti mungasodze moyo wa wanthu wangu mucipitiriza kukhala na moyo? 19 Imwepo mukundipswipiza pakati pa wanthu wangu kuti mugumane sevada yakundokwana m’manja pabodzi na nvululu za pau. Mumbapha wanthu omwe akhafunika lini kufa, ndipo mumbasiya wanthu omwe akhafunika lini kukhala na moyo mwa kuuza wanthu wangu bzinthu bzakunama, omwe ambabvesera kunama kwanuko.”’

20 “Tenepo Yahova Mbuya Mkululetu walewa kuti: ‘Imwe akazimwe, ninkulangani thangwe ra tumapulsera twanu twa m’manjatu, tomwe imwepo mumbatuphatisa basa kuti musodzere wanthu ninga mbalame. Inepano nin’tucosa m’manja mwanumo ndicipulumusa wanthu omwe imwepo mukuwasodza ninga mbalame. 21 Ning’amba nguwo zanu zakumpsinkhira mu msolo ndicipulumusa wanthu wangu m’manja mwanu. Kwa imwepo iwo an’dzakhala lini pomwe ninga nyama yakuphatidwa ndipo imwepo mun’dzadziwa kuti ine ndine Yahova. 22 Pakuti imwepo mwasunamisa nyakulungama na kunama kwanu, pomwe ine ndikhafuna lini kuti iwo asuname.* Ndipo mwathandizira nyakuipa kuti nyakuipayo aleke kusiya bzakuipabzo acikhala na moyo. 23 Ndipopa imwe akazimwe, mun’dzawona lini pomwe masomphenya yakunama ndipo mun’dzavima lini pomwe bzinthu bzakutsogolo. Nin’dzapulumusa wanthu wangu m’manja mwanu, ndipo imwepo mun’dzadziwa kuti ine ndine Yahova.’”

14 Akulu-akulu winango wa Jirayeri adabwera, ndipo adakhala kutsogolo kwangu. 2 Tenepo Yahova adalewalewa nande pomwe kuti: 3 “Iwe mwana wa munthu, amunawa atsimikiza kutewera bzifanikiso bzawo bzakunyantsa,* ndipo aikha patsogolo pa wanthu mwala wakukhukhumudwisa omwe ukuwacitisa pikado. Kodi ningalekerere kuti iwo ambandibvunze? 4 Tenepo awauze kuti: ‘Yahova Mbuya Mkululetu walewa kuti: “Mjirayeri ali-wentse akatsimikiza kutewera bzifanikiso bzace bzakunyantsa, aciikha patsogolo pa wanthu mwala wakukhukhumudwisa omwe uniwacitisa pikado ndipo aciyenda kwa mprofeta, ine Yahova nin’dzamutawira mwakubverana na kuwanda kwa bzifanikiso bzakunyantsa bzomwe anabzo. 5 Nin’dzacita bzimwebzi kuti Ajirayeri akhale na mantha, thangwe wentse acoka kwa ine ndipo atewera bzifanikiso bzawo bzakunyantsa.”’

6 “Tenepo uza nyumba ya Jirayeri kuti: ‘Yahova Mbuya Mkululetu walewa kuti: “Bwererani, siyani bzifanikiso bzanu bzakunyantsa ndipo siyanimbo bzinthu bzentse bzakunyantsa bzomwe mukucita. 7 Mjirayeri ali-wentse ayai mulendo omwe akukhala pakati pa Ajirayeri akandisiya, acitsimikiza kutewera bzifanikiso bzace bzakunyantsa, aciikha patsogolo pa wanthu mwala wakukhukhumudwisa omwe uniwacitisa pikado ndipo aciyenda kwa mprofeta wangu, ine Yahova nin’dzamalizana naye. 8 Nin’dzakhala nyamadulanthaka wa munthu umweyo ndipo nin’dzamuiikha cizindikiro ca ciratizo na cenjezo. Nin’dzamupha kuti aleke kukhala pakati pa wanthu wangu ndipo imwepo mun’dzadziwa kuti ine ndine Yahova.”’

9 “‘Tsono mprofetayo akapumpsidwa acitawira, nin’dzakhala ndine Yahova omwe wapumpsa mprofetayo. Tenepo nin’dzamufuthulira boko langu ndicimupfudziratu pakati pa wanthu wangu Ajirayeri. 10 Wentse an’dzabonera thangwe ra bzakuphonya bzawo. Kuphonya kwa munthu omwe wayenda kwa mprofeta kun’dzakhala kwakundendemerana na kuphonya kwa mprofetayo, 11 kuti nyumba ya Jirayeri ileke kudzandisiya nakuti ilekembo kudzakhala yakupswipa thangwe ra bzakuphonya bzawo bzentse. Iwo an’dzakhala wanthu wangu ndipo ine nin’dzakhala Mulungu wawo,’ walewa tenepo Yahova Mbuya Mkululetu.”

12 Tenepo Yahova adalewalewa nande pomwe kuti: 13 “Iwe mwana wa munthu, dziko likandiphonyera mwakucita bzinthu mwakusaya kukhulupirika, nin’dzalifuthulira boko langu, nin’dzagwata cakuikhira cakudya cace,* nin’dzalitumizira njala ndipo nin’dzapha wanthu na bzirombo m’dzikomo.” 14 “‘Napo amuna atatuwa Nowa, Daniyeli na Djobi angadakhala m’dzikomo, ndiwo okha omwe angadapulumuka thangwe ra cikhulupiro cawo,’ walewa tenepo Yahova Mbuya Mkululetu.”

15 “‘Ayai ndicitumiza m’dzikomo bzirombo bza m’thengo ndipo bzirombobzo bzicipha wanthu omwe akukhala m’mwemo, dzikolo licikhala matere ndipo pacisaya kuwoneka munthu ali-wentse wakugwata m’mwemo thangwe ra bzirombobzo, 16 pana ine Mulungu wamoyo’ ndikulumbira kuti: ‘Napo amuna atatuwa angadakhala ali m’mwemo, iwo angadapulumusa lini wana wawo wacimuna ne wacikazi, koma angadapulumuka iwo okha basi ndipo dzikolo lingadakhala matere,’” walewa tenepo Yahova Mbuya Mkululetu.

17 “‘Ayai ndicibweresera xipada dzikolo ndicilewa kuti: “Xipada ipite m’dzikomo” ndipo iphe wanthu pabodzi na bzirombo, 18 pana ine Mulungu wamoyo’ ndikulumbira kuti: ‘Napo amuna atatuwa angadakhala ali m’mwemo, iwo angadapulumusa lini wana wawo wacimuna ne wacikazi, koma angadapulumuka iwo okha basi,’” walewa tenepo Yahova Mbuya Mkululetu.

19 “‘Ayai ndicitumiza cisi* m’dzikomo na kukhuthulira ukali bwangu m’mwemo ndicipha wanthu azinji na bzirombo, 20 pana ine Mulungu wamoyo’ ndikulumbira kuti: ‘Napo Nowa, Daniyeli na Djobi angadakhala ali m’mwemo, iwo angadapulumusa lini wana wawo wacimuna ne wacikazi; thangwe ra cirungamo cawo angadapulumuka iwo okha basi,’” walewa tenepo Yahova Mbuya Mkululetu.

21 “Yahova Mbuya Mkululetu walewa kuti: ‘Umu ni momwe bzin’dzakhalira ndikadzatumizira Jeruzalemu bzinthu bzinai bzakuwalanga nabzo* bzomwe ni xipada, njala, bzirombo bza m’thengo na cisi kuti bziphe wanthu na bzirombo m’dzikomo. 22 Tsono winango an’dzasala ndipo an’dzapulumusidwa m’mwemo aciyenda kunja pabodzi na wana wacimuna na wacikazi. Iwo akubwera kudzagumana namwe. Imwepo mukadzawona njira zawo na bzicito bzawo, kulewa cadidi imwepo mun’dzatsangalazidwa na tsoka lomwe ndabweresera Jeruzalemu, inde, na bzentse bzomwe ndacitira mzindayo.’”

23 “Yahova Mbuya Mkululetu walewa kuti: ‘Iwo an’dzakutsangalazani mukadzawona njira zawo na bzicito bzawo ndipo mun’dzadziwa kuti bzomwe ndacitira mzindayu, ndiribe kubzicita mwakusaya mathangwe.’”

15 Yahova adalewalewa nande pomwe kuti: 2 “Iwe mwana wa munthu, kodi matabwa ya muti wa uva yangandendemerane na muti uli-wentse ayai na mthambi ya muti wa m’thengo? 3 Kodi mthambi zace zingaphatisidwe basa? Ayai kodi kamuti kace kangaphatisidwe basa pakumanikira cinthu? 4 Mutiyo umbathusidwa pa moto kuti ukhale nkhuni, ndipo motoyo umbanyekesa kutsinde na kuntsonga kwace ndipo pakati pambapsambo. Kodi muti umweyo ungaphate pomwe basa? 5 Napo pomwe mutiyo ukhali upulumira, ukhaphata lini basa, tsono tani ucipsa na moto na kunyeka, kodi ungaphate pomwe basa?”

6 “Yahova Mbuya Mkululetu walewa kuti: ‘Ninga miti ya m’thengo, ndacitisa miti ya muti wa uva kukhala nkhuni. Tenepo nin’dzacita bzibodzi-bodzibzi na wanthu omwe akukhala mu Jeruzalemu. 7 Ine ndawanyang’anisa mwaukali. Iwo athawa moto, tsono motoyo un’dzawanyekesa basi. Imwepo mun’dzadziwa kuti ine ndine Yahova, inepano ndikadzawanyang’anisa mwaukali.’”

8 “‘Dzikolo nin’dzalicitisa kukhala matere, thangwe iwo acita bzinthu mwakusaya kukhulupirika,’ walewa tenepo Yahova Mbuya Mkululetu.”

16 Yahova adalewalewa nande pomwe kuti: 2 “Iwe mwana wa munthu, dziwisa Jeruzalemu bza bzicito bzace bzakunyantsa. 3 Ulewe kuti, ‘Yahova Mbuya Mkululetu akuuza Jeruzalemu kuti: “Iwepo udacokera ku dziko la Akanani ndipo udabadwira kumweko. Pai wako akhali wa dzinza la Amori ndipo mai wako akhali Mhiti. 4 Pa ntsiku yomwe iwepo udabadwa, tcombotcombo lako liribe kugwatidwa, alibe kukusambika na madzi kuti ucene ne alibe kukuikha munyu ndipo ne alibe kukukulungira na nguwo. 5 Palibe munthu omwe adakubvera ntsisi kuti akucitire cibodzi mwa bzinthu bzimwebzi. Palibe omwe adakubvera ntsisi. M’mbuto mwace, pa ntsiku yomwe udabadwa, udathusidwa kuthengo thangwe wanthu adakuwenga.

6 “‘“Pomwe ndidapita na pamwepo, ndidakuwona ukuthusa-thusa minyendo pa mulopa wako ndipo uli gone pa mulopa wakoyo, tenepo, inepano ndidalewa kuti: ‘Pitiriza kukhala na moyo.’ Inde, ndidalewa bzimwebzi pomwe ukhadagona pa mulopa wakoyo kuti: ‘Pitiriza kukhala na moyo.’ 7 Ndidakucitisa kukhala thimu likulu la wanthu ninga miti yomwe ikuphukira m’thengo. Iwepo wakula, watalimpha ndipo ukuphatisa basa bzakudekesera bzabwino kwene-kwene. Masuku yako yakula ndipo tsisi lako lakulambo, tsono iwepo ukali pezi.”’

8 “‘Pomwe ndidapita na pamwepo, ndidakuwona kuti ukhana msinkhu wakuthemera kulewa mafala ya lufoyi. Tenepo ndidakufuthulira cakubvala cangu,* ndicikubvazika kuti uleke kukhala pezi. Ndidalumbira ndicicita mpangano na iwepo ndipo iwepo udakhala wangu,’ walewa tenepo Yahova Mbuya Mkululetu. 9 ‘Kuthumizira bzimwebzi, ndidakusambika na madzi, ndidatsuka mulopa wako ndipo ndidakudzola mafuta. 10 Tenepo ndidakubvazika cakubvala cakubordari,* ndipo ndidakupasa ntsapato za khanda labwino. Ndidakukulungira pa nguwo yabwino kwene-kwene ndicikubvazika bzakubvala bzakuumira. 11 Ndidakuikha bzakudekesera, ndidakubvazika mapulsera m’manja mwako ndipo ndidakubvazikambo kolari m’khosi mwako. 12 Ndidakuikha mphete pa mphuno ndipo ndidakubvazika mphete m’makutu, ndicikubvazikambo korowa mu msolo. 13 Iwepo ukhabzidekesa na oro na prata. Ukhabvala bzakubvala bzabwino, nguwo zakuumira na bzakubvala bzakubordari. Ukhadya ufa bwakunyodoka, uci na mafuta ya azeite. Udakhala wakudeka kwene-kwene ndipo ukhathemera kukhala mambo wacikazi.’”

14 “‘Thangwe ra kudeka kwako, dzina lako lidabvekera pakati pa mitundu ya wanthu, pakuti likhali labwino kwene-kwene thangwe ra ulemerero bwangu bomwe ndidakupasa,’ walewa tenepo Yahova Mbuya Mkululetu.”

15 “‘Koma udayamba kuthemba kudeka kwako ndipo udakhala puta thangwe ra kubvekera kwako. Iwepo ukhabzipereka kwa munthu ali-wentse omwe akhakufuna ndipo kudeka kwako kudakhala kwawo. 16 Iwepo udatenga bzakubvala bzako bzinango bza kore zakusiyana-siyana kuti udekesere mbuto zakupambulika zomwe ukhacitira uputa. Bzimwebzi bzikhafunika lini kucitika ndipo bzileke kudzacitika pomwe. 17 Kuthumizira bzimwebzi, iwepo udatenga bzinthu bzakufunika kwene-kwene bzakukonzedwa na oro na bzakukonzedwa* na prata bzomwe inepano ndikhadakupasa ndipo udakonzera bzifanikiso bza wanthu ucicita nabzo uputa. 18 Udatenga bzakubvala bzako bzakubordari ucifunikiza bzifanikisobzo.* Udabzipasa mafuta yangu na bzakununtcirisa bzangu. 19 Ndipo pau yomwe ndidakupasa kuti udye yakukonzedwa na ufa bwakunyodoka, mafuta na uci, iwepo udabziperekambo kwa bzifanikisobzo ninga bzakununtcirisa.* Bzimwebzi ndibzoletu bzomwe bzidacitika,’ walewa tenepo Yahova Mbuya Mkululetu.”

20 “‘Watenga wana wacimuna na wacikazi omwe ukhadandiberekera, uciwapereka ntsembe ku bzifanikiso. Kodi uputabo bukhali lini bwakukwana? 21 Iwepo wapha wana wangu uciwapereka ninga ntsembe mwakuwatentha pa moto. 22 Pomwe ukhacita bzinthu bzentse bzakunyantsabzi pabodzi na uputa, ukhakumbukira lini ntsiku zomwe ukhali tswaka, pomwe ukhali pezi ndipo ukhathusa-thusa minyendo yako pomwe ukhadagona pa mulopa wako. 23 Pomwe wamala kucita bzinthu bzakuipa bzentsenebzi, tsoka, tsoka kwa iwepo,’ walewa tenepo Yahova Mbuya Mkululetu. 24 ‘Wakonza mitunthu na mbuto zakupambulika mu mzinda uli-wentse. 25 Wamanga mbuto zako zakupambulika pa mbuto zakubvekera kwene-kwene mu mseu uli-wentse ndipo wacitisa kudeka kwako kukhala cinthu cakunyantsa, mwa kubzipereka* kwa ali-wentse omwe akhapita na pamwepo, ndipo wathumizira bzicito bzako bza uputa. 26 Iwepo wacita uputa na azivizinyu wako Aedjipito, omwe ana kalanga kakusaya kuphatika ndipo wandikalipisa na bzicito bzako bzizinji bza uputa. 27 Ndipopa nin’dzakufuthulira boko langu na kucepesa cakudya cako. Nin’dzakupereka kwa wana wacikazi wa Afilisteu, akazi omwe ambakuwenga, omwe akuipidwa na bzicito bzako bzakunyantsa kuti acite nawe bzinthu bzomwe iwo an’funa.

28 “‘Pakuti bzomwe ukhacitabzo bzikhakukwanira lini, udakacita uputa na Asiriya. Tsono napo pomwe udamala kucita nawo uputabo, bziribe kukwana basi. 29 Tenepo, iwepo udathumizira uputa bwako mpaka kufika dziko la anyamalonda* na Akalideya,* tsono bziribe kukwana basi. 30 Mtima wako ukhaduwala* pomwe ukhacita bzinthu bzentsenebzi ninga puta wakusaya manyazi,’ walewa tenepo Yahova Mbuya Mkululetu. 31 ‘Tsono pomwe udamanga mtunthu wako pa mbuto yakuwonekera mu mseu uli-wentse na kukonza mbuto zakupambulika zapadzulu m’misika iri-yentse, ukhacita lini bzinthu ninga puta thangwe ukhafuna lini kupagalidwi. 32 Iwepo ndiwe puta omwe umbafambizana na amuna winango m’mbuto mwa mwamuna wako! 33 Wanthu ambapasa maputa mphaso, tsono iwepo ndiwe omwe umbapereka mphaso kwa wentse omwe ambakukhumba, ndipo iwepo umbapereka bobobo kwa wanthu wakucokera m’mbuto zentse kuti abwere kwa iwepo kuti udzacite nawo uputa. 34 Iwepo ndiwe wakusiyana na akazi winango omwe ambacita uputa. Palibe winango omwe ambacita uputa ninga iwepo. Iwepo ndiwe omwe umbapagali amuna pomwe iwo ndiwo omwe akhafunika kukupagali. Bzomwe iwepo umbacita mpsakusiyaniratu na winango.’

35 “Tenepo iwe putawe, bvaya bzomwe Yahova an’funa kukuuza. 36 Yahova Mbuya Mkululetu walewa kuti: ‘Pakuti walatiza cikhumbo cako cakunyantsa mwakupitirira malire ndipo wanthu akuwona uli pezi pomwe ukhacita uputa na akwende wako pabodzi na bzifanikiso bzako bzentse bzakuipa na bzakunyantsa,* ucipereka mulopa wa wana wako ninga ntsembe ku bzifanikisobzo, 37 nin’dzatsonkhanisa akwende wako wentse omwe ukhawakondwesa, wentse omwe ukhawafuna na wentse omwe ukhawawenga. Nin’dzatsonkhanisa wanthu wakucokera ku mbali zentse kuti awengane nawe. Nin’dzakukhundula pamaso pawo ndipo iwo an’dzakuwona uli pezi-pezi.

38 “‘Ndipo nin’dzakupasa cirango comwe cimbaperekedwa kwa akazi wakulowodwa omwe acita uputa na kwa akazi omwe apha munthu, ndipo mulopa wako un’dzacosedwa* mwaukali na mwa ntcanje. 39 Nin’dzakupereka m’manja mwawo ndipo iwo an’dzapfudza mitunthu yako na mbuto zako zakupambulika. Iwo an’dzakukhundula bzakubvala, an’dzakutengera bzinthu bzako bzakufunika kwene-kwene,* ndipo an’dzakusiya uli pezi, ulibe kubvala. 40 Iwo an’dzakubweresera thimu la wanthu lomwe lin’dzakuboma na minyala ndipo lin’dzakupha na maxipada yawo. 41 Iwo an’dzacontha nyumba zako na moto ndipo an’dzakulanga akazi azinji akuwona. Inepano nin’dzamalisa uputa bwako ndipo iwepo un’dzasiya kuwapagali. 42 Ciya cangu cin’dzamalira iwepo, ndipo ukali bwangu bomwe ndikhanabo bun’dzamala. Mtima wangu un’dzaderekha ndipo nin’dzakhala lini pomwe na ukali.’

43 “‘Pakuti ulibe kukumbukira ntsiku zomwe ukhali tswaka ndipo wandikalipisa na bzinthu bzentse bzomwe udacita, inepano nin’dzacitisa kuti iwepo ubonere na bzomwe udacita. Iwepo un’dzapitiriza lini pomwe na khalidwe lako lakuipa ndipo un’dzacita lini pomwe bzinthu bzakunyantsa,’ walewa tenepo Yahova Mbuya Mkululetu.

44 “‘Wentse omwe ambaphatisa basa mimwani an’dzalewambo mwani wakuti: “Bzomwe mwana na mai ambacita, ndendende.” 45 Iwepo watengera mai wako omwe akhanyoza mwamuna wawo na wana wawo wacimuna, ndipo ndiwe m’bale wa mpfumakazi zako zomwe zikhanyoza azimuna wawo na wana wawo wacimuna. Mai wako akhali Mhiti ndipo pai wako akhali wa dzinza la Amori.’”

46 “‘M’bale wako wakuyamba* ni Samariya, omwe ambakhala kumbali yako ya ku norte pabodzi na wana wace wacikazi, ndipo m’bale wako mng’ono ni Sodoma, omwe ambakhala kumbali yako ya ku suli pabodzi na wana wace wacikazi. 47 Ulibe kundofamba kokha m’njira zawo na kutewezera bzicito bzawo bzakunyantsa, koma mu kanthawe kakucepa udayamba kucitambo bzinthu bzakuipa kwene-kwene kuposa iwo.’ 48 Yahova Mbuya Mkululetu walewa kuti: ‘Pana ine Mulungu wamoyo, ndikulumbira kuti m’bale wako Sodoma na wana wace wacikazi alibe kucita bzinthu bzomwe iwepo na wana wako wacikazi mwacita. 49 Bvaya, m’bale wako Sodoma adaphonya ibzi: Iye pabodzi na wana wace wacikazi akhabzikuza, akhana phoso lizinji ndipo akhakhala alibe thupo, tsono iye alibe kuthandiza anyakusaya na wakusauka. 50 Iwo adapitiriza kubzikuza na kucita bzinthu bzakunyantsa pamaso pangu, ndipopa ndidawona kuti bzikhali bwino kuwapfudza.

51 “‘Napo Samariya caiye alibe kucita kati na kati ya pikado zako. Wacita bzinthu bzizinji kwene-kwene bzakunyantsa kuposa azibale wako, mpaka udacitisa kuti iwo awoneke ninga wakulungama thangwe ra bzinthu bzako bzentse bzakunyantsa bzomwe ukhacita. 52 Tsapano un’nyala, thangwe wathandizira* bzicito bza azibale wako wacikazi. Iwo mbakulungama kuposa iwepo thangwe pikado zomwe iwepo udacita, n’zakunyantsa kwene-kwene kuposa zomwe iwo adacita. Tsapano cita manyazi ndipo khala wakunyozeka, pakuti iwepo wacitisa azibale wako wacikazi kuwoneka ninga wakulungama.’

53 “‘Nin’dzatsonkhanisa wanthu wawo omwe adawaphata kuti ayende nawo ku ukapolo, omwe ni anyakuphatidwa wa ku Sodoma pabodzi na wana wawo wacikazi, anyakuphatidwa ku Samariya pabodzi na wana wacikazi. Nin’dzatsonkhanisambo pabodzi na iwo wanthu wako omwe adaphatidwa aciyendesedwa ku ukapolo 54 kuti iwepo udzanyale. Iwepo un’dzacita manyazi thangwe udawacitisa kubzibva bwino. 55 Azibale wako caiwo wacikazi, Sodoma na Samariya pabodzi na wana wawo wacikazi, an’dzakhala pomwe ninga momwe akhaliri pakuyamba ndipo iwepo pabodzi na wana wako caiwo wacikazi mun’dzakhala pomwe ninga momwe mukhaliri pakuyamba. 56 M’bale wako wacikazi Sodoma ukhamuwona ninga kuti akhathemera lini kugumidwa na iwepo pa nthawe yomwe iwepo ukhabzikuza, 57 pomwe bzicito bzako bzakuipa bzikhanati kuwonekera. Tsapano wana wacikazi wa Siriya na azivizinyu wace akukutukwana ndipo wana wacikazi wa Afilisteu na wentse omwe ambakhala nawe pafupi akukunyoza. 58 Iwepo un’dzabonera na khalidwe lako lakupasa manyazi na bzicito bzako bzakunyantsa,’ walewa tenepo Yahova.”

59 “Yahova Mbuya Mkululetu walewa kuti: ‘Tsapano nin’cita nawe ndendende bzomwe udacita, thangwe udanyoza lumbiro na kuphonyera mpangano wangu. 60 Tsono ine nin’dzakumbukira mpangano omwe ndidacita na iwepo pomwe ukhali tswaka, ndipo nin’dzakhazikisa mpangano wakusaya kumala na iwepo. 61 Un’dzakumbukira bza khalidwe lako lakuipa ndipo un’dzacita manyazi pomwe un’dzatambira azibale wako wacikazi akulu na ang’ono, ndipo ine nin’dzakupasa kuti akhale wana wako wacikazi, koma sikuti thangwe ra mpangano omwe ndidacita na iwepo.’

62 “‘Ine nin’dzakhazikisa mpangano wangu na iwepo ndipo un’dzadziwa kuti ine ndine Yahova. 63 Tenepo, iwepo un’dzakumbukira ndipo un’dzacita manyazi kwene-kwene, mwakuti un’dzakwanisa lini kufungula mulomo thangwe ra manyazi yako ndikadzakulekerera napo kuti udacita bzinthu bzentsenebzi,’ walewa tenepo Yahova Mbuya Mkululetu.”

17 Yahova adalewalewa nande pomwe kuti: 2 “Iwe mwana wa munthu, uza Ajirayeri cithumbudzulo comwe ciri ninga ciratizo. 3 Ulewe kuti: ‘Yahova Mbuya Mkululetu walewa kuti: “Ku Lebanoni kudabwera mphungu ikulu yomwe ikhana maphaphidwe makulu na matali ndipo ikhana matenga mazinji ya kore zakusiyana-siyana, ndipo idatcola ntsonga ya muti wa mkungudza.* 4 Mphunguyo idatcola ntsonga itete yapadzulu iciyenda nayo ku dziko la anyamalonda,* ndipo idakaibzala mu mzinda omwe una amuna wa malonda. 5 Tenepo idatenga mbeu ya m’dzikolo ndipo idakaibzala m’munda wa ndovolo. Mphunguyo idabzala mbeuyo ninga muti* omwe umbakula m’mphepete mwa madzi mazinji. 6 Mbeu yace idaphukira ndipo idakhala muti wa uva mfupi, ndipo masamba yace yakhadagudira mpaka pantsi ndipo mizi yace ikhakula pantsi pace. Tenepo idakhala muti wa uva, idaphukira icikhala na mthambi.

7 “‘“Ndipo kudabwera pomwe mphungu inango ikulu yomwe ikhana maphaphidwe makulu na matenga matali-matali. Patsogolo pace, mwakufunisisa muti wa uva ule udafuthula mthambi zace na mizi yace kucokera pomwe ukhadabzalidwa, mpaka pomwe pakhana mphunguyo kuti iyo ithirizire. 8 Mutiyo ukhadabzalidwa kale pa mbuto ya ndovolo, pafupi na madzi mazinji kuti ukhale na mthambi, ubale bzisapo nakuti ukhale muti ukulu wa uva.”’

9 “Ulewe kuti: ‘Yahova Mbuya Mkululetu walewa kuti: “Kodi muti umweyu bzinthu bzin’dzaufambira bwino? Kodi munthu an’dzazula lini mizi yace kuti bzisapo bzace bzibvunde nakuti ntsonga zace zifote? Mutiyo un’dzauma kwene-kwene ndipo un’dzafunikira lini boko lamphanvu ayai wanthu azinji kuti auzule pabodzi na mizi yace. 10 Napo kuti mutiyo udacita kuzulidwa ucikabzalidwa kunango, kodi bzinthu bzin’dzaufambira bwino? Mphepo ya kumabvadzuwa ikadzafuliza mutiyo, kodi un’dzaumiratu lini? Mutiyo un’dzauma pa mbuto yomwe udabzalidwapo.”’”

11 Ndipo Yahova adalewalewa nande pomwe kuti: 12 “Ndaphata minyendo, uza wanthu wakupandukawa kuti: ‘Kodi imwepo mukuzindikira lini kuti bzimwebzi bzikuthandauza ciyani?’ ‘Mambo wa ku Babiloniya adabwera ku Jeruzalemu, adatenga mambo na nduna za kumweko aciyenda nawo ku Babiloniya. 13 Kuthumizira bzimwebzi, adatenga munthu m’bodzi wa m’banja la umambo ndipo adacita naye mpangano acimulumbirisa. Patsogolo pace, adatenga amuna wakubvekera wa m’dzikomo aciyenda nawo, 14 kuti umambobo bunyozeke bucileka kukhala na mphanvu, nakuti bupitirize kukhala pokha-pokha penu wanthuwo angadateweza mpangano omwe ukhadacitidwa. 15 Tsono pakumalizira pace, iye* adapandukira mamboyo* mwa kutumiza mitumi ku Edjipito kuti kumweko ikapasidwe makavalo na thimu la acikunda. Tsono kodi bzin’dzamufambira bwino? Kodi omwe akucita bzinthu bzimwebzi an’dzasiidwa ne kulangidwa? Kodi iye akasaya kuteweza mpangano angasiidwe ne kulangidwa?’

16 “‘Yahova Mbuya Mkululetu walewa kuti: “Pana ine Mulungu wamoyo, iye an’dzafera ku Babiloniya komwe kumbakhala mambo omwe adamusankhula* kuti akhale mambo,* thangwe iye wanyoza lumbiro lace ndipo alibe kuteweza mpangano. 17 Ndipo thimu lentse la acikunda wa Farawo lin’dzamuthandiza lini pa nkhondo, acikunda wa ku Babiloniya akadzamanga mitunthu yakumenyera nkhondo na mimuro kuzungulira mzindayo kuti aphe wanthu azinji. 18 Iye adanyoza lumbiro ndipo alibe kuteweza mpangano. Adacita bzinthu bzentsenebzi napo kuti akhadapicira, ndipopa an’dzapulumuka lini.”’

19 “‘Tenepo Yahova Mbuya Mkululetu walewa kuti: “Pana ine Mulungu wamoyo, ndikulumbira kuti: Nin’dzamulangadi thangwe ra kunyoza lumbiro langu na thangwe rakuti alibe kuteweza mpangano wangu. 20 Nin’dzamuthusira ukonde bwangu ndipo iye an’dzaphatidwa na ukonde bwangu bwa msodzi. Tenepo nin’dzamuyendesa ku Babiloniya, ndipo nin’dzapita m’mwemo kuti ndidzamutonge thangwe ra kusaya kukhulupirika kwace. 21 Acikunda wentse omwe adathawa, an’dzafa na xipada ndipo omwe an’dzapulumuka an’dzabalalisidwira ku mbuto zentse. Ndipo imwepo mun’dzadziwa kuti ine Yahova ndine omwe ndidalewa.”’

