AMOSE

1 Aya ni mafala ya Amose* omwe akhali m’bodzi mwa wanthu omwe akhafuwa mabira ku Tekowa. Iye adawona masomphenya yakulewa bza Jirayeri mu ntsiku za Uziya mambo wa Djuda na mu ntsiku za Jerobowamu mwana wacimuna wa Jowasi mambo wa Jirayeri, pomwe kukhadasala magole mawiri kuti citeketeke cicitike. 2 Iye adati:

“Yahova an’dzalirima mu Ziyoni

Ndipo iye an’dzakuwa mu Jeruzalemu.

Mbuto zakudyesera amakabusa zin’dzalira,

Ndipo pa ntsonga ya phiri la Karmelo pan’dzauma.”

3 “Yahova walewa kuti,

‘“Pakuti Damasko wandiphonyera* mwakubwereza-bwereza,* nin’dzabweza lini bzomwe ndikhafuna kumucitira,

Thangwe adaphwanya-phwanya Jiliyadi na simbi zomwe zimbaphatisidwa basa pakupulira.

4 Na tenepo, nin’dzatumiza moto pa nyumba ya Hazayeli,

Ndipo motoyo un’dzanyekesa nyumba zakulimba za ntsanza za Beni-hadadi.

5 Nin’dzatcola mipiringidzo ya bzipata bza Damasko,

Nin’dzapfudza wanthu wa ku Bikati-aveni

Na ule omwe ambatonga* mu Beti-edeni;

Ndipo wanthu wa ku Siriya an’dzayendesedwa ku ukapolo ku Kiri,” walewa tenepo Yahova.’

6 Yahova walewa kuti,

‘“Pakuti Gaza wandiphonyera mwakubwereza-bwereza,* nin’dzabweza lini bzomwe ndikhafuna kumucitira,

Pakuti iwo adatenga thimu lentse la wanthu ninga akapolo, aciwayendesa ku Edomu.

7 Na tenepo, nin’dzatumiza moto pa muro wa Gaza,

Ndipo motoyo un’dzanyekesa nyumba zace za ntsanza zakulimba.

8 Nin’dzapfudza wanthu wa ku Asidode,

Na ule omwe ambatonga* mu Asikeloni;

Inepano nin’dzalanga Ekroni

Ndipo anyakusala wa Afilisteu an’dzafa,” walewa tenepo Yahova Mbuya Mkululetu.’

9 Yahova walewa kuti,

‘Pakuti Tiro wandiphonyera mwakubwereza-bwereza,* nin’dzabweza lini bzomwe ndikhafuna kumucitira,

Pakuti iwo adatenga thimu lentse la wanthu ninga akapolo, aciwayendesa ku Edomu,

Na thangwe rakuti iwo alibe kukumbukira mpangano wa paubale.

10 Na tenepo, nin’dzatumiza moto pa muro wa Tiro,

Ndipo motoyo un’dzanyekesa nyumba zace za ntsanza zakulimba.’

11 Yahova walewa kuti,

‘Pakuti Edomu wandiphonyera mwakubwereza-bwereza,* nin’dzabweza lini bzomwe ndikhafuna kumucitira,

Thangwe iye adatewera m’bale wace caiye na xipada,

Ndipo adalamba kumulatiza ntsisi;

Na ukali bwace, iye akupitiriza kukhabvula-khabvula,

Ndipo iye akupitiriza kukhala adakalipa mwakusaya kulekeza thangwe ra iwo.

12 Na tenepo, nin’dzatumiza moto pa Temani,

Ndipo motoyo, un’dzanyekesa nyumba za ntsanza zakulimba za Bozira.’

13 Yahova walewa kuti,

‘“Pakuti Aamoni andiphonyera mwakubwereza-bwereza,* nin’dzabweza lini bzomwe ndikhafuna kuwacitira,

Thangwe iwo atumbula mimba za akazi wa pathupi wa ku Jiliyadi kuti athumizire mbuto yawo.

14 Na tenepo, nin’dzagasa muro wa Raba,

Ndipo motoyo un’dzanyekesa nyumba zace za ntsanza zakulimba,

Na kukuwa kwa nkhondo pa ntsiku ya nkhondo

Na conzi pa ntsiku ya nvula ya conzi.

15 Ndipo mambo wawo na nduna zace an’dzayenda nawo pabodzi ku ukapolo,” walewa tenepo Yahova.’

2 “Yahova walewa kuti:

‘“Pakuti Mowabe wandiphonyera* mwakubwereza-bwereza,* nin’dzabweza lini bzomwe ndikhafuna kumucitira,

Thangwe iye watentha mafupa ya mambo wa Edomu kuti yakhale dotha.

2 Na tenepo, nin’dzatumiza moto pa Mowabe,

Ndipo motoyo un’dzanyekesa nyumba za ntsanza zakulimba za Keriyoti;

Mowabe an’dzafa pakati pa ciwowo,

Na kulira kwa nkhondo pabodzi na kulira kwa cimbututu.

