JOWELI
1 Aya ni mafala ya Yahova yomwe Joweli* mwana wa Petuweli adatambira:
2 “Tetekerani ibzi akulu-akulumwe,
Ndipo tetekerani mwatceru, imwe mwentse omwe mukukhala m’dzikoli.
Kodi bzinthu ninga bzimwebzi bzidacitikambo kale mu ntsiku zanu,
Ayai mu ntsiku za makolo yanu yakale?
3 Uzani bzimwebzi wana wanu,
Ndipo wana wanuwo adzauzembo wana wawo,
Ndipo wana wa wana wanuwo adzauzembo m’badwo wakutsogolo.
4 Bzinthu bzomwe bziwala bzidasiya, bzidadyedwa na dzombe;
Bzinthu bzomwe dzombero lidasiya, bzidadyedwa na akapondolo;
Ndipo bzinthu bzomwe bzidasiyidwa na akapondolowo, bzidadyedwa na mabombo.
5 Lamukani imwe anyakuledzera ndipo lirani!
Dandaulani imwe mwentse anyakumwa vinyu,
Thangwe vinyu yakutapira yacosedwa pa mulomo panu.
6 Pakuti mtundu wa wanthu wabwera m’dziko langu, mtunduyo ngwamphanvu ndipo una wanthu wakusaya kulewengeka.
Mano yawo na ntsagwada zawo, ziri ninga za mphondolo.
7 Iwo adzonga muti wangu wa uva, ndipo acitisa muti wangu wa mkuyu kukhala citcici,
Ndipo iwo akwatulambo mabade yace aciyataya kutali
Napo mphukira zidasiyidwambo zakusaya mabade.
9 Ntsembe ya bzinthu bza m’munda na ntsembe ya vinyu bzacosedwa m’nyumba ya Yahova;
Ndipo antsembe, atumiki wa Yahova, akulira.
10 Munda wadzongedwa ndipo mataka yakulira;
Pakuti mbewu zadzongedwa, vinyu ipsa yauma ndipo mafuta yamala.
11 Alimi akucita thupo ndipo anyakusamalira minda ya uva akulira,
Thangwe ra tirigu na sevada;
Pakuti bzakubvuna bza m’munda bzadzongeka.
12 Muti wa uva wauma,
Ndipo muti wa mkuyu wafota.
Muti wa romaa,* muti wa kanjedza, muti wa masaa,
Na miti yentse ya m’munda yauma;
Pakuti kukondwa kwa mbumba kwasanduka manyazi.
13 Imwe antsembe, bvalani magundiri ndipo lirani;
Lirani, imwe atumiki wa pa guwa la ntsembe.
Imwe atumiki wa Mulungu wangu, pitani ndipo bvalani magundiri usiku bwentse;
Pakuti palibe omwe akubweresa ntsembe ya bzinthu bza m’munda na ntsembe ya vinyu pa nyumba ya Mulungu wanu.
14 Konzekerani nthawe ya kubzimana kudya,* dziwisani bza mtsonkhano wakupambulika.
Tsonkhanisani akulu na wanthu wentse wa m’dzikoli,
Kuti ayende ku nyumba ya Yahova Mulungu wanu, acikalirira Yahova kuti awathandize.
15 Maine, thangwe ra ntsikuyo!
Pakuti ntsiku ya Yahova iri pafupi,
Ndipo ntsikuyo in’dzafika ninga kupfudza kwakucokera kwa Wamphanvu-zentse!
16 Kodi alibe kutitengera cakudya ife tikuwona?
Kodi kukondwa kulibe kucosedwa pa nyumba ya Mulungu wathu?
17 Mbeu* zomwe akufukula mwakuphatisa basa foxolo zafota.
Nyumba zakukoyera bzinthu zadzongeka.
Magwangwa yadzongedwa pakuti cakudya cauma.
18 Napo bzifuwo bzikubuula!
Ng’ombe zikundofamba-famba thangwe rakuti kulibe mauswa!
Ndipo mabira yakutsautsika.
19 Nin’dzacemera imwepo Yahova;
Pakuti moto watentha mauswa ya m’thengo,
Ndipo motoyo watentha miti yentse ya m’thengo.
20 Napo bzirombo bza m’thengo bzikukulingani,
Pakuti mikulo ya madzi yauma,
Ndipo moto watentha mauswa ya m’thengo.”
2 “Lizani cimbututu mu Ziyoni!
Kuwani m’phiri langu lakucena kuti nkhondo ikubwera.
Ndipo wanthu wentse wakukhala m’dzikoli atetemere,
Pakuti ntsiku ya Yahova ikubwera ndipo iri pafupi!
2 Imweyi ni ntsiku ya mdima, mdima wa ndiwe yani,
Ntsiku ya mitambo na ya mdima wakuti bwerani mudzawone,
Iri ninga momwe cimbawonekera ceza ca kumacibese m’mapiri.