22 “‘Yahova Mbuya Mkululetu walewa kuti: “Nin’dzatcola ntsonga itete yapadzulu ya muti wa mkungudza ndipo nin’dzaibzala. Nin’dzabudula ntsonga itete ya mthambi zace, ndipo nin’dzaibzala padzulu pa phiri litali. 23 Nin’dzaibzala pa phiri litali la Jirayeri, ndipo mthambi zace zin’dzakula. Iyo in’dzabala bzisapo ndipo in’dzakhala muti ukulu wa mkungudza. Ndipo mbalame za mtundu uli-wentse zin’dzakhala pantsi pa mutiyo na pa mthunzi wa masamba yace. 24 Ndipo miti yentse ya m’thengo in’dzadziwa kuti ine Yahova, ndine omwe ndidatereza muti utali na kukwiza muti ufupi. Ndaumisa muti wakupswipirira ndipo muti wakuuma ndaucitisa kuti uphukire. Ine Yahova ndine omwe ndidalewa bzimwebzi ndipo ndidabzicita.”’”

18 Yahova adalewalewa nande pomwe kuti: 2 “Kodi ni mwani uponi umweyu omwe ukulewedwa mu Jirayeri wakuti: ‘Abereki adya uva bwakuwawa, tsono wana ndiwo omwe abva dziriza’?

3 “Yahova Mbuya Mkululetu walewa kuti: ‘Pana ine Mulungu wamoyo ndikulumbira kuti, imwepo mun’dzalewa lini pomwe mwani umweyu mu Jirayeri. 4 Pakuti moyo* wentse ngwangu. Moyo wa pai na wa mwana ngwangu. Tenepo, moyo omwe un’cita pikado, ndiwo omwe un’dzafa.*

5 “‘Tiyezezere kuti munthu ngwakulungama, ndipo ambacita bzinthu bzakulungama na bzabwino. 6 Iye ambadya lini ntsembe zakuperekedwa ku bzifanikiso m’mapiri, ambathemba lini bzifanikiso bzakunyantsa* bza nyumba ya Jirayeri, ambacita lini upombo na mkazi wa mwenekaciro ndipo ne ambacita lini malume ya pamphasa na mkazi omwe ali ku mwezi, 7 iye ambaboneresa lini munthu, m’mbuto mwace ambabwezera cinthu comwe adaphatira anyamangawa, ambabera lini munthu, m’mbuto mwace ambapasa cakudya wanthu omwe ana njala na bzakubvala kwa wanthu omwe alibe, 8 ambafiyalisi lini na juro,* ambafuna lini kugumana phindu pa bzinthu bzomwe wakumbiza mwanzace, m’mbuto mwace ambalamba kucita bzinthu mwakusaya cirungamo, ambatonga mwa cirungamo nkhani ya wanthu awiri omwe anesana, 9 ambafamba nthawe zentse mwakubverana na malamulo yangu ndipo ambabvera bzakutonga bzangu kuti acite bzinthu mwakukhulupirika. Munthu umweyu ngwakulungama ndipo an’dzapitiriza kukhala na moyo,’ walewa tenepo Yahova Mbuya Mkululetu.

10 “‘Tsono tiyezezere kuti iye ana mwana wacimuna omwe ni mbava, nyakupha,* ayai ambacita bzinthu bzinango ninga bzimwebzi, 11 (napo pai wace ambacita lini bzinthu ninga bzimwebzi). Mwanayo ambadya ntsembe zakuperekedwa ku bzifanikiso m’mapiri, ambacita upombo na* mkazi wa mwenekaciro, 12 ambacitira bzakuipa nyakubonera na nyakusauka, ambaba ndipo ambabwezera lini cinthu comwe akhadaphatira munthu omwe adamufiyali, ambathemba bzifanikiso bzakunyantsa, ambacita bzinthu bzakunyantsa, 13 ambafiyalisi na juro ndipo ambafuna kugumana phindu pa bzinthu bzomwe wakumbiza mwanzace. Mwana umweyo an’dzapitiriza lini kukhala na moyo. Kulewa cadidi iye an’dzafa thangwe ra bzinthu bzentse bzakunyantsa bzomwe ambacita ndipo mulandu wentse wa mulopa un’dzakhala pa iye.

14 “‘Tsono tiyezezere kuti pai ana mwana wacimuna omwe akuwona pikado zentse zomwe paiyo akucita, napo akuwona bzimwebzo, iye akucitambo lini. 15 Iye ambadya lini ntsembe zakuperekedwa ku bzifanikiso m’mapiri, ambathemba lini bzifanikiso bzakunyantsa bza nyumba ya Jirayeri, ambacita lini upombo na mkazi wa mwenekaciro, 16 ambaboneresa lini munthu, ambabwezera cinthu comwe adaphatira anyamangawa, ambabera lini munthu, ambapasa cakudya wanthu omwe ana njala na bzakubvala wanthu omwe alibe, 17 ambaboneresa lini anyakusauka, ambafiyalisi lini na juro, ambafuna lini kugumana phindu pa bzinthu bzomwe wakumbiza mwanzace, ambafamba nthawe zentse mwakubverana na malamulo yangu ndipo ambabvera bzakutonga bzangu. Munthu umweyo an’dzafa lini thangwe ra bzakuphonya bza pai wace. Kulewa cadidi, iye an’dzapitiriza kukhala na moyo. 18 Tsono pai wace adacita bzinthu mwacinyengo, adabera m’bale wawo, adacita bzinthu bzakuipa pakati pa wanthu wawo, iwo an’dzafa thangwe ra bzakuphonya bzawo.

19 “‘Tsono imwepo mun’dzabvunza kuti: “Thangwe ranyi mwanayo alibe mulandu thangwe ra bzakuphonya bza pai wace?” Ni thangwe rakuti mwanayo adacita bzinthu bzakulungama na bzabwino, adateweza malamulo yangu na kuyabvera. Kulewa cadidi, iye an’dzapitiriza kukhala na moyo. 20 Munthu omwe an’cita pikadoyo ndiye omwe an’dzafa. Mwana an’dzakhala lini na mulandu thangwe ra kuphonya kwa pai wace, ndipo pai an’dzakhalambo lini na mulandu thangwe ra kuphonya kwa mwana wace. Munthu wakulungama an’dzatongedwa mwakubverana na bzinthu bzakulungama bzomwe adacita ndipo munthu wakuipa an’dzatongedwa mwakubverana na bzinthu bzakuipa bzomwe adacita.

21 “‘Tsono munthu wakuipa akasiya pikado zace zentse zomwe akhacita, aciteweza malamulo yangu yentse na kucita bzabwino na bzakulungama, kulewa cadidi iye an’dzapitiriza kukhala na moyo. Iye an’dzafa lini. 22 Iye an’dzalangidwa lini thangwe ra bzakuipa bzomwe adacita, koma iye an’dzapitiriza kukhala na moyo thangwe ra kucita bzinthu bzakulungama.’

23 “Yahova Mbuya Mkululetu walewa kuti: ‘Kodi ine nimbakomedwa na infa ya munthu wakuipa? Ine nimbafuna kuti iye acinje makhalidwe yace kuti apitirize kukhala na moyo.’

24 “‘Tsono munthu wakulungama akasiya kucita bzinthu bzabwino, aciyamba kucita bzinthu bzakuipa* mwakucita bzinthu bzentse bzakunyantsa bzomwe wanthu wakuipa ambacita, kodi iye an’dzapitiriza kukhala na moyo? Palibe ne na cinthu cibodzi cabwino comwe iye adacita comwe cin’dzakumbukiridwa. Iye an’dzafa thangwe ra kusaya kukhulupirika kwace na pikado yace.

25 “‘Tsono imwepo mun’dzalewa kuti: “Bzomwe Yahova ambacita mpsakusaya kulungama.” Ndaphata minyendo, iwe nyumba ya Jirayeri, kodi ine nimbacita bzinthu bzakusaya kulungama? Ndimwe lini omwe mumbacita bzinthu bzakusaya kulungama?

26 “‘Munthu wakulungama akasiya kucita bzinthu bzabwino, aciyamba kucita bzinthu bzakuipa acifa, iye an’dzafa thangwe ra kuphonya kwace.

27 “‘Tsono munthu wakuipa akasiya kucita bzinthu bzakuipa bzomwe akhacita aciyamba kucita bzinthu bzabwino na bzakulungama, iye an’dzapulumusa moyo* wace. 28 Iye akazindikira bzakuphonya bzace bzentse bzomwe akhacita acibzisiya, kulewa cadidi iye an’dzapitiriza kukhala na moyo. Iye an’dzafa lini.

29 “‘Tenepo, nyumba ya Jirayeri in’dzalewa kuti: “Bzomwe Yahova ambacita mpsakusaya kulungama.” Iwe nyumba ya Jirayeri, kodi ine nimbacitadi bzinthu bzakusaya kulungama? Ndimwe lini omwe mumbacita bzinthu bzakusaya kulungama?’

30 “Yahova Mbuya Mkululetu walewa kuti: ‘Iwe nyumba ya Jirayeri, nin’dzatonga ali-wentse wa imwepo mwakubverana na bzicito bzace. Siyani, inde siyani bzakuphonya bzanu bzentse kuti bzileke kukhala ninga mwala wakukhukhumudwisa kwa imwepo bzicikucitisani kukhala na mulandu. 31 Iwe nyumba ya Jirayeri, siya bzinthu bzakuipa bzomwe ukhacita ndipo cinja mtima wako na makumbukidwe yako kuti uleke kufa.’

32 “Yahova Mbuya Mkululetu walewa kuti: ‘Nimbakomedwa lini munthu akafa. Tenepo cinjani makhalidwe yanu kuti mukhale na moyo.’”

Iyo idagona pakati pa mphondolo zamphanvu ndipo idafuwa wana wace.

 3 Iyo yafuwa m’bodzi mwa wana wace ndipo mwanayo wakula acikhala mphondolo yamphanvu.

 5 Mphondolo ikaziyo idadikhirira kubwera kwa mwana waceyo, mpaka pomwe idatsimikizira kuti mwanayo angadabwerera lini pomwe.

Na tenepo, iyo idatenga mwana munango icimulera mpaka kukhala mphondolo yamphanvu.

 6 Mwanayo adafamba pakati pa mphondolo zinango, acikhala mphondolo yamphanvu.

Iyo yapfunza kuphata nyama mpaka kudya wanthu.

 9 Adamanga mphuno yace na ngoloweko, ndipo adaiikha m’thanga aciyenda nayo kuna mambo wa ku Babiloniya.

Adaifungira kumweko kuti baludya lace lileke kubvekera pomwe m’mapiri ya Jirayeri.

10 Mai wako akhali ninga muti wa uva m’mulopa wako, wakubzalidwa pafupi na madzi.

Iwo akhabala bzisapo ndipo akhana mthambi zizinji thangwe akhali pafupi na madzi mazinji.

11 Mthambi zace zidakula zicikhala zakulimba, zicikhala zakuthemera kukonzera mpsimbo za amambo.

Mthambi zace zakulimba zidakhwadzulidwa ziciuma ndipo zidapsa na moto.

“‘Imweyi ni nyimbo yakulira, ndipo in’dzaimbidwa na wanthu pakulira.’”

20 Mu gole laci 7, mwezi wacixanu, pa ntsiku yaci 10 ya mweziyo, akulu-akulu winango wa Jirayeri adabwera ndipo adakhala kutsogolo kwangu kuti adzabvunze Yahova. 2 Tenepo Yahova adalewalewa nande kuti: 3 “Yahova Mbuya Mkululetu walewa kuti: ‘Iwe mwana wa munthu, lewalewa na akulu-akulu wa Jirayeri ndipo uwauze kuti: “Mwabwera kudzandibvunza? Pana ine Mulungu wamoyo nin’kutawirani lini cinthu ciri-centse, walewa tenepo Yahova Mbuya Mkululetu.”’”

4 “Kodi wakonzeka kuti uwatonge? Iwe mwana wa munthu, wakonzeka kuti uwatonge? Auze bzinthu bzakunyantsa bzomwe makolo yawo yakale yadacita. 5 Auze kuti: ‘Yahova Mbuya Mkululetu walewa kuti: “Pa ntsiku yomwe ndidasankhula Jirayeri, ndidacita lumbiro na wana* wa nyumba ya Djakobo ndipo ndidacitisa kuti iwo andidziwe mu dziko la Edjipito. Inde ndidalumbira kwa iwo ndiciwauza kuti: ‘Ine ndine Yahova Mulungu wanu.’ 6 Pa ntsiku imweyi inepano ndidalumbira kuti ningadawacosa mu dziko la Edjipito, ndiciwayendesa mu dziko lomwe ndikhadawasankhulira,* dziko lakuyerera mkaka na uci. Limweri likhali lakudeka kuposa madziko yentse. 7 Tenepo ine ndidawauza kuti: ‘Ali-wentse wa imwepo an’funika kutaya bzinthu bzakunyantsa bzomwe ambabzinamata. Lekani kubzipswipiza na bzifanikiso bzakunyantsa* bza ku Edjipito. Ine ndine Yahova Mulungu wanu.’

8 “‘“Tsono iwo adandipandukira ndipo alibe kufuna kundibvera. Iwo alibe kutaya bzinthu bzakunyantsa bzomwe akhabzinamata, ndipo alibe kusiya bzifanikiso bzakunyantsa bza ku Edjipito. Ndipopa ndidapicira kuwakhuthulira ciya cangu na kuwatulira ukali bwangu mu dziko la Edjipito. 9 Ndacita bzimwebzi thangwe ra dzina langu kuti lileke kupswipizidwa pakati pa mitundu ya wanthu yomwe iwo akhakhala. Pakuti ine ndidawacitisa kuti iwo* andidziwe pakati pa mitunduyo, pomwe ndidawacosa* mu dziko la Edjipito. 10 Tenepo, ndidawacosa mu dziko la Edjipito, ndiciwatsogolera m’dambo.

11 “‘“Ndawapasa bzakutonga bzangu ndiciwadziwisa malamulo yangu, kuti munthu omwe aniyateweza akhale na moyo. 12 Ndawapasa masabudu yangu ninga cizindikiro pakati pa ine na iwo, kuti iwo adziwe kuti ine Yahova ndine omwe nimbawacenesa.

13 “‘“Tsono nyumba ya Jirayeri yandipandukira m’dambo. Iwo alibe kufamba mwakubverana na bzakutonga bzangu, ndipo alamba malamulo yangu yomwe yangadacitisa munthu kukhala na moyo angadayabvera. Iwo apswipiza kwene-kwene masabudu yangu. Tenepo, ndapicira kuwakhuthulira ukali bwangu m’dambo kuti ndiwamalize. 14 Ndacita bzimwebzi thangwe ra dzina langu kuti lileke kupswipizidwa pamaso pa mitundu ya wanthu yomwe idawona pomwe ine ndikhawapulumusa.* 15 Ine ndidawalumbirirambo m’dambo kuti ningadawayendesa lini ku dziko lomwe ndikhadawapasa, dziko lakuyerera mkaka na uci, lomwe likhali lakudeka kuposa madziko yentse, 16 thangwe iwo alibe kubvera bzakutonga bzangu, alibe kufamba mwakubverana na malamulo yangu ndipo apswipiza masabudu yangu, pakuti mitima yawo yatewera bzifanikiso bzawo bzakunyantsa.

17 “‘“Tsono ndidawabvera ntsisi* ndipo ndiribe kuwapfudza ne kuwamala m’dambo. 18 Inepano ndidauza wana wawo m’dambo kuti: ‘Lekani kufamba mwakubverana na bzakutonga bza makolo yanu yakale ne kukoya malamulo yawo, ayai kubzipswipiza na bzifanikiso bzawo bzakunyantsa. 19 Ine ndine Yahova Mulungu wanu. Fambani mwakubverana na bzakutonga bzangu ndipo bverani malamulo yangu na kuyateweza. 20 Cenesani masabudu yangu ndipo iyo yan’dzakhala cizindikiro pakati pa ine na imwepo, kuti imwepo mudziwe kuti ine ndine Yahova Mulungu wanu.’

21 “‘“Tsono wanawo adayamba kundipandukira. Alibe kufamba mwakubverana na bzakutonga bzangu, alibe kubvera ne kuteweza malamulo yangu yomwe yangadacitisa munthu kukhala na moyo angadayabvera. Iwo adapswipiza masabudu yangu. Ndipopa ndidapicira kuwakhuthulira ukali bwangu na kuwatulira ciya cangu m’dambo. 22 Tsono inepano ndidabziphata ndipo ndidacita bzimwebzi thangwe ra dzina langu, kuti lileke kupswipizidwa pamaso pa mitundu ya wanthu yomwe idawona pomwe ine ndikhawapulumusa.* 23 Ndipo ndidawalumbirira m’dambo, kuti ningadawamwaza pakati pa mitundu ya wanthu na kuwabalalisira m’madziko yanango, 24 thangwe iwo alibe kuteweza bzakutonga bzangu, adalamba malamulo yangu, adapswipiza masabudu yangu ndipo adanamata bzifanikiso bzakunyantsa bza makolo yawo yakale. 25 Ndidawasiya kuti atewere bzakutonga bzakuphonyeka na malamulo yomwe yangadawapasa lini moyo. 26 Ndawasiya kuti apswipizidwe na ntsembe zawo pomwe akhatentha pamoto wana wawo wakuyamba kubadwa. Ndacita bzimwebzi kuti ndiwapfudze, kuti adziwe kuti ine ndine Yahova.”’

27 “Tsono iwe mwana wa munthu, uza nyumba ya Jirayeri kuti: ‘Yahova Mbuya Mkululetu walewa kuti: “Makolo yanu yakale yadandinyozambo mwakucita bzinthu mwakusaya kukhulupirika. 28 Ine ndidawayendesa ku dziko lomwe ndikhadalumbira kuwapasa. Pomwe adawona tumapiri twentse na miti yakugudira bwino, adayamba kupereka ntsembe zawo na mphaso zomwe ndiribe kukomedwa nazo. Kumweko akhapereka ntsembe zawo zakununtcira* na ntsembe za vinyu. 29 Ndipopa ndidawabvunza kuti: ‘Thangwe ranyi imwepo mumbayenda pa mbuto yapadzuluyi? (Imweyi imbacemeredwa Mbuto Yapadzulu mpaka lero.)’”’

30 “Tsapano uza nyumba ya Jirayeri kuti: ‘Yahova Mbuya Mkululetu walewa kuti: “Kodi imwepo mukubzipswipiza mwekha ninga momwe adacitira makolo yanu yakale, mwakutewera bzifanikiso bzakunyantsa kuti mucite nabzo upombo?* 31 Kodi imwepo mukubzipswipiza mpaka lero, mwakumbapereka ntsembe kuna bzifanikiso bzanu bzentse bzakunyantsa na kumbatentha wana wanu pamoto? Iwe nyumba ya Jirayeri, kodi inepano ningabvume kuti iwepo umbabwere kudzandibvunza?”’

“Yahova Mbuya Mkululetu walewa kuti: ‘Pana ine Mulungu wamoyo, nin’kutawirani lini cinthu ciri-centse. 32 Bzomwe mukukumbuka bzin’dzacitika lini, pomwe mukulewa kuti: “Mbatikhaleni ninga wanthu wa mitundu inango na wa madzinza manango, omwe ambanamata miti na minyala.’”

33 “Yahova Mbuya Mkululetu walewa kuti: ‘Pana ine Mulungu wamoyo ndikulumbira kuti: Ine nin’dzakutongani ninga mambo na boko langu lamphanvu na boko langu lakufuthuka kuti ndidzakukhuthulireni ciya cangu. 34 Na boko langu lamphanvu na lakufuthuka nin’dzakukhuthulirani ciya cangu ndipo nin’dzakucosani pakati pa wanthu, ndicikutsonkhanisani m’madziko yomwe ndidakubalalisirani. 35 Nin’dzakuyendesani ku dambo la mitundu ya wanthu ndipo kumweko nin’dzakutongani maso na maso.

36 “Yahova Mbuya Mkululetu walewa kuti: ‘Nin’dzakutongani ninga momwe ndidatongera makolo yanu yakale m’dambo, mu dziko la Edjipito. 37 Nin’dzakucitisani kuti mupite na pantsi pa mpsimbo ya makabusa, ndipo nin’dzakungingimizani kuti muteweze mpangano wangu. 38 Tsono nin’dzacosa pakati panu apanduki na omwe ambandiphonyera, pakuti nin’dzawacosa m’dziko lomwe akukhala ninga alendo, tsono iwo an’dzapita lini m’dziko la Jirayeri, ndipo imwepo mun’dzadziwa kuti ndine Yahova.’

39 “Tsono pakulewa bza imwepo nyumba ya Jirayeri, Yahova Mbuya Mkululetu walewa kuti: ‘Ali-wentse wa imwepo mbaayende akatumikire bzifanikiso bzace bzakunyantsa. Tsono mukacita bzimwebzo nin’dzakulambani ndipo mun’dzapswipiza lini pomwe dzina langu lakucena na ntsembe zanu pabodzi na bzifanikiso bzanu bzakunyantsa.’

40 “Yahova Mbuya Mkululetu walewa kuti: ‘Pa phiri langu lakucena, padzulu pa phiri la Jirayeri ni komwe nyumba yentse ya Jirayeri, Ajirayeri wentse an’dzanditumikira kumweko.* Kumweko nin’dzakomedwa namwe, ndipo nin’dzakukumbirani bzakupereka bzanu, mphaso zanu zabwino na bzinthu bzanu bzentse bzakucena. 41 Nin’dzakomedwa namwe thangwe ra mnuntci wabwino wa ntsembe zanu za bzakununtcirisa* ndikadzakucosani pakati pa mitundu inango na kukutsonkhanisani kucokera m’madziko yomwe ndidakubalalisirani, ndipo ine nin’dzabzicenesa pakati panu, pamaso pa mitundu ya wanthu.’

42 “‘Imwepo mun’dzadziwa kuti ine ndine Yahova, ndikadzakuyendesani ku dziko la Jirayeri, dziko lomwe ndidalumbira kupasa makolo yanu yakale. 43 Ndipo kumweko mun’dzakumbukira bza khalidwe lanu na bzicito bzanu bzentse bzomwe bzidakucitisani kukhala wakupswipa ndipo mun’dzanyantsidwa na bzinthu bzentse bzakuipa bzomwe mudacita. 44 Tenepo, imwe wa m’nyumba ya Jirayeri, imwepo mun’dzadziwa kuti ine ndine Yahova, ndikadzacita namwe bzinthu mwakubverana na dzina langu, sikuti na khalidwe lanu lakuipa ayai na bzicito bzanu bzacinyengo,’ walewa tenepo Yahova Mbuya Mkululetu.”

45 Ndipo Yahova adalewalewa nande pomwe kuti: 46 “Iwe mwana wa munthu, nyang’anisa ku mphimpha ya ku suli ndipo lewa bzinthu bzakuipa bzomwe bzin’dzacitika ku suli. Lewambo profesiya ya bzinthu bzomwe bzin’dzacitikira thengo la dziko la ku suli. 47 Uza thengo la ku suli kuti: ‘Bvaya mafala ya Yahova. Yahova Mbuya Mkululetu walewa kuti: “Ndikukuphatizirani moto, ndipo motoyo un’dzanyekesa miti yanu yentse, miti iwisi na yakuuma kubodzi. Motoyo un’dzathimisidwa lini ndipo un’dzabvula nkhope zentse za ku suli na za ku norte. 48 Ndipo wanthu wentse an’dzawona kuti ndine Yahova omwe ndaphatiza motoyo, ndipo motoyo un’dzathimisidwa lini.”’”

49 Tenepo ine ndidati: “Imwe Yahova Mbuya Mkululetu, iwo akundilewa kuti: ‘Kodi umweyu akundolewa lini mwani?’”

21 Yahova adalewalewa nande pomwe kuti: 2 “Iwe mwana wa munthu, nyang’anisa ku Jeruzalemu ndipo lewa bzinthu bzakuipa bzomwe bzin’dzacitikira mbuto zakucena ndipo lewambo maprofesiya yomwe yan’dzacitikira dziko la Jirayeri. 3 Uza dziko la Jirayeri kuti: ‘Yahova walewa kuti: “Ine ndine nyamadulanthaka wako. Nin’dzasolola xipada yangu m’cikhwama mwace ndipo nin’dzapha wanthu wakulungama na wakuipa pakati pako. 4 Pakuti nin’dzapha wanthu wakulungama na wakuipa pakati pako, nin’dzasolola xipada yangu m’cikhwama mwace kuna wentse, wa ku suli na wa ku norte. 5 Wanthu wentse an’dzadziwa kuti ine Yahova ndasolola xipada yangu m’cikhwama mwace, ndipo iyo in’dzabwerera lini pomwe m’cikhwama mwacemo.”’

6 “Iwe mwana wa munthu, buula uko ukutetemera na mantha, inde buula mwakuwawidwa mu mtima pamaso pawo. 7 Akakubvunza kuti: ‘Thangwe ranyi ukubuula?’ Uwatawire kuti: ‘Thangwe ra bzinthu bzomwe bzinicitika.’ Pakuti mwakusaya kupenukira bzinthu bzimwebzi bzin’dzacitika ndipo mitima ya wanthu wentse in’dzasungunuka na mantha, manja yawo yentse yan’dzatepa,* an’dzasunama ndipo mabondo yawo yentse yan’dzagoga madzi.* ‘Bzimwebzi bzin’dzacitika ndipo bzin’dzakwanisika,’ walewa tenepo Yahova Mbuya Mkululetu.”

8 Yahova adalewalewa nande pomwe kuti: 9 “Iwe mwana wa munthu, lewa profesiya yakuti: ‘Yahova akuti: “Lewa kuti: ‘Xipada! Xipada yanozedwa ndipo yamala kupukutidwa. 10 Iyo yanozedwa kuti iphe wanthu azinji ndipo yapukutidwa kuti iyetime ninga mpheni.’”’”

“Kodi tin’funika lini kukondwa?”

“‘Kodi iyo* in’dzalamba mpsimbo yakutongera ya mwana wangu ninga momwe imbacitira na miti yentsene?

11 “‘Iyo yaperekedwa kuti ipukutidwe nakuti iphatisidwe basa. Xipada imweyi yanozedwa ndipo yapukutidwa kuti iperekedwe m’manja mwa nyakupha.

12 “‘Iwe mwana wa munthu, lira ndipo dandaula pakuti xipadayo ikubwerera wanthu wangu. Iyo ikubwererambo akulu-akulu wentse wa Jirayeri. Iwo an’dzaphedwa na xipada pabodzi na wanthu wangu. Tenepo, latiza kuti wasunama. 13 Pakuti iyo yawonedwa kuti iri bwino, kodi n’ciyani comwe cin’dzacitika xipadayo ikadzalamba mpsimbo yakutongera? Mpsimboyo in’dzawoneka lini pomwe,’ walewa tenepo Yahova Mbuya Mkululetu.

14 “Tsono iwe mwana wa munthu, lewa profesiya, wombera m’manja ndipo lewa katatu kuti: ‘Xipada!’ Ni xipada yomwe ikupha wanthu, xipada yomwe ikupha wanthu azinji na xipada yomwe ikuwazungulira. 15 Mitima yawo in’dzasungunuka thangwe ra mantha ndipo azinji an’dzagwera m’misuwo ya mizinda yawo. Nin’dzapha na xipada wanthu azinji, inde, iyo ikuyetima ninga mpheni ndipo yapukutidwa kuti iphe wanthu azinji. 16 Iwe xipada, ceka mbali yamadidi ndipo tema mbali yamadzere! Ndoko kuli-kwentse komwe unitsogoleredwa! 17 Inepano nin’dzawomberambo m’manja mwangu ndipo nin’dzakhuta ukali bwangu. Ndine Yahova omwe ndalewa.”

18 Yahova adalewalewa nande pomwe kuti: 19 “Iwe mwana wa munthu, konza njira ziwiri kuti xipada ya mambo wa ku Babiloniya ipitire. Zentse ziwiri zin’dzacokera m’dziko libodzi ndipo pa mphambano pomwe panigawa njira zakuyendera m’mizinda miwiri pan’funika kuikhidwa cizindikiro. 20 Un’funika kulatiza njira kuti xipada iyende ku Raba mzinda wa Aamoni, ndipo njira inango iyende ku Djuda, mzinda wakulimba wa Jeruzalemu. 21 Pakuti mambo wa ku Babiloniya ambaima pa mphambano pomwe pambagawana miseu miwiriyi kuti acite vima-vima. Iye ambakunkhumula misewe, ambabvunza bzifanikiso bzace* ndipo ambadinga ciropa. 22 Kuvima-vima komwe kuli m’boko lace lamadidi kukulatiza kuti iye an’funika kuyenda ku Jeruzalemu. Iye an’funika kukonzekera bzimiti bzakulemera bzakugumulira mimuro, kutsogolera kupha wanthu azinji, kulewa cizindikiro ca nkhondo, kuimisa pa msuwo bzifuzo bza nkhondo bzakugumulira muro, kukonza mtunthu wakumenyera nkhondo na kukonza muro wakuzungulira mzindayo. 23 Kwa wale* omwe adacita naye lumbiro, an’dzazindikira kuti vima-vimayo akhali wakunama. Tsono iye wakumbukira kuphonya kwawo ndipo an’dzawaphata aciyenda nawo ku ukapolo.

24 “Tenepo Yahova Mbuya Mkululetu walewa kuti: ‘Imwepo mwacitisa kuti bzakuphonya bzanu bzikumbukiridwe mwakuwonesa padeca bzakuphonya bzanubzo na kucitisa kuti pikado zanu zidziwike na bzicito bzanu. Pakuti tsapano mwakumbukiridwa, mun’dzatengedwa mwamphanvu.’

25 “Iwe mkulu wakuipa wa Jirayeri, ntsiku yako yafika, wapwetekeka mpaka wasala pang’ono kufa ndipo nthawe yafika ya kutongedwa kwako kwakumalizira. 26 Yahova Mbuya Mkululetu walewa kuti: ‘Cosa duku ndipo cosambo korowa.* Bzinthu bzin’dzakhala lini pomwe ninga kale-kale. Kwiza munthu wakunyozeka ndipo bulusa munthu wakubzikuza. 27 Ine nin’dzapfudza, nin’dzapfudza, nin’dzapfudza umambo. Umambo bumwebu bun’dzakhala lini bwa munthu mpaka akadzafika ule omwe an’themera kutonga mwa lamulo, ndipo ine nin’dzabupereka kwa iye.’

