MALAKIYA

1 Cidziwiso:

Aya ni mafala ya Yahova kwa Ajirayeri mwakuphatisa basa Malakiya:*

2 Yahova walewa kuti: “Inepano nimbakufunani wanthumwe,”

Tsono imwepo mwalewa kuti: “Kodi mumbalatiza tani kuti mumbatifuna?”

“Kodi Esau akhali lini m’bale wace wa Djakobo?” walewa tenepo Yahova. “Tsono ine ndidafuna Djakobo, 3 ndipo ndidawenga Esau. Ndacitisa phiri lace kukhala matere ndipo ndaperekambo utaka bwace kwa mphumphi za m’dambo.”

4 “Napo Edomu acilewa kuti: ‘Ifepano tapfudzidwa, tin’bwerera ticikamanga pomwe ku matere yathuyo,’ tsono Yahova wa anyankhondo walewa kuti: ‘Iwo an’kamanga pomwe, koma inepano nin’kagwesa. Iwo an’dzacemeredwa “mphimpha ya bzakuipa” na “wanthu wakulambidwa na Yahova mpaka kale-kale.” 5 Imwepo mun’dzawona bzimwebzi na maso yanu ndipo mun’dzalewa kuti: “Atumbizike Yahova m’mphimpha zentse za Jirayeri.”’”

6 “‘Mwana ambalemekeza pai wace, ndipo mtumiki ambalemekeza mbuya wace. Tenepo, penu ndine pai, thangwe ranyi mukundilemekeza lini?’ Ndipo penu ndine mbuya* thangwe ranyi mukundigopa* lini?’ Ine Yahova wa anyankhondo ndikuuza imwepo antsembe omwe mumbanyoza dzina langu.

“‘Tsono imwepo mumbati: “Kodi ifepano timbalinyoza tani dzina lanulo?”’

7 “‘Mwalinyoza pakupereka cakudya* cakupswipa pa guwa langu la ntsembe.’

“‘Imwe mukulewa kuti: “Takupswipizani tani?”’

“‘Mwandipswipiza pakulewa kuti: “Meza ya Yahova njakunyozeka.” 8 Mukapereka ntsembe cifuwo comwe n’cizimola mumbalewa kuti: “Bziribe mulandu.” Ndipo mukapereka ntsembe cifuwo cakupunduka ayai cakuduwala mumbati: “Bziribe mulandu.”’”

“Ndaphata minyendo, yezerani kukapereka bzimwebzi kwa governadori wanu. Kodi iye an’dzakomedwa namwe? Kodi iye an’dzakutambirani bwino?” walewa tenepo Yahova wa anyankhondo.

9 “Tsapano ndaphata minyendo, kumbirani Mulungu kuti atibvere ntsisi. Tsono imwepo mukapereka ntsembe ninga zimwezi, kodi iye an’dzakubverani ntsisi?” walewa tenepo Yahova wa anyankhondo.

10 “Mbani pakati panu angafunge misuwo ya templo fovolo? Pakuti mumbafuna kupagalidwi kuti mugase moto pa guwa langu la ntsembe. Nimbakomedwa lini namwe,” walewa tenepo Yahova wa anyankhondo “ndipo nimbakomedwambo lini na ntsembe iri-yentse yomwe mumbapereka kucokera m’manja mwanu.”

11 “Pakuti dzina langu lin’dzakhala likulu pakati pa mitundu ya wanthu, kucokera kumabvadzuwa mpaka kumadokero. Kuli-kwentse kun’dzaperekedwa ntsembe za utsi ndipo ntsembezo zin’dzaperekedwa m’dzina langu ninga mphaso zakucena, pakuti dzina langu lin’dzakhala likulu pakati pa mitundu ya wanthu,” walewa tenepo Yahova wa anyankhondo.

12 “Tsono imwepo mukulipswipiza* mwakumbalewa kuti: ‘Meza ya Yahova njakupswipa ndipo ntsembe na cakudya comwe ciri pamwepo mpsakunyozeka.’ 13 Imwepo mumbalewa pomwe kuti: ‘Mpsakunetesa!’ Ndipo mumbalatiza kuti mukunyantsidwa nazo ntsembezo,” walewa tenepo Yahova wa anyankhondo. “Imwepo mumbabweresa bzifuwo bzakucita kuba, bzakupunduka na bzakuduwala ndipo mumbapereka bzinthu bzimwebzi ninga mphaso. Kodi inepano ningabvume mphaso ninga zimwezi?” walewa tenepo Yahova.

