ZEFANIYA
1 Zefaniya* mwana wa Kuxi, mwana wa Gedaliya, mwana wa Amaria, mwana wa Ezekiya mu ntsiku za Josiya mwana wa Aamoni mambo wa Djuda, adatambira mafala ya Yahova yakuti:
2 Yahova walewa kuti: “Nin’dzapfudziratu bzentse pa dziko la pantsi.
3 Nin’dzapfudza munthu na cirombo,
Nin’dzapfudza mbalame na ntsomba,
Nin’dzapfudza minyala yakukhukhumudwisa* pabodzi na wanthu wakuipa.
Ndipo nin’dzapfudza wanthu pa dziko la pantsi,” walewa tenepo Yahova.
4 “Nin’dzafuthula boko langu kuti ndilange Djuda
Ndipo nin’dzalanga wanthu wentse wa mu Jeruzalemu,
Nin’dzapfudza pa mbuto ino bzinthu bzentse bzomwe mpsakubverana na* Baala,
Ndipo nin’dzapfudza pomwe dzina la antsembe wa mirungu yacirendo pabodzi na antsembe winango,
5 Nin’dzapfudza wale omwe ambagodamira bzinthu bzakudzulu, omwe ali pa ntsodzi za nyumba zawo
Ndipo nin’dzapfudza pomwe wale omwe ambagodama acilumbira kuti an’dzakhala wakukhulupirika kwa Yahova,
Omwe pa nthawe ibodzi-bodziyo ambalumbira kukhalambo wakukhulupirika kwa Malikamu;
6 Na wale omwe akusiya kutewera Yahova
Omwe akulinga lini Yahova ayai kumukumbira malango.”
7 Nyamalani pamaso pa Yahova Mbuya Mkululetu, pakuti ntsiku ya Yahova iri pafupi.
Yahova wakonzekera ntsembe, iye wacenesa wale omwe wawacemera.
8 “Pa ntsiku ya ntsembe ya Yahova nin’dzalanga atsogoleri,
Nin’dzalanga wana wa mambo na wentse omwe ambabvala bzakubvala bzacirendo.
9 Pa ntsikuyo nin’dzalanga ali-wentse omwe ambafendera pafupi na mpando wa umambo,*
Wale omwe ambadzaza nyumba ya mbuya wawo na ciwembo pabodzi na cinyengo.”
10 Yahova walewa kuti: “Pa ntsikuyo,
Kun’dzabveka kulira kucokera pa Cipata ca Ntsomba,
Kun’dzabveka kulira kukulu kucokera ku mzinda upsa,
Na kugunda kwamphanvu kucokera m’mapiri.
11 Lirani imwe wanthu wa ku Makitesi,*
Pakuti anyakucita malonda wentse apfudzidwa;*
Wentse omwe akhapima prata apfudzidwa.
12 Pa nthawe imweyo, nin’dzafufudza Jeruzalemu na makandiyero,
Ndipo nin’dzalanga wale omwe ambakhala mwakusaya mantha,* omwe ambalewa mu mtima mwawo kuti:
‘Yahova an’dzacita lini cabwino ne cakuipa.’
13 Cuma cawo cin’dzapambidwa ndipo nyumba zawo zin’dzapfudzidwa,
An’dzamanga nyumba koma an’dzazikhala lini;
Ndipo an’dzalima minda ya uva, koma an’dzamwa lini vinyu yace.
14 Ntsiku ikulu ya Yahova iri pafupi!
Iri pafupi ndipo ikufendera mwakamfulumize kwene-kwene!*
Muwira wa ntsiku ya Yahova ngwakugopswa kwene-kwene.
Pa ntsiku imweyo, napo mcikunda an’dzalira mwakukuwa.
15 Ntsikuyo, ni ntsiku ya ukali,
Ntsiku ya matsautso na ya msunamo,
Ntsiku ya conzi na yakupfudza,
Ntsiku ya mdima wa ndiwe yani,
Ntsiku ya mitambo na ya mdima wakupasa mantha,
16 Ntsiku ya kulira kwa nyanga na kukuwa kwa nkhondo,
Ntsiku yomwe mizinda yakulimba na nyumba zitali za ntsanza za m’makhona* zin’dzapfudzidwa.
