ZAKARIYA
1 Mu gole laciwiri la utongi bwa mambo Dariyo, pa mwezi wacisere, mpolofeta Zakariya,* mwana wa Berekiya, mzukulu wa Ido, adatambira fala kucokera kwa Yahova lakuti: 2 “Yahova adakalipa kwene-kwene na abareki wanu.
3 “Auze kuti: ‘Yahova wa anyankhondo walewa kuti: “‘Bwererani kwa ine,’ walewa tenepo Yahova wa anyankhondo, ‘ndipo inepano nin’dzabwererambo kwa imwepo,’ walewa tenepo Yahova wa anyankhondo.”’
4 “‘Lekani kukhala ninga abereki wanu omwe apolofeta adawauza kuti: “Yahova wa anyankhondo walewa kuti: ‘Ndaphata minyendo, siyani* njira zanu zakuipa na bzicito bzanu bzakuipa.’”’
“‘Tsono iwo alibe kutetekera ndipo alibe kundibvera,’ walewa tenepo Yahova.
5 “‘Kodi abereki wanu ali kuponi tsapano? Kodi apolofeta adakhala na moyo mpaka kale-kale? 6 Kodi bzomwe ndidauza atumiki wangu, apolofeta, mafala yangu na mitemo yangu bziribe kucitikira abereki wanu?’ Tenepo, iwo adabwerera kwa ine aciti: ‘Yahova wa anyankhondo wacita bzomwe akhafuna kuticitira ndipo wacita mwakubverana na njira zathu na bzicito bzathu.’”
7 Pa ntsiku 24 ya mwezi wacikhumi na ubodzi, omwe ni mwezi wa Sebati,* mu gole laciwiri la utongi bwa mambo Dariyo, Yahova adacitisa inepano, mpolofeta Zakariya mwana wa Berekiya mzukulu wa Ido kuwona masomphenya. 8 “Bukhali usiku, ndipo ndidawona munthu omwe akhadapakira kavalo mfuira, iye akhadaima pakati pa miti ya djambalau yomwe ikhali m’cigwa ndipo m’mbuyo mwace mukhana makavalo mafuira, yakastanyo na macena.”
9 Tenepo, ine ndidabvunza kuti: “Kodi amwewa ni mbani mbuya wangu?”
Anjo omwe akhalewalewa nandeyo adanditawira kuti: “Nin’kuuza kuti amwewa ni mbani.”
10 Munthu omwe akhadaima pakati pa miti ya djambalau ule adati: “Amwewa ni omwe Yahova awatuma kuti afambe-fambe pa dziko la pantsi.” 11 Ndipo iwo adauza anjo wa Yahova omwe akhadaima pakati pa miti ya djambalau ule kuti: “Tafamba-famba m’dziko, tawona kuti dzikolo lidaderekha ndipo palibe cakunesa.”
12 Tenepo anjo wa Yahova adati: “Imwe Yahova wa anyankhondo, kodi mpaka lini mun’pitiriza kuleka kubvera ntsisi Jeruzalemu na mizinda ya Djuda yomwe imwepo mudakalipa nayo kwa magole 70?”
13 Tenepo Yahova adatawira anjo omwe akhalewalewa nandeyo na mafala yabwino na yakutsangalaza. 14 Anjo omwe akhalewalewa nandeyo adandiuza kuti: “Kuwa kuti: ‘Yahova wa anyankhondo walewa kuti: “Nin’dzakhotcerera Jeruzalemu na Ziyoni, inde, nin’dzawakhotcerera na mtima wangu wentse. 15 Ndidakalipa kwene-kwene na wanthu wa mitundu inango omwe ali pa mtendere, thangwe ndikhadakalipa pang’ono basi na wanthu wangu, tsono iwo athumizira tsoka la wanthu wanguwo.”’
16 “Tenepo Yahova walewa kuti: ‘“Nin’dzabvera pomwe ntsisi Jeruzalemu ndipo nyumba yangu in’dzamangidwa pomwe m’mwemo,” walewa tenepo Yahova wa anyankhondo, “ndipo Jeruzalemu an’dzapimidwa na cingwe cakupimira.”’
17 “Kuwa pomwe kuti: ‘Yahova wa anyankhondo walewa kuti: “Mizinda yangu in’dzadzala na bzinthu bzabwino mpaka kutaikira, ndipo Yahova an’dzatsangalaza pomwe Ziyoni ndipo an’dzasankhula pomwe Jeruzalemu.”’”
18 Patsogolo pace ndidawona nyanga zinai m’masomphenya. 19 Tenepo, ndidabvunza anjo omwe akhalewalewa nandeyo kuti: “Kodi nyanga zimwezi zikuimira ciyani?” Iye adanditawira kuti: “Zimwezi ni nyanga zomwe zidabalalisa Djuda, Jirayeri na Jeruzalemu.”
20 Patsogolo pace, Yahova adandiwonesa amisiri anai. 21 Ine ndidabvunza kuti: “Kodi amisiriwa akubwera kudzacita ciyani?”
Iye adanditawira kuti: “Zimwezi ni nyanga zomwe zidabalalisa Djuda, mwakuti palibe omwe adakwanisa kulamusa msolo wace. Amisiriwo an’dzabwera kuti adzagopswe na kupfudza nyanga za mitundu inango yomwe idaphatisa basa nyanga zace kuti ibalalise Djuda.”
2 Ndipo ndidawona pomwe m’masomphenya, munthu omwe akhana cingwe cakupimira m’manja mwace. 2 Tenepo inepano ndidamubvunza kuti: “Kodi ukuyenda kuponi?”
Iye adanditawira kuti: “Ndikuyenda kukapima Jeruzalemu kuti ndidziwe khwankhwa lace na kutalimpha kwace.”
3 Tenepo, anjo omwe akhalewalewa nande ule adayenda, ndipo kudabwera anjo munango kudzagumana naye. 4 Patsogolo pace adamuuza kuti: “Thamanga ukauze mulumbwana ule kuti, ‘“Jeruzalemu an’dzakhalidwa na wanthu ninga mzinda wakusaya muro* thangwe ra kuwanda kwa wanthu na bzifuwo bzomwe bziri m’mwemo. 5 Ndipo inepano nin’dzamuzungulira ninga muro wace wa moto, ndipo ulemerero bwangu bun’dzadzala mu Jeruzalemu,”’” walewa tenepo Yahova.
6 “Fulumizani! Fulumizani! Thawirani ku dziko la ku norte,” walewa tenepo Yahova.
“Pakuti ndakubalalisirani ku mbali zentse za pa dziko la pantsi,”* walewa tenepo Yahova.
7 “Fulumiza Ziyoni! Thawa, iwepo omwe ukukhala na mwana wacikazi wa Babiloniya. 8 Pakuti Yahova wa anyankhondo, ule omwe pambuyo pakupasidwa ulemerero wandituma kwa mitundu ya wanthu yomwe ikhapamba bzinthu bzanu, walewa kuti: ‘Ali-wentse omwe an’kukhuyani, ambakhala ninga kuti wakhuya mboni ya diso langu. 9 Pakuti nin’dzalamusa boko langu kwa iwo ndipo iwo an’dzapambidwa na akapolo wawo caiwo.’ Kulewa cadidi, imwepo mun’dzadziwa kuti Yahova wa anyankhondo wandituma.
