MAFALA YABWINO YA JUWAU

1 Pakuyamba, akhalipo omwe akhacemeredwa Fala; Falalo likhali pabodzi na Mulungu ndipo Falalo likhali mulungu. 2 Pakuyamba, iye akhali pabodzi na Mulungu. 3 Mulungu adamuphatisa basa pakulenga bzinthu bzentse, ndipo palibe cinthu ciri-centse comwe cidalengedwa mwakusaya kuphatisira basa iye. 4 Moyo udalengedwa mwakuphatisira basa iye ndipo moyoyo ni ceza kwa wanthu. 5 Ndipo ceza cidabvunika mu mdima, tsono mdimayo ulibe kukwanisa kukunda cezaco.

6 Padawoneka munthu m’bodzi omwe adatumidwa na Mulungu; ndipo dzina lace akhali Juwau. 7 Munthu umweyu adabwera ninga mboni kuti adzacitire umboni cezaco, kuti wanthu wa mitundu yentse akhulupire. 8 Iye akhali lini ceza, koma adabwera kudzacitira umboni bza cezaco.

9 Ceza cacadidi comwe cingadabvunika mitundu yentse ya wanthu cikhadasala pang’ono kubwera pa dziko la pantsi. 10 Iye akhali pa dziko ndipo Mulungu adamuphatisa basa pakulenga dziko, tsono dzikolo liribe kumuzindikira. 11 Iye adabwera kumui kwace, tsono wanthu wa kumui kwacewo alibe kumutambira. 12 Na tenepo, kwa wentse omwe adamutambira, iye adawapasa mphanvu kuti akhale wana wa Mulungu, thangwe iwo adalatiza cikhulupiro pa dzina lace. 13 Iwo alibe kubadwa na wanthu ayai thangwe ra kufuna kwa thupi ayai thangwe ra kufuna kwa omwe adawabalawo, koma adabadwa thangwe ra kufuna kwa Mulungu.

14 Na tenepo, Falalo lidabadwa ninga munthu licikhala pakati pathu, ife tawona ulemerero bwace, ulemerero ninga bwa mwana m’bodzi wa baba wace, iye akhali wakudeka mtima kukulu na wacadidi. 15 (Juwau adapereka umboni pakulewa bza iye, inde ndipo iye adakuwa kuti: “Uyu ndiye omwe ndikhalewa ule kuti: ‘Ule omwe akubwera m’mbuyo mwangu ndiye omwe an’dzapita patsogolo pangu, thangwe iye akhalipo kale inepano ndikanati kubadwa.’”) 16 Thangwe ra kuti iye ngwakudeka mtima kwene-kwene, ifepano timbapitiriza kutambira kudeka mtimako. 17 Thangwe Mulungu adapereka Malamulo mwakuphatisa basa Mozeji ndipo adalatiza kudeka mtima kwace kukulu na cadidi, mwakuphatisa basa Jezu Kristu. 18 Palibe munthu omwe adawona kale Mulungu, koma mwana m’bodzi yekha omwe adandendemerana na Mulunguyo, iye ambakhala pambali pa Baba wace, ndipo ndiye omwe adatifotokozera bza Mulunguyo.

19 Ubu ni umboni bomwe Juwau adapereka pomwe Adjuda adatumiza antsembe na Alevi kucokera ku Jeruzalemu kuti akamubvunze kuti: “Kodi iwepo ndiwe yani?” 20 Iye alibe kulamba kutawira, koma adalewa padeca kuti: “Inepano ndine lini Kristu.” 21 Ndipo iwo adamubvunza kuti: “Tsono ndiwe yani? Kodi ndiwe Eliya?” Iye adawatawira kuti: “Ndine lini.” “Kodi ndiwe mpolofeta?” Iye adatawira pomwe kuti: “Ne!” 22 Tenepo iwo adati: “Tsono iwepo ndiwe yani? Tiuze kuti tikakwanisembo kutawira wale omwe atituma. Kodi iwepo umbabziti ndiwe yani?” 23 Iye adati: “Ndine fala la munthu omwe akukuwa m’dambo kuti: ‘Lungamizani njira ya Yahova,’ ninga momwe adalewera mpolofeta Zaiya.” 24 Wanthu omwe akhamubvunzawo akhadatumidwa na Afarizeu. 25 Tenepo iwo adamubvunza kuti: “Tsono penu iwepo ndiwe lini Kristu, ne Eliya ne mpolofeta, thangwe ranyi umbabatiza wanthu?” 26 Juwau adawatawira kuti: “Inepano nimbabatiza na madzi. Pakati panu pana munthu omwe imwepo mukumudziwa lini, 27 omwe akubwera m’mbuyo mwangu, ndipo ndine lini wakuthemera kutsudzula bzingwe bza xango zace.” 28 Bzimwebzi bzidacitikira ku Betaniya ku ng’ambu inango ya Jordano, komwe Juwau akhabatiza wanthu.

29 Mangwana yace, Juwau adawona Jezu akubwera kwa iye, ndipo iye adati: “Onani Mwana wa Bira wa Mulungu omwe an’cosa pikado pa dziko la pantsi! 30 Uyu ndiye omwe ndikhalewa ule kuti: ‘Ule omwe akubwera m’mbuyo mwangu ndiye omwe an’dzapita patsogolo pangu, thangwe iye akhalipo kale inepano ndikanati kubadwa.’ 31 Napo ine ndikhamudziwa lini, koma comwe ndikubatizira wanthu m’madzi n’cakuti iye awonekere kwa Jirayeri.” 32 Juwau adacitirambo umboni mwakulewa kuti: “Ndidawona mzimu wakucena ukubuluka ninga nkhangaiwa kucokera kudzulu ndipo mzimuyo udapitiriza kukhala naye. 33 Napo ndikhamudziwa lini, koma Ule omwe adandituma kuti ndibatize wanthu m’madzi adandiuza kuti: ‘Ukadzawona mzimu wakucena ukubuluka kucokera kudzulu, ucidzakhala pa munthu munango, umweyo ndiye omwe an’dzabatiza na mzimu wakucena.’ 34 Ndipo inepano ndidawonadi bzimwebzi, ndipo ndidacitira umboni bwakuti umweyu ni Mwanadi wa Mulungu.”

35 Mkuca wace, Juwau akhadaima pabodzi na anyakupfunza wace awiri, 36 ndipo pomwe adawona Jezu akufamba, iye adati: “Onani Mwana wa Bira wa Mulungu!” 37 Pomwe anyakupfunza awiriwo adabva bzimwebzi, iwo adatewera Jezu. 38 Pomwe Jezu adaceuka, adawona kuti akhamutewera, ndipo adawabvunza kuti: “Mun’funa ciyani?” Iwo adatawira kuti: “Rabi, kodi mwafikira kuponi?” (Dzina lakuti Rabi limbathandauza “Mpfunzisi.”) 39 Iye adawauza kuti: “Tiyendeni mukawone.” Tenepo iwo adayenda naye acikawona komwe akhadafikirako ndipo iwo adakhala naye pabodzi ntsiku yentseneyo. Zikhali nthawe zinai zakumaulo.* 40 Andereya, m’bale wace wa Simau Pedru, akhali m’bodzi wa anyakupfunza awiri omwe adabva bzomwe Juwau adalewa ndipo adatewera Jezu. 41 Munthu wakuyamba omwe iye adagumana naye, akhali m’bale wace Simau ndipo adamuuza kuti: “Ifepano tagumana Mesiya” (Dzina lakuti Mesiya limbathandauza “Kristu”), 42 ndipo iye adamutenga aciyenda naye kuna Jezu. Pomwe Jezu adamuwona adamuuza kuti: “Iwepo ndiwe Simau, mwana wa Juwau; iwepo un’dzacemeredwa Khefa” (Dzina lakuti Khefa limbathandauza “Pedru”).

43 Mangwana yace Jezu adakumbuka bzakuyenda ku Galileya, ndipo iye adagumana na Filipi acimuuza kuti: “Bwera ukhale mteweri wangu.” 44 Filipi akhali wa ku Betsaida, mzinda omwe Andereya na Pedru adabadwira. 45 Patsogolo pace, Filipi adagumana na Nataniyeri acimuuza kuti: “Ifepano tagumana ule omwe adanembedwa m’Malamulo ya Mozeji na m’mabukhu ya apolofeta, iye ni Jezu, mwana wa Zuze wa ku Nazareti.” 46 Tsono Nataniyeri adamubvunza kuti: “Kodi mu Nazareti mungacokembo cinthu cabwino?” Filipi adamutawira kuti: “Bwera udzawone wekha.” 47 Pomwe Jezu adawona Nataniyeri akubwera kwa iye, adalewa kuti: “Onani Mjirayeri wacadidi, omwe mwa iye mulibe cinyengo.” 48 Nataniyeri adabvunza kuti: “Kodi imwepo mudandidziwira kuponi?” Jezu adamutawira kuti: “Filipi akanati kukucemera, inepano ndikhadakuwona kale pomwe ukhali pa mthunzi wa muti wa mkuyu.” 49 Nataniyeri adamutawira kuti: “Mpfunzisi,* imwepo ndimwe Mwana wa Mulungu; ndimwe Mambo* wa Jirayeri.” 50 Jezu adamutawira kuti: “Kodi ukukhulupira thangwe ndakuuza kuti ndakuwona pa mthunzi wa muti wa mkuyu? Iwepo un’dzawona bzinthu bzikulu kuposa bzimwebzi.” 51 Iye adalewa pomwe kuti: “Kulewa cadidi, ndikukuuzani mwentsenemwe kuti mun’dzawona kudzulu kucifunguka ndipo anjo wa Mulungu acimbabuluka kubwera kuna Mwana wa munthu, acimbakwira pomwe kudzulu.”

2 Pa ntsiku yacitatu, kudacitika phwando la malowozi ku Kana wa ku Galileya, ndipo mai wace wa Jezu akhalimbo kumweko. 2 Ndipo Jezu pabodzi na anyakupfunza wace akhadacemeredwambo ku phwando la malowoziyo.

3 Pomwe vinyu ikhadasala pang’ono kumala, mai wace wa Jezu adamuuza kuti: “Vinyu yamala.” 4 Tsono Jezu adatawira mai wacewo kuti: “Kodi imwepo na inepano tinabzo basa lanyi bzimwebzi? Nthawe yangu ikanati kukwana.” 5 Ndipo mai wacewo adakauza anyakugawa cakudya kuti: “Citani bzentse bzomwe akuuzenibzo.” 6 Pamwepo pakhana mitsuko 6 yakukonzedwa na minyala, mwakubverana na mwambo wa kubzicenesa wa Adjuda, ndipo mtsuko uli-wentse ukhambapita malitru yakukwana 22. 7 Tenepo Jezu adawauza kuti: “Dzazani madzi m’mitsukoyi.” Iwo adadzazadi mpaka pa mulomo. 8 Patsogolo pace iye adawauza kuti: “Tungani pang’ono kuti mukapase nyakutsogolera phwando.” Ndipo iwo adacitadi bzimwebzo. 9 Nyakutsogolera phwandoyo adalawidza madzi yomwe yakhadasandusidwa kukhala vinyuyo, tsono iye akhadziwa lini komwe vinyuyo ikhacokera, napo kuti anyakugawa cakudyawo akhadziwa. Tenepo, iye adacemeresa namwali wacimuna, 10 ndipo adamuuza kuti: “Wentse ambabweresa vinyu yabwino pakuyamba ndipo wanthu akaledzera, ambadzabweresa vinyu yakumala mphanvu. Tsono iwepo wakoya vinyu yabwino mpaka pano.” 11 Jezu adacita cakudabwisa cace cakuyambaci ku mzinda wa Kana wa ku Galileya, mwa njira imweyi, iye adalatiza mphanvu zace ndipo anyakupfunza wace adamukhulupira.

12 Pambuyo pa bzimwebzi, iye pabodzi na mai wace, azibale wace na anyakupfunza wace adapolikira ku Kafarnau, tsono kumweko alibe kukhala ntsiku zizinji.

13 Ntsiku ya Paskwa ya Adjuda ikhadafendera, tenepo, Jezu adayenda ku Jeruzalemu. 14 Pomwe adafika mu templo, iye adagumana anyakugulisa ng’ombe, mabira na nkhangaiwa pabodzi na anyakucinja kobiri adakhala m’mbuto zawo. 15 Pambuyo pakukonza mtcamu wa bzingwe, iye adathamangisa wentse omwe akhagulisa mabira na ng’ombe mu templomo, ndipo adatayira pantsi kobiri za anyakucinja kobiriwo na kugubududza meza zawo. 16 Ndipo iye adauza anyakugulisa nkhangaiwawo kuti: “Cosani bzinthubzi muno! Lekani kusandusa nyumba ya Babangu kukhala nyumba yakucitira malonda.” 17 Anyakupfunza wace adakumbukira bzomwe bzikhadanembedwa kuti: “Nyongo pa nyumba yanu in’dzandidya.”

18 Tenepo, Adjuda adamubvunza kuti: “Kodi n’cizindikiro ciponi comwe ungatilatize, cakuwonesa kuti un’themera kucita bzimwebzi?” 19 Jezu adawatawira kuti: “Gwesani temployi ndipo inepano nin’dzaimanga m’ntsiku zitatu.” 20 Tsono Adjudawo adamutawira kuti: “Temployi idamala magole 46 ikumangidwa, tsono iwepo ukulewa kuti un’dzaimanga m’ntsiku zitatu?” 21 Tsono temployo ikhathandauza thupi lace. 22 Pomwe iye adalamusidwa kwa anyakufa, anyakupfunza wace adakumbukira kuti iye akhambalewa kale bzimwebzi ndipo iwo adakhulupira bzinembo na mafala yomwe Jezuyo akhadayalewa.

23 Pomwe akhali ku Jeruzalemu ku phwando la Paskwa, wanthu azinji adamukhulupira thangwe ra kuwona bzakudabwisa bzomwe iye akhacita. 24 Tsono Jezu akhawakhulupira lini kwene-kwene, thangwe akhawadziwa wentsenewo, 25 ndipo iye akhafuna lini kuti munthu amufotokozere bzomwe wanthuwo akhali, thangwe iye akhadziwa kale bzomwe bzikhali mu mtima mwawo.

3 Pakhana Mfarizeu munango, wakucemeredwa Nikodemo, omwe akhali mtongi wa Adjuda. 2 Munthu umweyu adayenda kuna Jezu usiku, ndipo adamuuza kuti: “Mpfunzisi,* timbadziwa kuti imwepo ndimwe mpfunzisi wakucokera kwa Mulungu, thangwe palibe munthu omwe angacite bzakudabwisa bzomwe mumbacitabzi penu Mulungu ali lini naye.” 3 Jezu adamutawira kuti: “Cadidi ndikukuuza kuti: Munthu akasaya kubadwa papsa, iye angadzapite lini mu Umambo bwa Mulungu.” 4 Nikodemo adamubvunza kuti: “Kodi bzingakwanisike tani kuti munthu omwe adabadwa kale, abadwe pomwe papsa? Kodi iye angapite m’mimba mwa mai wace acibadwa pomwe?” 5 Jezu adamutawira kuti: “Cadidi ndikukuuza kuti, munthu angapite lini mu Umambo bwa Mulungu, akasaya kubadwa na madzi na mzimu. 6 Ule omwe adabadwa na munthu,* ni munthu, ndipo ule omwe adabadwa na mzimu, ni mzimu. 7 Lekani kudabwa thangwe ndakuuzani kuti: Mun’funika kubadwa papsa. 8 Conzi cimbayenda komwe cikufuna ndipo imwepo mumbandobva kuunga kwace, tsono mumbadziwa lini komwe cikucokera ne komwe cikuyenda. Mpsibodzi-bodzimbo na munthu omwe ambabadwa na mzimu.”

9 Tenepo Nikodemo adamubvunza kuti: “Kodi bzimwebzi bzingakwanisike tani?” 10 Jezu adamutawira kuti: “Iwepo ndiwe mpfunzisi wa Jirayeri, ukanati basi kudziwa bzinthu bzimwebzi? 11 Cadidi ndikuuzani kuti: Ifepano timbalewa bzomwe timbadziwa ndipo timbacitira umboni bzomwe tidawona, tsono imwepo mumbabvuma lini umboni bwathubo. 12 Ndikakuuzani bzinthu bza pa dziko la pantsi pano, imwepo mumbakhulupira lini, tsono mungakhulupire tani ndicikuuzani bzinthu bza kudzulu? 13 Kuthumizira bzimwebzi, palibe munthu omwe adakwira kale kudzulu, koma Mwana wa munthu yekha omwe adabuluka kucokera kudzuluko. 14 Ndipo ninga momwe Mozeji adamanikira nyoka pa muti m’dambo, Mwana wa munthu an’dzafunikambo kumanikidwa, 15 kuti ali-wentse omwe an’khulupira iye adzakhale na moyo wakusaya kumala.

16 “Pakuti Mulungu adafuna kwene-kwene dziko la pantsi, mwakuti adapereka mwana wace m’bodzi yekha, kuti ali-wentse omwe an’khulupira mwanayo, aleke kudzaphedwa, koma adzakhale na moyo wakusaya kumala. 17 Pakuti Mulungu alibe kutumiza Mwana wace pa dziko kuti adzatonge dziko,* koma kuti dzikolo lidzapulumusidwe mwa iye. 18 Ali-wentse omwe an’mukhulupira an’dzatongedwa lini, tsono omwe an’mukhulupira lini, watongedwa kale, pakuti alibe kukhulupira dzina la Mwana m’bodzi yekha wa Mulungu. 19 Wanthu an’dzatongedwa pa mathangwe aya: Ceza cidabwera pa dziko, tsono iwo adafuna mdima m’mbuto mwa cezaco, pakuti bzakucita bzawo bzikhali bzakuipa. 20 Pakuti ali-wentse omwe ambacita bzinthu bzakuipa, ambawengana na ceza ndipo ambafika lini pomwe pana cezaco, kuti mabasa yace yaleke kuzimbulidwa. 21 Tsono ule omwe ambacita bzinthu bzabwino, ambayenda pomwe pana ceza, kuti mabasa yace yawonekere kuti adayacita mwakubverana na kufuna kwa Mulungu.”

22 Patsogolo pace, Jezu na anyakupfunza wace adayenda ku midzi ya ku Djudeya ndipo adakhala nawo kumweko, acimbabatiza wanthu. 23 Tsono Juwau akhabatizambo wanthu ku Enoni, pafupi na Salimi, thangwe kumweko kukhana madzi mazinji ndipo wanthu akhambayenda kwa iye kuti akabatizidwe. 24 Pa nthawe imweyi Juwau akhanati kuikhidwa m’kawoko.

25 Tsono anyakupfunza wa Juwau adayamba kunesana na Mdjuda munango, pa nkhani yakulewa bza mwambo wa kubzicenesa. 26 Tenepo iwo adayenda kuna Juwau, acikamuuza kuti: “Mpfunzisi,* munthu omwe mukhanaye ku ng’ambu ya Jordano omwe mudamucitira umboni ule, akubatizambo wanthu ndipo wentse akuyenda kuna iye.” 27 Juwau adawatawira kuti: “Munthu angatambire lini cinthu ciri-centse, akasaya kupasidwa kucokera kudzulu. 28 Imwepo ndimwe mboni pa bzomwe ndidakuuzani kuti: ‘Ine ndine lini Kristu, koma ndidatumidwa patsogolo pace.’ 29 Ule omwe akulowola mkazi, ni mwamuna wa mkaziyo, koma xamwali wa mwamunayo akaima, acibva bzomwe iye akulewa, ambakomedwa kwene-kwene. Tenepo, kukomedwa kwangu kwathumizirika. 30 Ndipopa utumiki bwace bun’funika kupitiriza kuthumizirika, koma utumiki bwangu bun’funika kucepa.”

31 Ule omwe adacokera kudzulu, ngwapadzulu kuposa wentse. Ndipo ule omwe adacokera pa dziko la pantsi, ngwa pa dziko la pantsi ndipo ambalewalewa bzinthu bza pa dziko la pantsi. Ule omwe adacokera kudzulu, ngwapadzulu kuposa wentse. 32 Iye ambacitira umboni bzinthu bzomwe adawona na kubva, tsono palibe munthu omwe ambabvuma umboni bwacebo. 33 Ule omwe ambabvuma umboni bwacebo ambabvumambo kuti Mulungu ngwacadidi. 34 Pakuti ule omwe adatumidwa na Mulungu, ambalewalewa mafala ya Mulunguyo, thangwe iye ambapereka lini mzimu wace pang’ono-pang’ono.* 35 Baba ambafuna Mwana wace ndipo adapereka bzinthu bzentse m’manja mwace. 36 Ule omwe an’khulupira mwanayo, an’dzakhala na moyo wakusaya kumala; tsono ule omwe an’bvera lini mwanayo, an’dzauwona lini moyo, koma ukali bwa Mulungu bun’dzapitiriza kukhala pa iye.