17 Nin’dzacitisa wanthu kutsautsika,
Ndipo iwo an’dzafamba ninga azimola,
Pakuti iwo aphonyera Yahova.
Mulopa wawo un’dzathululidwa ninga pfumbi,
Ndipo matumbo yawo ninga ndowe.
18 Prata yawo ne oro yawo bzin’dzawapulumusa lini pa ntsiku ya ukali bwa Yahova;
Ukali bwace buli ninga moto ndipo bun’dzanyekesa dziko lentse la pantsi
Thangwe iye an’dzapfudza, inde, an’dzapfudziratu wanthu wentse wakukhala pa dziko la pantsi.”
2 Tsonkhanani, inde tsonkhanani,
Imwe mtundu wa wanthu wakusaya manyazi.
2 Pomwe lamulo likanati kukwanisika,
Pomwe ntsiku ikanati kupita ninga mungu omwe akumwazika na mphepo,
Pomwe ukali bwakugaka bwa Yahova bukanati kukufikirani,
Pomwe inati kukufikirani ntsiku ya ukali bwa Yahova,
3 Lingani Yahova imwe mwentse wanthu wakubzicepesa wa pa dziko la pantsi,
Imwe omwe mumbabvera malamulo yace yakulungama.
Lingani cirungamo ndipo lingani kukhala wakubzicepesa,
Pinango pentse mungadzabisidwe pa ntsiku ya ukali bwa Yahova.
4 Pakuti mzinda wa Gaza un’dzasiyidwa;
Ndipo mzinda wa Asikeloni un’dzapfudzidwa.
Wanthu wa ku Asidode an’dzathamangisidwa dzuwa liri ngende,*
Ndipo Ekroni an’dzazulidwa.
5 “Tsoka kwa wale omwe ambakhala mphepete mwa nyanza, wa dzinza la Akereti!
Fala la Yahova lin’dzakulangani.
Iwe Kanani, dziko la Afilisteu, inepano nin’dzakupfudza,
Ndipo palibe munthu omwe an’dzasiyidwa m’dziko lako.
6 Ndipo m’mphepete mwa nyanza mun’dzakhala mbuto yakudyesera bzifuwo,
Mun’dzakhala na micera ya amakabusa na mathanga ya mabira yakukonzedwa na minyala.
7 Iyo in’dzakhala mbuto ya wale omwe an’dzasala, wa m’nyumba ya Djuda;
Ndipo mbuto imweyo ndiyo yomwe iwo an’dzadyera.
Kukadoka iwo an’dzagona m’nyumba za Asikeloni,
Pakuti Yahova Mulungu wawo an’dzawakumbukira,*
Ndipo iye an’dzacitisa kuti wanthu wawo omwe akhadayendesedwa ku ukapolo abwerere.”
8 “Inepano ndabva kutukwana kwa Mowabe na mafala yakunyoza ya Aamoni,
Omwe akhasinjirira wanthu wangu na kuwagopswa mwakubzikuza kuti an’dzawatengera dziko lawo.”
9 Tsono Yahova wa anyankhondo, Mulungu wa Jirayeri walewa kuti: “Ine, Mulungu wamoyo ndikulumbira* kuti:
Mowabe an’dzakhala ninga Sodoma,
Ndipo Aamoni an’dzakhala ninga Gomora,
Mbuto yakudzala na lunya, mbuto ya mataka ya munyu ndipo in’dzakhala matere mpaka kale-kale.
Wanthu wangu omwe an’dzasala, an’dzapamba bzinthu bzawo,
Ndipo wanthu wangu omwe an’dzapulumuka an’dzatenga dziko lawo.
10 Bzimwebzi ndibzo bzomwe bzin’dzawacitikira thangwe ra kubzikuza kwawo,
Thangwe iwo akhabzikuza ndipo akhanyoza wanthu wa Yahova wa anyankhondo.
11 Yahova an’dzawacitisa mantha;
Pakuti iye an’dzapfudza mirungu yentse ya pa dziko la pantsi,
Ndipo ntsuwa zentse za mitundu ya wanthu zin’dzamugodamira,*
Iri-yentse pa mbuto yace.
