MABASA YA APOSTOLO

1 A Teofilo, mu nkhani yakuyamba ire, ndidanemba bzinthu bzentse bzomwe Jezu adayamba kucita na kupfunzisa 2 mpaka pa ntsiku yomwe iye adatengedwa kuyenda kudzulu. Iye adatengedwa, pomwe adamala kupereka malango kwa apostolo wace omwe adasankhulidwa na iye, mwakutsogoleredwa na mzimu wakucena. 3 Pambuyo pakubonera, Jezu adawonekera kwa iwo kazinji kentse, mwakuti iwo alibe kupenukira kuti iye akhana moyo. Iye adawonekera kwa iwo mu ntsiku zakukwana 40, acimbawauza bza Umambo bwa Mulungu. 4 Pomwe akhali pabodzi na iwo, iye adawauza kuti: “Lekani kucoka mu Jeruzalemu, koma pitirizani kudikhirira bzomwe Baba adakuuzani, ninga momwe ine ndidalewera; 5 pakuti Juwau adabatiza wanthu na madzi, tsono mu ntsiku zakucepa imwepo mun’dzabatizidwa na mzimu wakucena.”

6 Tenepo, pomwe iwo adatsonkhana adamubvunza kuti: “Mbuya, kodi ni nthawe ino yomwe mun’bwezeresa umambo kwa Jirayeri?” 7 Iye adawatawira kuti: “Mpsakuthemera lini imwepo kudziwa nthawe na nyengo yomwe Baba adaikhazikisa. 8 Tsono mzimu wakucena ukadzafika kwa imwepo, mun’dzatambira mphanvu ndipo mun’dzakhala mboni zangu ku Jeruzalemu, ku Djudeya kwentse na ku Samariya mpaka mbuto zakutali za pa dziko la pantsi.” 9 Pomwe adamala kulewa bzinthu bzimwebzi, iye adatengedwa aciyenda kudzulu, ndipo mitambo idamumpsinkha, pomwe iwo akhanyang’anisisa. 10 Pomwe akhapitiriza kunyang’anisa kudzuluko pa nthawe yomwe iye akhayenda, mwadzidzidzi adawonekera amuna awiri omwe akhadaima pambali pawo, omwe akhadabvala bzakubvala bzicena, 11 ndipo iwo adati: “Imwe amuna wa ku Galileya, thangwe ranyi imwepo mudaima mucimbanyang’anisa kudzulu? Jezu omwe watengedwa pakati panuyu aciyenda kudzulu, iye an’dzabwera mu njira ibodzi-bodziyi ninga momwe mwamuwoneramu pakuyenda kudzulu.”

12 Patsogolo pace, iwo adabwerera ku Jeruzalemu, kucokera ku phiri lakucemeredwa Phiri la Miolivera, lomwe liri pafupi na Jeruzalemu pa mtantho wa kilometro ibodzi.* 13 Pomwe adafika, iwo adayenda m’cipinda capadzaulu comwe akhakhala. M’mwemo mukhana Pedru na Juwau, Tiyago na Andereya, Filipi na Thomasi, Bartolomeu na Mateu, Tiyago mwana wa Alufeu, Simau omwe akhali wanyongo na Djuda mwana wa Tiyago. 14 Na cakulinga cibodzi, wentse adapitiriza kupemba pabodzi na akazi winango na Mariya mai wa Jezu na abale wace wa Jezuyo.

15 Mu ntsiku zimwezire, Pedru adaima pakati pa abalewo (wentse pabodzi akhalipo* wanthu wakukwana 120) acilewa kuti: 16 “Abale, bzikhali bzakufunika kuti bzomwe mzimu wakucena udaleweratu m’bzinembo mwakuphatisa basa Davide bzikwanisike, pakulewa bza Djuda omwe adatsogolera wanthu kuti akamange Jezu. 17 Thangwe iye akhali pakati pathu ndipo akhadasankhulidwambo kuti acite basa la utumikiri. 18 (Munthu umweyu adagula munda na kobiri zomwe adatambira thangwe ra kucita cinthu cakuipa, iye adagwa na msolo, mimba yace icitumbuka ndipo matumbo yace yentse yadabula panja. 19 Bzimwebzi bzidadzadziwika kwa wanthu wentse wa ku Jeruzalemu, ndipo munda umweyo, adadzaucemera m’cirewedwe cawo kuti Akeldama, kuthandauza “Munda wa Mulopa.”) 20 Pakuti bzidanembedwa m’bukhu la Salimo kuti: ‘Mbuto yace yakukhala isanduke matere, ndipo paleke kugumanika munthu wakukhala kumweko’ ndipo ‘udindo bwace bwakunyang’anira buperekedwe kwa munthu munango.’ 21 Tenepo, mpsakufunika kuti amuna omwe adakhala nafe pa nthawe yentse yomwe Mbuya Jezu adacita mabasa yace* pakati pathu, 22 kuyambira pomwe adabatizidwa na Juwau mpaka pa ntsiku yomwe adatengedwa pakati pathu, m’bodzi mwa amuna amwewa akhale mboni pabodzi na ife ya kulamusidwa kwace.”

23 Na tenepo, iwo adasankhula wanthu awiri, omwe ni Zuze wakucemeredwa Barisaba omwe akhadziwikambo na dzina lakuti Justo pabodzi na Matiya. 24 Patsogolo pace iwo adapemba, aciti: “Imwe Yahova, omwe mumbadziwa mitima ya wanthu wentse, latani pa amuna awiriwa omwe imwepo mwamusankhula, 25 kuti acite utumikibu na kukhala mpostolo, bzomwe Djuda adalamba aciyenda komwe iye akhafuna.” 26 Tenepo iwo adacita vima-vima kuti adziwe kuti mbani omwe akhadasankhulidwa, ndipo vima-vimayo adagwera Matiya, ndipopa iye adakhalambo m’thimu la apostolo 11 wale.

2 Pa ntsiku ya phwando la Pentekoste, anyakupfunza wentse akhadatsonkhana pa mbuto ibodzi. 2 Mwadzidzidzi kudabveka baludya lakucokera kudzulu ninga la cimphepo camphanvu, ndipo lidabveka m’nyumba yentse yomwe akhaliyo. 3 Ndipo adawona bzirambi-rambi bza moto bzomwe bzikhawoneka ninga malirime, ndipo bzidamwazana bzicikhala pa msolo pa m’bodzi na m’bodzi wa iwo. 4 Wentsenewo adadzazidwa na mzimu wakucena, ndipo adayamba kulewalewa bzirewedwe bzakusiyana-siyana mwakubverana na momwe mzimuyo ukhawatsogolerera.

5 Pa nthawe imweyire, mu Jeruzalemu mukhakhala wanthu wakugopa Mulungu wakucokera m’madziko yakusiyana-siyana. 6 Tenepo, pomwe padabveka baludya lire, padatsonkhana thimu la wanthu ndipo wanthuwo adadabwa kwene-kwene thangwe ali-wentse wa iwo adabva anyakupfunzawo akulewalewa cirewedwe cace. 7 Kulewa cadidi, iwo adadabwa kwene-kwene ndipo adati: “Onani wanthumwe, kodi wanthu wentse omwe akulewalewawa ni Agalileya lini? 8 Tsono bzikukwanisika tani kuti ali-wentse wa ifepano ambabve m’cirewedwe cace cakubadwa naco? 9 Pakati pathu pana wanthu omwe acokera ku Parto, ku Mediya, ku Elamu, Mezopotamiya, Djudeya, Kapadosiya, Ponto na m’bzigawo bza Aziya, 10 ku Frijiya, Pamfiliya, Edjipito na wakucokera m’madera ya ku Libiya kufupi na Sirene, na alendo wakucokera ku Roma pabodzi na Adjuda na wanthu wakutendeukira ku Cidjuda, 11 Akereta na Arabiya. Tentsenefe tawabva akulewa bza mabasa yamphanvu ya Mulungu m’bzirewedwe bzathu.” 12 Inde, iwo adadabwa kwene-kwene ndipo adayamba kubvunzana kuti: “Kodi bzimwebzi bzikuthandauza ciyani?” 13 Tenepo, wanthu winango akhawaseka acimbati: “Amwewa aledzera na vinyu yakutapira.”*

14 Tsono Pedru adaima pabodzi na anzace 11 wale, ndipo iye adalewa mwakukuwa kuti: “Imwe amuna wa ku Djudeya na mwentse wakukhala mu Jeruzalemu, khalani tceru ndipo tetekerani bwino-bwino mafala yangu. 15 Kulewa cadidi, wanthuwa alibe kuledzera ninga momwe imwepo mukukumbukirira, thangwe zino ni nthawe 9 zakumacibese.* 16 Mwakusiyana na bzimwebzi, bzikukwanisika bzomwe mpolofeta Joweri adalewa kuti: 17 ‘Mulungu walewa kuti: “Mu ntsiku zakumalizira, inepano nin’dzatsanulira mzimu wangu kwa wanthu wa mitundu yentse, ndipo wana wanu wacimuna na wana wanu wacikazi an’dzalewa mapolofesiya, maswaka pakati panu yan’dzawona masomphenya ndipo amuna akulu-akulu pakati panu an’dzalota. 18 Ndipo mu ntsiku zimwezo, nin’dzatsanulirambo mzimu wangu kwa atumiki wangu wacimuna na wacikazi, ndipo iwo an’dzalewambo mapolofesiya. 19 Ndipo nin’dzacita bzakudabwisa kudzulu na bzizindikiro pa dziko la pantsi: Mulopa, moto na mitambo ya utsi. 20 Pomwe ikanati kufika ntsiku ikulu ya Yahova yomwe in’dzalatiza ulemerero bwace, dzuwa lin’dzasanduka mdima ndipo mwezi un’dzasanduka mulopa. 21 Ndipo munthu ali-wentse omwe an’dzacemera dzina la Yahova, an’dzapulumuka.”’

22 “Imwe Ajirayeri, tetekerani mafala aya: Mulungu adalatiza padeca kuna imwepo, kuti Jezu wa ku Nazaleti akhadatumidwa na iye, ndipo mwakuphatisa basa Jezuyo, Mulungu adacita bzakudabwisa, mabasa yamphanvu na bzizindikiro pakati panu ninga momwe mukudziwira. 23 Mulungu akhadziwiratu kuti Jezu, angadadzamangidwa mwakubverana na kufuna kwace Mulunguyo na bzomwe iye akhadziwa kale. Imwepo mudamukhomerera pa muti, mwakuphatisa basa wanthu wakusaya kudziwa malamulo ndipo adamupha. 24 Tsono Mulungu adamulamusa mwakumutsudzula ku mabvuto ya* infa, thangwe bzingadakwanisika lini kuti iye apitirize kukhala wakumangidwa na infayo. 25 Pakulewa bza iye, Davide adati: ‘Nimbaikha Yahova patsogolo pangu nthawe zentse, thangwe iye ali ku boko langu lamadidi kuti ndireke kugwa. 26 Na thangwe limweri, mtima wangu udakomedwa ndipo lirime langu lidakondwa kwene-kwene. Tenepo, inepano* ndidakhala na cidikhiro; 27 thangwe imwe mun’dzandisiya lini* m’Thenje,* ndipo mun’dzabvuma lini kuti thupi la munthu wanu wakukhulupirika libvunde. 28 Imwepo mwandicitisa kudziwa njira za moyo, ndipo mun’dzadzaza mtima wangu na cikondweso pamaso panu.’

29 “Abale, ndibvumizeni kulewalewa namwe mwakutsudzuka bza kholo lathu Davide. Iye adafa acipendesedwa ndipo nthutu yace tikanayo mpaka lero. 30 Pakuti iye akhali mpolofeta ndipo akhadziwa kuti Mulungu akhadalumbira, kuti m’bodzi mwa wana wace* angadadzakhala pa mpando wace wa umambo. 31 Iye akhadawoneratu ndipo akhadaleweratu bza kulamusidwa kwa Kristu, kuti iye angadasiyidwa lini m’thenje* ne thupi lace lingadabvunda lini.* 32 Mulungu adalamusa Jezu ndipo tentsenefe ndife mboni za bzimwebzi. 33 Tenepo, pakuti iye adakwizidwa ku boko lamadidi la Mulungu, ndipo adapasidwa mzimu wakucena omwe akhadauzidwiratu kuti angadapasidwa na Baba wace, iye watitsanulira bzomwe imwepo mukuwona na kubvabzi. 34 Pakuti Davide alibe kuyenda kudzulu, tsono iye caiyeyo adalewa kuti: ‘Yahova adauza Mbuya wangu kuti: “Khala ku boko langu lamadidi 35 mpaka ndidzaikhe anyamadulanthaka wako ninga cakupondera nzayo zako.”’ 36 Tenepo, wanthu wentse wa mu Jirayeri akhale na citsimikizo centse cakuti Jezu, omwe adamukhomerera pa muti, Mulungu wamucitisa kukhala Mbuya na Kristu.”

37 Pomwe iwo adabva bzimwebzi, adaneseka kwene-kwene mu mtima mwawo, ndipo adabvunza Pedru na apostolo winangowo kuti: “Abale, kodi tin’funika kucita ciyani?” 38 Pedru adawatawira kuti: “Kungulani, ndipo ali-wentse abatizidwe mu dzina la Jezu Kristu, kuti mulekereredwe pikado zanu ndipo imwepo mun’dzatambira mphaso yafovolo ya mzimu wakucena. 39 Pakuti bzimwebzi bzidalewedweratu kuti bzin’dzacitikira imwepo pabodzi na wana wanu na wentse wakukhala kutali, kuphatanidzambo wentse omwe angasankhulidwe na Yahova Mulungu wathu.” 40 Iye akhacitira umboni mwakukwanira ndipo akhawacenjeza na mafala manango mazinji kuti: “Siyanani na wanthu wakuipawa kuti muleke kudzapfudzidwa.” 41 Tenepo, wanthu wentse omwe adabvuma na mtima wentse mafala yomwe Pedru adalewa, adabatizidwa, ndipo pa ntsiku imweyo, wanthu* pafupi-fupi 3000 adathumizirika mu thimu lawo. 42 Ndipo iwo akhapitiriza kumbapfunza na apostolowo, kumbapasana bzinthu, kumbadyera pabodzi na kumbapemba.

43 Kulewa cadidi, wanthu wentse adayamba kucita mantha, ndipo apostolo adayamba kucita bzizindikiro na bzakudabwisa bzizinji. 44 Wanthu wentse omwe adakhala ateweri wa Jezu akhali pabodzi, ndipo bzinthu bzentse bzomwe akhanabzo akhabziphatisa basa pabodzi. 45 Iwo adakagulisa minda yawo na bzinthu bzentse bzomwe akhanabzo, ndipo kobirizo adazigawa kwa wentse mwakubverana na bzomwe munthu ali-wentse akhafunikira. 46 Ntsiku zentse mwakuphatana iwo akhambakhala ku templo na cakulinga cibodzi, ndipo akhambazungirana m’mii mwawo, acimbadya pabodzi ndipo akhambapasana cakudya na mtima wentse na mwakukondwa. 47 Iwo akhatumbiza Mulungu ndipo akhafunidwa na wanthu wentse, ndipo pa nthawe ibodzi-bodziyo, Yahova ntsiku zentse akhapitiriza kuthumizira wanthu pakati pawo omwe akhapita mu njira ya cipulumuso.

3 Pedru na Juwau akhayenda ku templo kuti akacite mipembo ya masikati, yomwe ikhacitika pa nthawe zitatu za kumaulo.* 2 Ndipo mwamuna munango omwe adabadwa wakupunduka, akhambanyamulidwa ntsiku zentse, acikasiidwa pafupi na msuwo wa templo, wakucemeredwa Msuwo Wakudeka, kuti ambakwanise kukumbira bzinthu kwa wanthu omwe akhambapita mu templomo. 3 Pomwe iye adawona Pedru na Juwau akupita mu templomo, iye adayamba kuwakumbira bzinthu. 4 Tsono Pedru na Juwau adamunyang’anisisa, ndipo Pedru adati: “Nyang’anisa ifepano.” 5 Ndipo nyakupundukayo adawanyang’anisisa, acimbadikhira kuti angadapasidwa cinthu na iwo. 6 Tenepo, Pedru adati: “Ndiribe prata* ne oro, koma ninkupasa bzomwe ndinabzo. Mu dzina la Jezu Kristu wa ku Nazareti, lamuka ufambe.” 7 Na bzimwebzi, Pedru adaphata boko lamadidi la munthu nyakupundukayo acimulamusa. Pa nthawe imweyoletu, minyendo yace na mbzugudu* mwace bzidalimbiratu, 8 ndipo iye adamoga aciima na minyendo yace ndipo adapita nawo pabodzi mu templomo. Iye akhafamba na kumoga-moga, acimbatumbiza Mulungu. 9 Ndipo wanthu wentse adamuwona iye akufamba, acimbatumbiza Mulungu. 10 Iwo adayamba kumuzindikira kuti ngule omwe akhakhala pa Msuwo Wakudeka wa pa templo, acimbadikhirira kupasidwa bzinthu. Wanthuwo adadabwa kwene-kwene pomwe adawona munthuyo akufamba.