4 Pomwe Jezu adazindikira kuti Afarizeu abva kuti iye ana anyakupfunza azinji ndipo akubatiza wanthu azinji kuposa Juwau, 2 (napo kuti Jezu caiyeyo akhabatiza lini, koma anyakupfunza wace ndiwo omwe akhacita bzimwebzo) 3 iye adacoka ku Djudeya, aciyenda pomwe ku Galileya. 4 Tsono bzikhafunika kuti iye apite na ku Samariya. 5 Tenepo, iye adafika mu mzinda wa Samariya wakucemeredwa Sikari, pafupi na munda omwe Djakobo akhadapasa mwana wace Zuze. 6 Kumweko kukhana mcera wa Djakobo. Jezu akhadaneta na ulendobo, tenepo iye adakhala pafupi na mcerayo. Ndipo zikhali pafupi-fupi nthawe 12.*

7 Mkazi munango wa ku Samariya adafika pa mcerapo kudzatunga madzi. Jezu adamuuza kuti: “Ndikukumbirambo madzi yakumwa.” 8 (Pa nthawe imweyo, anyakupfunza wace akhadayenda mu mzinda kukagula cakudya.) 9 Tenepo, mkazi Msamariyayo adamubvunza kuti: “Kodi bzingakwanisike tani imwepo Mdjuda kukumbira madzi yakumwa inepano mkazi Msamariya?” (Thangwe Adjuda na Asamariya akhabverana lini.) 10 Pakutawira Jezu adauza mkaziyo kuti: “Iwepo ungadadziwa bza mphaso yafovolo ya Mulungu na omwe akukuuza kuti ‘ndipasembo madzi yakumwa,’ iwepo ungadamukumbira, ndipo iye angadakupasa madzi ya moyo.” 11 Mkaziyo adati: “Mbuya, imwepo mulibe ne combo cakutungira madzi, ndipo mcerayu ngwakuzika, kodi madzi ya moyoyo mun’kayatunga kuponi? 12 Kodi imwepo ndimwe mkulu kuposa pai wathu Djakobo omwe adatipasa mcerayu, omwe iye akhamwa na wana wace pabodzi na ng’ombe zace?” 13 Pakutawira Jezu adauza mkaziyo kuti: “Ali-wentse omwe animwa madziya, an’dzabva pomwe nyota. 14 Tsono ule omwe animwa madzi yomwe inepano nin’dzamupasa, an’dzabva lini pomwe nyota na pang’onopo, thangwe madzi yomwe nin’dzam’pasayo, yan’dzakhala ninga kamkulo ka madzi yakuyerera, yomwe yan’dzamupasa moyo wakusaya kumala.” 15 Mkaziyo adati: “Mbuya, ndipaseni madzi yamweyo kuti ndireke kubva pomwe nyota, na kumbabwera pomwe kuno kudzatunga madzi.”

16 Iye adauza mkaziyo kuti: “Ndoko ukacemere mwamuna wako ndipo ubwere naye kuno.” 17 Mkaziyo adamutawira kuti: “Ndiribe mwamuna.” Ndipo Jezu adauza mkaziyo kuti: “Watawira bwino pakulewa ‘kuti ndiribe mwamuna.’ 18 Thangwe iwepo ukhadalowodwa kale na amuna axanu, ndipo omwe unayeyo ni mwamuna lini wako. Apa walewadi cadidi.” 19 Mkaziyo adati kwa iye: “Mbuya, ndikuwona kuti imwepo ndimwe mpolofeta. 20 Makolo yathu yakale yakhanamatira m’phiri iri, tsono imwepo mumbalewa kuti ku Jeruzalemu ndiyo mbuto yomwe wanthu an’funika kumbanamatira.” 21 Jezu adati kwa iye: “Ndikhulupire mkaziwe, in’dzafika nthawe yomwe imwepo mun’dzanamata lini pomwe Baba mu phiri iri ne ku Jeruzalemu. 22 Imwepo mumbanamata cinthu comwe mumbacidziwa lini, tsono ifepano, timbanamata comwe tikucidziwa, thangwe cipulumuso cin’cokera* kwa Adjuda. 23 Na tenepo, in’dzafika nthawe ndipo njimweino kale, pomwe anyakunamata wacadidi an’dzanamata Baba mu mzimu na cadidi, pakuti Babayo akunyang’ana wanthu ninga amwewo kuti amunamate. 24 Mulungu ni mzimu, ndipo omwe animunamata, an’funika kumunamata mwakutsogoleredwa na mzimu na cadidi.” 25 Mkaziyo adati kwa iye: “Ndikudziwa kuti Mesiya wakucemeredwa Kristu an’dzabwera, ndipo iye akadzabwera, an’dzatifotokozera bzinthu bzentse padeca.” 26 Jezu adati kwa mkaziyo: “Munthu umweyo, ndinepanoletu.”

27 Pa nthawe imweyo anyakupfunza wace adafika, ndipo iwo adadabwa thangwe adamugumana akuceza na mkazi. Tsono palibe omwe adamubvunza kuti: “Mukufuna ciyani na mkaziyu?” Ayai “Thangwe ranyi mukulewalewa naye?” 28 Tenepo mkaziyo adasiya mtsuko wace wa madzi, aciyenda mu mzinda kukauza wanthu kuti: 29 “Tiyendeni mukawone munthu omwe wandiuza bzinthu bzentse bzomwe ndidacita. Kodi umweyu angaleke kukhala Kristu?” 30 Iwo adacoka mu mzindamo, aciyenda komwe kukhana Jezuko.

31 Pa nthawe imweyo anyakupfunza wace akhamungingimira kuti: “Mpfunzisi,* dyani.” 32 Tsono Jezu adawauza kuti: “Ndinaco cakudya comwe imwepo mukucidziwa lini.” 33 Tenepo anyakupfunzawo adayamba kumbabvunzana kuti: “Kodi alipo omwe wamubweresera cakudya?” 34 Jezu adati kwa iwo: “Cakudya cangu ni kucita kufuna kwa ule omwe adandituma na kumaliza basa lace. 35 Kodi imwepo mumbalewa lini kuti yasala minyezi minai kuti tibvune? Tsono ndikukuzani kuti: Nyang’anisani m’mindamu, bzinthu bzakhuma kale kuti bzibvunidwe. 36 Nyakubvuna akupagalidwi kale ndipo akugwezeka kale bzisapo bza moyo wakusaya kumala, kuti nyakubzala na nyakubvuna akondwe pabodzi. 37 Pa nkhani imweyi, mafalaya njacadidi: M’bodzi ni nyakubzala ndipo munango ni nyakubvuna. 38 Inepano ndakutumani kuti mukabvune bzomwe mulibe kubzala ndipo imwepo mwagumana phindu pa basa la wanthu winango.”

39 Asamariya azinji wa mu mzinda ule adakhulupira Jezu, thangwe ra mafala na umboni bomwe mkazi ule adaperekera kuti: “Iye wandiuza bzinthu bzentse bzomwe ndidacita.” 40 Tenepo pomwe Asamariya wale adafika kwa iye, iwo adamukumbira kuti apitirize kukhala nawo ndipo iye adakhala nawo ntsiku ziwiri. 41 Thangwe ra bzimwebzi, wanthu azinji adakhulupira bzomwe iye akhalewa. 42 Ndipo wanthuwo akhambauza mkaziyo kuti: “Ifepano tikukhulupira bzimwebzi sikuti thangwe ra mafala yomwe udatiuza yale yokha, pakuti ifepano tacita kubva tekha ndipo tikudziwa kuti munthu umweyu, ni omwe an’dzapulumusa dziko.”

43 Pomwe padapita ntsiku ziwiri, iye adacoka kumweko aciyenda ku Galileya. 44 Jezu caiyeyo adapereka umboni bwakuti mpolofeta ambalemekezedwa lini kumui kwace. 45 Tenepo, pomwe iye adafika ku Galileya, wanthu wa ku Galileyako adamutambira bwino, thangwe iwo akhadawona bzinthu bzentse bzomwe iye adacita ku Jeruzalemu pa phwando, pakuti iwo akhadayendambo ku phwandoko.

46 Patsogolo pace iye adafika pomwe ku Kana wa ku Galileya, kule komwe iye adasandusa madzi kukhala vinyu, tsono kumweko kukhana mtumiki munango wa mambo,* omwe mwana wace wacimuna akhaduwala ku Kafarnau. 47 Pomwe iye adabva kuti Jezu wafika ku Galileya kucokera ku Djudeya, adayenda komwe kukhana iyeko, acikamukumbira kuti ayende naye pabodzi kuti akapoze mwana waceyo, omwe akhaduwala mwa penu-penu. 48 Tsono Jezu adamuuza kuti: “Bzingadakhala kuti mulibe kuwona bzizindikiro na bzakudabwisa, imwepo mungadakhulupira lini.” 49 Mtumiki wa mamboyo adati: “Mbuya, mbatiyendeniletu mwananguyo akanati kumalizika.” 50 Jezu adamuuza kuti: “Ndoko, mwana wako walimba.” Munthuyo adakhulupira mafala ya Jezuyo ndipo adayendadi. 51 Tsono pomwe akhali mu njira, iye adagumana na akapolo wace omwe adamuuza kuti mwana wace walimba. 52 Tenepo iye adabvunza nthawe yomwe mwanayo adalimba. Iwo adamutawira kuti: “Iye adalimba dzulo pa nthawe ibodzi* ya kumasikati.” 53 Tenepo paiyo adazindikira kuti imweyi ikhali nthawe yomwe Jezu adamuuza kuti: “Mwana wako walimba.” Ndipo iye pabodzi na wentse wa m’banja lace adakhulupira Jezu. 54 Cimweci cikhali cakudabwisa caciwiri comwe Jezu adacita pomwe adacoka ku Djudeya aciyenda ku Galileya.

5 Pomwe bzimwebzi bzidamala, kumweko kukhana phwando la Adjuda ndipo Jezu adayenda ku Jeruzalemu. 2 Ku Jeruzalemuko, pa Cipata ca Mabira, pana thawale lomwe m’Cihebereu limbacemeredwa Betezata ndipo m’mbali mwa thawalero muna makhonde* maxanu. 3 M’makhondemo mukhakhala wanthu azinji wakuduwala, azimola, anyakupunduka na anyakudjedjera bziwalo. 4 —— 5 Kumweko kukhana mwamuna munango omwe akhaduwala kwa magole 38. 6 Pakuwona munthuyo adagona na kudziwa kuti akhaduwala kwa magole mazinji, Jezu adamubvunza kuti: “Kodi un’funa kulimba?” 7 Munthu wakuduwalayo adatawira kuti: “Mbuya, ndiribe munthu omwe angakandiyikhe m’thawalemo madzi yakabvunduka, ndipo ndikakhala kuti ndikuyenda kukapita, winango ambandipinzula.” 8 Jezu adamuuza kuti: “Lamuka! Nyamula mphasa* yako ufambe.” 9 Pa nthawe imweyoletu munthuyo adalimba ndipo adanyamula mphasa* yace aciyamba kufamba.

Imweyi ikhali ntsiku ya Sabudu. 10 Tenepo, Adjuda adauza munthu omwe akhadapozedwayo kuti: “Lero ni ntsiku ya Sabudu, mpsakubvumizidwa lini kunyamula mphasa.”* 11 Tsono iye adawatawira kuti: “Munthu omwe wandipozayo ndiye wandiuza kuti: ‘Nyamula mphasa* yako ufambe.’” 12 Iwo adamubvunza kuti: “Mbani umweyo omwe wakuuza kuti ‘nyamula mphasa yako ufambe?’” 13 Tsono munthuyo akhadziwa lini kuti mbani omwe akhadamupoza, pakuti Jezu akhadapita pakati pa thimu la wanthu lomwe likhali kumwekolo.

14 Patsogolo pace, Jezu adamugumana munthuyo mu templo ndipo adamuuza kuti: “Ona, walimba tsapano, leka kukacita pomwe pikado kuti bzinthu bzakuipiratu bzireke kukucitikira.” 15 Munthuyo adacoka pamwepo aciyenda kukauza Adjuda wale kuti ni Jezu omwe akhadamupoza. 16 Na thangwe limweri, Adjudawo adayamba kuboneresa Jezu thangwe iye akhacita bzinthu bzimwebzi pa ntsiku ya Sabudu. 17 Tsono Jezu adawauza kuti: “Baba wangu akadaphata basa mpaka pano ndipo inepano ndikupitirizambo kuphata basa.” 18 Bzimwebzi bzidacitisa Adjudawo kunyang’ana mpata uli-wentse wakuphera Jezu, sikuti thangwe ra kusaya kubvera lamulo la Sabudu lokha, koma thangwe rakuti iye akhalewambo kuti Mulungu ni Baba wace, acimbabziyesa kuti ngwakundendemerana na Mulunguyo.

19 Tenepo, Jezu adawauza kuti: “Cadidi ndikukuuzani, Mwana ambacita lini bzinthu bza mu msolo mwace, koma ambacita bzomwe adawona Baba wace akucita, thangwe bzinthu bzentse bzomwe Baba ambacita, mwanayo ambacitambo bzinthu mu njira ibodzi-bodziyo. 20 Pakuti Baba ambafuna Mwana wace ndipo ambamulatiza bzinthu bzentse bzomwe ambacita ndipo iye an’dzamulatiza mabasa makulu kuposa yamweya, kuti imwepo mudzadabwe nabzo. 21 Ninga momwe Baba ambalamusira wanthu wakufa aciwapasa moyo, Mwana ambaperekambo moyo kwa ule omwe iye afune. 22 Pakuti Baba ambatonga lini munthu ali-wentse, koma iye wapereka udindo bwentse bwakutonga kwa Mwana, 23 kuti wentse alemekeze Mwanayo ninga momwe ambalemekezera Baba. Ali-wentse omwe an’lemekeza lini Mwana, ambalemekezambo lini Baba omwe adatuma Mwanayo. 24 Cadidi ndikukuuzani kuti, ali-wentse omwe an’tetekera mafala yangu, acikhulupira ule omwe adandituma, anawo moyo wakusaya kumala ndipo iye an’dzongedwa lini, koma wacoka ku infa aciyenda ku moyo.

25 “Ndikukuuzani na citsimikizo centse kuti: Nthawe ikufika ndipo njimweyino kale, pomwe anyakufa an’dzabva fala la Mwana wa Mulungu ndipo wale omwe an’dzatetekera an’dzakhala na moyo. 26 Baba ana mphanvu yakupasa moyo, ndipo iye adapasambo Mwana mphanvu yakupasa moyoyo. 27 Ndipo Mulungu adamupasa mphanvu yakutonga thangwe iye ni Mwana wa munthu. 28 Lekani kudabwa na bzimwebzi, thangwe in’dzafika nthawe yomwe wentse omwe ali m’thenje,* an’dzabva fala lace 29 acidzabula. Omwe akhacita bzinthu bzabwino, an’dzamuka kuti atambire moyo, tsono wale omwe akhacita bzinthu bzakuipa, an’dzamuka kuti atongedwe. 30 Nimbacita lini ciri-centse mwakufuna kwangu, koma nimbatonga wanthu mwakubverana na bzomwe Baba wangu wandiuza ndipo nimbatonga mwacirungamo, thangwe nimbacita lini kufuna kwangu, koma kufuna kwa ule omwe adandituma.

31 “Ndikambauza ndekha wanthu pakulewa bza inepano, iwo an’dzakhulupira lini bzomwe ndikulewa. 32 Alipo munthu omwe ambalewa bza inepano, ndipo ndikudziwa kuti bzomwe ambalewabzo mpsacadidi. 33 Imwepo mudatumiza wanthu kuyenda kwa Juwau ndipo iye adacitira umboni cadidi. 34 Nin’funa lini munthu ali-wentse kuti auze wanthu bza inepano, tsono ndikulewa bzinthu bzimwebzi kuti imwepo mutambire moyo. 35 Munthu umweyu akhali mbvuniko wakugaka na wakuyetima, ndipo mu kanthawe kakucepa imwepo mukhafunisisa kukondwa kwene-kwene m’ceza cace. 36 Tsono inepano ndina bzinthu bzakufunika kwene-kwene kuposa bzomwe Juwau adalewa, pakuti mabasa yomwe Baba wangu adandipasa kuti ndicite, ni mabasa yomwe ndikucitaya kuti ndicitire umboni kuti Babayo ndiye omwe adanditumadi. 37 Ndipo Baba omwe adandituma, adandicitira umboni. Imwepo mukanati kubva fala lace ne kuwona nkhope yace, 38 ndipo fala lace lin’khala lini mwa imwepo, thangwe mumbakhulupira lini ule omwe iye adamutuma.

39 “Imwepo mumbafufudza Bzinembo, thangwe mumbakumbuka kuti mun’dzagumana moyo wakusaya kumala thangwe ra Bzinembobzo; ndipo Bzinembo bzimwebzo, ni bzomwe bzimbandicitira umboni. 40 Tsono imwepo mun’funa lini kubwera kwa ine kuti mudzagumane moyo. 41 Nimbabvuma lini ulemerero bwakucokera kwa wanthu. 42 Tsono ndikudziwa kuti imwepo mulibe lufoyi la Mulungu m’mitima mwanu. 43 Inepano ndidabwera m’dzina la Baba wangu, tsono imwepo mulibe kunditambira. Koma bzingadakhala kuti munthu munango wabwera m’dzina lace, imwepo mungadamutambira. 44 Kodi imwepo mungakhulupire tani pomwe mumbabvuma kutambira ulemerero bwakucokera kwa wanthu anzanu, ndipo mumbanyang’ana lini ulemerero bwakucokera kwa Mulungu yekha wacadidi? 45 Lekani kukumbuka kuti nin’kakulewerani kwa Baba, koma alipo munthu omwe angakulewereni ndipo munthuyo ni Mozeji omwe imwepo mudamukhulupira. 46 Ndipo penu mukhakhulupira Mozeji, mungadandikhulupirambo thangwe iye adanemba bza inepano. 47 Tsono penu mumbakhulupira lini bzomwe iye adanemba, kodi mungakhulupire tani bzomwe inepano ndikulewa?”

6 Pomwe adamala bzimwebzi, Jezu adayambukira ku ng’ambu inango ya nyanza ya Galileya yomwe imbacemeredwambo Tiberiadi. 2 Ndipo thimu la wanthu lidamutewera, thangwe likhawona bzinthu bzakudabwisa bzomwe iye akhacita pakuciza atenda. 3 Tenepo Jezu adakwira m’phiri, acikakhala m’mwemo pabodzi na anyakupfunza wace. 4 Ikhadasala pang’ono kufika ntsiku ya phwando la Paskwa ya Adjuda. 5 Pomwe Jezu adaceuka, adawona thimu likulu la wanthu lomwe likhamutewera, tenepo iye adabvunza Filipi kuti: “Kodi tin’kagula kuponi pau kuti wanthuwa adye?” 6 Iye adalewa bzimwebzi kuti awone bzomwe Filipiyo angadakumbuka, pakuti iye akhadziwa kale bzakucita. 7 Filipi adamutawira kuti: “Napo pau za madinario 200 zin’kwana lini kuti wentse adye pang’ono.” 8 Andereya, m’bodzi wa anyakupfunza wace, omwe akhali m’bale wace wa Simau Pedru adati: 9 “Pano, pana mulumbwana omwe ana pau zixanu zakukonzedwa na mpunga na tuntsomba tuwiri. Tsono kodi bzimwebzi bzingakwane thimu lentse la wanthuli?”

10 Jezu adati: “Auzeni wanthuwa akhale pantsi.” Pa mbutopo pakhana mauswa mazinji, tenepo amuna wakukwana 5000 adakhala pantsi. 11 Jezu adatenga pauzo acipemba, patsogolo pace adagawira omwe akhadakhala pamwepowo. Iye adacitambo bzibodzi-bodzi na tuntsombato ndipo ali-wentse adadya ninga momwe akhafunira. 12 Tsono pomwe iwo adakhuta, Jezu adauza anyakupfunza wace kuti: “Konkhobzani bzomwe bzasalabzi, kuti paleke kutaidwa ciri-centse.” 13 Tenepo iwo adakonkhobza bzitundu 12, kucokera ku pau zixanu zakukonzedwa na mpunga zire, zomwe wanthu adadya acizisiya.

14 Pomwe wanthuwo adawona cakudabwisaci, adayamba kulewa kuti: “Cadidi umweyu ni Mpolofeta ule omwe akhalewedwa kuti angadadzabwera pa dziko.” 15 Pomwe Jezu adadziwa kuti iwo akhabwera kuti adzamuphate kuti amuikhe kukhala mambo,* iye adacoka aciyenda ku phiri kwa yekha-yekha.