12 Imwepo Aetiyopiya mun’dzaphedwambo na xipada yangu.
13 Iye an’dzafuthulira boko lace ku norte,* acipfudza Asiriya,
Ndipo iye an’dzacitisa Ninive kukhala matere, mbuto yakusaya madzi ninga m’dambo.
14 Bzifuwo bzin’dzagona m’mwemo na bzirombo bzentse bza m’thengo.
Mbalame ya pelikano pabodzi na nungu bzin’dzagona usiku pakati pa midjirikiro yace.
Lin’dzabveka fala likuimba pa janera.
Pa misuwo pan’dzakhala na bzimabuma;
Pakuti iye an’dzasiya padeca matabwa.
15 Umweyu ni mzinda wakubzikuza omwe ukhagopa lini cinthu,
Omwe ukhalewa mu mtima mwace kuti, ‘Inepano ndine wakufunika kwene-kwene ndipo palibe munango wakundendemerana na ine.’
Tsono tsapano, wakhala cinthu cakupasa mantha,
Wakhala mbuto yakugona bzirombo bza m’thengo!
Munthu ali-wentse wakupita na m’mwemo, an’dzaliza muluzi na kukwetedza msolo.”
3 Tsoka iwe mzinda wakusaya kubvera, wakupswipa, omwe umbaponderera wanthu wa mzinda wace!
2 Mzindayo umbabvera lini ndipo umbabvuma lini malango.
Umbathemba lini Yahova ndipo umbafenderera lini Mulungu wace.
3 Nduna zace ziri ninga mphondolo zomwe zikulirima.
Ayeruzi wace ali ninga mphumphi za usiku;
Ambasiya lini pfupa ne libodzi la kudya mangwana yace.
4 Apolofeta wace mbakubzikuza na wacinyengo.
Antsembe wace ambapswipiza bzomwe mpsakucena;
Ndipo iwo ambabvera lini lamulo.
5 Yahova ngwakulungama ndipo ali pakati pace; iye ambacita lini cinthu cakuphonyeka.
Ninga dzuwa lomwe limbacoka ntsiku iri-yentse,
Iye ambacitisa kuti malamulo yace yadziwike macibese yali-yentse.
Tsono anyakusaya kulungama ambabva lini manyazi.
6 “Ndidapfudza mitundu ya wanthu ndipo nyumba zawo za ntsanza zidakhala matere.
Ndidapfudza miseu yawo ndipo palibe munthu omwe akhapita pomwe na m’mwemo.
Mizinda yawo idakhala matere ndipo palibe kusala munthu omwe akhakhala m’mwemo.
7 Inepano ndauza mzindayo kuti: ‘Kulewa cadidi, iwepo un’dzandigopa ndipo un’dzabvuma kutsimulidwa,’*
Kuti mbuto yace yakukhala ileke kupfudzidwa,
Pakuti nin’dzamupasa mulandu* thangwe ra bzentse bzomwe akucita.
Tsono iwo akhafunisisa kucita bzinthu mwa cinyengo.
8 Yahova walewa kuti: ‘Pitirizani kundidikhirira,
Mpaka pa ntsiku yomwe nin’dzamuka ndicikawatengera bzinthu bzawo,*
Pakuti bzomwe ndatonga mpsakuti nditsonkhanise mitundu ya wanthu na maumambo,
Nin’dzawakhuthulira ciya cangu na ukali bwangu bwentse bwakugaka;
Ukali bwangu buli ninga moto ndipo bun’dzanyekesa dziko lentse la pantsi.
9 Pa nthaweyo, nin’dzacinja cirewedwe ca wanthu, ndicidzawapasa cirewedwe cakucena,
Kuti wentse acemere dzina la Yahova,
Kuti amutumikire mwakuphatana.’
10 Kucokera m’mphimpha za mikulo ya ku Etiyopiya,
Anyakubalalisidwa wangu, wale omwe akundidandaulira, an’dzandibweresera mphaso.