11 Pomwe mwamunayo akhapitiriza kuphatirira Pedru na Juwau, wanthu wentse adathamangira komwe kukhana iwoko, ku mbuto yakucemeredwa Khonde la Salomau lomwe likhana midjirikiro ndipo iwo adadabwa kwene-kwene na bzomwe bzikhadacitikabzo. 12 Pomwe Pedru adawona bzimwebzi, iye adauza wanthuwo kuti: “Imwe wanthu wa mu Jirayeri, thangwe ranyi mukudabwa na bzimwebzi? Ndipo thangwe ranyi mukutinyang’anisa tenepa, ninga kuti tamucitisa kufamba na mphanvu zathu, ayai thangwe ra kubzipereka kwathu kwa Mulungu? 13 Mulungu wa Abalahamu, wa Izaki na wa Djakobo, Mulungu wa makolo yathu yakale, adatumbiza mtumiki wace Jezu, ule omwe imwepo mudamulamba mucimupereka kwa Pirato, napo kuti Piratoyo akhafuna kumutsudzula. 14 Kulewa cadidi, imwepo mudalamba munthu wakucena na wakulungama ule, ndipo mudakumbira Pirato kuti akutsudzulireni munthu omwe akhali kapondo, 15 ndipo imwepo mudapha Ule omwe ambatsogolera wanthu ku* moyo, tsono Mulungu adamulamusa kwa anyakufa ndipo ifepano ndife mboni za bzimwebzi. 16 Munthu omwe mukumuwonayu imwepo mumbamudziwa, iye wapozedwa mu dzina la Jezu na thangwe ra kukhulupira kwathu pa dzina la Jezuyo. Cikhulupiro comwe tinaco thangwe ra Jezu, ndico comwe cathandiza munthuyu kulimba pamaso pa mwentsemwe. 17 Ndipo tsapano abale, ndikudziwa kuti imwepo mudacita bzimwebzi mwakusaya kudziwa kuti iye akhali mbani maka-maka, ninga momwe adacitirambo atsogoleri wanu. 18 Tsono mwa njira imweyi, Mulungu adacitisa kuti bzikwanisike bzinthu bzomwe akhadaleweratu mwakuphatisa basa miromo ya apolofeta wentse, kuti Kristu wace angadadzabonera.

19 “Kungulani ndipo zungunukani kuti pikado zanu zipfudzidwe ndipo nthawe za mtsangalazo zibwere kucokera kwa Yahova.* 20 Iye an’dzakutumizirani Kristu omwe adasankhulidwa thangwe ra imwepo, omwe ni Jezu. 21 Iye an’funika kupitiriza kukhala kudzulu, mpaka pa nthawe yomwe bzinthu bzentse bzin’dzakonzedwa papsa, bzomwe Mulungu adaleweratu mwakuphatisa basa apolofeta wace wakucena wakale-kale. 22 Kulewa cadidi, Mozeji adati: ‘Yahova Mulungu wanu, an’dzakusankhulirani pakati pa abale wanu mpolofeta wakundendemerana na inepano. Mudzatetekere bzentse bzomwe iye an’dzakuuzani. 23 Kulewa cadidi, ali-wentse omwe an’dzatetekera lini mpolofeta umweyu, an’dzaphedweratu pakati pa wanthu wa Mulungu.’ 24 Kuyambira mpolofeta Samuyeri mpaka apolofeta wentse omwe adadzabwera patsogolo pace, adaleweratu padeca bza ntsiku zimwezi. 25 Imwepo ndimwe wana wa apolofeta na wa mpangano omwe Mulungu adacita na makolo yanu, pomwe adauza Abalahamu kuti: ‘Wanthu wentse wa pa dziko la pantsi an’dzasimbidwa kucokera mwa wana wako.’* 26 Pomwe Mulungu adalamusa mtumiki wace, cakuyamba adamutumiza kwa imwepo kuti adzakusimbeni, mwakucitisa ali-wentse wa imwepo kusiya bzicito bzace bzakuipa.”

4 Pomwe Pedru na Juwau akhalewalewa na thimu la wanthulo, antsembe, nyakunyang’anira mu templo na Asaduki adafika pomwe pakhana iwopo. 2 Iwo adakalipa thangwe apostolowo akhapfunzisa wanthu, ndipo akhalewa padeca kuti Jezu adalamusidwa kwa anyakufa. 3 Tenepo, iwo adaphata Pedru na Juwau aciwafungira m’kawoko mpaka mangwana yace thangwe kukhadadoka. 4 Wanthu wentse omwe adatetekera mafala ya apostolowo adakhulupira ndipo amuna wentse akhalipo pafupi-fupi 5000.

5 Mangwana yace, atongi, akulu na anembi adatsonkhana pabodzi mu Jeruzalemu. 6 Akhalipombo Anasi, omwe akhali mtsogoleri wa antsembe, Kaifasi, Juwau, Alexandre pabodzi na wentse omwe akhali abale wace wa mtsogoleri wa antsembe. 7 Iwo adauza Pedru na Juwau kuti aime pakati pawo, aciyamba kuwabvunza kuti: “Kodi imwepo mwacita bzimwebzi mu dzina la yani ayai na mphanvu za yani?” 8 Patsogolo pace, Pedru mwakudzazidwa na mzimu wakucena adawauza kuti:

“Imwe atongi wa wanthu na akulu, 9 penu ifepano tikubvunzidwa lero thangwe ra kupozedwa kwa munthu wakupundukayu ndipo penu mukufuna kudziwa munthu omwe wacitisa kuti umweyu apozedwe, 10 dziwani imwe mwentse pabodzi na Ajirayeri mwentse kuti mu dzina la Jezu Kristu Mnazareti, omwe imwepo mudamupha pa muti wakuzunzidwira ndipo Mulungu adamulamusa kwa anyakufa, ni munthu umweyu omwe wacitisa kuti mwamuna wakupundukayu apozedwe pamaso panu. 11 Jezu umweyu, ni mwala omwe imwepo anyakumanga mudaulamba, omwe udadzakhala mwala wakufunika wapakhona.* 12 Kuthumizira bzimwebzi, palibe munthu omwe angabwerese cipulumuso, pakuti palibe dzina linango pa dziko la pantsi lomwe Mulungu adalisankhula pakati pa wanthu kuti litipulumuse.”

13 Pomwe iwo adawona kukhwimika* kwa Pedru na Juwau na kuwonambo kuti iwo akhali wanthumbo tenepo na wakusaya kupfunza, iwo adadabwa kwene-kwene ndipo wanthuwo adazindikira kuti iwo akhafamba pabodzi na Jezu. 14 Pomwe iwo adawona mwamuna omwe adapozedwa ule adaima pabodzi na apostolo awiriwo, iwo adasaya cakulewa. 15 Na tenepo, iwo adawatonga kuti acoke kunja kwa Sinedriyo ndipo adayamba kumbabvunzana okha-okha 16 kuti: “Kodi ticite nawo ciyani amunawa? Pakuti iwo acitadi cizindikiro comwe cadziwika na wanthu wentse wakukhala mu Jeruzalemu ndipo tingalambe lini bzimwebzi. 17 Tsono kuti bzimwebzi bzireke kubvekera kwa wanthu wentse, bwerani tiwagopswe ndipo tiwauze kuti aleke kuuza munthu ali-wentse bza dzina limweri.”

18 Tenepo iwo adawacemera, aciwauza kuti aleke kulewa ne kupfunzisa pomwe mu dzina la Jezu. 19 Tsono pakuwatawira Pedru na Juwau adati: “Tongani mwekha penu mpsakuthemera pamaso pa Mulungu kubvera imwepo, kuposa kubvera Mulunguyo. 20 Tsono ifepano, tingaleke lini kulewalewa bzinthu bzomwe tidawona na kubva.” 21 Tenepo pomwe adawagopswa pomwe, iwo adawatsudzula thangwe alibe kugumana mathangwe yakuwapasira nyathwa, ndipo akhagopa wanthu thangwe wanthu wentse akhatumbiza Mulungu na bzomwe bzikhadacitikabzo. 22 Pakuti munthu omwe adapozedwa mwakudabwisa ule akhana magole yakupitirira 40.

23 Pomwe adatsudzulidwa, iwo adayenda kukagumana na anyakupfunza anzawo ndipo adawafotokozera bzentse bzomwe akhadauzidwa na atsogoleri wa antsembe na akulu. 24 Pakubva bzimwebzi, wentse mwakuphatana adapemba kwa Mulungu mwakukuwa, aciti:

“Mbuya Mkululetu, ndimwe Omwe mudalenga kudzulu, dziko la pantsi, nyanza na bzentse bzomwe bziri m’mwemo, 25 ndipo na mzimu wanu wakucena, mudalewa mwakuphatisa basa mulomo wa kholo lathu lakale Davide mtumiki wanu kuti: ‘Thangwe ranyi mitundu ya wanthu ikucita phiringu ndipo wanthu akukumbukira bzinthu bzapezi? 26 Amambo wa dziko aima kale m’mbuto zawo ndipo atongi atsonkhana kale pabodzi kuti alimbane na Yahova pabodzi na nyakudzozedwa* wace.’ 27 Pakuti Herode na Ponsiyo Pirato pabodzi na mitundu ya wanthu na wanthu wa ku Jirayeri, adatsonkhana pabodzi mu mzindayo kuti alimbane na mtumiki wanu wakucena Jezu, omwe imwepo mudamusankhula. 28 Ndipo iwo adatsonkhana pabodzi kuti acite bzinthu bzomwe imwepo mukhadalewa kale. Bzinthu bzimwebzi bzidacitika thangwe rakuti imwepo muna mphanvu* na thangwe ra kufuna kwanu. 29 Ndipo tsapano Yahova, bvani momwe iwo akutigopswera ndipo bvumani kuti atumiki wanu apitirize kulewalewa mafala yanu mwakukhwimika, 30 pomwe mukuphatisa basa mphanvu yanu kuti mupoze, nakuti bzizindikiro na bzakudabwisa bzipitirize kucitika m’dzina la Jezu mtumiki wanu wakucena.”

31 Pomwe adamala kupemba mwakudandaulira, mbuto yomwe akhadatsonkhanayo idatekenyeka ndipo wentse adadzazidwa na mzimu wakucena, aciyamba kulewalewa mafala ya Mulungu mwakukhwimika.

32 Kuthumizira bzimwebzi, thimu la wanthu omwe adakhulupira likhana makumbukidwe mabodzi* na mtima m’bodzi ndipo palibe munthu ne na m’bodzi omwe akhalewa kuti bzinthu bzomwe akhanabzo bzikhali bzace yekha, koma akhagawana na winango bzentse bzomwe akhanabzo. 33 Ndipo apostolowo adapitiriza kucitira umboni mwamphanvu bza kulamusidwa kwa Mbuya Jezu ndipo Mulungu adawalatiza wentsenewo kudeka mtima kwace kukulu. 34 Kulewa cadidi, palibe munthu ne na m’bodziyo pakati pawo omwe akhasaya cinthu, thangwe wentse omwe akhana minda yawo ayai nyumba zawo, adabzigulisa acibweresa kobirizo, 35 ndipo iwo akhazipereka kwa apostolo. Patsogolo pace, akhazigawanisa kwa munthu ali-wentse mwakubverana na kusaya kwace. 36 Na tenepo, Zuze wa ku Xipre, wa dzinza la Levi, omwe apostolo akhamucemera kuti Barnaba (dzina lomwe likasanduliziridwa limbathandauza mwana wa mtsangalazo), 37 akhana mbuto yace ndipo adaigulisa, kobirizo acizipereka kwa apostolo.

5 Na tenepo, mwamuna munango wakucemeredwa Ananiya pabodzi na mkazi wace Safira, adagulisambo mbuto yawo. 2 Tsono mwakubisa, iye pabodzi na mkazi wace adapambula kobiri zinango ndipo zakusalazo adakazipereka kwa apostolowo. 3 Tsono Pedru adalewa kuti: “Ananiya, thangwe ranyi iwepo walekerera kuti Sathani akucitise kunamiza mzimu wakucena ucipambula mwakubisa kobiri zomwe wagulisa mbuto yako? 4 Kodi mundayo ukhali lini wako pomwe ukhanati kuugulisa? Ndipo pomwe udagulisa, kobirizo zikhali lini m’manja mwako? Tsono thangwe ranyi mu mtima mwako wakumbuka kucita bzinthu bzimwebzi? Bzomwe wacitabzi, ulibe kunamiza wanthu koma wanamiza Mulungu.” 5 Pakubva mafalaya, Ananiya adagwa pantsi aciferatu ndipo wanthu wentse omwe adabva bzimwebzi adacita mantha kwene-kwene. 6 Tenepo, maswaka yadabwera yacimukulungira na nguwo ndipo adayenda naye kunja, acikamupendesa.

7 Pomwe zidapita nthawe zitatu, mkazi wace adabwera ndipo akhadziwa lini bzomwe bzikhadacitikabzo. 8 Pedru adabvunza mkaziyo kuti: “Ndiuze, kodi imwepo awirimwe mwagulisa mbuto yanu na kobiri zimwezi?” Mkaziyo adati: “Inde, na kobiri zimwezi.” 9 Tenepo Pedru adabvunza mkaziyo kuti: “Thangwe ranyi imwepo awirimwe mwapangana kuti muyeze mzimu wa Yahova? Ona, wale omwe akapendesa mwamuna wako ali pa msuwopo ndipo akubwera kudzakutenga kuti ayende nawe panja.” 10 Pa nthawe imweyoletu, iye adagwa pomwe pakhana Pedrupo aciferatu. Pomwe maswakayo yadapita, yadamugumana akhadafa kale ndipo yadamutakula yaciyenda naye panja ndipo adakam’pendesa pambali pa mwamuna wace. 11 Tenepo, gwere lentse pabodzi na wentse omwe adabva bzimwebzi adacita mantha kwene-kwene.

12 Kuthumizira bzimwebzi, apostolowo adapitiriza kucita bzizindikiro na bzakudabwisa bzizinji pakati pa wanthu ndipo wentse akhambatsonkhana pabodzi ku mbuto yakucemeredwa Khonde la Salomau. 13 Kulewa cadidi, palibe munthu ne na m’bodzi omwe adakhwimika kuphatana nawo, tsono wanthu akhambalewa bzabwino pakulewa bza iwo. 14 Kuthumizira bzimwebzi, wanthu omwe akhakhulupira Mbuya akhayenda acithumizirika, amuna na akazi. 15 Mwakuti akhambabweresa anyakuduwala m’miseu mikulu-mikulu, acimbawagonesa pa mphasa kuti Pedru akapita na pamwepo, mthunzi wace undokhuyembo winango mwa iwo. 16 Thimu la wanthu wakukhala m’mizinda yakuzungulira Jeruzalemu, akhapitiriza kubwera na wanthu wakuduwala na wale omwe akhadapoteredwa na mizimu yakuipa* ndipo wentsenewo akhapozedwa.

17 Tsono mkulu wa antsembe na wentse omwe akhanaye, pabodzi na wale omwe akhali mu cipembedzo ca Asaduki adaima ndipo akhana ntcanje kwene-kwene. 18 Ndipo iwo adaphata* apostolowo acikawaikha m’kawoko ya mu mzindamo. 19 Tsono pakati pa usiku, anjo wa Yahova adafungula misuwo ya m’kawokomo, aciwacosa panja ndipo adawauza kuti: 20 “Ndokoni mu templo ndipo mukapitirize kufotokozera wanthu mafala yentse yakulewa bza moyo omwe ukubwerayo.” 21 Pomwe adamala kubva bzimwebzi, iwo macibese-bese adakapita mu templo ndipo adayamba kupfunzisa wanthu.

Tsono pomwe adafika mkulu wa antsembe, pabodzi na wale omwe akhanaye, iwo adauza wanthu kuti apite mu Sinedriyo* pabodzi na thimu la akulu wa mtundu wa Ajirayeri ndipo iwo adatuma wanthu kuti ayende m’kawoko kuti akatenge apostolo, acibwera nawo kwa iwo. 22 Tsono pomwe alindiri wa pa templo adafika kumweko, alibe kuwagumana apostolowo. Na tenepo, iwo adabwerera acikalewa bzomwe awonabzo 23 kuti: “Takagumana misuwo idafunga ndipo alindiri adaima pa misuwopo. Tsono pomwe afungula, tiribe kuwona munthu ne na m’bodziyo mkatimo.” 24 Pomwe kapitawo wa m’templo pabodzi na mkulu wa antsembe adabva bzimwebzi, iwo adamalidwa nzeru ndipo akhambabzibvunza kuti n’ciyani comwe cingadacitika patsogolo pace. 25 Tsono munthu munango adabwera aciwauza kuti: “Amuna omwe imwepo mukhadawaikha m’kawoko wale, ali mu templo ndipo iwo akupfunzisa wanthu.” 26 Patsogolo pace, kapitawoyo pabodzi na alindiri wace adayenda kukawatenga, tsono alibe kuwatenga mwamphanvu thangwe akhagopa kuti wanthu angawabome na minyala.