10 “Kuwa mwakukondwa, iwe mwana wacikazi wa Ziyoni, pakuti ndikubwera ndipo nin’dzakhala pakati pako,” walewa tenepo Yahova. 11 “Pa ntsiku imweyo, wanthu wa mitundu mizinji an’dzaphatana na Yahova ndipo an’dzakhala wanthu wangu, ndipo ine nin’dzakhala pakati pako.” Ndipo un’dzadziwa kuti Yahova wa anyankhondo ndiye omwe wandituma kwa iwepo. 12 Yahova an’dzatenga Djuda kukhala utaka bwace m’dziko lakucena ndipo iye an’dzasankhula pomwe Jeruzalemu. 13 Wanthu wentse anyamale pamaso pa Yahova, pakuti iye akuphata basa kuti acite kufuna kwace kuna Jeruzalemu.
3 Ndipo iye adandilatiza Djoswa mkulu wa antsembe, omwe akhadaima pamaso pa anjo wa Yahova ndipo Sathani akhadaimambo ku boko lace lakumadidi kuti amutsutse. 2 Ndipo anjo wa Yahova ule adauza Sathani kuti: “Yahova akutsimule, iwe Sathani, inde, Yahova omwe wasankhula Jeruzalemu akutsimule! Kodi munthuyu ni citsiga lini comwe cacosedwa pamoto?”
3 Djoswa akhadabvala bzakubvala bzakupswipa pomwe akhadaima pamaso pa anjo ule. 4 Anjoyo adauza wanthu omwe akhadaima pamaso pacewo kuti: “Mukhunduleni bzakubvala bzakupswipabzi.” Patsogolo pace, iye adauza Djoswa kuti: “Ona, ndakucosera bzakuphonya bzako* ndipo wabvazikidwa bzakubvala bzabwino.”*
5 Tenepo, ine ndidalewa kuti: “Mubvazikeni duku lakucena mu msolo mwace.” Ndipo iwo adamubvazika duku lakucenalo mu msolo mwace, acimubvazikambo bzakubvala ndipo anjo wa Yahova akhadaima pafupipo. 6 Anjo wa Yahova ule adauza Djoswa kuti: 7 “Yahova wa anyankhondo walewa kuti, ‘ukafamba m’njira zangu, ucibverambo malamulo yangu, un’dzakhala muyeruzi wa wanthu wa m’nyumba mwangu ndipo un’dzanyang’anirambo kintale yangu, ndipo nin’dzakubvumiza kufika pomwe pana wanthu omwe adaima panowa.’
8 “‘Tetekera iwe Djoswa Mkulu wa Antsembe pabodzi na anzako omwe adakhala pantsi pamaso pako, pakuti amuna amwewa ali ninga cizindikiro. Ndikubweresa mtumiki wangu wakucemeredwa Mphukira. 9 Onani mwala omwe ndauikha pamaso pa Djoswa! Mwalayo una maso 7; pamwalapo nin’nemba mwakucita kugoba ndipo nin’cosa bzakuphonya bza dzikoli pa ntsiku ibodzi,’ walewa tenepo Yahova wa anyankhondo.
10 “‘Pa ntsiku imweyo, ali-wentse wa imwepo an’dzacemera vizinyu wace kuti adzakhale naye pa muti wa uva na pa muti wa mkuyu,’” walewa tenepo Yahova wa anyankhondo.
4 Anjo omwe akhalewalewa nande ule adabwerera acidzandilamusa ninga akulamusa munthu omwe akhadagona tulo. 2 Patsogolo pace, iye adandibvunza kuti: “Kodi ukuwona ciyani?”
Inepano ndidamutawira kuti: “Ndikuwona cakuikhira kandiyero ca oro comwe cina tijela padzulu pace. Ico cina makandiyero 7, inde, makandiyero 7 ndipo padzulu pace pana matubu 7. 3 Ndipo pafupi pace pana miti miwiri ya maolivera, ubodzi uli kumbali yamadidi ya tijelayo ndipo unango uli kumadzere.”
4 Patsogolo pace, ndidabvunza anjo omwe akhalewalewa nande ule kuti: “Kodi bzimwebzi bzikuthandauza ciyani mbuya wangu?” 5 Tenepo anjo omwe akhalewalewa nandeyo adandibvunza kuti: “Kodi ukudziwa lini thandauzo la bzinthu bzimwebzi?”
Inepano ndidamutawira kuti: “Ndikudziwa lini mbuya wangu.”
6 Tsono iye adandiuza kuti: “Aya ni mafala ya Yahova kwa Zerubabele: ‘“Kuti bzinthu bzentsenebzi bzicitike pan’funika lini thimu la acikunda ayai mphanvu za wanthu, koma mzimu wangu,” walewa tenepo Yahova wa anyankhondo. 7 Kodi ndiwe yani, iwe phiri likulu? Pamaso pa Zerubabele iwepo un’dzasanduka cigwa* ndipo iye an’dzabweresa mwala wakumalizira wa pakhona* uko wanthu akukuwa kuti: “Mwalayu ngwakudeka, ngwakudeka kwene-kwene.”’”
8 Yahova adalewalewa nande pomwe kuti: 9 “Manja ya Zerubabele ndiyo yomwe yadakonza aliserse ya nyumbayi ndipo manja mabodzi-bodziyo ndiyo yomwe yan’dzamaliza, ndipo mun’dzadziwa kuti Yahova wa anyankhondo ndiye omwe wandituma kwa imwepo. 10 Kodi mbani omwe adanyozera kale ntsiku yakuyamba ya bzinthu bzing’ono? Pakuti wanthu an’dzakondwa ndipo an’dzawona cingwe cakupimira* m’manja mwa Zerubabele. Napo maso 7 yan’dzawonambo bzimwebzi. Yamweya ni maso ya Yahova yomwe yakunyang’ana uku na uku pa dziko lentse la pantsi.”
11 Patsogolo pace, ndidamubvunza anjoyo kuti: “Kodi miti miwiri ya maolivera yomwe ubodzi uli kumbali ya madidi ndipo unango uli kumbali ya madzere kwa caikukhira kandiyero ikuthandauza ciyani?” 12 Ndipo ndidamubvunza pomwe kaciwiri kuti: “Kodi mthambi* ziwiri za miti ya maolivera zomwe zikucosa mafuta ya mawonekedwe ya oro, yomwe yakupita na m’matubu mawiri ya oro zikuthandauza ciyani?”
13 Tenepo, iye adandibvunza kuti: “Kodi ukudziwa lini thandauzo la bzinthu bzimwebzi?”
Ine ndidamutawira kuti: “Ndikudziwa lini mbuya wangu.”
14 Iye adati: “Miti imweyi ikuimira anyakudzozedwa awiri omwe adaima kumadidi na kumadzere kwa Mbuya wa pa dziko lentse la pantsi.”
5 Ndidawona pomwe m’masomphenya mpukutu omwe ukhambuluka. 2 Anjo ule adandibvunza kuti: “Kodi ukuwona ciyani?”
Inepano ndidamutawira kuti: “Ndikuwona mpukutu omwe ukumbuluka, omwe udatalimpha pafupi-fupi mametru 9* ndipo khwankhwa lace nda mametru manai na meya.”