11 Pa ntsiku imweyo iwepo* un’dzacitisidwa lini manyazi
Thangwe ra bzicito bzako bzentse bzakundipandukira,
Pakuti nin’dzacosa anyakubzikuza wentse pakati pako;
Ndipo iwepo un’dzabzikuza lini pomwe pa phiri langu lakucena.
12 Nin’dzasiya wanthu wakubzicepesa na wakuderekha kuti akhale pakati pako,
Ndipo iwo an’dzathawira pa dzina la Yahova.
13 Wale omwe an’dzasala mu Jirayeri, an’dzacita lini bzinthu bzakusaya kulungama;
Iwo an’dzalewa lini bzinthu bzakunama ayai kuphatisa basa lirime lawo kuti apumpse wanthu;
Iwo an’dzadya acigona, ndipo palibe omwe an’dzawacitisa mantha.”
14 Kuwani mwakukondwa imwe wanthu wa mu Ziyoni!
Kuwa mwakukomedwa, iwe Jirayeri!
Kondwani ndipo komedwani na mtima wanu wentse, imwe wanthu wa mu Jeruzalemu!
15 Yahova wakucosera nyathwa yomwe ukhabonera nayo,
Ndipo iye wacitisa kuti nyamadulanthaka wako abwerere.
Yahova Mambo wa Jirayeri ali pakati pako,
Ndipo iwepo un’dzagopa lini pomwe tsoka liri-lentse.
16 Pa ntsiku imweyo, Jeruzalemu an’dzauzidwa kuti:
“Leka kugopa iwe Ziyoni.
Leka kulekerera kuti manja yako yatepe.
17 Yahova Mulungu wako, anawe.
Pakuti ngwamphanvu, iye an’dzakupulumusa.
Thangwe ra iwepo, iye an’dzakondwa kwene-kwene.
Iye an’dzakhala phee thangwe ra kukomedwa na lufoyi lomwe iye akukulatiza.
Thangwe ra kukomedwa nawe, iye an’dzakuwa mwakukondwa.
18 Nin’dzatsonkhanisa wale omwe adasunama thangwe ra kusaya kugumanika pa maphwando yako;
Iwo adakhala kutali na iwepo pomwe ukhapirira kunyozedwa thangwe ra iye.
19 Pa nthawe imweyo, nin’dzalanga wentse omwe akukuboneresa;
Ndipo nin’dzapulumusa omwe akugwidoma,
Nin’dzatsonkhanisa omwe adabalalika.
Ndipo nin’dzawacitisa kukhala wakutumbizika na wakubvekera,
M’madziko yentse yomwe udacitisidwa manyazi.
20 Pa nthaweyo, inepano nin’dzakubweresani pomwe,
Pa nthawe imweyo inepano nin’dzakutsonkhanisani pabodzi,
Pakuti nin’dzakucitisa kukhala wakubvekera na wakutumbizika pakati pa wanthu wentse wa pa dziko la pantsi,
Iwepo un’dzawona ndikadzabweresa wanthu wako omwe akhadayendesedwa ku ukapolo,” walewa tenepo Yahova.
Kuthandauza kuti “Yahova Wabisa (wakoya).”
Bzikuwoneka kuti ni basa linango ayai cinthu cakubverana na kunamata cifanikiso.
Ayai, “bzomwe mpsakusala bza.”
Pinango imweyi ikhali mbuto yakudzusika yomwe ikhakhala mpando wa umambo.
Pinango imweyi ikhali mbuto yomwe ikhali pafupi na pa Cipata ca Ntsomba mu mzinda wa Jeruzalemu.
Mafala yace caiyo: “anyamalisidwa.”
Mafala yace caiyo: “wale omwe ali ninga vinyu yomwe mabvundu yace yademba.”
Ayai, “ndipo ikuthamanga kwene-kwene.”
Ayai, “m’maponta.”
Ayai, “masikati.”
Ayai, “an’dzawasamalira.”
Ayai, “ndikulumbirira moyo wangu.”
Ayai, “zin’dzamunamata.”
Ayai, “kudzaulu.”
Ayai, “cirango.”
Ayai, “nyathwa.”
Ayai pinango, “nin’dzamuka ninga mboni.”
Omwe ni Jeruzalemu.