27 Na tenepo adawabweresa, aciwaimisa patsogolo pa wanthu omwe akhali mu Sinedriyo. Patsogolo pace, mkulu wa antsembe adalewa 28 kuti: “Ifepano tidakuuzani kuti muleke kupfunzisa pomwe mu dzina la munthu umweyu. Tsono onani! mwadzaza Jeruzalemu na bzomwe mumbapfunzisa ndipo imwepo mwatsimikiza kutibweresera mulopa wa munthu umweyu.” 29 Tenepo Pedru na apostolo winangowo adatawira kuti: “Tin’funika kubvera Mulungu ninga mtongi sikuti wanthu. 30 Mulungu wa abereki wathu, adalamusa Jezu, omwe imwepo mudamupha mwa kumukhomerera pa muti. 31 Mulungu adalemekeza umweyu mwa kumuikha ku boko lace lamadidi. Iye adamusankhula kuti apulumuse wanthu na kuwapasa moyo.* Mulungu adacita bzimwebzi kuti wanthu wa mu Jirayeri akungule, acilekereredwa pikado zawo. 32 Ifepano ndife mboni za bzinthu bzimwebzi ndipo mzimu wakucena omwe Mulungu adaupereka kwa wale omwe ambamubvera ninga mtongi, ni mbonimbo.”

33 Pomwe iwo adabva bzimwebzi, adakalipa kwene-kwene ndipo adafuna kuwapha. 34 Tsono Mfarizeu munango wakucemeredwa Gamaliyeli, adaima mu Sinedriyomo. Iye akhali mpfunzisi wa lamulo wakugopedwa na wanthu azinji, ndipo iye adatonga kuti apostolowo abakacosedwe panja. 35 Patsogolo pace iye adati: “Imwe amuna wakulemekezeka wa mu Jirayeri, samalani na bzomwe mukufuna kuwacitira amunawa. 36 Mwa ciratizo, m’mbuyomu mukhana munthu munango wakucemeredwa Teuda, omwe akhambabziti ni munthu wakufunika ndipo amuna pafupi-fupi 400 adaphatana naye. Tsono wanthu adamupha ndipo wentse wale omwe akhamutewera, adabalalisidwa ndipo bzidandomalambo tenepo. 37 Patsogolo pace, kudabwerambo Djuda wa ku Galileya mu ntsiku za kanembera ndipo wanthu azinji akhamutewera. Mwamuna umweyu adadzafambo ndipo wentse omwe akhamutewera adabalalika. 38 Ndipopa thangwe ra bzimwebzi ndikukuuzani kuti lekani kuwacita cinthu ciri-centse wanthuwa ndipo alekeni ayende. Pakuti penu bzomwe akupfunzisabzi ayai basa lomwe akucitali ndakucokera kwa wanthu, bziniyenda lini patali. 39 Tsono penu ndakucokera kwa Mulungu, imwepo mun’kwanisa lini kuwaletsa, ndipo pinango imwepo mungakhale mukulimbana na Mulungu caiyeyo.” 40 Na bzimwebzi, iwo adabvera mafalaya ndipo adacemeresa apostolowo aciwapfumbula ndipo adawauza kuti aleke kulewalewa pomwe m’dzina la Jezu. Na tenepo adawasiya aciyenda.

41 Tenepo iwo adacoka mu Sinedriyomo wakukondwa kwene-kwene thangwe adakhala na mwayi wakunyozedwa thangwe ra dzina la Jezu. 42 Ndipo ntsiku na ntsiku, iwo akhapitiriza kupfunzisa mwakusaya kulekeza na kupalizira mafala yabwino yakulewa bza Kristu Jezu mu templo na nyumba na nyumba.

6 Mu ntsiku zimwezire, pomwe anyakupfunza akhayenda acithumizirika, Adjuda omwe akhalewalewa Cigerego adayamba kudandaula bza Adjuda omwe akhalewalewa Cihebereu, thangwe amamsiwa wawo akhasiyidwa ku mbali pa nthawe yakugawa cakudya. 2 Tenepo, apostolo 12 wale, adacemera anyakupfunza wentse aciwauza kuti: “Bziri lini bwino kulekeza kupfunzisa mafala ya Mulungu, kuti tikagawire cakudya. 3 Na tenepo abale, sankhulani pakati panu amuna wakukwana 7, wa mbiri yabwino, wakudzala na mzimu na nzeru ndipo ifepano tin’dzawauza kuti acite basa lakufunikali. 4 Ndipo ifepano tin’dzapitiriza kupemba na kucita utumiki bwakubverana na kupfunzisa fala la Mulungu.” 5 Bzomwe iwo adalewabzo bzidadekera anyakupfunza wentsewo. Tenepo, iwo adasankhula Sitefano, mwamuna wakudzala na cikhulupiro na mzimu wakucena. Ndipo adasankhulambo Filipi, Purokoro, Nikanori, Timoni, Parimena na Nikolau nyakutendeuka wa ku Antiyokiya. 6 Tenepo iwo adawabweresa kwa apostolo, ndipo pomwe adamala kupemba, apostolowo adaikha manja yawo pa iwo.

7 Na tenepo, mafala ya Mulungu yadapitiriza kumwazika ndipo mbogo ya anyakupfunza idapitiriza kuthumizirika kwene-kwene mu Jeruzalemu ndipo thimu likulu la antsembe lidabvera licikhulupira.

8 Sitefano akhafunidwa na Mulungu ndipo Mulunguyo adamupasa mphanvu. Iye akhacita bzakudabwisa bza mphanvu pabodzi na bzizindikiro pakati pa wanthu. 9 Tsono amuna winango, wa m’thimu lakucemeredwa Sinagoga ya Anyakutsudzulidwa* pabodzi na wanthu winango wa ku Sirene, ku Alexandriya, ku Silisiya na ku Aziya, adabwera kuti adzanesane na Sitefano. 10 Tsono iwo alibe kukwanisa kumukunda thangwe ra nzeru zomwe akhanazo, pabodzi na mzimu wakucena omwe ukhamutsogolera pakulewalewa. 11 Patsogolo pace, iwo mwakabise-bise adapumpswa amuna winango kuti alewe kuti: “Ifepano tidamubva umweyu akulewalewa bzinthu bzakunyoza Mozeji na Mulungu.” 12 Iwo adacitisa wanthu, akulu na anembi kuti akalipe. Ndipo, mwakusaya kucedwa, iwo adafika pomwe pakhana iyepo, tenepo adamuphata, aciyenda naye ku Sinedriyo. 13 Ndipo iwo adalewa umboni bwakunama kuti: “Munthu umweyu, akusiya lini kulewa kuipa bza templo ya Mulungu na Lamulo. 14 Mwa ciratizo, ifepano tidamubva umweyu akulewa kuti Jezu wa ku Nazareti, an’dzapfudza mbutoyi, acicinja miyambo yomwe Mozeji adatisiyira.”

15 Ndipo wentse omwe akhadakhala mu Sinedriyomo adamunyang’anisisa, ndipo iwo adawona kuti nkhope yace ikhawoneka ninga nkhope ya anjo.

7 Tsono mkulu wa antsembe adabvunza kuti: “Kodi bzimwebzi mpsacadidi?” 2 Sitefano adatawira kuti: “Amunamwe, abalemwe, tetekerani. Mulungu wa ulemerero adawonekera kwa kholo lathu lakale Abalahamu, pomwe akhali ku Mezopotamiya, anati kuyenda kukakhala ku Harani, 3 ndipo iye adamuuza kuti: ‘Siya dziko lako na azibale wako ndipo ndoko ku dziko lomwe inepano nin’dzakulatiza.’ 4 Tenepo iye adacoka m’dziko la Kalideu, aciyenda kukakhala ku Harani. Ndipo pomwe pai wace adafa kumweko, Mulungu adamucitisa kufulukira mu dziko limweri lomwe imwepo mukukhala tsapanoli. 5 Ndipo iye alibe kumupasa utaka buli-bwentse m’dzikomo, ne mbuto kuti aikhe minyendo yace, tsono iye adalewa kuti angadamupasa dzikoli ninga utaka bwace pabodzi na wana* wace, napo kuti pa nthaweyo akhanati kukhala na mwana. 6 Kuthumizira bzimwebzi, Mulungu adamuuza kuti wana* wace angadadzakhala alendo mu dziko la anikaciro, nakuti wanthu angadadzacita nawo bzinthu ninga akapolo aciwaboneresa kwa magole 400. 7 Ndipo Mulungu adati: ‘Nin’dzapasa mulandu mtundu wa wanthu omwe iwo an’dzautumikira ninga akapolo ndipo patsogolo pace, iwo an’dzacoka m’dzikolo kuti adzandinamate pa mbuto ino.’

8 “Mulungu adacitambo mpangano na Abalahamu, wakuti iye pabodzi na wana wace wentse acitidwe mgwatidwe,* tenepo pa ntsiku yaci 8 pomwe mwana wace Izaki adabadwa adamugwata. Djakobo akhali mwana wa Izaki ndipo Djakoboyo adadzakhala pai wa makolo yathu 12. 9 Ndipo abale wace wa Zuze adakhala na ntcanje, acimugulisa ku Edjipito. Tsono Mulungu akhanaye, 10 ndipo Mulunguyo adamupulumusa ku mabvuto yace yentse, acimucitisa kukhala wakufunika na wanzeru pamaso pa Farawo mambo* wa Edjipito. Ndipo iye adamusankhula kuti atonge dziko lentse la Edjipito na kunyang’anira nyumba yentse ya Farawo. 11 Tsono kudagwa njala mu dziko lentse la Edjipito na ku Kanani, inde cikhali citsautso cikulu ndipo makolo yathu yakhakwanisa lini kugumana cakudya. 12 Tsono Djakobo adabva kuti ku Edjipito kukhana cakudya cizinji kwene-kwene, tenepo iye adatumiza makolo yathu yakale pa ulendo bwakuyamba. 13 Pa ulendo bwaciwiri, Zuze adabzidziwikisa kwa abale wace ndipo abale wacewo adadziwikambo kwa Farawo. 14 Tenepo Zuze adacemeresa pai wace Djakobo pabodzi na abale wace wentse kuti abwere ku Edjipito ndipo wentse akhalipo wanthu 75. 15 Tenepo Djakobo adayenda ku Edjipito ndipo patsogolo pace adadzafera kumweko ndipo makolo yathu yakale yadaferambo kumweko. 16 Ndipo mafupa yawo yadatengedwa yaciyendesedwa ku Sekemu, yacikaikhidwa ku thenje lomwe Abalahamu akhadagula kwa wana wa Hamori ku Sekemuko na kobiri za prata.*

17 “Pomwe nthawe ikhafendera kuti bzikwanisike bzomwe Mulungu akhadauza Abalahamu, mtundu wa Ajirayeri ukhayenda ucikula ndipo ukhathumizirika mu Edjipito, 18 mpaka pa nthawe yomwe mu Edjipito mudayamba kutongedwa na mambo munango, omwe alibe kumudziwa Zuze. 19 Mambo umweyu mwakucenjera adaphatisa basa udindo bwace kuti azunze mtundu wathu, ndipo adakakamiza makolo yathu yakale kutaya matcece yawo kuti yaleke kukhala na moyo. 20 Pa nthawe imweyo, Mozeji adabadwa. Iye akhali wakudeka* ndipo adaleredwa na abereki wace kwa minyezi mitatu. 21 Tsono pomwe Mozejiyo adasiyidwa yekha, mwana wacikazi wa Farawo adamutenga acikamulera ninga mwana wace caiye. 22 Tenepo, Mozeji adapfunzisidwa mapfunziro ya padzulu yomwe yakhalipo mu Edjipito, kulewa cadidi iye akhali wamphanvu pa bzicito na m’mafala.

23 “Pomwe Mozeji adapfitsa magole 40, iye adakumbuka bza kuyenda kukawona* abale wace omwe akhali wana wa Jirayeri. 24 Pomwe iye adawona Mdjipito munango akuboneresa m’bodzi mwa abale wacewo, iye adakhotcerera m’bale waceyo ndipo adapha Mdjipitoyo. 25 Iye akhakumbuka kuti abale wacewo angadazindikira kuti Mulungu an’funa kuwapulumusa mwakuphatisa basa iye, tsono abale wacewo akhawona lini tenepo. 26 Mangwana yace, iye adayenda komwe kukhana abale waceko ndipo adawagumana akumenyana, ndipo pakufuna kuwaletsetsa iye adawauza kuti: ‘Amunamwe, imwepo ndimwe ubale bwanu, thangwe ranyi mukuboneresana?’ 27 Tsono ule omwe akhaboneresa mwanzaceyo, adamungwinya acilewa kuti: ‘Mbani wakuikha kuti ukhale mtsogoleri na mtongi pakati pathu? 28 Kodi iwepo un’funa kundipha ninga momwe udaphera Mdjipito ule dzulo?’ 29 Pomwe Mozeji adabva bzimwebzi, iye adathawa ku Edjipito aciyenda kukakhala ku Midiyani, ndipo kumweko iye adadzalowola acibereka wana awiri.

30 “Pomwe padapita magole 40, anjo m’bodzi adawonekera kwa iye m’dambo lomwe likhali pafupi na Phiri la Sinai, pa moto omwe ukhagaka pa citsongodza ca minga. 31 Pomwe Mozeji adawona bzimwebzi, iye adadabwa kwene-kwene. Tsono pomwe akhafendera pafupi kuti awonesese iye adabva fala la Yahova kuti: 32 ‘Inepano ndine Mulungu wa Makolo yanu yakale, Mulungu wa Abalahamu, wa Izaki na wa Djakobo.’ Tenepo, Mozeji adatetemera ndipo alibe kukhwimika kunyang’anisisa pomwe. 33 Ndipo Yahova adamuuza kuti: ‘Cosa xango ku nzayo zako, pakuti mbuto yomwe iwepo udaimayo ni mbuto yakucena. 34 Kulewa cadidi ndawona kubonera kwa wanthu wangu omwe ali ku Edjipito, ndabva kulira kwawo ndipo ndabuluka kuti ndiwapulumuse. Tsapano bvaya, inepano ninkutuma kuti uyende ku Edjipito.’ 35 Mozeji umweyu omwe iwo adamulamba acilewa kuti: ‘Mbani wakuikha kuti ukhale mtsogoleri na mtongi?’ Ndiye omwe Mulungu adamutuma ninga mtongi na mpulumusi mwakuphatisa basa anjo omwe adawonekera pa citsongodza caminga. 36 Mwamuna umweyu adawatsogolera pakucoka ku Edjipito, adacita bzizindikiro na bzakudabwisa ku Edjipitoko ndipo adacitambo bzakudabwisabzo pa nyanza ifuira na mu dambo kwa magole 40.

37 “Mozeji umweyu adauza wana wa Ajirayeri kuti: ‘Mulungu an’dzakusankhulirani pakati pa abale wanu mpolofeta wakundendemerana na inepano.’ 38 Iye ndiye omwe akhana Ajirayeri m’dambo na anjo omwe adalewalewa na iye pabodzi na makolo yathu yakale mu Phiri la Sinai, iye adatambira mafala yakupambulika na ya mphanvu kuti atipase ifepano. 39 Makolo yathu yakale yadalamba kumubvera, ndipo mitima yawo idabwerera ku Edjipito. 40 Ndipo adauza Aroni kuti: ‘Tikonzere Mulungu kuti atitsogolere, pakuti tikudziwa lini bzomwe bzacitika na Mozeji omwe adatitsogolera pakucoka ku Edjipito.’ 41 Na tenepo, mu ntsiku zimwezire, iwo adakonza cifanikiso ca mwana wa ng’ombe, acibweresa ntsembe pa cifanikisoco ndipo adayamba kukondwa na mabasa ya manja yawo. 42 Ndipopa Mulungu adawasiya, aciwalekerera kuti anamate dzuwa, mwezi na nyenyezi zakudzulu, ninga momwe bzidanembedwera m’bukhu la apolofeta kuti: ‘Imwe dzinza la Jirayeri, kodi ntsembe zomwe mukhapereka m’dambo kwa magole 40, mukhazipereka kwa ine? 43 Ne. Tsono imwepo mukhanyamula tendi la mulungu Moloke na nyenyezi ya mulungu Refani, bzifanikiso bzomwe imwepo mudabzikonza kuti mumbabzinamate. Ndipopa inepano ndin’dzakuyendesani kutali, kupitirira ku Babiloniya.