3 Tenepo, iye adandiuza kuti: “Limweri ni themberero lomwe likubwera pa dziko lentse la pantsi, thangwe ali-wentse omwe akuba akupasidwa lini nyathwa ninga momwe bzidanembedwera kumbali ibodzi ya mpukutuyu, ndipo ali-wentse omwe akulumbira mwakunama akupasidwambo lini nyathwa ninga momwe bzidanembedwera kumbali inango ya mpukutuyu. 4 Yahova wa anyankhondo walewa kuti: ‘Inepano nin’dzatumiza mpukutuyo kuti ukapite m’nyumba mwa mbava na m’nyumba mwa munthu omwe ambalumbira mwakunama m’dzina langu. Mpukutuyo un’dzapitiriza kukhala m’nyumbazo mpaka kudzongeratu nyumbazo, matabwa na minyala yace.’”
5 Patsogolo pace anjo omwe akhalewalewa nandeyo adandifenderera acindiuza kuti: “Ndaphata minyendo, djiguma uwone comwe cikubwera.”
6 Tenepo inepano ndidamubvunza kuti: “Kodi cimweci n’ciyani?”
Iye adanditawira kuti: “Cimweci ni combo cakupimira comwe cimbakwana efa* ibodzi.” Ndipo iye adapitiriza kuti: “Umu ni momwe wanthu wentse wa pa dziko la pantsi ambawonekera.” 7 Ndipo ndidawona munthu omwe adagwanankhula tampa ya xumbu ya combo cakupimiraco ndipo mkati mwa comboco mukhana mkazi omwe akhadakhala. 8 Tenepo iye adalewa kuti: “Mkaziyu dzina lace ni Uipi.” Iye adamugwinyira pomwe mkati mwa comboco, acicigwanankhira na tampa ya xumbu ire.
9 Patsogolo pace ndidanyang’anisa kudzulu ndipo ndidawona akazi awiri akubwera, ndipo iwo akhambuluka na conzi. Iwo akhana maphaphidwe ninga ya Segonya* ndipo iwo adanyamula comboco aciyenda naco m’dzaulu.* 10 Tenepo, ndidabvunza anjo omwe akhalewalewa nande ule kuti: “Kodi amwewa akuyenda naco kuponi comboci?”
11 Iye adanditawira kuti: “Akuyenda naco ku dziko la Sinari* kuti akamangire mkaziyo nyumba kumweko, nyumbayo ikakamala, mkaziyo an’kaikhidwa m’mwemo yomwe ni mbuto yace yakuthemera.”
6 Patsogolo pace, ndidawona pomwe m’masomphenya ngolo zinai za nkhondo zomwe zikhacokera pakati pa mapiri mawiri, ndipo mapiriyo yakhali ya mkuwa.* 2 Ngolo yakuyamba ikhapfuwidwa na makavalo mafuira, ndipo ngolo yaciwiri ikhapfuwidwa na makavalo mapswipa. 3 Ngolo yacitatu ikhapfuwidwa na makavalo macena, ndipo ngolo yacinai ikhapfuwidwa na makavalo yamathotho-mathotho.
4 Tenepo ndidabvunza anjo omwe akhalewalewa nande ule kuti: “Kodi ngolo zimwezi zikuimira ciyani mbuya wangu?”
5 Anjoyo adanditawira kuti: “Ngolozi zikuimira bzakulengedwa bzauzimu bzinai bzakudzulu, bzomwe bzikubwera pambuyo pakuwonekera pamaso pa Mbuya wa pa dziko lentse la pantsi. 6 Ngolo yomwe ikupfuwidwa na makavalo mapswipa ikuyenda ku dziko la ku norte, yomwe ikupfuwidwa na makavalo macena ikuyenda ku ng’ambu inango ya nyanza, ndipo yomwe ikupfuwidwa na makavalo yamathotho-mathotho ikuyenda ku dziko la ku suli. 7 Ndipo makavalo yamathotho-mathotho yakhafunisisa kufamba-famba pa dziko lentse la pantsi.” Patsogolo pace iye adati: “Ndokoni, mufambe-fambe pa dziko la pantsi.” Tenepo, makavaloyo yadayamba kufamba-famba pa dziko lentse la pantsi.
8 Anjo ule adandicemera mwakukuwa acindiuza kuti: “Ona, ukali bomwe Yahova akhanabo na dziko la ku norte bwamala thangwe ra makavalo yomwe yayenda kumweko.”
9 Yahova adalewalewa nande pomwe aciti: 10 “Ukatambire bzakupereka kwa Helidai, Tobiya na Jedaiya bzomwe adapasidwa na wanthu omwe akhadatengedwera ku ukapolo. Pa ntsiku imweyo, udzayende kumui kwa Djosiya mwana wa Zefaniya, komwe kuna wanthu omwe acokera ku Babiloniya. 11 Ukatambire prata na oro ndipo ukakonzere korowa ucikabvazika Djoswa mkulu wa antsembe, mwana wa Jehozadaki. 12 Ndipo ukamuuze kuti:
“‘Yahova wa anyankhondo walewa kuti: “Munthuyu dzina lace ni Mphukira. Iye an’dzaphukira pa mbuto yace ndipo an’dzamanga templo ya Yahova. 13 Umweyu ni omwe an’dzamanga templo ya Yahova ndipo an’dzapasidwa ulemerero. Iye an’dzakhala pa mpando wace wa umambo acitonga ninga mambo ndipo an’dzakhalambo wantsembe. Iye an’dzacita mabasa mawiriya kuti abwerese mtendere. 14 Korowayo in’dzakhala mu templo ya Yahova kuti wanthu adzakumbukire Helemu, Tobiya, Jedaiya pabodzi na Heni mwana wa Zefaniya. 15 Ndipo wale omwe ali kutali an’dzabwera kuti adzathandizire kumanga templo ya Yahova, ndipo imwepo mun’dzadziwa kuti Yahova wa anyankhondo ndiye omwe wandituma kwa imwepo.” Bzimwebzi bzin’dzacitika mukapitiriza kutetekera fala la Yahova Mulungu wanu.’”
7 Mu gole lacinai la utongi bwa mambo Dariyo, Yahova adalewalewa na Zakariya pa ntsiku yacinai, mwezi wacipfemba omwe ni mwezi wa Kisilevi.* 2 Wanthu wa ku Beteli adatuma Sarezeri na Rejemu-meleki pabodzi na wanthu wace kuti akadandaulire* Yahova kuti awasimbe. 3 Adawatuma kuti akauze antsembe wa pa nyumba* ya Yahova wa anyankhondo na apolofeta kuti: “Kodi nin’funika kulira mwezi wacixanu na kubzimana kudya ninga momwe nimbacitira magole yentseneya?”
4 Yahova wa anyankhondo adalewalewa nande pomwe kuti: 5 “Uza wanthu wentse wa m’dzikoli kuti: ‘Pomwe mukhabzimana kudya na kulira pa mwezi wacixanu na mwezi wacinomwe kwa magole 70, kodi mukhabzimanadi kudya* thangwe ra inepano? 6 Ndipo pomwe mukhambadya na kumwa, kodi mukhambacita lini bzimwebzi kuti mubzikondwese mwekha? 7 Kodi mukhafunikira lini kubvera mafala ya Yahova yomwe adayalewa mwakuphatisa basa apolofeta wakale-kale pomwe mu Jeruzalemu na m’mizinda yapafupi mukhana wanthu ndipo mukhana mtendere? Kodi mukhafunika lini kubvera Mulungu pomwe ku Negebe na ku Sefela kukhana wanthu?’”