16 Pomwe kukhadoka, anyakupfunza wace adayenda ku nyanza, 17 ndipo iwo adapakira mwadiya, aciyambukira ku Kafarnau. Kukhana kale mdima ndipo Jezu akhanati kuyenda kukagumana nawo. 18 Ndipo m’nyanzamo mukhacita mabimbi thangwe ra conzi camphanvu. 19 Tenepo, pomwe iwo adacapa mwadiyayo kwa makilometro 5 ayai 6, adawona Jezu akufamba padzulu pa madzi, acimbafendera pafupi na mwadiyayo, tenepo, iwo adabva mantha. 20 Tsono iye adati kwa iwo: “Ndinepano, lekani kucita mantha.” 21 Tenepo, iwo adamutambira m’mwadiyamo, ndipo mwakusaya kucedwa iwo adafika komwe akhayenda.

22 Mangwana yace, thimu la wanthu lomwe likhadaima ku ng’ambu inango ya nyanzayo lidawona kuti pakhalibe mwadiya munango, koma pakhana mwadiya m’bodzi yekha mng’ono. Tenepo, iwo adadziwa kuti Jezu alibe kupakira mwadiya pabodzi na anyakupfunza wace, koma anyakupfunza wacewo akhadayenda okha. 23 Mimwadiya yakucokera ku Tiberiadi idafika pafupi na mbuto yomwe thimu la wanthu lidadya pau zomwe Jezu akhadazipempherera. 24 Tenepo, pomwe thimu la wanthuwo lidawona kuti ne Jezu ne anyakupfunza wace kukhalibe kumweko, adapakira pomwe mimwadiya yawo, aciyenda ku Kafarnau kuti akamunyang’ane.

25 Pomwe adagumana Jezu ku ng’ambu inango ya nyanzayo, adamubvunza kuti: “Mpfunzisi,* kodi mwafika lini kuno?” 26 Jezu adawatawira kuti: “Cadidi ndikukuzani kuti imwepo mukundinyang’ana lini thangwe ra bzakudabwisa bzomwe mudawona, koma ni thangwe rakuti mudadya pau mucikhuta. 27 Lekani kuphatira basa cakudya comwe cimbamala, koma phatirani basa cakudya comwe cimbamala lini comwe cimbatsogolera ku moyo wakusaya kumala, ndipo Mwana wa munthu an’funa kudzakupasani. Pakuti Mulungu Baba wamuikha cizindikiro cakulatiza kuti iye ngwakubvumizika.”

28 Iwo adamubvunza kuti: “Kodi ni basa liponi lomwe tin’funika kucita kuti tibvumidwe na Mulungu?” 29 Jezu adawatawira kuti: “Iri ndiro basa la Mulungu lomwe mun’funika kucita, khulupirani ule omwe iye adamutuma.” 30 Patsogolo pace, iwo adamubvunza kuti: “Kodi ni bzizindikiro bziponi bzomwe mun’dzacita kuti ife tiwone ticikukhulupirani? Ndipo ni basa liponi lomwe mun’dzacita? 31 Makolo yathu yakale adadya mana m’dambo ninga momwe bzidanembedwera kuti: ‘Iye adawapasa pau yakucokera kudzulu kuti adye.’” 32 Jezu adawauza kuti: “Cadidi ndikukuuzani kuti, Mozeji alibe kukupasani pau yakucokera kudzulu, tsono Baba wangu adakupasani pau caiyo yakucokera kudzulu. 33 Pakuti pau ya Mulungu, njire yomwe idacokera kudzulu ndipo imbapasa moyo dziko.” 34 Tenepo, iwo adamuuza kuti: “Mbuya, mbatipasani pau imweyo nthawe zentse.”

35 Jezu adawauza kuti: “Inepano ndine pau ya moyo, ali-wentse omwe an’bwera kwa ine an’dzabva lini pomwe njala ndipo ali-wentse omwe an’khulupira inepano, cipo acidzabva pomwe nyota. 36 Tsono ninga momwe ndidakuuzirani kale kuti, napo mwandiwona mumbandikhulupira lini. 37 Wentse omwe Baba adandipasa, an’dzabwera kwa ine ndipo wentse omwe an’dzabwera kwa ine, nin’dzawalamba lini. 38 Pakuti ine ndiribe kubwera kucokera kudzulu kuti ndidzacite kufuna kwangu, koma kufuna kwa ule omwe adandituma. 39 Kufuna kwa ule omwe adandituma n’kwakuti ndireke kuluza ne na m’bodziyo pa wentse omwe iye adandipasa, koma kuti ndidzawalamuse kwa anyakufa pa ntsiku yakumalizira. 40 Pakuti kufuna kwa Baba wangu n’kwakuti ali-wentse omwe an’zindikira mwana acimukhulupira, adzatambire moyo wakusaya kumala ndipo inepano nin’dzamulamusa pa ntsiku yakumalizira.”

41 Patsogolo pace Adjuda adayamba kung’ung’udzika thangwe Jezu adalewa kuti: “Inepano ndine pau yakucokera kudzulu.” 42 Ndipo iwo adayamba kulewa kuti: “Kodi umweyu ni Jezu lini mwana wa Zuze? Kodi pai wace na mai wace timbawadziwa lini? Tsono thangwe ranyi akulewa kuti ‘inepano ndidacokera kudzulu’?” 43 Pakuwatawira Jezu adati: “Lekani kung’ung’udzika. 44 Palibe munthu omwe angabwere kwa ine, penu Baba omwe adandituma alibe kumubweresa ndipo inepano nin’dzamulamusa pa ntsiku yakumalizira. 45 Bzidanembedwa na Apolofeta kuti: ‘Wentsewa an’dzapfunzisidwa na Yahova’ ndipo ali-wentse omwe an’tetekera Baba acipfunza, an’dzabwera kwa inepano. 46 Palibe munthu omwe adawona kale Baba, kupambula ule omwe adacokera kwa Mulungu, umweyo ndiye omwe adawona Baba. 47 Cadidi ndikukuuzani kuti ali-wentse omwe an’khulupira an’dzakhala na moyo wakusaya kumala.

48 “Ine ndine pau ya moyo. 49 Makolo yanu yadadya mana m’dambo, koma iwo adadzafa. 50 Imweyi ni pau yomwe idacokera kudzulu, kuti ali-wentse omwe aniidya aleke kufa. 51 Inepano ndine pau ya moyo yomwe idacokera kudzulu ndipo ali-wentse omwe an’dya pau imweyi, an’dzakhala na moyo mpaka kale-kale, kulewa cadidi, pau yomwe nin’dzapereka ni thupi langu, kuti wanthu wa pa dziko akhale na moyo.”

52 Tenepo Adjuda adayamba kunesana okha-okha kuti: “Kodi munthu umweyu angatipase tani thupi lace kuti tidye?” 53 Tenepo Jezu adawauza kuti: Cadidi ndikukuuzani kuti: “Mukasaya kudya thupi la Mwana wa munthu na kumwa mulopa wace, imwepo mun’dzakhala lini na moyo. 54 Ali-wentse omwe an’dya thupi langu na kumwa mulopa wangu, anawo moyo wakusaya kumala, ndipo inepano nin’dzamulamusa kwa anyakufa pa ntsiku yakumalizira. 55 Thangwe thupi langu, ni cakudya caico ndipo mulopa wangu, ni cakumwa caico. 56 Ali-wentse omwe an’dya thupi langu na kumwa mulopa wangu, umweyo na inepano timbabverana. 57 Ninga Baba wamoyo adandituma ine, ndipo inepano ndina moyo thangwe ra Babayo, tenepo ali-wentse omwe an’dya thupi langu an’dzakhalambo na moyo thangwe ra ine. 58 Imweyi ni pau yomwe idacokera kudzulu, pau imweyi idasiyana na yomwe makolo yanu yadadya ndipo na kupita kwa nthawe adadzafa. Ali-wentse omwe an’dya pau imweyi an’dzakhala na moyo wakusaya kumala.” 59 Iye adalewa bzimwebzi pomwe akhapfunzisa ku nyumba yakunamatira* ya ku Kafarnau.

60 Pomwe iwo adabva bzimwebzi, anyakupfunza wace azinji adati: “Mafala yamweya njakukalipisa, kodi mbani omwe angayatetekere?” 61 Tsono Jezu adazindikira kuti anyakupfunza wace akhang’ung’udzika na bzimwebzi, tenepo iye adawabvunza kuti: “Kodi mwakalipa thangwe ra bzimwebzi? 62 Kodi bzin’dzakhala tani mukadzawona mwana wa munthu akukwira acibwerera komwe akhali pakuyamba? 63 Mzimu ndiwo umbapasa moyo, thupi liribe basa. Mafala yomwe ndakuuzaniya ndiyo mzimu na moyo. 64 Tsono winango wa imwepo akukhulupira lini.” Pakuti Jezu akhadziwa kuyambira pa ciyambi kuti ni mbani omwe akumukhulupira lini na omwe an’dzamupereka. 65 Iye adathumizira kuti: “Ndipopa ndakuuzani kuti palibe munthu omwe angabwere kwa ine, penu Baba alibe kumubvumiza.”

66 Thangwe ra bzimwebzi, anyakupfunza wace azinji adabwerera acikacita pomwe bzomwe akhacita kale pakuyamba, ndipo alibe kudzafamba naye pomwe. 67 Tenepo, Jezu adabvunza anyakupfunza wace 12 wale kuti: “Kodi imwepo mun’funambo lini kuyenda?” 68 Simau Pedru adamutawira kuti: “Mbuya, kodi tiniyenda kuna yani? Imwepo ndimwe muna mafala ya moyo wakusaya kumala. 69 Ifepano tikukhulupira ndipo tikudziwa kuti imwepo ndimwe Wakucena wa Mulungu.” 70 Jezu adawatawira kuti: “Mulipo lini 12 omwe ndidakusankhulani? Tsono m’bodzi wa imwepo ali ninga Dyabu.” 71 Kulewa cadidi, iye akhalewa bza Djuda, omwe akhali mwana wa Simau Sikaliyoti, pakuti ndiye omwe angadadzamupereka napo kuti akhali m’bodzi wa anyakupfunza wace 12.

7 Patsogolo pace, Jezu adapitiriza kumbacita mabasa yace ku Galileya, thangwe iye akhafuna lini kucita bzimwebzi ku Djudeya, pakuti Adjuda akhamunyang’ana kuti amuphe. 2 Tsono, nthawe ya phwando la misasa la Adjuda likhadafendera. 3 Tenepo, azibale wace adamuuza kuti: “Ndoko ku Djudeya kuti anyakupfunza wako akawonembo mabasa yomwe ukucitaya. 4 Thangwe palibe munthu omwe ambacita cinthu mwakabisira akafuna kudziwika padeca. Penu iwepo ukucita bzinthu bzimwebzi, bzilatize kwa wanthu wentse.” 5 Kulewa cadidi, azibale wacewo akhamukhulupira lini. 6 Tenepo Jezu adawauza kuti: “Nthawe yangu ikanati kukwana, tsono kwa imwepo nthawe yentse njakuthemera. 7 Dziko liribe thangwe lakukuwengerani, koma iro limbawenga inepano thangwe nimbazimbula padeca kuti mabasa yace njakuipa. 8 Imwepo ndokoni ku phwandoko, koma inepano ndiniyenda lini, thangwe nthawe yangu ikanati kukwana.” 9 Pomwe adamala kuwauza bzimwebzi, iye adasala ku Galileya.

10 Tsono pomwe azibale wace adayenda ku phwandoko, iye adayendambo, koma mwakabisira. 11 Tenepo, Adjuda adayamba kumunyang’ana pa phwandopo, acimbati: “Kodi munthu umweule ali kuponi?” 12 Pakhana wanthu azinji pakati pa thimulo, omwe akhambalewa bza iye mwakazewe-zewe. Winango akhambati: “Iye ni munthu wabwino.” Tsono winango akhati: “Ne, ngwabwino lini. Iye akunamiza wanthu.” 13 Palibe munthu omwe akhalewa bza iye padeca thangwe ra kugopa Adjuda.

14 Pomwe phwandolo likhali pakati, Jezu adayenda ku templo ndipo adayamba kupfunzisa. 15 Ndipo Adjuda akhadabwa, acimbalewa kuti: “Kodi munthu umweyu akudziwa tani Bzinembo uko alibe kuyenda ku xikola?”* 16 Jezu adawatawira kuti: “Bzomwe inepano nimbapfunzisa mpsangu lini, koma mpsa ule omwe adandituma. 17 Munthu omwe an’funa kucita kufuna kwa Mulungu, iye an’dzadziwa penu bzomwe nimbapfunzisa bzimbacokera kwa Mulunguyo ayai bzimbacokera mu msolo mwangu. 18 Ali-wentse omwe ambalewalewa bza mu msolo mwace, ambalinga kubzipasa ulemerero, tsono ali-wentse omwe ambalinga ulemerero kwa ule omwe adandituma, umweyo ngwacadidi ndipo ambacita bzinthu mwacirungamo. 19 Kodi Mozeji alibe kukupasani Malamulo? Tsono palibe ne na m’bodzi wa imwepo omwe ambabvera Malamuloyo. Thangwe ranyi mun’funa kundipha?” 20 Thimu la wanthulo lidatawira kuti: “Iwepo una ciwanda. Kodi mbani an’funa kukuphayo?” 21 Pakuwatawira Jezu adati: “Inepano ndandocita cakudabwisa cibodzi cokha, ndipo mwentsenemwe mukudabwa. 22 Na thangwe limweri, Mozeji adakupasani mgwatidwe.* Mgwatidweyo ulibe kucokera kwa Mozeji, koma kwa makolo yanu yakale ndipo imwepo mumbacita munthu mgwatidwe* pa ntsiku ya Sabudu. 23 Tsono penu imwepo mumbacita mgwatidwe pa ntsiku ya Sabudu kuti muteweze Malamulo ya Mozeji, thangwe ranyi mukukalipa na inepano thangwe rakuti ndapoza munthu pa ntsiku ya Sabudu? 24 Lekani kumbatonga mwakumbawona nkhope, koma mbatongani mwacirungamo.”

25 Patsogolo pace, wanthu winango wakukhala ku Jeruzalemu adayamba kulewa kuti: “Kodi ngumweyu lini omwe akunyang’anidwa ule kuti aphedwe? 26 Tsono onani, iye akulewalewa padeca ndipo palibe omwe akulewa bza iye. Kodi atsogoleri wathu akukumbukambo kuti umweyu ni Kristu? 27 Ifepano tikudziwa komwe munthuyu wacokera; tsono Kristu akadzabwera, palibe omwe an’dzadziwa komwe iye wacokera.” 28 Patsogolo pace, pomwe Jezu akhapfunzisa mu templo, adalewalewa mwakukuwa kuti: “Imwepo mumbandidziwa ndipo mumbadziwambo kuti inepano ndine wa kuponi. Inepano ndiribe kubwera mwakucita kufuna kwangu, koma ule omwe adandituma ngwacadidi ndipo imwepo mumbamudziwa lini. 29 Inepano nimbamudziwa pakuti ndine muimikiri wace, ndipo iye ndiye omwe adandituma.” 30 Tenepo, iwo adayamba kunyang’ana njira yakuti amumange, tsono palibe omwe adakwanisa kumuphata thangwe nthawe yace ikhanati kukwana. 31 Napo bzikhali tenepo, wanthu azinji adamukhulupira ndipo iwo akhambalewa kuti: “Kodi Kristu akadzabwera, an’dzacita bzakudabwisa bzizinji kuposa bzomwe munthuyu akucita?”

32 Pomwe Afarizeu adabva thimu la wanthulo likung’ung’udzika pakulewa bza Jezu, atsogoleri wa antsembe na Afarizeuwo adatuma alindiri kuti akamumange.* 33 Patsogolo pace Jezu adawauza kuti: “Nin’khala namwe mu kanthawe kakucepa ndikanati kuyenda kwa ule omwe adandituma. 34 Imwepo mun’dzandinyang’ana, tsono mun’dzandiwona lini ndipo komwe inepano ndiniyenda, imwepo mun’dzafika lini.” 35 Na tenepo Adjuda adayamba kumbabvunzana kuti: “Kodi umweyu an’funa kuyenda kuponi komwe ifepano tingamugumane lini? Kodi an’funa kuyenda kwa Adjuda omwe adamwazikana pakati pa Agerego kuti akapfunzise Ageregowo? 36 Kodi umweyu an’funa kulewanyi akati: ‘Imwepo mun’dzandinyang’ana tsono mun’dzandiwona lini ndipo komwe inepano ndiniyenda imwepo mun’dzafika lini’?”

37 Pa ntsiku yakumalizira, yomwe ikhali ntsiku ikulu ya phwandolo, Jezu adaima acilewa mwakukuwa kuti: “Penu alipo omwe ana nyota, abwere kuna ine kuti adzamwe madzi. 38 Ali-wentse omwe an’ndikhulupira, ‘mu mtima mwace mun’dzayerera madzi ya moyo, ninga momwe bzinembo bzimbalewera.’” 39 Tsono iye akhalewa bza mzimu wakucena, omwe ungadadzaperekedwa kwa wale omwe akhamukhulupira; pakuti iwo akhanati kutambira mzimuyo, thangwe Jezu akhanatimbo kutambira ulemelero. 40 Pomwe wanthu winango pa thimulo adabva mafala yamweya, adayamba kulewa kuti: “Cadidi munthuyu ni mpolofetadi.” 41 Winango akhambalewa kuti: “Umweyu ni Kristu.” Tsono winango akhambalewambo kuti: “Kodi Kristu angacokere ku Galileya? 42 Kodi bzinembo bzimbalewa lini kuti Kristu an’dzabadwira mu dzinza la Davide ndipo an’dzacokera ku Betelehemu, mzinda omwe Davideyo akhakhala?” 43 Tenepo wanthuwo adayamba kusaya kubvesesana thangwe ra Jezu. 44 Winango wa iwo akhafuna kumumanga, tsono palibe omwe adayezera kumuphata.

45 Patsogolo pace, alindiriwo adabwerera, ndipo atsogoleri wa antsembe na Afarizeu adawabvunza kuti: “Thangwe ranyi mulibe kubwera naye?” 46 Alindiriwo adawatawira kuti: “Palibe munthu omwe adalewalewa kale ninga iye.” 47 Tsono Afarizeuwo adawabvunza kuti: “Kodi imwepo mwapumpsidwambo? 48 Kodi alipo omwe akumukhulupirambo pakati pa atsogoleri wathu ayai Afarizeu? 49 Thimu la wanthu lomwe limbadziwa lini Malamuloli ndakutembereredwa.” 50 Tsono Nikodemo, omwe akhadayenda kuna Jezu pakuyamba ule, ndipo omwe akhalimbo m’bodzi wa iwo adalewa kuti: 51 “Kodi Malamulo yathu yambatibvumiza kutonga munthu, tikanati kubva bzomwe iye wacita?” 52 Pakutawira iwo adati: “Kodi iwepombo ndiwe wa ku Galileya? Fufudza uwone penu ku Galileya kungacoke mpolofeta.”*

8 12 Patsogolo pace, Jezu adawauza pomwe kuti: “Inepano ndine ceza ca dziko. Ali-wentse omwe an’tewera inepano, an’dzafamba lini mu mdima koma an’dzakhala na ceza ca moyo.” 13 Tenepo Afarizeu adamuuza kuti: “Iwepo ukubzicitira wekha umboni, tsono umboni bwakobo n’bwakunama.” 14 Pakutawira Jezu adawauza kuti: “Napo ndikubzicitira ndekha umboni, umboni bwangubo n’bwacadidi thangwe ndikudziwa komwe ndidacokera na komwe ndikuyenda, tsono imwepo mun’dziwa lini komwe ndidacokera ne komwe ndikuyenda. 15 Imwepo mumbatonga ninga momwe wanthu ambacitira, tsono inepano nimbatonga lini munthu. 16 Napo ndicitonga, katongedwe kangu n’kacirungamo thangwe ndiri lini ndekha, koma ndiri pabodzi na Baba omwe adandituma. 17 Napo m’Malamulo mwanu* mudanemba kuti: ‘Umboni bwa wanthu awiri n’bwacadidi.’ 18 Inepano nimbabzicitira ndekha umboni ndipo Baba omwe adandituma ambandicitirambo umboni.” 19 Tenepo iwo adamubvunza kuti: “Kodi Baba wakoyo ali kuponi?” Jezu adawatawira kuti: “Imwepo mumbandidziwa lini, ne mumbadziwa lini Baba wangu. Bzingadakhala kuti mumbandidziwa, mungadadziwambo Baba wangu.” 20 Iye adalewa mafala yamweya pafupi na makaxa ya bzakupereka pomwe akhapfunzisa mu templo, tsono palibe omwe adamuphata thangwe nthawe yace ikhanati kukwana.