44 “Mu dambo, makolo yathu yakale yakhana tendi la umboni lomwe lidakonzedwa na Mozeji mwakuteweza malango ya Mulungu, mwakubverana na ciratizo comwe iye adalatizidwa. 45 Patsogolo pace, wana wa makolo yathu yakaleyo adalitenga tendiro pomwe akhali pabodzi na Djoswe acilibweresa m’dziko lacirendo, lomwe Mulungu adathamangisa wanthuwo pamaso pa makolo yathu yakaleyo. Tendiro lidapitiriza kukhala pano mpaka m’ntsiku za Davide. 46 Davideyo adafunidwa na Mulungu ndipo iye adakumbira kuti amange nyumba ya Mulungu wa Djakobo. 47 Tsono Salomau ndiye omwe adadzam’mangira nyumbayo. 48 Tsono napo bziri tenepo, Mulungu Mkululetu ambakhala lini m’nyumba zakukonzedwa na manja ya wanthu, ninga momwe mpolofeta adalewera kuti: 49 ‘Yahova walewa kuti: Kudzulu ni mpando wangu wa umambo ndipo dziko la pantsi ni cakupondera nzayo zangu. Kodi ni nyumba ya mtundu wanyi yomwe mun’dzandimangira? Ayai iripo mbuto iri-yentse yomwe inepano ningakhale? 50 Kodi ni boko lini langu lomwe lidakonza bzinthu bzentsenebzi?’

51 “Imwe wanthu wa makanimwe, ndimwe wakuuma mitima na wakusaya kubva. Nthawe zentse mumbatsutsa mzimu wakucena ninga momwe adacitira makolo yanu yakale, imwepo mukucitambo bzibodzi-bodzi. 52 Kodi ni mpolofeta uponi omwe alibe kuzunzidwa na makolo yanu yakale? Iwo adapha wale omwe akhadziwisiratu bza kubwera kwa munthu wakulungama. Iye ndiye ule omwe imwepo mudam’pereka, mucimupha. 53 Mulungu mwakuphatisa basa anjo adakupasani Lamulo, tsono imwepo mulibe kuliphatisisa.”

54 Pomwe adabva bzimwebzi, iwo adabva ciya mu mtima mwawo, aciyamba kukeketa mano thangwe ra iye. 55 Tsono iye mwakudzazidwa na mzimu wakucena, adanyang’anisa kudzulu ndipo adawona ulemerero bwa Mulungu na bwa Jezu omwe akhadaima ku boko lamadidi la Mulungu, 56 ndipo iye adati: “Onani ndikuwona kudzulu kudafunguka ndipo Mwana wa munthu adaima ku boko lamadidi la Mulungu.” 57 Na bzimwebzi iwo adakuwa na mphanvu zawo zentse ndipo adafunga makutu na manja yawo ndipo wentse pabodzi adayenderatu pana iyepo. 58 Pomwe adamucosa mu mzindamo, adayamba kumuboma na minyala ndipo mboni zomwe zidamunamizira, zidasiya bzakubvala bzace m’minyendo mwa tswaka linango lakucemeredwa Saulo. 59 Pomwe Sitefano akhabomedwa na minyala, iye adakumbira Jezu kuti: “Mbuya Jezu, tambirani moyo* wangu.” 60 Na tenepo, pomwe iye adagodama, adakuwa na mphanvu kuti: “Yahova, lekani kuwapasa mulandu thangwe ra pikadoyi.” Pomwe adalewa bzimwebzi iye adafa.

8 Saulo adabvumambo kuti Sitefano aphedwe.

Pa ntsiku imweyo, gwere lomwe likhali mu Jeruzalemu lidayamba kuzunzidwa kwene-kwene ndipo wentse adabalalikira m’bzigawo bza Djudeya na Samariya, kupambula apostolo okha. 2 Tsono amuna winango wakugopa Mulungu, adatenga Sitefano, aciyenda kukamupendesa m’thenje ndipo adamulira kwene-kwene. 3 Ndipo Saulo adayamba kuboneresa kwene-kwene gwere. Iye akhapita nyumba na nyumba, ndipo akhapfuwira panja amuna na akazi, acimbayenda kukawafungira m’kawoko.

4 Na tenepo, wanthu omwe adabalalisidwawo akhambayenda acipalizira mafala yabwino ya Mulungu, m’mbuto zomwe akhathawirazo. 5 Ndipo Filipi adapolikira mu mzinda* wa Samariya, aciyamba kupalizira wanthu wa kumweko bza Kristu. 6 Thimu la wanthu likhatetekera na mtima wentse bzomwe Filipi akhalewa. Iwo akhabvesera ndipo akhawona bzizindikiro bzomwe iye akhacita. 7 Pakuti azinji akhana mizimu yakuipa,* tenepo mizimu yakuipayo ikhakuwa icicoka. Kuthumizira bzimwebzi, azinji omwe akhadadjedjera bziwalo na anyakupunduka adapozedwa. 8 Na tenepo, wanthu wa mu mzindamo adakondwa kwene-kwene.

9 Ndipo mu mzindamo mukhana munthu munango dzina lace Simau omwe pakuyamba akhacita bzinthu bza matsenga, ndipo akhadabwisa kwene-kwene wanthu wa ku Samariya, acimbabzilewa yekha kuti akhali munthu wakufunika kwene-kwene. 10 Wanthu wentse, kuyambira wana mpaka akulu akhamubvesera acimbalewa kuti: “Mwamuna umweyu ni Mphanvu ya Mulungu, yakucemeredwa Mphanvu Ikulu.” 11 Wanthuwo akhambamubvesera thangwe iye akhawadabwisa kuyambira kale-kale na bzamatsenga bzacebzo. 12 Tsono pomwe Filipi adapalizira mafala yabwino ya Umambo bwa Mulungu na ya dzina la Jezu Kristu, iwo adakhulupira ndipo adabatizidwa amuna na akazi. 13 Napo Simau caiyeyo adakhulupira acibatizidwa ndipo adapitiriza kukhala na Filipiyo. Iye akhadabwa pakuwona bzizindikiro na mabasa yamphanvu yomwe yakhacitikayo.

14 Pomwe apostolo ku Jeruzalemu adabva kuti wanthu wa ku Samariya abvuma mafala ya Mulungu, iwo adatuma Pedru na Juwau kuti ayende kumweko. 15 Tenepo iwo adayendadi, acikapempherera wanthu wa ku Samariyawo kuti atambire mzimu wakucena. 16 Tsono palibe ne m’bodzi wa iwo omwe akhadatambira kale mzimu wakucenayo, koma iwo akhadandobatizidwa kokha mu dzina la Mbuya Jezu. 17 Na tenepo, apostolowo adaikha manja yawo pa wanthuwo, ndipo iwo adayamba kutambira mzimu wakucena.

18 Pomwe Simau adawona kuti mzimu wakucena ukuperekedwa thangwe ra kuikha manja komwe apostolo akhacita, iye adawapasa kobiri, 19 ndipo adalewa kuti: “Ndipasenimbo mphanvu imweyi, kuti munthu ali-wentse omwe inepano nin’muikha manja yangu, atambirembo mzimu wakucena.” 20 Tsono Pedru adamutawira kuti: “Kobiri yakoyo ipfudzidwe pabodzi na iwepo, thangwe ukukumbuka kuti na kobiri ungakwanise kugula mphaso yafovolo yomwe Mulungu adatipasa. 21 Palibe cinthu ciri-centse comwe un’cita pa utumikibu, thangwe mtima wako ngwakusaya kulungama pamaso pa Mulungu. 22 Tenepo kungula makumbukidwe yako yakuipaya ndipo upembe kwa Yahova mwakumudandaulira, kuti penu mpsakukwanisika, akulekerere makumbukidwe yakuipa ya mu mtima mwakoyo. 23 Pakuti iwepo ndiwe veneno* yakuwawa ndipo udadzala na kusaya cirungamo.” 24 Simau adawatawira kuti: “Ndikumbirireni kwa Yahova, kuti bzinthu bzomwe mwalewabzi bzireke kundicitikira.”

25 Tenepo, pomwe adamala kucitira umboni mwakukwanira na kulewa bza mafala ya Yahova, iwo adabwerera ku Jeruzalemu ndipo akhayenda acipalizira mafala yabwino ku midzi mizinji ya ku Samariyako.

26 Ndipo anjo wa Yahova adalewalewa na Filipi kuti: “Lamuka, ndoko ku suli,* ku mseu wakucokera ku Jeruzalemu omwe umbayenda mpaka ku Gaza.” (Umweyu ni mseu wa m’dambo) 27 Pomwe Filipi adabva bzimwebzi, adalamuka aciyenda ndipo adawona mwamuna munango* wa ku Etiyopiya, omwe akhali nyabasa mkulu wa mu utongi bwa Kandasi, mambo wacikazi* wa ku Etiyopiya. Iye akhanyang’anira cuma centse ca mamboyo. Mwamunayu akhadayenda ku Jeruzalemu kuti akanamate. 28 Iye akhadakhala m’ngolo mwace pakubwerera ku Jeruzalemuko ndipo akhawerenga mwakukuwa bukhu la mpolofeta Zaiya. 29 Tenepo, mzimu wakucena udauza Filipi kuti: “Ndoko, ndipo fendera pafupi na ngoloyo.” 30 Filipi adathamanga m’mbali mwa ngoloyo ndipo adamubva iye akuwerenga mwakukuwa bukhu la mpolofeta Zaiya, acimubvunza kuti: “Kodi imwepo mukubvesesa bzomwe mukuwerengabzo?” 31 Munthuyo adatawira kuti: “Kodi ningabvesese tani bzimwebzi pakasaya kuwoneka munthu wakuti andifotokozere?” Munthuyo adakumbira Filipi kuti apakire m’ngolomo, acikhala naye pabodzi. 32 Mbali ya m’Bzinembo yomwe munthuyo akhawerenga mwakukuwayo ikhalewa kuti: “Iye adatengedwa aciyenda kukaphedwa ninga bira, ndipo ninga mwana wa bira omwe wandokhala zii pomwe akusengedwa maukuse, mwakuti alibe kufungula mulomo wace. 33 Pa nthawe yomwe akhacitiridwa bzinthu bzakupasa manyazi, iye alibe kutongedwa mwa cirungamo. Kodi mbani omwe an’dzalewa bza m’badwo wace? Thangwe moyo wace un’dzapfudzidwa pa dziko la pantsi.”

34 Patsogolo pace, mwamunayo adabvunza Filipi kuti: “Ndaphata minyendo, ndiuzeni, kodi mpolofetayu akulewa bza yani? Kodi akubzilewa yekha ayai akulewa bza munthu munango?” 35 Filipi adayamba kulewalewa ndipo adayambiratu na cinembo cibodzi-bodzici. Iye adamuuza munthuyo mafala yabwino yakulewa bza Jezu. 36 Pomwe akhafamba mu msewumo, adafika pa mbuto inango pomwe pakhana madzi ndipo mwamunayo adalewa kuti: “Onani madziya! Kodi n’ciyani comwe cingandiletse kubatizidwa?” 37 —— 38 Tenepo, iye adaimisa ngoloyo ndipo wentse awiri, Filipi pabodzi na mwamunayo adabuluka, aciyenda pomwe pakhana madzipo ndipo iye adamubatiza. 39 Pomwe adacoka m’madzimo, mzimu wa Yahova, mwakusaya kucedwa udatsogolera Filipi kuti acoke pa mbutopo, ndipo mwamunayo alibe kumuwona pomwe Filipiyo, koma iye adapitiriza kuyenda acimbakondwa kwene-kwene. 40 Filipi adayenda ku Asidode ndipo adapitiriza kupalizira mafala yabwino m’mizinda yentse mpaka kukafika ku Sezareya.

9 Tsono Saulo akhadatsimikiza kuboneresa anyakupfunza wa Mbuya na kuwapha. Tenepo iye adayenda kwa mkulu wa antsembe, 2 ndipo adakamukumbira matsamba yakuyenda m’nyumba zakunamatira* za ku Damasko, na cakulinga cakuti akakagumana ali-wentse omwe akutewera Njirayo, amuna napo akazi, akawamange aciyenda nawo ku Jeruzalemu.

3 Pomwe iye akhali pa ulendo bwacebo ndipo akhadasala pang’ono kufika ku Damasko, mwadzidzidzi padawoneka ceza cakucokera kudzulu comwe cidamubvunika, 4 ndipo iye adagwa pantsi acibva mafala yakumuuza kuti: “Saulo, Saulo, thangwe ranyi iwepo ukundizunza?” 5 Saulo adabvunza kuti: “Ndimwe yani Mbuya?” Iye adamutawira kuti: “Ndine Jezu, ule omwe iwepo ukumuzunza. 6 Tsono lamuka, kapite mu mzindamo ndipo kumweko ninkakuuza bzomwe ukacite.” 7 Amuna omwe akhanaye pabodzi pa ulendobo adandoima acikhala zii ndipo adasaya cakulewa, thangwe iwo akhabva mafala koma akhawona lini munthu ali-wentse. 8 Saulo adalamuka pantsipo, ndipo napo kuti iye akhadapenya iye akhawona lini cinthu. Tenepo iwo adamuphata boko aciyenda naye mpaka mu mzinda wa Damasko. 9 Saulo adamala ntsiku zitatu akuwona lini cinthu ndipo alibe kudya ne kumwa ciri-centse.

10 Ku Damasko kukhana nyakupfunza munango wakucemeredwa Ananiya, ndipo Mbuya adamuuza m’masomphenya kuti: “Ananiya!” Iye adatawira kuti: “Ndine Mbuya.” 11 Mbuyayo adamuuza kuti: “Lamuka ndipo ndoko ku mseu wakucemeredwa mseu Wakuthamuka, ndipo ukakafika pa mui pa Djuda, ukabvunze bza munthu wakucemeredwa Saulo wa ku Tarso ndipo nthawe ino iye akupemba. 12 Ndipo m’masomphenya iye wawona mwamuna munango wakucemeredwa Ananiya, omwe apita aciikha manja yace pa iye kuti ayambe pomwe kuwona.” 13 Tsono Ananiya adatawira kuti: “Mbuya, inepano ndabva bzinthu bzizinji pakulewa bza munthu umweyu, ndabva bzentse bzomwe iye wacitira anyakucena wanu mu Jeruzalemu. 14 Ndipo kuno iye wabvumizidwa na akulu wa antsembe kuti amange wentse omwe an’cemera dzina lanu.” 15 Tsono Mbuya adati: “Ndoko, thangwe munthu umweyu ni combo cangu cakusankhulidwa kuti cinyamule dzina langu kuyendesa kwa wanthu wa mitundu, amambo na kwa wana wa Jirayeri. 16 Thangwe ine nin’dzamulatiza padeca bzinthu bzentse bzomwe iye an’dzabonera nabzo thangwe ra dzina langu.”

17 Na tenepo, Ananiya adayenda acikapita m’nyumbamo, ndipo adaikha manja yace pa iye acilewa kuti: “Saulo m’bale wangu, Mbuya Jezu omwe wawonekera kwa iwepo mu mseu omwe ukhabwera naye, wandituma kuti iwepo uyambe pomwe kuwona nakuti udzazidwe na mzimu wakucena.” 18 Pa nthawe imweyoletu tudagwa tubzinthu m’maso mwace twakuwoneka ninga mabade ya ntsomba ndipo iye adayamba pomwe kuwona. Na tenepo iye adamuka aciyenda kabatizidwa. 19 Ndipo iye adadya cakudya acikhala pomwe na mphanvu.

Iye adapitiriza kukhala ku Damaskoko pabodzi na anyakupfunza mu ntsiku zakucepa, 20 ndipo mwakusaya kucedwa, iye adayamba kupalizira bza Jezu m’nyumba zakunamatira,* kuti Jezuyo ni Mwana wa Mulungu. 21 Tsono wentse omwe akhamubvawo akhadabwa kwene-kwene ndipo akhambalewa kuti: “Kodi ngumweyu lini omwe akhaboneresa kwene-kwene wanthu omwe akhacemera dzina limweri ku Jeruzalemu? Kodi iye alibe kubwera kuno na cakulinga cakuti adzawamange aciyenda nawo kwa akulu-akulu wa antsembe?” 22 Tsono Saulo akhapalizira mwakuphata mtima kwene-kwene ndipo Adjuda omwe akhakhala ku Damasko akhadabwa naye kwene-kwene, thangwe iye akhapereka umboni bwakubveka bwino bwakuti Jezu ni Kristu.