28 “Tsono iwe mwana wa munthu, lewa profesiya yakuti: ‘Yahova Mbuya Mkululetu walewa bza Aamoni na kutukwana kwawo.’ Lewa kuti: ‘Xipada! Xipada yacosedwa m’cikhwama mwace kuti iphe wanthu, yapukutidwa kuti iphe ndipo ikuyetima ninga mpheni. 29 Thangwe ra masomphenya na kuvima-vima kwanu kwakunama pakulewa bza imwepo, mun’dzaikhidwa pa mbuto pomwe pana wanthu omwe aphedwa,* amwewa ni wanthu wakuipa, omwe ntsiku ya kulangidwa kwawo kwakumalizira yafika. 30 Bwezera xipada m’cikhwama mwace. Ine nin’dzakutonga pa mbuto yomwe udabadwira, ku dziko lomwe udacokera. 31 Nin’dzakulangani thangwe ndina ciya. Ukali bwangu bun’dzakutenthani ninga moto ndipo nin’dzakuperekani m’manja mwa wanthu wakuipa mtima, omwe ana luso lakupfudza. 32 Imwepo mun’dzakhala ninga nkhuni pamoto, mulopa wanu caiwo un’dzathululidwa m’dziko lanu ndipo mun’dzakumbukiridwa lini pomwe, pakuti ine Yahova ndine omwe ndalewa.’”

22 Yahova adalewalewa nande pomwe kuti: 2 “Iwe mwana wa munthu, kodi wakonzeka kulewa bza kutongedwa kwa mzinda omwe una mulandu wa mulopa na kuzimbula bzinthu bzace bzentse bzakunyantsa? 3 Un’funika kulewa kuti: ‘Yahova Mbuya Mkululetu walewa kuti: “Iwe mzinda omwe umbapha wanthu wako, iwepo ukukonza bzifanikiso bzakunyantsa* kuti ubzipswipize wekha, tsono nthawe ya kutongedwa kwako ikufika, 4 ndipo un’khala na mulandu thangwe ra kupha wanthu, bzifanikiso bzako bzakunyantsa bzakucitisa kukhala wakupswipa. Wafulumizisa kumala kwa ntsiku zako, ndipo kumala kwa magole yako kwafika. Ndipopa nin’dzakucitisa kukhala cinthu cakunyozeka kwa wanthu wa mitundu inango ndipo un’dzasinjiriridwa na wanthu wa m’madziko yentse. 5 Madziko yapafupi na yakutali yan’dzakunyoza kuti ndiwe mzinda omwe una dzina lakupswipa ndipo udadzala na bzinthu bzakuipa. 6 Mkulu ali-wentse wa Jirayeri omwe ali pakati pako, akuphatisa basa mphanvu yace ya utongi kuti aphe wanthu. 7 Pakati pako, pai na mai ambanyozedwa, nyakubwera ambacitiridwa bzinthu mwacinyengo, nkhungwa na mkazi mamsiwa ambaboneresedwa.”’”

8 “‘Ukunyoza mbuto zangu zakucena ndipo ukupswipiza masabudu yangu. 9 Pakati pako pana wanthu omwe ambalewa kuipa anzawo kuti mbiri yawo idzongeke, omwe mbakutsimikiza kupha wanthu. Pakati pako pana wanthu omwe ambadya ntsembe zakuperekedwa m’mapiri ndipo pakati pako pana wanthu omwe ana makhalidwe yakunyantsa. 10 Pakati pako pana wanthu omwe ambacita malume ya pamphasa na mkazi wa pai wawo* ndipo ambacita malume ya pamphasa na mkazi omwe ali ku mwezi. 11 Pakati pako munthu ambacita bzinthu bzakunyantsa na mkazi wa mwanzace, munango ambacita bzinthu bzakunyantsa na mulowola wace caiye mwakucita naye malume ya pamphasa, ndipo munango ambacita malume ya pamphasa na mpfumakazi yace caiyo, omwe ni mwana wa pai wace. 12 Wanthu wako ambabvuma bobobo kuti aphe wanthu, umbafiyalisi na juro* kuti ugumane phindu na bzinthu bzomwe wafiyalisi ndipo umbatengera kobiri anzako. Inde, iwepo wandiyebweratu,’ walewa tenepo Yahova Mbuya Mkululetu.

13 “‘Ndikukomedwa lini thangwe ra kugumana kwako phindu mwakusaya cirungamo na thangwe ra kupha wanthu komwe kukucitika pakati pako. 14 Kodi iwepo un’dzakhwimika na kukhala wamphanvu pa ntsiku yomwe nin’dzakulanga? Ine Yahova ndalewa ndipo nin’dzacita. 15 Nin’dzakubalalisira ku mitundu ya wanthu na kukubalalisira m’madziko ndipo nin’dzamalisa khalidwe lako lakupswipa. 16 Un’dzapasidwa manyazi pakati pa mitundu ya wanthu ndipo un’dzadziwa kuti ine ndine Yahova.’”

17 Yahova adalewalewa nande pomwe kuti: 18 “Iwe mwana wa munthu, nyumba ya Jirayeri yakhala cinthu cakusaya basa kwa ine. Wentse ali ninga kobre,* mtobve, simbi* na xumbu mu forno yakusungunusira simbi. Iwo akhala bzinthu bzakusaya basa ninga bzinthu bzomwe bzimbasala pakusungunusa prata.

19 “Tenepo Yahova Mbuya Mkululetu walewa kuti: ‘Pakuti mwentsenemwe mwakhala bzinthu bzakusaya basa ninga bzakusala pakusungunusa prata, inepano nin’dzakutsonkhanisani mkati mwa Jeruzalemu. 20 Ninga momwe ambatsonkhanisira prata, kobre,* simbi,* xumbu na mtobve mu forno yakusungunusira prata kuti abziphatizire moto kuti bzisungunuke, inepano nin’dzakutsonkhanisani na ukali bwangu na ciya cangu, ndicikuphatizirani moto kuti musungunuke. 21 Nin’dzakutsonkhanisani pabodzi, nin’dzakufulizirani moto wa ukali bwangu ndipo imwepo mun’dzasungunuka mkati mwa mzindayo. 22 Ninga momwe prata imbasungunukira mkati mwa forno yakusungunusira, imwepo mun’dzasungunukambo mkati mwa mzindayo ndipo imwepo mun’dzadziwa kuti ine Yahova ndakukhuthulirani ukali bwangu.’”

23 Ndipo Yahova adalewalewa nande pomwe kuti: 24 “Iwe mwana wa munthu, uza mzindayo kuti: ‘Iwepo ndiwe dziko lomwe lin’dzacenesedwa lini ndipo ne nvula in’dzabvumba lini pa ntsiku ya ukali bwangu. 25 Aprofeta wako akupangana kucita bzinthu bzakuipa m’mwemo, ninga mphondolo yomwe ikulirima iciphata nyama. Iwo akupha wanthu, akupamba cuma na bzinthu bzakufunika kwene-kwene ndipo akucitisa akazi azinji kukhala amamsiwa m’mwemo. 26 Antsembe wawo ambaphonyera lamulo langu ndipo ambapswipiza mbuto zangu zakucena. Ambasiyanisa lini comwe n’cakucena na bzinthu bzinango ndipo ne ambapfunzisa lini wanthu kusiyanisa cakucena na cakupswipa. Iwo ambalamba kukoya masabudu yangu ndipo ambandipswipiza pakati pawo. 27 Nduna zomwe ziri pakati pawo ziri ninga mphumphi zomwe zimbapha nyama. Iwo ambacosa mulopa ndipo ambapha wanthu kuti agumane phindu mwacinyengo. 28 Tsono aprofeta wawo ambampsinkha bzentsenebzi na mtoto. Iwo ambawona masomphenya yakunama ndipo ambalewa bzinthu bzakunama pakulewa bzakutsogolo mwakulewa kuti: “Yahova Mbuya Mkululetu walewa kuti,” pomwe Yahova caiyeyo alibe kuwauza cinthu. 29 Wanthu wa m’dzikolo ambacitira cinyengo wanthu na kuwabera, ambaboneresa nyakusauka na nyakubonera, ambacitirambo cinyengo anyakubwera ndipo ambawacitira lini cirungamo.’

30 “‘Ndidanyang’ana munthu pakati pawo kuti akonze muro wa minyala pomwe pakhadadzongeka ayai aime patsogolo pangu pa mbuto pomwe muroyo udagumuka kuti akhotcerere mzindayo kuti uleke kupfudzidwa, tsono ndiribe kugumana ne na m’bodzi. 31 Ndipopa nin’dzawakhuthulira ciya cangu ndipo nin’dzawapfudza na ukali bwangu bomwe buli ninga moto. Nin’dzacitisa kuti abonere thangwe ra bzicito bzawo,’ walewa tenepo Yahova Mbuya Mkululetu.”

23 Yahova adalewalewa nande pomwe kuti: 2 “Iwe mwana wa munthu, pakhana akazi awiri omwe akhali wana wa mai m’bodzi. 3 Iwo akhali maputa ku Edjipito, ndipo adacita uputabo kuyambira pomwe akhali atsikana. Kumweko adaphatidwa masuku yawo, ndipo masuku yawo ya paudende yadaphatidwa-phatidwa. 4 Dzina la mkulu ni Ohola* ndipo mng’ono wace ni Oholiba.* Iwo adadzakhala wangu ndipo adabereka wana wacimuna na wacikazi. Pakulewa bza madzina yawo, Ohola ni Samariya ndipo Oholiba ni Jeruzalemu.

5 “Ohola adacita uputa uko akhali wangu. Iye akhafuna kwene-kwene akwende wace omwe ni Asiriya, omwe akhali azivizinyu wace. 6 Iwo akhali magovernadori wakubvala bzakubvala bza azuli na wakuimikira magovernadori. Wentse akhali maswaka yakudeka ndipo akhambapakira makavalo. 7 Iye adapitiriza kucita uputa na wana wentse wakubvekera wa Asiriya, ndipo adabzipswipiza na bzifanikiso bzakunyantsa* bza wale omwe iye akhawafuna kwene-kwene. 8 Iye alibe kusiya uputa bomwe akhacita ku Edjipito, pakuti Aedjipitowo akhacita naye malume ya pamphasa kuyambira pomwe iye akhali mtsikana. Iwo adaphata-phata masuku yace pomwe akhali dende, ndipo akhalatiza kuti akhamufuna kwene-kwene. 9 Ndipopa ndam’pereka m’manja mwa akwende wace, omwe ni wana wa Asiriya, omwe akhamufuna kwene-kwene. 10 Iwo adamukhundula acimusiya pezi, adatenga wana wace wacimuna na wacikazi aciyenda nawo ku ukapolo ndipo adamupha na xipada. Iye adakhala na mbiri yakuipa pakati pa akazi anzace ndipo adalangidwa.

11 “Pomwe m’bale wace Oholiba adawona bzimwebzi, cikhumbo cace cakufuna amuna cidathumizirika kwene-kwene ndipo adacita uputa kwene-kwene kuposa m’bale wace. 12 Iye akhafuna kwene-kwene azivizinyu wace omwe akhali wana wa Asiriya, magovernadori na wakuimikira magovernadori, amuna omwe akhabvala bzakubvala bzabwino kwene-kwene omwe akhambapakira makavalo na maswaka yentse yakudeka. 13 Pomwe iye adakhala wakupswipa, ndidawona kuti wentse awiri akhacita bzibodzi-bodzi. 14 Tsono iye adalemweratu kucita uputabo. Iye adawona bzifanikiso bzacimuna bzidanembedwa pa parede, bzifanikiso bza Akalideya bzakupintaridwi na kore ifuira. 15 Ibzo bzikhadabvala bande* m’ciuno na duku mu msolo, bzikhawoneka ninga acikunda ndipo bzentse bzikhaimira wanthu wa ku Babiloniya omwe akhadabadwira ku dziko la Akalideya. 16 Pomwe iye adawawona, adayamba kuwasirira kwene-kwene ndipo adatumiza mitumi kuti iyende ku Kalideya. 17 Tenepo wana wa ku Babiloniya akhabwera kudzacita naye malume ya pamphasa pa kama pace, ndipo adapswipizidwa na cikhumbo cawo camphanvu.* Pomwe iwo adamala kumupswipiza, iye adanyantsidwa nawo kwene-kwene aciwasiya.

18 “Pomwe adapitiriza kucita uputa mwakusaya manyazi acimbabziwoneresa kwa wanthu, inepano ndidanyantsidwa naye ndipo ndidamusiya ninga momwe ndidanyantsidwira na m’bale wace ndicimusiya. 19 Ndipo iye adapitiriza na uputa bwace, acimbakumbusira m’ntsiku zomwe akhali mtsikana, pomwe akhambacita uputa m’dziko la Edjipito. 20 Iye akhasirira kwene-kwene akwende wace* ninga momwe ambacitira azimakhadzi wa amuna omwe ana cidzo ninga ca bulu na omwe ana cidzo ninga ca kavalo. 21 Udasuwa khalidwe lako lakuipa lomwe ukhanalo pomwe ukhali mtsikana ku Edjipito, pomwe akhakuphata-phata masuku pa nthawe yomwe ukhali mtsikana.

22 “Tenepo iwe Oholiba, Yahova Mbuya Mkululetu walewa kuti: ‘Nin’nyosa akwende wako omwe iwepo ukhadanyantsidwa nawo uciwasiya ndipo nin’wabweresa kuti adzanyosane nawe kucokera kumbali zentse. 23 Wana wa ku Babiloniya na Akalideya wentse, amuna wa ku Pekodi, amuna wa ku Sowa na wa ku Kowa pabodzi na wana wentse wa Asiriya. Wentsenewa ni maswaka yakudeka, magovernadori na wakuimikira magovernadori, anyankhondo na amuna wakusankhulidwa, wentse ambapakira makavalo. 24 Iwo an’dzabwera kudzamenyana nawe ndipo pakufika, kun’dzabveka baludya la ngolo za nkhondo na maroda yace, an’dzabwera na acikunda azinji, bzakukhotcerera bzikulu-bzikulu na bzing’ono-bzing’ono* pabodzi na makapaseti. Iwo an’dzakuzungulira m’mbali zentse ndipo inepano nin’dzakulekerera kuti akutonge, ndipo an’dzakutonga ninga momwe iwo akufunira. 25 Nin’dzakulatiza ciya cangu ndipo iwo an’dzakucitira bzinthu mwaukali. An’dzagwata mphuno yako na makutu yako ndipo anyakusala wako an’dzafa na xipada. Iwo an’dzatenga wana wako wacimuna na wacikazi, ndipo anyakusayala wako an’dzapsa na moto. 26 Iwo an’dzakukhundula bzakubvala ndipo an’dzakutengera bzinthu bzako bzakubzidekesera. 27 Nin’dzamalisa khalidwe lako lakuipa na uputa bwako, bomwe udabuyambira ku dziko la Edjipito. Iwepo un’dzasiya kuwanyang’anisa ndipo un’dzakumbukira lini pomwe bza Edjipito.’

28 “Pakuti Yahova Mbuya Mkululetu walewa kuti: ‘Inepano nin’kupereka m’manja mwa wanthu omwe iwepo umbawawenga, wale omwe udanyantsidwa nawo uciwasiya. 29 Iwo an’dzakucitira bzinthu mwa ciwengo, an’dzakutengera bzinthu bzomwe udabzigumana thangwe ra kuphata basa mwa nyongo ndipo an’dzakusiya pezi. Wanthu wentse an’dzakuwona uli pezi-pezi, an’dzawona bzinthu bzentse bzakunyantsa bzomwe ukhacita ndipo uputa bwako bun’dzawonekera padeca. 30 Iwepo un’dzabonera na bzinthu bzimwebzi thangwe udatewera mitundu ya wanthu ninga puta, ndipo udabzipswipiza na bzifanikiso bzawo bzakunyantsa. 31 Iwepo udacita bzinthu ninga momwe adacitira m’bale wako ndipo nin’dzaikha kopo yace m’manja mwako.

32 “Yahova Mbuya Mkululetu walewa kuti:

“Pakuti ndine omwe ndidalewa,” walewa tenepo Yahova Mbuya Mkululetu.’

35 “Tenepo Yahova Mbuya Mkululetu walewa kuti: ‘Pakuti iwepo wandiyebwa* ndipo walatiza kuti ulibe nande basa, un’dzabonera thangwe ra khalidwe lako lakuipa na uputa bwako.’”

36 Tenepo, Yahova adandiuza kuti: “Iwe mwana wa munthu, kodi iwepo un’kalewa bza kutongedwa kwa Ohola na Oholiba pabodzi na bzinthu bzakunyantsa bzomwe iwo acita? 37 Iwo acita uputa ndipo ana mulopa m’manja mwawo. Iwo alibe kundocita uputa na bzifanikiso bzawo bzakunyantsa, koma adatenthambo pamoto wana omwe adandiberekera, aciwapereka ninga cakudya kwa bzifanikiso bzawo. 38 Kuthumizira bzimwebzi, iwo adandicitirambo ibzi: Adapswipiza mbuto yangu yakucena pa ntsiku imweyire ndipo adapswipizambo masabudu yangu. 39 Pa ntsiku imweyo, pomwe adamala kupha wana wawo kuti awapereke ninga ntsembe kwa bzifanikiso bzawo bzakunyantsa, iwo adapita pa mbuto yangu yakucena kuti aipswipize. Ndibzo bzomwe iwo adacita m’nyumba mwangu. 40 Mpaka iwo adatumiza mtumi kuti akacemere amuna wakutali. Pomwe iwo akhafika, iwepo udasamba, udapintali maso yako ndipo udabzidekesa. 41 Iwepo wakhala pa mpando wakudeka omwe uli patsogolo pa meza, ndipo waikha bzakununtcirisa na mafuta yangu pa meza imweyo. 42 Kumweko kukhabveka baludya la thimu la wanthu omwe akhalibe thupo na cinthu ciri-centse, ndipo pakati pawo pakhana aledzeri omwe akhacokera m’dambo. Iwo adabvazika akazi mapulsera ndipo adawabvazikambo korowa zakudeka m’misolo mwawo.

43 “Tenepo ine ndidalewa pakulewa bza ule omwe waneta kucita uputa kuti: ‘Tsapano iye an’pitiriza kucita uputa bwacebo.’ 44 Iwo akupitiriza kuyenda kukagumana naye, ninga momwe ambacitira munthu omwe akuyenda kukagumana na mkazi puta. Tenepo, adakagumana na Ohola na Oholiba, azikazi omwe ana khalidwe lakuipa. 45 Tsono wanthu wakulungama an’dzawalanga, ninga momwe ambalangira wanthu omwe ambacita uputa na anyakupha wanthu, pakuti iwo ni maputa ndipo m’manja mwawo muna mulopa.

46 “Tenepo Yahova Mbuya Mkululetu walewa kuti: ‘Lin’dzatumizidwa thimu la anyankhondo kwa iwo kuti adzakhale cinthu cakupasa mantha kwa winango na cakupambidwa. 47 Thimu la anyankhondolo lin’dzawaboma na minyala ndipo lin’dzawapha na xipada. Iwo an’dzapha wana wawo wacimuna na wacikazi ndipo an’dzatentha nyumba zawo na moto. 48 Ine nin’dzamalisa khalidwe lakuipa m’dzikolo ndipo akazi wentse an’dzapfunza na bzimwebzi ndipo an’dzatewezera lini khalidwe lako lakuipa. 49 Iwo an’dzakulangani thangwe ra khalidwe lanu lakuipa na pikado zanu zomwe mudacita na bzifanikiso bzanu bzakunyantsa. Ndipo imwepo mun’dzadziwa kuti ine ndine Yahova Mbuya Mkululetu.’”

24 Pa ntsiku yaci 10, mwezi waci 10, m’gole laci 9, Yahova adalewalewa nande pomwe kuti: 2 “Iwe mwana wa munthu, nemba ntsikuyi, ntsiku ya lero. Mambo wa ku Babiloniya ayamba kucita nkhondo na Jeruzalemu pa ntsiku imweyinoletu. 3 Ndipo lewa mwani wakulewa bza nyumba yakupanduka. Pakulewa bza iwo, lewa kuti:

“‘Yahova Mbuya Mkululetu walewa kuti:

“Tereka poto, tereka poto pamoto ndipo uikhe madzi mkatimo.

 5 Tenga bira wabwino pakati pa mabira ndipo ikha nkhuni pantsi pa poto.

Phika nthindi pabodzi na mafupa yace m’potomo.”’

6 “Yahova Mbuya Mkululetu walewa kuti:

‘Tsoka mzinda omwe umbapha wanthu, omwe uli ninga poto ya fuluju ndipo fulujoyo iribe kucosedwa,

Cosa nthindi zentse m’potomo, ibodzi na ibodzi ndipo leka kucita kusankhula.*

 7 Thangwe mulopa omwe mzindayo udacosa uli m’potomo.

Mzindayo udathululira mulopayo pa mwala wakunyalala; ulibe kuuthululira pantsi kuti ufuciridwe na mataka.

9 “Tenepo Yahova Mbuya Mkululetu walewa kuti:

‘Tsoka kwa mzinda omwe umbapha wanthu!

Ine nin’dzagwezeka nkhuni zizinji.

Bzinthu bzace bzakupswipa bzin’dzasungunuka mkati mwace ndipo fuluju yace in’dzamala kupsa.

Thusani poto pabodzi na fuluju yaceyo pamoto.’

13 “‘Iwepo wapswipa thangwe ra khalidwe lako lakuipa. Ine ndayezera kukucenesa tsono ulibe kucena. Iwepo un’dzacena lini mpaka ciya cangu kudzamala. 14 Ine Yahova ndalewa, ndipo bzin’dzacitika. Mwakusaya kupenukira, ine nin’dzacita bzimwebzi. Nin’dzakubvera lini ntsisi ne kubwerera m’mbuyo. Iwo an’dzakutonga mwakubverana na makhalidwe yako na bzicito bzako,’ walewa tenepo Yahova Mbuya Mkululetu.”

15 Yahova adalewalewa nande pomwe kuti: 16 “Iwe mwana wa munthu, nin’funa kukucosera kabodzi na kabodzi munthu omwe umbamufuna. Un’funika lini kudandaula,* kulira ne kucosa misozi. 17 Buula mwakazizi ndipo leka kusunama ninga momwe ambacitira munthu akafedwa. Bvala duku ndipo bvalambo xango. Leka kumpsinkha mulomo ne kudya cakudya comwe wanthu an’dzakubweresera.”

18 Tenepo macibese ndidalewalewa na wanthu, ndipo usiku mkazangu adafa. Mangwana yace ndidacita ndendende ninga momwe ndidauzidwira. 19 Wanthu akhandibvunza kuti: “Kodi un’tiuza lini kuti bzomwe ukucitabzi bzikubverana tani na ifepano?” 20 Ine ndidawatawira kuti: “Yahova wandiuza kuti: 21 ‘Uza nyumba ya Jirayeri kuti: “Yahova Mbuya Mkululetu walewa kuti: ‘Nin’funa kupswipiza mbuto yangu yakucena yomwe imbakucitisani kusamwa, mumbaifuna na kuikumbukira mu mtima mwanu. Wana wanu wacimuna na wacikazi omwe mudawasiya an’dzaphedwa na xipada. 22 Tsono imwepo mun’funika kudzacita bzomwe ine ndacitabzi. Mun’dzampsinkha lini mulomo ne kudya cakudya comwe wanthu an’dzakubwereserani. 23 Mun’dzabvala duku ndipo mun’dzabvalambo xango ku nzayo zanu. Mun’dzadandaula lini ne kulira, m’mbuto mwace mun’dzabonera thangwe ra bzakuphonya bzanu ndipo ali-wentse an’dzabuulira mwanzace. 24 Ezekiyeli wakhala cizindikiro kwa imwepo. Mudzacite ndendende ninga momwe iye adacitira. Bzimwebzi bzikadzacitika, imwepo mun’dzadziwa kuti ine ndine Yahova Mbuya Mkululetu.’”’”

25 “Tsono iwe mwana wa munthu, pa ntsiku yomwe nin’dzawacosera muro wawo wakulimba, bzinthu bzakudeka bzomwe bzimbawakondwesa, bzinthu bzomwe iwo ambabzifuna, bzinthu bzomwe iwo ambabzikumbukira mu mtima mwawo pabodzi na wana wawo wacimuna na wacikazi, 26 iwepo un’dzadziwisidwa bzimwebzo na munthu omwe an’dzapulumuka. 27 Pa ntsiku imweyo un’dzafungula mulomo, un’dzalewalewa na munthu omwe an’dzapulumukayo ndipo un’dzakhala lini pomwe bewewe. Iwepo un’dzakhala cizindikiro kwa iwo, ndipo iwo an’dzadziwa kuti ine ndine Yahova.”

25 Yahova adalewalewa nande pomwe kuti: 2 “Imwe mwana wa munthu, nyang’anisa Aamoni ndipo lewa profesiya ya bzinthu bzakuipa bzomwe bzin’dzawacitikira. 3 Uza Aamoni kuti: ‘Bvani mafala ya Yahova Mbuya Mkululetu. Yahova Mbuya Mkululetu walewa kuti: “Pomwe mudapswipiza mbuto yangu yakucena, imwepo mudaseka mucilewa kuti: ‘Yaa, bziri bwino!’ Ndipo mudalewambo bzibodzi-bodzibzi pomwe dziko la Jirayeri lidapfudzidwa na pomwe Adjuda adayendesedwa ku ukapolo. 4 Tenepo nin’dzakuperekani kwa wanthu wa kumabvadzuwa. Iwo an’dzamanga misasa yawo pakati panu ndipo an’dzamangambo matendi yawo. An’dzadya bzisapo bzanu na kumwa mkaka wanu. 5 Nin’dzacitisa kuti Raba ikhale mbuto yakudyesera ngamira, ndipo dziko la Aamoni ikhale mbuto yakupumira mabira, ndipo imwepo mun’dzadziwa kuti ine ndine Yahova.”’”

6 “Yahova Mbuya Mkululetu walewa kuti: ‘Pakuti imwepo mwawombera m’manja, mwamenyesa minyendo yanu pantsi, mucikomedwa na kunyoza dziko la Jirayeri thangwe ra tsoka lomwe agumana nalo, 7 nin’dzakufuthulirani boko langu kuti ndikuperekeni kwa wanthu wa mitundu inango ninga bzinthu bzakupamba. Nin’dzakumalisani pakati pa wanthu ndipo nin’dzakupfudzani pakati pa madziko. Nin’dzakumalisani ndipo imwepo mun’dzadziwa kuti ine ndine Yahova.’

8 “Yahova Mbuya Mkululetu walewa kuti: ‘Pakuti Mowabe na Seiri walewa kuti: “Onani! Nyumba ya Djuda yandendemerana na mitundu inango yentse,” 9 nin’dzacitisa kuti mizinda yomwe iri m’mphepete mwa Mowabe yomwe imbadekesa dzikolo ikhale yakusaya kukhotcerereka, ndipo mizindayo ni Beti-jesimoti, Baala-meoni na Kiriyataimu. 10 Nin’dzakuperekani pabodzi na Aamoni kwa wanthu wa kumabvadzuwa kuti Aamoniwo aleke kudzakumbukiridwa pomwe pakati pa mitundu ya wanthu. 11 Nin’dzalanga Mowabe ndipo iwo an’dzadziwa kuti ine ndine Yahova.’

12 “Yahova Mbuya Mkululetu walewa kuti: ‘Edomu adaboneresa nyumba ya Djuda ndipo ana mulandu ukulu thangwe ra kuwaboneresako. 13 Na thangwe limweri Yahova Mbuya Mkululetu walewa kuti: “Nin’dzafuthulirambo boko langu Edomu ndipo nin’dzapfudza pakati pace wanthu na bzirombo kubodzi ndipo nin’dzacitisa dzikolo kukhala matere. Kucokera ku Temani mpaka ku Dedani, iwo an’dzafa na xipada. 14 ‘Nin’dzaphatisira basa wanthu wangu Ajirayeri kuti ndilange Edomu. Iwo an’dzalatiza kuna Edomu ukali bwangu na ciya cangu kuti Edomuyo adzadziwe kuti ndine omwe ndikumulanga,’ walewa tenepo Yahova Mbuya Mkululetu.”’

15 “Yahova Mbuya Mkululetu walewa kuti: ‘Thangwe ra kuipa mtima na makumbukidwe yakuipa ya Afilisteu, iwo adanyang’ana njira yakuwabwezera na kuwapfudza. 16 Na thangwe limweri Yahova Mbuya Mkululetu walewa kuti: “Nin’dzafuthulira boko langu Afilisteu, nin’dzamalisa Akereti ndipo nin’dzapfudza wanthu wakusala omwe ambakhala m’mphepete mwa nyanza. 17 Nin’dzawaboneresa na kuwalanga kwene-kwene ndipo ndikadzawalanga tenepo, iwo an’dzadziwa kuti ine ndine Yahova.”’”

26 Mu gole laci 11, pa ntsiku yakuyamba ya mwezi, Yahova adalewalewa nande kuti: 2 “Iwe mwana wa munthu, Tiro akusinjirira Jeruzalemu mwakulewa kuti: ‘Yaa, bziri bwino! Msuwo wa wanthu azinji wadzongeka! Pakuti iye wapfudzidwa, bzentse bzin’khala bzangu ndipo ndinidala’; 3 ndipopa Yahova Mbuya Mkululetu walewa kuti: ‘Iwe Tiro, inepano nin’menyana nawe, ndipo nin’dzacitisa mitundu mizinji ya wanthu kuti imenyane nawe ninga momwe yambacitira mabimbi m’nyanza. 4 Mitunduyo in’dzapfudza mimuro ya Tiro ndipo in’dzapfudzambo nyumba zako zakulimba za ntsanza, nin’dzapala mataka yace ndipo nin’dzacitisa dzikolo kukhala mwala wakunyalala. 5 Dzikolo lin’dzakhala mbuto yakuumisira makhokota pakati pa nyanza.’

“‘Pakuti ine ndine omwe ndalewa, ndipo iro lin’dzapambidwa na mitundu inango ya wanthu, walewa tenepo Yahova Mbuya Mkululetu. 6 Wanthu wa m’midzi* yakuzungulira mzindayo an’dzaphedwa na xipada, ndipo wanthu an’dzadziwa kuti ine ndine Yahova.’

7 “Yahova Mbuya Mkululetu walewa kuti: ‘Nin’dzabweresa Nabukadinazori mambo wa ku Babiloniya kucokera ku norte kuti akamenyane na Tiro; iye ni mambo wa amambo, ana makavalo, ngolo za nkhondo, anyakupakira makavalo na thimu likulu la anyankhondo.* 8 Iye an’dzapfudza na xipada wanthu omwe akukhala m’dzikolo, an’dzamanga muro wakukuzungulira, an’dzamanga mtunthu wakumenyera nkhondo, ndipo an’dzaphatanidza bzakukhotcera bzizinji kuti abzikhotcerere pakumenyana nawe. 9 An’dzagumula mimuro yako na bzimiti bzakulemera bzakugumulira muro* ndipo an’dzagumulambo nyumba zako zakulimba za ntsanza na mbadzo. 10 Makavalo yace yan’dzakhala mazinji ndipo un’dzakwanisa lini kuwona thangwe ra pfumbi lakunyosedwa na makavaloyo. Baludya la makavalo na ngolo za nkhondo lin’dzatekenyesa mimuro yako iye akadzapita pa misuwo yako, ninga wanthu omwe akupita mu mzinda na pa mphotco wa muro. 11 Njondo* za makavalo yace zin’dzaponda-ponda miseu yako yentse; iye an’dzapha wanthu wako na xipada ndipo pilare zako zakulimba zin’dzagwa. 12 Iwo an’dzapamba bzinthu bzako, an’dzakutengera malonda yako, an’dzagumula mimuro yako na nyumba zako zakudeka; ndipo an’dzathusa m’madzi minyala, matabwa na mataka yako.’

