DJONA
1 Yahova adauza Djona* mwana wa Amitai kuti: 2 “Lamuka, ndoko ku Ninive, mzinda ukulu ndipo ukalewe bza kupfudzidwa kwa mzindayo, pakuti ine ndawona bzakuipa bzomwe akucita.”
3 Tsono Djona adathawa Yahova aciyenda ku Tarisi. Iye adapolikira ku Jope ndipo kumweko adagumana naviyo* yomwe ikhayenda ku Tarisi. Iye adapagali ulendobo, acipakira naviyoyo pabodzi na wanthuwo kuti ayende ku Tarisi, pakuthawa Yahova.
4 Tsono Yahova adabweresa conzi camphanvu m’nyanza, ndipo conzico cikhali camphanvu mwakuti naviyoyo ikhadasala pang’ono kulubzika. 5 Amalinyero adabva mantha kwene-kwene, mwakuti ali-wentse adayamba kukumbira thandizo kwa mulungu wace ndipo iwo adayamba kuthusira m’nyanza mitolo yomwe ikhali m’naviyomo kuti naviyoyo ilulidwe. Tsono Djona akhadayenda ku cipinda ca pantsi ca mu naviyoyo, komwe adakagona tulo twamphanvu. 6 Nyakutsogolera naviyoyo adafika pomwe pakhana Djona acimubvunza kuti “Thangwe ranyi iwepo ukugona? Lamuka, cemera mulungu wako. Pinango Mulungu wacadidi an’tibvera ntsisi ndipo ifepano tinifa lini.”
7 Tenepo, iwo adauzana kuti: “Bwerani ticite vima-vima kuti tiwone mbani omwe akucitisa kuti tsokali litigwere.” Na tenepo iwo adacitadi vima-vimayo, ndipo vima-vimayo adagwera Djona. 8 Tenepo iwo adamubvunza kuti: “Taphata minyendo, tiuze, kodi ndiwepo omwe ukucitisa kuti tsokali litigwere? Umbaphata basa lanyi, ndipo wacokera kuponi? Kodi ndiwe wa dziko liponi na wa dzinza liponi?”
9 Tsono iye adawatawira kuti: “Ndine Mhebereu ndipo nimbanamata Yahova Mulungu wa kudzulu, omwe adakonza nyanza na dziko la pantsi.”
10 Na bzimwebzi, amunawo adabva mantha kwene-kwene thangwe iye akhadawauza kuti akhathawa Yahova. Tenepo iwo adamubvunza kuti: “Kodi iwepo wacitanyi.” 11 Pakuti conzi camphanvu cire cikhayenda cicithumizirika, amunawo adamubvunza kuti: “Kodi ticite nawe ciyani kuti nyanzayi iderekhe?” 12 Iye adawatawira kuti: “Ndiphateni mucindithusa m’nyanzamu ndipo nyanzayi in’derekha, thangwe ndikudziwa kuti cimphepoci cabwera thangwe ra inepano.” 13 Tsono amunawo adacapa na mphanvu* kuti ayendese naviyoyo pa mbuto yakuuma, koma alibe kukwanisa thangwe conzico cikhayenda cicithumizikiratu.
14 Na bzimwebzi, iwo adadandaulira Yahova kuti: “Imwe Yahova, taphata minyendo, lekani kutilekerera kuti tife thangwe ra munthuyu.* Lekani kutipasa mulandu wakupha munthu wakusaya mulanduyu pakuti imwepo mwacita bzinthu mwakubverana na kufuna kwanu, imwe Yahova.” 15 Tenepo iwo adaphata Djona acimuthusa m’nyanza ndipo nyanzayo idaderekha. 16 Na bzimwebzi amunawo adayamba kulemekeza kwene-kwene Yahova, ndipo adapereka ntsembe kwa Yahova na kucita malumbiro.
17 Yahova adatumiza cintsomba cikulu kuti cikakhudyule Djona, mwakuti Djonayo adakhala m’mimba mwa cintsombaco ntsiku zitatu, usiku na masikati.