23 Tenepo, pomwe padapita ntsiku zizinji Adjudawo adapangana kuti amuphe. 24 Na tenepo Saulo adazindikira bzinthu bzakuipa bzomwe iwo akhafuna kumucitira, ndipo iwo akhambalindira mwatceru misuwo ya mu mzindamo usiku na masikati kuti amuphe. 25 Na tenepo anyakupfunza wace adamutenga usiku acimuikha m’dengu, ndipo adamubulisa na pa mubo omwe ukhali pa mpanda wa mu mzindayo.

26 Pomwe adafika ku Jeruzalemu, iye adayeza kuphatana na anyakupfunza winangowo, tsono wentse akhana mantha na iye thangwe iwo akhakhulupira lini kuti iye akhadakhalambo nyakupfunza. 27 Tsono Barnaba adabwera kudzamuthandiza ndipo adamutenga aciyenda naye kwa apostoloko, iye adawauza bzentse bzomwe bzikhadacitika pa mseu pale nakuti Mbuyayo akhadalewalewa naye. Iye adalewambo kuti Sauloyo adalewalewambo mwakukhwimika mu dzina la Jezu pomwe akhali ku Damasko. 28 Na bzimwebzi, Sauloyo adapitiriza kukhala nawo pabodzi ndipo akhafamba mwakutsudzuka* mu Jeruzalemu acimbalewalewa mwakukhwimika mu dzina la Mbuya. 29 Iye akhalewalewa acimbagazana na Adjuda omwe akhalewalewa Cigerego, tsono Adjudawo akhanyang’ana mpata wakuti amuphe. 30 Pomwe abalewo adazindikira bzimwebzi, iwo adayenda naye ku Sezareya ndipo kumweko adakamutumiza ku Tarso.

31 Tenepo mu Djudeya mwentse, mu Galileya na mu Samariya, gwere lidakhala pa mtendere ndipo likhalimba. Pakuti iwo akhalatiza kuti akhagopa Yahova, ndipo akhakhala na moyo mwakubverana na mtsangalazo omwe mzimu wakucena ukhawapasa, gwere lidapitiriza kukula.

32 Pakuti Pedru akhafamba mu bzigawo bzentse, iye adayenda kukazungira anyakucena omwe akhakhala ku Lida. 33 Ndipo kumweko iye adagumana mwamuna munango dzina lace Eneya, omwe akhadamala magole 8 adagona pa kama thangwe akhana matenda yakufa bziwalo. 34 Pedru adauza munthuyo kuti: “Eneya, Jezu Kristu akukupoza. Lamuka, ndipo longedza kama yako.” Tenepo iye adamuka pa nthawe ibodzi-bodziyo, aciyenda. 35 Pomwe wanthu wentse omwe akhakhala ku Lida na ku Cigwa ca Saroni adawona bzimwebzi, iwo adakhulupira Mbuya.

36 Ku Jope kukhana nyakupfunza m’bodzi dzina lace Tabita, mu Cigerego dzinali limbathandauza Dorka.* Iye akhacita mabasa mazinji yabwino, ndipo akhathandiza anyakusauka. 37 Tsono mu ntsiku zimwezire iye adaduwala acifa. Na tenepo iwo adamutenga acikamuikha m’cipinda ca nyumba ya padzulu. 38 Pakuti mzinda wa Jope ukhali pafupi na mzinda wa Lida, pomwe apostolo adabva kuti Pedru akhali ku mzinda wa Lidayo, iwo adatuma amuna awiri kuti akamudandaulire kuti: “Taphata minyendo, bwerani kuno mwakamfulumize.” 39 Na tenepo Pedru adakonzeka aciyenda nawo. Pomwe adafika, iwo adamutenga aciyenda naye m’cipinda ca m’nyumba ya padzulu; ndipo akazi mamsiwa wentse adabwera pomwe pakhana iyepo akulira, acimbamulatiza bzakubvala* bzomwe Dorka adawakonzera pomwe akhana moyo. 40 Pedru adauza wentse kuti acoke ndipo adagodama acipemba. Patsogolo pace iye adazungunuka ndipo adanyang’anisa nyakufayo acilewa kuti: “Tabita, muka!” Iye adafungula maso yace ndipo pomwe adawona Pedru, adamuka acikhala. 41 Pedru adaphata boko lace acimulamusa, ndipo adacemera anyakucena na akazi mamsiwa. Ndipo wentsenewo adawona kuti Tabita akhana moyo. 42 Bzimwebzi bzidadziwika mu Jope mwentse, ndipo wanthu azinji adakhulupira Mbuya. 43 Iye adapitiriza kukhala ku Jope kwa kanthawe ndipo akhakhala na munthu wakufukuta makhanda, wakucemeredwa Simau.

10 Ku Sezareya kukhana mwamuna munango wakucemeredwa Korneliyo omwe akhali mkulu wa anyankhondo* mu thimu lakucemeredwa anyankhondo wa ku Italiya.* 2 Iye akhali munthu wakubzipereka na wakugopa Mulungu pabodzi na wanthu wentse wa m’banja mwace, iye akhambapasa bzinthu bzabwino wanthu wakusauka, ndipo nthawe zentse akhambacita mipembo yakudandaulira Mulungu. 3 Pafupi-fupi nthawe zitatu zakumaulo* iye adawona anjo wa Mulungu akubwera kuna iye m’masomphenya ndipo anjoyo adati: “Korneliyo!” 4 Tenepo Korneliyo adamunyang’anisisa ndipo na mantha adatawira kuti: “Ndikukubvani Mbuya.” Tsono anjoyo adati: “Mipembo yako Mulungu waibva ndipo akomedwa nayo. Iye wawonambo thandizo lomwe iwepo ukhapereka kwa wanthu wakusauka. 5 Tenepo, tumiza amuna kuti ayende ku Jope kuti akatenge munthu munango dzina lace Simau, omwe ambadziwikambo na dzina lakuti Pedru. 6 Munthu umweyu wafikira kumui kwa Simau omwe ni nyakufukuta makhanda ndipo nyumba yace iri m’mphepete mwa nyanza.” 7 Pomwe anjo omwe akhalewalewa naye ule adayenda, iye adacemera anyabasa wace awiri ndipo adacemerambo mcikunda m’bodzi pakati pa atumiki wace omwe akhagopa Mulungu, 8 ndipo iye adawafotokozera bzentse, aciwatumiza ku Jope.

9 Mangwana yace pomwe iwo akhapitiriza ulendo bwawo, ndipo akhadasala pang’ono kufika mu mzinda, Pedru adakwira padzaulu pa nyumba* kuti akapembe, pa nthawe ya 12 za kumasikati.* 10 Tsono Pedru adabva njala ndipo akhafuna kudya. Tenepo, pomwe cakudya cikhakonzedwa, Pedru adawona masomphenya. 11 Iye adawona kudzulu kudafunguka, ndipo cinthu cikulu cakuwoneka ninga cinguwo cakuphatidwa maponta manai cikhapolika kubwera pa dziko la pantsi; 12 ndipo mu cinguwomo mukhana bzirombo bza mtundu uli-wentse, bza minyendo minai, bzakukwawa na mbalame zakudzulu. 13 Tenepo kudabveka fala lakumuuza kuti: “Pedru, lamuka, phaya udye!” 14 Tsono Pedru adatawira kuti: “Ne Mbuya, thangwe ndikanati kudya cinthu cakuipisidwa na cakupswipa.” 15 Ndipo falalo lidalewa pomwe kaciwiri kwa iye kuti: “Leka kulewa pomwe kuti mpsakuipisidwa, bzinthu bzomwe Mulungu wabzicenesa.” 16 Bzimwebzi bzidacitika pomwe kacitatu ndipo pa nthawe ibodzi-bodziyo cinguwo cire cidabwerera kudzulu.

17 Pedru akhadabwa ndipo akhabzibvunza kuti bzomwe akhadawonabzo bzikhathandauza ciyani. Pomwe bzimwebzi bzikhacitika, amuna omwe adatumidwa na Korneliyowo akhabvunza kumui kwa Simau ndipo akhadaima pa msuwo. 18 Iwo adacemera munthu pamuipo acibvunza penu pakhana mulendo wakucemeredwa Simau omwe akhadziwikambo na dzina lakuti Pedru. 19 Pomwe Pedru akhapitiriza kukumbukira bza masomphenya yale, mzimu wa Mulungu udalewa kuti: “Ona! Pana amuna atatu omwe akukunyang’ana. 20 Tenepo, buluka uyende nawo pabodzi mwakusaya kuzeza, thangwe ndine omwe ndawatuma.” 21 Pedruyo adabuluka ndipo adayenda kukagumana na wanthuwo acilewa kuti: “Ndiri pano ine, omwe mukhanyang’ana ule ndine. Kodi ningakuthandizeni tani?” 22 Iwo adamutawira kuti: “Korneliyo, omwe ni mkulu wa anyankhondo, munthu wakulungama na wakugopa Mulungu omwe Adjuda azinji ambamulewa kuti ni munthu wabwino, watambira malango ya Mulungu mwakuphatisa basa anjo wakucena, kuti akucemereni imwepo kuti muyende kumui kwace kuti akabve bzomwe imwepo mun’kalewa.” 23 Tenepo, Pedru adawatambira ninga alendo wace.

Mangwana yace, adayenda nawo pabodzi, ndipo abale winango wa ku Jope adawaperekeza. 24 Pomwe idapita ntsiku ibodzi iye adakafika ku Sezareya. Korneliyo akhadikhiriradi na mtima wentse, ndipo iye akhadatsonkhanisa abale wace pabodzi na axamwali wace wa pa mtima. 25 Pomwe Pedru adafika pamuipo, Korneliyo adayenda kukagumana naye ndipo adagodama acimulemekeza.* 26 Tsono Pedru adamulamusa aciti: “Lamuka; ndine munthumbo ninga iwepo.” 27 Pomwe Pedru akhaceza na Korneliyo, Pedruyo adapita m’nyumba aciwona wanthu azinji omwe akhadatsonkhana. 28 Tenepo iye adati: “Imwepo mukudziwa bwino kuti mpsakuletsedwa Adjuda kumbabverana ayai kuceza na wanthu wa mtundu unango. Tsono Mulungu adandilatiza kuti nin’funika lini kulewa munthu ali-wentse kuti ngwakuipisidwa ayai wakupswipa. 29 Ndipopa pomwe ndacemeredwa, ndabwera mwakusaya kupenukira. Tsono nin’funa ndidziwe thangwe ranyi mwandicemera.”

30 Korneliyo adati: “Papita ntsiku zinai m’mbuyomu pomwe inepano ndikhapemba m’nyumba mwangu pa nthawe ibodzi-bodziyi, zomwe ni nthawe zitatu zakumaulo. Mwadzidzidzi kutsogolo kwangu kudabwera mwamuna munango omwe akhana bzakubvala bzakuyetima, 31 ndipo iye adati: ‘Korneliyo, mipembo yako Mulungu waibva ndipo wakomedwa nayo, iye wawonambo thandizo lomwe iwepo ukhapereka kwa wanthu wakusauka. 32 Tenepo, tumizani amuna kuti ayende ku Jope, kuti akatenge munthu munango dzina lace Simau omwe ambadziwikambo na dzina lakuti Pedru. Munthu umweyo, wafikira kumui kwa Simau omwe ni nyakufukuta makhanda, ndipo nyumba yace iri m’phepete mwa nyanza.’ 33 Tenepo mwakusaya kucedwa ndakucemeresani ndipo imwepo mwalatiza kudeka mtima kukulu mwa kubwera kuno. Ndipopa tentse tiri pamaso pa Mulungu kuti tibve bzinthu bzentse bzomwe Yahova wakutumani kuti mudzatiuze.”

34 Na bzimwebzi, Pedru adayamba kulewalewa aciti: “Tsapano ndazindikira kuti Mulungu alibe tsankhulo, 35 iye ambatambira munthu wa mtundu uli-wentse omwe ambamugopa na kucita cirungamo. 36 Iye watumiza fala lace kwa wana wa Jirayeri kuti awauze mafala yabwino ya mtendere mwakuphatisa basa Jezu Kristu, omwe ni Mbuya wa wentse. 37 Imwepo mukudziwa kuti pambuyo pa Juwau kupalizira bza ubatizo bwace, nkhani imweyi ikhalewedwa kuyambira ku Galileya mpaka ku Djudeya kwentse: 38 Ndikulewa bza Jezu wa ku Nazareti, omwe Mulungu adamudzoza na mzimu wakucena acimupasa mphanvu, iye adafamba m’bzigawo bzentse acimbacita bzinthu bzabwino na kupoza wanthu omwe akhaboneresedwa na Dyabu ndipo akhacita bzimwebzi thangwe Mulungu akhanaye. 39 Ndipo ifepano ndife mboni za bzinthu bzentse bzomwe iye adacita mu dziko la Adjuda na mu Jeruzalemu; tsono iwo adamupha acimukhomerera pa muti. 40 Ndipo Mulungu adamulamusa pa ntsiku yacitatu kuti wanthu amuwone, 41 sikuti kwa wanthu wentse, koma kwa mboni zomwe zidasankhulidwiratu na Mulungu, ndipo mboni zimwezi ndifepano omwe tidadya na kumwa naye pabodzi pomwe adalamusidwa kwa anyakufa. 42 Ndipo iye adatonga kuti tipalizire wanthu na kucitira umboni bwakukwanira bwakuti iye adasankhulidwa na Mulungu kuti akhale mtongi wa wanthu wamoyo na wakufa. 43 Apolofeta wentse adatsimikiza kuti munthu ali-wentse omwe an’khulupira iye, pikado zace zentse zin’lekereredwa mu dzina lace.”

44 Pomwe Pedru akhalewalewa bza bzinthu bzimwebzi, mzimu wakucena udabwera kwa wentse omwe akhabva mafalaya. 45 Ndipo anyakukhulupirika omwe akhadacitidwa mgwatidwe* omwe akhadabwera pabodzi na Pedruyo adadabwa kwene-kwene, thangwe mphaso yafovolo ya mzimu wakucena idatsanulidwambo kwa wanthu wa mitundu inango. 46 Pakuti iwo adawabva akulewalewa m’bzirewedwe bzakusiyana-siyana acimbatumbiza Mulungu. Na tenepo Pedru adawauza kuti: 47 “Wanthu amwewa atambirambo mzimu wakucena ninga ifepano, kodi alipo munthu omwe angawaletse kuti aleke kubatizidwa na madzi?” 48 Tenepo, iwo adatonga kuti wanthuwo abatizidwe mu dzina la Jezu Kristu. Ndipo adakumbira kuti akhale nawo pabodzi tuntsiku tung’ono-ng’ono.

11 Tsapano apostolo pabodzi na abale omwe akhali ku Djudeya, adabva kuti wanthu wa mitundu inango, akhadabvumambo mafala ya Mulungu. 2 Tsono pomwe Pedru adayenda ku Jeruzalemu, wanthu omwe akhambalimbikisa mgwatidwe* adayamba kumunesa,* 3 ndipo akhalewa kuti: “Iwepo wapita m’nyumba za wanthu wakusaya kucita mgwatidwe* ndipo wadya nawo pabodzi.” 4 Na tenepo, Pedru adayamba kuwafotokozera bwino-bwino bzomwe bzikhadacitikabzo kuti:

5 “Inepano ndikhali mu mzinda wa Jope ndipo pomwe ndikhapemba ndidawona masomphenya. Ndipo m’masomphenyamo, ndidawona cinthu cakundendemerana na cinguwo cikulu comwe cikhabuluka kucokera kudzulu. Ico cikhadaphatidwa m’maponta manai, ndipo cidabwera pafupi na inepano. 6 Pomwe ndidanyang’anisisa m’cinguwomo, ndidawona bzirombo bza minyendo minai bza pa dziko la pantsi, bzirombo bzakuthengo, bzakukwawa na mbalame zakudzulu. 7 Ndipo ndidabva pomwe fala lakundiuza kuti: ‘Pedru, lamuka, phaya udye!’ 8 Tsono inepano ndidatawira kuti: ‘Ningacite lini bzimwebzo Mbuya thangwe pamulomo pangu pakanati kupita cinthu cakuipisidwa ayai cakupswipa.’ 9 Fala lakucokera kudzulu lire lidanditawira kaciwiri kuti: ‘Leka kulewa pomwe kuti mpsakuipisidwa, bzinthu bzomwe Mulungu wabzicenesa.’ 10 Pomwe falalo lidabveka pomwe kacitatu, bzentsenebzo bzidabwerera kudzulu. 11 Kuthumizira bzimwebzi, pa nthawe ibodzi-bodziyo, amuna atatu omwe akhadatumidwa kucokera ku Sezareya akhandinyang’ana ndipo adafika pamui pomwe ndikhalipo. 12 Tenepo mzimu wa Mulungu udandiuza kuti ndiyende nawo pabodzi mwakusaya kuzeza. Ndipo abale 6 awa adayenda pabodzi na inepano ndipo tidakapita m’nyumba mwa Korneliyo.

