NAHUMU
1 Mafala yakulewa bzomwe bzin’dzacitikira Ninive: Bukhuli likulewa bza masomphenya ya Nahumu* wa ku Elikosi:
2 Yahova ni Mulungu omwe ambafuna kunamatidwa iye yekha basi ndipo ambabwezera wanthu wakuipa;
Yahova ambabwezera ndipo ngwakukonzeka kulatiza ukali bwace.
Yahova ambabwezera wanthu omwe ambamuwenga,
Ukali bwace iye ambakoyera anyamadulanthaka wace.
3 Yahova ngwakupirira* ndipo ngwamphanvu kwene-kwene,
Tsono Yahova cipo acidzasiya kupereka cirango cakuthemera.
Iye ambaphatisa basa conzi cakudzonga na cimphepo camphanvu,
Ndipo mitambo iri ninga mpfumbi ku minyendo yace.
4 Iye ambatsimula nyanza aciiumisa
Ndipo ambaumisa mikulo yentse.
Basani na Karmelo akufota,
Ndipo maluwa ya ku Lebanoni yakufotambo.
5 Mapiri yambatekenyeka thangwe ra iye,
Ndipo tumapiri tumbasungunuka.
Dziko lin’dzatetemera pamaso pace,
Dziko na wentse omwe ambakhala m’mwemo.
6 Iye akakalipa mbani angaime pa maso pace?
Mbani angapitirize kuima pomwe iye akulatiza ukali bwace bukulu?
Ukali bwace bun’dzathululidwa ninga moto,
Ndipo minyala in’dzabaduka-baduka thangwe ra iye.
7 Yahova ngwabwino ndipo ni mbuto yakukhotcerereka pa ntsiku ya tsoka.
Iye ambakumbukira* wale omwe ambathawira kwa iye.
8 Iye an’dzapfudziratu mzindayo* na madzi yakudzala,
Ndipo anyamadulanthaka wace an’dzakhala mu mdima.
9 Kodi pana bzomwe mungacite kuti mukwanise kunesana na Yahova?
Iye an’dzakupfudzani mucimaliratu.
Iye an’dzabweresa lini pomwe tsokalo kaciwiri.
10 Napo wanthu wa ku Ninive ali ninga litsito la minga,
Ndipo iwo ali ninga wale omwe aledzera na bzakumwa bzakuledzeresa;*
Tsono iwo an’dzapsa na moto ninga mapesi yakuuma.
11 Mwa iwe mun’dzacoka munthu wakufuna kucitira bzakuipa Yahova,
Ndipo an’dzapereka malango yakusaya basa.
12 Yahova walewa kuti:
“Napo iwo akhana mphanvu nakuti akhalipo azinji,
Iwo an’dzagwatidwa acifa.*
Inepano nin’dzakulanga* tsono nin’dzakulanga lini pomwe kaciwiri.
13 Ndipo tsapano nin’dzatcola djoki lomwe adakumangirira nalo ndicilicosa kwa iwepo,
Ndipo nin’dzagwata pakati bzingwe bzomwe adakumangira nabzo.
14 Pakulewa bza iwepo* Yahova watonga kuti:
‘Palibe wana wakucokera kwa iwepo omwe an’dzadziwika na dzina lako.
Nin’dzapfudza bzifanikiso bzakusema na bzifanikiso bza simbi* bzomwe bziri m’nyumba* ya mirungu yako.
Nin’dzakukonzera thenje thangwe ndiwe wakunyantsa.’
15 Nyang’anisani m’mapiri muwone nzayo za ule omwe akubweresa mafala yabwino,
Ule omwe akudziwisa bza mtendere.
Cita maphwando yako, iwe Djuda ndipo teweza malumbiro yako,
Thangwe palibe munthu wapezi-pezi omwe an’dzapita pomwe na pakati pako.
Iye an’dzaphedweratu.”
2 Ule omwe ambamwaza wanthu wafika kuti adzanesane nawe.*
Khotcerera muro wako wakulimba.
Lindira miseu yako.
Cita bzentse bzomwe ungakwanise* kuti ugumane mphanvu zakumenyera nkhondo.
2 Pakuti Yahova an’dzabwezeresa ulemerero bwa Djakobo,
Ndipo an’dzabwezeresambo ulemerero bwa Jirayeri,
Thangwe anyakupfudza adawapfudza
Ndipo adadzonga mthambi zawo.
3 Bzakukhotcera bza anyamadulanthaka wa Ninive n’bzifuira,
Anyankhondo wawo adabvala bzakubvala bzifuira.
