HABAKUKI
1 Mafala yomwe mpolofeta Habakuki* adatambira m’masomphenya:
2 Imwe Yahova, mpaka lini nin’dzakukumbirani thandizo mucisaya kundibva?
Mpaka lini nin’dzakukumbirani kuti mundipulumuse ku ciwembo imwe mucisaya kucita cinthu?*
3 Thangwe ranyi mukundicitisa kuwona bzinthu bzakuipa?
Thangwe ranyi mumbalekerera wanthu omwe ambaboneresa anzawo?
Thangwe ranyi nimbandokhalira kuwona kupfudzidwa kwa bzinthu na ciwembo?
Ndipo thangwe ranyi wanthu akupopotezana na kunesana tenepa?
4 Ndipopa lamulo liribe mphanvu,
Ndipo cirungamo cikucitika lini.
Pakuti anyakuipa akuboneresa wanthu wakulungama,
Ndipopa cirungamo cikucitika lini.
5 “Nyang’anisani mitundu ya wanthu ndipo khalani tceru,
Anyang’anisiseni bwino-bwino ndipo dabwani,
Pakuti mu ntsiku zanu mun’dzacitika cinthu
Comwe imwepo mun’dzakhulupira lini napo munthu acikuuzani.
6 Pakuti ninkubwereserani Akalideya,
Mtundu wakusaya ntsisi na waukali.
Iwo ambapita pa mbuto ikulu ya pa dziko la pantsi
Kuti apambe nyumba zomwe n’zawo lini.
7 Iwo mbakugopswa ndipo wanthu ambacita nawo mantha
Iwo ambakhazikisa okha malamulo yawo na utongi.*
8 Makavalo yawo yambathamanga kwene-kwene kuposa anyalugwe,
Ndipo njaukali kwene-kwene kuposa mphumphi usiku.
Makavalo yawo yambathamanga kwene-kwene;
Makavalo yawo yambacokera kutali.
Makavaloyo yambathamanga ninga mphungu yomwe ikumbuluka kuti iphate cakudya cace.
9 Wentse ambabwera adakonzeka kuti adzacite ciwembo.
Akagumana wentse pabodzi, ambakhala ninga conzi cakucokera kumabvadzuwa,
Ndipo ambatsonkhanisa akapolo azinji ninga mcenga.
10 Iwo ambanyoza amambo
Ndipo ambaseka akulu-akulu.
Iwo ambaseka mimuro* yentse yakulimba,
Ambakonza mitumbira acikunda mizindayo.
11 Iwo an’dzafamba ninga conzi ndipo an’dzapita na pakati pa mzindayo,
Tsono iwo an’dzakhala na mulandu,
Thangwe mphanvu zawo, ni mulungu wawo.
12 Imwe Yahova, kodi imwepo mulipo lini kuyambira kale-kale?
Imwe Mulungu wangu, Mulungu Wakucena, imwepo mumbafa lini.*
Imwe Yahova, mwawasankhula kuti acite bzomwe imwepo mwatonga;
Tsendwa langu, imwepo mwawakhazikisa kuti mubwerese nyathwa.*
13 Maso yanu njakucena kwene-kwene ndipo yan’themera lini kuwona bzakuipa,
Ndipo mumbakwanisa lini kulekerera bzakuipa kucitika.
Tsono thangwe ranyi mumbalekerera wanthu omwe ambacita bzinthu bzacinyengo?
Ndipo thangwe ranyi mukupitiriza kukhala mudanyamala pomwe anyakuipa akukhudyula wanthu wakulungama kuposa iwo?
14 Thangwe ranyi mukucitisa munthu kukhala ninga ntsomba za m’nyanza,
Ninga bzirombo bzakukwawa bzomwe bziribe mtongi?
15 Iye* ambamedza bzentsenebzi na medzo.
Iye ambawaphata na khokota wace,
Ndipo ambawatsonkhanisa m’bwazi bwace.
Ndipopa iye ambakondwa kwene-kwene.