3 Nin’dzacosa mtongi* pakati pace

Ndipo nin’dzapha nduna zace zentse pabodzi na iye,” walewa tenepo Yahova.’

4 Yahova walewa kuti:

‘Pakuti Djuda wandiphonyera mwakubwereza-bwereza,* nin’dzabweza lini bzomwe ndikhafuna kumucitira;

Thangwe iwo adalamba lamulo la* Yahova

Ndipo alibe kuphatisisa mitemo yace,

Koma iwo adasoceresedwa ninga momwe makolo yawo yakale yadacitira.

5 Na tenepo, nin’dzatumiza moto pa Djuda,

Ndipo motoyo un’dzanyekesa nyumba za ntsanza zakulimba za Jeruzalemu.’

6 Yahova walewa kuti:

‘Pakuti Jirayeri wandiphonyera mwakubwereza-bwereza,* nin’dzabweza lini bzomwe ndikhafuna kumucitira,

Thangwe iwo ambagulisa munthu wakulungama na prata,*

Ndipo ambagulisambo munthu wakusauka na pare ibodzi ya ntsapato.

7 Iwo ambapondera-pondera pa pfumbi misolo ya anyakusauka

Ndipo ambafunga njira ya wanthu wakubzicepesa.

Pai na mwana wace wacimuna ambacita malume ya pamphasa na mtsikana m’bodzi,

Acipswipiza dzina langu lakucena.

8 Iwo ambatandika pafupi na maguwa yentse ya ntsembe bzakubvala bzomwe adaphatira wanthu omwe anawo mangawa,

Iwo ambagula vinyu na kobiri zomwe adapagalisi wanthu ndipo ambakamwera vinyuyo m’nyumba* ya mirungu yawo.’

9 ‘Tsono ndine omwe ndidapfudza Aamori pamaso pawo,

Omwe akhadatalimpha ninga miti ya mkungudza na wamphanvu ninga bzimiti bzikulu-bzikulu;

Ndidapfudza bzisapo bzace m’dzaulu na mizi yace pantsi.

10 Inepano ndidakucosani m’dziko la Edjipito,

Ndipo ndidakufambisani m’dambo kwa magole 40,

Kuti mukatenge dziko la Aamori.

11 Ndidacitisa winango mwa wana wanu wacimuna kukhala apolofeta

Na winango mwa maswaka yanu ninga Anaziri.

Kodi n’tenepo lini imwe Ajirayeri?’ walewa tenepo Yahova.

12 ‘Tsono imwepo mudapitiriza kupasa Anaziri vinyu kuti amwe,

Ndipo mudatonga kuna apolofeta kuti: “Lekani kulewa mapolofesiya.”

13 Tenepo nin’dzakuphwanyani pa mbuto pomwe mulipo,

Ninga momwe ngolo yakudzala na tirigu imbaphwanyira bzinthu bzomwe bziri pantsi.

14 Nyakuthamanga kwene-kwene an’dzasaya kwakuthawira,

Munthu wamphanvu, mphanvu zacezo zin’dzamala

Ndipo palibe mcikunda omwe an’dzapulumusa moyo wace.

15 Nyakuphatisa basa uta, an’dzakwanisa lini kubzikhotcerera,

Nyakuthamanga kwene-kwene an’dzakwanisa lini kuthawa,

Ndipo nyakupakira pa kavalo an’dzakwanisa lini kupulumusa moyo wace.

16 Napo mcikunda wakukhwimika kwene-kwene kuposa anzace

An’dzathawa ali pezi pa ntsiku imweyo,’ walewa tenepo Yahova.”

3 “Imwe Ajirayeri, bvani mafala ya Yahova yakulewa bza imwepo na yakulewa bza banja lentse lomwe ndidalicosa m’dziko la Edjipito yakuti:

2 ‘Pa mabanja yentse ya pa dziko la pantsi nimbadziwa imwepo mwekha.

Ndipopa nin’dzakupasani nyathwa thangwe ra bzakuphonya bzanu bzentse.

3 Kodi wanthu awiri ambafamba pabodzi pomwe akanati kupangana?

4 Kodi mphondolo imbalirima m’thengo pomwe ikanati kuphata nyama?

Kodi mphondolo yamphanvu imbalira pa mbuto yace yakubisalira pomwe ikanati kuphata cinthu ciri-centse?

5 Kodi munthu angaphate mbalame akasaya kuiteya?*

Kodi msampha umbalapuka pomwe ukanati kuphata cinthu ciri-centse?

6 Kodi nyanga ikalira mu mzinda, wanthu ambatetemera lini?

Tsoka likacitika mu mzinda, kodi ni Yahova lini omwe wacitisa?

7 Pakuti Yahova Mbuya Mkululetu an’dzacita lini cinthu ciri-centse

Akanati kuzimbula cintsintsi cace kwa atumiki wace apolofeta.

8 Mphondolo yalirima! Mbani an’dzabva lini mantha?

Yahova Mbuya Mkululetu walewalewa! Mbani an’dzalewa lini mapolofesiya?’