8 Yahova adapitiriza kulewalewa na Zakariya kuti: 9 “Yahova wa anyankhondo walewa kuti: ‘Mbatongani mwacirungamo ndipo mbacitiranani bzinthu mwalufoyi lacadidi na mwa ntsisi 10 Lekani kumbabera akazi mamsiwa, nkhungwa,* mulendo ne nyakusauka ndipo lekanimbo kukumbuka bza kutaxula mwanzanu napo na mu mtima mwanu.’ 11 Tsono iwo adalamba kutetekera ndipo mwakubzikuza iwo adandilinza ngoto, acifunga makutu yawo kuti aleke kubva. 12 Iwo adaumisa mitima yawo ninga mwala wa diyamante* kuti aleke kubvera malamulo na mafala ya Yahova wa anyankhondo, yomwe adayatumiza na mzimu wace mwakuphatisa basa apolofeta wakale-kale. Ndipopa, Yahova wa anyankhondo adakalipa kwene-kwene.”
13 “‘Ninga momwe iwo alibe kunditetekera pomwe ndidawacemera,* inepanombo ndiribe kuwatetekera pomwe adandicemera,’ walewa tenepo Yahova wa anyankhondo. 14 ‘Tenepo, ndidawabalalisira ku mitundu yentse ya wanthu yomwe akhaidziwa lini ninga kuti amwazidwa na conzi camphanvu, ndipo dziko lomwe akhakhala lasanduka matere ndipo palibe omwe ambayenda kumweko ne kugwatira na kumweko; pakuti iwo acitisa dziko lakudeka kukhala lakugopswa.’”
8 Yahova wa anyankhondo adapitiriza kulewalewa nande kuti: 2 “Yahova wa anyankhondo walewa kuti: ‘Inepano nin’dzakhotcerera Ziyoni, inde, nin’dzamukhotcerera na mtima wangu wentse.’”
3 “Yahova walewa kuti: ‘Nin’dzabwerera ku Ziyoni ndipo nin’dzakhala mu Jeruzalemu. Jeruzalemu an’dzacemeredwa mzinda wa cadidi na phiri lakucena, phiri la Yahova wa anyankhondo.’”
4 “Yahova wa anyankhondo walewa kuti: ‘Amuna na akazi wacikulire an’dzakhala pomwe m’misika ya ku Jeruzalemu, ndipo ali-wentse an’dzakhala na mpsimbo yace thangwe ra kukalamba.* 5 Ndipo alumbwana na atsikana azinji an’dzasenzeka m’misika ya mu mzindamo.’”
6 “Yahova wa anyankhondo walewa kuti: ‘Napo kuti bzimwebzi bzingadzawoneke ninga bzakunesa kwene-kwene kwa wanthu omwe an’dzasala m’ntsiku zimwezo, kodi bzingadzakhalembo bzakunesa kwene-kwene kwa inepano?’ Walewa tenepo Yahova wa anyankhondo.”
7 “Yahova wa anyankhondo walewa kuti: ‘Inepano ndikupulumusa wanthu wangu kucokera m’madziko ya kumabvadzuwa na kumadokero. 8 Inepano nin’dzawabweresa pomwe ku Jeruzalemu ndipo iwo an’dzakhala kumweko. Iwo an’dzakhala wanthu wangu ndipo inepano nin’dzakhala Mulungu wawo wacadidi na wacirungamo.’”
9 “Yahova wa anyankhondo walewa kuti: ‘Khwimikani ndipo khalani wakulimbika pa basa, imwe omwe mukubva mafala yomwe yakucokera pa mulomo pa apolofeta, yomwe ni mafala mabodzi-bodzi yomwe yadalewedwa pa ntsiku yakumangidwa kwa aliserse ya nyumba ya Yahova wa anyankhondo kuti templo imangidwe. 10 Pomwe nthawe imweyo ikhanati kufika, wanthu na bzifuwo akhapagalidwi lini ndipo wanthu akhatazira kufamba thangwe ra anyamadulanthaka, pakuti ndidacitisa kuti wanthu wentse aphindukirane.’
11 “‘Koma tsapano, wanthuwa nin’dzawacitira lini pomwe bzinthu ninga momwe ndikhawacitira kale-kale,’ walewa tenepo Yahova wa anyankhondo. 12 ‘Pakuti kun’dzabzalidwa mbeu ya mtendere, muti wa uva un’dzabala bzisapo bzace, dziko lin’dzapereka phoso ndipo kudzulu kun’dzagwesa mame yace; nin’dzacitisa kuti bzentsenebzi bzidzakhale utaka kwa omwe an’dzasala. 13 Ninga momwe udakhalira themberero pakati pa mitundu inango, iwe nyumba ya Djuda na iwe nyumba ya Jirayeri, imwepo mun’dzakhala cisimbo thangwe nin’dzakupulumusani. Lekani kugopa! Khwimikani.’
14 “Pakuti Yahova wa anyankhondo walewa kuti: ‘“Ninga momwe ndikhadatsimikizirira kukupasani nyathwa pomwe makolo yanu yakale yadandikalipisa,” walewa tenepo Yahova wa anyankhondo, “ndipo ndiribe kuwabvera ntsisi, 15 tsapano ndatsimikizambo kucitira bzabwino Jeruzalemu na nyumba ya Djuda. Tenepo lekani kugopa!”’
16 “‘Ibzi ndibzo bzomwe mun’funika kumbacita: Mbalewani cadidi kwa winango na mwanzace ndipo mukambatonga mirandu pa bzipata bza m’mizinda yanu, mbatongani mwakubverana na cadidi na mwakulimbikisa mtendere. 17 Leka kukumbuka bza kutaxula mwanzako na mu mtima ndipo leka kumbafuna kulumbira kuli-kwentse kwakunama, pakuti inepano nimbawenga bzinthu bzentsenebzi,’ walewa tenepo Yahova.”
18 Yahova wa anyankhondo adapitiriza kulewalewa nande kuti: 19 “Yahova wa anyankhondo walewa kuti: ‘Kubzimana kudya* kwa mwezi wacinai, kubzimana kudya kwa mwezi wacixanu, kubzimana kudya kwa mwezi wacinomwe na kubzimana kudya kwa mwezi wacikhumi, zin’dzakhala ntsiku za cikondweso na kukomedwa kwa nyumba ya Djuda. Tenepo, mbafunani cadidi na mtendere.’
20 “Yahova wa anyankhondo walewa kuti: ‘In’dzafika ntsiku yomwe wanthu wa mitundu yakusiyana-siyana na wanthu wa m’mizinda mizinji an’dzabwera; 21 ndipo wanthu wa mu mzinda ubodzi an’dzayenda kukauza wanthu wa mu mzinda munango kuti: “Mbatiyendeni, mbatiyendeni tikadandaulire Yahova kuti atisimbe ndipo tikamunyang’ane Yahova wa anyankhondo. Inepano ndikuyendambo kumweko.” 22 Wanthu wa mitundu mizinji na mitundu yamphanvu an’dzalinga Yahova wa anyankhondo ku Jeruzalemu na kukumbira Yahova kuti awasimbe.’
23 “Yahova wa anyankhondo walewa kuti: ‘Mu ntsiku zimwezo, amuna 10 wakucokera m’bzirewedwe bzentse bza mitundu ya wanthu an’dzaphatirira cakubvala ca Mdjuda, acimbalewa kuti: “Tin’funa kuyenda namwe, thangwe tabva kuti Mulungu anamwe.”’”
9 Cidziwiso:
“Aya ni mafala ya Yahova yakutonga dziko la Hadaraki
Na Damasko,
Pakuti maso ya Yahova yali tceru pa wanthu
Na madzinza yentse ya Jirayeri.