13 “‘Nin’dzamalisa baludya la nyimbo zako ndipo kuimba kwa harpa* zako kun’dzabveka lini pomwe. 14 Nin’dzakucitisa kukhala mwala wakunyalala ndipo un’dzakhala mbuto yakuumisira makhokota. Pakuti ndine Yahova omwe ndalewa, iwepo un’dzamangidwa lini pomwe,’ walewa tenepo Yahova mbuya Mkululetu.

15 “Yahova Mbuya Mkululetu wauza Tiro kuti: ‘Wanthu wakupwetekeka kwene-kwene akadzabuula* ndipo wanthu azinji akadzaphedwa pakati pako, kodi ntsuwa zin’dzatetemera lini na baludya lakupfudzidwa kwako? 16 Nduna zentse za* m’nyanza zin’dzacoka pa mipando yawo ya umambo, zin’dzakhundula bzakubvala bzakusaya manja na bzakubvala bzakubordari ndipo zin’dzacita mantha kwene-kwene. Izo zin’dzakhala pantsi, ndipo zin’dzatetemera mwakusaya kulekeza zicimbakunyang’anisa mwakudabwa. 17 Izo zin’dzaimba nyimbo yakulira pakulewa bza iwepo kuti:

19 “Yahova Mbuya Mkululetu walewa kuti: ‘Inepano ndikadzakupfudza ndicikucitisa kukhala ninga mizinda yomwe imbakhalidwa lini na wanthu, ndikadzakudzaza na madzi ya mabimbi ndicikumpsinkha na madzi yamphanvu, 20 nin’dzatenga iwepo pabodzi na wale omwe akuyenda ku thenje komwe kuna wanthu wa nthawe zakale-kale; nin’dzakucitisa kuti ukhale pa mbuto yakuzika kwene-kwene ninga mbuto zakale-kale za matere pabodzi na omwe akuyenda ku thenje, kuti iwepo uleke kukhalidwa pomwe. Tenepo nin’dzadekesa dziko la wanthu wamoyo.

21 “‘Nin’dzakubweresera tsoka mwadzidzidzi, ndipo un’dzawoneka lini pomwe. An’dzakunyang’ana koma un’dzawoneka lini pomwe,’ walewa tenepo Yahova Mbuya Mkululetu.”

“Iwe Tiro, iwe omwe umbabzilewa kuti: ‘Ine ndidadeka kwene-kwene.’

 8 Wanthu wa ku Sidoni na wa ku Arvadi ndiwo omwe akhali anyakucapa wako.

Iwe Tiro, wanthu wako waluso ndiwo omwe akhakufambisira naviyo.

 9 Adziwi na wanthu waluso wa ku Jebali ndiwo omwe akhamata matabwa ya naviyo zako kuti zileke kupita madzi.

Naviyo zentse za m’nyanza na anyakufambisa wace akhabwera kwa iwepo kuti adzacite nawe malonda.

10 Amuna wa ku Persiya, wa ku Ludi na wa ku Puti akhali m’thimu lako la anyankhondo, iwo akhali acikunda wako.

Iwo akhamanika bzakukhotcera na makapaseti yawo pa iwepo, ndipo akhacitisa kuti ukhale na ulemerero.

12 “‘“Tarisi akhacita nawe malonda thangwe ra kuwanda kwa cuma cako. Iye akhagula bzinthu bzako bzabwino mwa kucinjanisa na prata,* simbi,* mtobve na xumbu. 13 Javani, Tubali na Meseki akhagula bzinthu bzako mwakucinjanisa na akapolo wawo na bzinthu bzawo bza kobre.* 14 Wanthu wa m’nyumba ya Togarima akhagula bzinthu bzako mwa kucinjanisa na makavalo yakunyamulira mitolo, makavalo yakumenyera nkhondo na nyulusi.* 15 Ukhacita malonda na wanthu waku Dedani. Iwepo ukhana wanthu omwe akhakucitira malonda mu ntsuwa zizinji, ndipo iwo akhambakupasa nyanga za nzou na mkhomodwa* ninga mtsonkho. 16 Edomu akhacita nawe malonda thangwe ra kuwanda kwa bzinthu bzako. Iwo akhagula bzinthu bzako mwa kucinjanisa na minyala ya turkeza, nguwo za roxo, bzakubvala bzakubordari bza kore zakusiyana-siyana, nguwo zabwino kwene-kwene, minyala yakufunika kwene-kwene ya korali* na ya rubi.

17 “‘“Djuda na dziko la Jirayeri akhacita nawe malonda. Iwo akhambacinjanisa bzinthu bzako mwa kukupasa tirigu ya miniti, bzakudya bzakusankhulidwa bwino, uci, mafuta ya azeite na balsamo.

18 “‘“Damasko akhacita nawe malonda thangwe ra kuwanda kwa bzinthu bzako na cuma cako centse. Iye akhacinjanisa bzimwebzi mwa kukupasa vinyu ya ku Heliboni na usalu bufuirira na bwakupfumbuka bwa ku Zahari. 19 Vedani na Javani wa ku Uzali akhakupasa simbi, kasiya* na kalamo,* pakucinjanisa na bzinthu bzako. 20 Dedani akhakugulisira bzakukhalira pa misana ya makavalo. 21 Wanthu wa ku Arabya na akulu-akulu wentse wa ku Kedari omwe akhacita malonda yakugulisa wana wa mabira, mabvululume* na mbuzi akhakuphatira basa. 22 Anyakucita malonda wa ku Xeba na ku Raama, akhacita nawe malonda. Iwo akhakupasa perfume zentse zabwino, minyala yakufunika na oro mwakucinjanisa na bzinthu bzako. 23 Harani, Kane, Edeni, anyamalonda wa ku Xeba, Hasuri na Kilimadi, akhacita nawe malonda. 24 Pa msika wako, iwo akhagulisa bzakubvala bzabwino, bzakubvala bza kore ya azuli, bzakubvala bza kore zakusiyana-siyana bzakubordari, na tapeti za kore zakusiyana-siyana. Bzentsenebzi bzikhamangidwa bwino-bwino na bzingwe.

28 Amarinyero wako akadzakuwa, dziko lentse lin’dzatekenyeka.

32 Pa kudandaulapo, an’dzaimba nyimbo ya nkhawa pakulewa bza iwepo kuti:

‘Mbani omwe angandendemerane na Tiro omwe tsapano wapfudzidwa pakati pa nyanza?

33 Pomwe bzinthu bzako bzikhabwera kucokera pakati pa nyanza, iwepo ukhakhutisa wanthu azinji.

Cuma cako cizinji na malonda yako bzidadaza amambo wa pa dziko la pantsi.

36 Anyakucita malonda wa mitundu inango an’dzaimba muluzi thangwe ra bzomwe bzakucitikira.

28 Yahova adalewalewa nande pomwe kuti: 2 “Iwe mwana wa munthu, uza mtsogoleri wa Tiro kuti: ‘Yahova Mbuya Mkululetu walewa kuti:

“Pakuti wabzikuza mu mtima mwako ucilewa kuti: ‘Ndine mulungu,

Ndidakhala pa mpando wa umambo wa mulungu pakati pa nyanza.’

 3 Ukukumbuka kuti ndiwe wanzeru kwene-kwene kuposa Daniyeli.

Ndipo umbakumbukambo kuti palibe cintsintsi comwe cingabisike kwa iwepo.

6 “‘Na thangwe limweri, Yahova Mbuya Mkululetu walewa kuti:

 9 Kodi iwepo un’dzapitiriza kulewa kwa ule omwe an’kupha kuti: ‘Ndine mulungu?’

M’manja mwa wale omwe an’dzakupswipiza un’dzakhala munthu basi, sikuti mulungu.”’

11 Yahova adalewalewa nande pomwe kuti: 12 “Iwe mwana wa munthu, imba nyimbo yakulira pakulewa bza mambo wa Tiro, lewa kuti: ‘Yahova Mbuya Mkululetu walewa kuti:

13 Iwepo ukhali mu Edeni munda wa Mulungu.

Pakuikhira minyala imweyi pakhali pa oro.

Bzentsenebzi bzidakonzedwa pa ntsiku yomwe udalengedwa.

14 Ine ndakusankhula na kukudzoza kuti ukhale kerubi wakukhotcerera.

Iwepo ukhali pa phiri lakucena la Mulungu, ndipo ukhafamba pa minyala ya moto.

17 Udabzikuza thangwe ra kudeka kwako.

Wadzonga nzeru zako thangwe ra ulemerero bwako bukulu.

Nin’dzakuthusa pantsi.

Nin’dzacitisa kuti amambo akunyang’anise.

18 Thangwe ra kuphonya kwako kukulu na malonda yako yakusaya kukhulupirika, iwepo wapswipiza mbuto zako zakucena.

Nin’dzaphatiza moto pakati pako ndipo motoyo un’dzakutentha.

Nin’dzakucitisa kukhala dotha pa dziko la pantsi pamaso pa wentse omwe akukuwona.

19 Wanthu wentse omwe ambakudziwa pakati pa mitundu an’dzakunyang’anisa mwakudabwa.

20 Yahova adalewalewa nande pomwe kuti: 21 “Iwe mwana wa munthu, nyang’anisa ku Sidoni ndipo ulewe profesiya ya bzinthu bzomwe bzin’dzamucitikira. 22 Lewa kuti: ‘Yahova Mbuya Mkululetu walewa kuti:

23 Nin’dzakutumizira cisi* ndipo mulopa un’dzayerera m’miseu yako.

24 “‘“Nyumba ya Jirayeri in’dzazunguliridwa lini pomwe na nceso ayai minga zakuwawa, omwe ni wanthu omwe ambawacitira bzinthu mwakunyoza; ndipo wanthu an’dzadziwa kuti ine ndine Yahova Mbuya Mkululetu.”’

25 “‘Yahova Mbuya Mkululetu walewa kuti: “Ndikadzatsonkhanisa Ajirayeri pakati pa mitundu ya wanthu yomwe ndidawabalalisira, inepano nin’dzacenesedwa pakati pawo, pamaso pa wanthu wa mitundu inango. Ndipo iwo an’dzakhala mu dziko lawo cairo lomwe ndidapasa mtumiki wangu Djakobo. 26 Iwo an’dzakhala m’mwemo mwakukhotcerereka, an’dzamanga nyumba na kubzala uva. Iwo an’dzakhaladi mwakukhotcerereka ndikadzalanga wanthu wakuwazungulira, omwe ambawacitira bzinthu mwa kuwanyoza; ndipo an’dzadziwa kuti ine ndine Yahova Mulungu wawo.”’”

29 Mu gole laci 10, mwezi waci 10, pa ntsiku yaci 12 ya mweziyo, Yahova adalewalewa nande pomwe kuti: 2 “Iwe mwana wa munthu, nyang’anisa Farawo, mambo wa Edjipito ndipo lewa profesiya ya bzinthu bzomwe bzin’citikira iye na Edjipito wentse. 3 Lewa mafala aya: ‘Yahova Mbuya Mkululetu walewa kuti:

Iwepo umbalewa kuti: ‘Mkulo wa Nilo ni wangu.

Ndidabzikonzera kuti ukhale wangu.’

 4 Tsono nin’dzakoloweka na medzo ntsagwada zako ndipo nin’dzacitisa kuti ntsomba za mu mkulo wako wa Nilo ziphatirire mabade yako.

Nin’dzakucosa mu mkulo wako wa Nilo pabodzi na ntsomba zentse za mu Nilo zomwe zidaphatirira ku mabade yako.

 5 Nin’dzakusiya m’dambo pabodzi na ntsomba zentse za mu mkulo wako wa Nilo.

Iwepo un’dzangwa pakati pa thengo ndipo palibe munthu omwe an’dzakutenga acikuikha m’thenje.

Nin’dzakupasa bzirombo bza m’thengo na mbalame zakudzulu kuti bzikhale cakudya cako.

8 “‘Tenepo Yahova Mbuya Mkululetu walewa kuti: “Nin’kubweresera xipada ndipo nin’dzapfudza wanthu na bzirombo pakati pako. 9 Dziko la Edjipito lin’dzapfudzidwa licikhala matere ndipo iwo an’dzadziwa kuti ine ndine Yahova, pakuti iwepo walewa kuti: ‘Mkulo wa Nilo ni wangu ndine omwe ndidaukonza.’ 10 Tenepo ndakhala nyamadulanthaka wako na nyamadulanthaka wa mkulo wako Nilo. Ndipo nin’dzacitisa dziko la Edjipito kupfudzidwa licikhala lakuuma, licikhala dambo lakusaya kukhalidwa na wanthu kucokera ku Migidoli mpaka ku Siyene mpaka kukafika ku malire na Etiyopiya. 11 Palibe omwe an’dzapita na kumweko ne bzirombo ne wanthu ndipo kun’dzakhalidwa lini kwa magole 40. 12 Nin’dzacitisa dziko la Edjipito kukhala matere kuposa madziko manango, ndipo mizinda yace in’dzakhala matere kuposa mizinda inango kwa magole 40. Nin’dzabalalisa Aedjipito pakati pa mitundu ya wanthu ndipo nin’dzawawabalisira m’madziko manango.”

13 “‘Tenepo Yahova Mbuya Mkululetu walewa kuti: “Yakadzamala magole 40, nin’dzatsonkhanisa Edjipito kucokera m’mitundu ya wanthu yomwe adabalalisidwira. 14 Aedjipito omwe adayendesedwa ku ukapolo, nin’dzawabwezeresa ku Patrosi dziko lawo lakubadwira, ndipo kumweko an’dzakhala umambo bwakusaya mphanvu. 15 Dziko la Edjipito lin’dzakhala lakusaya mphanvu pakundendemezera na maumambo yanango, ndipo lin’dzakunda lini pomwe mitundu inango ya wanthu. Ine nin’dzawapunguza mwakuti an’dzakwanisa lini pomwe kukunda wanthu wa mitundu inango. 16 Dziko la Edjipito lin’dzathembedwa lini pomwe na nyumba ya Jirayeri, koma lin’dzandowakumbusa kuphonya kwawo, thangwe ra kukumbira thandizo kwa iwo. Ndipo iwo an’dzadziwa kuti ine ndine Yahova Mbuya Mkululetu.”’”

17 Mu gole laci 27, mwezi wakuyamba, pa ntsiku yakuyamba ya mweziyo, Yahova adalewalewa nande pomwe kuti: 18 “Iwe mwana wa munthu, Nabukadinazori* mambo wa ku Babiloniya, waphatisa basa mwamphanvu acikunda wace kuti amenyane na Tiro. Tsisi la acikunda wentse lidamala kukudzuka ndipo mapewa yawo yentse yadaswukuka. Tsono iye pabodzi na acikunda wace alibe kupasidwa cinthu ciri-centse thangwe ra basa lomwe adacita pakumenyana na Tiro.

19 “Tenepo, Yahova Mbuya Mkululetu walewa kuti: ‘Nin’dzapasa Nabukadinazori* mambo wa ku Babiloniya dziko la Edjipito, ndipo iye an’dzatenga cuma cace na kupamba bzinthu bzizinji m’mwemo. Ndipo bzimwebzi an’dzabziphatisa basa kuti apagaliri acikunda wace.’

20 “‘Pakuti adandiphatira basa, nin’dzamupasa dziko la Edjipito ninga pagamento thangwe ra basa lomwe adacita pakumenyana na Tiro,’ walewa tenepo Yahova Mbuya Mkululetu.

21 “Pa ntsiku imweyi nin’dzacitisa kuti pawoneke munthu wamphanvu pakati pa nyumba ya Jirayeri ndipo nin’dzakupasa mwayi wakuti ulewelewe pakati pawo, tenepo iwo an’dzadziwa kuti ine ndine Yahova.”

30 Yahova adalewalewa nande pomwe kuti: 2 “Iwe mwana wa munthu, lewa profesiya yakuti: ‘Yahova Mbuya Mkululetu walewa kuti:

“Dandaulani mwakulewa kuti: ‘Maine, ntsiku ikufika!’

 3 Pakuti ntsiku iri pafupi, ntsiku ya Yahova iridi pafupi.

In’dzakhala ntsiku ya mitambo na nthawe yakuti wanthu wa mitundu atongedwe.

Bzimwebzi bzikadzacitika, wanthu wa ku Etiyopiya an’dzabva mantha kwene-kwene.

 6 Yahova walewa kuti:

“‘Kucokera ku Migidoli mpaka ku Siyene iwo an’dzafa na xipada mu dzikolo,’ walewa tenepo Yahova Mbuya Mkululetu. 7 ‘Madziko yawo yan’dzakhala matere kuposa madziko manango ndipo mizinda yawo in’dzapfudzidwa kuposa mizinda inango. 8 Ndikadzatentha Edjipito na kupfudza wentse omwe ambamuthandizira, iwo an’dzadziwa kuti ine ndine Yahova. 9 Pa ntsiku imweyo nin’dzatumiza mitumi m’manaviyo kuti ikacitise mantha wanthu wakubzithemba wa ku Etiyopiya, ndipo Aetiyopiyawo an’dzabva mantha kwene-kwene pa ntsiku yomwe Edjipito an’dzapfudzidwa, pakuti mwakusaya kupenukira ntsiku imweyi in’dzafikadi.’

10 “Yahova Mbuya Mkululetu walewa kuti: ‘Nin’malisa wanthu wa ku Edjipito mwakuphatisa basa Nabukadinazori mambo wa ku Babiloniya.* 11 Iye pabodzi na anyankhondo wace omwe mbakuipa kwene-kwene kuposa mitundu inango ya wanthu, an’dzabweresedwa kuti apfudze dziko. Iwo an’dzasolola maxipada yawo kuti amenyane na Edjipito ndipo an’dzadzaza dzikolo na wanthu wakufa. 12 Nin’dzaumisa madzi ya m’migero ya Nilo ndipo dzikolo nin’dzalipereka m’manja mwa wanthu wakuipa. Nin’dzacitisa kuti dzikolo pabodzi na bzinthu bzentse bzomwe bziri m’mwemo, bzipfudzidwe na wanthu wacirendo. Ndine Yahova omwe ndalewa.’

13 “Yahova Mbuya Mkululetu walewa kuti: ‘Nin’dzapfudzambo bzifanikiso bzakunyantsa* ndipo nin’dzamalisa mirungu ya Nofi* yomwe iribe basa. Pan’dzawoneka lini pomwe mtsogoleri* mu dziko la Edjipito ndipo nin’dzacitisa kuti wanthu wa ku Edjipitoko abve mantha. 14 Nin’dzapfudza mzinda wa Patrosi, nin’dzatentha na moto mzinda wa Zowani ndipo nin’dzalanga mzinda wa No.* 15 Nin’dzakhuthulira ciya cangu mzinda wa Sini, yomwe ni mbuto yakukhotcerereka ya Edjipito ndipo nin’dzapfudza wanthu wa mu mzinda wa No. 16 Nin’dzatentha na moto dziko la Edjipito, wanthu wa mzinda wa Sini an’dzabva mantha kwene-kwene, anyamadulanthaka an’dzapita mu mzinda wa No ndipo an’dzamenyana na Nofi* masikati! 17 Maswaka ya mzinda wa Oni* na Pibeseti yan’dzafa na xipada, ndipo anyakukhala m’mizinda imweyi an’dzayendesedwa ku ukapolo. 18 Ku Tapanesi masikati yan’dzacita mdima ndikadzagwata djoki ku Edjipito. Kubzikuza kwace kun’dzamala, iye an’dzampsinkhidwa na mitambo ndipo wanthu wa m’mizinda yace an’dzayendesedwa ku ukapolo. 19 Nin’dzalanga Edjipito ndipo iwo an’dzadziwa kuti ine ndine Yahova.’”

20 Ndipo mu gole laci 11, mwezi wakuyamba, pa ntsiku yaci 7 ya mweziyo, Yahova adalewalewa nande pomwe kuti: 21 “Iwe mwana wa munthu, ndatcola boko la Farawo mambo wa ku Edjipito; iye an’dzakonzedwa lini kuti apole ne kumangiriridwa ligadura kuti akhale na mphanvu zakukwanira kuti aphatise basa xipada.”

22 “Tenepo Yahova Mbuya Mkululetu walewa kuti: ‘Farawo mambo wa Edjipito nin’malizana naye, nin’dzatcola manja yace kuyambira labwino na lakutcoka kale ndipo nin’citisa kuti xipada igwere pa boko lace. 23 Tsono nin’dzabalalisira Aedjipito ku mitundu inango, ndipo nin’dzawabalalisira m’madziko manango. 24 Nin’dzapasa mphanvu manja ya mambo wa ku Babiloniya ndipo nin’dzaikha xipada m’manja mwace. Nin’dzatcola manja ya Farawo ndipo iye an’dzabuula kwene-kwene pamaso pace* ninga munthu omwe wasala pang’ono kufa. 25 Nin’dzapasa mphanvu manja ya mambo wa ku Babiloniya koma manja ya Farawo yan’dzakhala yakusaya mphanvu; ndikadzaikha xipada yangu m’manja mwa mambo wa ku Babiloniya ndipo iye akadzaiphatisa basa kuti amenyane na dziko la Edjipito, iwo an’dzadziwa kuti ine ndine Yahova. 26 Ndipo nin’dzabalalisira Aedjipito ku mitundu inango ndiciwamwazira m’madziko manango, ndipo iwo an’dzadziwa kuti ine ndine Yahova.’”

 4 Mutiyo udakula kwene-kwene thangwe ra madzi ndipo madzi yakuzika yadacitisa kuti utalimphe.

 5 Ndipopa udatalimpha kuposa miti yentse ya m’thengo.

 8 Palibe muti munango wa mkungudza m’munda wa Mulungu omwe ungadandendemerana na umweyu.

Ndipo palibe muti unango m’munda wa Mulungu omwe ungadandendemerana na kudeka kwace.

10 “Tenepo, Yahova Mbuya Mkululetu walewa kuti: ‘Pakuti mutiyo watalimpha kwene-kwene mpaka ntsonga yace kufika m’mitambo ndipo wabzikuza thangwe ra kutalimpha kwace, 11 nin’dzaupereka m’manja mwa mtongi wamphanvu wa mitundu ya wanthu. Mwakusaya kupenukira, mtongiyo an’dzamulanga ndipo ine nin’dzamulamba thangwe ra bzinthu bzakuipa bzomwe adacita. 12 Wanthu wa mitundu inango omwe mbakuipa kwene-kwene, an’dzamugwesa ndipo an’dzamusiya m’mapiri, masamba yace yan’dzagwa m’bzigwa bzentse* ndipo mthambi zace zakutchoka zin’dzagwera m’mikulo yentse ya m’dzikolo. Wanthu wentse wa pa dziko la pantsi an’dzacoka pa mthunzi wace acimusiya yekha. 13 Mbalame zentse zakudzulu zin’dzakhala pa cimuti cakugwaco, ndipo bzirombo bzentse bza m’thengo bzin’dzakhala mu mthambi zace. 14 Bzimwebzi bzin’dzacitika kuti paleke kuwoneka muti utali pafupi na madzi ayai kucitisa ntsonga yace kufika m’mitambo, nakuti paleke kuwoneka muti wakuthiriziridwa bwino ucitalimpha mpaka m’mitambo. Pakuti miti yentse in’dzapfudzidwa, in’dzayenda pantsi pa dziko pabodzi na wana wa wanthu omwe akuyenda m’dindi.’*

15 “Yahova Mbuya Mkululetu walewa kuti: ‘Pa ntsiku yomwe mutiyu un’dzayendesedwa m’thenje,* ine nin’dzacitisa kuti wanthu alire. Ndipopa nin’dzampsinkha madzi yakuzika ndicifunga mikulo kuti madzi mazinji yaleke kufamba. Nin’dzacitisa ku Lebanoni kuti kukhale mdima thangwe ra iye ndipo miti yentse ya m’thengo in’dzafota. 16 Nin’dzacitisa mitundu ya wanthu kutetemera thangwe ra kugwa kwace, ndikadzamucitisa kupita m’thenje* pabodzi na wentse omwe akupita m’dindi,* ndipo miti yentse ya ku Edeni, miti yakudeka na yabwino ya ku Lebanoni, yentse yakuthiriziridwa bwino in’dzatsangalazidwa pantsi pa mataka. 17 Iwo an’dzapita naye pabodzi m’thenje,* wale omwe adaphedwa na xipada pabodzi na omwe akhamuthandizira omwe akhakhala mu mthunzi wace pakati pa mitundu ya wanthu.’

18 “‘Kodi ni muti uponi wa mu Edeni omwe ungandendemezeredwe na ulemerero na ukulu bwako? Tsono iwepo mwakusaya kupenukira un’dzagwesedwa pantsi pabodzi na miti ya ku Edeni mpaka pantsi pa mataka. Iwepo un’dzagona pakati pa wanthu wakusaya kucitidwa mgwatidwe* na wanthu omwe aphedwa na xipada. Bzimwebzi ni bzomwe bzin’dzacitikira Farawo pabodzi na wanthu wace wentse,’ walewa tenepo Yahova Mbuya Mkululetu.”

 3 Yahova Mbuya Mkululetu walewa kuti:

 7 ‘Iwepo ukadzapfudzidwa, nin’dzampsinkha kudzulu ndipo nin’dzacitisa nyenyezi zace kukhala mdima.

Ali-wentse an’dzacita mantha na moyo wace pa ntsiku yakuphedwa kwako.’

11 Pakuti Yahova Mbuya Mkululetu walewa kuti:

‘Xipada ya mambo wa ku Babiloniya in’dzabwera kwa iwepo.

Iwo an’dzamalisa kubzikuza kwa Edjipito ndipo wanthu wace wentse an’dzaphedwa.

An’dzaimba pakulewa bza Edjipito na pakulewa bza mitundu yentse ya wanthu,’ walewa tenepo Yahova Mbuya Mkululetu.”

17 Mu gole laci 12, pa ntsiku yaci 15 ya mwezi,* Yahova adalewalewa nande aciti: 18 “Iwe mwana wa munthu, lira thangwe ra mathimu ya wanthu wa ku Edjipito ndipo ulewe kuti iwo pabodzi na mitundu yamphanvu ya wanthu an’dzapolikira ku dziko la kunyantsi komwe an’dzakhala na wanthu wentse omwe adafa.*

19 “‘Kodi iwepo ukubziwona ninga udadeka kwene-kwene kuposa winango? Iwepo un’dzafa ndipo un’dzagona pabodzi na wanthu wakusaya kucitidwa mgwatidwe!’*

20 “‘Aedjipito afa pakati pa wanthu omwe aphedwa na xipada, iwo aphedwa na xipada. Atengeni pabodzi na thimu lawo lentse.

21 “‘Pantsi pa thenje,* acikunda wamphanvu an’dzalewalewa naye pabodzi na wale omwe ambamuthandiza. Kulewa cadidi, Aedjipito an’dzaphedwa na xipada ndipo an’dzapfudzidwa ninga wanthu wakusaya kucitidwa mgwatidwe. 22 Asiriya ali kumweko pabodzi na thimu lawo lentse. Mathenje yawo yali m’mbali mwawo ndipo wentse afa na xipada. 23 Mathenje yawo yali m’dindi* lakuzika ndipo thimu lawo liri m’mbali mwa thenje lawo. Wentsenewo adafa na xipada thangwe pomwe iwo akhana moyo, adacitisa mantha wanthu.

24 “‘Elamu ali kumweko pabodzi na thimu lace, m’mbali mwa thenje lace. Wentse wa iwo adafa na xipada, iwo adayenda pantsi ali wakusaya kucitidwa mgwatidwe, wale omwe akhacitisa mantha wanthu. Tsapano iwo an’dzacita manyazi pabodzi na wale omwe akuyenda m’dindi.* 25 Pakati pa anyakufa, adamukonzera mbuto yakugona pabodzi na thimu lace lentse, m’mbali mwa thenje lace. Wentsenewo alibe kucitidwa mgwatidwe ndipo adafa na xipada pakuti akhacitisa mantha wanthu. Iwo an’dzacita manyazi pabodzi na wale omwe akuyenda m’dindi.* Iye waikhidwa pakati na wanthu wakufa.

26 “‘Kumweko kuna Meseki na Tubali pabodzi na mathimu yawo. Mathenje yawo yali m’mbali mwawo.* Wentsenewo alibe kucitidwa mgwatidwe ndipo adafa na xipada, pakuti akhacitisa mantha wanthu. 27 Kodi an’dzagona lini pabodzi na acikunda wamphanvu wakusaya kucitidwa mgwatidwe omwe adafa, omwe adayenda m’thenje* pabodzi na bzifuzo bzawo bza nkhondo? Xipada zawo zin’dzaikhidwa kuntsi kwa misolo yawo ndipo pikado zawo zin’dzaikhidwa kuntsi kwa mafupa yawo,* pakuti acikunda wamphanvuwa akhacitisa mantha wanthu. 28 Tsono iwepo un’dzapfudzidwa pakati pa wanthu wakusaya kucitidwa mgwatidwe* ndipo un’dzagona pabodzi na wanthu omwe adaphedwa na xipada.

29 “‘Edomu ali kumweko na amambo wace pabodzi na akulu-akulu wace wentse. Napo kuti mbamphanvu, iwo apendesedwa pakati pa wanthu omwe adaphedwa na xipada. Iwo an’dzagona pabodzi na wanthu wakusaya kucitidwa mgwatidwe na omwe akuyenda m’dindi.*

30 “‘Kumweko kuna nduna zentse za* ku norte pabodzi na Asidoniyo wentse. Iwo adayenda m’dindi* na manyazi pabodzi na wanthu omwe adaphedwa, napo kuti akhacitisa mantha wanthu thangwe ra mphanvu zawo. Iwo an’dzagona ali wakusaya kucitidwa mgwatidwe pabodzi na omwe adaphedwa na xipada, ndipo an’dzacita manyazi pabodzi na wale omwe akuyenda m’dindi.

31 “‘Farawo an’dzawona bzinthu bzentsenebzi ndipo an’dzatsangalazidwa na bzinthu bzomwe bzidacitikira thimu lace. Farawo pabodzi na acikunda wace wentse an’dzaphedwa na xipada,’ walewa tenepo Yahova Mbuya Mkululetu.

32 “‘Pakuti iye adacitisa mantha wanthu, Farawo pabodzi na thimu lace lentse an’dzagona na wanthu wakusaya kucitidwa mgwatidwe pabodzi na omwe adaphedwa na xipada,’ walewa tenepo Yahova Mbuya Mkululetu.”