9 ‘Lewani ibzi pa nyumba za ntsanza zakulimba za Asidode

Na pa nyumba za ntsanza zakulimba za m’dziko la Edjipito.

Lewani kuti: “Tsonkhanani pabodzi kuti muphindukire mapiri ya ku Samariya;

Onani ciwowo comwe ciripo pakati pace

Na cinyengo comwe cikucitika pakati pace.

10 Pakuti ambadziwa lini kucita bzomwe mpsakulungama,

Iwo adzaza nyumba zawo za ntsanza zakulimba na bzinthu bzomwe adapamba mwaciwembo,”’ walewa tenepo Yahova.

11 Yahova Mbuya Mkululetu walewa kuti:

‘Nyamadulanthaka an’dzazungulira dzikoli,

Iye an’dzakucitisa kukhala wakusaya mphanvu

Ndipo an’dzapamba nyumba zako za ntsanza zakulimba.’

12 Yahova walewa kuti:

‘Ninga momwe makabusa ambapulumusira minyendo miwiri ayai mbali ya khutu la bira m’kamwa mwa mphondolo,

Umu ni momwe wana ang’ono-ng’ono wa Jirayeri an’dzapulumusidwira,

Wale omwe tsapano ali ku Samariya, omwe adakhala pa kama zabwino na pa mipando yakudeka.’*

13 Yahova Mbuya Mkululetu, Mulungu wa anyankhondo, akulewa kuti: ‘Tetekerani ndipo dziwisani nyumba ya Djakobo.’

14 ‘Pakuti pa ntsiku yomwe nin’dzalanga Ajirayeri thangwe ra bzicito bzawo bzentse bza kundiphindukira,*

Nin’dzalangambo maguwa ya ntsembe ya ku Beteli;

Ndipo nyanga za guwa la ntsembe zin’dzagwatidwa, zicigwa pantsi.

15 Nin’dzagwesa nyumba ya mu nthawe ya mphepo na ya m’cirimo.’

‘Nyumba zakudekesedwa na nyanga za nzou zin’dzapfudzidwa,

Ndipo nyumba zikulu zin’dzapfudzidwambo,’ walewa tenepo Yahova.”

4 “Bvani mafalaya, imwe ng’ombe zikazi za ku Basani,

Zomwe ziri m’phiri la Samariya,

Imwe akazi omwe mukucitira bzacinyengo wanthu wakunyozeka ndipo mukuponderera wanthu wakusauka,

Ndipo mukuuza azibayanu* kuti: ‘Tibweresereni bzakumwa kuti timwe!’

2 Yahova Mbuya Mkululetu walumbirira kucena kwace kuti:

‘“Onani! Zikufika ntsiku zomwe imwepo mun’dzanyamulidwa pa ngoloweko za munthu wakupha nyama

Ndipo anyakusala pakati panu an’dzanyamulidwa na medzo.

3 Imwepo mu’dzabula na m’mikhekhe* ya muro, ali-wentse pa mkhekhe omwe uli pafupi na iye;

Ndipo mun’dzathamangisidwa mucithawira ku Harimoni,” walewa tenepo Yahova.’

4 ‘Bwerani ku Beteli kuti mudzacite pikado,*

Ndipo bwerani ku Giligali kuti mudzathumizire kucita pikado!

Bweresani ntsembe zanu macibese,

Ndipo pa ntsiku yacitatu bweresani cakupereka canu cakhumi.

5 Tenthani pau yakukonzedwa na fermento ninga ntsembe yakutenda,

Dziwisani mwakukuwa bza ntsembe zanu zakucita kufuna!

Pakuti bzimwebzi ni bzomwe mumbafuna kucita, imwe wanthu wa mu Jirayeri,’ walewa tenepo Yahova Mbuya Mkululetu.

6 ‘Ndipo inepano ndiribe kukupasani cakudya* m’mizinda yanu yentse

Ndipo ndacitisa kuti musaye cakudya m’miyi yanu yentse;

Tsono imwepo mulibe kubwerera kwa ine,’ walewa tenepo Yahova.

7 ‘Ndipo ndidacitisambo kuti kuleke kubvumba pomwe kukhadasala minyezi mitatu kuti mubvune;

Ndikhabvumbisa nvula mzinda ubodzi, koma unango ndikhabvumbisa lini.

Nvula ikhabvumba m’munda ubodzi,

Tsono m’munda unango ikhabvumba lini ndipo ukhauma.

8 Wanthu wa m’mizinda miwiri ayai mitatu akhadzedzereka kuyenda mu mzinda unango kukamwa madzi,

Napo bziri tenepo, iwo akhakhondwa lini;

Tsono imwepo mulibe kubwerera kwa ine,’ walewa tenepo Yahova.

9 ‘Ndadzonga bzomwe mudabzala na mphepo yakupsa pabodzi na mkungwe.

Imwepo mukhathumizira madimba yanu na minda ya uva,

Tsono bziwala bzikhadzonga miti yanu ya nkhuyu na ya maolivera;

Napo bziri tenepo, imwepo mukhabwerera lini kwa ine,’ walewa tenepo Yahova.