Kuna wanthu azinji na wamphanvu;
Kukhalibe kale wanthu ninga amwewo
Ndipo cipo acidzawoneka pomwe
Ku magole ya mibadwo yentse.
3 Patsogolo pawo moto wakudzonga,
Ndipo m’mbuyo mwawo moto wakunyekesa.
Dziko lomwe liri patsogolo pawo liri ninga zunde la Edeni,
Koma m’mbuyo mwawo liri ninga dambo lomwe liribe cinthu,
Ndipo palibe cinthu comwe cingapulumuke.
4 Mawonekedwe yawo yali ninga makavalo,
Ndipo iwo ambathamanga ninga makavalo ya nkhondo.
5 Kuunga kwawo kuli ninga ngolo za nkhondo zikakhala zikumoga padzulu pa mapiri,
Ninga baludya la moto omwe ukutentha mapesi.
Iwo ali ninga wanthu wamphanvu omwe afola kuti amenye nkhondo.
6 Wanthu an’dzatetemera thangwe ra iwo.
Ndipo nkhope zawo zin’dzawoneka zakugwa.
7 Iwo ambathamanga ninga anyankhondo,
Ambakwira mpanda ninga acikunda,
Ali-wentse ambayenda wititi,
Ndipo ambapambuka lini pa njira zawo.
8 Iwo ambagwinyana-gwinyana lini;
Ali-wentse ambathamanga pa njira yace.
Winango akagwesedwa na bzifuzo bza nkhondo,
Winangowo ambabwerera lini m’mbuyo.
9 Ambapita mu mzinda ndipo ambathamanga padzulu pa muro.
Ambakwira nyumba acipita m’nyumbamo na pa janera ninga mbava.
10 Dziko limbatetemera pamaso pawo ndipo kudzulu kumbatekenyeka.
Dzuwa na mwezi bzacita mdima,
Ndipo nyenyezi zaluza ceza cace.
11 Yahova an’dzalewalewa pamaso pa acikunda wace, thangwe mu msasa mwace muna wanthu azinji.
Pakuti ule omwe ambacitadi bzomwe walewa ngwamphanvu;
Pakuti ntsiku ya Yahova njikulu na yakupasa mantha.
Kodi mbani omwe angadzapirire pa ntsiku imweyi?”
12 Ndipopa Yahova walewa kuti: “Pakuti nthawe ikalipo, bwererani kwa ine na mtima wentse,
Mwa kubzimana kudya,* mwakulira na mwakudandaula.
13 Ng’ambani mitima yanu, sikuti bzakubvala bzanu,
Ndipo bwererani kwa Yahova Mulungu wanu,
Pakuti iye ngwantsisi, wakudeka mtima, ambakalipa lini kamangu ndipo ngwalufoyi likulu lacadidi,
Ndipo iye angacinje makumbukidwe yace pa nkhani yakubweresa nyathwa.
14 Mbani an’dziwa, pinango iye angabwerere m’mbuyo
Acicinja makumbukidwe yace, acikupasani cisimbo,
Ntsembe ya bzinthu bza m’munda na ntsembe ya vinyu kuti mupereke kwa Yahova Mulungu wanu?
15 Lizani cimbututu mu Ziyoni!
Dziwisani* bza kubzimana kudya* na bza mtsonkhano wakupambulika.
16 Tsonkhanisani wanthu, cenesani gwere.
Tsonkhanisani amuna wacikulire, tsonkhanisani wana na matcece.
Namwali wacimuna acoke m’cipinda cace ca mkati ndipo namwali wacikazi acoke pa mbuto yace yakugona.
17 Pakati pa khonde na guwa la ntsembe
Alire antsembe, atumiki wa Yahova, acilewa kuti:
‘Imwe Yahova, bverani ntsisi wanthu wanu;
Lekani kucitisa manyazi utaka bwanu,
Mwakusiya kuti wanthu wa mitundu inango awatonge.
Wanthu wa mitundu inangowo afikirenyi pakulewa kuti: “Kodi Mulungu wawoyo ali kuponi?”’
18 Yahova an’dzathandiza dziko lace mwa nyongo
Ndipo an’dzabvera ntsisi wanthu wace.
19 Yahova an’dzatawira wanthu wace kuti:
‘Ndikukutumizirani bzinthu bza m’munda, vinyu ipsa na mafuta,
Imwepo mun’dzakhuta bzinthu bzimwebzi;
Ndipo nin’dzalekerera lini pomwe kuti wanthu wa mitundu akucitiseni manyazi.