6 “‘Tsono penu mulindiriyo wawona anyamadulanthaka akubwera, iye ne kuliza nyanga kuti acenjeze wanthuwo, ndipo anyamadulanthakawo acibwera n’kupha m’bodzi mwa wanthuwo, munthuyo an’dzafa thangwe ra kuphonya kwace koma mulandu wa mulopa wace nin’dzasunda mulindiriyo.’

7 “Tsono iwe mwana wa munthu, inepano ndakuikha kuti ukhale mulindiri pa nyumba ya Jirayeri. Ukabva mafala yakucokera pamulomo pangu, ukawacenjeze wanthuwo. 8 Inepano ndikauza munthu wakuipa kuti: ‘Kulewa cadidi iwepo un’dzafa,’ tsono iwepo ukasaya kulewa ciri-centse kuti umucenjeze kuti acinje bzicito bzace, iye an’dzafa ninga munthu wakuipa thangwe ra kuphonya kwace, tsono mulopa wace nin’dzasunda iwepo. 9 Tsono iwepo ukacenjeza munthu wakuipayo kuti acinje bzicito bzace bzakuipa, koma iye n’kulamba kucinjako, iye an’dzafa thangwe ra kuphonya kwaceko, tsono iwepo un’dzapulumusa moyo wako.

10 “Iwe mwana wa munthu, uza nyumba ya Jirayeri kuti: ‘Imwepo mwalewa kuti: “Kusaya kubvera kwathu na pikado zathu ni mtolo ukulu kwene-kwene kwa ifepano ndipo bzikuticitisa kumala mphanvu. Tenepo tingapitirize tani kukhala na moyo?”’ 11 Uwauze kuti: ‘Yahova Mbuya Mkululetu walewa kuti: “Pana ine Mulungu wamoyo, nimbakomedwa lini na infa ya munthu wakuipa, koma nimbafuna kuti munthu wakuipa acinje bzicito bzace kuti apitirize kukhala na moyo. Siyani, siyani makhalidwe yanu yakuipa, imwe wa m’nyumba ya Jirayeri, thangwe ranyi mukufuna kufa?”’

12 “Iwe mwana wa munthu, uza wanthu wako kuti: ‘Cirungamo ca munthu wakulungama cin’dzamupulumusa lini iye akasiya kucita bzinthu bzabwino, ndipo kuphonya kwa munthu wakuipa kun’dzamukhukhumudwisa lini iye akasiya kucita bzinthu bzakuipabzo. Munthu wakulungama an’dzapulumuka lini thangwe ra cirungamo cace pa ntsiku yomwe iye an’dzacita pikado. 13 Ndikauza munthu wakulungama kuti: “Kulewa cadidi iwepo un’dzakhala na moyo,” koma iye akacita bzinthu bzakuipa thangwe ra kuthemba cirungamo cace, palibe bzicito bzace bzakulungama bzomwe bzin’dzakumbukiridwa. Iye an’dzafa thangwe ra bzinthu bzakuipa* bzomwe wacitabzo.

14 “‘Ndipo ndikauza munthu wakuipa kuti: “Kulewa cadidi iwepo un’dzafa,” ndipo iye akasiya pikado zace acicita bzinthu bzabwino na bzakulungama, 15 akabwezera bzinthu bzomwe akhadaphatira munthu omwe akhanaye mangawa, acibwezerambo bzomwe waba, ndipo acifamba mwakubverana na malamulo yomwe yambapasa moyo, acisaya kucita bzinthu bzomwe mpsakuipa, kulewa cadidi iye an’dzapitiriza kukhala na moyo. Iye an’dzafa lini. 16 An’dzatawira lini mulandu thangwe ra pikado iri-yentse yomwe adacita.* Pakuti wacita bzinthu bzakulungama na bzabwino, kulewa cadidi iye an’dzapitiriza kukhala na moyo.’

17 “Wanthu wako alewa kuti: ‘Bzomwe Yahova ambacita mpsakusaya kulungama,’ tsono kulewa cadidi, iwo ndiwo omwe ambacita bzinthu bzakusaya kulungama.

18 “Munthu wakulungama akasiya kucita bzinthu bzabwino, aciyamba kucita bzinthu bzakuipa, iye an’dzafa thangwe ra bzimwebzo. 19 Tsono munthu wakuipa akasiya bzakuipa acicita bzabwino na bzakulungama, iye an’dzapitiriza kukhala na moyo thangwe ra bzimwebzo.

20 “Tsono imwepo mwalewa kuti: ‘Bzomwe Yahova ambacita mpsakusaya kulungama.’ Imwe wa m’nyumba ya Jirayeri, inepano nin’dzatonga munthu ali-wentse mwakubverana na bzomwe ambacita.”

21 Pakumalizira pace, mu gole laci 12 la ukapolo bwathu, m’mwezi waci 10, pa ntsiku yacixanu ya mweziyo, munthu m’bodzi omwe adapulumuka ku Jeruzalemu adabwera kwa ine acilewa kuti: “Mzinda watengedwa!”

22 Usiku bomwe mangwana yace mwamuna omwe adapulumuka ule angadafika, boko la Yahova lidandifikira ndipo iye adafungula mulomo wangu pomwe mwamuna ule akhanati kufika macibese. Mulomo wangu ukhadafungulidwa kale ndipo ndikhali lini pomwe bewewe.

23 Tenepo Yahova adalewalewa nande kuti: 24 “Iwe mwana wa munthu, wanthu wakukhala m’matere akulewa bzinthu pakulewa bza Jirayeri kuti: ‘Abulahamu akhali munthu m’bodzi basi, napo bziri tenepo iye adatenga dziko lino. Ife ndife azinji, kulewa cadidi, tidapasidwa dzikoli ninga utaka.’

25 “Tenepo uwauze kuti: ‘Yahova Mbuya Mkululetu walewa kuti: “Imwepo mumbadya nyama na mulopa wace, mumbanyang’anisisa bzifanikiso bzanu bzakunyantsa* ndipo mumbapitiriza kupha wanthu. Tsono thangwe ranyi mukufuna kuti dzikoli likhale lanu? 26 Mumbathemba xipada yanu, mumbacita bzinthu bzakunyantsa ndipo munthu ali-wentse ambacita upombo na mkazi wa mwenekaciro. Tsono thangwe ranyi mun’funa ku dzikoli likhale lanu?”’

27 “Iwepo un’funika kuwauza kuti: ‘Yahova Mbuya Mkululetu walewa kuti: “Pana ine Mulungu wamoyo, wale omwe ambakhala m’matere an’dzafa na xipada. Omwe ali m’thengo nin’dzawapereka kwa bzirombo bza m’thengo kuti akhale cakudya ca bzirombobzo ndipo omwe akukhala m’mimuro yakulimba na mu mphako an’dzafa na matenda. 28 Nin’dzacitisa kuti dzikoli lileke kukhalidwa pomwe na wanthu, ndipo kubzikuza kwace kun’dzamala. Mapiri ya Jirayeri yan’dzakhalidwa lini pomwe na wanthu ndipo palibe munthu omwe an’dzapita na m’mwemo. 29 Ndipo iwo an’dzadziwa kuti ine ndine Yahova, ndikadzacitisa dzikoli kukhaliratu matere thangwe ra bzinthu bzentse bzakunyantsa bzomwe iwo adacita.”’

30 “Tsono iwe mwana wa munthu, wanthu wako akucezerana bza iwepo m’mbali mwa mimuro na m’misuwo ya nyumba. Ali-wentse akuuza m’bale wace kuti: ‘Bwerani, bwerani tidzabve mafala ya Yahova.’ 31 Iwo an’dzabwera azinji kwene-kwene kuti adzakhale pamaso pako ninga wanthu wangu. Iwo an’dzabva mafala yako, tsono an’dzayaphatisa lini basa, thangwe na miromo yawo, iwo ambalewa bzinthu bzabwino bza iwepo akakhala pabodzi na iwepo, koma mitima yawo imbafuna kugumana phindu mwacinyengo. 32 Kwa iwo, iwepo uli ninga nyimbo ya lufoyi yakuimbidwa na fala lakudeka na yakuimbidwa bwino na cakuimbira ca bzingwe. Iwo an’dzabva mafala yako, koma palibe omwe an’dzayaphatisa basa. 33 Bzentse bzikadzakwanisika, iwo an’dzadziwa kuti pakati pawo pakhana mprofeta ndipo ibzo bzin’dzakwanisikadi.”

34 Yahova adalewalewa nande pomwe kuti: 2 “Iwe mwana wa munthu, lewa profesiya ya bzinthu bzakuipa bzomwe bzin’citikira amakabusa wa Jirayeri. Lewa profesiya yakulewa bza amakabusa yakuti: ‘Yahova Mbuya Mkululetu akuti: “Tsoka kwa amakabusa wa Jirayeri, omwe ambandobzisamalira* iwo okha basi. Kodi ni mabira lini yomwe iwo akhafunika kuyasamalira?* 3 Imwepo mumbadya mafuta, mumbabvala bzakubvala bzabwino kwene-kwene ndipo mumbapha cifuwo cakunenepa, tsono mumbasamalira lini mabirayo. 4 Mulibe kulimbisa mabira yakutepa, kusamalira yakuduwala, kumanga na ligadura yomwe yana bzironda, kubweza yomwe yakhadabzipambula na yanzace ne kukanyang’ana yomwe yakhadataika. M’mbuto mwace mwayatsogolera mwaukali na mwadima. 5 Ndipopa iyo yadabalalisidwa thangwe pakhalibe makabusa. Yadabalalisidwa ndipo yadakhala cakudya ca bzirombo bzentse bza m’thengo. 6 Mabira yangu yadataika m’mapiri yentse na m’tumapiri tung’ono-tung’ono. Mabira yangu yadabalalika pa dziko lentse la pantsi ndipo palibe omwe adayanyang’ana kuti akayatenge.

7 “‘“Tenepo imwe amakabusa, tetekerani mafala ya Yahova yakuti: 8 ‘Yahova Mbuya Mkululetu walewa kuti: “Pana ine Mulungu wamoyo, pakuti mabira yangu yakhala nyama yakuphatidwa na cakudya kwa bzirombo bzentse bza m’thengo thangwe ra kusaya makabusa, ndipo amakabusa wangu alibe kuyenda kukanyang’ana mabira yangu, m’mbuto mwace akhandobzisamalira iwo okha m’mbuto mwakusamalira mabira yangu,”’ 9 tenepo imwe amakabusa, tetekerani mafala ya Yahova yakuti: 10 Yahova Mbuya Mkululetu walewa kuti: ‘Nin’dzalanga amakabusa ndipo iwo an’dzatawira mulandu thangwe ra bzinthu bzomwe acitira mabira yangu, ndipo nin’dzabvuma lini pomwe kuti iwo asamalire mabira yangu. Amakabusawo an’dzabzisamalira lini pomwe okha. Nin’dzapulumusa mabira yangu m’kamwa mwawo ndipo iwo an’dzayadya lini pomwe.’”

11 “‘Pakuti Yahova Mbuya Mkululetu walewa kuti: “Ine ndiri pano. Ine nin’dzanyang’ana ndekha mabira yangu na kuyasamalira. 12 Nin’dzasamalira mabira yangu ninga momwe ambacitira makabusa omwe wagumana mabira yace yomwe yakhadabalalika aciyasamalira. Nin’dzayapulumusa kuli-kwentse komwe yadabalalisidwira pa ntsiku ya mitambo na ya mdima ukulu. 13 Nin’dzayacosa pakati pa mitundu ya wanthu ndiciyatsonkhanisa m’madziko, ndipo nin’dzayayendesa m’dziko lawo na kuyacitisa kuti yadye m’mapiri ya Jirayeri, m’mbuto zomwe zina mikulo ya madzi na mbuto zentse zakukhalidwa na wanthu m’dzikolo. 14 Nin’dzayayendesa pa mbuto ya mauswa yabwino kuti yakadye ndipo mbuto yakudyerayo iri m’mapiri matali-matali ya Jirayeri. Kumweko yan’dzagona pa mauswa yabwino ndipo yan’dzadya mauswa yabwino m’mapiri ya Jirayeri.”

15 “‘“Nin’dzasamalira ndekha mabira yangu, ndipo nin’dzayapasa mbuto kuti yagone,” walewa tenepo Yahova Mbuya Mkululetu. 16 “Nin’dzanyang’ana bira omwe wataika, nin’dzabweresa omwe akhadabzipambula na mwanzace, nin’dzamanga na ligadura omwe akhadapwetekeka, nin’dzalimbisa wakutepa ndipo nin’dzapha wakunenepa na wamphanvu. Inepano nin’dzayatonga ndipo nin’dzayapasa cirango cakuthemera.”

17 “‘Pakulewa bza imwepo mabira yangu, Yahova Mbuya Mkululetu walewa kuti: “Ndasala pang’ono kutonga bira ali-wentse payekha, pakati pa mabvululume na atonde. 18 Kodi mpsakukwanira lini kudyera m’mbuto zomwe zina mauswa yabwino? Kodi mukhafunika kuponda-ponda mauswa yentse yakusala pa mbuto zanu zakudyera? Pomwe mwamala kumwa madzi yakucena, kodi yakusala mukhafunika kuyaponda-ponda muciyapswipiza? 19 Kodi mabira yangu ndiyo yomwe yakhafunika kudya mauswa yomwe imwepo mwaponda-ponda na kumwa madzi yomwe imwepo mwapswipiza na minyendo yanu?”

20 “‘Pakuti Yahova Mbuya Mkululetu walewa kuti: “Ine ndiri pano. Inepano nin’dzatonga bira wakunenepa na wakuwonda, 21 pakuti imwepo mukupitiriza kumbagwinyana na thupi lanu na phewa lanu ndipo mukhasuntha na nyanga zanu mabira yentse yakuduwala mpaka iyo kubalalika. 22 Ine nin’dzapulumusa mabira yangu, ndipo iyo yan’dzasiya kukhala nyama yakuphatidwa ndipo nin’dzatonga bira ali-wentse payekha. 23 Nin’dzayapasa m’busa m’bodzi, omwe ni mtumiki wangu Davide ndipo iye an’dzayasamalira.* Iye an’dzayasamaliradi* acikhala makabusa wawo. 24 Ine Yahova nin’dzakhala Mulungu wawo ndipo mtumiki wangu Davide an’dzakhala mtsogoleri pakati pawo. Ndine Yahova omwe ndalewa.

25 “‘“Nin’dzacita nayo mpangano wa mtendere ndipo nin’dzapulumusa dzikoli ku bzirombo bzaukali kuti yadzakhale mwakukhotcerereka m’dambo na kugona m’thengo. 26 Nin’dzacitisa kuti mabirayo na mbuto zakuzungulira phiri langu zikhale bzisimbo, ndipo nin’dzacitisa kuti nvula igwe pa nthawe yace. Kun’dzawoneka bzisimbo bzizinji ninga kubvumba kwa nvula. 27 Miti ya m’munda in’dzabala bzisapo, bzakudya bzin’dzabala bwino pa mataka ndipo mabira yangu yan’dzakhala mwakukhotcerereka m’dzikomo. Ndipo iyo yan’dzadziwa kuti ine ndine Yahova, ndikadzatcola djoki lawo na kuyapulumusa kwa wale omwe akhayaboneresa. 28 Iyo yan’dzakhala lini pomwe nyama yakuphatidwa kwa mitundu ya wanthu, ndipo bzirombo bza m’thengo bza pa dziko la pantsi bzin’dzayadya lini pomwe. Iyo yan’dzakhala mwakukhotcerereka ndipo palibe omwe an’dzayagopswa.

29 “‘“Nin’dzayapasa mbuto yomwe in’dzakhala yakubvekera thangwe ra bzomwe bzin’dzamera pa mbutoyo. Iyo yan’dzafa lini pomwe na njala m’dzikomo ndipo ne yan’dzanyozedwa lini pomwe na mitundu ya wanthu. 30 ‘Iwo an’dzadziwa kuti ine Yahova Mulungu wawo, ndinawo pabodzi, ndipo Ajirayeri ni wanthu wangu,’ walewa tenepo Yahova Mbuya Mkululetu.”’

31 “‘Imwe mabira yangu, mabira yomwe nimbayasamalira, imwepo ndimwe wanthu, koma ine ndine Mulungu wanu,’ walewa tenepo Yahova Mbuya Mkululetu.”

35 Yahova adalewalewa nande pomwe kuti: 2 “Iwe mwana wa munthu, nyang’anisa mphimpha za kumapiri ya Seiri ndipo lewa bzinthu bzakuipa bzomwe bzin’citika kumweko. 3 Uwauze kuti: ‘Yahova Mbuya Mkululetu walewa kuti: “Iwe mphimpha za kumapiri ya Seiri, inepano ndakhala nyamadulanthaka wako, nin’kufuthulira boko langu, ndipo nin’citisa kuti ukhale mbuto yomwe in’dzakhalidwa lini na wanthu. 4 Nin’dzapfudza mizinda yako icikhala matere ndipo un’dzakhala mbuto yomwe in’dzakhalidwa lini na wanthu, ndipo iwepo un’dzadziwa kuti ine ndine Yahova. 5 Pakuti iwepo wawawenga kwene-kwene Ajirayeri ndipo wawapha na xipada pa nthawe ya tsoka lawo na pa nthawe yakulangidwa kwawo kwakumalizira.”’

6 “Yahova Mbuya Mkululetu walewa kuti: ‘Pana ine Mulungu wamoyo, nin’dzacitisa kuti ufe ndipo infayo un’dzaithawa lini. Pakuti wapha wanthu omwe ukhawawenga, infa in’dzakutewera m’mbuyo. 7 Nin’dzacitisa mphimpha za kumapiri ya Seiri kuti zisaye kukhalidwa na wanthu ndipo nin’dzapfudza wentse omwe ambapita na kumweko, pakuyenda ayai pakubwerera. 8 Nin’dzampsinkha mapiri yako na wanthu wakufa, ndipo wanthu omwe an’dzafa na xipada an’dzagwera m’tumapiri twako, m’bzigwa bzako na m’mikulo yako yentse. 9 Nin’dzakucitisa kukhala mbuto yakusaya kukhalidwa mpaka kale-kale ndipo mizinda yako in’dzakhalidwa lini pomwe ndipo imwepo mun’dzadziwa kuti ine ndine Yahova.’

10 “Iwepo walewa kuti: ‘Mitundu miwiriyi na madziko mawiriya yan’dzakhala yangu ndipo ifepano tin’dzayatenga,’ napo Yahova caiyeyo acidzakhala kumweko. 11 Yahova Mbuya Mkululetu walewa kuti: ‘Pana ine Mulungu wamoyo, nin’dzakubwezera thangwe ra ciya, ntcanje na ciwengo comwe udalatiza kwa iwo, ndipo inepano ndikadzakulanga, nin’dzabzidziwikisa pakati pawo. 12 Tenepo un’dzadziwa kuti ine Yahova, ndabva mafala yentse yakunyoza yomwe udalewa kumapiri ya Jirayeri pomwe udati: “Iwo ni matere ndipo adaperekedwa m’manja mwathu kuti tiwapfudze.”* 13 Mwakubzikuza mwandilewa kuipa ndipo mwathumizira mafala yanu yakunditukwana. Ine ndabva bzentsene.’

14 “Yahova Mbuya Mkululetu walewa kuti: ‘Dziko lentse lin’dzakomedwa ndikadzakucitisa kukhala mbuto yakusaya kukhalidwa na wanthu. 15 Pakuti iwepo udakomedwa pomwe utaka bwa nyumba ya Jirayeri budapfudzidwa, inepano nin’kucitambo bzibodzi-bodzibzi. Iwe mphimpha ya kumapiri ya Seiri, inde Edomu wentse, un’dzakhala matere yomwe yan’dzakhalidwa lini na wanthu, ndipo iwo an’dzadziwa kuti ine ndine Yahova.’”

36 “Iwe mwana wa munthu, lewa profesiya ya bzinthu bzomwe bzin’dzacitikira mapiri ya Jirayeri kuti: ‘Imwe mapiri ya Jirayeri, bvani mafala ya Yahova. 2 Yahova Mbuya Mkululetu walewa kuti: “Nyamadulanthaka wakunyozani mwa kulewa kuti: ‘Ya, bziri bwino! Mpaka mapiri yakale-kale yakhala yathu!’”’

3 “Tenepo lewa profesiya yakuti: ‘Yahova Mbuya Mkululetu walewa kuti: “Pakuti iwo adakucitisani kukhala matere ndipo adamenyana namwe kucokera ku mbali zentse kuti mukhale utaka bwa wale omwe adapulumuka kucokera pa mitundu ya wanthu, pakuti wanthu akupitiriza kulewa bza imwepo na kukulewani kuipa, 4 ndipopa imwe mapiri ya Jirayeri, tetekerani mafala ya Yahova Mbuya Mkululetu, Yahova Mbuya Mkululetu akuuza mapiri, tumapiri tung’ono-tung’ono, mikulo na bzigwa,* matere yomwe yakukhalidwa lini na wanthu na mizinda yomwe idasiidwa yomwe idapambidwa icisinjiriridwa na wanthu omwe adapulumuka pakati pa mitundu ya wanthu yakuwazungulira. 5 Yahova Mbuya Mkululetu akulewa kuti: ‘Nin’dzalewalewa na ukali bwangu bzakugaka moto kwa wale omwe adapulumuka pakati pa mitundu ya wanthu na kwa Edomu wentse na wale omwe mwakukomedwa na mwakunyoza kwene-kwene ambalewa kuti dziko langu ndawo, kuti atenge dzikolo pabodzi na mbuto yakudyesera bzifuwo.’”’

6 “Tenepo lewa profesiya yakulewa bza dziko la Jirayeri ndipo uza mapiri, tumapiri tung’ono-tung’ono, mikulo na bzigwa kuti: ‘Yahova Mbuya Mkululetu walewa kuti: “Tetekerani! Ndinilewalewa mwa nyongo na mwaukali thangwe ra kunyoza komwe mitundu ya wanthu yakucitani.”’

7 “Tenepo, Yahova Mbuya Mkululetu walewa kuti: ‘Ndaimisa boko langu ndipo ndikulumbira kuti mitundu yapafupi in’dzanyozedwambo. 8 Tsono imwe mapiri ya Jirayeri, mun’dzakhala na mthambi ndipo mun’dzabalira bzisapo wanthu wangu Ajirayeri, pakuti iwo anibwerera mwakusaya kucedwa. 9 Ndipo ine ndinamwe pabodzi, nin’dzakuthandizani ndipo mun’dzalimidwa na kubzalidwa. 10 Nin’dzawanza wanthu wako, nyumba yentse ya Jirayeri, inde nyumba yentse, mizinda in’dzakhalidwa ndipo matere yan’dzamangidwa pomwe. 11 Inde, nin’dzawanza wanthu wako na bzifuwo bzako. Iwo an’dzawanda acikhala azinji. Nin’dzacitisa kuti mukhalidwe ninga kale, nin’dzacitisa kuti bzinthu bzikufambireni bwino kuposa kale ndipo mun’dzadziwa kuti ine ndine Yahova. 12 Nin’dzacitisa wanthu wangu Ajirayeri kukhala mwa imwepo ndipo iwo an’dzakutengani kuti mukhale wawo. Imwepo mun’dzakhala utaka bwawo ndipo wana wawo an’dzafa lini pomwe thangwe ra imwepo.’”

13 “Yahova Mbuya Mkululetu walewa kuti: ‘Pakuti iwo akukulewani kuti: “Iwepo ndiwe dziko lomwe limbapha wanthu ndipo umbacitisa wanthu wa mitundu yako kuleka kukhala na wana,”’ 14 ‘ndipopa iwepo un’dzadya lini pomwe wanthu ne kucitisa wanthu wa mitundu yako kuleka kukhala na wana,’ walewa tenepo Yahova Mbuya Mkululetu. 15 ‘Nin’dzacitisa lini pomwe kuti wanthu wa mitundu inango akutukwane ne kukucitisa kuti upirire kunyozedwa na wanthu winango ndipo un’dzakhukhumudwisa lini pomwe wanthu wa mitundu yako,’ walewa tenepo Yahova Mbuya Mkululetu.”

16 Ndipo Yahova adalewalewa nande pomwe kuti: 17 “Iwe mwana wa munthu, pomwe nyumba ya Jirayeri ikhakhala m’dziko lawo, iwo adaipswipiza thangwe ra makhalidwe yawo na bzicito bzawo. Kwa ine, makhalidwe yawo yakhali yakupswipa ninga mkazi omwe ali ku mwezi. 18 Tenepo ndidawakhuthulira ciya cangu, thangwe ra kupha wanthu komwe adacita m’dzikolo na kupswipiza dzikolo thangwe ra bzifanikiso bzawo bzakunyantsa.* 19 Ndipopa ndidawabalalisira kwa wanthu wa mitundu inango ndipo ndidawabalalisira m’madziko manango. Ndipo ndidawatonga mwakubverana na makhalidwe yawo na bzicito bzawo. 20 Tsono pomwe iwo adafika kwa mitundu imweyi, wanthu adapswipiza dzina langu lakucena mwa kulewa bza iwo kuti: ‘Awa ni wanthu wa Yahova, tsono iwo adacoka m’dziko lace.’ 21 Ndipopa nin’dzakhotcerera dzina langu lakucena, lomwe nyumba ya Jirayeri idapswipiza pakati pa mitundu yomwe iwo adayenda.”

22 “Na tenepo, uza nyumba ya Jirayeri kuti: ‘Yahova Mbuya Mkululetu walewa kuti: “Imwe wa m’nyumba ya Jirayeri, inepano nin’cita bzimwebzi sikuti thangwe ra imwepo, koma thangwe ra dzina langu lakucena lomwe imwepo mudalipswipiza pakati pa mitundu inango yomwe imwepo mudayenda.”’ 23 ‘Inepano nin’dzacenesadi dzina langu likulu lomwe lidapswipizidwa pakati pa mitundu inango lomwe imwepo mudalipswipiza pakati pawo. Ndipo wanthu wa mitundu inango an’dzadziwa kuti ine ndine Yahova, ndikadzacenesedwa pakati panu pamaso pa mitundu inangoyo,’ walewa tenepo Yahova Mbuya Mkululetu. 24 ‘Nin’dzakucosani pakati pa mitundu inango na kukutsonkhanisani kucokera m’madziko yentse ndipo nin’dzakubwezerani m’dziko lanu. 25 Nin’dzakuwazirani madzi yakucena ndipo mun’dzakhala wakucena. Nin’dzacenesa kupswipa kwanu kwentse na ku bzifanikiso bzanu bzentse bzakunyantsa. 26 Nin’dzakupasani mtima upsa na makumbukidwe mapsa. Nin’dzacosa m’thupi mwanu mtima wakuuma ninga mwala ndicikupasani mtima wakufewa ninga nyama.* 27 Nin’dzaphatisa basa mphanvu yangu kuti ndicinje makumbukidwe yanu, nin’dzacitisa kuti mufambe mwakubverana na bzakutonga bzangu ndipo mun’dzabvera na kuteweza malamulo yangu. 28 Tenepo imwepo mun’dzakhala m’dziko lomwe ndidapasa makolo yanu yakale, mun’dzakhala wanthu wangu ndipo ine nin’dzakhala Mulungu wanu.’

29 “‘Nin’dzakupulumusani ku bzakupswipa bzanu bzentse, nin’dzacitisa kuti bzakudya bzibale kwene-kwene ndipo nin’dzakubwereserani lini njala. 30 Nin’dzacitisa kuti miti ibale bzisapo bzizinji ndipo nin’dzacitisambo kuti bzakudya bza m’munda bzibale kwene-kwene kuti muleke kupasidwa manyazi pakati pa mitundu inango thangwe ra njala. 31 Tenepo mun’dzakumbukira makhalidwe yanu yakuipa na bzicito bzanu bzakuipa ndipo mun’dzanyantsidwa thangwe ra bzakuphonya bzanu na bzicito bzanu bzakunyantsa. 32 Tsono dziwani ibzi: Ine ndikucita lini bzimwebzi thangwe ra imwepo, imwe wa m’nyumba ya Jirayeri, citani manyazi ndipo umidwani thupi thangwe ra makhalidwe yanu,’ walewa tenepo Yahova Mbuya Mkululetu.

33 “Yahova Mbuya Mkululetu walewa kuti: ‘Pa ntsiku yomwe nin’dzakucenesani ku bzakuphonya bzanu bzentse, nin’dzacitisa kuti mizinda ikhalidwe pomwe na wanthu ndipo matere yamangidwe pomwe. 34 Dziko lomwe likhali matere lomwe munthu ali-wentse akhaliwona pakupita na m’mwemo, lin’dzalimidwa. 35 Ndipo wanthu an’dzalewa kuti: “Dziko lomwe likhali matere lakhala ninga zunde la Edeni, mizinda yomwe ikhali matere ndipo ikhakhalidwa lini na wanthu na yakudzongeka, tsapano yamangidwa ndipo ikukhalidwa pomwe na wanthu.” 36 Ndipo wanthu wa mitundu inango omwe an’dzasala pakati panu, an’dzadziwa kuti ndine Yahova omwe ndamanga mbuto zomwe zikhadapfudzidwa na kubzala mbuto yomwe ikhali matere, ndine Yahova omwe ndalewa na kucita bzimwebzi.’

37 “Yahova Mbuya Mkululetu walewa kuti: ‘Kuthumizira bzimwebzi nin’dzabvuma kuti nyumba ya Jirayeri indikumbire kuti ndiwacitire ibzi: Kucitisa wanthu wawo kuwanda ninga mabira. 38 Ndipo mizinda yomwe ikhali matere in’dzadzala na wanthu, ninga wanthu wakucenesedwa, ninga mabira ya ku Jeruzalemu* pa nthawe ya phwando, ndipo an’dzadziwa kuti ine ndine Yahova.’”

37 Boko la Yahova likhali pa ine ndipo Yahova adandilamusa na mzimu wace, acindiikha pakati pa cigwa* comwe cikhadadzala na mafupa. 2 Iye adacitisa kuti ndifambe m’mwemo ndipo ndidawona kuti m’cigwamo mukhana mafupa mazinji ndipo yakhadauma kwene-kwene. 3 Iye adandibvunza kuti: “Iwe mwana wa munthu, kodi mafupaya yangakhale pomwe na moyo?” Ine ndidatawira kuti: “Yahova Mbuya Mkululetu, mun’dziwa ndimwepo.” 4 Tenepo iye adandiuza kuti: “Lewa profesiya yakulewa bza mafupaya, yauze kuti: ‘Imwe mafupa yakuuma, tetekerani mafala ya Yahova yakuti:

5 “‘Yahova Mbuya Mkululetu akulewa bza mafupamwe kuti: “Nin’dzakuikhani mphuwe kuti mukhale pomwe na moyo. 6 Nin’dzakuikhani mdzipe na nyama ndipo nin’dzakuikhanimbo khanda na mphuwe kuti mukhale pomwe na moyo. Ndipo mun’dzadziwa kuti ine ndine Yahova.”’”