21 Tenepo iye adawauza pomwe kuti: “Inepano ndikuyenda, ndipo imwepo mun’dzandinyang’ana, tsono mun’dzafa na pikado zanu, thangwe komwe ndikuyendako imwepo mungakufike lini.” 22 Adjudawo adayamba kulewa kuti: “Thangwe ranyi umweyu akulewa kuti: ‘Komwe ndikuyendako imwepo mungakufike lini?’ Kodi umweyu an’funa kubzipha?” 23 Iye adawauza pomwe kuti: “Imwepo ndimwe wa pantsi pano, tsono inepano ndine wakudzulu. Imwepo ndimwe wa pa dziko, tsono inepano ndine lini wa pa dzikoli. 24 Ndipopa ndikukuuzani kuti: Imwepo mun’dzafa na pikado zanu, pakuti mukasaya kukhulupira kuti ndine yani, imwepo mun’dzafa na pikado zanu.” 25 Tenepo iwo adamubvunza kuti: “Kodi iwepo ndiwe yani?” Jezu adawatawira kuti: “Thangwe ranyi inepano ndikubonera kulewalewa namwe? 26 Ndina bzinthu bzizinji kuti ndilewe na kutonga. Kulewa cadidi, Ule omwe adandituma ngwacadidi ndipo bzinthu bzomwe ndidabva kwa iye nimbabzilewa pa dziko.” 27 Iwo alibe kubvesesa kuti iye akhalewa bza Baba wace. 28 Patsogolo pace Jezu adati: “Mukadzamala kumanika Mwana wa munthu pa muti, imwepo mun’dzazindikira kuti iye ndinepano, thangwe nimbacita lini bza mu msolo mwangu, koma nimbalewa bzinthu bzomwe Baba adandipfunzisa. 29 Ndipo Ule omwe adandituma anande pabodzi ndipo iye alibe kundisiya, thangwe nthawe zentse nimbacita bzomwe ambakomedwa nabzo.” 30 Pomwe adalewa bzinthu bzimwebzi, wanthu azinji adamukhulupira.

31 Patsogolo pace, Jezu adauza Adjuda omwe akhamukhulupirawo kuti: “Mukapitiriza kubvera fala langu, ndimwedi anyakupfunza wangu. 32 Ndipo imwepo mun’dzadziwa cadidi, ndipo cadidico cin’dzakutsudzulani.” 33 Tsono iwo adamutawira kuti: “Ifepano ndife wana wa Abalahamu ndipo tikanati kukhala akapolo wa munthu ali-wentse. Thangwe ranyi iwepo ukulewa kuti: ‘Mun’dzatsudzulidwa’?” 34 Jezu adawatawira kuti: “Cadidi ndikukuuzani kuti ali-wentse omwe ambacita pikado, ni kapolo wa pikadoyo. 35 Kuthumizira bzimwebzi, kapolo ambakhala lini pa mui pa bwana wace kwa nthawe zentse, tsono mwana wa pa muipo ambakhala mpaka kale-kale. 36 Tenepo Mwana akadzakutsudzulani, imwepo mun’dzakhala na ufulu caibo. 37 Ndikudziwa kuti ndimwe wana wa Abalahamu, tsono mukufuna kundipha thangwe mumbabvuma lini mafala yangu. 38 Inepano nimbalewa bzinthu bzomwe ndidawona pomwe ndikhana Baba wangu, tsono imwepo mumbacita bzinthu bzomwe mudabva kwa baba wanu.” 39 Pakutawira iwo adamuuza kuti: “Pai wathu ni Abalahamu.” Tsono Jezu adawauza kuti: “Bzingadakhala kuti ndimwe wana wa Abalahamu, mungadacita mabasa yomwe Abalahamuyo adacita. 40 Inepano ndine munthu omwe ndakuuzani cadidi comwe ndidabva kucokera kwa Mulungu, tsono imwepo mukufuna kundipha. Abalahamu alibe kucita bzimwebzi. 41 Imwepo mumbacita mabasa ya baba wanu.” Tsono iwo adamuuza kuti: “Ifepano tiribe kubadwa mwa uputa,* Baba wathu ni m’bodzi yekha basi, Mulungu.”

42 Jezu adawauza kuti: “Bzingadakhala kuti Mulungu ni Baba wanu, imwepo mungadandifuna pakuti ndidacokera kwa Mulungu ndipo ndiri pano. Ndiribe kubwera mwa kufuna kwangu, koma Iye ndiye omwe adandituma. 43 Thangwe ranyi imwepo mukubvesesa lini bzomwe ndikulewa? Thangwe mun’funa lini kutetekera mafala yangu. 44 Imwepo ndimwe wakucokera kwa baba wanu Dyabu, ndipo mumbafuna kucita bzomwe baba wanuyo ambafuna. Iye ngwakupha kuyambira pa ciyambi ndipo alibe kupitiriza kukhala mu cadidi thangwe mwa iye mulibe cadidi. Akambalewa bzakunama, ambalewa mwakubverana na bzomwe iye ali, thangwe iye ngwakunama ndipo ni baba wakunama. 45 Thangwe ndikukuuzani cadidi, imwepo mukundikhulupira lini. 46 Mbani wa imwepo omwe angalewe kuti ndina pikado? Penu ndikulewa cadidi, thangwe ranyi imwepo mukundikhulupira lini? 47 Wana wa Mulungu, ambatetekera mafala ya Mulungu, tsono imwepo mumbatetekera lini thangwe ndimwe lini wana wa Mulunguyo.”

48 Pakumutawira Adjuda adati: “Tikalewa kuti ‘Iwepo ndiwe Msamariya ndipo una ciwanda,’ kodi tikuphonyeka?” 49 Jezu adawatawira kuti: “Ndiribe ciwanda ine. Nimbalemekeza Baba wangu, tsono imwepo mumbandinyoza. 50 Inepano nimbalinga lini kubzipasa ulemerero, tsono alipo omwe ambafuna kundipasa ulemererobo ndipo ni mtongi. 51 Cadidi ndikukuuzani kuti, ali-wentse omwe an’tetekera mafala yangu, cipo acidzawona infa.” 52 Adjuda adamuuza kuti: “Tsapano tadziwadi kuti iwepo una ciwanda. Abalahamu adafa ndipo apolofeta adafambo, tsono iwepo ukulewa kuti ‘Ali-wentse omwe an’tetekera mafala yangu cipo acidzawona infa.’ 53 Kodi iwepo ndiwe mkulu kuposa pai wathu Abalahamu? Iye adafa ndipo apolofeta adafambo. Kodi iwepo umbabziwona kuti ndiwe yani?” 54 Jezu adawatawira kuti: “Penu inepano nimbabzipasa ndekha ulemerero, ulemerero bwangubo n’bwakusaya basa. Baba wangu omwe imwepo mumbalewa kuti ni Mulungu wanu, ndiye omwe ambandipasa ulemerero. 55 Imwepo mumbamudziwa lini, tsono inepano nimbamudziwa. Ndipo ningadakuuzani kuti nimbamudziwa lini, ningadakhala wakunama ninga imwepo, tsono ine nimbamudziwa ndipo nimbabvera mafala yace. 56 Abalahamu pai wanu adakomedwa kwene-kwene pomwe akhadikhirira kuwona ntsiku yangu ndipo iye adaiwona, acikomedwa.” 57 Tsono Adjudawo adamubvunza kuti: “Iwepo ulibe ne magole 50, tsono udamuwona tani Abalahamuyo?” 58 Jezu adawauza kuti: “Cadidi ndikukuuzani kuti inepano ndikhalipo kale, Abalahamu akanati kubadwa.” 59 Tenepo, iwo adalokota minyala kuti amubome, tsono Jezu adabisalika, acicoka mu templomo.

9 Pomwe Jezu akhapita na pamwepo, adawona munthu munango omwe akhadabadwa zimola. 2 Ndipo anyakupfunza wace adamubvunza kuti: “Mpfunzisi,* mbani adaphonya kuti munthuyu abadwe zimola, ni munthuyu ayai ni abereki wace?” 3 Jezu adawatawira kuti: “Palibe omwe adaphonya, ne umweyu ne abereki wace, koma bzimwebzi bzidacitika kuti wanthu awone mabasa ya Mulungu. 4 Tin’funika kuphata basa la Ule omwe adandituma pomwe yakali masikati, thangwe usiku bukufika ndipo palibe munthu omwe an’dzaphata basa. 5 Pomwe ndikali pantsi pano, ndine ceza ca dziko.” 6 Pomwe adamala kulewa bzimwebzi, Jezu adapsipira mata pantsi acimunya matope na mata yaceyo. Patsogolo pace adanyatika matopeyo m’maso mwa zimolayo, 7 ndipo iye adamuuza kuti: “Ndoko ukasambe m’thawale la Silowe” (dzina lakuti Silowe limbathandauza “Wakutumidwa”). Ndipo iye adayendadi kukasamba, acibwerera akuwona.

8 Patsogolo pace, wale omwe akhakhala naye pafupi na wale omwe akhambamuwona acimbakumbira-kumbira, adayamba kumbalewa kuti: “Kodi umweyu ngule lini omwe akhambakhala pantsi acimbakumbira-kumbira?” 9 Winango akhalewa kuti: “Inde ndiye.” Tsono winango akhambalewa kuti: “Ne, ndiye lini, adandotengana.” Tsono munthuyo adalewa kuti: “Inde, ndinepano.” 10 Tenepo, iwo adamubvunza kuti: “Tsono maso yakoya yafunguka tani?” 11 Iye adatawira kuti: “Munthu munango wakucemeredwa Jezu, adamunya matope, acinyatika m’maso mwangumu ndipo adandiuza kuti: ‘Ndoko ukasambe mu thawale la Silowe.’ Inepano ndidayendadi ndicikasamba, ndipo ndidayamba kuwona.” 12 Na bzimwebzi wanthuwo adamubvunza kuti: “Ali kuponi munthu umweyo?” Tsono iye adawatawira kuti: “Nin’dziwa lini.”

13 Tenepo, iwo adatenga munthu omwe akhali zimolayo, aciyenda naye kwa Afarizeu. 14 Ntsiku yomwe Jezu adamunya matope acifungula maso ya zimolayo, ikhali ntsiku ya Sabudu. 15 Na tenepo, Afarizeu adayambambo kubvunza munthuyo kuti iye adayamba tani kuwona. Iye adawatawira kuti: “Jezu adanyatika matope m’maso mwangumu ndiciyenda kukasamba, ndipo tsapano ndikuwona.” 16 Afarizeu winango adalewa kuti: “Munthu umweyu alibe kucokera kwa Mulungu thangwe ambalemekeza lini ntsiku ya Sabudu.” Tsono winango adati: “Bzingakwanisike tani munthu wa pikado kucita bzakudabwisa ninga bzimwebzi?” Tenepo adayamba kugawanika pakati pawo. 17 Ndipo iwo adabvunza pomwe munthu omwe akhali zimolayo kuti: “Kodi iwepo unti tani pakulewa bza munthu umweyu, pakuti iye wafungula maso yakoya?” Munthuyo adati: “Iye ni mpolofeta.”

18 Na bzimwebzi Adjuda akhakhulupira lini kuti munthuyo akhadabadwadi zimola, ndipo tsapano akhawona, mpaka adadzacemeresa abereki wa munthuyo. 19 Ndipo iwo adabvunza abereki wa munthuyo kuti: “Kodi uyu ndiye mwana wanu omwe mumbalewa kuti adabadwa zimola? Kodi bzakwanisika tani kuti tsapano ayambe kuwona?” 20 Abereki wacewo adatawira kuti: “Ifepano tin’dziwa kuti umweyu ni mwana wathu omwe adabadwadi zimola. 21 Tsono ifepano tikudziwa lini kuti wayamba tani kuwona ndipo tikudziwambo lini kuti ni mbani omwe wamufungula maso yaceya. Mubvunzeni iye, pakuti ni mkulu, angalewe yekha.” 22 Abereki wacewo adalewa bzimwebzi thangwe akhagopa Adjuda, pakuti Adjudawo akhadapangana kuti munthu ali-wentse omwe angadabvuma kuti Jezu ni Kristu, angadathothedwa m’nyumba yakunamatira.* 23 Ndipopa abereki wacewo adalewa kuti: “Iye ni mkulu, mubvunzeni.”

24 Tenepo, iwo adacemera pomwe kaciwiri munthu omwe akhali zimolayo acimuuza kuti: “Tumbiza Mulungu. Ifepano tikudziwa kuti munthu umweyu ni nyapikado.” 25 Iye adatawira kuti: “Inepano ndikudziwa lini penu munthuyo ni nyapikado ayai ne. Tsono comwe ndikudziwa n’cakuti inepano ndikhali zimola, ndipo tsapano ndikuwona.” 26 Tenepo iwo adamubvunza kuti: “Kodi iye wakucita ciyani? Wakufungula tani masoya?” 27 Iye adawatawira kuti: “Inepano ndakuuzani kale, tsono imwepo mulibe kufuna kubva. Thangwe ranyi mun’funa pomwe kubva bza nkhani imweyi? Kodi mun’funambo kukhala anyakupfunza wace?” 28 Na bzimwebzi iwo adalewa mwakumunyoza kuti: “Iwepo ndiwe nyakupfunza wa munthu umweyo, tsono ifepano ndife ateweri wa Mozeji. 29 Ifepano tikudziwa kuti Mulungu adalewalewa na Mozeji, tsono pakulewa bza munthu umweyo, ifepano tikudziwa lini komwe iye adacokera.” 30 Iye adawatawira kuti: “Mpsakudabwisa kuti imwepo mun’dziwa lini komwe iye adacokera, koma iye wafungula maso yanguya. 31 Ifepano timbadziwa kuti Mulungu ambatetekera lini anyapikado. Koma ambatetekera wale omwe ambamugopa na kucita kufuna kwace. 32 Kuyambira kale-kale, bzikanati kubvekambo kale kuti munthu wafungula maso ya munthu omwe adabadwa zimola. 33 Bzingadakhala kuti munthu umweyu alibe kucokera kwa Mulungu, angadakwanisa lini kucita bzimwebzi.” 34 Pakumutawira iwo adati: “Iwepo ndiwe munthu wakubadwa na pikado, kodi un’funa kupfunzisa ifepano?” Tenepo iwo adamuthotha.

35 Jezu adabva kuti Afarizeuwo akhadathotha munthuyo, ndipo pomwe adamugumana, adamubvunza kuti: “Kodi iwepo umbakhulupira Mwana wa munthu?” 36 Munthuyo adamutawira kuti: “Kodi ni mbani iye Mbuya, kuti inepano ndimukhulupire?” 37 Jezu adamuuza kuti: “Iwepo udamuwona kale ndipo ngumweyu omwe ukulewalewa nayeyu.” 38 Munthuyo adati: “Nimbamukhulupira Mbuya.” Ndipo iye adamugodamira. 39 Tenepo Jezu adati: “Ndidabwera pa dziko kudzatonga, kuti wanthu omwe ambawona lini, awone ndipo omwe ambawona, akhale azimola.” 40 Pomwe Afarizeu winango omwe akhanaye pabodzi adabva bzimwebzi, adamubvunza kuti: “Kodi ifepanombo ndife azimola?” 41 Jezu adawatawira kuti: “Bzingadakhala kuti ndimwe azimola, mungadakhala mulibe pikado. Tsono pakuti mumbalewa kuti ‘Ifepano timbawona.’ Pikado yanu in’pitiriza kukhala namwe.”

10 Cadidi ndikukuuzani kuti: “Ule omwe an’pita lini na pa msuwo m’thanga la mabira, koma acipita na pa mphotco, umweyo ni mbava ndipo ni kambowa. 2 Tsono ule omwe ambapita na pa msuwo, ni makabusa wa mabirayo. 3 Mulindiri wa pa msuwo ambamufungulira, ndipo mabirayo yambabva fala lace. Iye ambacemera dzina la bira ali-wentse ndipo ambayatsogolera kucoka kunja. 4 Akamala kucosa mabira yentseyo panja, iye ambayenda patsogolo pa mabirayo, ndipo mabirayo yambam’tewera thangwe yambadziwa fala lace. 5 Mabirayo yambatewera lini munthu wacirendo, koma yambamuthawa, thangwe yambadziwa lini fala lacirendo.” 6 Jezu adalewa ciratizoci kwa iwo, tsono iwo alibe kubvesesa bzomwe akhawauzabzo.

7 Tenepo, Jezu adawauza pomwe kuti: “Cadidi ndikukuuzani kuti, inepano ndine msuwo wa mabira. 8 Ali-wentse omwe an’bwera m’mbuto mwangu acilewa kuti ni makabusa wacadidi, umweyo ni mbava ndipo ni kambowa; ndipo mabirayo yanimubvera lini. 9 Inepano ndine msuwo. Ali-wentse omwe an’pita pana ine, an’dzapulumuka. Iye an’dzapita acibula, ndipo an’dzagumana cakudya. 10 Mbava imbandobwera kudzaba, kudzapha na kudzapfudza. Tsono ine ndidabwera kuti mukhale na moyo wakusaya kumala. 11 Ine ndine makabusa wabwino, ndipo makabusa wabwino ambapereka moyo wace kuti apulumuse mabira. 12 Koma nyabasa omwe ni makabusa lini ndipo mabirayo njace lini, akawona mphumphi ikubwera, iye ambathawa, acisiya mabirayo. Mphumphiyo imbaphata mabira manango ndipo manango yambathawa, yacibalalika. 13 Iye ambathawa thangwe rakuti ni nyabasa ndipo alibe basa na mabirayo. 14 Inepano ndine makabusa wabwino. Nimbadziwa mabira yangu ndipo mabirayo yambandidziwambo. 15 Ninga momwe Baba ambandidziwira, inepanombo nimbadziwa Baba ndipo nimbapereka moyo wangu kuti ndipulumuse mabirayo.

16 “Ndipo ndina mabira manango yomwe njathanga lini limweri. Mabira yamweyo nin’funikambo kuyabweresa ndipo yan’dzatetekera fala langu. Mabirayo yan’dzakhala thimu libodzi na makabusa m’bodzi. 17 Ndipopa Baba wangu ambandifuna, thangwe ndikupereka moyo wangu kuti ndidzautambire pomwe. 18 Palibe munthu omwe angandicosere moyo wangu, koma nimbaupereka mwakufuna kwangu. Ndinayo mphanvu ya kuupereka ndipo ndinayo mphanvu ya kuutambira pomwe. Lamulo limweri, ndidalitambira kwa Baba wangu.”

19 Padawoneka pomwe kugawanika pakati pa Adjuda thangwe ra mafala yamweya. 20 Wanthu azinji akhambalewa kuti: “Umweyu ana ciwanda ndipo akupenga. Thangwe ranyi mukumutekera?” 21 Winango akhambati: “Mafala yamweya nja munthu lini omwe ana ciwanda. Kodi ciwanda cingafungule maso ya munthu omwe ni zimola?”

22 Pa nthawe imweyo, padacitika phwando lakukumbukira kuperekedwa kwa templo ku Jeruzalemu, ikhali nthawe ya mphepo, 23 ndipo Jezu akhafamba m’khonde mwa templo, lomwe likhacemeredwa kuti Khonde la Salomau. 24 Tenepo Adjuda adamuzungulira aciyamba kumuuza kuti: “Kodi ni lini pomwe un’dzatiuza cadidi pakulewa bza iwepo? Penu ndiwe Kristu, tiuziretu padeca.” 25 Jezu adawatawira kuti: “Ndakuuzani kale, tsono imwepo mun’funa lini kukhulupira. Mabasa yomwe nimbayacita m’dzina la Baba wangu, yambandicitira umboni. 26 Tsono imwepo mumbakhulupira lini thangwe ndimwe lini mabira yangu. 27 Mabira yangu yambatetekera fala langu, nimbayadziwa ndipo iyo yambanditewera. 28 Nin’dzayapasa moyo wakusaya kumala ndipo iyo yan’dzapfudzidwa lini, ndipo palibe munthu omwe an’dzayapsokonyola m’manja mwangu. 29 Bzomwe Baba wangu wandipasa, mpsikulu kwene-kwene kuposa bzinthu bzentse, ndipo palibe omwe angabzipsokonyole m’manja mwa Baba. 30 Inepano na Baba timbabverana.”*

31 Na tenepo, Adjuda adalokota pomwe minyala kuti amubome. 32 Jezu adawauza kuti: “Ndakulatizani mabasa mazinji yabwino yakucokera kwa Baba. Tsono ni mabasa yaponi maka-maka yomwe mun’funa kundibomera nayo?” 33 Adjudawo adamutawaira kuti: “Ifepano tinkuboma lini thangwe ra mabasa yabwino, koma thangwe ra kunyoza Mulungu; pakuti napo ndiwe munthu, umbabziyesa kuti ndiwe mulungu.” 34 Jezu adawatawira kuti: “Kodi m’Malamulo yanu Mulungu alibe kulewa kuti: ‘Ine ndikuti: “Imwepo ndimwe mirungu”’? 35 Mulungu adati kwa wale omwe adatongedwa na fala lace: ‘Imwepo ndimwe mirungu’ ndipo bzinembo bzingacinjidwe lini. 36 Tsono inepano ndine munthu wakucenesedwa na Mulungu ndipo iye adandituma pa dziko la pantsi. Tenepo, thangwe ranyi mukulewa kuti: ‘Iwepo ukunyoza Mulungu.’ Kodi ni thangwe rakuti ndalewa kuti ‘ndine Mwana wa Mulungu?’ 37 Penu ndikucita lini mabasa ya Baba wangu, lekani kundikhulupira. 38 Tsono penu nimbayacita, napo muleke kundikhulupira, khulupirani mabasayo, kuti mudziwe na kukhulupira kuti Baba adabverana na inepano, ndipo inepano ndidabverana na Baba.” 39 Tenepo, iwo adayezera pomwe kumuphata, tsono iye adawathawa.