10 ‘Ndidakutumizirani cisi ninga ca ku Edjipito.

Ndidapha maswaka yanu na xipada ndipo ndidakutengerani makavalo yanu.

Ndidacitisa kununkha kwa misasa yanu kufika m’mphuno mwanu;

Tsono imwepo mulibe kubwerera kwa ine,’ walewa tenepo Yahova.

11 ‘Ndidapfudza pakati panu

Ninga momwe ndidapfudzira Sodoma na Gomora.

Ndipo imwepo mukhali ninga citsiga comwe cafumulidwa pa moto;

Tsono imwepo mulibe kubwerera kwa ine,’ walewa tenepo Yahova.

12 Tenepo, bzimwebzi ni bzomwe nin’dzakucitira, iwe Jirayeri.

Pakuti nin’dzakucitira bzimwebzi,

Konzeka kuti ukagumane na Mulungu wako, iwe Jirayeri.

13 Pakuti ndiye omwe adakonza mapiri na mphepo;

Iye ambauza munthu makumbukidwe yace,

Iye ambacinja madandakweca kukhala usiku,

Ndipo ambaponda mbuto zapadzulu za pa dziko la pantsi;

Dzina lace ni Yahova, Mulungu wa anyankhondo.”

5 “Imwe wanthu wa m’nyumba ya Jirayeri, bvani mafala ya nyimbo yakulira yakulewa bza imwepo yakuti:

2 ‘Wagwa dende Jirayeri,

Iye an’kwanisa lini pomwe kulamuka.

Iye wathawidwa mu dziko lace;

Ndipo palibe omwe animulamusa.’

3 “Pakuti Yahova Mbuya Mkululetu walewa kuti:

‘Mzinda omwe ukuyenda kukamenya nkhondo na wanthu 1000, un’dzasala na wanthu 100;

Ndipo mzinda omwe ukuyenda kukamenya nkhondo na wanthu 100, un’dzasala na wanthu 10. Bzimwebzi bzin’dzacitikira wanthu wa m’nyumba ya Jirayeri.’

4 “Pakuti Yahova wauza nyumba ya Jirayeri kuti:

‘Yambani pomwe kundinamata kuti mupitirize kukhala na moyo.

5 Lekani kuyenda ku Beteli,

Ndipo lekani kuyenda ku Giligali ne ku Beeri-seba,

Pakuti mwakusaya kupenukira Giligali an’dzayendesedwa ku ukapolo,

Ndipo Beteli an’dzapfudzidwa.*

6 Yambani pomwe kunamata Yahova, kuti mupitirize kukhala na moyo,

Kuti iye aleke kupfudza mbadwa za Zuze ninga momwe moto umbacitira,

Na kupfudzambo Beteli mwakuti palibe omwe angauthimise motoyo.

7 Imwepo mwacitisa cirungamo kukhala cinthu cakuwawa,

Ndipo mwathusira pantsi cirungamo.

8 Ule omwe adalenga nyenyezi za Kima na nyenyezi za Kesili,*

Ule omwe ambasandusa mdima wamphanvu kukhala macibese,

Ule omwe ambasandusa masikati kukhala mdima ninga usiku,

Ule omwe ambacemera madzi ya m’nyanza

Kuti ayathululire pa mataka ya pa dziko la pantsi,

Dzina lace ni Yahova.

9 Iye an’dzacitisa wanthu wamphanvu kupfudzidwa mwakusaya kudikhiririka,

Ndipo an’dzacitisa kuti mbuto zakukhotcerereka zipfudzidwe.

10 Iwo ambawenga wale omwe ambatsimula pa cipata ca mzinda,

Ndipo ambanyantsidwa na wale omwe ambalewa cadidi.

11 Pakuti imwepo mumbauza munthu wakusauka kuti apagali bzinthu bza m’munda,*

Ndipo mumbamucitisa kuti akupaseni bzinthu bza m’mundabzo ninga mtsonkho,

Imwepo mun’dzapitiriza lini kukhala m’nyumba zomwe mudamanga na minyala yakucita kusema

Ndipo ne mun’dzamwa lini vinyu yakucokera m’minda yanu ya uva yomwe mudacita kubzala.

12 Pakuti ndikudziwa kuti n’kangasi komwe imwepo mwandipandukira,*

Ndipo ndikudziwambo kukula kwa pikado zanu.

Imwepo mumbaboneresa munthu wakulungama,

Mumbabvuma bobobo*

Ndipo mumbalamba ugo bwa munthu wakusauka pa cipata ca mzinda.

13 Tenepo, wale omwe mbakuzindikira an’dzapitiriza kukhala adanyamala pa nthawe imweyo,

Pakuti in’dzakhala nthawe ya tsoka.

14 Lingani kucita bzabwino sikuti bzakuipa,

Kuti mupitirize kukhala na moyo.

Ndipo Yahova Mulungu wa anyankhondo akhale namwe,

Ninga momwe mumbalewera kuti iye anamwe.

15 Wengani comwe n’cakuipa ndipo funani comwe n’cabwino,

Bvumani kuti cirungamo cipitirize kukhala pa cipata ca mzinda.