2 Mafalaya yakutongambo Hamate omwe akucita naye malire,
ndipo yakutongambo Tiro na Sidoni thangwe ana nzeru kwene-kwene.
3 Tiro wakonza muro kuti abzikhotcerere.
Iye adabzigwezekera prata ninga mataka,
Ndipo oro ninga matope ya m’miseu.
4 Yahova an’dzamutengera cuma cace,
Iye an’dzapfudza acikunda wace mwakuwathusira m’nyanza;
Ndipo Tiroyo an’dzatenthedwa na moto.
5 Asikeloni an’dzawona bzimwebzi ndipo an’dzabva mantha,
Gaza an’dzabva kuwawa kwene-kwene,
Ndipo Ekroni an’dzabvambo kuwawako, thangwe omwe akhamuthemba wacitisidwa manyazi.
Ku Gaza kun’dzakhala lini pomwe mambo
Ndipo ku Asikeloni kun’dzakhalidwa lini pomwe na wanthu.
6 Mwana wa panjira an’dzakhala ku Asidode
Ndipo inepano nin’dzamalisa kusamwa kwa Mfilisteu.
7 Nin’dzacosa mulopa mkamwa mwace,
Na bzinthu bzakunyantsa m’mano mwace
Ndipo omwe adzasale an’dzakhala wa Mulungu wathu.
Iye an’dzakhala ninga mtsogoleri wa Djuda
Ndipo Ekroni an’dzakhala ninga Mjebusi.
8 Nin’dzamanga tendi kunja kwa nyumba yangu kuti ndilindire,
Kuti paleke kugumanika nyakupita ne nyakubula.
Palibe kapitau ali-wentse omwe an’dzapita na kumweko,
Pakuti ine ndawona na maso yangu bzomwe bzidawacitikira.*
9 Kondwa kwene-kwene, iwe mwana wacikazi wa Ziyoni,
Kuwa mwakukondwa, iwe mwana wacikazi wa Jeruzalemu,
Ona! Mambo wako akubwera kwa iwepo.
Iye ngwakulungama ndipo akubweresa cipulumuso,
Ngwakubzicepesa ndipo akubwera adapakira pa bulu.
Pa kabulu kacimuna, kamwana ka bulu wacikazi.
10 Nin’dzacosa ngolo za nkhondo ku Efraimu
Ndipo ku Jeruzalemu nin’dzacosa makavalo.
Kun’dzakhala kulibe pomwe uta bwa nkhondo.
Mamboyo an’dzalewa mafala ya mtendere kwa wanthu wa mitundu inango;
Utongi bwace bun’dzayambira ku nyanza, mpaka kufika ku nyanza inango,
Ndipo bun’dzacokera ku Mkulo* mpaka ku mamaliziro ya dziko la pantsi.
11 Tsono mkaziwe, thangwe ra mulopa wa mpangano wako,
Nin’dzatsudzula anyam’kawoko wako mu mcera omwe ulibe madzi.
12 Bwererani pa mbuto yakukhotcerereka, imwe anyam’kawoko omwe muna cidikhiro.
Lero ndikukuuza kuti:
‘Nin’dzakusimba kubwerezera kawiri, iwe mkaziwe.
13 Nin’dzafunya Djuda ninga uta bwangu,
Ndipo Efraimu an’dzakhala msewe wa utabo.
Iwe Ziyoni, nin’dzalamusa wana wako
Kuti akamenyane na wana wa Gresiya,
Ndipo nin’dzakucitisa kukhala ninga xipada ya mcikunda wamphanvu.’
14 Bzin’dzawonekeratu padeca kuti Yahova ali pakati pa wanthu wace,
Ndipo msewe wace un’dzathamanga ninga mpheni.
Yahova Mbuya Mkululetu an’dzaliza nyanga,
Ndipo iye an’dzayenda na conzi camphanvu ca ku suli.
15 Yahova wa anyankhondo an’dzawakhotcerera,
Minyala yomwe wanthu an’dzathusa na sikopo in’dzawapweteka lini.
Ndipo iwo an’dzakunda anyamadulanthaka wawo;
Iwo an’dzamwa acikuwa-kuwa ninga kuti amwa vinyu
Ndipo iwo an’dzakhala ninga tijela yakudzala na vinyu;
An’dzakhala ninga mulopa wakuthululidwa m’makhona* ya paguwa la ntsembe.
16 Pa ntsiku imweyo, Yahova Mulungu wawo an’dzawapulumusa,
Ninga momwe makabusa ambapulumusira mabira yace;
Pakuti iwo an’dzakhala ninga minyala yakuyetima ya pa korowa ya umambo mu dziko lace.
17 Ubwino bwace n’bukulu
Ndipo iye ngwakudeka kwene-kwene!
Cakudya na vinyu ipsa bzimbapasa mphanvu maswaka na madende.”
10 “Kumbirani Yahova kuti akubvumbisireni nvula pa nyengo ya nvula yakumalizira.
Pakuti ni Yahova omwe ambakonza mitambo ya nvula,
Ndipo ambabvumbisira wanthu nvula yamphanvu.
Iye ambameresa bzakudya m’munda mwa ali-wentse.
2 Pakuti bzifanikiso bza terafimu* bzimbalewa mafala yakupumpsa;
Ndipo anyakuvima ambawona masomphenya yakunama.
Iwo ambalewa bza maloto yakusaya basa,
Iwo ambayezera kutsangalaza, tsono kutsangalaza kwawoko n’kwapezi-pezi.
Ndipopa wanthu an’dzadzungaira ninga mabira,
Ndipo iwo an’dzabonera thangwe ra kusaya makabusa.
3 Ukali bwangu bwagakira abusa,
Ndipo nin’dzapasa mulandu atsogoleri* wawo wakuipa;
Pakuti ine Yahova wa anyankhondo ndakumbukira mabira yangu, nyumba ya Djuda,
Ndipo ndaicitisa kukhala kavalo wangu wakulemekezeka wa pa nkhondo.
4 Mu nyumba ya Djuda mun’dzacoka mtsogoleri,
Mun’dzacokambo mtongi na nyakuthandiza,
Ndipo mun’dzacoka uta bwa nkhondo;
Nyakunyang’anira ali-wentse an’dzacoka mwa iye, wanthu wentsenewa an’dzacoka mwa iye.
5 Ndipo iwo an’dzakhala ninga acikunda wamphanvu,
Omwe akuponda-ponda matope ya m’miseu ku nkhondo.
An’dzamenya nkhondo pakuti Yahova anawo,
Ndipo anyakupakira pa makavalo an’dzacitisidwa manyazi.
6 Nin’dzacitisa nyumba ya Djuda kukhala yamphanvu,
Ndipo nin’dzapulumusa nyumba ya Zuze.
Nin’dzawabwezeresa ku dziko lawo
Pakuti nin’dzawabvera ntsisi;
Iwo an’dzakhala ninga kuti ndikhalibe kuwalamba,
Pakuti ine ndine Yahova Mulungu wawo ndipo nin’dzawatawira.
7 Wanthu wa ku Efraimu an’dzakhala ninga anyankhondo wamphanvu,
Ndipo mu mtima mwawo an’dzakondwa ninga kuti amwa vinyu.
Wana wawo an’dzawona bzimwebzi ndipo an’dzakondwa,
Mitima yawo in’dzakondwa thangwe ra Yahova.