7 Tenepo ndidalewa profesiya ninga momwe akhadandiuzira, pomwe ndidandomala kulewa profesiyayo, ndidayamba kubva baludya la kumenyana-menyana kwa mafupayo, ndipo mafupayo yadayamba kuphatana liri-lentse na linzace. 8 Patsogolo pace kudabwera mdzipe na nyama pa mafupayo ndipo kudabwerambo khanda padzulu pace, tsono yakhalibe mphuwe.

9 Patsogolo pace iye adandiuza kuti: “Lewa profesiya kuna mphepo, iwe mwana wa munthu, lewa profesiya ndipo uza mphepo kuti: ‘Yahova Mbuya Mkululetu walewa kuti: “Iwe mphepo,* bwera kucokera ku mphepo zinai ndipo ufulizire omwe adafawa kuti akhale pomwe na moyo.”’”

10 Tenepo ndidalewa profesiya ninga momwe akhadandiuzira. Mphepo idapita mwa iwo, adayamba kukhala na moyo aciima ndipo adakhala thimu likulu la anyankhondo.

11 Patsogolo pace iye adandiuza kuti: “Iwe mwana wa munthu, mafupaya ni nyumba yentse ya Jirayeri. Iwo akulewa kuti: ‘Mafupa yathu yauma, ndipo cidikhiro cathu camala, tentse tamala kupfudzidwa.’ 12 Tenepo lewa profesiya yakulewa bza iwo kuti: ‘Yahova Mbuya Mkululetu walewa kuti: “Imwe wanthu wangu, nin’dzafungula mathenje yanu ndicikulamusani ku mathenje yanuyo ndipo nin’dzakuyendesani ku dziko la Jirayeri. 13 Imwe wanthu wangu, ndikadzafungula mathenje yanu ndicidzakulamusani m’mathenje yanuyo, imwepo mun’dzadziwa kuti ine ndine Yahova.”’ 14 ‘Nin’dzaikha mzimu wangu mwa imwepo, mun’dzakhala pomwe na moyo ndipo nin’dzacitisa kuti mukhale m’dziko lanu. Na tenepo mun’dzadziwa kuti ndine Yahova omwe ndalewa na kucita bzimwebzi,’ walewa tenepo Yahova.”

15 Yahova adalewalewa nande pomwe kuti: 16 “Iwe mwana wa munthu, tenga mpsimbo ndipo uinembe kuti: ‘Kwa Djuda na kwa wanthu wa Jirayeri omwe anaye pabodzi.’* Ndipo tenga mpsimbo inango uciinemba kuti: ‘Kwa Zuze, mpsimbo ya Efraimu na wentse wa m’nyumba ya Jirayeri omwe anaye pabodzi.’* 17 Ukamala phatanidza mpsimbo ziwirizo kuti zikhale mpsimbo ibodzi m’manja mwako. 18 Wanthu wako akakubvunza kuti: ‘Kodi un’tiuza lini kuti bzimwebzi bzin’funa kulewa ciyani?’ 19 Uwatawire kuti: ‘Yahova Mbuya Mkululetu walewa kuti: “Nin’dzatenga mpsimbo ya Zuze yomwe iri m’manja mwa Efraimu na madzinza ya Jirayeri yomwe yali pabodzi na iye ndipo nin’dzayaphatanidza na mpsimbo ya Djuda; nin’dzazicitisa kukhala mpsimbo ibodzi, ndipo mpsimbozo zin’dzakhala ibodzi m’manja mwangu.”’ 20 Mpsimbo zomwe un’dzazinembazo zidzakhale m’manja mwako kuti iwo adzaziwone.

21 “Tenepo auze kuti: ‘Yahova Mbuya Mkululetu walewa kuti: “Nin’cosa Ajirayeri pakati pa mitundu inango yomwe adayendayo ndipo ndiniwatsonkhanisa kucokera m’mbali zentse ndiciwabweresa m’dziko lawo. 22 Nin’dzacitisa kuti iwo akhale mtundu ubodzi m’dzikolo m’mapiri ya Jirayeri ndipo wentse an’dzatongedwa na mambo m’bodzi basi. Iwo an’dzakhala lini pomwe mitundu miwiri ne maumambo mawiri. 23 Iwo an’dzapswipizidwa lini pomwe na bzifanikiso bzawo bzakunyantsa,* bzicito bzawo bzakuipa ne na bzakuphonya bzawo. Nin’dzamalisa kusaya kukhulupirika kwawo komwe adandicitira mwakundiphonyera ndipo nin’dzawacenesa. Iwo an’dzakhala wanthu wangu ndipo ine nin’dzakhala Mulungu wawo.

24 “‘“Mtumiki wangu Davide an’dzakhala mambo wawo ndipo wentse makabusa wawo an’dzakhala m’bodzi. Iwo an’dzafamba mwakubverana na malamulo yangu ndipo an’dzabvera bzakutonga bzangu. 25 Iwo an’dzakhala m’dziko lomwe ndidapasa mtumiki wangu Djakobo, dziko lomwe makolo yawo yakale yadakhalambo. An’dzakhala m’mwemo mpaka kale-kale, iwo, wana wawo na wana wa wana wawo ndipo mtumiki wangu Davide an’dzakhala mtsogoleri wawo* mpaka kale-kale.

26 “‘“Nin’dzacita nawo mpangano wa mtendere ndipo un’dzakhala mpangano wakusaya kumala. Nin’dzacitisa kuti akhazikike m’dzikomo nakuti awande kwene-kwene, ndipo nin’dzaikha templo yangu pakati pawo mpaka kale-kale. 27 Tendi langu* lin’dzakhala pakati pawo, ine nin’dzakhala Mulungu wawo ndipo iwo an’dzakhala wanthu wangu. 28 Templo yangu ikadzakhala pakati pawo mpaka kale-kale, mitundu ya wanthu in’dzadziwa kuti ine Yahova ndikucenesa Jirayeri.”’”

38 Yahova adalewalewa nande pomwe kuti: 2 “Iwe mwana wa munthu, nyang’anisa Gogi wa dziko la Magogi, mtsogoleri mkulu wa* Meseki na Tubali ndipo lewa profesiya ya bzinthu bzakuipa bzomwe bzinimucitikira. 3 Lewa kuti: ‘Yahova Mbuya Mkululetu walewa kuti: “Iwe Gogi, mtsogoleri mkulu wa* Meseki na Tubali, ndikubwera kudzamenyana nawe. 4 Nin’dzacitisa kuti uzungunuke ndicikoloweka ntsagwada zako na medzo, ndipo nin’dzacitisa kuti ucoke pabodzi na acikunda wako wentse wamphanvu, makavalo na anyakupakira makavalo, wentse wakubvala bzakubvala bzakulemekezeka, thimu likulu la anyankhondo lomwe lina bzakukhotcera bzikulu-bzikulu na bzing’ono-bzing’ono,* ndipo wentsene an’dzakhala na maxipada. 5 Ndipo acikunda wa ku Persiya, Etiyopiya na Puti anawo pabodzi, wentse ana bzakukhotcera na makapaseti. 6 Gomeri na acikunda wace wentse, wanthu wa m’nyumba ya Togarima omwe ambakhala ku mphimpha zakutali za ku norte na acikunda wace wentse, inde wanthu azinji anawe.

7 “‘“Konzeka, konzekera iwepo pabodzi na acikunda wako kuti mukamenye nkhondo ndipo iwepo un’dzakhala mtsogoleri wawo.

8 “‘“Zikadzapita ntsiku zizinji iwepo un’dzacemeredwa. Kuphampha kwa magole iwepo un’dzapita m’dziko lomwe wanthu wace adabwerera pambuyo pakupulumuka ku xipada, omwe adatsonkhanisidwa pakati pa wanthu azinji acibweresedwa m’mapiri ya Jirayeri yomwe yakhadapfudzidwa kwa magole mazinji. Anyakukhala m’dziko limweri adabweresedwa kucokera pakati pa mitundu ya wanthu ndipo wentse akukhala mwakukhotcerereka. 9 Iwepo, acikunda wako wentse pabodzi na wanthu azinji omwe an’dzakuperekeza, un’dzabwera kudzamenyana nawo ninga conzi ndipo un’dzampsinkha dzikolo ninga mitambo.”’

10 “Yahova Mbuya Mkululetu walewa kuti: ‘Pa ntsiku imweyi, mu mtima mwako un’dzakumbuka kucita bzinthu bzakuipa. 11 Un’dzalewa kuti: “Nin’pita m’dziko la wanthu wakusaya kukhotcerereka. Ndiniyenda kukamenyana na wale omwe ambakhala mwakukhotcerereka na mwakusaya thupo liri-lentse. Wentsenewo ambakhala m’midzi yomwe iribe mimuro, bzakufungira ayai misuwo.” 12 Un’dzapita m’mwemo kuti ukapambe bzinthu bzizinji, ukapfudze mbuto zomwe zikhadapfudzidwa zomwe tsapano zikukhalidwa pomwe na wanthu ndipo ukapfudzembo wale omwe adatsonkhanisidwa pakati pa mitundu ya wanthu omwe akugwezeka cuma na bzinthu bzizinji ndipo akukhala pakati pa dziko.

13 “‘Xeba na Dedani, anyamalonda wa ku Tarisi na anyankhondo wace wentse an’dzakubvunza kuti: “Kodi iwepo un’dzapita m’dzikoli kuti upambe bzinthu bzizinji? Kodi watsonkhanisa anyankhondo wako azinji kuti utenge prata,* oro, cuma na bzinthu bzizinji?”’

14 “Tenepo iwe mwana wa munthu, uza Gogi profesiya yakuti: ‘Yahova Mbuya Mkululetu walewa kuti: “Pa ntsikuyo, pomwe wanthu wangu Ajirayeri an’dzakhala mwakukhotcerereka, kodi iwepo un’dzadziwa lini bzimwebzi? 15 Un’dzabwera kucokera kumbuto yako ku mphimpha zakutali za ku norte, iwepo pabodzi na wanthu wako azinji, wentse adapakira pa makavalo, omwe ni thimu likulu la anyankhondo na acikunda azinji. 16 Un’dzabwera kuti udzamenyane na wanthu wangu Ajirayeri ninga mtambo omwe umbampsinkha dziko, ndipo kuphampha kwa ntsiku zakumalizira, nin’dzakubweresa kuti udzamenyane na dziko langu, kuti mitundu ya wanthu idzandidziwe ndikadzabzicenesa pamaso pako mwakuphatisa basa iwepo Gogi.”’

17 “Yahova Mbuya Mkululetu walewa kuti: ‘Kodi ndiwepo lini ule omwe ndidakulewa m’mbuyomu mwakuphatisa basa atumiki wangu, aprofeta wa Jirayeri omwe kwa magole mazinji adalewa profesiya yakuti ungadadzabweresedwa kuti udzamenyane nawo?’

18 “‘Pa ntsikuyo, ntsiku yomwe Gogi an’dzapita m’dziko la Jirayeri ukali bwangu bukulu bun’dzagaka, walewa tenepo Yahova Mbuya Mkululetu. 19 Na nyongo yangu na moto wa ukali bwangu, inepano nin’dzalewalewa; pa ntsiku imweyo pan’dzacitika citeke-teke cikulu m’dziko la Jirayeri. 20 Thangwe ra inepano, ntsomba za m’nyanza, mbalame za kudzulu, bzirombo bza m’thengo na bzirombo bzentse bzakukwawa pa dziko la pantsi bzin’dzatetemera, ndipo wanthu pa dziko lentse la pantsi an’dzatetemerambo. Mapiri yan’dzagwesedwa, nkhomole zin’dzagumuka ndipo mimuro yentse in’dzagwa pa dziko.’

21 “Yahova Mbuya Mkululetu walewa kuti: ‘Nin’dzatumiza xipada m’mapiri yangu yentse kuti adzamenyane na Gogi ndipo mcikunda ali-wentse an’dzamenyana na mwanzace. 22 Nin’dzamutonga mwakuphatisa basa cisi* pabodzi na kupha wanthu, iye, acikunda wace pabodzi na wanthu wentse omwe akumuperekeza nin’dzawabvumbisira nvula yamphanvu, matalala, moto na enxofre. 23 Kulewa cadidi, nin’dzalatiza mphanvu zangu ndipo nin’dzawawonesa kuti ndine Mulungu wakucena na kubzidziwikisa pakati pa mitundu izinji, ndipo iwo an’dzadziwa kuti ine ndine Yahova.’

39 “Iwe mwana wa munthu, lewa profesiya ya bzinthu bzakuipa bzomwe bzin’citikira Gogi, yakuti: ‘Yahova Mbuya Mkululetu walewa kuti: “Iwe Gogi, mtsogoleri mkulu wa* Meseki na Tubali, ndikubwera kudzamenyana nawe. 2 Nin’dzakucitisa kuti uzungunuke, ndipo nin’dzakutsogolera kuti ubwere kucokera ku mphimpha zakutali za mbali ya ku norte, ucifika ku mapiri ya ku Jirayeri. 3 Nin’dzagwesa uta bomwe buli ku boko lako lamadzere ndipo nin’dzacitisa kuti misewe yomwe iri ku boko lako lamadidi igwe. 4 Un’dzafera m’mapiri ya Jirayeri, iwepo, acikunda wako na wanthu wentse omwe unawo pabodzi. Nin’dzakupereka kuti ukhale cakudya kwa mtundu uli-wentse wa mbalame zomwe zimbadya nyama na bzirombo bza m’thengo.”’

5 “‘Un’dzafera m’thengo pakuti ine ndalewa,’ walewa tenepo Yahova Mbuya Mkululetu.

6 “‘Ndipo nin’dzatumizira moto Magogi na kwa wale omwe ambakhala mwakukhotcerereka mu ntsuwa, ndipo iwo an’dzadziwa kuti ine ndine Yahova. 7 Nin’dzacitisa kuti dzina langu lakucena lidziwike pakati pa wanthu wangu Ajirayeri, ndipo nin’dzabvuma lini pomwe kuti dzina langu lakucena lipswipizidwe ndipo wanthu an’dzadziwa kuti ine ndine Yahova, Wakucena wa mu Jirayeri.’

8 “‘Inde, bzimwebzi bzin’dzabwera ndipo bzin’dzacitika,’ walewa tenepo Yahova Mbuya Mkululetu. ‘Imweyi ni ntsiku yomwe ndidalewa. 9 Anyakukhala m’mizinda ya Jirayeri an’dzabula, ndipo an’dzagasa moto na bzifuzo bza nkhondo, bzakukhotcera bzikulu-bzikulu na bzing’ono-bzing’ono,* uta, misewe na madipa ya nkhondo, ndipo iwo an’dzabziphatisa basa kuti agasire moto kwa magole manomwe. 10 An’dzafunika lini pomwe kunyang’ana nkhuni m’thengo, pakuti iwo an’dzaphatisa basa bzifuzo bza nkhondo kuti agasire moto.’

“‘An’dzapamba bzinthu kwa wale omwe adawapambira ndipo an’dzatenga bzinthu kwa wale omwe adawatengera,’ walewa tenepo Yahova Mbuya Mkululetu.

11 “‘Pa ntsiku imweyi, Gogi nin’dzamupasa thenje ku Jirayeri, m’cigwa ca* wale omwe ambacita ulendo kumabvadzuwa kwa nyanza, ndipo ico* cin’dzafunga njira yomwe wanthu ambapita nayo. Ni kumweko komwe an’dzapendesa Gogi pabodzi na wanthu wace wentse, ndipo mbutoyo an’dzaicemera cigwa ca Hamoni-Gogi.* 12 Nyumba ya Jirayeri in’dzamala minyezi 7 ikuwapendesa kuti acenese dziko. 13 Wanthu wentse wa m’dzikoli an’dzathandizira pa kuwapendesapo, ndipo bzimwebzi bzin’dzacitisa kuti akhale wakubvekera pa ntsiku yomwe inepano nin’dzabzilemekezesa,’ walewa tenepo Yahova Mbuya Mkululetu.

14 “‘An’dzasankhulidwa amuna kuti afambe mwakubwereza-bwereza m’dzikolo na kupendesa omwe akhadasala kuti dzikolo licenesedwe. Iwo an’dzapitiriza kunyang’ana wanthu wakufawo kwa minyezi minomwe. 15 Pomwe amuna wale an’dzakhala akufamba-famba m’dzikolo, akadzagumana pfupa la munthu wakufa, an’dzaikha cizindikiro pambali pace, ndipo wanthu wakusankhulidwa kuti ambapendese wanthu wakufa, an’dzalifucira mu cigwa ca Hamoni-Gogi. 16 Kumweko kun’dzagumanikambo mzinda wakucemeredwa Hamona,* ndipo iwo an’dzacenesambo dzikolo.’

17 “Iwe mwana wa munthu, Yahova Mbuya Mkululetu walewa kuti: ‘Uza mitundu yentse ya mbalame na bzirombo bzentse bza m’thengo kuti: “Tsonkhanani ndipo bwerani, gwezekanani pafupi na ntsembe yomwe nin’funa kukukonzerani, ntsembe ikulu m’mapiri ya Jirayeri. Imwepo mun’dzadya nyama na kumwa mulopa. 18 Mun’dzadya nyama ya wanthu wamphanvu ndipo mun’dzamwa mulopa wa atsogoleri wa dziko, kuphatanidzambo bzifuwo bzentse bzakunenepa bza ku Basani, bzomwe ni mabvululume, wana wacimuna wa mabira, atonde na mikono. 19 Na ntsembe zomwe nin’dzakukonzerani, imwepo mun’dzabzimbidwa na mafuta ndipo mun’dzamwa mulopa mpaka kuledzera.”’

20 “‘Pa meza yangu, imwepo mun’dzakhuta thangwe ra kudya nyama ya makavalo, anyakufambisa ngolo, amuna wamphanvu na mtundu uli-wentse wa anyankhondo,’ walewa tenepo Yahova Mbuya Mkululetu.

21 “‘Nin’dzalatiza ulemerero bwangu pakati pa mitundu ya wanthu, ndipo mitundu yentse in’dzawona katongedwe komwe nin’dzacita na mphanvu zangu zomwe nin’dzazilatiza pakati pawo. 22 Kuyambira ntsiku imweyo mpaka kutsogolo, nyumba ya Jirayeri in’dzadziwa kuti ine ndine Yahova Mulungu wawo. 23 Ndipo mitundu inango ya wanthu in’dzadziwa kuti nyumba ya Jirayeri yayendesedwa ku ukapolo thangwe ra kuphonya kwawo na kusaya kukhulupirika kwawo. Ndipopa ndawabisira nkhope yangu, ndawapereka m’manja mwa anyamadulanthaka wawo ndipo wentse afa na xipada. 24 Ndidacita nawo bzinthu mwakubverana na bzinthu bzakupswipa bzomwe adacita pabodzi na bzakuphonya bzawo, ndipo ndidawabisira nkhope yangu.’

25 “Tenepo Yahova Mbuya Mkululetu walewa kuti: ‘Nin’dzacosa ku ukapolo wana wa Djakobo, nin’dzabvera ntsisi nyumba yentse ya Jirayeri ndipo nin’dzakhotcerera mwa nyongo dzina langu lakucena. 26 Akadzamala kupasidwa manyazi thangwe ra kusaya kukhulupirika kwawo, iwo an’dzakhala m’dziko lawo mwakukhotcerereka ndipo palibe munthu ali-wentse omwe an’dzawagopswa. 27 Ndikadzawabweresa kucokera pakati pa mitundu ya wanthu na kuwatsonkhanisa kucokera m’madziko ya anyamadulanthaka wawo, ine nin’dzabzicenesambo pakati pawo, pamaso pa mitundu mizinji.’

28 “‘Ine ndikadzawayendesa ku ukapolo pakati pa mitundu inango na kuwabwezera m’dziko lawo ne kusiya m’mbuyo m’bodzi wa iwo, iwo an’dzadziwa kuti ine ndine Yahova Mulungu wawo. 29 Nin’dzawabisira lini pomwe nkhope yangu, pakuti nin’dzatsanulira mzimu wangu nyumba ya Jirayeri,’ walewa tenepo Yahova Mbuya Mkululetu.”

40 Mu gole laci 25 la ukapolo bwathu, kumayambiriro kwa golero, pa ntsiku yacikhumi ya mwezi wakuyamba mu gole laci 14 pambuyo pa kugwa kwa mzinda, pa ntsiku imweyoletu, boko la Yahova lidandifikira ndipo iye adanditenga aciyenda nande mu mzinda. 2 Mulungu adanditenga m’masomphenya acindiyendesa ku dziko la Jirayeri, ndipo adandiikha pa phiri litali kwene-kwene ndipo ku suli kwace kukhana cinthu cakundendemerana na mzinda.

3 Pomwe iye adandiyendesa kumweko, ndidawona munthu omwe akhana mawonekedwe ninga ya kobre.* M’manja mwace iye akhana cingwe ca linyo* na mtete* wakupimira ndipo akhadaima pa cipata. 4 Munthuyo adandiuza kuti: “Iwe mwana wa munthu, nyang’anisisa bwino, tetekera ndipo khala tceru pa bzentse bzomwe nin’kulatiza, pakuti iwepo wabweresedwa kuno thangwe ra bzimwebzi. Ukauze Jirayeri bzentse bzomwe uniwona.”

5 Ine ndidawona muro wakuzungulira kunja kwa templo.* M’manja mwa munthu ule mukhana mtete wakupimira wa mametru pafupi-fupi matatu.* Iye adayamba kupima muroyo ndipo khwankhwa la muroyo likhali la mtete ubodzi ndipo kutalimpha kwace kukhalimbo kwa mtete ubodzi.

6 Tenepo iye adayenda mpaka ku cipata ca kumabvadzuwa ndipo adakwira ntsikada. Adapima pakupitira pa msuwo ndipo khwankhwa lace likhali la mtete ubodzi ndipo mbali inango yakupitira, khwankhwa lace likhanambo mtete ubodzi. 7 Cipinda ciri-centse ca alindiri, kutalimpha kwace na khwankhwa lace bzikhali bza mtete ubodzi. Kucokera pa cipinda cibodzi ca alindiri kufika pa cipinda cinango, pakhana makovado maxanu. Pakupitira pa msuwo pomwe pakhali pafupi na pa khonde la pa msuwopo pomwe pakhali kutsogolo kwa templo, pakhana mtete ubodzi.

8 Iye adapima khonde la pacipata lomwe likhali kumbali ya mkati ndipo likhali la mtete ubodzi. 9 Patsogolo pace iye adapima khonde la pacipata ndipo likhali la makovado 8. Adapimambo mapilare yace ya m’mbali ndipo yakhali ya makovado mawiri. Khonde la pacipata likhali m’mbali mwa templo.

10 Pakhana bzipinda bzitatu bza alindiri m’mbali iri-yentse ya cipata ca kumabvadzuwa. Bzipinda bzentse bzitatu bzikhadandendemerana ndipo pilare za m’mbali zomwe zikhali m’mbali iri-yentse zikhadandendemeranambo.

11 Patsogolo pace iye adapima khwankhwa la pakupitira pa msuwo ndipo likhali la makovado 10, ndipo kutalimpha kwa msuwoyo kukhali kwa makovado 13.

12 Mbuto yomwe ikhadazunguliridwa na muro, yomwe ikhali kutsogolo kwa bzipinda bza alindiri bzomwe bzikhali kumbali ziwiri, ikhali ya kovado ibodzi. Bzipinda bza alindiri bzomwe bzikhali kumbali ziwiri, bzikhali bza makovado 6.

13 Patsogolo pace iye adapima cipata, kuyambira pa ntsodzi ya cipinda ca alindiri mpaka pa ntsodzi* ya cipinda cinango, ndipo khwankhwa lace likhali la makovado 25. Msuwo wa cipinda cibodzi ukhali kutsogolo kwa msuwo wa cipinda cinango. 14 Iye adapima mapilare ya m’mbali ndipo yakhadatalimpha makovado 60, ndipo adapimambo mapilare ya m’mbali ya bzipata bza m’mphepete mwa kintale. 15 Kucokera kutsogolo kwa msuwo wa cipata mpaka kutsogolo kwa khonde pambali ya msuwo wakupitira mkati, yakhali makovado 50.

16 Mkati mwa cipata, m’bzipinda bza alindiri na mapilare yace ya m’mbali, mbali zentse ziwiri zikhana majanera yomwe mkati mwace yakhali makulu ndipo yakhayenda yacicepa. Mkati mwa khonde mukhana majanera m’mbali ziwiri ndipo m’mapilare ya m’mbali mukhana bzithunzi-thunzi bza miti ya kanjedza.

17 Patsogolo pace, iye adanditenga acindiyendesa ku mbuto yakunja ndipo ndidawona bzipinda bzakudyera ndipo pantsi pentse pa mbuto yakunjayo pakhadakonzedwa na minyala. Pa mbuto yakunjapo pakhana bzipinda bzakudyera bzakukwana 30. 18 Pantsi pomwe pakhana minyalapo pakhali kumbali kwa bzipata ndipo khwankhwa lace likhali lakundendemerana na kutalimpha kwa bzipatabzo. Imweyi ikhali mbuto ing’ono yomwe ikhadalongedzedwa minyala.

19 Patsogolo pace iye adapima mtantho kucokera ku cipata cing’ono mpaka kumayambiriro kwa kintale ya mkati, ndipo ukhali wa makovado 100 kumbali ya kumabvadzuwa na kumbali ya ku norte.

20 Kintale yakunja ikhana cipata cakupitira ku norte ndipo iye adapima kutalimpha kwace na khwankhwa lace. 21 Mbali iri-yentse ikhana bzipinda bzitatu bza alindiri. Mapilare ya m’mbali na khonde lace bzikhali bzakundendemerana na cipata cakuyamba. Cipataco cikhadatalimpha makovado 50 ndipo khwankhwa lace likhali la makovado 25. 22 Majanera yace, khonde lace na bzithunzi-thunzi bzace bza miti ya kanjedza bzikhali bzakundendemerana na cipata ca kumabvadzuwa. Kuti munthu apite m’mwemo akhafunika kukwira ntsikada zakukwana 7, ndipo khonde lace likhali kutsogolo kwa ntsikadazo.

23 Mu kintale ya mkati, mukhana cipata comwe cikhali kutsogolo kwa cipata ca ku norte na cinango comwe cikhali kutsogolo kwa cipata ca kumabvadzuwa. Iye adapima mtantho kucokera pa cipata cibodzi kufika pa cipata cinango, ndipo yakhali makovado 100.

24 Patsogolo pace, iye adanditenga aciyenda nande kumbali ya ku suli, ndipo kumweko ndidakawona cipata kumbali ya ku suli. Iye adapima mapilare yace ya m’mbali na khonde lace ndipo adawona kuti yakhali yakundendemerana na manango. 25 Mbali ziwiri za cipataco na khonde lace zikhana majanera, ndipo majanerayo yakhali yakundendemerana na manango. Cipataco cikhadatalimpha makovado 50 ndipo khwankhwa lace likhali la makovado 25. 26 Pakhana ntsikada zakukwana 7 zakupitira, ndipo khonde lace likhali kutsogolo kwa ntsikadazo. Mapilare yace ya m’mbali yakhana bzithunzi-thunzi bza miti ya kanjedza, cibodzi uku cinango uku.

27 Mbuto ya mkati ikhana cipata cakupitira kumbali ya ku suli. Iye adapima kucokera ku cipata cibodzi mpaka ku cipata cinango cakupitira kumbali ya ku suli, ndipo yakhali makovado 100. 28 Patsogolo pace iye adanditenga acindiyendesa ku mbuto ya mkati ndipo ndidapita na pa cipata ca mbali ya ku suli, acipima cipata ca ku mbali ya ku sulico ndipo adawona kuti cikhali cakundendemerana na bzinango. 29 Bzipinda bzace bza alindiri, mapilare yace ya m’mbali na khonde lace bzikhali bzakundendemerana na bzinango. Mbali ziwiri za cipata na khonde lace zikhana majanera. Cipataco cikhadatalimpha makovado 50 ndipo khwankhwa lace likhali la makovado 25. 30 Mbali zentse zikhana makhonde ndipo makhondeyo yakhadatalimpha makovado 25 ndipo khwankhwa lace likhali la makovado maxanu. 31 Khonde la cipata ca mbali ya ku suli likhadanyang’ana kumbali yakunja ndipo mapilare yace ya m’mbali yakhana bzithunzi-thunzi bza miti ya kanjedza na ntsikada 8 zomwe zikhafikisa kumweko.

32 Iye adanditenga kumabvadzuwa acindiyendesa ku mbuto ya mkati, ndipo adapima cipata, aciwona kuti cikhali cakundendemerana na bzinango. 33 Bzipinda bzace bza alindiri, mapilare yace ya m’mbali na khonde lace, bzikhali bzakundendemerana na bzinango. Mbali ziwiri za cipataco na khonde lace zikhana majanera. Cipataco cikhadatalimpha makovado 50 ndipo khwankhwa lace likhali la makovado 25. 34 Khonde lace likhanyang’ana mbali yakunja ndipo mapilare yace mawiri ya m’mbali yakhana bzithunzi-thunzi bza miti ya kanjedza na ntsikada 8 zomwe zikhafikisa kumweko.

35 Patsogolo pace iye adanditenga acindiyendesa ku cipata ca ku norte. Adacipima ndipo adawona kuti cikhali cakundendemerana na bzinango. 36 Bzipinda bzace bza alindiri, mapilare yace ya m’mbali na khonde lace bzikhali bzakundendemerana na bzinango. Ico cikhana majanera m’mbali ziwiri. Cipataco cikhadatalimpha makovado 50 ndipo khwankhwa lace likhali la makovado 25. 37 Mapilare yace ya m’mbali yakhanyang’ana mbali yakunja ndipo mapilare yace mawiri ya m‘mbali yakhana bzithunzi-thunzi bza miti ya kanjedza na ntsikada 8 zomwe zikhafikisa kumweko.

38 Pafupi na mapilare ya m’mbali mwa bzipata pakhana cipinda cakudyera comwe cikhana msuwo, ndipo m’mwemo akhatsukira ntsembe zakucita kutentha.

39 Mbali iri-yentse ya khonde la cipata,* ikhana meza ziwiri zomwe akhaphera ntsembe zakucita kutentha, ntsembe za pikado na ntsembe za kupalamula. 40 Kunja kwa msuwo komwe akhakwira kuti ayende ku cipata ca mbali ya ku norte, kukhana meza ziwiri, ndipo kumbali inango ya khonde la pacipata zikhalipombo meza ziwiri. 41 Mbali zentse za cipata zikhana meza zinai ndipo zentse pabodzi zikhalipo 8, ndipo ni meza zimwezi zomwe akhaphera ntsembe. 42 Meza zinai zakuperekera ntsembe zakucita kutentha zikhadakonzedwa na minyala yakusema. Kutalimpha kwace kukhali kwa kovado ibodzi na meya, khwankhwa lace likhali la kovado ibodzi na meya, ndipo kutalimpha kwace kucokera pantsi kuyenda kudzulu zikhali za kovado ibodzi. Pa meza zimwezi pakhakoyedwa bzombo bzomwe akhabziphatisa basa pakuphera ntsembe zakutentha na ntsembe zinango. 43 M’mbali zentse za maparede ya mkati, mukhana bzakumanikira bzinthu,* kukula kwace kukhali kwa cithatha ca boko ndipo pa mezazo pakhaikhidwa nyama zakuperekedwa ntsembe.