40 Ndipo iye adayambuka pomwe mkulo wa Jordano, ku mbuto yomwe Juwau akhabatizira wanthu pakuyamba, ndipo adakhala kumweko. 41 Wanthu azinji adabwera kwa iye aciyamba kulewa kuti: “Juwau alibe kucita cakudabwisa ciri-centse, tsono bzinthu bzentse bzomwe Juwau adalewa pakulewa bza munthuyu, bzikhali bzacadidi.” 42 Ndipo wanthu azinji kumweko adamukhulupira.

11 Munthu munango wakucemeredwa Lazaro akhaduwala. Iye akhali wa ku Betaniya, mzinda omwe Mariya na m’bale wace Marta akhakhala. 2 Mariya umweyu, ngule omwe adadzoza Mbuya mafuta yakununtcira , acipukuta minyendo ya Mbuyayo na tsisi lace ndipo Lazaro omwe akhaduwalayo akhali m’bale wace. 3 Tenepo, mpfumakazi za Lazaroyo zidatumiza mafala yakuti: “Mbuya, munthu omwe mumbamufuna ule akuduwala.” 4 Pomwe Jezu adabva bzimwebzi, iye adati: “Matendaya njakuti lini afe nayo, koma kuti Mulungu apasidwe ulemerero, nakuti Mwana wa Mulungu alemekezedwe.”

5 Jezu akhafuna kwene-kwene Marta, Mariya na Lazaro. 6 Tenepo, pomwe iye adabva kuti Lazaro akuduwala, iye adapitiriza kukhala komwe akhaliko kwa ntsiku ziwiri. 7 Patsogolo pace, iye adauza anyakupfunza wace kuti: “Mbatiyendeni pomwe ku Djudeya.” 8 Anyakupfunza wace adamuuza kuti: “Mpfunzisi,* tsapanopa wanthu wa ku Djudeya akhafuna kukubomani na minyala. Kodi mukufuna kubwerera pomwe kumweko basi?” 9 Jezu adatawira kuti: “Kodi masikati yalibe maora 12? Penu munthu an’famba masikati, palibe comwe cingamukhukhumudwise thangwe iye ambawona ceza ca m’dzikoli. 10 Tsono munthu ali-wentse akafamba usiku, ambakhukhumudwa, thangwe mwa iye mulibe ceza.”

11 Pomwe adamala kulewa bzimwebzi, iye adathumizira kuti: “Lazaro xamwali wathu wagona, tsono ndikuyenda kukam’musa ku tulo twaceto.” 12 Pamwepo anyakupfunza wacewo adamuuza kuti: “Mbuya, penu iye akugona an’khala bwino.” 13 Pamwepa Jezu akhalewa bza infa yace, tsono anyakupfunzawo akhakumbuka kuti akulewa bza kugona tulo caito. 14 Patsogolo pace, Jezu adawauza padeca kuti: “Lazaro wafa, 15 ndipo inepano ndikukomedwa namwe thangwe ndikhali lini kumweko, kuti imwepo mukhulupire. Tsono mbatiyendeni komwe kuna iyeko.” 16 Tenepo, Thomasi, omwe akhacemeredwambo Didimo,* adauza anyakupfunza winangowo kuti: “Mbatiyendenimbo kuti tikafe naye pabodzi.”

17 Pomwe Jezu adafika kumweko, adakagumana Lazaro ali kale m’thenje kwa ntsiku zinai. 18 Mzinda wa Betaniya, ukhali pafupi na Jeruzalemu, pafupi-fupi makilometro matatu. 19 Ndipo Adjuda azinji akhayenda kukatsangalaza Marta na Mariya, thangwe ra kufedwa m’bale wawoyo. 20 Pomwe Marta adabva kuti Jezu akubwera, iye adayenda kukagumana naye, tsono Mariya adapitiriza kukhala kumui. 21 Patsogolo pace Marta adauza Jezu kuti: “Mbuya, bzingadakhala kuti mukhali kuno, m’bale wangu angadafa lini. 22 Ndipo napo tsapano, ndikudziwa kuti ciri-centse comwe mungakumbire Mulungu, Mulunguyo an’dzakupasani.” 23 Jezu adati kwa iye: “M’bale wako an’dzamuka.” 24 Marta adamuuza kuti: “Ndikudziwa kuti iye an’dzamuka pa ntsiku yakumalizira.” 25 Jezu adauza Marta kuti: “Inepano ndine kumuka na moyo. Ali-wentse omwe an’ndikhulupira, napo acifa, an’dzakhala pomwe na moyo. 26 Ndipo ali-wentse omwe ana moyo, acindikhulupira ine, cipo acidzafa. Kodi ukukhulupira bzimwebzi?” 27 Iye adamutawira kuti: “Inde Mbuya. Inepano nimbakhulupira kuti imwepo ndimwe Kristu, Mwana wa Mulungu, omwe angadabwera pa dziko.” 28 Pomwe adamala kulewa bzimwebzi, iye adayenda kukacemera m’bale wace Mariya, acimuuza pambali kuti: “Mpfunzisi ali kuno ndipo iye akukucemera.” 29 Pomwe Mariya adabva bzimwebzi, adamuka mwakamfulumize aciyenda komwe kukhana Jezuko.

30 Pa nthawe imweyi, Jezu akhanati kufikiratu m’mudzimo, koma akhali ku mbuto komwe Marta akhadagumana naye. 31 Adjuda akhali m’nyumba acimbatsagalaza Mariya, tsono pomwe iwo adawona kuti iye wamuka mwakamfulumize acibula kunja, adamutewera, thangwe akhakumbuka kuti iye akuyenda ku thenje kuti akalirire kumweko. 32 Pomwe Mariya adawona Jezu, iye adafika pomwe pakhana iyepo ndipo adamugodamira, acimuuza kuti: “Mbuya, bzingadakhala kuti mukhali kuno, m’bale wangu angadafa lini.” 33 Pomwe Jezu adawona Mariya pabodzi na Adjuda omwe akhadabwera nayewo akulira, bzidamuwawa kwene-kwene ndipo adaneseka mu mtima. 34 Tenepo Jezu adabvunza kuti: “Kodi mwamuikha kuponi?” Iwo adamutawira kuti: “Mbuya, tiyendeni mukawone.” 35 Tenepo Jezu adalira. 36 Pamwepo Adjudawo adayamba kulewa kuti: “Onani momwe iye akhamufunira!” 37 Tsono winango akhalewa kuti: “Umweyu adafungula maso ya zimola ule. Tsono angadalekambo kucitisa kuti Lazaro aleke kufa.”

38 Jezu adaneseka pomwe mu mtima ndipo adayenda pa nthutupo. Kulewa cadidi, nthutuyo ikhali mphako ndipo ikhadafungidwa na cimwala. 39 Jezu adati: “Cosani cimwalaci.” Tsono Marta m’bale wace wa munthu omwe akhadasaikayo adati: “Mbuya, pinango iye akununkha, thangwe papita kale ntsiku zinai.” 40 Jezu adamuuza kuti: “Ndiribe kukuuza kuti ukakhulupira un’dzawona ulemerero bwa Mulungu?” 41 Tenepo, iwo adacosadi cimwalaco. Patsogolo pace, Jezu adanyang’anisa kudzulu acilewa kuti: “Baba, ndikukutendani thangwe mwandibva. 42 Cadidi, ndikudziwa kuti nthawe zentse mumbandibva, tsono ndikulewa bzimwebzi thangwe ra thimu la wanthu lomwe lidaima panoli, kuti likhulupire kuti imwepo ndimwe omwe mudandituma.” 43 Pomwe adamala kulewa bzimwebzi, iye adakuwa kwene-kwene aciti: “Lazaro bula!” 44 Munthu omwe akhadafayo adabula. Minyendo na manja yace bzikhadakulungiridwa na nguwo ndipo msolo wace ukhadampsinkhidwa na nguwo. Jezu adati: “Mutsudzuleni ndipo mulekeni ayende.”

45 Tenepo, Adjuda azinji omwe akhadayenda kukazungira Mariya na kuwona bzomwe Jezu adacita, adamukhulupira. 46 Tsono winango wa iwo, adayenda kwa Afarizeu, acikawauza bzomwe Jezu akhadacita. 47 Tenepo, atsogoleri wa antsembe pabodzi na Afarizeu adatsonkhana ku nyumba ikulu ya mphala ya Adjuda ndipo adati: “Kodi ticite ciyani? Munthuyu akucita bzakudabwisa bzizinji. 48 Tikamulekerera kuti apitirize kumbacita bzimwebzi, wanthu wentse an’dzamukhulupira ndipo Aroma an’dzabwera, acidzatitengera mbuto zathuzi pabodzi na mtundu wathu.” 49 Tsono m’bodzi wa iwo, Kaifasi, omwe akhali mkulu wa antsembe m’gole limwelire adawauza kuti: “Imwepo mun’dziwa lini cinthu ciri-centse. 50 Kodi mukuwona lini kuti bziri bwino kwa imwepo kuti munthu m’bodzi afere wanthu wentse, m’mbuto mwakuti mtundu wentse upfudzidwe?” 51 Bzomwe iye adalewabzi, bziribe kucokera mu msolo mwace. Pakuti iye akhali mkulu wa antsembe m’gole limwelire, iye adalewa polofesiya yakuti Jezu angadafera mtunduyo, 52 sikuti kundofera mtunduyo basi, koma kuti atsonkhanise pabodzi wana wa Mulungu omwe akhadabalalika. 53 Tenepo, kuyambira ntsiku imweyo, iwo adapangana kuti amuphe.

54 Ndipopa Jezu akhafamba lini padeca pakati pa Adjuda. Koma adacoka kumweko, aciyenda kufupi na ku dambo, ku mzinda wakucemeredwa Efraimu ndipo adakakhala kumweko pabodzi na anyakupfunza wace. 55 Ntsiku ya Paskwa ya Adjuda ikhadafendera, ndipo wanthu azinji wa m’midzi akhadayenda ku Jeruzalemu pomwe Paskwa ikhanati kuyamba, kuti akabzicenese mwakubverana na mwambo wawo. 56 Iwo akhanyang’ana Jezu ku templo ndipo akhambabvunzana kuti: “Mukuwona tani? Kodi iye an’bwera lini pa phwandoli?” 57 Tsono atsogoleri wa antsembe pabodzi na Afarizeu, akhadauza wanthu kuti munthu ali-wentse akadziwa komwe Jezu ali, awauze kuti iwo akamumange.

12 Pomwe zikhadasala ntsiku 6 kuti Paskwa icitike, Jezu adafika ku Betaniya komwe kukhana Lazaro, ule omwe iye adamulamusa kwa anyakufa. 2 Tenepo, iwo adamukonzera cakudya kuti alalire kumweko, ndipo Marta ndiye omwe akhawatumikira, tsono Lazaro akhali m’bodzi wa omwe akhadya naye pabodzi. 3 Ndipo Mariya adatenga mafuta yakununtcira. Mafutayo yakhali nardo caiye ndipo yakhali yakuumira kwene-kwene. Iye adatenga mafutayo acidzoza minyendo ya Jezu ndipo adapukuta minyendo ya Jezuyo na tsisi lace. 4 Tsono Djuda Sikaliyoti, m’bodzi wa anyakupfunza wace omwe angadadzamupereka adati: 5 “Thangwe ranyi mafuta yakununtciraya yalibe kugulisidwa na madinario 300 ndipo kobirizo ziciperekedwa kwa wanthu wakusauka?” 6 Iye adalewa bzimwebzi, sikuti thangwe akhana thupo na anyakusaukawo, koma thangwe rakuti akhali mbava. Iye akhambakoya kaxa ya kobiri ndipo akhambaba kobiri zomwe zikhambathusidwa m’kaxamo. 7 Tenepo Jezu adati: “Musiyeni acite bzimwebzi pakukonzekera ntsiku yomwe nin’dzaikhidwa m’thenje. 8 Thangwe anyakusauka mun’khala nawo nthawe zentse, tsono ine mun’dzakhala lini nande nthawe zentse.”

9 Tsono thimu likulu la Adjuda lidadziwa kuti Jezu akhali kumweko, tenepo lidayenda kumweko, sikuti thangwe ra Jezu yekhayo ne, koma kuti akawonembo Lazaro omwe Jezuyo akhadamulamusa kwa anyakufa. 10 Atsogoleri wa antsembe adapangana kuti aphembo Lazaroyo, 11 thangwe rakuti Adjuda azinji akhayenda kumweko ndipo akhakhulupira Jezu thangwe ra Lazaroyo.

12 Mangwana yace, thimu likulu la wanthu lomwe lidayenda ku phwandolo lidabva kuti Jezu akubwera ku Jeruzalemu. 13 Tenepo iwo adatcola nthambi za miti ya kanjedza ndipo adabula aciyenda kukagumana naye. Ndipo iwo adayamba kumbakuwa kuti: “Mupulumuseni taphata minyendo! Wakusimbidwa ngule omwe ambabwera mu dzina la Yahova, Mambo* wa Jirayeri!” 14 Pomwe Jezu adagumana Bulu mng’ono, iye adapakira buluyo ninga momwe bzinembo bzimbalewera kuti: 15 “Leka kugopa mwana wacikazi wa Ziyoni. Ona! Mambo wako akubwera, ndipo iye akubwera adapakira mwana wa bulu wacimuna.” 16 Pakuyamba anyakupfunza wacewo akhalibe kuzindikira bzimwebzi, tsono pomwe Jezu adapasidwa ulemerero, iwo adakumbukira kuti bzimwebzi bzikhadanembedwa pakulewa bza iye ndipo adakumbukirambo kuti iwo akhadamucitirambo bzimwebzi.

17 Wanthu omwe akhali pabodzi na Jezu pomwe adacemera Lazaro kuti abule mu nthutu acimulamusa kwa anyakufa, adapitiriza kumucitira umboni. 18 Ni thangwe limweri lomwe lidacitisa thimu la wanthulo kuyenda kukagumana naye, pakuti lidabva kuti iye akhadacita cakudabwisa cimweci. 19 Tenepo, Afarizeu adayamba kumbauzana okha-okha kuti: “Onani, palibe comwe tikukwanisa kucita. Wanthu wentse akumutewera.”

20 Ku phwandoko, akhalipombo Agerego winango omwe akhadayenda kuti akanamate. 21 Tenepo iwo adafenderera Filipi, omwe akhali wa ku Betsaida wa ku Galileya, acimuuza kuti: “Tin’funa kuwonana na Jezu.” 22 Filipi adayenda kukauza Andereya, ndipo Andereya na Filipi adayenda kukauza Jezu.

23 Tsono Jezu adawauza kuti: “Yafika nthawe yakuti Mwana wa munthu alemekezedwe. 24 Cadidi ndikukuuzani kuti: Mbeu ya tirigu ikasaya kugwa pantsi icifa, imbapitiriza kukhala ibodzi; tsono ikafa, imbadzabala bzisapo bzizinji. 25 Ali-wentse wakufuna moyo wace, akuupfudza, tsono wakuwengana na moyo wace m’dziko lino, akuukoyera moyo wakusaya kumala. 26 Penu munthu an’funa kunditumikira, anditewere ndipo komwe ine nin’dzakhala, mtumiki wanguyo an’dzakhalambo kumweko. Ali-wentse wakutumikira inepano, Baba an’dzamulemekeza. 27 Moyo wangu ukutsautsika tsapano, kodi ningalewe pomwe ciyani? Baba, ndipulumuseni ku nthawe yakunesayi. Tsono nthawe imweyi in’funika kundifikira, pakuti ndibzo bzomwe ndidabwerera. 28 Baba lemekezani dzina lanu.” Pamwepo padabveka fala kucokera kudzulu liciti: “Ndalilemekeza kale ndipo nin’dzalilemekeza pomwe.”

29 Tenepo, thimu la wanthu lomwe likhadaima pamwepolo lidabva bzimwebzi ndipo lidayamba kulewa kuti: “Kudzulu kwagunda.” Tsono winango akhati: “Anjo walewalewa naye.” 30 Pakutawira Jezu adati: “Mafalaya yabveka sikuti thangwe ra inepano ne, koma ni thangwe ra imwepo. 31 Tsapano dzikoli likutongedwa; ndipo tsapanopapa mtongi wa dzikoli an’thothedwa. 32 Tsono inepano ndikadzakwizidwa kudzulu kucokera pa dziko la pantsi, nin’dzabweresa kwa ine wanthu wa mitundu yakusiyana-siyana.” 33 Iye adalewa bzimwebzi kuti awadziwise momwe iye angadadzafera. 34 Tenepo, thimu la wanthulo lidamutawira kuti: “Ifepano tidabva m’Malamulo kuti Kristu an’dzakhala mpaka kale-kale. Tsono imwepo mukulewa tani kuti Mwana wa munthu an’dzakwizidwa m’dzulu? Kodi Mwana wa munthuyo ni mbani?” 35 Tenepo, Jezu adati kwa iwo: “Ceza cin’pitiriza kukhala pakati panu mu kanthawe kakucepa. Fambani pomwe cezaco mukanaco, kuti mdima uleke kukumpsinkhani, pakuti omwe ambafamba mu mdima ambadziwa lini komwe akuyenda. 36 Pomwe ceza mukanaco, khulupirani cezaco kuti mukhale wana wa ceza.”

Pomwe Jezu adamala kulewa bzimwebzi, iye adacoka, aciwabisalikira. 37 Napo kuti iye adacita bzakudabwisa bzizinji pamaso pawo, iwo akhamukhulupira lini, 38 kuti yakwanisike mafala ya mpolofeta Zaiya yakuti: “Yahova, kodi mbani omwe wakhulupira bzomwe ife talewa? Ndipo mphanvu za Yahova zalatizidwa* kwa yani?” 39 Bzomwe bzidawacitisa kuti iwo aleke kukhulupira, ni bzomwe Zaiya adalewa pomwe kuti: 40 “Iye adawakhalisa azimola na kuumisa mitima yawo, kuti aleke kuwona na maso yawo nakuti alekembo kubvesesa na mitima yawo, acibwerera kuti ine ndiwapoze.” 41 Zaiya adalewa bzinthu bzimwebzi pakulewa bza Kristu, thangwe iye adawona ulemerero bwace. 42 Napo bzikhali tenepo, atsogoleri azinji wa Adjuda akhamukhulupira, koma iwo akhabzilewa lini padeca thangwe akhabva mantha na Afarizeu, pakuti angadawathotha mu nyumba yakunamatira, 43 thangwe iwo akhafuna kwene-kwene ulemerero bwa wanthu kuposa bwa Mulungu.

44 Tenepo, Jezu adakuwa aciti: “Omwe an’ndikhulupira, akukhulupira lini inepano ndekha, koma akukhulupirambo ule omwe adandituma, 45 ndipo ali-wentse omwe aniwona inepano, wawonambo Ule omwe adandituma. 46 Ndabwera ninga ceza ca dziko, kuti ali-wentse omwe an’ndikhulupira, aleke kupitiriza kukhala mu mdima. 47 Tsono ali-wentse omwe anibva mafala yangu acisaya kuyateweza, inepano nin’mutonga lini, pakuti ndiribe kubwera kudzatonga dziko, koma kudzalipulumusa. 48 Ali-wentse omwe an’ndinyoza na kusaya kubvera mafala yangu, alipo omwe an’dzamutonga. Fala lomwe ndalewa ndiro lomwe lin’dzamutonga pa ntsiku yakumalizira. 49 Pakuti bzomwe nimbalewa bzimbacokera lini mu msolo mwangu, koma Baba omwe adandituma ndiye omwe ambandipasa malamulo ya bzomwe nimbalewa na kupfunzisa. 50 Ndipo nin’dziwa kuti malamulo yace yambathandauza moyo wakusaya kumala. Tenepo, ciri-centse comwe nin’lewalewa, nimbalewa ninga momwe Baba adandiuzira.”