Pinango Yahova Mulungu wa anyankhondo

An’dzadekera mtima anyakusala wa Zuze.’

16 “Tenepo, Yahova Mulungu wa anyankhondo, Yahova, walewa kuti:

‘Pan’dzabveka kulira m’misika yentse

Ndipo m’miseu yentse wanthu an’dzalewa kuti, “Mai ine, Mai ine!”

An’dzacemera alimi kuti adzalire

Ndipo an’dzacemerambo anyakudziwa kulira kuti adzalire kwene-kwene.’

17 ‘Mun’dzabveka kulira m’minda yentse ya uva;

Pakuti nin’dzapita na pakati panu,’ walewa tenepo Yahova.

18 ‘Tsoka kwa wale omwe akufunisisa ntsiku ya Yahova!

Kodi ntsiku ya Yahova in’dzathandauza ciyani kwa imwepo?

Iyo in’dzakhala ntsiku ya mdima sikuti ya ceza.

19 In’dzakhala ninga munthu omwe pakuthawa mphondolo, akugumana na urso,*

Ndipo pomwe wapita m’nyumba aciphata parede, nyoka ikumuluma.

20 Ntsiku ya Yahova in’dzakhala ya mdima sikuti ya ceza;

Ndipo in’dzakhala ya mdima wamphanvu sikuti ya ceza.

21 Inepano nimbawenga na kulamba maphwando yanu,

Ndipo nimbakomedwa lini na mnuntci wa ntsembe zanu zomwe mumbazipereka pa mitsonkhano yanu yakupambulika.

22 Napo imwepo mucipereka ntsembe zanu zakucita kutentha na ntsembe zakuperekedwa ninga mphaso,

Inepano nin’dzakomedwa lini nazo,

Ndipo nin’dzakomedwambo lini na ntsembe zanu za mtendere za bzifuwo bzakunenepa.

23 Siyani kuimba nyimbo zanu za baludya;

Ndipo ndikufuna lini kubva nyimbo zanu zakuimbidwa na bzakuimbira bza bzingwe.

24 Lekani kuti cirungamo ciyerere ninga madzi,

Ndipo ciyererembo ninga mkulo omwe umbaphwa lini nthawe zentse.

25 Imwe wanthu wa nyumba ya Jirayeri

Kodi imwepo mudandipasa ntsembe pomwe mukhali m’dambo kwa magole 40?

26 Tsono imwepo mun’dzanyamula mambo wanu Sakuti na Kaiwani,*

Bzifanikiso bzomwe mudakonza bza nyenyezi ya mulungu wanu.

27 Ndipo nin’dzakutumizani ku ukapolo kutali na ku Damasko,’ walewa tenepo ule omwe dzina lace ni Yahova, Mulungu wa anyankhondo.”

6 “Tsoka kwa wanthu wakubzithemba* wa mu Ziyoni,

Kwa wale omwe akubzibva kuti mbakukhotcerereka m’phiri la Samariya,

Wanthu wakubvekera wa mu mtundu omwe ngwakufunika pakati pa mitundu inango,

Wale omwe nyumba ya Jirayeri imbawathemba!

2 Ndokoni ku Kaline mukawone,

Mukacoka kumweko, muyende ku Hamate mzinda ukulu,

Ndipo mukamala mupolikire ku Gati wa Afilisteu.

Kodi mizindayi njakufunika kuposa maumambo mawiriya?*

Ayai kodi mphimpha zawo n’zikulu kuposa zanu?

3 Kodi imwepo mwasiya kukumbukira ntsiku ya tsoka

Mucibweresa umambo* bwaciwembo?

4 Iwo ambagona pa kama ya nyanga za nzou ndipo ambakhala m’mipando yakudeka,

Iwo ambadya wana wa mabira na mphulu zakunenepa;*

5 Iwo akukonza nyimbo zakuimbidwa na bzakuimbira bza bzingwe,

Ndipo ninga Davide, iwo ambakonza bzakuimbira nyimbo;

6 Iwo ambamwera vinyu m’makopo makulu-makulu

Ndipo ambadzola mafuta yabwino kwene-kwene.

Tsono iwo alibe kukumbukira kupfudzidwa kwa wanthu wa m’nyumba ya Zuze.

7 Tenepo, iwo an’dzakhala wakuyambirira kuyendesedwa ku ukapolo,

Ndipo maphwando ya baludya ya wale omwe ambakhala m’mipando yakudeka yan’dzafika kuphampha.

8 ‘Yahova Mbuya Mkululetu walumbirira dzina lace,’ walewa tenepo Yahova Mulungu wa anyankhondo,

‘“Nimbawenga kubzikuza kwa Djakobo,

Nimbawenga nyumba zace za ntsanza zakulimba,

Ndipo nin’dzapereka mzindayo pabodzi na bzentse bzomwe bziri m’mwemo kwa anyamadulanthaka wace.