44 Kunja kwa cipata ca mkati, kukhana bzipinda bzomwe aimbi akhadyera. Bzipindabzo bzikhali mkati, pafupi na cipata ca ku norte comwe cikhanyang’ana ku suli. Pakhana cipinda cinango cakudyera comwe cikhali pafupi na cipata ca kumabvadzuwa, comwe cikhanyang’ana ku norte.

45 Iye adandiuza kuti: “Cipinda cakudyeraci comwe cikunyang’ana ku suli, n’ca antsembe omwe ambacita mabasa mu templo. 46 Cipinda cakudyera comwe cikunyang’ana ku norte, n’ca antsembe omwe ambacita mabasa pa guwa la ntsembe. Amwewa ni wana wa Zadoki, Alevi wakusankhulidwa kuti afenderere Yahova kuti amutumikire.”

47 Patsogolo pace iye adapima mbuto ya mkati, ndipo adawona kuti mbali zentse zinai zikhali zakundendemerana. Kutalimpha kwace kukhali kwa makovado 100 ndipo khwankhwa lace likhali la makovado 100. Guwa la ntsembe likhali kutsogolo kwa templo.

48 Tenepo adanditenga acindiyendesa pa khonde la templo, ndipo adapima mapilare ya m’mbali ya khondero aciwona kuti mbali ibodzi ikhali ya makovado maxanu, ndipo mbali inango ikhali ya makovado pomwe maxanu. Mbali ibodzi ya cipata ikhana khwankhwa la makovado matatu ndipo mbali inango ikhali ya makovado pomwe matatu.

49 Khondero likhadatalimpha makovado 20 ndipo khwankhwa lace likhali la makovado 11.* Kuti afike pamwepo, wanthu akhafunika kukwira ntsikada. Ndipo pakhana mapilare manango m’mbali mwa mapilare ya m’mphepete, ibodzi uku inango uku.

41 Iye adanditenga, acindiyendesa ku mbuto yakucena ya panja* ndipo adapima mapilare ya m’mbali. Mbali ibodzi ntcinya yace ikhali ya makovado 6* ndipo mbali inangoyo ikhalimbo ya makovado 6. 2 Khwankhwa la pa msuwo likhali la makovado 10. Maparede ya m’mbali mwa msuwo yakhali ya makovado maxanu mbali ibodzi ndipo mbali inangoyo makovado pomwe maxanu. Iye adapima kutalimpha kwa mbuto yakucena ya panja ndipo iyo ikhali ya makovado 40 ndipo khwankhwa lace likhali la makovado 20.

3 Patsogolo pace iye adapita,* ndipo adapima mapilare ya m’mbali mwa msuwo. Ntcinya yace ikhali ya makovado mawiri ndipo khwankhwa la msuwoyo likhali la makovado 6. Maparede ya m’mbali mwa msuwoyo yakhali ya makovado manomwe. 4 Iye adapimambo cipinda comwe cikhadanyang’ana pa mbuto yakucena ya panja ndipo cikhadatalimpha makovado 20, khwankhwa lace likhali la makovado 20. Ndipo iye adandiuza kuti: “Iyi ni Mbuto Yakucenesesa.”

5 Adapima parede ya mu templo ndipo ntcinya yace ikhali ya makovado 6. Khwankhwa la bzipinda bza m’mbali bzomwe bzikhazungulira temployo likhali la makovado manai. 6 Bzipinda bza m’mbali bzikhali pa prediyo ya andare zitatu, cipinda ciri-centse cikhali padzulu pa cinzace ndipo andare iri-yentse ikhana bzipinda 30. M’maparedemo mukhana bzinthu bzomwe bzikhadjimbikira maviga ya m’bzipinda bza m’mbalibzo bzomwe bzikhacitisa kuti mavigayo yaleke kupita mkati mwa parede ya temployo. 7 Mbali ziwiri za templo zikhana mbuto yakupitira, yomwe ikhambayenda icizungulira* pomwe munthu akhambakwira kuyenda m’bzipinda bza padzulu. Bzipinda bza andare yacitatu ya prediyoyo bzikhali bzikulu kuposa bzipinda bza andare yaciwiri ya prediyoyo ndipo bzipinda bza andare yaciwiri bzikhalimbo bzikulu kuposa bzipinda bza andare yakuyamba, ndipo munthu akafuna kuyenda ku bzipinda bza m’dzulu bza andare yacitatu kucokera ku bzipinda bza andare ya pantsi, akhapita na pa andare ya pakati.

8 Ine ndidawona mbuto ya padzulu kuzungulira temployo, ndipo maaliserse yace ya m’bzipinda bza m’mbali yakhali ya mtete ubodzi wa makovado matanthatu. 9 Ntcinya ya parede yakunja ya m’bzipinda bza m’mbali ikhali ya makovado maxanu. M’mphepete mwa bzipinda bza m’mbali mukhana mbuto yakusaya kufunga yomwe ikhacita mbali ya templo.

10 Pakati pa templo na bzipinda bzakudyera pakhana mbuto m’mbali iri-yentse yomwe khwankhwa lace likhali la makovado 20. 11 Pakhana mbuto yakupitira m’bzipinda bza m’mbali, kucokera ku mbuto yakusaya kufunga ya kumbali ya ku norte na mbali inango yakupitira ya ku suli. Khwankhwa la mbuto yakusaya kufunga likhali la makovado maxanu m’mbali zentse.

12 Nyumba ya kumadokero yomwe ikhadanyang’ana ku mbuto yakusaya cinthu, khwankhwa lace likhali la makovado 70 ndipo likhadatalimpha makovado 90. Ntcinya ya maparede ya nyumbayo ikhali ya makovado maxanu m’mbali zentse.

13 Iye adapima templo ndipo ikhadatalimpha makovado 100. Mbuto yakusaya cinthu, nyumbayo* na maparede yace bzikhana makovado 100. 14 Kutsogolo kwa templo komwe kukhadanyang’anisa ku mbali ya kumabvadzuwa na khwankhwa la mbuto yakusaya cinthu, bzikhana makovado 100.

15 Iye adapima kutalimpha kwa nyumba yomwe ikhadanyang’ana kumbuyo kwa mbuto yakusaya cinthu kuphatanidzambo mbuto zomwe zikhapitidwa na wanthu mbali zentse ziwiri, adawona kuti zikhali za makovado 100.

Adapimambo mbuto yakucena ya panja na ya mkati pabodzi na makhonde ya mu kintalemo, 16 pakupitira pa msuwo, majanera yomwe mkati mwace yakhayenda yacicepa na mbuto zakupitidwa na wanthu m’mbali zentse zitatu. Pafupi na pakupitira pakhana matabwa yomwe yadakhomereredwa kucokera pantsi mpaka m’majanera ndipo majanerayo yakhadampsinkhidwa. 17 Iye adapima padzulu pa msuwo, mbali za mkati na za kunja kwa templo pabodzi na muro wentse. 18 Pakhana bzithunzi-thunzi bzakugoba bza akerubi na bza miti ya kanjedza. Muti wa kanjedza uli-wentse ukhali pakati pa akerubi awiri, ndipo kerubi ali-wentse akhana nkhope ziwiri. 19 Nkhope ya munthu ikhadanyang’anisa muti wa kanjedza omwe ukhali kumbali inango ndipo nkhope ya mphondolo ikhadanyang’anisa muti wa kanjedza omwe ukhali kumbali inango. Bzithunzi-thunzi bzakucita kugobabzo bzikhali tenepo pa templo yentse. 20 Pa parede ya mbuto yakucena, kucokera pantsi mpaka padzulu pa msuwo, pakhana bzithunzi-thunzi bzakugoba bza akerubi na bza miti ya kanjedza.

21 Aro za pa msuwo wa mbuto yakucena zikhali zakundendemerana mbali zentse. Kutsogolo kwa mbuto yakucsena, kukhana cinthu cakundendemerana na 22 guwa la ntsembe lakukonzedwa na matabwa, ndipo kucoka pantsi kuyenda kudzulu likhali la makovado matatu, kutalimpha kwace kukhali kwa makovado mawiri. Iro likhana mapilare m’makhona,* yomwe pantsi pace na m’mbali mwace yakhadakonzedwa na matabwa. Tenepo iye adandiuza kuti: “Iyi ni meza yomwe iri pamaso pa Yahova.”

23 Templo* na mbuto yakucena bzikhana misuwo miwiri-miwiri. 24 Misuwoyo ikhafunyika pakati, ndipo msuwo uli-wentse ukhana mbali ziwiri. 25 Pa misuwo ya m’templo, pakhana bzithunzi-thunzi bzakucita kugoba bza akerubi na bza miti ya kanjedza bzakundendemerana na bzomwe bzikhali pa maparede yale. Pa khonde lace pakhana gota lakukonzedwa na matabwa ku mbali ya kunja. 26 Pakhana majanera yomwe mkati mwace yakhayenda yacicepa na bzithunzi-thunzi bza miti ya kanjedza m’mbali zentse ziwiri za khonde pabodzi na bzipinda bza m’mbali mwa templo na m’magota.

42 Patsogolo pace, adanditenga acindiyendesa kunja ku mbali ya ku norte. Ndipo adandiyendesa ku bzipinda bzakudyera bza m’dadada bzomwe bzikhakhala kufupi na mbuto yakusaya cinthu, ku mbali ya ku norte kwa nyumba yomwe ikhali pafupipo. 2 Mbali ya msuwo wa ku norte ikhadatalimpha makovado 100,* ndipo khwankhwa lace likhana makovado 50. 3 Bzipindabzo bzikhali pakati pa kintale ya mkati, yomwe khwankhwa lace likhana makovado 20 na mbuto yakunja yomwe pantsi pace pakhadakonzedwa na minyala. Cipinda ciri-centse cikhali kutsogolo kwa cinzace ndipo kutalimpha kwace kukhali kwa prediyo ya andare zitatu. 4 Kutsogolo kwa bzipinda bzakudyera kukhana njira yakupitira mkati, yomwe khwankhwa lace likhana makovado 10 ndipo kutalimpha kwace kukhali kwa makovado 100,* ndipo misuwo yakupitira m’bzipinda bzakudyerabzo ikhadanyang’ana ku mbali ya ku norte. 5 Bzipinda bzakudyera bza nyumba ya padzulu bzikhali bzing’ono-bzing’ono kuposa bzipinda bza pantsi na bza pakati, pakuti bzipindabzo bzikhadacepa thangwe ra njira zomwe zikhapitidwa na wanthu. 6 Bzipindabzo bzikhali mu andare yacitatu ya prediyoyo, tsono bzikhalibe mapilare ninga ya mu kintale. Ndipopa andareyo ikhali ing’ono kuposa andare ya pantsi na ya pakati.

7 Muro wa kunja wakukonzedwa na minyala wa kufupi na bzipinda bzakudyera bzomwe bzikhali pafupi na kintale ya kunja na kutsogolo kwa bzipinda bzinango bzakudyera, ukhadatalimpha makovado 50. 8 Pakuti bzipinda* bzakudyera bzomwe bzikhali pafupi na mbuto ya panja bzikhadatalimpha makovado 50, koma bzipinda bzakudyera bzomwe bzikhali kumbali ya mbuto yakucena bzikhana makovado 100. 9 Bzipinda bzakudyerabzo bzikhana msuwo ku mbali ya kumabvadzuwa, omwe wanthu akhambapita nawo kucokera ku mbuto ya kunja.

10 Kumbuyo kwa muro wakukonzedwa na minyala wa ku kintale omwe ukhali ku mbali ya kumabvadzuwa, pafupi na mbuto yakusaya cinthu ya nyumbayo, kukhana bzipinda bzakudyera. 11 Kutsogolo kwa bzipindabzo kukhana njira ninga ya bzipinda bzakudyera bza ku mbali ya ku norte. Kutalimpha na khwankhwa lace bzikhali bzakundendemerana ndipo mbuto zakubulira na mbali zace bzikhali ndendende. Misuwo ya bzipinda bzimwebzi 12 ikhali yakundendemerana na misuwo ya bzipinda bzakudyera bza kumbali ya ku suli. Kutsogolo kwa muro wa minyala omwe ukhadanyang’ana ku mbali ya kumabvadzuwa, kumayambiriro kwa njira, kukhana msuwo omwe wanthu angadapita nawo.

13 Tenepo iye adandiuza kuti: “Bzipinda bzakudyera bzomwe bziri ku mbali ya ku norte na bzipinda bzakudyera bzomwe bziri ku mbali ya ku suli bzomwe bziri pafupi na mbuto yakusaya cinthu, ni bzipinda bzakudyera bzakupambulika. M’mwemu, antsembe omwe ambafenderera Yahova ambadyera ntsembe zakucenesesa. M’bzipinda bzimwebzi, iwo ambaikha ntsembe zakucenesesa, ntsembe za bzinthu bza m’munda, ntsembe za pikado na ntsembe za kupalamula, pakuti imweyi ni mbuto yakupambulika. 14 Antsembewo akapita, an’dzafunika lini kudzacoka pa mbuto yakucena kuyenda panja pomwe akanati kucinja bzakubvala bzomwe akhaphatisa basa pakutumikira, pakuti bzakubvalabzo mpsakupambulika. Iwo an’dzafunika kubvala bzakubvala bzinango, aciyenda bwino ku mbuto yakusaya kufunga komwe kuna wanthu.”

15 Pomwe adamala kupima mkati mwa templo, iye adanditenga aciyenda nande panja na pa cipata comwe cikhanyang’ana ku mbali ya kumabvadzuwa ndipo adapima panja pentsenepo.

16 Iye adapima mbali ya kumabvadzuwa na mtete* wakupimira, ndipo mwakubverana na mtete wakupimirayo, mbaliyo idakwana mitete 500.

17 Adapima mbali ya ku norte mwakubverana na mtete wakupimira ndipo idakwana mitete 500.

18 Adapima mbali ya ku suli mwakubverana na mtete wakupimira ndipo idakwana mitete 500.

19 Iye adazungulira ku mbali ya kumadokero ndipo adapima mitete 500 na mtete wakupimira.

20 Iye adapima mbali zentse zinai ndipo pakhana muro wakuzungulira omwe ukhadatalimpha mitete 500 ndipo khwankhwa lace mitete 500. Muroyo ukhasiyanisa bzinthu bzakucena na bzinthu bzomwe bzikhaphatisidwa basa na wanthu azinji.

43 Tenepo iye adanditenga acindiyendesa ku cipata ca kumbali ya kumabvadzuwa. 2 Kumweko ndidawona ulemerero bwa Mulungu wa Jirayeri bukucokera kumabvadzuwa, fala lace likhabveka ninga kuunga kwa madzi yamphanvu ndipo dziko la pantsi likhadangwerewera na ceza ca ulemerero bwace. 3 Bzomwe ndidawona m’masomphenya, bzikhali ninga bzomwe ndidawona pomwe ndidabwera kuti ndidzapfudze mzinda, ninga bzomwe ndidawona pafupi na mkulo wa Kebari. Tenepo ndidagodama ndicitsulimisa nkhope yangu mpaka pantsi.

4 Patsogolo pace, ulemerero bwa Yahova budapita mu templo na pa cipata comwe cikhadanyang’ana kumabvadzuwa. 5 Mzimu* udandilamusa ucindiyendesa ku mbuto ya mkati, ndipo ndidawona kuti templo ikhadadzala na ulemerero bwa Yahova. 6 Tenepo ndidabva munthu akulewalewa nande mu templomo, ndipo iye adabwera acikhala kumbali kwangu. 7 Iye adandiuza kuti:

“Iwe mwana wa munthu, iyi ni mbuto ya mpando wangu wa umambo, mbuto yomwe nin’dzaikha minyendo yangu yomwe nin’dzakhala na wanthu wa Jirayeri mpaka kale-kale. Nyumba ya Jirayeri in’dzapswipiza lini pomwe dzina langu lakucena, ne iwo ne amambo wawo thangwe ra kusaya kukhulupirika kwawo* ayai na bzifanikiso bzomwe akhabzinamata ninga amambo.* 8 Iwo adaikha pakupitira pawo pafupi na pakupitira pa nyumba yangu na aro zawo pafupi na aro za nyumba yangu, mwakuti iwo na ine tikhadandosiyana parede basi. Ndidawapfudza na ukali bwangu thangwe akhapswipiza dzina langu lakucena na bzinthu bzawo bzakunyantsa bzomwe akhacitabzo. 9 Tsapano mbacose kusaya kukhulupirika kwawo pabodzi na bzifanikiso bzawo bzomwe akhabzinamata ninga amambo, ndipo ine nin’dzakhala pakati pawo mpaka kale-kale.

10 “Iwe mwana wa munthu, fotokozera Ajirayeri bza templo kuti acite manyazi thangwe ra bzakuphonya bzomwe iwo adacita ndipo iwo apfunze momwe temployo idakonzedwera. 11 Iwo akhacita manyazi thangwe ra bzentse bzomwe adacita, uwauze momwe temployo idamangidwira, momwe mbali zace zidakonzedwera, misuwo yace yakupitira na yakubulira. Uwauze momwe temployo idakonzedwera ndipo uwadziwise bza mitemo na malamulo ya kamangidweko. Cita kunemba bzentsenebzi iwo akuwona na maso yawo kuti awone momwe idamangidwira, aciteweza mitemo yace. 12 Lamulo la templo ndiri: Mbuto yentse yakuzungulira ntsonga ya phiri njakucenesesa. Inde, limweri ni lamulo la templo.

13 Mphimo za guwa la ntsembe zakupimidwa na makovado ni izi: (Kovado iri-yentse ikhadathumiziridwa khwankhwa la cithatha cibodzi ca boko).* Kutalimpha kwa mbali ya pantsi ya guwa la ntsembe kukhali kwa kovado ibodzi ndipo khwankhwa lakuzungulira m’mbali mwace likhali la kovado ibodzi. Ntcinya ya mbali ya pantsi yakuzungulira guwa lentse la ntsembe nja mphimo ya boko libodzi.* Imweyi ni mbali ya pantsi ya guwa la ntsembero. 14 Mbali yaciwiri yomwe ikhali padzulu pa mbali ya pantsi ire ikhadatalimpha makovado mawiri, ndipo khwankhwa lakuzungulira m’mbali mwace likhali la kovado ibodzi. Mbali imweyi ikhali ikulu na makovado manai kuposa yomwe ikhali padzulu pace, ndipo khwankhwa lace kuzungulira guwa lentsenero likhana kovado ibodzi. 15 Mbali yakumalizira ya padzulu ni cakuikhira moto ca pa guwa la ntsembe comwe cikhana nyanga zinai zakunyang’ana kudzulu m’maponta manai. 16 Cakuikhira moto ca pa guwa la ntsembe n’cakundendemerana m’mbali zentse ndipo cikhadatalimpha makovado 12 ndipo khwankhwa lace nda makovado 12. 17 Mbali yacitatu ya pa guwa la ntsembe ikhana mbali zinai ndipo ikhadatalimpha makovado 14 ndipo khwankhwa lace likhana makovado 14. Ntcinya yakuzungulira mbali imweyi ikhana kati na kati ya kovado ndipo mbali ya pantsi ikhana kovado ibodzi mbali zentse.

“Ndipo ntsikada za guwa la ntsembero zikhali kumbali ya kumabvadzuwa.”

18 Tenepo iye adandiuza kuti: “Iwe mwana wa munthu, Yahova Mbuya Mkululetu walewa kuti: ‘Yamweya ni malango yomwe yan’funika kutewezedwa guwa la ntsembe likadzamangidwa kuti pambadzaperekedwe ntsembe zakucita kutentha na kupalangiridwa mulopa.’

19 “‘Kwa antsembe, Alevi omwe ni wana wa Zadoki omwe ambandifenderera kuti anditumikire, un’funika kuwapasa mwana wa bira ninga ntsembe ya pikado,’ walewa tenepo Yahova Mbuya Mkululetu. 20 ‘Un’funika kutenga pang’ono mulopa wa mwana wa birayo uciikha pa nyanga zinai za pa guwa la ntsembero, uikhembo m’maponta manai ya mbali yacitatu ya guwalo ndipo uikhembo pa ntcinya yentse yakuzungulira guwalo kuti licenesedwe ku pikado nakuti pikado zace zimpsinkhidwe. 21 Patsogolo pace utenge mkono wa ntsembe ya pikado, ndipo umutenthe pa mbuto yakuperekera ntsembe ya mu templo, kunja kwa mbuto yakucena. 22 Pa ntsiku yaciwiri udzapereke tonde wakusaya cirema ninga ntsembe ya pikado ndipo guwa la ntsembe lin’dzacenesedwa ku pikado ninga momwe lidacenesedwera ku ntsembe ya pikado ya mkono.’

23 “‘Ukadzamala kulicenesa ku pikado, udzapereke mkono wakusaya cirema na bvululume wakusaya cirema. 24 Udzabwerese bzimwebzi kwa Yahova ndipo antsembe an’funika kudzabziwazira munyu, acidzabzipereka ninga ntsembe yakucita kutentha kwa Yahova. 25 Iwepo un’funika kumbapereka tonde pa ntsiku iri-yentse ninga ntsembe ya pikado na mkono pabodzi na bvululume. Umbapereke bzifuwo bzakusaya cirema ndipo umbacite bzimwebzi kwa ntsiku zinomwe. 26 Iwo an’dzafunika kuliperekera ntsembe guwalo kwa ntsiku 7 ndipo an’dzafunikambo kulicenesa na kuyamba kuliphatisa basa. 27 Zikadzamala ntsiku zimwezi, pa ntsiku yaci 8 kuyenda kutsogolo, antsembe an’dzakuperekerani ntsembe zakutentha* pa guwalo na ntsembe za mbverano, ndipo ine nin’dzakomedwa namwe,’ walewa tenepo Yahova Mbuya Mkululetu.”

44 Iye adanditenga acindibwezera pomwe ku cipata cakunja ca mbuto yakucena comwe cikhadanyang’ana kumbali ya kumabvadzuwa ndipo cikhadafunga. 2 Na tenepo Yahova adandiuza kuti: “Cipataci cin’dzapitiriza kukhala cidafunga, cin’funika lini kufungulidwa ndipo palibe munthu omwe an’funika kupita na pamwepo, pakuti Yahova Mulungu wa Jirayeri wapita na pamwepo, ndipopa cin’funika kupitiriza kukhala cidafunga. 3 Tsono mtsogoleri an’dzakhala pamwepo kuti adye cakudya pamaso pa Yahova pakuti iye ni mtsogoleri. Iye an’dzapita na pa cipata ca pakhonde ndipo an’dzabulambo na pamwepo.”

4 Patsogolo pace iye adandicitisa kupita na pa cipata ca mbali ya ku norte ndipo adandiyendesa mpaka patsogolo pa templo. Pomwe ndidanyang’anisa ndidawona kuti ulemerero bwa Yahova bukhadadzala mu templo ya Yahova. Na bzimwebzi ndidagodama, ndicitsulimisa nkhope yangu mpaka pantsi. 5 Patsogolo pace Yahova adandiuza kuti: “Iwe mwana wa munthu, tetekera ndipo onesesa. Tetekera mwatceru bzentse bzomwe nin’kuuza pakulewa bza mitemo na malamulo ya templo ya Yahova. Onesesa bwino-bwino pa msuwo wa templo na misuwo yakubulira ya mbuto yakucena. 6 Uza nyumba yakupanduka ya Jirayeri kuti: ‘Yahova Mbuya Mkululetu walewa kuti: “Imwe wa m’nyumba ya Jirayeri, bzalemwa bzakunyantsa bzomwe mumbacita. 7 Mumbabweresa wanthu wa mitundu inango mkati mwa mbuto yangu yakucena, omwe alibe kucitidwa mgwatidwe* mu mtima na thupi kuti apswipize templo yangu. Imwepo mumbapereka kwa ine cakudya, mafuta na mulopa tsono pa nthawe ibodzi-bodziyo mumbapitiriza kuphonyera mpangano wangu thangwe ra bzicito bzanu bzentse bzakunyantsa. 8 Imwepo mumbasamalira lini bzinthu bzangu bzakupambulika, m’mbuto mwace mumbauza wanthu winango kuti iwo acite mabasa pa mbuto yangu yakucena.”’

9 “‘Yahova Mbuya Mkululetu walewa kuti : “Wanthu wa mitundu inango omwe ambakhala mu Jirayeri ndipo alibe kucitidwa mgwatidwe mu mtima na thupi an’funika lini kupita pa mbuto yangu yakucena.”’

10 “‘Alevi omwe adandisiya pomwe Ajirayeri adandipandukira acitewera bzifanikiso bzawo bzakunyantsa,* an’dzabonera thangwe ra bzakuphonya bzawo. 11 Ndipo iwo an’dzakhala atumiki wangu wa pa mbuto yangu yakucena kuti ambanyang’anire bzipata bza pa templo na kutumikira mu templomo. Iwo an’dzapha nyama zakuperekedwa ninga ntsembe zakucita kutentha na ntsembe zomwe wanthu ambabweresa, ndipo an’dzakhala patsogolo pa wanthu kuti ambawatumikire. 12 Pakuti iwo akhatumikira Ajirayeri pa nthawe yomwe Ajirayeriwo akhatumikira bzifanikiso bzawo bzakunyantsa. Iwo adakhala mwala wakukhukhumudwisa wa nyumba ya Jirayeri, omwe udawacitisa kucita pikado, ndipopa ine ndidalamusa boko langu ndicilumbira kuti iwo an’dzabonera thangwe ra bzakuphonya bzawo,’ walewa tenepo Yahova Mbuya Mkululetu. 13 An’dzandifenderera lini pomwe kuti anditumikire ninga antsembe wangu, ndipo ne an’dzafenderera lini pomwe bzinthu bzangu bzakupambulika na bzakucenesesa. Iwo an’dzacita manyazi thangwe ra bzinthu bzakunyantsa bzomwe akhacita. 14 Ndipo nin’dzawapasa basa la pa templo kuti ambasamalire basa lentse lomwe limbacitika pamwepo na bzinthu bzentse bzomwe bzin’funika kucitika m’mwemo.’

15 “‘Pakulewa bza antsembe, Alevi wana wa Zadoki omwe akhasamalira mabasa ya pa mbuto yangu yakucena pa nthawe yomwe Ajirayeri akhadandipandukira, iwo an’dzandifenderera kuti anditumikire ndipo an’dzabwera pamaso pangu kuti andipase mafuta na mulopa,’ walewa tenepo Yahova Mbuya Mkululetu. 16 ‘Ndiwo omwe an’dzapita m’mbuto yangu yakucena. Iwo an’dzafenderera meza yangu kuti anditumikire na kusamalira mabasa yangu.

17 “‘Iwo akadzapita pa bzipata bza mbuto ya mkati, an’dzafunika kubvala bzakubvala bza nguwo ya linyo.* Iwo an’dzafunika lini kubvala bzakubvala bzakukonzedwa na ukuse bwa bira pomwe akutumikira pa bzipata bza mbuto ya mkati, ayai kucokera pamwepo kupita mkati. 18 Iwo an’dzafunika kubvala maduku mu msolo mwawo na makabudula* bzakukonzedwa na nguwo ya linyo. An’dzafunika lini kubvala bzakubvala bzomwe bzingawacitise kaluma. 19 Anati kuyenda ku mbuto ya panja, mbuto yomwe imbakhala wanthu, an’dzafunika kucosa bzakubvala bzomwe akhadabvala pakutumikira acibziikha m’bzipinda bzakudyera bzakupambulika; adzabvale bzakubvala bzinango kuti aleke kudzacenesa wanthu mwakusaya kuthemera na bzakubvala bzawo. 20 Iwo an’dzafunika lini kumeta mipala mu msolo mwawo, ne kusiya kuti tsisi lawo likule kwene-kwene. Iwo an’funika kudzakhala na tsisi lifupi. 21 Antsembe an’funika lini kumwa vinyu akafuna kupita m’mbuto ya mkati. 22 An’funika lini kulowola mkazi mamsiwa ayai wakulambana na mwamuna wace, koma angalowole dende la mtundu wa Jirayeri ayai mamsiwa omwe mwamuna wace akhali wantsembe.’

23 “‘Iwo an’dzafunika kupfunzisa wanthu wangu kusiyanisa cinthu cakupambulika na cakusaya kupambulika ndipo an’dzawapfunzisa kusiyanisa cinthu cakupswipa na cakucena. 24 Iwo an’dzafunika kutsogolera ninga atongi pakutonga nkhani, an’dzafunika kutonga mwakubverana na mitemo yangu, ndipo an’funika kukoya malamulo yangu na mitemo yangu yakulewa bza maphwando yangu yentse ndipo an’dzafunikambo kucenesa masabudu yangu. 25 An’funika lini kufenderera munthu wakufa kuti aleke kupswipa, tsono iwo angapswipe akafedwa pai, mai, mwana wawo wacimuna, mwana wawo wacikazi, m’bale wawo ayai mpfumakazi yawo yomwe ikanati kulowodwa. 26 Wantsembe akamala kucenesedwa an’funika kudikhirira ntsiku zinomwe. 27 Pa ntsiku yomwe an’dzapita m’mbuto yakucena, mbuto ya mkati kuti atumikire pa mbuto yakucena, an’funika kudzabwera na ntsembe yace ya pikado,’ walewa tenepo Yahova Mbuya Mkululetu.

28 “‘Pakulewa bza utaka bwawo, Ine ndine utaka bwawo. Imwepo mun’funika lini kuwapasa utaka buli-bwentse mu Jirayeri, pakuti ine ndine utaka bwawo. 29 Iwo ndiwo omwe an’dzadya ntsembe za bzinthu bza m’munda, ntsembe za pikado na ntsembe za kupalamula, ndipo bzinthu bzentse bzomwe bzin’dzaperekedwa kwa Mulungu mu Jirayeri bzin’dzakhala bzawo. 30 Bzisapo bzentse bzabwino bzakuyambirira bzomwe mun’dzabvuna na bzinthu bzentse bzomwe mun’dzabweresa ninga ntsembe bzin’dzakhala bza antsembe. Mumbapereke ufa bwanu bwa misere bwa bzakubvuna bzanu bzakuyambirira bza m’munda kwa antsembe. Mukacita bzimwebzi imwepo mun’dzasimbidwa m’mii mwanu. 31 Antsembe an’funika lini kudya mbalame ayai nyama iri-yentse yakufa yokha, ayai yakuphedwa na cirombo cinzace.’