13 Pomwe phwando la Paskwa likhanati kuyamba, Jezu akhadziwiratu kuti ikhadafika nthawe yakuti acoke pa dziko la pantsi aciyenda kwa Baba wace. Pakuti iye akhafuna ateweri wace wa pa dziko la pantsi, iye adapitiriza kuwafuna mpaka kuphampha kwa moyo wace. 2 Pomwe akhalalira, Dyabu akhadaikha kale mu mtima mwa Djuda Sikaliyoti, mwana wa Simau, makumbukidwe yakupereka Jezu. 3 Tenepo, Jezu pakudziwa kuti Baba akhadaikha bzinthu bzentse m’manja mwace, nakuti akhadacokera kwa Mulungu ndipo angadabwerera kwa Mulunguyo, 4 iye adalamuka pa mezapo acicosa cakubvala cace cakunja ndipo adatenga tuwadya, aciimangirira m’nciuno mwace. 5 Patsogolo pace, iye adaikha madzi m’basiya, ndipo adayamba kutsuka minyendo ya anyakupfunza wace, acimbaipukuta na tuwadya yomwe akhadaimangirira m’nciunoyo. 6 Tenepo, iye adafika pomwe pakhana Simau Pedru. Tsono Pedruyo adamubvunza kuti: “Mbuya, imwepo mukufuna kutsuka minyendo yanguyi?” 7 Jezu adamutawira kuti: “Bzomwe ndikucitabzi, iwepo un’bzibvesesa lini tsapanopa koma un’dzabzibvesesa kutsogolo.” 8 Pedru adati: “Kulewa cadidi, imwepo cipo mucitsuka minyendo yanguyi.” Jezu adamuuza kuti: “Ndikasaya kutsuka minyendo yako, iwepo uli lini ku mbali yangu.” 9 Simau Pedru adati kwa iye: “Mbuya lekani kundotsuka minyendo yangu yokha, koma tsukanimbo manja yangu pabodzi na msolo wangu.” 10 Jezu adamuuza kuti: “Ali-wentse omwe wasamba m’thupi, ambandofunika kusamba m’minyendo basi thangwe thupi lentse lidacena kale, ndipo imwepo ndimwe wakucena, koma sikuti mwentsenemwe.” 11 Pakuti iye akhadziwa munthu omwe angadadzamupereka ndipopa iye adalewa kuti: “Sikuti mwentsenemwe ndimwe wakucena.”

12 Pomwe adamala kutsuka minyendo yawo, iye adabvala cakubvala cace cakunja acikhala pomwe pa mezapo ndipo adawabvunza kuti: “Kodi mukudziwa thangwe ranyi ndatsuka minyendo yanuyi? 13 Imwepo mumbandicemera ‘Mpfunzisi’ na ‘Mbuya,’ ndipo mumbalewa cadidi, pakuti ndinedi. 14 Tenepo, penu ine Mbuya na Mpfunzisi ndatsuka minyendo yanu, imwepo mun’funikambo kumbatsukana minyendo. 15 Pakuti ine ndakupasani ciratizo kuti mucitembo ndendende ninga momwe ine ndacitiramu. 16 Cadidi ndikukuuzani kuti, nyabasa ni mkulu lini kuposa mbuya wace, ndipo nyakutumidwa ni mkulu lini kuposa nyakumutumayo. 17 Penu imwepo mukudziwa bzimwebzi, ndimwe wakukondwa mukambabzicita. 18 Inepano ndikulewa lini bzimwebzi kwa mwentsenemwe, pakuti ndikudziwa omwe ndawasankhula. Tsono ndalewa bzimwebzi kuti bzinembo bzikwanisike, pakuti bzimbati: ‘Ule omwe akhadya pau yangu adandiphindukira.’* 19 Ndikukuuzani bzimwebzi pomwe bzikanati kucitika, kuti bzikadzacitika imwepo mudzakumbukire kuti cinembo cikhalewa bza inepano. 20 Cadidi ndikukuuzani kuti ali-wentse omwe an’tambira ule omwe inepano ndamutuma, watambirambo inepano ndipo ali-wentse omwe an’tambira inepano, watambirambo Ule omwe adandituma.”

21 Pomwe adamala kulewa bzimwebzi, Jezu adaneseka kwene-kwene mu mtima ndipo adalewa padeca kuti: “Cadidi ndikukuuzani kuti m’bodzi wa imwepo an’dzandipereka.” 22 Anyakupfunzawo adayamba kunyang’anisana ndipo akhadziwa lini kuti ni mbani wa iwo omwe akhalewedwa. 23 M’bodzi wa anyakupfunza omwe Jezu akhamufuna kwene-kwene akhadakhala pafupi* na Jezuyo. 24 Tenepo, Simau Pedru adanyang’anisisa nyakupfunzayo ndipo adati: “Tiuze, kodi umweyu akulewa bza yani?” 25 Tenepo nyakupfunzayo adatsamira pa cifuwa pa Jezu, acimubvunza kuti: “Mbuya, kodi ni mbani?” 26 Jezu adatawira kuti: “Omwe nimusaizira pau yakunyedza ndicim’pasa, ngumweyoletu.” Pomwe adamala kusaiza pauyo adapasa Djuda, mwana wa Simau Sikaliyoti. 27 Pomwe Djuda adatambira pauyo, Sathani adapita mwa iye. Tenepo, Jezu adamuuza kuti: “Bzomwe ukucita, bzicite mwakamfulumize.” 28 Tsono omwe akhadya naye pamezawo alibe kudziwa thangwe ranyi Jezu adalewa mafala yamweya kwa iye. 29 Pakuti Djuda ndiye omwe akhakoya kaxa ya kobiri, winangowo akhakumbuka kuti Jezu akumuuza kuti: “Kagule bzakufunikira pa phwando,” ayai kuti akapase bzinthu anyakusauka. 30 Pomwe Djuda adatambira pauyo, adacokeratu pa nthawe imweyo ndipo bukhali usiku.

31 Pomwe Djuda adabula, Jezu adati: “Tsapano Mwana wa munthu an’lemekezedwa, ndipo Mulungu an’lemekezedwambo thangwe ra Mwanayo. 32 Mulungu caiyeyo an’dzamupasa ulemerero ndipo an’dzacita bzimwebzo mwakamfulumize. 33 Wana wangu wakufunidwa, nin’khala namwe mu kanthawe kakucepa ndipo imwepo mun’dzandinyang’ana tsono ninga momwe ndidauzira Adjuda, tsapano ndikuuzambo imwepo kuti komwe inepano ndikuyenda, imwepo mungakufike lini. 34 Ndikukupasani lamulo lipsa lakuti mumbafunane ninga momwe inepano nimbakufunirani, imwepombo mbafunanani. 35 Na bzimwebzi, wentse an’dzadziwa kuti ndimwe anyakupfunza wangu mukambafunana.”

36 Simau Pedru adamubvunza kuti: “Mbuya, kodi mukuyenda kuponi?” Jezu adamutawira kuti: “Komwe inepano ndikuyenda, iwepo unganditewere lini tsapanopapa, koma un’dzanditewera kutsogoloku.” 37 Pedru adamubvunza pomwe kuti: “Mbuya, thangwe ranyi ningakutewereni lini tsapanopapa komwe mukuyendako? Ndine wakukonzeka kupereka moyo wangu thangwe ra imwepo.” 38 Jezu adamutawira kuti: “Ndiwe wakukonzeka kupereka moyo wako thangwe ra ine? Cadidi ndikukuuza kuti congwe akanati kulira, iwepo un’ndilamba katatu.”

14 “Lekani kuneseka mu mtima mwanu, khulupirani Mulungu ndipo khulupiranimbo inepano. 2 M’nyumba mwa Baba wangu, muna mbuto zizinji, bzingadakhala kuti bziri lini tenepo, ningadakuuzani, pakuti ndikuyenda kukakukonzerani mbuto. 3 Ndipo ndikayenda kukakukonzerani mbutoyo, nin’dzabwera pomwe kudzakutengani kuti mukakhalembo komwe ine nin’kakhala. 4 Ndipo imwepo mumbaidziwa njira ya komwe inepano ndikuyenda.”

5 Thomasi adamuuza kuti: “Mbuya, ifepano tikudziwa lini komwe mukuyenda. Tsono tingaidziwe tani njirayo?”

6 Jezu adamutawira kuti: “Inepano ndine njira, cadidi na moyo. Palibe munthu omwe angayende kwa Baba, acisaya kupita na kuna ine. 7 Imwepo mungadandidziwa, mungadamudziwambo Baba wangu. Kuyambira tsapano mwamudziwa ndipo mwamuwona.”

8 Filipi adamuuza kuti: “Mbuya tiwoneseni Baba, ndipo bzimwebzi mpsakukwanira kwa ifepano.”

9 Jezu adamuuza kuti: “Inepano ndakhala namwe nthawe itali kwene-kwene, Filipi, ukanati kundidziwa basi? Ule omwe wawona inepano, wawonambo Baba. Thangwe ranyi ukulewa kuti, ‘Tiwoneseni Babayo?’ 10 Kodi iwepo ukukhulupira lini kuti inepano nimbabverana na Baba, ndipo Baba ambabverana na inepano? Bzomwe inepano nimbakuuzani, bzimbacokera lini mu msolo mwangu, koma Baba omwe akupitiriza kukhala wakubverana na inepano, ndiye akucita mabasa yace. 11 Khulupirani kuti inepano nimbabverana na Baba, ndipo Baba ambabverana na inepano; ayai, khulupirani mabasa yomwe nimbayacita. 12 Cadidi ndikukuuzani kuti, ali-wentse omwe an’ndikhulupira, an’dzacitambo mabasa yomwe ndikuyacitaya, ndipo iye an’dzacita mabasa makulu kuposa yamweya, thangwe inepano ndikuyenda kuna Baba wangu. 13 Ndipo ciri-centse comwe mun’dzakumbira m’dzina langu, nin’dzacita cimweco, kuti Baba alemekezedwe thangwe ra Mwana. 14 Mukakumbira cinthu ciri-centse mu dzina langu, nin’dzacicita.

15 “Penu mumbandifuna, mun’dzabvera malamulo yangu. 16 Ndipo nin’dzakumbira Baba kuti adzakupaseni mthandizi* munango, ndipo iye an’dzakhala namwe mpaka kale-kale. 17 Mthandizi umweyo, ni mzimu wacadidi omwe dziko lingautambire lini, thangwe limbauwona lini ne kuudziwa. Imwepo mumbaudziwa, thangwe uli mwa imwe ndipo mun’pitiriza kukhala naye. 18 Nin’dzakusiyani lini pa ukungwa. Inepano nin’dzabwera kwa imwepo. 19 Kasala kanthawe kakucepa, ndipo dziko lin’dzandiwona lini pomwe, tsono imwepo mun’dzandiwona, thangwe ndina moyo ndipo imwepo mun’dzakhalambo na moyo. 20 Pa ntsiku imweyo, imwepo mun’dzadziwa kuti inepano ndine wakubverana na Baba ndipo imwepo ndimwe wakubverana na inepano ndipo inepano ndine wakubverana na imwepo. 21 Ali-wentse omwe an’bvuma malamulo yangu, aciyateweza, umweyo ambandifuna. Ndipo omwe ambandifuna, an’dzafunidwambo na Baba wangu, ndipo inepano nin’dzamufuna ndicibzilatizambo kwa iye padeca.”

22 Djuda (sikuti Djuda Sikaliyoti) adamubvunza kuti: “Mbuya, n’ciyani cacitika kuti mubziwonesere padeca kwa ife sikuti ku dzikoli?”

23 Pakutawira Jezu adamuuza kuti: “Penu munthu ambandifuna, an’dzabvera mafala yangu ndipo Baba wangu an’dzamufunambo. Ndipo ine na Baba wanguyo tin’dzayenda kuna iye, ticikhala naye. 24 Tsono omwe ambandifuna lini, ambabvera lini mafala yangu. Ndipo mafala yomwe mukubvaya, njangu lini koma nja Baba omwe adandituma.

25 “Ndikukuuzani bzinthu bzimwebzi, thangwe ndikanamwe pabodzi. 26 Tsono mthandizi omwe ni mzimu wakucena, omwe Baba wangu an’dzatumiza m’dzina langu, un’dzakupfunzisani bzinthu bzentse na kukukumbusani bzinthu bzentse bzomwe ndidakuuzani. 27 Nin’kusiyirani mtendere; nin’kupasani mtendere wangu. Ndiniupereka lini ninga momwe dzikoli limbacitira. Lekani kuneseka m’mitima mwanu, ne kubva mantha. 28 Imwepo mudabva pomwe ndidakuuzani kuti: ‘Inepano ndikuyenda ndipo nin’dzabwerera pomwe kwa imwepo.’ Penu imwepo mumbandifuna, mun’dzakomedwa kwene-kwene, thangwe ndikuyenda kwa Baba, pakuti Baba ni mkulu kuposa ine. 29 Tenepo, inepano ndakuuzani bzimwebzi pomwe bzikanati kucitika, kuti bzikadzacitika imwepo mudzakhulupire. 30 Inepano nin’kuuzani lini pomwe bzinthu bzizinji, thangwe mtongi wa dzikoli akubwera ndipo iye alibe mphanvu pa ine. 31 Tsono kuti dziko lidziwe kuti nimbafuna Baba, nimbacita bzomwe Baba adandiuza kuti ndicite. Lamukani, mbaticokeni pano.

15 “Inepano ndine muti wa uva caiye, ndipo Baba wangu ni mulimi. 2 Mthambi iri-yentse yomwe imbabala lini bzisapo mwa ine, iye ambaigwata, ndipo iri-yentse yomwe imbabala bzisapo, iye ambaitunthula kuti ibale bzisapo bzizinji. 3 Imwepo mudacena kale thangwe ra mafala yomwe ndidakuuzani yale. 4 Pitirizani kubverana nande, ndipo inepano nin’dzapitirizambo kubverana namwe. Ninga momwe mthambi imbabala lini bzisapo ikakhala payokha mwakusaya kuphatana na muti wa uva, mpsibodzi-bodzimbo na imwepo, mungabale lini bzisapo mukasaya kupitiriza kubverana na inepano. 5 Inepano ndine muti wa uva ndipo imwepo ndimwe mithambi. Ali-wentse omwe an’pitiriza kukhala wakuphatana na inepano, inepanombo nin’dzaphatana naye ndipo munthu umweyo ambabala bzisapo bzizinji, thangwe mukasaya inepano, imwepo mungacite lini cinthu. 6 Ndipo ali-wentse omwe an’pitiriza lini kukhala wakuphatana na inepano, iye an’dzakhala ninga mthambi yomwe yathusidwa kunja, iciuma. Ndipo wanthu ambazigwezeka mthambizo, acizithusa pa moto ndipo zimbapsa. 7 Imwepo mukapitiriza kubverana na inepano, mucimbateweza bzomwe inepano nimbalewa, mungakumbire ciri-centse comwe mungafune ndipo cin’dzacitikadi kwa imwepo. 8 Baba wangu ambalemekezedwa, mukapitiriza kubala bzisapo bzizinji na kulatiza kuti ndimwe anyakupfunza wangu. 9 Ninga momwe Baba ambandifunira, inepanombo nimbakufunani. Pitirizani kufunidwa na inepano. 10 Mukambabvera malamulo yangu, imwepo mun’dzapitiriza kufunidwa na inepano ninga momwe ine nimbabvera malamulo ya Baba, ndipo nimbapitiriza kufunidwa na iye.

11 “Ndakuuzani bzinthu bzimwebzi kuti mukhale na cikondweso cangu, ndipo cikondweso canu, cithumizirike kwene-kwene. 12 Lamulo langu ndiri, mumbafunane ninga momwe inepano ndidakufunirani. 13 Palibe omwe ana lufoyi likulu, kuposa munthu omwe ambapereka moyo wace thangwe ra axamwali wace. 14 Imwepo mun’dzapitiriza kukhala axamwali wangu mukapitiriza kucita bzomwe nimbakuuzani. 15 Nin’kucemerani lini pomwe akapolo, thangwe kapolo ambadziwa lini bzomwe mbuya wace akucita. Tsono nin’kucemerani axamwali, thangwe ndakudziwisani bzinthu bzentse bzomwe ndidabva kwa Baba wangu. 16 Imwepo mulibe kundisankhula, koma inepano ndine omwe ndidakusankhulani. Ndidakuikhani kuti mupitirize kubala bzisapo bzizinji, ndipo bzisapobzo bzileke kumala, kuti ciri-centse comwe mukumbire kwa Baba m’dzina langu, akupaseni.

17 “Inepano ndikukuuzani bzinthu bzimwebzi kuti mumbafunane. 18 Penu dziko limbakuwengani, dziwani kuti lidayamba kuwenga inepano likanati kuwenga imwepo. 19 Bzingadakhala kuti mumbacita mbali ya dziko, dzikoli lingadakufunani. Tsapano pakuti mumbacita lini mbali ya dziko ndipo ndidakusankhulani m’dzikoli, ndipopa dzikoli limbakuwengani. 20 Kumbukirani mafala yomwe ndidakuuzani yakuti: Kapolo, ni mkulu lini kuposa mbuya wace. Penu adazunza inepano, iwo an’dzazunzambo imwepo; penu adabvera mafala yangu iwo an’dzabverambo mafala yanu. 21 Tsono iwo an’dzacita bzinthu bzentsenebzi thangwe ra dzina langu, thangwe iwo ambadziwa lini Ule omwe adandituma. 22 Bzingadakhala kuti ndiribe kubwera kudzawauza, iwo angadakhala alibe pikado, tsono tsapano iwo alibe mathangwe yakulambira pikado yawoyo. 23 Ali-wentse omwe ambandiwenga, ambawengambo Baba wangu. 24 Bzingadakhala kuti iwo alibe kuwona mabasa yomwe ndidayacita pakati pawo yomwe palibe munthu omwe adayacita kale, iwo angadakhala alibe pikado; tsono iwo adandiwona, ndipo adawenga inepano pabodzi na Baba wangu. 25 Tsono bzimwebzi bzidacitika kuti yakwanisike mafala yomwe yadanembedwa m’Malamulo yawo yakuti: ‘Iwo adandiwenga mwakusaya mathangwe.’ 26 Akadzabwera mthandizi, omwe ni mzimu wakucena wacadidi, omwe nin’dzautumiza kwa imwe kucokera kwa Baba, un’dzandicitira umboni; 27 ndipo imwepo mun’dzaperekambo umboni, thangwe mudakhala nande kuyambira paciyambi.

16 “Ndakuuzani bzinthu bzimwebzi kuti muleke kundisiya. 2 Wanthu an’dzakuthothani mu nyumba zakunamatira.* Kulewa cadidi, in’dzafika nthawe yomwe ali-wentse omwe an’dzakuphani, an’dzakumbuka kuti akucita basa lakupambulika la Mulungu. 3 Tsono iwo an’dzacita bzimwebzi, thangwe ambadziwa lini Baba ne inepano. 4 Tenepo, inepano ndidakuuzani bzinthu bzimwebzi kuti ikadzafika nthawe yakuti bzidzacitike, imwepo mudzakumbukire kuti ndikhadakuuzani kale bzinthu bzimwebzi.

“Ndiribe kukuuzani bzinthu bzimwebzi pakuyamba, thangwe ndikhanamwe pabodzi. 5 Tsono tsapano ndikuyenda kwa Ule omwe adandituma; koma palibe omwe akundibvunza kuti: ‘Kodi mukuyenda kuponi?’ 6 Tsono imwepo mwasunama m’mitima mwanu thangwe ndakuuzani bzinthu bzimwebzi. 7 Kulewa cadidi, ndikuyenda kuti imwepo mugumane phindu, pakuti ndikasaya kuyenda, mthandizi an’dzabwera lini kwa imwepo, tsono ndikayenda, nin’dzakutumizirani mthandiziyo. 8 Ndipo mthandiziyo akadzabwera, an’dzalatiza padeca pikado za dziko, cirungamo na kutonga kwa Mulungu: 9 cakuyamba iye an’dzalatiza padeca pikado za dziko, thangwe dzikoli liribe kundikhulupira; 10 patsogolo pace iye an’dzalatiza dzikolo kuti nimbacita cirungamo, thangwe ndikuyenda kwa Baba, ndipo mun’dzandiwona lini pomwe; 11 ndipo an’dzakulatizani padeca cirango ca Mulungu, thangwe mtongi wa dzikoli watongedwa kale.