8 ‘Nin’dzawalizira mphethwa ndiciwatsonkhanisa pabodzi,
Pakuti ine nin’dzawalombola ndipo iwo an’dzakhala azinji;
Ndipo an’dzapitiriza kuwanda.
9 Napo kuti nin’dzawamwaza ninga mbeu pakati pa wanthu wa mitundu inango,
Iwo an’dzandikumbukira pomwe ali kumbuto zakutali;
Iwo pabodzi na wana wawo an’dzakhala pomwe na mphanvu ndipo an’dzabwerera.
10 Nin’dzawabweresa kucokera ku dziko la Edjipito
Ndipo nin’dzawatsonkhanisa kucokera ku Asiriya;
Nin’dzawabweresa ku dziko la Jiliyadi na Lebanoni,
Ndipo kun’dzakhala kulibe mbuto yakukwanira kwa iwo.
11 Nin’dzapita na pa nyanza, ndiciibweresera tsoka;
Nin’dzagawa mabimbi ya nyanzayo
Ndipo madzi ya mu mkulo wa Nilo yan’dzauma.
Nin’dzapfudza dziko la Asiriya lomwe ndakubzikuza,
Ndipo mpsimbo ya umambo ya Edjipito in’dzacosedwa.
12 Ine Yahova nin’dzawacitisa kukhala wamphanvu,
Ndipo bzicito bzawo bzin’dzalemekezesa dzina langu,’ walewa tenepo Yahova.”
11 “Iwe Lebanoni, fungula misuwo yako,
Kuti moto utenthe miti yako ya mkungudza.
2 Lira mwakukuwa, iwe muti wa Junípero,* pakuti muti wa mkungudza wagwa;
Ndipo miti mikulu-mikulu yapfudzidwa!
Lirani mwakukuwa, imwe miti mikulu-mikulu ya ku Basani,
Pakuti thengo lakugudira lapfudzidwa!
3 Tetekerani! Amakabusa akulira mwakukuwa,
Thangwe ulemerero bwawo bwamala,
Tetekerani! Mphondolo zamphanvu zikulirima,
Thangwe thengo lakugudira la mphepete mwa mkulo wa Jordano lapfudzidwa.
4 “Yahova Mulungu wangu walewa kuti: ‘Usa mabira yangu yomwe yakhafuna kuphedwa. 5 Anyakuyagula adayapha koma alibe kupasidwa mulandu, ndipo anyakuyagulisa ambati: “Atumbizidwe Yahova pakuti nin’dala.” Ndipo amakabusa wa mabirayo alibe nayo ntsisi.’
6 “‘Nin’dzabvera lini pomwe ntsisi wanthu wakukhala m’dziko limweri,’ walewa tenepo Yahova. ‘Nin’dzacitisa munthu ali-wentse kupundizidwa na mwanzace ndipo an’dzapundizidwambo na mambo wace; iwo an’dzadzonga dzikoli ndipo ine nin’dzawapulumusa lini m’manja mwawo.’”
7 Ndipo ndidayamba kuusa mabira yomwe yakhafuna kuphedwa yale, ndidacita bzimwebzi thangwe ra imwepo, wanthu wakutsautsika wa m’thimu la mabirali. Tenepo ndidatenga mpsimbo ziwiri, ibodzi ndidaipasa dzina lakuti Cikondweso ndipo inangoyo ndidaipasa dzina lakuti Ciphatano, ndipo ndidayamba kuusa thimu la mabiralo. 8 Patsogolo pace, m’mwezi ubodzi ndidacosa amakabusa atatu thangwe ndikhakwanisa lini kupirira nawo ndipo iwombo akhaipidwa nande. 9 Ndipo ndidalewa kuti: “Nin’siya kukuusani. Omwe akufa mbafe, omwe akupfudzidwa mbapfudzidwe ndipo anyakusala adyane.” 10 Tenepo ndidatenga mpsimbo yangu yomwe ndidaipasa dzina lakuti Cikondweso ire ndiciitcola-tcola. Ndidacita bzimwebzi kuti ndimalise mpangano omwe ndikhadaucita na wanthu wa mtundu wangu. 11 Pa ntsiku imweyo, mpanganoyo udamala ndipo mabira yakutsautsika yale yomwe yakhawona bzomwe bzikhacitikabzo, yadadziwa kuti bzomwe ndikhadacitabzo ni bzomwe Yahova akhadalewa.
12 Patsogolo pace ndidawauza kuti: “Penu mukuwona kuti mpsakuthemera, mundipagali, tsono penu mukuwona kuti mpsakuthemera lini, lekani kundipagaliko.” Tenepo iwo adandipagali* kobiri 30 za prata.
13 Patsogolo pace Yahova adandiuza kuti: “Kazithuse m’mbuto yakukoyera cuma, zimwezi ni kobiri zakufunika kwene-kwene zomwe akuwona kuti angandigule nazo.” Tenepo ndidatenga kobiri 30 za prata zire ndicikazithusa m’mbuto yakukoyera cuma pa nyumba ya Yahova.
14 Patsogolo pace ndidatcola-tcola mpsimbo yangu yaciwiri ire yomwe ndidaipasa dzina lakuti Ciphatano kuti ndimalise ubale pakati pa Djuda na Jirayeri.
15 Ndipo Yahova adandiuza kuti : “Tsapano tenga bzinthu bzakuphatira basa bza makabusa wapezi-pezi. 16 Pakuti nin’dzacitisa kuti m’dzikoli mukhale na makabusa munango. Makabusa umweyo an’dzasamalira lini mabira yomwe yalikufa. Iye an’dzanyang’ana lini tumabira tung’ono tomwe twataika, an’dzasamalira lini bira omwe wapwetekeka ne kudyesa bira omwe ngwathanzi, m’mbuto mwace, iye an’dzadya nyama ya bira omwe ngwakunenepa na kupswukula njondo za mabirayo.
17 Tsoka kwa makabusa wangu omwe ngwapezi-pezi, omwe wasiya thimu la mabira!
Xipada in’dzatema boko lace na kuboola diso lace lamadidi.
Boko lace lin’dzafoteratu lentse,
Ndipo diso lace lamadidi lin’dzacita mdima.”
12 Cidziwiso:
“Aya ni mafala ya Yahova yakulewa bza Jirayeri,”
Yahova omwe adafuthula kudzulu ninga cakubvala,
Na kukonza aliserse ya dziko la pantsi,
Na omwe adalenga moyo omwe wanthu anawo walewa kuti:
2 “Nin’dzacitisa Jeruzalemu kukhala tijela yomwe in’dzacitisa mitundu yentse yakumuzungulira kudzedzereka. Djuda an’dzazunguliridwa ndipo Jeruzalemu an’dzazunguliridwambo. 3 Pa ntsiku imweyo, nin’dzacitisa Jeruzalemu kukhala mwala wakulemera kwa wanthu wa mitundu yentse. Wentse omwe an’nyamula mwala umweyo an’dzapwetekeka kwene-kwene, ndipo mitundu yentse ya wanthu ya pa dziko la pantsi in’dzatsonkhana kuti imenyane naye. 4 Pa ntsiku imweyo,” Yahova walewa kuti: “Nin’dzacitisa kavalo ali-wentse kubva mantha kwene-kwene ndipo anyakupakira pa makavalowo nin’dzawacitisa msala. Maso yangu yan’dzanyang’anisisa nyumba ya Djuda ndipo kavalo ali-wentse wa wanthu wa mitundu inango nin’dzamucitisa kukhala zimola. 5 Ndipo atsogoleri wa Djuda an’dzalewa mu mtima mwawo kuti: ‘Wanthu wakukhala mu Jeruzalemu ni mphanvu yathu, pakuti Yahova wa anyankhondo ni Mulungu wawo.’ 6 Pa ntsiku imweyo, nin’dzacitisa atsogoleri wa Djuda kukhala ninga fugau* ya moto pakati pa nkhuni ndipo an’dzakhalambo ninga mitsatso ya moto pakati pa tirigu. Iwo an’dzatentha mitundu yentse ya wanthu yakuwazungulira yomwe iri kumbali ya kumadidi na ya kumadzere ndipo wanthu wa mu Jeruzalemu an’dzapitiriza kukhala mu mzinda wawo wa Jeruzalemu.