Simbi za ngolo zawo za nkhondo zikuyetima ninga moto
Pa ntsiku yomwe iye akukonzekera nkhondo,
Ndipo iwo akutekenyesa madipa yawo yakukonzedwa na miti.
4 Ngolo zawo za nkhondo zimbathamanga kwene-kwene m’miseu,
Izo zimbakwira zicipolika mwakuthamanga m’misika.
Zimbayetima ninga mibvuniko ndipo zimbayetimambo ninga mpheni.
5 Iye an’dzacemera akulu-akulu wa anyankhondo wace.
Iwo an’dzakhukhumudwa pakuyenda.
An’dzathamangira mpaka ku muro wa mzindayo,
Iwo an’dzalimbisa mimuro* yawo.
6 Misuwo ya mikulo in’dzafungulidwa,
Ndipo nyumba ya mambo in’dzapfudzidwa.*
7 Nkhaniyi yatsimikiziridwa kuti: Iye wakhundulidwa ndipo wacitisidwa manyazi
Iye an’dzatengedwa ndipo akapolo wace wacikazi an’dzalira;
An’dzalira ninga nkhangaiwa acimbabzimenya-menya pa nkhombe.*
8 Nthawe zentse Ninive ali ninga thawale la madzi,
Tsono tsapano iwo akuthawa.
“Imani! Imani!”
Tsono palibe omwe akuzungunuka.
9 Pambani prata,* pambani oro!
Thangwe cuma cawo n’cakusaya malire
Pakuti iye adadzala na bzinthu bzizinji bzabwino.
10 Mzindayo wasiyidwa ulibe cinthu, wasala matere ndipo wapfudzidwa!
Mitima yawo ikusungunuka na mantha, mabondo yawo yamala mphanvu ndipo m’ciuno mwawo mukutetemera;
Nkhope zawo zentse zina mantha.
11 Kodi mbuto yomwe mphondolo zimbabisalira iri kuponi, komwe mphondolo* zimbadyera?
Mbuto yomwe mphondolo imbafamba na mwana wace,
Komwe palibe omwe ambazicitisa mantha?
12 Mphondoloyo ikhakhabvula bzirombo bzizinji kuti wana wace adye
Ndipo ikhapha bzirombo kuti ipasembo mphondolo zacikazi,
Iyo ikhacitisa kuti mu mphako zace mupitirize kukhala na nyama zomwe ikhaphata
M’mbuto zace zakubisalira mukhadzala na bzirombo bzomwe ikhaphata.
13 Yahova wa anyakhondo akuti: “Ona! Ndikubwera kudzakulanga,
Nin’dzatentha na moto ngolo zace za nkhondo,
Ndipo xipada in’dzapha mphondolo zako.
Un’dzasodza lini pomwe pa dziko la pantsi,*
Ndipo mafala ya wanthu wako omwe umbawatuma
Yan’dzabveka lini pomwe.”
3 Tsoka mzinda omwe wanthu wace ambapha anzawo!*
Iye ngwakudzala na cinyengo na kuba.
Omwe umbapamba nthawe zentse!
2 Likubveka baludya la mitcamu na baludya la maroda,
Kuthamanga kwene-kwene kwa kavalo na kuunga kwa ngolo.
3 Nyakukwira pa kavalo, kuyetima kwa xipada, madipa yakuyetima ninga mpheni,
Anyakuphedwa azinji, mathupi mazinji ya wanthu wakufa
Ndipo wanthu wakufa ali pentse-pentse.
Iwo akupitiriza kukhukhumudwa na mathupi ya anyakufawo.
4 Bzimwebzi bzacitika thangwe ra kucita kwace uputa kwene-kwene,
Iye ngwakudeka na wakusiririka, ndipo iye ni mkazi omwe ana luso lakucitambo bzamizimu,
Iye ambapumpsa mitundu ya wanthu na uputa bwace ndipo ambapumpsambo madzinza ya wanthu na bzamizimu bzace.
5 Yahova wa anyankhondo walewa kuti: “Ona! Inepano nin’kulanga,*
Nin’dzakukhundula saya yako icidzakumpsinkha ku nkhope kwako
Nin’dzacitisa kuti mitundu ya wanthu ikowenere,
Na kuti amambo awone kupasidwa kwako manyazi.
6 Nin’dzakuthusira bzinthu bzakunyantsa
Ndipo nin’dzakunyaza.
Nin’dzakucitisa manyazi pakati pa thimu la wanthu.
7 Ali-wentse omwe an’dzakuwona an’dzathawa acilewa kuti:
‘Ninive wapfudzidwa!