14 “Wakutembereredwa ni munthu wacinyengo. Iye anaco cifuwo cacimuna cabwino pakati pa bzifuwo bzace, koma ambapicira acipereka ntsembe kwa Yahova cifuwo cakupunduka. Pakuti ine ndine Mambo mkulu ndipo dzina langu lin’dzagopedwa pakati pa mitundu ya wanthu,” walewa tenepo Yahova wa anyankhondo.

2 “Tsapano, imwe antsembe, lamuloli likuyenda kwa imwepo. 2 Mukalamba kutetekera na kuleka kuwona kuti nkhani yakutumbiza dzina langu njakufunika kwene-kwene m’mitima mwanu, nin’dzakutembererani ndipo nin’dzacitisa bzisimbo bzanu kukhala themberero. Ndacitisa kale bzisimbo kukhala themberero, thangwe imwepo mukuwona lini nkhani imweyi kukhala yakufunika,” walewa tenepo Yahova wa anyankhondo.

3 “Nin’dzadzonga* mbeu yanu thangwe ra imwepo ndipo nin’dzakuwazirani ndowe ku nkhope kwanu, ndowe za bzifuwo bzomwe mumbapereka ntsembe pa maphwando yanu ndipo imwepo mun’dzakathusidwa pa ndowezo. 4 Tenepo imwepo mun’dziwa kuti ndakupasani lamulo limweri kuti mpangano wangu na Levi upitirize kuphata basa,” walewa tenepo Yahova wa anyankhondo.

5 “Mpangano omwe ndidacita naye ukhali mpangano wa moyo na mtendere. Ndapitiriza kumupasa bzimwebzi kuti ambandigope,* iye adandigopadi ndipo adalemekeza dzina langu. 6 Lamulo* la cadidi likhali pamulomo pace ndipo pamulomo pacepo, pakhalibe bzakusaya kulungama. Iye adafamba nande mwa mtendere na mwakulungama ndipo adacitisa wanthu azinji kusiya kucita bzinthu bzakuipa. 7 Wantsembe an’funika kukhala na cidziwiso pamulomo pace nthawe zentse ndipo wanthu ambakabvunze lamulo* kwa iye, thangwe iye ni nyakutumidwa wa Yahova wa anyankhondo.

8 “Tsono imwepo mwapambuka pa njira yangu. Thangwe ra imwepo, wanthu azinji asiya kutewera lamulo.* Imwepo mwapfudza mpangano omwe ndikhadaucita na Levi,” walewa tenepo Yahova wa anyankhondo. 9 “Nin’dzakucitisani kukhala wanthu wakunyozeka na wakunyazisidwa pamaso pa wanthu wentse, thangwe rakuti mulibe kupitiriza kuteweza njira zangu, koma imwepo mukhalatiza tsankhulo kwa wanthu wentse pakuphatisa basa lamulo.”

10 “Kodi tentsenefe pai wathu ni m’bodzi lini? Kodi Mulungu omwe adatilenga ni m’bodzi lini? Tsono thangwe ranyi tikucitirana bzinthu mwacinyengo na kupswipiza mpangano wa makolo yathu yakale? 11 Djuda wacita bzacinyengo ndipo mu Jirayeri na mu Jeruzalemu mwacitika bzinthu bzakunyantsa, thangwe Djuda wapswipiza kucena* kwa Yahova, komwe Mulungu ambakufuna, ndipo walowola mkazi omwe ni mwana wa mulungu wacirendo. 12 Yahova an’dzapfudza ali-wentse omwe ambacita bzimwebzi m’matendi ya Djakobo, bziribe basa kuti ni yani* napo iye acipereka ntsembe kwa Yahova wa anyankhondo.”