13 “Iye adatifotokozera kuti adawona anjo omwe akhadaima pa nyumba yace, ndipo anjoyo adati: ‘Tumani wanthu kuti ayende ku Jope kuti akacemere Simau wakudziwikambo na dzina lakuti Pedru, 14 iye an’dzakuuza bzinthu bzomwe bzingadzapulumuse iwepo na wanthu wa pamui pako.’ 15 Tsono pomwe ndidandoyamba kulewalewa, iwo adatambira mzimu wakucena ninga momwe bzidacitikirambo ifepano pakuyamba. 16 Na bzimwebzi, inepano ndidakumbukira mafala yomwe Mbuya akhambalewa kuti: ‘Juwau adabatiza wanthu na madzi, tsono imwepo mun’dzabatizidwa na mzimu wakucena.’ 17 Na Tenepo, penu Mbuya adawapasa mphaso ibodzi-bodzi na yomwe adapasa ifepano omwe timbakhulupira Mbuya Jezu Kristu, kodi ndine yanimbo ine kuti ndimuletse Mulungu?”

18 Pomwe iwo adabva bzinthu bzimwebzi alibe kumunesa* pomwe, ndipo adayamba kutumbiza Mulungu acilewa kuti: “Tsapano Mulungu wapereka mwayi kwa wanthu wa mitundu yentse kuti akungule acidzagumana moyo.”

19 Wanthu wentse omwe akhadabalalika na cizunzo comwe cikhadayamba thangwe ra Sitefano, adayenda mpaka ku Fenisiya, ku Xipre na ku Antiyokiya, tsono iwo akhapalizira Adjuda okha. 20 Tenepo, amuna winango pakati pawo omwe akhali wa ku Xipre na ku Sirene, adabwera ku Antiyokiya ndipo adayamba kulewalewa kwa wanthu omwe ambalewalewa Cigerego mwa kuwapalizira mafala yabwino, yakulewa bza Mbuya Jezu. 21 Kuthumizira bzimwebzi, Yahova akhawathandiza ndipo wanthu azinji adacinja acikhulupira Mbuya.

22 Mbiri yawo idabveka ku gwere la ku Jeruzalemu, ndipo iwo adatuma Barnaba kuti ayende ku Antiyokiya. 23 Pomwe iye adafika, adawona kudeka mtima kukulu kwa Mulungu, ndipo iye adakondwa aciyamba kulimbikisa wentse kuti apitirize kubvera Mbuya na mtima wentse. 24 Thangwe iye akhali munthu wabwino na wakudzala na mzimu wakucena na wacikhulupiro. Ndipo wanthu azinji akhakhulupira Mbuya. 25 Tenepo iwo adayenda ku Tarso kuti akanyang’ane Saulo. 26 Pomwe adamugumana, adamubweresa ku Antiyokiya. Na tenepo, iwo adamala gole libodzi akutsonkhana mu gwere la kumweko acimbapfunzisa thimu likulu la wanthu. Ndipo ku Antiyokiyako ndiko komwe anyakupfunza adayamba kucemeredwa kuti Akristau mwakutsogoleredwa na Mulungu.

27 Mu ntsiku zimwezire, apolofeta winango adacoka ku Jeruzalemu acipolikira ku Antiyokiya. 28 M’bodzi wa apolofetawo dzina lace Agabo, mwakutsogoleredwa na mzimu wakucena iye adaleweratu bzomwe bzingadacitika kutsogolo, kuti kungadadzakhala na njala pa dziko lentse la pantsi, ndipo bzimwebzi bzidadzacitikadi pa nthawe ya Klaudiyo. 29 Na tenepo, anyakupfunzawo adabverana kuti ali-wentse, acose bzomwe angadakwanisa kuti atumize thandizolo kwa abale wa ku Djudeya; 30 iwo adatumiza thandizolo kwa akulu, mwakuphatisa basa Barnaba na Saulo.

12 Pa nthawe imweyire, mambo* Herode adayamba kuboneresa wanthu winango wa m’gwere. 2 Iye adatonga kuti Tiyago m’bale wace wa Juwau, aphedwe na xipada. 3 Pomwe adawona kuti bzimwebzi bzikhadekera Adjuda, iye adatonga kuti Pedru amangidwembo. (Bzimwebzi bzidacitika pa nthawe ya Phwando la Pau Zakusaya Cakufufumisa.) 4 Iye adam’manga acimuikha m’kawoko. Ndipo pakhana mathimu manai ya acikunda omwe akhambamunyang’anira mwakupinzirana. Thimu liri-lentse, likhana acikunda anai. Ndipo Herode akhafuna kuti adzamuwonese kwa wanthu Paskwa ikadzamala. 5 Tenepo Pedru adapitiriza kukhala m’kawokomo, tsono gwere likhamupempherera kwa Mulungu, usiku na masikati.

6 Tsapano, usiku bomwe mangwana yace Herode angadatenga Pedru kuti akamuwonese kwa wanthu, Pedruyo akhagona, ndipo akhadamangidwa na makorenti mawiri, pakati pa acikunda awiri. Pa msuwo wakupitira m’kawokomo, pakhana acikunda awiri omwe akhanyang’anira kawokoyo. 7 Mwadzidzidzi, anjo wa Yahova adabwera m’kawokomo, ndipo ceza cidabvunika mkati mwentsenemo. Anjoyo adakhuya Pedru m’mbabvu ndipo iye adamuka, patsogolo pace anjoyo adamuuza kuti: “Lamuka, fulumiza.” Na tenepo, makorenti yomwe akhadam’manga nayoyo, yadagwa pantsi. 8 Anjoyo adamuuza kuti: “Konzeka ndipo bvala xango zako.” Pedruyo adacitadi bzimwebzo. Pakumalizira anjoyo adati: “Bvala cakubvala cako cakunja ndipo unditewere.” 9 Tenepo iye adacoka acimutewera, tsono akhadziwa lini kuti bzomwe bzikhacitika na anjo bzire bzikhali bzacadidi. Kulewa cadidi, iye akhawona ninga kuti akulota. 10 Adapitirira thimu lakuyamba la acikunda na thimu laciwiri, acifika pa msuwo wa simbi wakupitira mu mzinda ndipo msuwoyo udafunguka okha. Pomwe adacokapo, adafamba mu mseu pabodzi ndipo mwadzidzidzi, anjo ule adacoka acimusiya yekha. 11 Tenepo, pomwe Pedru adazindikira bzinthu bzomwe bzikhamucitikirabzo, iye adalewa kuti: “Tsapano, ndazindikira kuti Yahova watumiza anjo wace kuti adzandipulumuse m’manja mwa Herode ndipo wandipulumusambo ku bzinthu bzentse bzomwe Adjuda akhadikhirira kuti bzingadandicitikira.”

12 Pomwe iye adadziwa bzimwebzi, adayenda kumui kwa Mariya mai wace wa Juwau omwe akhadziwikambo na dzina lakuti Marko komwe wanthu azinji akhadatsonkhana kumweko acimbapemba. 13 Pomwe iye adagogodza msuwo ukulu wa kunja, mtumiki m’bodzi wacikazi wakucemeredwa Roda, adayenda kukawona kuti ni mbani omwe akhagogodza msuwoyo. 14 Pomwe adazindikira mafala ya Pedru, iye adakondwa kwene-kwene, mwakuti alibe kufungula msuwo ndipo adathamanga mkati acikauza wanthu kuti Pedru ali pa msuwo. 15 Iwo adamuuza kuti: “Iwepo ukupenga kani!” Tsono iye adapitiriza kulewa na mtima wentse kuti Pedru akhali pa msuwo. Ndipo iwo adayamba kulewa kuti: “Penu n’tenepo, ni anjo umweyo.” 16 Tsono Pedru adapitiriza basi kugogodza msuwoyo. Pomwe iwo adafungula, adamuwona ndipo adadabwa kwene-kwene. 17 Na tenepo, iye adacita cizindikiro na manja yace kuti iwo anyamale. Ndipo adawafotokozera bwino-bwino momwe Yahova adamucosera m’kawoko, aciwauza kuti: “Kamuuzeni Tiyago bzinthu bzimwebzi pabodzi na abale winango.” Na tenepo, iye adacoka aciyenda ku mbuto inango.

18 Pomwe kudacena, padawoneka phiringu pakati pa acikunda, thangwe iwo akhadziwa lini komwe Pedru akhadayenda. 19 Herode adanyang’ana Pedru kwentse-kwentse, tsono pakuti alibe kumugumana, adabvunza acikundawo mibvunzo mizinji ndipo adatonga kuti iwo apasidwe nyathwa. Patsogolo pace Herode adayenda ku Djudeya mpaka ku Sezareya ndipo adakhala kumweko tuntsiku tung’ono-ng’ono.

20 Tsapano iye akhadakalipa kwene-kwene na wanthu wa ku Tiro na wa ku Sidoni. Na tenepo, wanthu wa kumweko adayenda kuna iye na cakulinga cibodzi. Pomwe adamala kulewalewa na Balasto omwe akhanyang’anira nyumba ya mambo, iwo adalewalewambo na mambo Herode kuti akhazikise mtendere pakati pawo, thangwe cakudya cawo akhacigula mu dziko lomwe likhatongedwa na mambo Herode. 21 Ntsiku inango, Herode adabvala bzakubvala bza umambo ndipo adakhala pa mpando wace wa umambo aciyamba kulewalewa pamaso pa wanthu wentse. 22 Tenepo, wanthu omwe akhadatsonkhana pamwepowo adayamba kukuwa acimbati: “Yamweya ni mafala ya Mulungu, sikuti ya munthu.” 23 Pa nthawe ibodzi-bodziyo, anjo wa Yahova adacitisa kuti iye aduwale thangwe alibe kupereka ulemerero kwa Mulungu ndipo iye adafa mwakucita kudyedwa na nkhonye.

24 Tsono mafala ya Yahova yakhayenda yacimwazika, ndipo wanthu azinji akhayakhulupira.

25 Pomwe Barnaba na Saulo adamaliza basa lawo lakupereka thandizo ku Jeruzalemu, iwo adabwerera ku Antiyokiya ndipo adatenga Juwau omwe akhadziwikambo na dzina lakuti Marko.

13 Ku gwere la ku Antiyokiya, kukhana apolofeta na apfunzisi awa: Barnaba, Sumeyoni omwe akhadziwikambo na dzina lakuti Nijeri, ndipo winango akhali Saulo, Lusiyo wa ku Sirene pabodzi na Manayeni omwe adapfunzisidwa na mambo* Herode. 2 Pomwe akhatumikira Yahova acimbabzimana kudya, mzimu wakucena udati: “Pa wanthu wentsenewa, mundipambulire Barnaba na Saulo kuti acite basa lomwe ndidawacemerera.” 3 Pomwe adamala kubzimana kudya acipemba, iwo adaikha manja yawo pa Saulo na Barnaba aciwasiya kuti ayende.

4 Tenepo mwa kutumizidwa na mzimu wakucena, amuna amwewa adayenda ku Seleusiya, patsogolo pace adacita ulendo bwa m’madzi aciyenda mpaka ku ntsuwa ya Xipre. 5 Pomwe adafika ku Salamina, iwo adayamba kupalizira mafala ya Mulungu m’nyumba zakunamatira za Adjuda* ndipo Juwau akhali pabodzi na iwo ninga mthandizi.

6 Pomwe adamala kupalizira ntsuwa yentse ya Xipre mpaka ku Pafo, adagumana na Mdjuda munango dzina lace Bari-Jezu, omwe akhacita bzamatsenga ndipo akhali mpolofeta wakunama. 7 Iye akhali pabodzi na mtongi wa cigawo Serjo Paulo, omwe akhali munthu wanzeru. Mtongiyu adacemera Barnaba na Saulo, thangwe akhafunisisa kubva mafala ya Mulungu. 8 Tsono Elima,* nyakucita bzamatsenga (komwe ni kasanduliziridwe ka dzina laceri) adayamba kugaza Barnaba na Saulo aciyeza kucitisa mtongi ule kuti aleke kukhulupira Mbuya. 9 Tsono Saulo, omwe ambacemeredwambo Paulo, pomwe adadzazidwa na mzimu wakucena, adamunyang’anisisa, 10 ndipo iye adati: “Iwe munthu wakudzala na cinyengo na uipi bwa mtundu uli-wentse, mwana wa Dyabu, nyamadulanthaka wa bzinthu bzentse bzomwe mpsakulungama, thangwe ranyi iwepo ukucinja bzipfunziso bzakulungama bza Yahova? 11 Bvaya, boko la Yahova liri pa iwepo ndipo iwepo un’khala zimola, ndipo uniwona lini ceza ca dzuwa kwa kanthawe. Pa nthawe ibodzi-bodziyo, pfulere* na mdima bzidamugwera ndipo iye adayamba kufamba uku na uku acimbayeza kunyang’ana munthu kuti amuphate boko. 12 Tenepo, pomwe mtongi wa cigawo ule adawona bzomwe bzidacitikabzo, iye adayamba kukhulupira thangwe adadabwa kwene-kwene na bzipfunziso bza Yahova.

13 Tsapano Paulo pabodzi na anzace, adacita ulendo bwa m’madzi kucokera ku Pafo ndipo adafika mu mzinda wa Perje m’cigawo ca Pamfiliya. Tsono Juwau adawasiya acibwerera ku Jeruzalemu. 14 Na tenepo, iwo adapitiriza ulendo bwawo kucokera ku Perje ndipo adafika ku Antiyokiya wa ku Pisidiya. Pa ntsiku ya Sabudu, iwo adapita m’nyumba yakunamatira acikhala pantsi. 15 Pomwe adamala kuwerenga Lamulo na bzakunemba bza apolofeta pamaso pa wanthu wentse, atsogoleri wa m’nyumba yakunamatirayo adauza Paulo na Barnaba kuti: “Amunamwe, abalemwe, penu muna mafala yali-yentse yakulimbikisa wanthu, yaleweni.” 16 Tenepo Paulo adaima ndipo adapereka cizindikiro na boko lace aciti:

“Imwe Ajirayeri na wanthu mwentse wakugopa Mulungumwe, tetekerani.” 17 Mulungu wa wanthuwa, Ajirayeri, adasankhula makolo yathu yakale, pomwe iwo akhakhala ku Edjipito ninga alendo, Iye adawathandiza ndipo adaphatisa basa mphanvu zace kuti awacose m’dziko limwero. 18 Iye adapirira nawo pafupi-fupi kwa magole 40 m’dambo. 19 Pomwe adapfudza mitundu 7 m’dziko la Kanani, Iye adawapasa dziko lawolo ninga utaka. 20 Bzentsenebzi bzidacitika pafupi-fupi magole 450.

“Patsogolo pace, adawapasa atongi mpaka kudzafika pa nthawe ya mpolofeta Samuyeri. 21 Tsono iwo adakumbira kutongedwa na mambo ndipo Mulungu adawapasa Sauli mwana wa Khisi omwe adacokera m’dzinza la Benjamini ndipo adatonga kwa magole 40. 22 Pomwe adamucosa, Iye adawasankhulira Davide kuti akhale mambo wawo omwe iye adamucitira umboni mwa kulewa kuti: ‘Ndagumana Davide mwana wa Jese, munthu omwe ambakondwesa mtima wangu; ndipo an’dzacita bzentse bzomwe inepano ndikufuna.’ 23 Mwakubverana na bzomwe iye akhadalewa kale kuti bzin’dzacitika, Mulungu adabweresera Ajirayeri mpulumusi, omwe ni Jezu, kucokera kwa wana* wa munthu umweyu. 24 Pomwe Jezuyo akhanati kufika, Juwau adapalizira pamaso pa Ajirayeri wentse bza ubatizo, ninga cizindikiro ca kukungula. 25 Tsono pomwe Juwau akhamaliza utumiki bwace, iye adati: ‘Kodi mukukumbuka kuti inepano ndine yani? Ndine lini ule omwe imwepo mukumudikhirira. Tsono onani, ule omwe akubwera kutsogolo kwangu, inepano ndine lini wakuthemera kutsudzula bzingwe bza xango zace.’

26 “Amunamwe, abalemwe, dzinza la Abalahamu na mwentse omwe mumbagopa Mulungu, mafala yacipulumusoya, yatumizidwa kwa ifepano. 27 Pakuti anyakukhala mu Jeruzalemu pabodzi na atsogoleri wawo, alibe kumuzindikira mpulumusi umweyo. Tsono pakucita bzinthu ninga atongi, adateweza mafala ya apolofeta, yomwe yambawerengedwa mwakukuwa m’ntsiku zentsene za Sabudu. 28 Napo alibe kugumana mulandu uli-wentse wa kumuphera, iwo adangingimiza Pirato kutonga kuti iye aphedwe. 29 Ndipo pomwe iwo adateweza bzinthu bzentse bzomwe bzidanembedwa pakulewa bza iye, adamucosa pa muti wakuzunzidwira acikam’pendesa mu thenje. 30 Tsono Mulungu adamulamusa kwa anyakufa. 31 Ndipo kwa ntsiku zizinji, iye adawonekera kwa wanthu omwe adacoka naye ku Galileya aciyenda ku Jeruzalemu. Iwo tsapano akupereka umboni kwa wanthu pakulewa bza iye.