7 “Yahova an’dzayamba kupulumusa matendi ya Djuda, tenepo, kudeka kwa nyumba ya Davide na kudeka kwa wanthu wakukhala mu Jeruzalemu kun’dzakhala lini kukulu kwene-kwene kuposa kudeka kwa Djuda. 8 Pa ntsiku imweyo, Yahova an’dzakhotcerera wanthu wakukhala mu Jeruzalemu; munthu omwe an’dzakhukhumudwa pa ntsiku imweyo an’dzakhala wamphanvu ninga Davide, ndipo nyumba ya Davide in’dzakhala yamphanvu ninga Mulungu ndipo in’dzakhalambo ninga anjo wa Yahova omwe akutsogolera wanthu wace. 9 Kulewa cadidi, pa ntsiku imweyo nin’dzapfudza mitundu yentse ya wanthu yomwe ikubwera kudzamenyana na Jeruzalemu.
10 “Nin’dzathululira mzimu wangu pa nyumba ya Davide na pa wanthu wakukhala mu Jeruzalemu, inepano nin’dzawabvuma ndipo nin’dzatetekera mipembo yawo yomwe ambaicita mwakudandaulira, ndipo iwo an’dzanyang’anisa munthu omwe adamulasa ndipo an’dzamulirira ninga kuti akulira mwana wacimuna m’bodzi omwe wafa; iwo an’dzalira mwakuwawidwa ninga momwe ambalirira pa nkhawa ya mwana wacimuna wakuyamba kubadwa. 11 Pa ntsiku imweyo, wanthu an’dzalira kwene-kwene mu Jeruzalemu ninga momwe adalirira ku Hadadrimoni m’cigwa ca Megido. 12 Wanthu wa m’dziko lentsero an’dzalira mwakukuwa. Banja liri-lentse lin’dzalira palokha; banja la nyumba ya Davide lin’dzalira palokha ndipo akazi wa m’banjali an’dzalirambo pawokha; banja la nyumba ya Natani lin’dzalira palokha ndipo akazi wa m’banjali an’dzalirambo pawokha; 13 banja la nyumba ya Levi lin’dzalira palokha ndipo akazi wa m’banjali an’dzalirambo pawokha; banja la Simei lin’dzalira palokha ndipo akazi wa m’banjali an’dzalirambo pawokha; 14 ndipo mabanja manango yentse yan’dzalirambo, banja liri-lentse lin’dzalira palokha ndipo akazi wa m’mabanjayo an’dzalirambo pawokha.
13 “Pa ntsiku imweyo, pan’dzaceredwa mcera pa nyumba ya Davide na kwa wanthu wakukhala mu Jeruzalemu kuti adzacenesedwe ku pikado zawo na bzakunyantsa bzawo.
2 Yahova wa anyankhondo walewa kuti: “Pa ntsiku imweyo, nin’dzapfudza madzina ya bzifanikiso m’dziko lentseli ndipo bzifanikisobzo bzin’dzakumbukiridwa lini pomwe; ndipo nin’dzacosambo apolofeta na mizimu yakunyantsa m’dzikoli. 3 Pakadzagumanika munthu ali-wentse wakulewa pomwe polofesiya, pai wace na mai wace omwe adamubereka an’dzamuuza kuti: ‘Iwepo unifa thangwe walewa bzinthu bzakunama m’dzina la Yahova.’ Ndipo pai wace na mai wacewo an’dzamupfika na cisu thangwe ra kulewa polofesiya.
4 “Pa ntsiku imweyo, apolofeta an’dzabva manyazi na masomphenya yomwe awona pomwe akulewa polofesiya ndipo iwo an’dzabvala lini pomwe bzakubvala bzakupambulika bza ukuse kuti apumpse wanthu. 5 Mpolofeta ali-wentse an’dzalewa kuti: ‘Ndine lini mpolofeta, ndine mulimi, thangwe munthu munango adandigula kuti ndikhale kapolo wace kuyambira pomwe ndikhali mwana.’ 6 Tsono akadzabvunzidwa kuti: ‘Kodi bzironda bzomwe bziri m’thupi mwakobzi wacitiwanyi?’ Iye an’dzatawira kuti: ‘Ndidapwetekedwa pomwe ndikhali kumui kwa axamwali wangu.’”*
7 “Iwe xipada, lamuka kuti ukaphe makabusa wangu,
Ndoko ukaphe ule omwe ni xamwali wangu,” walewa tenepo Yahova wa anyankhondo.
“Pweteka makabusa ndipo mabira yabalalike;
Inepano nin’dzatsangalaza mabira yakunyozeka.”
8 “Mu dziko lentseli wanthu azinji an’dzaphedwa,
Ndipo mbang’ono-ng’ono omwe an’dzasala,”
Walewa tenepo Yahova.
9 Ndipo nin’dzatenga wanthu wakusalawo ndiciwaikha pa moto,
Nin’dzawacenesa ninga momwe ambacenesera prata,
Ndipo nin’dzawapima ninga momwe ambapimira oro.
Iwo an’dzacemera dzina langu,
Ndipo inepano nin’dzawatawira,
Nin’dzalewa kuti: ‘Awa ni wanthu wangu,’
Ndipo iwo an’dzalewa kuti: ‘Yahova ni Mulungu wathu.’”
14 “Tetekerani! Ntsiku ya Yahova ikubwera, ntsiku yomwe anyamadulanthaka wanu an’dzapamba bzinthu bzanu acigawana imwepo mukuwona. 2 Nin’dzatsonkhanisa mitundu yentse ya wanthu kuti imenye nkhondo na Jeruzalemu, mzindayo un’dzakundidwa, bzinthu bza m’nyumba bzin’dzakundidwa ndipo akazi an’dzapswithidwa. Kati na kati ya wanthu wa mu mzindamo an’dzayendesedwa ku ukapolo ndipo anyakusala an’dzapitiriza kukhala mu mzindamo.
3 “Yahova an’dzayenda kukamenyana na wanthu wa mitundu inangoyo ninga momwe adacitira pakumenyana na anyamadulanthaka wace m’mbuyomu. 4 Pa ntsiku imweyo, nzayo zace zin’dzaponda Phiri la Miolivera lomwe liri kutsogolo kwa Jeruzalemu, kumabvadzuwa ndipo Phiri la Mioliveralo lin’dzagawika pakati kucokera kumabvadzuwa mpaka kumadokero ndipo pakati pa mapiriyo pan’dzakhala na cigwa cikulu kwene-kwene. Mbali ibodzi ya phirilo in’dzayenda ku norte ndipo mbali inangoyo in’dzayenda ku suli. 5 Imwepo mun’dzathawira ku cigwa ca mapiri yangu pakuti cigwa ca mapirico cin’dzafika mpaka ku Azeli. Mun’dzathawa ninga momwe mudacitira pakuthawa citeketeke comwe cidacitika mu ntsiku za Uziya mambo wa Djuda, ndipo Yahova Mulungu wangu an’dzabwera ndipo anyakucena wentse an’dzakhala naye pabodzi.