13 “Ndipo pana cinthu cinango* comwe imwepo mukucita, comwe cikucitisa kuti guwa la ntsembe la Yahova lidzale na misozi, kulira na kubuula mwakuti iye akubvuma lini ntsembe zomwe imwepo mukupereka ninga mphaso, ndipo akukomedwa lini na ciri-centse cakucokera m’manja mwanu. 14 Ndipo imwepo mumbalewa kuti: ‘Thangwe ranyi?’ Thangwe Yahova ni mboni pakati pa iwepo na mkazi wa pautswaka bwako, omwe iwepo wamucitira bzinthu mwacinyengo, napo kuti iye ni mwanzako na mkazi wako thangwe ra mpangano.* 15 Tsono, alipo m’bodzi pakati panu omwe alibe kucita bzimwebzi, pakuti iye ana mzimu wa Mulungu. Kodi iye akhafuna ciyani? Wana wa Mulungu. Tenepo, khalani tceru na bzicito* bzanu ndipo lekani kucita bzinthu mwacinyengo kwa mkazi wa pautswaka bwanu. 16 Pakuti nimbawenga* kulambana,” walewa tenepo Yahova Mulungu wa Jirayeri, “ndipo nimbawengambo munthu ali-wentse waciwembo,”* walewa tenepo Yahova wa anyankhondo. “Khalani tceru na bzicito bzanu ndipo lekani kucita bzinthu mwacinyengo.

17 “Imwepo mumbanetesa Yahova na mafala yanu. Tsono imwepo mwalewa kuti: ‘Kodi timbamunetesa tani?’ Mwa kumbalewa kuti: ‘Ali-wentse omwe ambacita bzinthu bzakuipa, ngwabwino kwa Yahova ndipo iye ambakomedwa na wanthu ninga amwewo,’ ayai mwa kulewambo kuti: ‘Ali kuponi Mulungu wacirungamo?’”

3 “Onani! Ndikutumiza mtumiki wangu ndipo iye an’dzakonza njira patsogolo pangu ndipo mwadzidzidzi, Mbuya wacadidi omwe imwepo mukumunyang’ana an’dzabwera ku templo yace ndipo mtumiki wa mpangano omwe imwepo mumbakomedwa naye an’dzabwera, iye an’dzabweradi,” walewa tenepo Yahova wa anyankhondo.

2 “Tsono mbani an’dzapirira pa ntsiku yakubwera kwace ndipo mbani an’dzaima pulu iye akadzawonekera? Pakuti iye an’dzakhala ninga moto wa anyakusula simbi* na sabau ya anyakufula bzakubvala. 3 Iye an’dzakhala pantsi ninga nyakuwonga na nyakucenesa prata* ndipo an’dzacenesa wana wa Levi. Iye an’dzawawonga ninga momwe ambacitira na oro na prata. Kulewa cadidi, kwa Yahova iwo an’dzakhala wanthu omwe ambapereka ntsembe mwacirungamo. 4 Ndipo ntsembe zomwe Djuda na Jeruzalemu an’dzapereka ninga mphaso, zin’dzakondwesa Yahova ninga momwe bzikhaliri kale-kale.

5 “Nin’dzabwera kuti ndidzakutongeni ndipo kabodzi na kabodzi nin’dzatonga anyakucita bzamatsenga, anyakucita upombo ayai uputa, omwe ambalumbira mwakunama, anyakucita cinyengo pakupagali munthu wa ganya, anyakucitira cinyengo mkazi mamsiwa, mwana wakusaya pai* na omwe ambalamba kuthandiza alendo. Wanthu amwewa ambandigopa lini,” walewa tenepo Yahova wa anyankhondo.

6 “Pakuti ine ndine Yahova ndipo nimbacinja lini.* Imwepo ndimwe wana wa Djakobo ndipopa mukanati kumala kupfudzidwa. 7 Kuyambira mu ntsiku za makolo yanu yakale-kale, imwepo mwapambuka pa mitemo yangu ndipo mukuibvera lini. Bwererani kwa ine ndipo inembo nin’dzabwerera kwa imwepo,” walewa tenepo Yahova wa anyankhondo.

Tsono imwepo mumbalewa kuti: “Tin’bwerera tani?”

8 “Kodi munthu angabere Mulungu?” Tsono imwepo mukundibera.

Imwepo mumbalewa kuti: “Kodi tikukuberani tani?”

“Pa nkhani ya cakhumi na bzakupereka. 9 Kulewa cadidi, imwepo ndimwe wakutembereredwa* pakuti mukundibera, inde, mtundu wentse ukucita bzimwebzi. 10 Bweresani cakhumi* centse mu templo* kuti pa nyumba yangu pakhale na cakudya ndipo ndaphata minyendo, ndiyezeni pa nkhani imweyi,” walewa tenepo Yahova wa anyankhondo, “kuti muwone penu ningakufungulireni lini misuwo yakudzulu ndicikukhuthulirani bzisimbo mpaka mucidzasaya pakubziikha.”