9 “‘“Penu m’nyumba ibodzi mun’dzasala wanthu 10, iwo an’dzafambo. 10 M’bale wawo* an’dzabwera ndipo an’dzawacosa panja, aciwatentha m’bodzi na m’bodzi. Iye an’dzacosera kunja kwa nyumba mafupa yawo. Tenepo, iye an’dzabvunza omwe an’dzakhala akalipo m’cipinda ca mkati ca nyumbayo kuti: ‘Kodi mwasala munthu ali-wentse m’mwemo?’ Ndipo omwe ali m’cipindayo an’dzatawira kuti: ‘Ne, mulibe!’ Patsogolo pace iye an’dzamuuza kuti: ‘Nyamala! Pakuti ino ni nthawe lini yakuguma dzina la Yahova.’”

11 Pakuti Yahova wapereka lamulo,

Ndipo iye an’dzapfudza nyumba ikulu icikhala bzimabuma,

Ndipo nyumba ing’ono icikhala bzimataka.

12 Kodi makavalo yangathamange pa tsendwa,

Ayai kodi munthu angalime pa mwala na ng’ombe?

Pakuti imwepo mwasandusa cirungamo kukhala muti wa veneno,*

Ndipo cisapo ca cirungamo mwacisandusa kukhala msapani.*

13 Imwepo mumbakondwa na cinthu cakusaya basa,

Ndipo mumbati: “Kodi ifepano tiribe kukunda* na mphanvu zathu?”

14 Na tenepo, imwe wanthu wa m’nyumba ya Jirayeri, nin’dzabweresa mtundu wa wanthu winango kuti udzakubonereseni,’ walewa tenepo Yahova Mulungu wa anyankhondo,

‘Ndipo iwo an’dzakupondererani kucokera ku Lebo-Hamate* mpaka ku cigwa* ca Araba.’”

7 Yahova Mbuya Mkululetu adandiwonesa masomphenya aya: Iye adatumiza dzombe pa nthawe yomwe mbeu zakumalizira* zikhayamba kukula. Imweyi ikhali nthawe yakubzala mbeu zakumalizira, pomwe wanthu akhadamala kumweta upswa bwakuyenda kwa mambo. 2 Pomwe dzombero lidamala kudya bzakumera bza pa dziko la pantsi, ine ndidati: “Imwe Yahova Mbuya Mkululetu, ndaphata minyendo, alekerereni! Kodi Djakobo angapulumuke* tani? Pakuti iye ngwakutepa!”

3 Tenepo, Yahova adacinja makumbukidwe yace.* Ndipo Yahova adati: “Bzomwe wawonabzi bzin’dzacitika lini.”

4 Yahova Mbuya Mkululetu adandiwonesa masomphenya aya: Yahova Mbuya Mkululetu walewa kuti pakhale na cirango ca moto. Moto udatentha mpaka nyanza yakuzika kuuma ndipo udatenthambo mbali ibodzi ya dziko. 5 Tenepo ine ndidati: “Imwe Yahova Mbuya Mkululetu, ndaphata minyendo, lekani kucita bzimwebzi. Kodi Djakobo angapulumuke* tani? Pakuti iye ngwakutepa!”

6 Tenepo, Yahova adacinja makumbukidwe yace.* Ndipo Yahova Mbuya Mkululetu adati: “Bzomwe wawonabzi bzin’dzacitikambo lini.”

7 Iye adandiwonesa masomphenya aya: Ndidawona Yahova adaima padzulu pa muro wakukonzedwa na cingwe cakupimira, ndipo m’manja mwace mukhana cingwe cakupimiraco. 8 Tenepo Yahova adandibvunza kuti: “Amose, n’ciyani comwe iwepo ukuwona?” Ine ndidatawira kuti: “Ndikuwona cingwe cakupimira.” Ndipo Yahova adati: “Ndikuikha cingwe cakupimiraci pakati pa wanthu wangu Ajirayeri. Inepano nin’dzawalekerera lini pomwe. 9 Mbuto zapadzulu za Izaki zin’dzakhala matere ndipo mbuto zakucena za Jirayeri zin’dzapfudzidwa; ndipo nin’dzabwera ndicilanga nyumba ya Jerobowamu na xipada.”

10 Amaziya wantsembe wa ku Beteli, adatumiza mafala kwa Jerobowamu mambo wa Jirayeri yakuti: “Amose akukukonzerani ciwembo mkati caimo mwa nyumba ya Jirayeri ndipo dzikoli laneta na mafala yace yentse. 11 Amose walewa kuti: ‘Jerobowamu an’dzaphedwa na xipada ndipo mwakusaya kupenukira, Jirayeri an’dzatengedwa m’dziko lace aciyendesedwa ku ukapolo.’”

12 Tenepo Amaziya adauza Amose kuti: “Iwe nyakuwona masomphenya, coka kuno, thawira ku dziko la Djuda, ukadye pau yako kumweko ucimbakalewa mapolofesiya kumweko. 13 Tsono iwepo leka kulewa pomwe mapolofesiya ku Beteli kuno, pakuti ni mbuto yakucena ya mambo na nyumba ya umambo.”