20 Nin’dzakufundusirani kutali wale omwe akucokera ku Norte;
Nin’dzawathamangisira ku dziko lakuuma na lakusaya wanthu,
Pomwe nkhope zawo zidanyang’ana ku nyanza ya kumabvadzuwa*
Ndipo m’mambuyo mwawo mudalata ku nyanza ya kumadokero.
Kununkha kwawo kun’dzabvekera pa dziko lentse,
Ndipo cibvunde cawo cin’dzapitiriza kubvekera;
Pakuti Mulungu an’dzacita bzinthu bzikulu.’
21 Leka kucita mantha iwe dziko.
Kondwa ndipo komedwa, pakuti Yahova an’dzacita bzinthu bzikulu.
22 Lekani kucita mantha imwe bzirombo bza m’thengo,
Pakuti mbuto yakudyesera bzifuwo ya m’dambo in’dzakhala na mauswa yakupswipirira,
Ndipo miti in’dzabala bzisapo;
Muti wa mkuyu na wa uva in’dzabala bzisapo bzizinji.
23 Imwe wana wa Ziyoni, kondwani mucikomedwa thangwe ra Yahova Mulungu wanu;
Pakuti iye an’dzakupasani nvula yakuyambirira yakukwanira
Ndipo an’dzakubvumbisirani nvula ya mbvumbi,
Nvula yakuyambirira na nvula yakumalizira ninga momwe bzikhaliri pakuyamba.
24 Pa mbuwa pan’dzadzala na tirigu yakupulidwa bwino,
Ndipo mwakupsinyira uva mun’dzadzala mpaka kutaikira vinyu ipsa na mafuta.
25 Nin’dzawabwezera bzinthu bzomwe adaluza
M’magole yomwe bzidadyedwa na dzombe, akapondolo, mabombo na bziwala.
Limweri ni thimu langu likulu la anyankhondo lomwe ndatumiza pakati panu.
26 Kulewa cadidi, imwepo mun’dzadya mucikhuta,
Ndipo mun’dzatumbiza dzina la Yahova Mulungu wanu,
Omwe wakucitirani bzakudabwisa;
Wanthu wangu cipo acidzacitisidwa pomwe manyazi.
27 Imwepo mun’dzadziwa kuti ine ndiri pakati pa Jirayeri,
Nakuti ine ndine Yahova Mulungu wanu ndipo palibe munango.
Wanthu wangu cipo acidzacitisidwa pomwe manyazi.
28 Patsogolo pace, nin’dzapereka mzimu wangu wakucena kwa wanthu wa mitundu yentse,
Ndipo wana wanu wacimuna na wacikazi an’dzalewa mapolofesiya,
Amuna wacikulire omwe ali pakati panu an’dzalotesedwa,
Ndipo maswaka yan’dzawona masomphenya.
29 Mu ntsiku zimwezo, napo akapolo wangu wacikazi na wacimuna
Nin’dzawapasambo mzimu wakucena.
30 Ndipo nin’dzacita bzakudabwisa kudzulu na pa dziko la pantsi,
Bzomwe ni mulopa, moto na utsi bomwe bukukwira kudzulu.
31 Dzuwa lin’dzasanduka mdima ndipo mwezi un’dzasanduka mulopa.
Bzimwebzi bzin’dzacitika, pomwe ntsiku ikulu na yakugopswa ya Yahova ikanati kufika.
32 Ndipo munthu ali-wentse omwe an’dzacemera dzina la Yahova an’dzapulumuka;
Pakuti mu Phiri la Ziyoni na mu Jeruzalemu mun’dzakhala wanthu omwe apulumuka ninga momwe Yahova adalewera.
Amwewa ni wanthu omwe Yahova akuwacemera.”
3 “Ndipo mu ntsiku zimwezo na pa nthawe imweyo,
Pomwe nin’dzacosa Djuda na Jeruzalemu ku ukapolo,
2 Nin’dzatsonkhanisambo mitundu yentse ya wanthu
Ndipo nin’dzaipolikisa ku cigwa ca Jewosafati.*
Ndipo kumweko nin’dzakaitonga
Thangwe ra bzomwe adacitira wanthu wangu na utaka bwangu, Jirayeri,
Pakuti adamwaza wanthu wangu pakati pa mitundu ya wanthu,
Ndipo adagawana dziko langu.
3 Mitunduyi idacita vima-vima kwa wanthu wangu;
Ndipo ikhagulisa mwana wacimuna kuti ikwanise kupagali puta
Ndipo ikhagulisa mwana wacikazi, kuti igule vinyu kuti imwe.
4 Kodi ndakuphonyerani ciyani ine,
Iwe Tiro na Sidoni na mphimpha zentse za ku Filistiya?
Kodi mukundibwezera pa cinthu comwe ndidakucitirani?
Penu mukundibwezera,
Inepano ninkubwezeranimbo mwakamfulumize na mwakusaya kucedwa pa bzomwe mukundicitirabzo.