32 “Na tenepo, ifepano tikupalizira kwa imwepo mafala yabwino pakulewa bza bzinthu bzomwe bzikhadalewedweratu kwa makolo yathu yakale. 33 Mulungu adacitisa kuti bzikwanisike kwa ifepano wana wace, mwa kulamusa Jezu, ninga momwe bzidanembedwera mu salimo laciwiri kuti: ‘Iwepo ndiwe mwana wangu ndipo lero, inepano ndakhala baba wako.’ 34 Pakuti Mulungu adamulamusa kwa anyakufa kuti aleke kukhala pomwe na thupi lakudzongeka. Na tenepo, iye adalewa kuti: ‘Inepano nin’dzakufuna na lufoyi lacadidi ninga momwe ndikhadauzira kale Davide.’ 35 Ndipopa salimo linango limbalewa kuti: ‘Imwepo mun’dzabvuma lini kuti thupi la mtumiki wanu wakukhulupirika libvunde.’ 36 Davide adacita bzomwe Mulungu akhafuna pa nthawe yentse yomwe iye akhana moyo. Iye adafa aciikhidwa m’thenje la makolo yace yakale ndipo thupi lace lidabvunda. 37 Tsono ule omwe adalamusidwa na Mulungu, thupi lace liribe kubvunda.

38 “Na tenepo abale, ndikukuuzani kuti thangwe ra infa ya munthu umweyu, Mulungu an’dzalekerera pikado zanu. 39 Kuthumizira bzimwebzi, wentse omwe ambakhulupira, ambawonedwa na Mulungu ninga wanthu wakulungama thangwe ra Jezu. Tsono Lamulo la Mozeji, lingadakwanisa lini kukucitisani kukhala wanthu wakulungama pa bzinthu bzentse. 40 Na tenepo, khalani tceru kuti bzinthu bzomwe bzidanembedwa na apolofeta bzileke kucitika na imwepo. Iwo adati: 41 ‘Imwe wanthu omwe mumbafuna kunyoza, onani basa lomwe inepano ndikucita mu ntsiku zanu. Basa lomwe ndikucitali, imwepo mun’dzalikhulupira lini napo aciwoneka munthu wakukufotokozerani bwino-bwino. Tsono imwepo mun’dzadabwa ndipo mun’dzawoneka lini pomwe.’”

42 Pomwe Paulo na Barnaba akhacoka, wanthu adawakumbira kuti adzawafotokozere pomwe nkhani zimwezi, pa ntsiku ya Sabudu yakutewera. 43 Pomwe mtsonkhanoyo udamala, Adjuda azinji na wanthu omwe akhadatendeukira kucidjuda, omwe akhanamata Mulungu, adatewera Paulo na Barnaba, ndipo pomwe akhalewalewa na wanthuwo, iwo adawalimbikisa kucita bzinthu bzomwe bzingawacitise kuti apitirize kufunidwa na Mulungu.

44 Pa ntsiku ya Sabudu yakutewera, pafupi-fupi wanthu wentse wa mu mzinda, adatsonkhana kuti atetekere mafala ya Yahova. 45 Pomwe Adjuda adawona thimu la wanthulo, iwo adacita ntcanje ndipo adayamba kugaza mwakunyoza bzomwe Paulo akhalewa. 46 Tsono Paulo na Barnaba mwakukhwimika, adawauza kuti: “Bzikhali bzakufunika kuti imwepo mukhale wakuyamba kuuzidwa mafala ya Mulungu. Pakuti mafalaya mwayalamba ndipo mukubzitonga mwekha kuti ndimwe lini wakuthemera kutambira moyo wakusaya kumala, ifepano tikuyenda kukapalizira mafala yamweya kwa wanthu wa mitundu inango. 47 Pakuti Yahova adatiuza mafala aya: ‘Ndakusankhulani kuti mukhale ceza kwa wanthu wa mitundu inango, kuti mupalizire bza cipulumuso pa dziko lentse la pantsi.’”*

48 Pomwe wanthu wa mitundu inangowo adabva bzimwebzi, iwo adakondwa kwene-kwene acitumbiza Yahova thangwe ra mafala yace. Ndipo wentse omwe akhana makumbukidwe yabwino yomwe yangadawathandiza kugumana moyo wakusaya kumala, adakhulupira. 49 Kuthumizira bzimwebzi, mafala ya Yahova yadapitiriza kumwazika m’dziko lentsero. 50 Tsono Adjuda, adapumpsa akazi omwe akhagopa Mulungu pabodzi na amuna omwe akhana maudindo mu mzindamo. Tenepo, wanthu amwewa adacitisa kuti Paulo na Barnaba ayambe kuzunzidwa acithothedwa mu mzindamo. 51 Iwo adakunkhumula pfumbi ku nzayo zawo* ndipo adayenda ku Ikoniyo. 52 Anyakupfunza adapitiriza kukhala na mzimu wakucena, ndipo mitima yawo ikhali yakukondwa kwene-kwene.

14 Pomwe Paulo na Barnaba akhali ku Ikoniyo, iwo adapita m’nyumba yakunamatira* ya Adjuda ndipo adalewalewa bwino kwene-kwene mwakuti thimu likulu la Adjuda na Agerego lidakhulupira. 2 Tsono Adjuda omwe alibe kukhulupira, adapumpsa wanthu wa mitundu inango kuti agaze Paulo na Barnaba. 3 Tenepo, iwo adamala nthawe ikulu akulewalewa mwakukhwimika, thangwe akhadapasidwa mphanvu na Yahova, ndipo iye adacitira umboni mafala yakupaliziridwa yakulewa bza kudeka mtima kwace kukulu, mwa kubvuma kuti bzizindikiro na bzakudabwisa bzicitike mwakuphatisa basa iwo. 4 Thangwe ra bzimwebzi, thimu la wanthu lidagawanika. Winango adakhala ku mbali ya Adjuda ndipo winango adakhala kumbali ya apostolo. 5 Na tenepo, wanthu wa mitundu inango na Adjuda pabodzi na atongi wawo, adabverana kuti abonerese na kuthusira minyala apostolowo. 6 Pomwe adadziwisidwa bzimwebzi, iwo adathawira m’mizinda ya Likaoniya, Listra na Derbe pabodzi na m’mizinda ya pafupi. 7 Kumweko iwo adapitiriza kupalizira mafala yabwino.

8 Ku Listra kukhana mwamuna munango wakupunduka minyendo. Iye adabadwa wakupunduka ndipo akhanati kale kufamba. 9 Mwamuna umweyu akhatetekera pomwe Paulo akhalewalewa. Na tenepo, Paulo adamunyang’anisisa ndipo adawona kuti iye akhana cikhulupiro cakuti angadapozedwa. 10 Ndipo mwakukuwa, adamuuza kuti: “Lamuka, ima na minyendo yako.” Mwamunayo adamoga, aciyamba kufamba. 11 Pomwe thimu la wanthu lidawona bzomwe Paulo adacitabzo, lidakuwa m’cirewedwe ca Cilikaoniya kuti: “Mirungu yakhala ninga wanthu ndipo yabwera kwa ife!” 12 Tenepo iwo adayamba kucemera Barnaba kuti Zeu tsono Paulo adamucemera kuti Herme, thangwe ndiye omwe akhatsogolera pakulewalewa. 13 Wantsembe wa mulungu Zeu, omwe templo yace ikhali pafupi na msuwo wakupitira mu mzinda, adabweresa ng’ombe na nkhata za maluwa pa misuwo yakupitira mu mzindamo. Iye pabodzi na thimu la wanthu, akhafuna kupereka ntsembe kuti anamate Paulo na Barnaba.

14 Tsono pomwe mpostolo Barnaba na mpostolo Paulo adabva bzimwebzi, iwo adang’amba bzakubvala bzawo bza kunja ndipo adathamanga acikapita pakati pa thimu la wanthulo acimbakuwa kuti: 15 “Wanthumwe, thangwe ranyi mukucita bzinthu bzimwebzi? Ifepano ndifembo wanthu ninga imwepo ndipo timbabonerambo. Ndipo tikupalizira mafala yabwinoya, kuti musiye bzinthu bzakusaya basa muciyamba kunamata Mulungu wamoyo omwe adalenga kudzulu, dziko la pantsi, nyanza na bzinthu bzentse bzomwe bziri m’mwemo. 16 M’mibadwo ya m’mbuyomu, iye adalekerera kuti mitundu yentse ya wanthu, imbacite bzomwe ikhafuna, 17 napo iye alibe kusiya kupereka umboni bwakuti alipo thangwe adacita bzinthu bzabwino kuna imwepo mwa kubvumbisa nvula kucokera kudzulu na kukupasani nthawe yakubvuna bzinthu bzizinji ndipo iye adakupasani bzakudya acidzaza mitima yanu na cikondweso.” 18 Tsono napo apostolowo adafotokoza bzinthu bzentsenebzi, iwo adaneseka kwene-kwene kuti aletse wanthuwo kupereka ntsembe kwa iwo.

19 Tsono adafika Adjuda wakucokera ku Antiyokiya na ku Ikoniyo ndipo adapumpsa thimu la wanthulo. Wanthuwo adayamba kuboma Paulo na minyala ndipo adamukwekwetera kunja kwa mzindayo, thangwe akhakumbuka kuti iye akhadafa. 20 Tenepo, pomwe anyakupfunza adabwera pakhana iyepo, iye adamuka ndipo adapita mu mzinda. Mangwana yace, iye pabodzi na Barnaba adayenda ku Derbe. 21 Pomwe adapalizira mafala yabwino ku mzinda umweyu na kuthandiza wanthu kuti akhale anyakupfunza, iwo adabwerera pomwe ku Listra, ku Ikoniyo na ku Antiyokiya. 22 M’mbuto zentsenezi, iwo adauza anyakupfunzawo kuti akhale wakukhwimika ndipo adawalimbikisa mwa kuwauza kuti apitirize kukhulupira mbuya, mwa kulewa kuti: “Tin’funika kupirira mabvuto mazinji, kuti tikapite mu Umambo bwa Mulungu.” 23 Na tenepo, iwo adaikha akulu mu gwere liri-lentse kuti athandize anyakupfunzawo. Iwo adawapempherera, ndipo adabzimana kudya aciwasiya akuluwo m’manja mwa Yahova, omwe iwo adamukhulupira.

24 Patsogolo pace, iwo adapita na ku Pisidiya ndipo adakafika ku Pamfiliya. 25 Pomwe adamala kupalizira mafala ya Mulungu ku Perje, iwo adayenda ku Ataliya. 26 Pakucokera kumweko, iwo adacita ulendo bwa m’madzi aciyenda ku Antiyokiya. Kumweko abale adawasiya kuti Mulungu awasamalire nakuti iye awalatize kudeka mtima kwace kukulu kuti akwanise kucita basa lomwe tsapano iwo akulimalizisa.

27 Pomwe iwo adafika ku Antiyokiya, adatsonkhanisa gwere lentse pabodzi ndipo adawafotokozera bzinthu bzizinji bzomwe Mulungu adacita mwakuphatisa basa iwo. Adawafotokozerambo momwe Mulungu adafungulira wanthu wa mitundu inango msuwo wa cikhulupiro. 28 Tenepo iwo adakhala nthawe itali pabodzi na anyakupfunzawo.

15 Tsapano amuna winango wakucokera ku Djudeya adayenda ku Antiyokiya ndipo kumweko adayamba kupfunzisa abale kuti: “Mukasaya kucitidwa mgwatidwe* mwakubverana na mwambo wa Mozeji, imwepo mungadzapulumusidwe lini.” 2 Tsono Paulo na Barnaba alibe kubverana nabzo ndipo adanesana nawo kwene-kwene, tenepo iwo adabverana kuti Paulo na Barnaba pabodzi na abale winango ayende ku Jeruzalemu kuti akacezerane bza nkhaniyi na apostolo pabodzi na akulu.

3 Pomwe adamala kuperekezedwa na abale wa m’gwere, iwo adapitiriza ulendo bwawo ndipo adapita na ku Fenisiya na ku Samariya. Kumweko adafotokoza bwino-bwino bza kutendeuka kwa wanthu wa mitundu inango, ndipo bzimwebzi bzidakondwesa kwene-kwene abale wentsewo. 4 Pomwe adafika ku Jeruzalemu, iwo adatambiridwa na manja mawiri na gwere, na apostolo pabodzi na akulu. Ndipo Paulo na Barnaba adawafotokozera bzinthu bzizinji bzomwe Mulungu adacita mwakuphatisa basa iwo. 5 Tsono anyakukhulupira winango omwe kale-kale akhali mu cipembedzo ca Afarizeu, adaima m’mipando mwawo acilewa kuti: “Mpsakufunika kuti anyakukhulupira wentse omwe ni Adjuda lini acitidwe mgwatidwe* aciuzidwa kuti ambabvere Lamulo la Mozeji.”

6 Tenepo apostolowo pabodzi na akulu adatsonkhana kuti acezerane bza nkhaniyi. 7 Pomwe adanesana kwene-kwene Pedru adaima ndipo adawauza kuti: “Amunamwe, abalemwe, imwepo mukudziwa bwino kuti kucokera mu ntsiku zakuyambirira, Mulungu adandisankhula pakati panu kuti kucokera pa mulomo pangu wanthu abve mafala yabwino acikhulupira. 8 Ndipo Mulungu omwe ambadziwa bza mu mtima, adacitira umboni wanthu amwewa mwa kuwapasa mzimu wakucena ninga momwe adacitira na ifepano. 9 Ndipo iye alibe kusiyanisa pakati pa ife na iwo, koma adacenesa mitima yawo thangwe ra cikhulupiro cawo. 10 Tsono thangwe ranyi imwepo mukuyeza Mulungu mwa kuikha m’khosi mwa anyakupfunza djoki lomwe makolo yathu yakale ne ife tiribe kukwanisa kulinyamula? 11 Mwa kusiyana na bzimwebzi, ifepano timbakhulupira kuti tin’dzapulumusidwa thangwe ra kudeka mtima kukulu kwa mbuya Jezu ndipo anyakupfunza omwe ni Adjuda lini iwo ambakhulupirambo bzibodzi-bodzibzi.”

12 Na bzimwebzi, thimu lentse la wanthuwo lidanyamala ndipo lidayamba kutetekera Barnaba na Paulo pomwe akhafotokoza bzizindikiro na bzakudabwisa bzizinji bzomwe Mulungu adacita pakati pa wanthu wa mitundu inango mwa kuphatisa basa iwo. 13 Pomwe iwo adamala kulewalewa, Tiyago adatawira acilewa kuti: “Amunamwe, abalemwe nditetekereni. 14 Sumeyoni adatiuza kuti Mulungu adabvumambo wanthu wa mitundu inango pa nthawe yakuyamba kuti kucokera mwa iwo, asankhulembo wanthu wakudziwika na dzina lace. 15 Ndipo bzimwebzi bzikubverana na mafala ya apolofeta yomwe yadanembedwa kuti: 16 Bzimwebzi bzikadzamala, nin’dzabwerera ndipo nin’dzamusa pomwe nyumba* ya Davide yomwe ikhadagwa. Ndipo nin’dzaimanga pomwe m’mbuto zomwe ikhadagumuka ndiciilimbisa, 17 kuti wanthu wakusalirawo apitirize kulinga Yahova na mtima wawo wentse pabodzi na wanthu wa mitundu yentse, wanthu omwe ambacemeredwa na dzina langu, walewa tenepoyo Yahova, ule omwe akucita bzinthu bzimwebzi, 18 bzomwe bzimbadziwika kuyambira kale-kale. 19 Na tenepo makumbukidwe yangu njakuti ndikufuna lini kuboneresa wanthu wa mitundu inango omwe abwera kwa Mulungu, 20 tsono tiwanembere kuti atcenkhe bzinthu bzakuipisidwa thangwe ra bzifanikiso, upombo ayai uputa,* bzirombo ayai bzifuwo bzakufa mwakucita kuponyongoledwa* pabodzi na kutcenkha mulopa. 21 Kuyambira kale-kale wanthu akupalizira m’mzinda na mzinda mafala yakucokera m’mabukhu ya Mozeji, thangwe mabukhu yamweya yambawerengedwa mwakukuwa m’nyumba zakunamatira* ntsiku zentsene za Sabudu.”