16 Ndipopa iye ambapereka ntsembe* kwa khokota wace
Ndipo ambapereka ntsembe kwa bwazi bwace,
Thangwe bzimwebzi ndibzo bzimbamucitisa kukhala na cakudya cakununa*
Na cakupasa thanzi.
17 Kodi iye an’dzapitiriza kupfuwa khokota wace omwe alibe bzinthu?
Kodi iye an’dzapitiriza kupha mitundu ya wanthu mwakusaya ntsisi?
2 Nin’dzapitiriza kuima pa mbuto yangu yakuphatira basa la ulindiri,
Ndipo nin’dzaima padzulu pa muro.*
Nin’dzapitiriza kulindira kuti ndiwone bzomwe iye an’dzalewa mwakuphatisa basa inepano,
Na bzomwe nin’dzatawira ndikadzatsimulidwa.
2 Tenepo, Yahova adanditawira kuti:
“Nemba bzomwe ukuwona m’masomphenyabzi, ndipo ubzinembe mwakubveka bwino m’matabwa,
Kuti ule omwe aniwerenga mwakukuwa, aleke kuneseka.*
3 Pakuti bzomwe ukuwona m’masomphenyabzi bzin’dzacitika pa nthawe yakuikhidwiratu,
Ndipo bzikuthamangira kuphampha* kwace, bzimwebzi mpsakunama lini.
Napo bzicicedwa,* pitiriza kudikhirira!
Pakuti bzin’dzacitikadi.
Ndipo bzin’cedwa lini!
4 Ona munthu wakubzikuza;
Mu mtima mwace muli lini bwino.
Tsono munthu wakulungama an’dzakhala na moyo thangwe ra kukhulupirika* kwace.
5 Kulewa cadidi, vinyu imbacitisa munthu kucita bza utsiru,
Ndipopa munthu wakubzikuza an’dzakwanirisa lini bzakulinga bzace.
Iye ambakhala na njala ninga Thenje,*
Ndipo iye ambakhuta lini ninga infa.
Iye ambapitiriza kutsonkhanisa mitundu yentse ya wanthu,
Ndipo iye ambabzitsonkhanisira yekha wanthu wentse.
6 Kodi wentsenewo an’dzakulewa lini mwakuphatisa basa mwani, mafala yakunesa kubvesesa na bzidapi?
Iwo an’dzalewa kuti:
‘Tsoka kwa ule omwe wadala na bzinthu bzomwe mpsace lini
Na ule omwe akupitiriza kuthumizira mangawa yace,
Mpaka lini an’pitiriza kucita bzimwebzi?
7 Kodi wale omwe adakufiyalisi an’dzakuphindukira lini mwadzidzidzi acidzakusunda?
Iwo an’dzamuka, acidzakusukusa mwamphanvu,
Ndipo iwo an’dzapamba bzinthu bzako.
8 Pakuti wapamba bzinthu bza mitundu mizinji ya wanthu,
Wanthu wentse wakusala wa mitunduyo an’dzapambambo bzinthu bzako,
Thangwe rakuti udapha wanthu azinji
Ndipo wacitira ciwembo dziko la pantsi,
Mizinda na wanthu wakukhala m’mizindamo.
9 Tsoka kwa ule omwe ambagumanira nyumba yace phindu mwacinyengo,
Kuti aikhe citsa cace pa mbuto yapadzulu kwene-kwene,
Na cakulinga cakuti tsoka lileke kufika pomwe iye ali!
10 Ciwembo comwe wakonza cacitisa manyazi nyumba yako.
Wabzibweresera wekha pikado thangwe ra kupha wanthu azinji.
11 Pakuti mwala un’dzalira pa parede,
Ndipo un’dzatawiridwa na mtanda wa pantsodzi.
12 Tsoka kwa ule omwe ambamanga mzinda mwa kupha wanthu,
Na omwe ambakhazikisa mzindayo mwakucita bzakusaya kulungama!
13 Kodi ni Yahova lini wa anyankhondo omwe an’dzacitisa kuti wanthu aphate basa mwamphanvu kuti moto udzawone cakutentha
Nakuti wanthuwo anete papezi?