14 Tenepo Amose adatawira Amaziya kuti: “Inepano ndikhali lini mpolofeta ne mwana wa mpolofeta; inepano ndikhali makabusa ndipo ndikhasamalira miti ya nkhuyu.* 15 Tsono Yahova adandicemera kuti ndisiye kuusa thimu la mabira ndipo Yahova adandiuza kuti: ‘Ndoko ukalewe mapolofesiya kwa wanthu wangu Ajirayeri.’ 16 Tsapano tetekera fala la Yahova: ‘Iwepo ukundiuza kuti: “Leka kulewa mapolofesiya pakulewa bza Jirayeri ndipo leka kupalizira pakulewa bza nyumba ya Izaki.” 17 Tenepo Yahova akulewa kuti: “Mkazi wako an’dzakhala puta mu mzinda ndipo wana wako wacimuna na wana wako wacikazi an’dzaphedwa na xipada. Dziko lako lin’dzagawidwa na cingwe cakupimira ndipo iwepo un’dzafera m’dziko lakupswipa, ndipo mwakusaya kupenukira, Jirayeri an’dzatengedwa m’dziko lace aciyendesedwa ku ukapolo.”’”

8 Yahova Mbuya Mkululetu adandiwonesa masomphenya aya: Ndidawona citundu* ca bzisapo bza m’cirimo. 2 Tenepo iye adandibvunza kuti: “Amose, kodi iwepo ukuwona ciyani?” Ine ndidatawira kuti: “Ndikuwona citundu ca bzisapo bza m’cirimo.” Na tenepo Yahova adandiuza kuti: “Yafika ntsiku yakuti wanthu wangu Ajirayeri apasidwe nyathwa ndipo nin’dzawalekerera lini pomwe. 3 ‘Pa ntsiku imweyo, nyimbo za mu templo zin’dzasanduka kulira,’ walewa tenepo Yahova Mbuya Mkululetu. ‘Mbuto iri-yentse in’dzakhala na mitembo ndipo kun’dzandoti zii!’

4 Bvani imwe, wanthu omwe mukupenyerera munthu wakusauka

Ndipo mukupfudza wanthu wakubzicepesa wa pa dziko la pantsi,

5 Omwe mukulewa kuti: ‘Kodi ni lini pomwe phwando lakusekerera mwezi upsa lin’dzamala kuti tigulise bzinthu bzathu bza m’munda,

Na pomwe ntsiku ya Sabudu in’dzamala kuti tigulise bzinthu bzathu bza m’mundabzo?

Kuti ticepese mphimo ya efa*

Nakuti tithumizire kulemera kwa siklo,*

Ticicinja balantsa yathu kuti tibere anyakugula;

6 Kuti tigule munthu wakusauka na prata,*

Na kugula munthu wakusauka na pare ibodzi ya ntsapato,

Nakuti tigulise bzinthu bza m’munda bzakusaya basa.’

7 Yahova omwe ni Ulemerero bwa Djakobo wabzilumbirira yekha kuti:

‘Nin’dzayebwa lini bzentse bzomwe iwo adacita.

8 Thangwe ra bzimwebzi, dzikoli lin’dzatetemera,

Ndipo munthu ali-wentse wakukhala m’mwemo an’dzalira.

Kodi dziko lentse lin’dzadzala lini ninga mkulo wa Nilo?

Kodi lin’dzawinduka-winduka lini* ninga Nilo wa ku Edjipito?’

9 Yahova Mbuya Mkululetu walewa kuti:

‘Pa ntsiku imweyo, nin’dzacitisa kuti dzuwa limire masikati,

Ndipo nin’dzacitisambo kuti dziko likhale mdima pomwe dzuwa liri ngende.

10 Maphwando yanu nin’dzayasandusa kulira

Ndipo nyimbo zanu zentse nin’dzazisandusa nyimbo za nkhawa,

Nin’dzacitisa wentse kuti abvale magundiri m’ciuno mwawo ndipo misolo yawo yentse in’dzasengedwa mipala;

Nin’dzacitisa kuti mulire ninga kuti mwasaikidwa mwana wanu m’bodzi yekhayo wacimuna

Ndipo ntsiku yomwe bzimwebzi bzin’dzamala in’dzakhala yakuwawa.’

11 Yahova Mbuya Mkululetu walewa kuti:

‘Onani, zin’dzafika ntsiku zomwe nin’dzabweresa njala pa dzikoli,

Sikuti njala ya cakudya ne nyota ya madzi,

Koma yakubva mafala ya Yahova.

12 Iwo an’dzadzedzereka kucokera ku nyanza mpaka ku nyanza

Na ku norte* mpaka kumabvadzuwa.*

Ndipo an’dzapitiriza kunyang’ana fala la Yahova mbuto iri-yentse, tsono an’dzaligumana lini.

13 Pa ntsiku imweyo, madende yakudeka yan’dzakomoka,

Ndipo maswaka yan’dzakomokambo thangwe ra nyota;

14 Wale omwe ambalumbirira pikado ya Samariya mwakulewa kuti:

“Pana Mulungu wako wamoyo, iwe Dani!”