6 “Pa ntsiku imweyo kun’dzakhala kulibe ceza cakupambulika, ndipo bzinthu bzin’dzauma thangwe ra kudjedjera kwene-kwene. 7 Ntsikuyo in’dzakhala yakusiyana na ntsiku zentse ndipo in’dzacemeredwa ntsiku ya Yahova. Kun’dzakhala kulibe masikati ne usiku thangwe usiku bun’dzakhala ninga masikati. 8 Pa ntsiku imweyo, madzi yamoyo yan’dzayerera kucokera ku Jeruzalemu ndipo kati na kati ya madziyo yan’dzayenda ku nyanza* ya kumabvadzuwa, ndipo kati na kati ya madzi manangoyo yan’dzayenda ku nyanza* ya kumadokero. Bzimwebzi bzin’dzacitika m’cirimo na mu nthawe ya mphepo. 9 Ndipo Yahova an’dzakhala mambo pa dziko lentse la pantsi. Pa ntsiku imweyo, Yahova an’dzakhala m’bodzi ndipo dzina lace lin’dzakhalambo libodzi.
10 “Dziko lentse lin’dzakhala ninga Araba, kuyambira ku Jeba mpaka ku Rimoni ku suli kwa Jeruzalemu, ndipo Jeruzalemu an’dzaikhidwa pa mbuto yapadzulu, acikhalidwa na wanthu pa mbuto yace kuyambira ku Cipata ca Benjamini mpaka ku Cipata Cakuyamba mpaka kukafika pa Cipata Capakhona, ndipo kucokerambo pa ntsanza ya Hananeli mpaka kufika pa mbuto yakupondera uva ya mambo. 11 Wanthu an’dzakhala m’mwemo ndipo mzindayo un’dzapasidwa lini pomwe mulandu wakuti upfudzidwe, ndipo wanthu mu Jeruzalemu an’dzakhala mwa mkhomeko.
12 “Cisi comwe Yahova an’dzabweresera wanthu wa mitundu inango omwe an’dzamenyana na Jeruzalemu n’cici: Thupi lawo lin’dzabvunda iwo akana moyo, maso yawo yan’dzabvundambo pomwe yali m’mbuto mwace ndipo lirime lawo lin’dzabvunda mkamwa mwawo.
13 “Pa ntsiku imweyo, Yahova an’dzacitisa phiringu pakati pawo ndipo ali-wentse an’dzaphata boko la mwanzace acimumenya. 14 Djuda an’dzamenyambo nkhondo mwakuthandizira Jeruzalemu ndipo an’dzatsonkhanisa cuma ca wanthu wa mitundu yentse yapafupi. An’dzatsonkhanisa oro, prata na bzakubvala bzizinji.
15 “Ndipo cisi cakundendemerana na cimweci cin’dzabwererambo makavalo, bzirombo bzakuwoneka ninga kavalo, ngamira, mabulu na bzirombo bzentse bzakugumanika m’misasa ya anyamadulanthaka wawo.
16 “Nyakusala ali-wentse wa mitundu yentse ya wanthu omwe adabwera kudzamenyana na Jeruzalemu, an’dzayenda kumweko gole liri-lentse kuti akagodame* pamaso pa mambo, omwe ni Yahova wa anyankhondo, acikacita Phwando la Misasa. 17 Tsono ali-wentse wa m’mabanja ya pa dziko lentse la pantsi akasaya kuyenda ku Jeruzalemu kukagodamira mambo omwe ni Yahova wa anyankhondo, nvula in’dzamubvumbira lini. 18 Ndipo wanthu wa ku Edjipito akasaya kubwera mu mzindayo, nvula in’dzawabvumbirambo lini, m’mbuto mwace, Yahova an’dzawabweresera cisi comwe adabweresera mitundu ya wanthu omwe alibe kuyenda kukacita Phwando la Misasa. 19 Cimweci ni cirango comwe cin’dzabwerera Edjipito pabodzi na mitundu yentse yomwe iribe kuyenda ku Phwando la Misasa, pakuti kucita bzimwebzi ni pikado.
20 “Pa ntsiku imweyo, mafala yakuti ‘Kucena n’kwa Yahova!’ yan’dzanembedwa m’masino yomwe yambakhala m’khosi mwa makavalo, ndipo mapoto* yakuphikira ya m’nyumba ya Yahova yan’dzakhala ninga matijela patsogolo pa guwa la ntsembe. 21 Poto iri-yentse yakuphikira ku Jeruzalemu na ku Djuda in’dzakhala yakucena ndipo in’dzakhalambo ya Yahova wa anyankhondo, ndipo wentse omwe an’dzapereka ntsembe an’dzabwera, acidzaphatisa basa manango mwa mapotoyo kuti aphikire ntsembezo. Pa ntsiku imweyo, m’nyumba ya Yahova wa anyankhondo mun’dzakhala mulibe pomwe Mkanani*.”
Lomwe limbathandauza “Yahova Wakumbukira.”
Ayai, “bwererani ku.”
Onani Mafala Yakuphampha B15.
Ayai, “litsito.”
Mafala yace caiyo: “ku mbali zinai za kudzulu.”
Ayai, “mulandu wako.”
Ayai, “bzakupambulika.”
Ayai, “gowa.”
Ayai, “paponta.”
Mafala yace caiyo: “mwala, mtobve.”
Zimwezi ni mthambi zomwe zina bzisapo.
Mafala yace caiyo: “Udatalimpha makovado 20 ndipo khwankhwa lace nda makovado 10.” Onani Mafala Yakuphampha B14.
Mafala yace caiyo: “efa.” Efa yomwe ikulewedwayo, ni combo ayai dengu yomwe ikhaphatisidwa basa pa kupimira efa ibodzi, yomwe ikhali malitru 22. Onani Mafala Yakuphampha B14.
Ayai, “Nyantcengwe; Mulenga-conzi.”
Mafala yace caiyo: “Pakati pa dziko na kudzulu.”
Komwe ni ku Babiloniya.
Ayai, “kobre.”
Onani Mafala Yakuphampha B15.
Ayai, “akakhazikise pantsi mtima wa.”
Ayai, “templo.”
Ayai, “mukhacitadi jejum.”
Mafala yace caiyo: “mwana wakusaya pai.”
Ayai pinango, “mwala wakuuma.”
Mafala yace caiyo: “iye adawacemera.”
Mafala yace caiyo: “thangwe ra kuwanda kwa ntsiku.”
Ayai, “kucita jejum.”
komwe ni kubonera kwa wanthu wace.
Omwe ni Eufrate.
Ayai, “m’maponta.”
Ayai, “mirungu ya banja; bzifanikiso.”
Mafala yace caiyo: “atonde.”
Umweyu ni muti omwe udandendemerana na muti wa mkungudza.
Mafala yace caiyo: “adapima.”
Ayai, “mbaula.”
Ayai, “kwa wale omwe ambandifuna.”
Yomwe ni Nyanza Yakufa.
Yomwe ni Nyanza ya Mediteraniyo.
Ayai, “akanamate.”
Ayai, “mikhate.”
Ayai pinango, “nyamalonda.”