12 “Ndikana bzinthu bzizinji kuti ndikuuzeni, tsono pakali pano, mun’kwanisa lini kubzibvesesa. 13 Na tenepo, akadzafika mthandizi omwe ni mzimu wa cadidi, iye an’dzakutsogolerani ku cadidi centse, pakuti an’dzalewalewa lini bza mu msolo mwace, koma an’dzalewalewa bzomwe iye adabva na kukuuzani bzinthu bzomwe bzikubwera. 14 Iye an’dzandilemekeza, thangwe an’dzakufotokozerani bzomwe adabva kwa ine. 15 Bzinthu bzentse bza Baba mpsangu. Ndipopa ndakuuzani kuti iye an’dzakufotokozerani bzomwe adabva kwa ine. 16 Mu kanthawe kakucepa, imwepo mun’dzandiwona lini pomwe, ndipo mu kanthawe kakucepa, imwepo mun’dzandiwona.”

17 Na bzimwebzi, anyakupfunza wace winango adayamba kumbabvunzana kuti: “Kodi umweyu an’funa kulewa ciyani akati, ‘Mu kanthawe kakucepa, imwepo mun’dzandiwona lini pomwe, ndipo mu kanthawe kakucepa, imwepo mun’dzandiwona,’ ndipo ‘ndikuyenda kuna Baba’?” 18 Tenepo iwo adayamba kumbalewa kuti: “Kodi umweyu an’funa kulewa ciyani akati, ‘mu kanthawe kakucepa’? Ifepano tikudziwa lini bzomwe iye akulewa.” 19 Jezu adadziwa kuti iwo akhafuna kumubvunza, tenepo iye adawauza kuti: “Kodi imwepo mukubvunzana bzimwebzi thangwe ndalewa kuti: ‘Mu kanthawe kakucepa, imwepo mun’dzandiwona lini pomwe, ndipo mu kanthawe kakucepa, imwepo mun’dzandiwona’? 20 Cadidi ndikukuuzani kuti, imwepo mun’dzalira ndipo mun’dzadandaula, tsono dziko lin’dzakondwa; imwepo mun’dzasunama, tsono msunamo wanuyo un’dzasandusidwa cikondweso. 21 Mkazi akakhala akubala, ambasunama thangwe yafika nthawe yace, tsono akabala mwanayo, iye ambakumbukira lini bza kubonerako, thangwe ambakomedwa kuti munthu wabadwa pa dziko. 22 Mpsibodzi-bodzimbo na imwepo, tsapano mudasunama; koma tin’dzawonana pomwe, ndipo mitima yanu in’dzakondwa ndipo palibe omwe an’dzakucoserani cikondwesoco. 23 Pa ntsiku imweyo, palibe omwe an’dzacita pomwe mibvunzo. Cadidi ndikukuuzani kuti, mukakumbira cinthu ciri-centse kuna Baba, iye an’dzakupasani m’dzina langu. 24 Mpaka pano, imwepo mukanati kukumbira cinthu ciri-centse m’dzina langu. Kumbirani ndipo mun’dzapasidwa, kuti cikondweso canu cikhale cakukwanira.

25 “Ndakuuzani bzinthu bzimwebzi mwakuphatisa basa bziratizo. Tsono ikufika nthawe yomwe nin’dzaphatisa lini pomwe basa bziratizo, koma nin’dzakuuzani padeca bza Baba. 26 Ntsiku zimwezo, imwepo mun’dzakumbira Baba m’dzina langu; koma bzin’funa lini kulewa kuti inepano ndine omwe nin’dzakukumbirirani.27 Pakuti Baba ambakufunani, thangwe imwepo mumbandifuna ndipo mudakhulupira kuti ndidabwera ninga muimikiri wa Mulungu. 28 Inepano ndidabwera pa dziko ninga muimikiri wa Baba. Tsapano, ndikucoka pa dziko la pantsi pano ndipo ndikuyenda kuna Baba.”

29 Anyakupfunza wacewo adati: “Yaa! Tsapano mukulewalewa mwakusaya kunesa kubvesesa ndipo mukuphatisa lini pomwe basa bziratizo. 30 Tsapano tadziwa kuti imwepo mumbadziwa bzinthu bzentse ndipo mpsakufunikira lini kuti munthu akubvunzeni. Na thangwe limweri tikukhulupira kuti mudacokeradi kwa Mulungu.” 31 Jezu adati: “Kodi mukukhulupira tsapano? 32 Onani! Nthawe ikubwera, ndipo yafika kale, pomwe mwentsenemwe mun’dzabalalika muciyenda m’mii mwanu, ndipo mun’dzandisiya ndekha. Tsono nin’dzakhala lini ndekha, thangwe Baba anande. 33 Ndakuuzani bzinthu bzimwebzi kuti mukhale na mtendere thangwe ra inepano. M’dzikomu mun’dzagumana na matsautso mazinji, tsono khwimikani! Ine ndalikunda dziko.”

17 Pomwe Jezu adamala kulewa bzimwebzi, iye adanyang’anisa kudzulu acilewa kuti: “Baba, nthawe yafika, lemekezani mwana wanu kuti iye akulemekezenimbo, 2 ninga momwe mudam’pasira mphanvu yakutonga wanthu wentse, kuti iye apereke moyo wakusaya kumala kwa wentse omwe mudamupasa. 3 Kuti wanthu adzakhale na moyo wakusaya kumala, an’funika kudziwa imwepo Mulungu m’bodzi yekha wacadidi, na Jezu Kristu, ule omwe imwepo mudamutuma. 4 Inepano ndakulemekezani pa dziko la pantsi, ndipo ndamaliza basa lomwe mudandipasa kuti ndicite. 5 Tsapano Baba, ndipaseni ulemerero bomwe ndikhanabo kumbali kwanu pomwe dziko likhanati kulengedwa.

6 “Ndadziwisa dzina lanu kwa wanthu omwe mudandipasa pa dziko. Iwo akhali wanu ndipo imwepo mudawapereka kwa ine, ndipo iwo ambabvera mafala yanu. 7 Tsapano, iwo akudziwa kuti bzinthu bzentse bzomwe mudandipasa bzidacokera kwa imwepo; 8 thangwe inepano ndidawauza mafala yomwe mudandiuza, iwo adayabvuma ndipo adadziwa kuti inepano ndidabwera ninga muimikiri wanu, ndipo iwo adakhulupira kuti ndimwe omwe mudandituma. 9 Tenepo inepano ndikuwakumbirira, ndikukumbirira lini dzikoli, koma wale omwe imwe mudandipasa thangwe iwo ni wanu; 10 ndipo bzinthu bzangu bzentse mpsanu, ndipo bzinthu bzanu mpsangu. Tenepo, ndalemekezeka pamaso pawo.

11 “Inepano ndikucoka m’dzikoli ndipo ndikubwera kwa imwe, tsono iwo akali m’dzikoli. Baba wakucena, anyang’anireni thangwe ra dzina lanu lomwe mudandipasa, kuti iwo akhale wakubverana ninga momwe ifepano tiriri wakubverana. 12 Pomwe ndikhanawo pabodzi, inepano ndikhawanyang’anira thangwe ra dzina lanu lomwe mudandipasa; inepano ndawakhotcerera ndipo palibe ne na m’bodzi wa iwo omwe wataika, kupambula mwana omwe an’dzapfudzidwa, kuti bzikwanisike bzomwe bzidanembedwa. 13 Koma tsapano inepano ndikubwera kwa imwe ndipo ndikulewa bzimwebzi pa dziko, kuti iwo adzale na cikondweso cangu. 14 Inepano ndawapasa fala lanu, tsono dziko limbawawenga, thangwe iwo ambacita lini mbali ya dziko, ninga momwe inepano nimbacitambo lini mbali ya dziko.

15 “Inepano ndikukumbira lini kuti muwacose m’dzikoli, koma muwanyang’anire thangwe ra nyakuipayo. 16 Iwo ambacita lini mbali ya dziko ninga momwe ine nimbacitambo lini mbali ya dziko. 17 Aceneseni na cadidi; fala lanu ni cadidi. 18 Ninga momwe imwepo mudanditumira pa dziko, inembo ndawatuma pa dzikoli. 19 Ndipo inepano ndabzicenesa thangwe ra iwo, kuti iwombo abzicenese na cadidi.

20 “Inepano ndikupempherera lini iwo okha, koma ndikupemphererambo ali-wentse omwe an’ndikhulupira akapfunzisidwa na iwo, 21 kuti wentse akhale wakubverana ninga momwe imwe Baba mudabverana na inepano, ndipo inepano ndidabverana na imwe, kuti iwo akhalembo wakubverana na ifepano, nakuti dziko likhulupire kuti imwepo mudanditumadi. 22 Inepano ndawapasa ulemerero bomwe imwepo mudandipasa, kuti iwo akhale wakubverana ninga momwe ifembo tiriri wakubverana. 23 Inepano ndine wakuphatana na iwo, ndipo imwepo ndimwe wakuphatana na ine, kuti iwo akhale wakuphatana kwene-kwene ndipo dziko lin’dzadziwa kuti ndimwepo omwe mudandituma, nakuti mumbawafuna ninga momwe mumbandifunira. 24 Baba, ndikufuna kuti wale omwe mudandipasa adzakhale nande komwe inepano nin’dzakhala, kuti iwo adzawone ulemerero bomwe mudandipasa, thangwe rakuti mudandifuna pomwe dziko likhanati kulengedwa. 25 Baba wakulungama, kulewa cadidi, dzikoli limbakudziwani lini, tsono inepano nimbakudziwani ndipo awa ambadziwa kuti imwepo mudandituma. 26 Inepano ndawadziwisa dzina lanu, ndipo nin’pitiriza kulidziwisa, kuti lufoyi lomwe mudandifuna nalo likhalembo pa iwo, ndipo inepano ndikhalembo wakubverana nawo.”

18 Pomwe Jezu adamala kulewa bzimwebzi, iye na anyakupfunza wace adacoka aciyenda ku ng’ambu inango ya Cigwa ca Kidironi. Kumweko kukhana dimba, ndipo iye na anyakupfunza wace adapita m’dimbamo. 2 Tsono Djuda, ule omwe angadadzamupereka, akhaidziwambo mbutoyo, thangwe Jezu nthawe zizinji akhambayenda kumweko na anyakupfunza wace. 3 Tenepo, Djuda adatenga thimu la acikunda na alindiri omwe akhadatumidwa na atsogoleri wa antsembe pabodzi na Afarizeu aciyenda nawo kumweko. Ndipo iwo adanyamula mitsatso, makandiyero na bzifuzo. 4 Patsogolo pace, Jezu pakudziwa bzentse bzomwe bzingadamucitikira, adawafenderera aciwabvunza kuti: “Kodi mukunyang’ana yani?” 5 Iwo adamutawira kuti: “Jezu wa ku Nazareti.” Iye adawauza kuti: “Ndinepano.” Tsono Djuda nyakumupereka ule, akhalimbo pabodzi na iwo.

6 Tsono pomwe Jezu adawauza kuti, “ndinepano,” iwo adafundukira, acigwa pantsi. 7 Tenepo, iye adawabvunza pomwe kuti: “Kodi mukunyang’ana yani?” Iwo adati: “Jezu wa ku Nazareti.” 8 Jezu adawatawira kuti: “Ndakuuzani kale kuti ndinepano. Tenepo, penu imwepo mukunyang’ana inepano, asiyeni awa ayende.” 9 Bzimwebzi bzidacitika kuti yakwanisike mafala yomwe iye adalewa kuti: “Wale omwe imwepo mudandipasa, palibe ne na m’bodzi omwe wataika.”

10 Patsogolo pace, Simau Pedru, omwe akhana xipada, adaisolola, acigwata khutu la kumadidi la kapolo wa mkulu wa antsembe. Kapoloyo dzina lace akhali Malko. 11 Tenepo Jezu adauza Pedru kuti: “Bwezera xipada m’mbuto mwace. Kodi nin’funikira lini kumwa bza m’kopo yomwe Baba wandipasa?”

12 Patsogolo pace, acikunda, mkulu wa acikunda na alindiri wa Adjuda, adaphata Jezu acimumanga. 13 Iwo adayamba kuyenda naye kwa Anasi omwe akhali amibzala wa Kaifasi, omwe gole limwero akhali mkulu wa antsembe. 14 Kaifasi umweyu, ngule omwe adacenjeza Adjuda, kuti bzikhana phindu kwa iwo kuti munthu m’bodzi afere wanthu wentse.

15 Simau Pedru na anyakupfunza winango, akhambatewera Jezu. Nyakupfunza winangoyo akhadziwika na mkulu wa antsembe, ndipo iye adapita na Jezu mpaka mkati mwa mpanda wa mkulu wa antsembeyo, 16 tsono Pedru akhadaima kunja pa msuwo. Tenepo, nyakupfunza omwe akhadziwika na mkulu wa antsembe ule adapita acikalewalewa na mulindiri wa pa msuwo ndipo adatenga Pedru acipita naye mkati. 17 Mtumiki m’bodzi wacikazi, omwe akhali mulindiri wa pa msuwo, adabvunza Pedru kuti: “Kodi imwepo ndimwembo lini m’bodzi wa anyakupfunza wa munthu umweyu?” Iye adatawira kuti: “Ne, ndine lini.” 18 Akapolo na alindiri akhadaima pamwepo acimbawotha moto wa masimbe thangwe kukhadjedjera kwene-kwene. Ndipo Pedru adaimambo nawo pabodzi pamwepo, aciwothambo motoyo.

19 Tenepo, mtsogoleri wa antsembe adabvunza Jezu bza anyakupfunza wace na bzomwe akhapfunzisa. 20 Jezu adamutawira kuti: “Inepano ndikhambalewalewa padeca mu dziko. Nthawe zentse ndikhambapfunzisa ku nyumba zakunamatira,* ku templo komwe Adjuda wentse akhambatsonkhana ndipo ndiribe kulewalewa mwacintsintsi. 21 Thangwe ranyi imwepo mukubvunza inepano? Bvunzani wale omwe akhabva bzomwe ndikhawauza. Onani! Wentsenewa akudziwa bzomwe ndikhalewa.” 22 Pomwe Jezu adamala kulewa bzimwebzi, m’bodzi wa alindiri omwe akhali pafupi na iye, adam’menya mbama acimubvunza kuti: “Ungatawire tenepayu mtsogoleri wa antsembe?” 23 Jezu adamutawira kuti: “Penu ndalewa cinthu ciri-centse cakuphonyeka, ndiuze comwe ndaphonyaco; tsono penu bzomwe ndalewa mpsacadidi, thangwe ranyi wandimenya?” 24 Patsogolo pace, Anasi adatumiza Jezu kwa Kaifasi mkulu wa antsembe, pomwe Jezuyo akhadamangidwa.

25 Pa nthawe imweyo, Simau Pedru akhadaima acimbawotha moto. Tenepo, iwo adamubvunza kuti: “Kodi iwepo ndiwembo lini m’bodzi wa anyakupfunza wace?” Iye adalamba acilewa kuti: “Ne, ndine lini.” 26 Tsono m’bodzi wa akapolo wa mkulu wa antsembe omwe akhalimbo m’bale wa munthu omwe akhadagwatidwa khutu na Pedruyo, adati: “Kodi inepano ndiribe kukuwona pabodzi na iye ku dimba kule?” 27 Tsono Pedru adalamba pomwe, ndipo pa nthawe imweyoletu congwe adalira.

28 Ku macibese-bese, iwo adacoka na Jezu kumui kwa Kaifasi, aciyenda naye kwa Pirato omwe akhali mtongi wa Djudeya. Tsono iwo alibe kupita m’nyumba mwa Piratoyo thangwe akhafuna lini kupswipa, pakuti akhafuna kukadya phwando la Paskwa. 29 Tenepo, Pirato adabula panja aciwabvunza kuti: “Kodi munthuyu waphonya ciyani?” 30 Iwo adamutawira kuti: “Bzingadakhala kuti munthuyu alibe kuphonya* cinthu, ifepano tingadamubweresa lini kwa imwepo.” 31 Na tenepo, Pirato adawauza kuti: “Mutengeni mukamutonge mwakubverana na malamulo yanu.” Tsono Adjudawo adati: “Malamulo yathu yambabvumiza lini kupha munthu.” 32 Bzimwebzi bzidacitika kuti yakwanisike mafala yomwe Jezu adalewa ya momwe iye angadafera.

33 Tenepo, Pirato adapita pomwe m’nyumbamo, ndipo adacemera Jezu acimubvunza kuti: “Kodi iwepo ndiwe Mambo* wa Adjuda?” 34 Jezu adatawira kuti: “Kodi imwepo mukundibvunza bzimwebzi thangwe mwakumbuka mwekha, ayai alipo omwe akuuzani bza ine?” 35 Pirato adamutawira kuti: “Iwepo un’dziwa kuti inepano ndine lini Mdjuda. Wanthu wa mtundu wako pabodzi na atsogoleri wa antsembe ndiwo omwe akupereka kwa ine. Kodi wacita ciyani?” 36 Jezu adatawira kuti: “Umambo bwangu bumbacita lini mbali ya dziko. Bzingadakhala kuti bumbacita mbali ya dzikoli, ateweri wangu angadamenya nkhondo kuti ndileke kuperekedwa kwa Adjuda. Tsono cadidi n’cakuti, Umambo bwangu bumbacita lini mbali ya dzikoli.” 37 Tenepo, Pirato adamubvunza kuti: “Tsono iwepo ndiwe mambo?” Jezu adatawira kuti: “Imwepo mukulewa mwekha kuti inepano ndine mambo. Comwe ndidabadwira na comwe ndidabwerera pa dziko la pantsi, ni kucitira umboni cadidi. Ali-wentse omwe ali ku mbali ya cadidi, ambabvera fala langu.” 38 Pirato adamubvunza kuti: “Kodi cadidi n’ciyani?”

Pomwe adamala kumubvunza bzimwebzi, iye adabula panja aciyenda pomwe komwe kukhana Adjudako, ndipo adawauza kuti: “Inepano ndikuwona lini mulandu uli-wentse kwa munthuyu. 39 Kuthumizira bzimwebzi, imwepo muna cizolowezi cakuti pa nthawe ya Paskwa nimbakutsudzulireni munthu m’bodzi. Tenepo, kodi imwepo mun’funa kuti ndikutsudzulireni Mambo wa Adjuda?” 40 Iwo adakuwa pomwe kuti: “Tin’funa lini munthu umweyo, koma Baraba!” Tsono Barabayo akhali mbava.

19 Patsogolo pace, Pirato adatenga Jezu acikamupfumbulisa. 2 Ndipo acikunda adakonza nkhata ya minga acimubvazika mu msolo, ndipo adamubvazika cakubvala cifuira kwene-kwene. 3 Iwo akhambafika pafupi na iye acimbamuuza kuti: “Muli tani imwe, Mambo* wa Adjuda!” Ndipo iwo akhambamukwantsa. 4 Pirato adabula pomwe panja, acikawauza kuti: “Onani! Ndinimucosa panja kuti imwepo muwone kuti ndiribe kugumana mulandu uli-wentse kwa munthuyu.” 5 Tenepo, Jezu adabula panja, adabvala nkhata yaminga mu msolo mwace na cakubvala cifuira cire, ndipo Pirato adati kwa iwo: “Onani! Munthu ule uyu.” 6 Tenepo, pomwe atsogoleri wa antsembe pabodzi na alindiri adawona Jezuyo, iwo adakuwa kuti: “Akamanikidwe pa muti! Akamanikidwe pa muti!” Tsono Pirato adati: “Mutengeni mukamuphe* mwekha, pakuti inepano ndiribe kugumana mulandu uli-wentse kwa munthuyu.” 7 Adjudawo adamutawira kuti: “Ifepano tina malamulo, ndipo mwakubverana na malamulo yathuyo, umweyu akuthemera kufa thangwe akhabziti ni mwana wa Mulungu.”

8 Pomwe Pirato adabva bzimwebzi, iye adagoperatu, 9 ndipo Pirato adapita pomwe m’nyumbamo acikabvunza Jezu kuti: “Kodi iwepo wacokera kuponi?” Tsono Jezu alibe kumutawira. 10 Tenepo, Pirato adati kwa iye: “Kodi iwepo un’funa lini kunditawira? Kodi un’dziwa lini kuti inepano ndinazo mphanvu zakukutsudzula na zakukuphesa?”* 11 Jezu adamutawira kuti: “Imwepo mungadakhala lini na mphanvu iri-yentse pa inepano, bzingadakhala kuti mulibe kupasidwa kucokera kudzulu. Ndipopa, munthu omwe wandipereka kwa imwepo, ana pikado ikulu.”