14 Pakuti dziko la pantsi lin’dzadzala na cidziwiso ca ulemerero bwa Yahova,
Ninga momwe madzi yambadzazira nyanza.
15 Tsoka kwa ule omwe an’pasa anzace cakumwa,
Cakusanganizidwa na ukali na ciya kuti aledzere,
Na cakulinga cakuti awawonere.
16 Un’dzakhuta manyazi m’mbuto mwa ulemerero.
Un’dzamwesedwambo ndipo un’dzabzilatiza padeca kuti ulibe kucitidwa mgwatidwe.*
Yahova an’dzacitisa kuti umwe bzomwe bziri m’kopo ya ku boko lace lamadidi,
Ndipo ulemerero bwako bun’dzasanduka manyazi;
17 Pakuti ciwembo comwe udacitira Lebanoni cin’dzakumpsinkha,
Ndipo kupfudzidwa komwe kumbagopswa bzirombo kun’dzakubwerera,
Thangwe rakuti udapha wanthu azinji,
Ndipo wacitira ciwembo dziko la pantsi,
mizinda na wanthu wakukhala m’mizindamo.
18 Kodi cifanikiso cakusema cina phindu lanyi
Pakuti cakonzedwa na misiri?
Kodi cina phindu lanyi cifanikiso ca simbi* na mpfunzisi wakunama
Napo kuti m’misiri angabzikhulupire,
Acikonza mirungu yomwe iribe phindu na yomwe ingalewelewe lini?
19 Tsoka kwa ule omwe aniuza muti kuti: “Lamuka!”
Ayai kuuza mwala omwe umbalewalewa lini kuti: “Lamuka, tipfunzise!”
Bzifanikisobzo bzidapalangiridwa na oro na prata,*
Ndipo mkati mwace mulibe mphuwe.
20 Tsono Yahova ali mu templo yace yakucena.
Dziko lentse likhale lidanyamala pamaso pace!’”
3 Mpembo wa mpolofeta Habakuki omwe adaucita ninga nyimbo ya kulira:
2 Imwe Yahova, ndabva nkhani yakulewa bza imwepo.
Imwe Yahova, ndadabwa na mabasa yanu.
Na kupita kwa magole,* citani pomwe mabasa yanu yamphanvu!
Na kupita kwa magole* citisani kuti mabasa yanu yadziwike.
Ndipo kumbukirani kulatiza ntsisi pa nthawe ya ukali bwanu.
3 Mulungu wabwera kucokera ku Temani,
Wakucena wabwera kucokera ku Phiri la Parani. (Sela)*
Ulemerero bwace, bwampsinkha kudzulu;
Dziko lentse ladzala na wanthu omwe akumutumbiza.
4 Kuyetima kwace kuli ninga ceza.
Kuyetima kwa mitundu miwiri kukhacokera m’manja mwace,
Momwe mukhabisalikira mphanvu zace.
5 Patsogolo pace pakhafamba cisi,
Ndipo kufesuka kukhatewera mathanya yace.
6 Iye adaima ndipo adacitisa dziko kutekenyeka.
Na kundonyang’anisa kokha, iye adacitisa mitundu ya wanthu kutetemera.
Mapiri yomwe yalipo kuyambira kale-kale, yadasweka,
Ndipo mitunthu yakale-kale idakotama.
Zimwezi ni njira zace zakale-kale.
7 Ndawona kutsautsika m’matendi mwa Kuxe.
Nguwo za matendi ya dziko la Midiyani zidatetemera.
8 Imwe Yahova, mwakalipa thangwe ra mikulo?
Kodi ukali bwanu bwagakira mikulo?
Ayai, kodi mwakalipa na nyanza?
Pakuti mwapakira makavalo yanu;
Ndipo ngolo zanu za nkhondo zidakunda.
9 Mwacosa uta bwanu ndipo mwakonzeka kubuthusa.
Mpsimbo* zidakonzeka kuphata basa lace mwakubverana na lumbiro. (Sela)
Mwakhekhemula dziko mwakuphatisa basa mikulo.