5 Pakuti mwatenga prata* na oro yangu,
Ndipo mwatengambo cuma cangu cakufunika kwene-kwene muciciikha m’templo yanu;
6 Na kugulisa wanthu wa ku Djuda na wa ku Jeruzalemu kwa Agerego,
Na cakulinga cakuti muwacose na kuwayendesa kutali na dziko lawo;
7 Inepano nin’dzawacitisa kuti abwerere kucokera komwe mudawagulisirako,
Ndipo nin’dzakubwezerani bzomwe mudawacitira.
8 Nin’dzagulisa wana wanu wacimuna na wacikazi kwa wanthu wa ku Djuda,
Ndipo Adjudawo an’dzawagulisa kwa wanthu wa ku Xeba, mtundu wakutali kwene-kwene;
Pakuti Yahova caiyeyo ndiye omwe walewa bzimwebzi.
9 Dziwisani mitundu ya wanthu kuti:
‘Konzekerani nkhondo, konzekeresani amuna wamphanvu,
Acikunda wentse afendere pafupi ndipo ayambe nkhondo.
10 Sulani mapaza yanu kukhala xipada ndipo madjeko yanu kukhala madipa.
Ndipo nyakutepa alewe kuti: “Ndine wamphanvu.”
11 Imwe wanthu wa mitundu yapafupi, bwerani ndipo tsonkhanani pabodzi kuti muthandizane.’”
Imwe Yahova, citisani kuti anyankhondo wanu apolikire kumweko.
12 “Mitundu yentse ya wanthu ilamuke ndipo iyende ku cigwa ca Jewosafati;
Pakuti nin’kakhala kumweko kuti nditonge mitundu yentse ya wanthu wapafupi.
13 Pakuti nthawe yakubvuna yakwana, tengani djeko wanu.
Bwerani ndipo polikirani kuno, pakuti pakupsinyira uva padzala.
Ndipo pakupsinyira uvapo pakutaikira vinyu, pakuti kuipa kwa wanthu n’kukulu kwene-kwene.
14 Thimu la wanthu azinji liri ku cigwa cakutongera mirandu,
Pakuti ntsiku ya Yahova iri pafupi ku cigwa cakutongera miranduco.
15 Dzuwa na mwezi bzin’dzacita mdima,
Ndipo nyenyezi zin’dzaluza ceza cace.
16 Yahova an’dzalirima ninga mphondolo kucokera pa phiri la Ziyoni,
Ndipo an’dzalewalewa ali ku Jeruzalemu.
Kudzulu na dziko la pantsi bzin’dzatekenyeka;
Tsono Yahova an’dzakhala mbuto yakuthawira wanthu wace,
Na mbuto ya mkhomeko kwa Jirayeri.
17 Ndipo imwepo mun’dzadziwa kuti ine ndine Yahova Mulungu wanu, omwe ambakhala mu Ziyoni, phiri langu lakucena.
Jeruzalemu an’dzakhala mbuto yakucena,
Ndipo wanthu wa m’madziko manango an’dzapita lini pomwe na kumweko.
18 Pa ntsiku imweyo, m’mapiri mun’dzagoga vinyu yakutapira.
M’tumapiri mun’dzayerera mkaka,
Ndipo m’tumikulo twa ku Djuda mun’dzadzala madzi.
Madzi yan’dzayerera kucokera pa nyumba ya Yahova,
Ndipo yan’dzathirizira cigwa ca miti ya mkexa.
19 Tsono Edjipito an’dzakhala matere,
Ndipo Edomu an’dzakhala thengo lakusaya kukhalidwa na wanthu,
Thangwe ra ciwembo comwe adacitira wanthu wa ku Djuda,
Mwakupha wanthu wakusaya pikado.
20 Koma Djuda an’dzakhalidwa na wanthu mpaka kale-kale,
Ndipo mu Jeruzalemu mun’dzakhalidwambo mibadwo na mibadwo.
21 Nin’dzamuwona kuti alibe mulandu* ule omwe ndikhamuwona kuti ana mulandu;
Ndipo Yahova an’dzakhala mu Ziyoni.”
Kuthandauza kuti “Yahova ni Mulungu.”
Ayai, “mtsikana.”
Ayai, “mwamuna.”
Muti umweyu umbabala bzisapo bzomwe mkati mwace muna tubzinthu tomwe tumbakhala ninga cimanga.
Ayai, “ya jejum.”
Ayai pinango, “nkhuyu zakuuma.”
Ayai, “mwa jejum.”
Mafala yace caiyo: “Cenesani.”
Ayai, “bza jejum.”
Yomwe ni Nyanza Yakufa.
Kuthandauza kuti “Yahova ni Nyakutonga.”
Ayai, “siriva.”
Mafala yace caiyo: “mulandu wa mulopa.”