Mbani an’dzamubvera ntsisi?’
Kodi nin’dzawagumana kuponi wanthu kuti akutsangalaze?
8 Kodi iwepo ndiwe wabwino kwene-kwene kuposa No-amoni,* omwe akhali pafupi na migero ya Nilo?
Iye akhadazunguliridwa na madzi;
Cuma cace cikhali madzi ndipo muro wace ukhali madzi.
9 Mphanvu zace zentse zikhacokera ku Etiyopiya na ku Edjipito.
Wanthu wa ku Puti na wa ku Libiya akhamuthandiza.
10 Tsono napo No-amoni, adatengedwa aciyendesedwa ku dziko linango;
Ndipo iye adayendesedwa ku ukapolo.
Wana wace adagwatidwa-gwatidwa m’miseu yentse.*
Iwo adacitira vima-vima wanthu wace wakulemekezeka,
Ndipo amuna wace wentse wakulemekezeka adaikhidwa m’kawoko acimangidwa na makorenti.
11 Iwepombo Ninive un’dzaledzera;
Ndipo un’dzabisalika.
Ndipo un’dzanyang’ana mbuto yakuthawira anyamadulanthaka wako.
12 Mimuro yace yentse yakulimba iri ninga mikuyu na nkhuyu zace zakuyambirira kufuira;
Mitiyo ikatekenyesedwa, nkhuyuzo zimbagwera m’kamwa mwa anyakuzidya.
13 Ona! Thimu lako la acikunda liri ninga akazi pakati pako.
Misuwo ya bzipata bza dziko lako in’dzafungulidwa kuti anyamadulanthaka wako apite.
Moto un’dzanyekesa bzakufungira bza misuwo yako.
14 Tunga madzi kuti udzayaphatise basa ukadzazunguliridwa.
Limbisa pomwe mimuro yako yakulimba.
Pita m’matope ukanye-kanye dongo;
Tenga cikombole kuti ukonze tijolo.
15 Napo bziri tenepo, iwepo un’dzapsa na moto.
Ndipo un’dzaphedwa na xipada.
Iyo in’dzakudya ninga momwe bziwala bzimbadyera bzinthu bzakumera.
Muwande ninga bziwala!
Inde muwande kwene-kwene ninga bziwala!
16 Wacitisa kuti wanthu wako wakucita malonda awande kuposa nyenyezi zakudzulu
Bziwala bzimbagundula bzicimbulukira kutali.
17 Alindiri wako ali ninga bziwala,
Ndipo akulu-akulu wako ali ninga mtambo wa bziwala.
Mu ntsiku za mphepo ibzo bzimbathawira m’mikhekhe ya muro;
Tsono dzuwa likagaka, ibzo bzimbambulukira kutali;
Ndipo palibe omwe ambadziwa komwe bzayenda.
18 Imwe mambo wa Asiriya, amakabusa wanu akuwodzira.
Wanthu wanu wakulemekezeka ali m’nyumba zawo
Wanthu wanu amwazidwira m’mapiri,
Ndipo palibe omwe akuwatsonkhanisa pabodzi.
19 Un’dzapuma lini pa matsoka yako.
Ndipo bzironda bzako bzin’dzapola lini.
Wentse omwe an’dzabva bza iwepo an’dzawombera m’manja;
Pakuti ni mbani omwe alibe kubonera thangwe ra ciwembo cako?”
Kuthandauza “nyakutsangalaza.”
Ayai, “ambakalipa lini kamangu.”
Ayai, “ambasamalira.” Mafala yace caiyo: “ambadziwa.”
omwe ni Ninive.
Ayai, “bzakumwa bzakuledzeresa bzakukonzedwa na trigo.”
Ayai pinango, “ndipo an’dzapita na pakati pawo.”
Omwe ni Djuda.
Omwe ni Asiriya.
Ayai, “cifanikiso ca simbi yakucita kusungunula.”
Ayai, “templo.”
Omwe ni Ninive.
Mafala yace caiyo: “Limbisa ciuno cako.”
Ayai, “malitsito.”
Ayai, “in’dzasungunuka.”
Mafala yace caiyo: “pa mtima.”
Ayai, “siriva.”
Ayai, “wana wa mphondolo.”
Mafala yace caiyo: “Inepano nin’dzagwata bzirombo pa dziko la pantsi bzomwe iwepo umbaphata.”
Mafala yace caiyo: “omwe una mulandu wa mulopa.”
Omwe ni Ninive.
Omwe ni Tebesi.
Mafala yace caiyo: “Pa msolo pa miseu yentse.”