11 “Ndipo nin’dzatsimula dzombe* ndipo iro lin’dzadya lini cisapo ca m’dziko lanu ndipo miti ya uva ya m’minda mwanu in’dzaleka lini kubala bzisapo,” walewa tenepo Yahova wa anyankhondo.

12 “Mitundu yentse ya wanthu in’dzalewa kuti imwepo ndimwe wakukondwa thangwe dziko lanu lin’dzakhala dziko lakukondwesa,” walewa tenepo Yahova wa anyankhondo.

13 “Mafala yomwe mudandilewa, njakuipa kwene-kwene,” walewa tenepo Yahova.

Tsono imwepo mukulewa kuti: “Kodi ni bzakuipa bziponi bzomwe tidakulewanibzo?”

14 “Imwepo mumbalewa kuti: ‘Kutumikira Mulungu kulibe phindu. Kodi bzina phindu lanyi kupitiriza kucita bzomwe iye ambafuna na kulatiza Yahova wa anyankhondo kuti tidasunama thangwe ra pikado zathu? 15 Tsapano timbawona kuti wanthu wakubzikuza mbakukondwa. Kuthumizira bzimwebzi, omwe ambacita bzakuipa, bzinthu bzimbawafambira bwino. Iwo ambayeza Mulungu, koma palibe comwe cimbawacitikira.’”

16 Pa nthawe imweyo wale omwe akhagopa Yahova akhacezerana, ali-wentse na mwanzace, ndipo Yahova adakhala tceru acimbatetekera. Ndipo bukhu lidayamba kunembedwa pamaso pace, lomwe likhana madzina ya wale omwe an’dzakumbukiridwa na iye, wale omwe akhagopa Yahova na kukumbukira bza dzina lace.

17 “Iwo an’dzakhala wangu pa nthawe yomwe nin’dzawacitisa kukhala cuma cangu cakupambulika,” walewa tenepo Yahova wa anyankhondo. “Inepano nin’dzawabvera ntsisi, ninga momwe pai ambabvera ntsisi mwana wace omwe ambamubvera. 18 Ndipo imwepo mun’dzakwanisa pomwe kuwona kusiyana komwe kulipo pakati pa munthu wakulungama na munthu wakuipa na pakati pa munthu omwe ambatumikira Mulungu na omwe ambamutumikira lini.”

4 “Onani! Ntsiku yakugaka moto ninga forno ikubwera ndipo wanthu wentse wakubzikuza na wakucita bzakuipa an’dzakhala ninga mapesi. Ntsiku yomwe ikubwerayo in’dzawanyekesa, mwakuti pa iwo pan’dzasala lini muzi ne mthambi,” walewa tenepo Yahova wa anyankhondo. 2 “Tsono kwa imwepo, omwe mumbalemekeza* dzina langu, dzuwa la cirungamo lin’dzakugakirani ndipo ceza* cace cin’dzakupozani ndipo mun’dzamoga-moga ninga tumphulu twakunenepa.”

3 “Pa ntsiku yomwe nin’dzacita bzimwebzi, imwepo mun’dzaponda-ponda wanthu wakuipa, pakuti iwo an’dzakhala ninga pfumbi ku nzayo zanu,” walewa tenepo Yahova wa anyankhondo.

4 “Kumbukirani bza lamulo la mtumiki wangu Mozeji, bzakutonga na mitemo yentse yomwe ndidapereka ku Horebi kuti Jirayeri wentse abvere.

5 “Tetekerani, nin’dzakutumizirani mpolofeta Eliya, pomwe ikanati kufika ntsiku ikulu na yakupasa mantha ya Yahova. 6 Iye an’dzacitisa mitima ya azipai kukhala ninga ya wana ndipo mitima ya wana ninga ya azipai, kuti ndileke kubwera kudzadzonga dziko na kulipfudza.”

(Bzinembo bzomwe bzidanembedwa mu Cihebereu na mu Ciaramaiko bzamalira pano. Bzinembo bzakutewerabzi bzidanembedwa mu Cigerego)