Ndipo ambalewambo kuti: “Tikulumbirira njira ya ku Beeri-seba!”

Iwo an’dzagwa ndipo an’dzalamuka lini pomwe.’”

9 Ndidawona Yahova adaima padzaulu pa guwa la ntsembe ndipo iye adati: “Menya padzaulu pa pilare ndipo tsinde lace lin’dzatekenyeka. Agwate padzaulu ndipo anyakusala wa wanthuwo inepano nin’dzawapha na xipada. Palibe omwe an’dzakwanisa kuthawa ndipo palibe ne na m’bodziyo omwe an’dzakwanisa kupulumuka.

2 Iwo akacera mpaka ku Thenje,*

Kumweko nin’dzawacosa na boko langu;

Napo acikwira kudzulu,

Kumweko inepano ninkawabulusa.

3 Napo iwo acibzibisa padzulu pa phiri la Karmelo,

Inepano nin’dzawanyang’ana kumweko ndipo nin’dzawagumana ndiciwaphata.

Iwo acibisalika pantsi pa nyanza,

Kumweko nin’dzatuma nyoka kuti ziwalume.

4 Napo akatengedwa na anyamadulanthaka wawo aciyendesedwa ku ukapolo,

Kumweko nin’dzatuma xipada ndipo iyo in’dzawapha;

Inepano nin’dzawabweresera* bzakuipa sikuti bzabwino.

5 Pakuti Yahova wa anyankhondo, Mbuya Mkululetu, Ngule omwe ambakhuya dzikoli,

Mwakuti iro limbasungunuka ndipo wanthu wentse wakukhala m’mwemo an’dzalira;

Iro lin’dzadzala ninga mkulo wa Nilo,

Ndipo lin’dzapunguzika ninga Nilo wa ku Edjipito.

6 ‘Ule omwe ambakonza ntsikada kudzulu

Ndipo ambaikha ntsodzi yace padzaulu pa dziko;

Ule omwe ambacemera madzi ya m’nyanza,

Kuti ayathululire pa mataka ya pa dziko la pantsi,

Dzina lace ni Yahova.’

7 Yahova walewa kuti: ‘Imwe Ajirayeri, kodi imwepo muli lini ninga wana wacimuna wa Kuxe kwa ine?

Kodi inepano ndiribe kucosa Ajirayeri m’dziko la Edjipito?

Kodi ndiribe kucosambo Afilisteu ku Kreta na Asiriya ku Kiri?’

8 ‘Onani! Maso ya Yahova Mbuya Mkululetu yali pa umambo bwa anyapikado,

Ndipo iye an’dzabupfudza pa dziko la pantsi.

Tsono nyumba ya Djakobo nin’dzaipfudza lini yentse,’ walewa tenepo Yahova.

9 ‘Pakuti onani, inepano ndikupereka lamulo,

Ndipo nin’dzatekenyesa nyumba ya Jirayeri pakati pa mitundu yentse,

Ninga momwe munthu ambacitira pa kupepeta,

Ndipo palibe ne kamwala kabodzi komwe kambacoka m’cisero kacigwa pantsi.

10 Wanthu wangu wentse wapikado an’dzafa na xipada,

Wale omwe ambalewa kuti: “Tsoka lin’dzatifikira lini pafupi ne kutigwera.”’

11 ‘Pa ntsiku imweyo nin’dzamusa nyumba ya* Davide yomwe yagwa,

Nin’dzakonzesa mbuto zakudzongeka,*

Ndipo nin’dzabwezeresa matere yace;

Nin’dzaimanga pomwe kuti ikhale ninga momwe ikhaliri kale-kale,

12 Kuti iwo atenge bzakusala bza Edomu,

Na bza mitundu yentse yomwe ikhacemeredwa na dzina langu,’ walewa tenepo Yahova ule omwe akucita bzimwebzi.

13 Yahova walewa kuti: ‘Onani, zikufika ntsiku,

Pomwe nthawe yakubvuna inati kufika, in’dzafika nthawe yakulima,

Ndipo pomwe ikanati kufika nthawe ya kuponda-ponda* uva, in’dzafika nthawe ya kubzala;

Vinyu yakutapira in’dzagoga m’mapiri,

Ndipo in’dzayerera m’mapiri yentse mang’ono-mang’ono.*

14 Nin’dzabweresa wanthu wangu Ajirayeri kucokera ku ukapolo,

Ndipo iwo an’dzamanga pomwe mizinda yomwe ikhadasiyidwa acikhala m’mwemo;

Iwo an’dzalima minda ya uva acimwa vinyu yace,

Ndipo an’dzalima minda ya bzisapo acidya bzisapo bzace.’

15 ‘Nin’dzawabzala m’dziko lawo,

Ndipo iwo an’dzazulidwa lini pomwe

Mu dziko lomwe ndawapasa,’ walewa tenepo Yahova Mulungu wanu.”

Kuthandauza “Kukhala Mtolo” ayai “Kutakula Mtolo.”

Ayai, “wandicitira ciwembo.”