2 Tenepo Djona adapemba kwa Yahova Mulungu wace pomwe akhali m’mimba mwa cintsomba 2 aciti:
“Pa matsautso yangu ndidacemera Yahova, ndipo iye adanditawira.
Pomwe ndikhali mu thenje* lakuzika* ndidalilira thandizo,
Imwepo mudabva mafala yangu.
3 Pomwe mudandithusa pa mbuto yakuzika, pantsi caipo pa nyanza,
Madzi yamphanvu yadandimiza
Mabimbi yanu yentse yamphanvu yadandimpsinkha.
4 Ndipo ine ndidati: ‘Ndathamangisidwa pamaso panu,
Kodi nin’dzakwanisa kunyang’anisa pomwe templo yanu yakucena?’
5 Madzi yadandimiza mwakuti ndikhadasala pang’ono kufa
Madzi yakuzika yadandizungulira
Bzinthu bzakumera bza m’nyanza bzikhadazengedera* msolo wangu.
6 Ndidamira mpaka kufika pantsi pa mapiri
Bzakufungira bza dziko bzidandifungira mpaka kale-kale.
Tsono imwe Yahova Mulungu wangu mudandicosa m’dindi na moyo.
7 Pomwe ndikhadasala pang’ono kufa, Yahova ndiye omwe ndidamukumbukira
Tenepo mpembo wangu udafika kwa imwepo mu templo yanu yakucena.
8 Wale omwe ambanamata bzifanikiso bzapezi-pezi, ambasiya Mulungu omwe ngwakukhulupirika pakuwalatiza lufoyi lace.
9 Tsono inepano nin’dzakutendani na kupereka ntsembe kwa imwepo,
Bzomwe ndalumbira nin’dzateweza.
Cipulumuso cimbacokera kwa Yahova.
10 Tenepo Yahova adatonga cintsombaco kuti cikasanze Djona kunja.
3 Yahova adalewalewa na Djona kaciwiri kuti: 2 “Lamuka, ndoko ku Ninive mzinda ukulu ndipo ukalewe mafala yomwe nin’kuuza.”
3 Tenepo, Djona adabvera mafala ya Yahova ndipo adayendadi ku Niniveko. Ninive ukhali mzinda ukulu kwene-kwene,* ndipo munthu angadamala ntsiku zitatu kuti afambe mzinda wentseneyo. 4 Patsogolo pace, Djona adapita mu mzindamo ndipo adafamba mtantho wa ntsiku ibodzi acimbalewa kuti: “Zandosala ntsiku 40 kuti Ninive apfudzidwe.”
5 Ndipo wanthu wentse wa ku Ninive kuyambira mkulu mpaka mwana adakhulupira Mulungu, ndipo iwo adauzana kuti abzimane kudya* na kubvala magundiri. 6 Pomwe mambo wa ku Ninive adauzidwa mafala ya Djona, iye adamuka pa mpando wace wa umambo, ndipo adakhundula cakubvala cace ca umambo acibvala magundiri ndipo adakakhala pa dotha. 7 Kuthumizira bzimwebzi, iye adadziwisa wanthu wentse wa ku Ninive kuti:
“Mambo na wanthu wace wakulemekezeka atonga kuti paleke kugumanika munthu ne cirombo, ng’ombe ayai mabira omwe anidya cinthu ciri-centse. Munthu ali-wentse ayai cifuwo aleke kudya ne kumwa madzi. 8 Munthu ali-wentse na bzifuwo abvale magundiri ndipo akuwire Mulungu na mtima wentse, ndipo asiye bzakuipa na ciwembo comwe akhacita. 9 Mbani an’dziwa? Pinango Mulungu wacadidi angabweze ukali bwace bukulu, acicinja nzeru pa bzomwe akhafuna, kuti tileke kupfudzidwa.”