45 “‘Pomwe mukugawa dziko kuti likhale utaka bwanu, imwepo mun’funika kupasa Yahova mbali inango ya dzikolo. Mbali imweyi in’dzakhala yakucena. Kutalimpha kwace kukhale kwa makovado 25 000* ndipo khwankhwa lace likhale na makovado 10 000. Mbuto yentseneyi* in’dzakhala yakucena. 2 Mkati mwa mbutoyo mudzakhale na mbuto inango yakundendemerana mbali zentse zinai. Idzatalimphe makovado 500 ndipo khwankhwa lace makovado 500 ndipo idzakhale na mbali inango ya khwankhwa la makovado 50 kuti idzakhale mbuto yakudyesera bzifuwo. 3 Kunja kwa mbuto imweyi, imwepo mun’funika kudzapima mbuto yakutalimpha makovado 25 000 ndipo khwankhwa lace makovado 10 000. Ndipo kumweko kun’funika kudzakhala templo yomwe n’cinthu cakucenesesa. 4 Imweyi in’dzakhala mbuto yakucena ya antsembe omwe ambatumikira pa templo ndipo ambafenderera Yahova kuti amutumikire. Imweyi in’dzakhala mbuto yomwe an’dzamanga nyumba zawo na kumangira templo.

5 “‘Padzakhale na mbuto yakutalimpha makovado 25 000 ya khwankhwa la makovado 10 000. Mbuto imweyi in’dzakhala ya Alevi omwe ambatumikira pa templo ndipo iwo an’dzakhala na bzipinda bzawo bzakudyera bzakukwana 20.

6 “‘Imwepo mun’funika kugwata mbuto yakutalimpha makovado 25 000 yakundendemerana na mbuto yomwe imbaperekedwa kwa Mulungu. Ndipo khwankhwa lace likhale makovado 5000 kuti ikhale mbuto ya mzinda. Mbuto imweyi in’dzakhala ya nyumba yentse ya Jirayeri.

7 “‘Mtsogoleri an’dzakhala na mbuto mbali zentse ziwiri za mbuto yakuperekedwa kwa Mulungu na mbuto ya mzinda. In’dzakhala pafupi na mbuto yakuperekedwa kwa Mulungu na mbuto ya mzinda. In’dzakhala ku mbali ya kumadokero na ku mbali ya mabvadzuwa. Kutalimpha kwace kucokera kumalire ya kumadokero na kumalire ya kumabvadzuwa, kudzakhale kwakundendemerana na ibodzi mwa mbuto ya madzinzayo. 8 Mbuto imweyi in’dzakhala utaka bwawo mu Jirayeri. Atsogoleri wangu an’dzaboneresa lini pomwe wanthu wangu ndipo mbuto inango yakusala in’dzaperekedwa ku nyumba ya Jirayeri mwakubverana na madzinza yawo.’

9 “Yahova Mbuya Mkululetu walewa kuti: ‘Imwe atsogoleri wa mu Jirayeri bzakucita bzanu bzakuipa bzalemwa kwene-kwene!’

“‘Siyani kucita ciwembo na kuponderera wanthu ndipo citani bzomwe mpsakulungama na bzabwino. Siyani kutengera wanthu wangu utaka bwawo,’ walewa tenepo Yahova Mbuya Mkululetu. 10 ‘Imwepo mun’funika kumbaphatisa basa balantsa yomwe iri bwino, mphimo ya efa* yomwe iri bwino na mphimo ya mtsuko* omwe uli bwino. 11 Mphimo za efa zin’funika kumbakhala ndendende ndipo mphimo za mtsuko zin’funikambo kumbakhala ndendende ndipo zin’funika lini kumbacinja-cinja. Mphimo ya mtsuko in’funika kukhala mbali ibodzi pa mbali 10 za homeri* ndipo mphimo ya efa in’funikambo kukhala mbali ibodzi pa mbali 10 za homeri. Mphimo ya homeri ndiyo in’dzaphatisidwa basa pakupimira bzinthu. 12 Mphimo ya siklo* imbakwane majera* 20. Masiklo 20 na masiklo 25 na masiklo 15 yambandendemerane na mane* ibodzi kuna imwepo.’

13 “‘Bzomwe mun’funika kumbapereka ni ibzi: Mbali ibodzi pa mbali 6 za mphimo ya efa ya homeri ibodzi ya tirigu na mbali ibodzi pa mbali 6 za mphimo ya efa ibodzi ya homeri ibodzi ya sevada. 14 Mafuta yomwe mudzacite bzakupereka, yadzabverane na mphimo ya mtsuko. Mphimo ya mtsuko ni mbali ibodzi ya mbali 10 za mphimo ya koro* ndipo mitsuko 10 ni mphimo ibodzi ya homeri, pakuti mitsuko 10 ikuimira homeri ibodzi. 15 Ndipo mun’funika kumbapereka bira m’bodzi pa mabira 200 ya bzifuwo bza Ajirayeri. Bzentsenebzi bzin’dzaphatisidwa basa kuti bzikhale ntsembe ya bzinthu bza m’munda, ntsembe yakucita kutentha, ntsembe ya mbverano* na ntsembe yakumpsinkha pikado za wanthu,’ walewa tenepo Yahova Mbuya Mkululetu.

16 “‘Wanthu wentse wa m’dzikoli an’dzacita cakupereka cimweci kwa mtsogoleri wa Jirayeri. 17 Tsono mtsogoleriyo ndiye an’dzanyang’anira ntsembe zakucita kutentha, ntsembe za bzinthu bza m’munda, ntsembe za vinyu za m’maphwando, za pakuwonekera kwa mwezi upsa, za m’masabudu na za m’maphwando yentse yomwe yambacitika pa nyumba ya Jirayeri. Ndiye omwe an’dzapereka ntsembe za pikado, ntsembe za bzinthu bza m’munda, ntsembe zakucita kutentha na ntsembe za mbverano* kuti ampsinkhe pikado za nyumba ya Jirayeri.’

18 “Yahova Mbuya Mkululetu walewa kuti: ‘Mwezi wakuyamba, pa ntsiku yakuyamba ya mweziyo, un’funika kutenga mkono m’bodzi wakusaya cirema pakati pa bzifuwo ndipo ucenese templo ku pikado. 19 Wantsembe an’dzatenga pang’ono mulopa wa ntsembe ya pikado ndipo an’dzaupalangira pa maaro ya templo m’maponta manai ya pa guwa la ntsembe na m’maaro ya pa cipata cakupitira m’mbuto ya mkati. 20 Iwepo un’dzacitambo bzibodzi-bodzibzi pa ntsiku yaci 7 ya mweziyo kucitira munthu ali-wentse omwe an’cita pikado mwakusaya kudziwa ayai utowa. Ndipo imwepo mun’funika kupereka ntsembe yakucenesa templo.

21 “‘Mwezi wakuyamba, pa ntsiku yaci 14 ya mweziyo imwepo mun’funika kumbacita Phwando la Paskwa. Mkati mwa ntsiku 7 mun’funika kumbadya pau zakusaya fermento. 22 Pa ntsikuyi mtsogoleri an’dzapereka ninga ntsembe ya pikado mkono m’bodzi, kuperekera iye na wanthu wentse wa m’dzikoli. 23 Pa ntsiku iri-yentse ya ntsiku 7 za phwandolo iye an’funika kudzapereka ninga ntsembe yakucita kutentha kuna Yahova mikono 7 ya ng’ombe zakusaya cirema na mabvululume 7 yakusaya cirema ndipo kuthumizira bzimwebzi ntsiku na ntsiku ambapereke tonde ninga ntsembe ya pikado. 24 Pakupereka mkono ali-wentse ambaperekembo ntsembe ya bzinthu bza m’munda yakukwana mphimo ibodzi ya efa. Pakupereka bvululume ali-wentse ambaperekembo ntsembe ya bzinthu bza m’munda yakukwana mphimo ibodzi ya efa. Ndipo pa mphimo iri-yentse ya efa ambaperekembo mafuta yakukwana mphimo ya hini.*

25 “‘Mwezi waci 7, pa ntsiku yaci 15 ya mweziyo, mkati mwa ntsiku 7 za phwandolo iye an’funika kumbapereka bzinthu bzibodzi-bodzibzi, ntsembe ya pikado, ntsembe yakucita kutentha, ntsembe ya bzinthu bza m’munda na mafuta.’”

46 “Yahova Mbuya Mkululetu walewa kuti: ‘Cipata ca mbuto ya mkati ca ku mbali ya kumabvadzuwa cin’funika kukhala cidafunga kwa ntsiku 6 za basa, tsono mu ntsiku za Sabudu na ntsiku zakuwonekera kwa mwezi upsa cin’funika kukhala cidafungula. 2 Mtsogoleri an’dzapita na pakhonde la pacipata ndipo an’dzakaima pafupi na aro ya pa cipataco. Antsembe an’dzapereka ntsembe yakucita kutentha na ntsembe ya mbverano* yomwe iye an’dzabweresa ndipo iye an’dzagodama pakupitira pa msuwo acicoka. Tsono cipataco cin’funika lini kufungidwa mpaka kudoka. 3 Wanthu wa m’dzikoli an’dzafunikambo kugodama pamaso pa Yahova pa msuwo wa pa cipataco mu ntsiku za Sabudu na zakuwonekera kwa mwezi upsa.

4 “‘Ntsembe yakucita kutentha yomwe mtsogoleriyo an’dzapereka kwa Yahova pa ntsiku ya Sabudu, in’funika kudzakhala ya wana wacimuna wa mabira wakukwana 6 wakusaya cirema na bvululume m’bodzi wakusaya cirema. 5 Pakupereka bvululume, ambaperekembo ntsembe ya bzinthu bza m’munda yakukwana mphimo ibodzi ya efa.* Pakupereka wana wacimuna wa mabira, ambaperekembo ntsembe ya bzinthu bza m’munda yomwe angakwaniseyo ndipo pa ntsembe iri-yentse ya bzinthu bza m’munda ya mphimo ibodzi ya efa, ambaperekembo mafuta ya mphimo ya hini.* 6 Pa ntsiku yakuwonekera kwa mwezi upsa, ambapereke mkono wakusaya cirema pakati pa bzifuwo, wana wacimuna wa mabira wakukwana 6 na bvululume m’bodzi. Bzentsenebzi bzin’funika kukhala bzakusaya cirema. 7 Pakupereka mkono mng’ono, ambaperekembo ntsembe ya bzinthu bza m’munda yakukwana mphimo ibodzi ya efa. Pakupereka bvululume, ambaperekembo ntsembe ya bzinthu bza m’munda ya mphimo ibodzi ya efa. Pakupereka wana wacimuna wa mabira, ambaperekembo ntsembe ya bzinthu bza m’munda yomwe iye angakwaniseyo, ndipo pa ntsembe iri-yentse ya bzinthu bza m’munda ya mphimo ya efa, ambaperekembo mafuta yakukwana mphimo ibodzi ya hini.

8 “‘Pakupita, mtsogoleriyo an’funika kupita na pakhonde la pacipata ndipo an’funikambo kubula na kubodzi-bodziko. 9 Ndipo wanthu wa m’dzikoli akabwera pamaso pa Yahova m’nthawe za maphwando, omwe an’pita na ku cipata ca ku norte kuti adzanamate an’funika kubula na ku cipata ca ku suli, ndipo omwe an’pita na ku cipata ca ku suli an’funika kubula na ku cipata ca ku norte. Palibe omwe an’funika kubula na pacipata cibodzi-bodzi comwe wapita naco, pakuti ali-wentse an’funika kubula na pacipata comwe alibe kupita naco. 10 Pakulewa bza mtsogoleri omwe ali pakati pawo, iye an’funika kupita iwo akapita na kubula iwo akabula. 11 Pa nthawe za maphwando* ambapereke mkono mng’ono pabodzi na ntsembe za bzinthu bza m’munda zakukwana mphimo ibodzi ya efa. Ambaperekembo bvululume m’bodzi na ntsembe ya bzinthu bza m’munda yakukwana mphimo ibodzi ya efa. Pakupereka wana wacimuna wa mabira, ambaperekembo ntsembe ya bzinthu bza m’munda yomwe angakwaniseyo ndipo pa ntsembe iri-yentse ya bzinthu bza m’munda ya mphimo ya efa, ambaperekembo mafuta yakukwana mphimo ibodzi ya hini.

12 “‘Mtsogoleri akabweresa ntsembe yakucita kutentha ayai ntsembe ya mbverano* ninga ntsembe yomwe akupereka mwakucita kufuna kwa Yahova, an’dzamufungulira cipata ca ku mbali ya kumabvadzuwa ndipo iye an’dzapereka ntsembe yace yakucita kutentha na ntsembe zawo za mbverano ninga momwe ambacitira pa ntsiku ya Sabudu. Iye akabula, cipataco cin’funika kudzafungidwa.

13 “‘Ntsiku zentse un’funika kumbabweresa mwana wacimuna wa bira wa gole libodzi ndipo akhale wakusaya cirema ninga ntsembe yakucita kutentha kwa Yahova. Un’funika kumbacita bzimwebzi macibese yali-yentse. 14 Pakupereka kwa antsembe mwana wacimuna wa birayo, umbaperekembo ntsembe ya bzinthu bza m’munda ya mbali ibodzi pa mbali 6 za mphimo ya efa macibese yali-yentse. Umbaperekembo mafuta yakukwana mbali ibodzi pa mbali zitatu za mphimo ya hini kuti ambayawaze mu ufa bwakunyodoka. Imweyi in’dzakhala ntsembe ya bzinthu bza m’munda yakuperekedwa nthawe zentse kwa Yahova. Limweri lin’dzakhala lamulo mpaka kale-kale. 15 Mwana wacimuna wa bira, ntsembe za bzinthu bza m’munda na mafuta, bzin’dzaperekedwa macibese yali-yentse ninga ntsembe zakucita kutentha za nthawe zentse.’

16 “Yahova Mbuya Mkululetu walewa kuti: ‘Mtsogoleri akapasa mphaso m’bodzi mwa wana wace wacimuna ninga utaka, utakabo bun’dzakhala bwa wana wacewo. Bumwebu ni utaka bwawo. 17 Tsono iye akapasa m’bodzi mwa anyabasa wace mbali ibodzi ya utaka bwace ninga mphaso, imweyi in’dzakhala yace mpaka m’gole lakutsudzulidwa ndipo patsogolo pace in’dzakhala ya mtsogoleriyo. Ni mphaso yokha yakuperekedwa kwa wana wace yomwe in’dzakhala yawo mpaka kale-kale. 18 Mtsogoleriyo an’funika lini kutengera wanthu utaka bwawo aciwangingimiza kubula m’mbuto zawo. Ni utaka bwace bokha bomwe iye an’funika kupasa wana wace wacimuna, kuti paleke kugumanika munthu pakati pa wanthu wangu wakutengeredwa utaka bwace.’”

19 Patsogolo pace, iye adandipitisa na pa msuwo omwe ukhali kumbali kwa cipata cakupitira m’bzipinda bzakudyera bzakupambulika. Bzipindabzo bzikhali bza antsembe ndipo bzikhali ku mbali ya ku norte. Ndipo kumweko ndidawona mbuto inango ya mkati yomwe ikhali ku mbali ya ku madokero. 20 Iye adandiuza kuti: “Iyi ni mbuto yomwe antsembe an’dzaphikira ntsembe za kupalamula, ntsembe za pikado na mbuto yakuwotcera ntsembe za bzinthu bza m’munda kuti antsembewo aleke kubula na cinthu ciri-centse kunja, ku kintale yakunja kugopera kuti angacenese wanthu mwakusaya kuthemera.”

21 Iye adandiyendesa mu kintale ya kunja, ndipo adandipitisa na m’maponta manai ya kintaleyo ndipo ndidawona kintale inango pa ponta iri-yentse ya kintale yakunjayo. 22 M’maponta manai ya kintaleyo mukhana makintale mang’ono-mang’ono yomwe yakhadatalimpha makovado 40* ndipo yakhana khwankhwa la makovado 30. Yentse manai yakhadakula mwakundendemerana.* 23 Mkati mwa makintale manai mang’ono-mang’onoyo mukhana kaciguwa* m’mphepete mwentse mwa parede, ndipo pantsi pace pakhana mbuto zakupferusira ntsembe. 24 Tenepo iye adandiuza kuti: “Zimwezi ni mbuto zomwe wale omwe ambatumikira mu templo ambaphikira ntsembe zomwe wanthu ambabweresa.”

47 Tenepo iye adandibwezera pomwe pa msuwo wa templo ndipo na pamwepo ndidawona madzi yomwe yakhayerera kucokera pantsi pakupitira mu templo yomwe yakhayenda kumabvadzuwa, pakuti kutsogolo kwa templo kukhali ku mbali ya kumabvadzuwa. Madziyo yakhacoka pantsi ku mbali yamadidi ya templo, ndipo yakhapita na mbali ya ku suli ya guwa la ntsembe.

2 Patsogolo pace iye adandiyendesa kunja na pacipata ca ku norte ndipo adandizungulirisa mpaka pa cipata ca kunja ca mbali ya kumabvadzuwa ndipo ndidawona madzi yakuyerera kucokera ku mbali yamadidi.

3 Pomwe munthuyo adayenda ku mbali ya kumabvadzuwa na cingwe cakupimira m’manja mwace, adapima makovado 1000* ndipo adacitisa kuti ndiyambuke madzi. Madziyo yakhandifika m’mphundupundu.

4 Patsogolo pace iye adapima pomwe makovado 1000 ndipo adacitisa kuti ndiyambuke madzi ndipo madziyo yakhandifika m’mabondo.

Iye adapima pomwe makovado 1000 ndipo adacitisa kuti ndiyambuke ndipo madziyo yakhandifika m’ciuno.

5 Pomwe adapima pomwe makovado 1000, madziyo yakhali mazinji kwene-kwene mwakuti ningadakwanisa lini kuyambuka na minyendo, pakuti madziyo yakhadazika kwene-kwene mwakuti bzingadafunika kucita kuyantca. Yakhali mazinji kwene-kwene mwakuti bzingadakwanisika lini kuyambuka na minyendo.

6 Iye adandibvunza kuti: “Iwe mwana wa munthu, kodi wawona bzimwebzi?”

Tenepo iye adandicitisa kuti ndifambe ndicibwerera ku ng’ambu inango ya madziyo. 7 Pomwe ndidabwerera, ndidawona kuti ng’ambu zentse ziwiri za madzi mukhana miti mizinji kwene-kwene. 8 Patsogolo pace iye adandiuza kuti: “Madziya yakuyerera kuyenda ku mphimpha ya kumabvadzuwa yacipita na ku Araba* mpaka kukafika ku nyanza. Yakakafika m’nyanzamo, madzi ya m’nyanzayo yan’dzakhala madzi yabwino. 9 Bzakulengedwa bzizinji bzin’dzakhala na moyo kuli-kwentse komwe madziyo yan’dzafika, kun’dzakhala na ntsomba zizinji pakuti madzi yamweya yan’dzafika kumweko. Madzi ya m’nyanzamo yan’dzakhala madzi yabwino ndipo bzirombo bzentse bzin’dzakhala na moyo kuli-kwentse komwe madziyo yan’dzafika.

10 “Akhombwe an’dzakhala m’mphepete mwa m’nyanzamo kucokera ku Eni-gedi mpaka ku Eni-eglaimu, komwe kun’dzakhala mbuto yakuumisira bwazi bwawo. Kun’dzakhala na ntsomba zizinji za mitundu mizinji ninga ntsomba za m’Nyanza Ikulu.*

11 “Kumweko kun’dzakhala na mathawale na mbuto za matope, tsono madzi yace yan’dzakhala lini madzi yabwino. Yan’dzapitiriza kukhala madzi ya munyu.

12 “M’mphepete mwa madzimo mun’dzamera miti ya mitundu yentse ya bzisapo bzomwe bzimbadyedwa. Masamba yace yan’dzafota lini ndipo mitiyo in’dzaleka lini kubala bzisapo. Mwezi uli-wentse in’dzabala bzisapo thangwe in’dzathiriziridwa na madzi yakucokera ku templo. Bzisapo bzace bzin’dzakhala cakudya ndipo masamba yace yan’dzakhala mankhwala yakupozera.”

13 Yahova Mbuya Mkululetu walewa kuti: “Limweri ni dziko lomwe mun’dzagawana ninga utaka pa madzinza 12 ya Jirayeri, ndipo Zuze an’dzakhala na mbali ziwiri. 14 Lin’dzakhala utaka bwanu ndipo mun’dzatambira mbuto zakundendemerana. Ndidalumbira kupasa dzikoli makolo yanu yakale, koma tsapano mun’gawana ninga utaka.

15 “Malire ya mbuto ya mbali ya ku norte ngaya: Kuyambira ku Nyanza Ikulu yacipita na mu mseu wakuyenda ku Hetiloni mpaka kuyenda ku Zedadi, 16 ku Hamate, ku Berota na ku Sibraimu wa ku mphimpha za ku Damasko na ku Hamate yacifika ku Hazeri-hatikoni, omwe ali kufupi na malire ya Haurani. 17 Na tenepo malireyo yakucokera ku nyanza mpaka kukafika ku Hazari-enani, m’mphepete mwa malire ya Damasko ku norte na m’malire ya Hamate. Yamweya ni malire ya mbali ya ku norte.

18 “Malire ya mbali ya kumabvadzuwa yakupita na pakati pa Haurani na Damasko, yacipita na m’mphepete mwa Jordano pakati pa Jiliyadi na dziko la Jirayeri. Mun’funika kupima mtantho wace kuyambira m’malire* mpaka kufika ku nyanza ya kumabvadzuwa.* Yamweya ni malire ya mbali ya kumabvadzuwa.

19 “Malire ya mbali ya ku suli yan’dzacokera ku Tamara mpaka ku madzi ya ku Meribati-kadesi, yaciyenda mpaka ku cigwa ca ku Edjipito yacikafika ku Nyanza Ikulu. Yamweya ni malire ya mbali ya ku suli.

20 “Ku mbali ya kumadokero, malire yanu yakhale Nyanza Ikulu kuyambira m’malire* mpaka kufika kutsogolo kwa Lebo-hamate.* Yamweya ni malire ya mbali ya kumadokero.”

21 “Imwepo mun’funika kugawana mwekha-mwekha dzikoli m’madzinza 12 ya Jirayeri. 22 Mun’funika kuligawa dzikoli ninga utaka pakati panu, kuphatanidzambo wanthu wa mitundu inango omwe mukukhala nawo pabodzi, omwe adabereka wana pakati panu. Iwo an’dzakhala kwa imwepo ninga nzika za mu Jirayeri. Madzinza ya Jirayeri yakadzatambira utaka, iwo an’dzatambirambo. 23 Mun’funika kupasa utaka munthu wa dzinza linango ku mbuto komwe dzinza lace likukhala,” walewa tenepo Yahova Mbuya Mkululetu.

48 “Madzina ya madzinza kuyambira kumbali ya ku norte ni aya: Mbali ya Dani ikuyambira m’mphepete mwa mseu wa ku Hetiloni kukafika ku Lebo-hamate* mpaka ku Hazari-enani, m’mphepete mwa malire ya Damasko kuyenda ku norte, pafupi na Hamate. Mbali imweyi ikucokera kumalire ya kumabvadzuwa mpaka kumalire ya kumadokero. 2 Mbali ya Aseri ina malire na Dani, kucokera kumalire ya kumabvadzuwa mpaka kumalire ya kumadokero. 3 Mbali ya Nafitali ina malire na Aseri, kucokera kumalire ya kumabvadzuwa mpaka kumalire ya kumadokero. 4 Mbali ya Manase ina malire na Nafitali, kucokera kumalire ya kumabvadzuwa mpaka ku malire ya kumadokero. 5 Mbali ya Efraimu ina malire na Manase, kucokera kumalire ya kumabvadzuwa mpaka kumalire ya kumadokero. 6 Mbali ya Rubeni ina malire na Efraimu, kucokera kumalire ya kumabvadzuwa mpaka kumalire ya kumadokero. 7 Mbali ya Djuda ina malire na Rubeni, kucokera kumalire ya kumabvadzuwa mpaka kumalire ya kumadokero. 8 M’malire ya Djuda kuyambira kumbali ya kumabvadzuwa mpaka m’malire ya kumbali ya kumadokero, mun’funika kusankhula mbuto ya khwankhwa la makovado 25 000 kuti ikhale cakupereka, ndipo kutalimpha kwace kundendemerane na mbuto za madzinza manango, kucokera kumalire ya kumabvadzuwa mpaka kumalire ya kumadokero. Ndipo templo in’dzakhala pakati.

9 “Mbuto yomwe mun’funika kupasa Yahova ninga cakupereka, in’funika kutalimpha makovado 25 000 ndipo khwankhwa lace makovado 10 000. 10 Mbuto imweyi in’dzaperekedwa kwa antsembe ninga cakupereka cakupambulika. Idzakhale ya makovado 25 000 ku norte, 10 000 kumadokero, 10 000 kumabvadzuwa na 25 000 ku suli. Templo ya Yahova in’dzakhala pakati. 11 In’dzakhala ya antsembe omwe adacenesedwa pakati pa wana wa Zadoki, wale omwe adapitiriza kunditumikira ndipo alibe kupanduka pomwe Ajirayeri na Alevi adandipandukira. 12 Iwo an’dzakhala na mbali pakati pa mbuto yomwe idaperekedwa ninga cinthu cakucenesesa yomwe in’dzacita malire na Alevi.

13 “Pafupi na mbuto za antsembe, Alevi an’dzapasidwambo mbuto yawo yakutalimpha makovado 25 000, khwankhwa lace 10 000. (Kutalimpha kwace kwentse kun’dzakhala na makovado 25 000 ndipo khwankhwa lace 10 000.) 14 Iwo an’funika lini kugulisa, kucinjanisa ne kupereka kuna munthu munango mbali yomwe njabwino kwene-kwene ya mbutoyo, pakuti njakupambulika kwa Yahova.

15 “Mbuto yomwe in’sala yomwe khwankhwa lace nja makovado 5000, m’mphepete mwa malire ya makovado 25 000 in’dzaphatisidwa basa na wanthu wentse wa mu mzinda, kuti ikhale yakudyesera bzifuwo. Ndipo mzinda un’dzakhala pakati. 16 Kukula kwa mzindayo kukhale uku: Malire ya ku norte yan’dzakhala na makovado 4500, malire ya ku suli 4500, malire ya kumabvadzuwa 4500 ndipo malire ya kumadokero 4500. 17 Mbuto yakudyesera bzifuwo ya mu mzindamo in’dzakhala na makovado 250 ku norte, 250 ku suli, 250 kumabvadzuwa na 250 kumadokero.

18 “Kutalimpha kwa mbuto yomwe in’dzasala, kun’dzafika mpaka ku mbuto ya cakupereka cakupambulika, ndipo idzakhale na makovado 10 000 kumabvadzuwa na 10 000 kumadokero. Kun’dzafika mpaka ku mbuto ya cakupereka cakupambulika, ndipo cakudya comwe cin’dzacoka m’mwemo, cin’dzakhala cakudya ca anyabasa wa mu mzindamo. 19 Mbutoyo in’dzalimidwa na anyabasa wa mu mzinda wakucokera m’madzinza yentse ya Jirayeri.

20 “Mbuto yentse yomwe iniperekedwayo ikhale na mbali zinai zakundendemerana ndipo mbali iri-yentse ikhale na makovado 25 000. Imwepo mun’funika kukoya mbuto imweyi ninga cakupereka cakupambulika, pabodzi na mbuto ya mzinda.

21 “Mbuto zomwe zinisala ku mbali ziwiri za cakupereka cakupambulika na mbuto ya mzinda zin’dzakhala za mtsogoleri. In’dzakhala pafupi na malire ya makovado 25 000 kumabvadzuwa na kumadokero kwa mbuto yomwe idaperekedwa. Mbuto ya mtsogoleriyi in’dzakhala pakati pa mbuto za madzinza mawiri, mbuto ya cakupereka cakupambulika na mbuto yakucena ya templo, zin’dzakhala pakati pa mbuto imweyi.

22 “Mbuto ya Alevi na mbuto ya mzinda zin’dzakhala pakati pa mbuto ya mtsogoleri. Mbuto ya mtsogoleriyo in’dzakhala pakati pa malire ya Djuda na malire ya Benjamini.

23 “Tsono madzinza yomwe yanisala, mbali ya Benjamini inifika kumalire ya kumabvadzuwa mpaka kumalire ya kumadokero. 24 Mbali ya Simiyoni ina malire na Benjamini, kucokera kumalire ya kumabvadzuwa mpaka kumalire ya kumadokero. 25 Mbali ya Isakari ina malire na Simiyoni, kucokera kumalire ya kumabvadzuwa mpaka kumalire ya kumadokero. 26 Mbali ya Zebuloni ina malire na Isakari, kucokera kumalire ya kumabvadzuwa mpaka kumalire ya kumadokero. 27 Mbali ya Gadi ina malire na Zebuloni, kucokera kumalire ya kumabvadzuwa mpaka kumalire ya kumadokero. 28 Malire ya ku mbali ya suli, yomwe yambapita m’malire mwa Gadi, yan’dzacokera ku Tamara mpaka ku madzi ya ku Meribati-kadesi, yaciyenda mpaka ku cigwa ca ku Edjipito yacikafika ku Nyanza Ikulu.*

29 “Iri ni dziko lomwe mun’funika kugawa ninga utaka kuna madzinza ya Ajirayeri, ndipo zimwezi zin’dzakhala mbuto zawo,” walewa tenepo Yahova Mbuya Mkululetu.

30 “Mbuto zakubulira mu mzinda zin’dzakhala tenepa: Mbali ya ku norte in’dzakhala na makovado 4500.

31 Bzipata bza mu mzinda bzin’dzakhala na madzina ya madzinza ya Jirayeri. Ku norte kun’dzakhala na bzipata bzitatu ibzi: Cipata ca Rubeni, cipata ca Djuda na cipata ca Levi.

32 Kumbali ya kumabvadzuwa kun’dzakhala na makovado 4500 ndipo kun’dzakhala na bzipata bzitatu ibzi: Cipata ca Zuze, cipata ca Benjamini na cipata ca Dani.

33 Kumbali ya ku suli kun’dzakhala na makovado 4500 na bzipata bzitatu ibzi: Cipata ca Simiyoni, cipata ca Isakari na cipata ca Zebuloni.

34 Kumalire ya kumadokero kun’dzakhala na makovado 4500 na bzipata bzitatu ibzi: Cipata ca Gadi, cipata ca Aseri na cipata ca Nafitali.

35 “Mzinda wentseneyo un’dzakhala na makovado 18 000 ndipo kucokera ntsiku imweyo kuyenda kutsogolo, mzindayo un’dzacemeredwa na dzina lakuti Yahova Ali m’Mwemo.”