10 Mapiri yadabva kuwawa pomwe yadakuwonani.
Nvula yamphanvu idabvumba.
Madzi yakuzika yadalirima.
Ndipo yadamusa manja yace m’dzulu.
11 Dzuwa na mwezi bzidaima kudzulu.
Misewe yanu idayenda ninga ceza.
Dipa lanu likhayetima ninga ciphaliwali.
12 Mwafamba pa dziko la pantsi na ciya.
Mwaponda-ponda* mitundu ya wanthu mwaukali.
13 Mudayenda kuti mukapulumuse wanthu wanu, kuti mukapulumuse nyakudzozedwa wanu.
Mwapeya mtsogoleri* wa m’nyumba ya anyakuipa.
Nyumbayo yapfudzidwa kuyambira pa ntsodzi* mpaka pa aliserse. (Sela)
14 Mwabowola misolo ya acikunda wace na bzifuzo bzawo bza nkhondo,*
Pomwe iwo akhabwera ninga conzi kuti adzandimwaze.
Iwo akhakomedwa kukhudyula mwa cintsintsi munthu wakutsautsika.
15 Mwapita pa nyanza na makavalo yanu,
Pa madzi mazinji yomwe yakucita mabimbi.
16 Pomwe ndidabva bzimwebzi, m’mimba mwangu mudayamba kubvunduka;
Miromo yangu idatetemera na baludya.
Kubvunda kudapita m’mafupa yangu;
Minyendo yangu idayamba kutetemera.
Tenepo ndikudikhirira mwakuderekha ntsiku ya matsautso,
Thangwe ntsiku imweyi, ikubwerera wale omwe ambafuna kumenya nafe nkhondo.
17 Napo miti ya mkuyu icisaya kupfundira,
Ndipo miti ya uva icisaya kukhala na bzisapo;
Napo miti ya maolivera icisaya kubala,
Ndipo m’minda mucikhala mulibe cakudya,
Napo mabira yacinyembereka m’thanga,
Ndipo mucikhala mulibembo ng’ombe m’thanga;
18 Ine nin’dzakondwa thangwe ra Yahova;
Nin’dzakondwa thangwe ra Mulungu wa cipulumuso cangu.
19 Yahova Mbuya Mkululetu ni mphanvu yangu;
Iye an’dzacitisa minyendo yangu kukhala ninga ya bawala
Ndipo an’dzandicitisa kuponda m’mbuto za padzulu.
Kwa anyakutsamulira nyimbo na bzakuimbira bzangu bza bzingwe.
Ayai pinango kuthandauza, “Kukumbatira na Mphanvu.”
Ayai, “kundipulumusa.”
Ayai: “ulemu.”
Ayai, “malitsito.”
Ayai pinango, “ifepano tin’dzafa lini.”
Ayai, “kutsimula.”
Omwe ni anyamadulanthaka wa Akalideya.
Ayai, “ntsembe za utsi.”
Mafala yace caiyo: “cakukwana bwino mafuta.”
Ayai, “litsito.”
Ayai, “awerenge bwino-bwino.”
Ayai, “kukwanisika.”
Ayai, “iciwoneka ninga kuti ikucedwa.”
Ayai pinango, “cikhulupiro; kukhulupira.”
Ayai, “Seoli,” lomwe ni thenje la wanthu wentse. Onani Kafotokozedwe ka Mafala Manango.
Ayai, “sirkunsizau.”
Ayai, “simbi yakusungunusa.”
Ayai, “siriva.”
Ayai pinango, “Mu nthawe yathu ino.”
Ayai pinango, “Mu nthawe yathu ino.”
Onani Kafotokozedwe ka Mafala Manango.
Ayai pinango, “Misewe.”
Mafala yace caiyo: “mwapula.”
Mafala yace caiyo: “msolo.”
Mafala yace caiyo: “khosi.”
Mafala yace caiyo: “mpsimbo.”