10 Pomwe Mulungu wacadidi adawona bzomwe iwo akhadacita, kuti akhadasiya bzicito bzawo bzakuipa, iye adacinja nzeru zace ndipo alibe kuwabweresera tsoka lomwe akhadalewa kuti angadawabweresera.
4 Tsono bzimwebzi bzidamuipira kwene-kwene Djona ndipo iye adakalipa kwene-kwene. 2 Tenepo, iye adapemba kwa Yahova aciti: “Imwe Yahova, mpsimwebziletu bzomwe ndikhakumbuka pomwe ndikhali kumui, ndipopa pa ulendo bwakuyamba bule inepano ndidayeza kuthawira ku Tarisi, thangwe ndikhadziwa kuti imwepo ndimwe Mulungu wantsisi na wakudeka mtima, wakusaya kukalipa kamangu, wa lufoyi likulu lacadidi* nakuti ndimwe wakukonzeka kucinja nzeru mucileka kubweresa cirango comwe mukhafuna kubweresera wanthu. 3 Tsapano, imwe Yahova, ndaphata minyendo, ndilekeni ndife, thangwe kwa ine bziri bwino kufa kuposa kukhala na moyo.”
4 Tsono Yahova adamubvunza kuti: “Kodi iwepo ukuwona kuti pana thangwe lakubveka lakuti ukalipe?”
5 Tenepo Djona adacoka mu mzindamo ndipo adakakhala kumbali ya kumabvadzuwa kwa mzindayo, ndipo iye adakonza gota, acikhala pa mthunzi pace kuti awone bzomwe bzingadacitikira mzindayo. 6 Tsono Yahova Mulungu adameresa kamuti ninga ka mphonda,* kaciyanga pomwe Djona akhadakhalapo kuti kamucitire mthunzi. Iye adacita bzimwebzi kuti acepese kutsautsika kwace, ndipo Djona adakomedwa kwene-kwene na kamuti komwe kadamerako.
7 Tsono mangwana yace pomwe kukhacena, Mulungu wacadidi adacitisa kuti cikonye cidye kamutiko ndipo kadauma. 8 Pomwe dzuwa lidacoka, Mulungu adabweresambo mphepo yakupsa kucokera kumabvadzuwa ndipo Djona adapsa na dzuwa mwakuti akhadasala pang’ono kukomoka, ndipo iye akhakumbira kufa acimbalewa kuti: “Kwa ine bziri bwino kufa kuposa kukhala na moyo.”
9 Na tenepo, Mulungu adabvunza Djona kuti: “Kodi ukuwona kuti mpsakuthemera iwepo kukalipa kwene-kwene thangwe ra kamuti ka mphondaka?”
Djona adatawira kuti: “Inde, ndinalo thangwe lakukalipira, lakukalipa kwene-kwene mwakuti nin’funa kufa.” 10 Tsono Yahova adamuuza kuti: “Iwepo ukubvera ntsisi kamuti ka mphonda komwe ulibe kukabzala ne kukakulisa, komwe kandokula usiku bubodzi, kacifa usiku bwa mangwana yace. 11 Kodi inepano nin’funikambo lini kubvera ntsisi Ninive mzinda ukulu, omwe una wanthu wakupitirira 120 000, omwe ne ambadziwa lini kusiyanisa cabwino na cakuipa pabodzi na bzifuwo bzawo bzizinji?”
Kuthandauza “Nkhangaiwa.”
Ayai, “xitima ya m’madzi.”
Ayai, “adacita nyongo kuti ayambuke na conzico.”
Ayai, “moyo wa munthuyu.”
Ayai, “Seoli,” lomwe ni thenje la wanthu wentse. Onani Kafotokozedwe ka Mafala Manango.
Mafala yace caiyo: “m’mimba.”
Ayai, “bzazvengezera;” “bzatsengedera.”
Mafala yace caiyo: “mzinda ukulu kuna Mulungu.”
Ayai, “acite jejum.”
Ayai, “wakukhulupirika pa kulatiza lufoyi.”
Ayai pinango, “kamuti ka ntsatsi.”