12 Na thangwe limweri, Pirato akhanyang’ana njira yakuti atsudzulire Jezu. Tsono Adjuda akhakuwa kuti: “Imwepo mukamutsudzula umweyu, ndimwe lini xamwali wa Seza. Munthu ali-wentse omwe an’bziti ni mambo, akuphindukira Seza.” 13 Pomwe Pirato adamala kubva mafala yamweya, adamucosa Jezu panja. Ndipo iye adakhala pa mpando wakutongera mirandu, pa mbuto yomwe pantsi pace pakhadakonzedwa na minyala yomwe m’Cihebereu, imbacemeredwa Gabata. 14 Imweyi ikhali ntsiku yakukonzekera Paskwa, ndipo zikhali nthawe 12 za kumasikati.* Ndipo Pirato adauza Adjudawo kuti: “Onani! Mambo wanu uyu!” 15 Tsono iwo adakuwa kuti: “Mupheni! Mupheni! Akamanikidwe pa muti!” Pirato adawabvunza kuti: “Kodi ndiphe mambo wanuyu?” Atsogoleri wa antsembe adatawira kuti: “Ifepano tiribe mambo munango, koma Seza basi.” 16 Patsogolo pace, Pirato adapereka Jezu m’manja mwawo kuti akaphedwe pa muti.

Tenepo, iwo adatenga Jezuyo aciyenda naye. 17 Jezu adatakula yekha muti wace wakuzunzidwira,* aciyenda naye ku mbuto yakucemeredwa Nkhadzi za Misolo, yomwe m’Cihebereu imbacemeredwa Gologota. 18 Kumweko, Jezu adakakhomereredwa pabodzi na amuna awiri. M’bodzi kumbali iyi, munango kumbali inangoyo, ndipo Jezuyo akhali pakati. 19 Pirato adanemba mafala aciyaikha pa muti wakuzunzidwirayo. Mafalayo yakhati: “Jezu wa ku Nazareti, Mambo wa Adjuda.” 20 Adjuda azinji adawerenga mafalayo, thangwe mbuto yomwe Jezu akhadakhomereredwayo, ikhali pafupi na mzinda. Ndipo mafalayo yakhadanembedwa m’Cihebereu, m’Cilatini na m’Cigerego. 21 Tsono atsogoleri wa antsembe wa Adjuda, adauza Pirato kuti: “Lekani kunemba kuti, ‘Mambo wa Adjuda,’ m’mbuto mwace nembani kuti iye akhalewa kuti: ‘Inepano ndine Mambo wa Adjuda.’” 22 Tsono Pirato adawatawira kuti: “Bzomwe inepano ndanemba, bzin’cinjidwa lini.”

23 Pomwe adamala kukhomerera Jezu pa muti, acikunda adatenga bzakubvala bzace bzakunja acibzigawa panai. Mcikunda ali-wentse adatenga cipande cace, ndipo iwo adatengambo cakubvala cace ca mkati. Tsono cakubvala ca mkatico cikhalibe msono, ikhali nguwo ibodzi yokha kuyambira padzulu mpaka pantsi. 24 Tenepo, iwo adayamba kumbauzana kuti: “Mbatilekeni kung’amba cakubvalaci, koma mbaticiteni vima-vima kuti tiwone mbani omwe an’citenga.” Bzimwebzi bzidacitika kuti cikwanisike cinembo comwe cimbati: “Iwo adagawana bzakubvala bzangu pakati pawo, ndipo adacita vima-vima cakubvala cangu.” Ndipo acikundawo adacitadi bzimwebzo.

25 Pafupi na pa muti wakuzunzidwira wa Jezu, pakhadaima mai wace pabodzi na m’bale wa mai waceyo, Mariya mkazi wa Kulopa na Mariya Madalena. 26 Tenepo, pomwe Jezu adawona mai wace pabodzi na nyakupfunza omwe iye akhamufuna kwene-kwene ule adaima pafupipo, iye adauza mai wacewo kuti: “Mai! Kuyambira lero, uyu ndiye mwana wanu.” 27 Patsogolo pace, iye adauza nyakupfunza waceyo kuti: “Kuyambira lero, awa ni mai wako.” Ndipo kuyambira pamwepo,* iye adawatenga aciyenda nawo kumui kwace.

28 Patsogolo pace, pomwe Jezu adadziwa kuti bzinthu bzentse bzakwanisika, kuti cinembo cikwanisike, iye adati: “Ndina nyota.” 29 Pamwepo pakhana mtsuko omwe ukhadadzala na vinyu yakuwawasa. Tenepo, iwo adatenga thonje acilibviika mu vinyu yakuwawasayo, ndipo adalipfikirira ku muti wa isopo* acilifikisa pa mulomo pace. 30 Pomwe Jezu adatambira vinyu yakuwawasayo, adati: “Bzakwanisika!” Ndipo adatsulimisa msolo wace acifa.

31 Pakuti imweyi ikhali ntsiku Yakukonzekera Sabudu,* Adjuda akhafuna lini kuti mitembo ipitirize kukhala pa miti yakuzunzidwirayo mpaka pa ntsiku ya Sabudu (thangwe ntsiku imweyi ya Sabudu ikhali ikulu kwene-kwene). Tenepo, Adjudawo adayenda kukakumbira Pirato kuti awabvumize kukatcola minyendo ya mitemboyo, acikaibulusa. 32 Tenepo, acikunda adayenda acikatcola minyendo ya wanthu awiri omwe akhadamanikidwa pabodzi na Jezu. 33 Tsono pomwe adafika pomwe pakhana Jezu, iwo adawona kuti akhadafa kale. Tenepo, iwo alibe kutcola minyendo yace. 34 Tsono m’bodzi wa acikundawo, adamulasa na dipa m’mbabvu ndipo pa nthawe imweyoletu, adacoka mulopa na madzi. 35 Munthu omwe adawona bzimwebzi, akucitira umboni ndipo umboni bwacebo n’bwacadidi. Munthu umweyo, akudziwa kuti ambalewa cadidi kuti imwepombo mukhulupire. 36 Kulewa cadidi, bzimwebzi bzidacitika kuti cinembo cikwanisike, comwe cidati: “Palibe pfupa lace ne na libodzilo lomwe lin’dzatcoledwa.” 37 Ndipo cinembo cinango pomwe cidalewa kuti: “Iwo an’dzanyang’ana munthu omwe adamulasa.”

38 Pomwe bzidamala kucitika bzimwebzi, Zuze wa ku Arimateya, adayenda kwa Pirato kukakumbira mtembo wa Jezu. Iye akhali nyakupfunza wa Jezuyo, tsono akhabzilewa lini padeca kuti akhali nyakupfunza wace, thangwe akhagopa Adjuda. Pirato adamubvumiza ndipo iye adayenda acikacosa mtemboyo. 39 Nikodemo, munthu omwe adayenda kukagumana na Jezu kakuyamba usiku, adayendambo. Iye akhadatakula mira yakusanganizidwa na aloe yomwe ikhadalemera pafupi-fupi makilu 33. 40 Tenepo, iwo adatenga mtembo wa Jezu aciukulungira na nguwo yabwino kwene-kwene, acimuikha bzakununtcirisa bzire mwakubverana na mwambo wa Adjuda pakupendesa nkhawa. 41 Tsono bzidacitika kuti pafupi na mbuto yomwe akhadamukhomererayo, pakhana dimba ndipo m’dimbamo mukhana thenje lipsa lomwe likhanati kuikhidwa kale munthu. 42 Pakuti imweyi ikhali ntsiku yomwe Adjuda akhakonzekera Sabudu, iwo adaikha Jezu mu thenje limwero thangwe adawona kuti likhali pafupi.

20 Pa ntsiku yakuyamba ya Mdzinga,* Mariya Madalena adayenda ku thenje macibese-bese pomwe kukhana mdima, ndipo iye adawona kuti cimwala comwe cikhadafunga nthutu cikhadacosedwa kale. 2 Tenepo, iye adabwerera acithamanga kuyenda kukhana Simau Pedru na nyakupfunza omwe akhafunidwa kwene-kwene na Jezu ule, ndipo adakawauza kuti: “Iwo acosa mtembo wa Mbuya mu nthutu, ndipo tikudziwa lini komwe akawuikha.”

3 Tenepo, Pedru na nyakupfunza munangoyo adathamanga aciyenda ku thenjeko. 4 Anyakupfunza awiriwo adayambira pabodzi kuthamanga, tsono nyakupfunza munangoyo adathamanga kwene-kwene kuposa Pedru, ndipo ndiye omwe adayamba kufika ku thenjeko. 5 Iye adasonzokera mu nthutumo ndipo adandowona nguwo zomwe zikhadasala m’mwemo, tsono alibe kupita mkatimo. 6 Patsogolo pace, Simau Pedru omwe akhabwera m’mbuyo mwace adafika acipitiratu mu nthutumo. Ndipo iye adandowona nguwo zomwe zikhadasiyidwa m’mwemo. 7 Tsono nguwo yomwe ikhadampsinkha msolo wa Jezu, ikhali lini pabodzi na nguwo zinangozo, koma ikhadavunyiziridwa pambali. 8 Ndipo nyakupfunza omwe adayamba kufika ule, adapitambo mu nthutumo, ndipo adawona acikhulupira. 9 Pakuti iwo akhabvesesa lini cinembo comwe cikhalewa kuti iye akhafunikira kulamusidwa kwa anyakufa. 10 Tenepo, anyakupfunzawo adabwerera m’mii mwawo.

11 Tsono Mariya adasala kunja, pafupi na nthutuyo akulira. Pomwe akhalirapo, iye adasonzokera kuti awone mkati mwa nthutuyo. 12 Ndipo iye adawona anjo awiri omwe akhadabvala bzakubvala bzicena akhadakhala pa mbuto yomwe mtembo wa Jezuyo ukhadaikhidwa. Ndipo m’bodzi akhadakhala ku msolo ndipo munangoyo akhadakhala ku minyendo. 13 Iwo adamubvunza kuti: “Thangwe ranyi ukulira?” Iye adati: “Iwo atenga Mbuya ndipo ndikudziwa lini komwe akamuikha.” 14 Pomwe adamala kulewa bzimwebzi, iye adazungunuka ndipo adawona Jezu adaima. Tsono alibe kuzindikira kuti akhali Jezu. 15 Tenepo Jezu adati kwa iye: “Kodi ukulira ciyani ndipo ukunyang’ana yani?” Pakukumbuka kuti akhali munthu omwe akhasamalira dimbalo, iye adamutawira kuti: “Pai, penu mwamucosa ndimwepo, ndiuzeni komwe mwakamuikha ndipo inepano nin’kamutenga.” 16 Jezu adati kwa iye: “Mariya!” Mariyayo adazungunuka ndipo adalewa Mucihebereu kuti: “Raboni!” (bzomwe bzimbathandauza kuti “Mpfunzisi!”) 17 Jezu adati kwa iye: “Leka kundiphatirira, pakuti ndikanati kuyenda kwa Baba. Tsono ndoko kwa azibale wangu ndipo kawauze kuti: ‘Ndikuyenda kuna Baba wangu, omwe ni Baba wanumbo ndipo kwa Mulungu wangu, omwe ni Mulungu wanumbo.’” 18 Mariya Madalena adayenda kukadziwisa nkhani yabwinoyi kwa anyakupfunzawo, iye adati: “Inepano ndawona Mbuya!” Ndipo iye adawauza bzentse bzomwe Jezu akhadamuuza.

19 Pa ntsiku imweyo, yomwe ikhali ntsiku yakuyamba ya Mdzingayo, anyakupfunzawo adatsonkhana pabodzi kumaulo. Iwo akhadakhiya nyumba yomwe akhadatsonkhanayo thangwe ra kugopa Adjuda. Jezu adafika, aciima pakati pawo ndipo adawauza kuti: “Mtendere ukhale namwe.” 20 Pomwe adamala kulewa bzimwebzi, iye adawalatiza m’manja mwace, na pa mbali pomwe akhadabowoledwa na dipa. Ndipo anyakupfunzawo adakomedwa kwene-kwene kuwona Mbuyayo. 21 Jezu adawauza pomwe kuti: “Mtendere ukhale namwe. Ninga momwe Baba adanditumira, inembo ndikukutumani.” 22 Pomwe adamala kulewa bzimwebzi, iye adawafuliza, aciwauza kuti: “Tambirani mzimu wakucena. 23 Mukalekerera munthu omwe wacita pikado, ndiye kuti Mulungu wamulekererambo kale; tsono mukasaya kulekerera munthu omwe wacita pikado, ndiye kuti Mulungu alibembo kumulekerera.”

24 Tsono Thomasi omwe akhacemeredwambo Mamphase, omwe akhali m’bodzi wa anyakupfunza 12 wale, pakhalibe pomwe Jezu adawonekera. 25 Tenepo anyakupfunza winangowo adakamuuza kuti: “Ifepano tawona Mbuya!” Tsono iye adati: “Ndikasaya kuwona bzipsazi bza perego m’manja mwace na kuikha cala cangu pa bzipsazipo, ndipo ndikasaya kuikha boko langu pa mbali yomwe adabowoledwa ire, nin’dzakhulupira lini na pang’onopo.”

26 Pomwe padapita ntsiku 8, anyakupfunza wacewo adatsonkhana pomwe pabodzi ndipo Thomasi akhalipombo. Napo kuti misuwo ikhadafunga, Jezu adawonekera pakati pawo, aciwauza kuti: “Mtendere ukhale namwe.” 27 Patsogolo pace iye adauza Thomasi kuti: “Ikha cala cako apa ndipo ona manja yangu, futhula boko lako ndipo phata pa mbali yomwe ndidabowoledwa na dipa, leka kupenukira koma khulupira.” 28 Pakutawira Thomasi adati kwa iye: “Mbuya wangu na Mulungu wangu!” 29 Jezu adamuuza kuti: “Kodi ukukhulupira thangwe wandiwona? Wakukondwa mbale omwe anikhulupira napo alibe kuwona.”

30 Kulewa cadidi, Jezu adacita bzakudabwisa bzinango bzizinji pamaso pa anyakupfunzawo, bzomwe bziribe kunembedwa m’bukhu* lino. 31 Tsono bzimwebzi bzidanembedwa kuti imwepo mukhulupire kuti Jezu ni Kristu Mwana wa Mulungu, ndipo thangwe ra kukhulupira kwanu, mukhale na moyo wakusaya kumala m’dzina lace.

21 Pambuyo pa bzimwebzi, Jezu adawonekera pomwe kwa anyakupfunza wace ku nyanza ya Tiberiadi, iye adawonekera tenepa: 2 Kumweko kukhana Simau Pedru, Thomasi (omwe akhacemeredwambo Mamphase), Nataniyeri wakucokera ku Kana wa ku Galileya, wana wa Zebedeu na anyakupfunza winango awiri. 3 Simau Pedru adawauza kuti: “Inepano ndikuyenda kukapha ntsomba.” Iwo adamuuza kuti: “Ifepano tiniyendambo nawe.” Iwo adayenda acikapakira mwadiya, tsono adaphuphudza usiku bwentse ndipo alibe kuphata cinthu.

4 Pomwe kukhacena, Jezu adaima pa gombe, tsono anyakupfunzawo alibe kuzindikira kuti akhali Jezu. 5 Patsogolo pace Jezu adawabvunza kuti: “Wana wangu, kodi muna cinthu ciri-centse* kuti tidye?” Iwo adatawira kuti: “Ne!” 6 Iye adawauza kuti: “Thusani bwazibo ku mbali ya madidi ya mwadiyayo, ndipo mun’gumana ntsomba.” Tenepo, iwo adathusa bwazibo ndipo alibe kukwanisa kubupfuwa thangwe ra kuwanda kwa ntsomba. 7 Patsogolo pace, nyakupfunza omwe akhafunidwa na Jezu ule adauza Pedru kuti: “Ni Mbuya!” Simau Pedru pakubva kuti akhali Mbuya, adabvala cakubvala cace cakunja pakuti akhali pezi* ndipo adamogera m’madzimo. 8 Tsono anyakupfunza winangowo akhabwera m’mwadiya ung’ono acimbapfuwa bwazi bwakudzala na ntsomba, pakuti iwo akhali lini kutali na kunja ndipo pakhana mtantho wa mametru pafupi-fupi 90.

9 Pomwe iwo adafika kunja, adawona moto wa masimbe ndipo pa motopo pakhana ntsomba, ndipo adawonambo pau. 10 Jezu adawauza kuti: “Bweresani ntsomba zinango zomwe mwaphata tsapanopa.” 11 Tenepo, Simau Pedru adapita m’mwadiyamo acipfuwira kunja bwazi bomwe bukhana ntsomba zikulu-zikulu zakukwana 153. Napo kuti mukhana ntsomba zizinji, bwazibo bulibe kung’ambika. 12 Jezu adawauza kuti: “Bwerani mudye.” Palibe ne na m’bodzi wa anyakupfunzawo omwe adakhwimika kumubvunza kuti: “Ndimwe yani?” Thangwe iwo akhadziwa kuti akhali Mbuya. 13 Jezu adayenda kukatenga pau aciwapasa, ndipo adacitambo bzibodzi-bodzibzo na ntsomba. 14 Kamweka kakhali kacitatu komwe Jezu adawonekera kwa anyakupfunza wace pambuyo pakulamusidwa kwa anyakufa.

15 Pomwe iwo adamaliza kudya, Jezu adauza Simau Pedru kuti: “Simau mwana wa Juwau, kodi umbandifuna kwene-kwene kuposa ntsombazi?” Iye adamutawira kuti: “Inde Mbuya, imwepo mukudziwa kuti nimbakufunani.” Jezu adamuuza kuti: “Dyesa wana wa mabira yangu.” 16 Iye adamubvunza pomwe kaciwiri kuti: “Simau mwana wa Juwau, kodi umbandifuna kwene-kwene?” Iye adamutawira kuti: “Inde Mbuya, imwepo mukudziwa kuti nimbakufunani.” Jezu adamuuza kuti: “Usa kathimu kangu ka mabira.” 17 Iye adamubvunza pomwe kacitatu kuti: “Simau mwana wa Juwau, kodi umbandifuna kwene-kwene?” Pedru adasunama thangwe ra kumubvunza kacitatu kuti: “Kodi umbandifuna kwene-kwene?” Tenepo iye adamuuza kuti: “Mbuya, imwepo mumbadziwa bzinthu bzentse ndipo mun’dziwa kuti inepano nimbakufunani.” Jezu adamuuza kuti: “Dyesa kathimu kangu ka mabira. 18 Cadidi ndikukuuza kuti, pomwe iwepo ukhali tswaka, ukhabvala bzakubvala uciyenda komwe un’funa. Tsono ukadzakalamba, un’dzalamusa manja yako, ndipo munthu munango ndiye omwe an’dzakubvazika, acikuyendesa komwe iwepo un’funa lini.” 19 Iye adalewa bzimwebzi, pakufuna kulatiza mtundu wa infa yomwe iye angadadzalemekeza nayo Mulungu. Pomwe adamaliza kulewa bzimwebzi, iye adamuuza kuti: “Pitiriza kunditewera.”

20 Pedru adazungunuka, ndipo adawona nyakupfunza omwe akhafunidwa na Jezu ule akuwatewera, nyakupfunza umweyu ngule omwe pa Paskwa akhadakhala pafupi* na Jezu, omwe adabvunza kuti: “Mbuya, mbani omwe akufuna kukuperekani?” 21 Tenepo, pomwe Pedru adamuwona, adabvuza Jezu kuti: “Mbuya, kodi n’ciyani cin’dzacitika kwa munthuyu?” 22 Jezu adati kwa iye: “Ndicifuna kuti iye apitirize mpaka ine kubwera, kodi iwepo unabzo basa lanyi? Iwepo ndopitiriza kunditewera.” 23 Pomwe adalewa bzimwebzi, mafala yamweya yadabvekera kwa abale kuti nyakupfunza umweyu angadadzafa lini, tsono Jezu akhalibe kulewa kuti iye angadadzafa lini, koma adalewa kuti: “Ndicifuna kuti iye apitirize mpaka ine kubwera, kodi iwepo unabzo basa lanyi?”

24 Nyakupfunza umweyu, ndiye omwe adacitira umboni bzinthu bzimwebzi, ndipo ndiye omwe adanemba bzinthu bzimwebzi ndipo tikudziwa kuti umboni bwacebo, n’bwacadidi.

25 Kulewa cadidi, pana bzinthu bzizinji bzomwe Jezu adacita. Bzingadakhala kuti bzidanembedwa cibodzi na cibodzi, nin’kumbuka kuti dziko lentse lingadakhala liribe m’mbuto ya kukoya mabukhu yomwe yangadanembedwa.