22 Patsogolo pace apostolo na akulu pabodzi na gwere lentse adabverana kuti atumize amuna wakusankhulidwa pakati pawo kuti ayende ku Antiyokiya pabodzi na Paulo na Barnaba. Iwo adatumiza Djuda omwe akhacemeredwambo Barsaba pabodzi na Sila ndipo amuna amwewa ndiwo omwe akhatsogolera pakati pa abale. 23 Iwo adanemba tsamba aciwapasa kuti ayende nalo, ndipo m’tsambamo adanemba kuti:

“Ifepano apostolo na akulu omwe ndife abale wanu, tikukunemberani imwepo abale omwe ndimwe lini Adjuda omwe mumbakhala ku Antiyokiya, ku Siriya na ku Silisiya kuti: Tambirani kulimba wathu! 24 Ifepano tabva kuti wanthu winango acoka pakati pathu ndipo akubwereserani mabvuto thangwe ra bzakulewalewa bzawo, ndipo iwo akuyeza kuviringiza makumbukidwe yanu napo kuti ife tiribe kuwapasa malango yali-yentse. 25 Pa thangwe limweri, tentse tabverana kuti tisankhule amuna kuti tikutumizireni imwepo pabodzi na anzathu wakufunidwa Barnaba na Paulo, 26 amuna omwe adapereka moyo wawo thangwe ra dzina la Mbuya wathu Jezu Kristu. 27 Tenepo tikutumiza Djuda na Sila kuti adzakufotokozereni bzinthu bzibodzi-bodzibzi na miromo yawo. 28 Pakuti mzimu wakucena pabodzi na ifepano, tawona kuti ni bwino kuti tileke kukusenzesani mtolo wakulemera kupambula bzinthu bzakufunika bzokha bzomwe ni ibzi: 29 kupitiriza kutcenkha bzinthu bzakuperekedwa ntsembe ku bzifanikiso, mulopa, bzirombo ayai bzifuwo bzakufa mwakucita kuponyongoledwa* na upombo ayai uputa.* Mukatcenkha bzinthu bzimwebzi mwakusamala, bzinthu bzin’dzakufambirani bwino. Tikukufunirani moyo wabwino!”

30 Pomwe iwo adacoka, adayenda ku Antiyokiya ndipo kumweko adatsonkhanisa anyakupfunza wentse pabodzi aciwapasa tsambalo. 31 Pomwe adawerenga tsambalo, iwo adakondwa kwene-kwene na mafala yakulimbikisayo. 32 Pakuti Djuda na Sila akhalimbo apolofeta, iwo adafotokoza nkhani zizinji zakulimbikisa abale. 33 Pomwe awiriwo adakhala kumweko ntsiku zing’ono-ng’ono, abale wa kumwekowo adagonekana nawo ndipo awiriwo adabwerera ku Jeruzalemu. 34 —— 35 Tsono Paulo na Barnaba pabodzi na abale winango azinji adapitiriza kukhala ku Antiyokiya acimbapfunzisa na kupalizira mafala yabwino ya Yahova.

36 Pomwe zidapita ntsiku zing’ono-ng’ono, Paulo adauza Barnaba kuti: “Mbatibwerere tsapano tikazungire abale ku mizinda yentse yomwe tidapalizira mafala yabwino ya Yahova, kuti tikawone momwe iwo aliri.” 37 Barnaba akhadatsimikiza kutenga Juwau, omwe ambacemeredwambo na dzina lakuti Marko, kuti ayende naye. 38 Tsono Paulo alibe kubverana nabzo bzakuti iwo ayende naye pabodzi, thangwe iye adawasiya ku Pamfiliya ndipo alibe kufuna kuyenda nawo pabodzi kuti akawathandize basa lakupalizira. 39 Na bzimwebzi iwo adakalipizana kwene-kwene* mwakuti adamwazana ndipo Barnaba adatenga Marko acicita ulendo bwa m’madzi mpaka ku Xipre. 40 Paulo adasankhula Sila ndipo pomwe abale adamala kupemba kuti Yahova amusamalire, iye adayenda. 41 Iye adapita na ku Siriya pabodzi na ku Silisiya acimbalimbikisa magwere.

16 Tenepo iye adafika ku Derbe na ku Listra. Kumweko kukhana nyakupfunza m’bodzi dzina lace Timotio, mai wace akhali Mdjuda ndipo akhali nyakupfunza, tsono pai wace akhali Mgerego. 2 Ndipo abale wa ku Listra na ku Ikoniyo akhalewa bzabwino pakulewa bza iye. 3 Paulo adafunisisa kutenga Timotio kuti afambe naye pabodzi, tenepo iye adamutenga acimucita mgwatidwe* thangwe ra Adjuda omwe akhali kumweko, pakuti wentse akhadziwa kuti pai wace akhali Mgerego. 4 Pomwe akhacita ulendo bwawobo m’mizindamo, iwo akhadziwisa abale na mpfumakazi bzomwe akulu pabodzi na apostolo ku Jeruzalemu akhadabverana kuti iwo ateweze malangoyo mwakuphatana. 5 Na tenepo, cikhulupiro ca magwereyo cikhalimbikisidwa ndipo wanthu omwe akhakhulupira m’magweremo akhayenda acithumizirika ntsiku na ntsiku.

6 Kuthumizira bzimwebzi, iwo adacita ulendo bwawo ndipo adayenda ku Frijiya na m’dziko la Galatiya thangwe mzimu wakucena ukhadawaletsa kupalizira Fala m’cigawo ca Aziya. 7 Pomwe adafika ku Misiya iwo adayeza kuyenda ku Bitiniya, tsono Jezu mwakuphatisa basa mzimu* alibe kuwabvumiza. 8 Na tenepo iwo adayenda ku Misiya acipolikira ku Trowa. 9 Ndipo usiku Paulo adawona masomphenya, ndipo m’masomphenyamo iye adawona mwamuna munango omwe akhadaima ndipo akhamukumbira kuti: “Bwerani ku Masedoniya kuno kuti mudzatithandize.” 10 Pomwe iye adandomala kuwona masomphenyayo, ifepano tidayenda ku Masedoniya thangwe tikhadatsimikiza kuti ni Mulungu omwe akhadaticemera kuti tikapalizire mafala yabwino kwa iwo.

11 Tenepo tidacita ulendo bwa m’madzi kucokera ku Trowa mpaka ku Samatrasiya tsono mangwana yace tidayenda ku Neyapolisi. 12 Pomwe tidacoka kumweko tidayenda ku Filipi, mzinda unango wa Roma* omwe ukhali mzinda wa cigawo ca Masedoniya. Tidakhala kumweko tuntsiku tung’ono-ng’ono. 13 Pa ntsiku ya Sabudu tidacoka na pa nsuwo wakupitira mu mzindamo, ndipo tidayenda m’mphepete mwa mkulo unango pakuti tikhakumbuka kuti tingadagumana mbuto yakucitira mpembo, ndipo kumweko tidakhala pantsi ticiyamba kulewalewa na akazi winango omwe akhadatsonkhana kumweko. 14 Pakhana mkazi munango wakucemeredwa Lidiya omwe akhagulisa nguwo zakuumira kwene-kwene mu mzinda wa Tiyatira ndipo iye akhanamata Mulungu, iye akhatetekera ndipo Yahova adafungula kwene-kwene mtima wace kuti ambatetekere mwatceru bzinthu bzomwe Paulo akhalewa. 15 Pomwe iye pabodzi na wanthu wa kumui kwace adabatizidwa, iye adatidandaulira kuti: “Penu mwandiwona kuti ndine wakukhulupirika kwa Yahova, bwerani mudzakhale kumui kwangu.” Iye adatingingimiza kuti tiyende kumui kwaceko.

16 Ntsiku inango pomwe tikhayenda ku mbuto yakucitira mpembo, adabwera nyabasa munango wacikazi omwe akhana mzimu wakuipa, ciwanda cakuvima bzakutsogolo. Iye akhacitisa kuti azimbuya* wace agumane phindu thangwe ra kuvima kwaceko. 17 Mtsikana umweyo akhambatitewera ifepano acimbakuwa kuti: “Amuna amwewa mbakapolo wa Mulungu Mkululetu ndipo akupalizira kwa imwepo bza njira yacipulumuso.” 18 Mtsikanayu akhambacita bzimwebzi ntsiku zizinji. Pakumalizira pace Paulo adaneta nabzo ndipo adazungunuka aciuza mzimuyo kuti: “Ndikukuuza iwepo m’dzina la Jezu Kristu kuti coka mwa mtsikanayu.” Ndipo nthawe imweyoletu mzimuyo udacoka.

19 Tsono azimbuya wace wale pomwe adawona kuti bzinthu bzomwe bzikhawabweresera phindu bzamala, iwo adaphata Paulo na Sila aciwakwekwetera ku msika komwe kukhana atsogoleri wawo. 20 Pomwe iwo adafika nawo kwa akulu-akulu wa boma, wanthuwo adalewa kuti: “Amuna amwewa akuyambisa phiringu mu mzinda mwathu muno. Amwewa ni Adjuda, 21 ndipo iwo akupfunzisa miyambo yomwe njakubvumizika lini kwathu kuno, thangwe ndife Aroma.” 22 Thimu lentse la wanthu lidalewalewa na ciya kwa Paulo na Sila, ndipo akulu-akulu wa boma adatonga kuti iwo akhundulidwe bzakubvala acipfumbulidwa na mitcamu. 23 Pomwe adamala kuwapfumbulako, adawafungira m’kawoko ndipo adauza nyakulindira m’kawokomo kuti awanyang’anire bwino kuti aleke kuthawa. 24 Pomwe alindiri wa m’kawokomo adauzidwa bzimwebzi, adawaikha m’kawoko ya mkati ndipo adamangirira minyendo yawo ku mtanda.*

25 Tsono pakati pa usiku, Paulo na Sila akhapemba ndipo akhatumbiza Mulungu mwa kuimba nyimbo ndipo wanthu winango omwe akhali m’kawokomo akhabvesera. 26 Mwadzidzidzi kudacitika citeketeke camphanvu ndipo kawokoyo idayamba kutekenyeka, pa nthawe imweyoletu misuwo yentse idafunguka ndipo makorenti yawo yentse yadatsudzuka. 27 Pomwe nyakunyang’anira m’kawoko ule adamuka ndipo adawona kuti misuwo ya m’kawokomo idafunguka, iye adasolola xipada yace kuti abziphe thangwe akhakumbuka kuti wanthu omwe akhali m’kawokomo athawa. 28 Tsono Paulo adakuwa kuti: “Leka kubzipha thangwe tentse tiripo!” 29 Tenepo iye adakumbira mbvuniko acithamangira m’katimo, ndipo adagodamira Paulo na Sila uko akutetemera na mantha. 30 Iye adayenda nawo panja aciti: “Amunamwe, kodi ningacite ciyani kuti ndidzapulumusidwe?” 31 Iwo adati: “Khulupira Mbuya Jezu ndipo un’dzapulumuka iwepo pabodzi na wanthu wa pamui pako.” 32 Tenepo iwo adalewa mafala ya Yahova kwa iye pabodzi na wanthu wentse wa pamui pace. 33 Pa nthawe ibodzi-bodziyo usikubo, iye adawatenga aciyenda nawo ku mbuto inango ndipo adakawatsuka bzironda bzawo. Tenepo iye pabodzi na wanthu wa pamui pace adabatizidwa mwakusaya kucedwa. 34 Iye adayenda nawo kumui kwace aciwaikhira cakudya pa meza, ndipo iye pabodzi na wanthu wentse wa pamui pace adakondwa kwene-kwene thangwe ra kukhulupira Mulungu.

35 Pomwe kudacena, akulu-akulu wa boma adatuma alindiri kuti akauze anyakunyang’anira m’kawoko kuti: “Tsudzulani amunawa.” 36 Nyakunyang’anira m’kawokoyo adafikisa mafalayo kwa Paulo kuti: “Akulu-akulu wa boma atumiza wanthu kudzalewa kuti imwepo awirimwe mutsudzulidwe. Tenepo bulani ndipo ndokoni mwa mtendere.” 37 Tsono Paulo adawatawira kuti: “Iwo atipfumbula pamaso pa wanthu uko tikhanati kutongedwa acitiikha m’kawoko, napo kuti ndife Aroma, tsapano akuticosa mwakabise-bise? Ne, abwere iwo adzaticose okha.” 38 Anyakunyang’anira m’kawoko adafikisa mafalayo kwa akulu-akulu wa bomawo. Na bzimwebzi akulu-akulu wa bomawo adabva mantha kwene-kwene pomwe adabva kuti iwo akhali Aroma. 39 Tenepo iwo adabwera aciwadandaulira kuti awalekerere ndipo adawaperekeza mpaka kunja aciwakumbira kuti acoke mu mzindamo. 40 Tsono pomwe Paulo na Sila adacoka m’kawokomo, iwo adayenda kumui kwa Lidiya ndipo pomwe adawona abale, iwo adawalimbikisa aciyenda.

17 Iwo adapita na ku Anfipoli na ku Apoloniya ndipo adafika ku Tesalonika, komwe kukhana nyumba yakunamatira ya Adjuda.* 2 Tenepo, ninga mwa cizolowezi cace Paulo adapita m’nyumba yakunamatiramo, ndipo mu ntsiku zitatu za Sabudu za midzinga yakutewerana iye adacezerana nawo mwakuphatisa basa Bzinembo. 3 Iye akhafotokoza na kulatiza umboni bwakucokera m’bzinembo pakuwatsimikizira kuti bzikhali bzakufunikira kuti Kristu abonere acilamusidwa kwa anyakufa. Iye akhalewa kuti: “Jezu ni Kristu omwe inepano ndikukufotokozeraniyu.” 4 Thangwe ra bzimwebzi, wanthu winango omwe akhali pamwepowo, adayamba kukhulupira ndipo adaphatana na Paulo na Sila. Ndipo thimu likulu la Agerego omwe akhanamata Mulungu adacitambo bzibodzi-bodzibzo, pabodzi na amuna na akazi azinji omwe akhali wanthu wakubvekera.

5 Tsono Adjuda adacita njiru ndipo adaphatana na wanthu winango wakuipa omwe akhandofamba-famba pa msika thangwe ra kusaya cakucita. Iwo adakhala thimu la ciwembo ndipo adayambisa phiringu mu mzindamo. Iwo adapita mwamphanvu m’nyumba mwa Jasoni pakunyang’ana Paulo na Sila kuti awacose panja aciwayendesa komwe kuna thimu la wanthuko. 6 Pomwe adawasaya, iwo adakwekweta Jasoni pabodzi na abale winango ndipo adayenda nawo kwa atsogoleri wa mu mzindamo acimbakuwa kuti: “Wanthu amwewa ni omwe akubweresa mabvuto pa dziko la pantsi komwe kuna wanthu, tsapano akugumanikambo kuno. 7 Ndipo Jasoni adatambira wanthu amwewa ninga alendo wace. Wanthu wentsenewa akucita bzinthu mwakupitana na malamulo ya Seza acimbalewa kuti pana mambo* munango omwe ni Jezu.” 8 Pomwe iwo adabva bzinthu bzimwebzi, thimu la wanthulo pabodzi na atongi wa mu mzindamo adakalipa. 9 Cakuyamba, atongi wa mu mzindamo adapagalisi Jasoni kobiri pabodzi na anzacewo, ndipo patsogolo pace adawaleka kuti ayende.

10 Mwakusaya kucedwa, pomwe kudadoka, abale adatumiza Paulo na Sila kuti ayende ku Bereya ndipo pomwe adafika kumweko iwo adapita m’nyumba yakunamatira ya Adjuda. 11 Wanthu wa ku Bereya akhana mtima wakufunisisa kupfunza kuposa wanthu wa ku Tesalonika wale, ndipo iwo adatambira mafala ya Mulungu na mtima wentse. Iwo ntsiku na ntsiku akhafufudza Bzinembo mwakusamala kwene-kwene kuti atsimikizire penu bzomwe akhadabvabzo bzikhalidi bzacadidi. 12 Tenepo, azinji wa iwo adakhala anyakukhulupira ndipo akazi azinji wa Cigerego omwe akhali wakubvekera pabodzi na amuna winango adakhulupirambo. 13 Tsono pomwe Adjuda wa ku Tesalonika adabva kuti Paulo akhapalizirambo mafala ya Mulungu ku Bereya, iwo adayenda kumweko kukanyosa wanthuwo kuti acite phiringu. 14 Na tenepo mwakusaya kucedwa, abale adatumiza Paulo kuti ayende ku nyanza, tsono Sila na Timotio adasala kumweko. 15 Wanthu omwe akhaperekeza Paulowo adayenda naye mpaka kukafika ku Atena, pomwe wanthuwo akhabwerera, Paulo adawauza kuti Sila na Timotio akufunika kuyenda kuna iye mwakamfulumize.

16 Tsapano pomwe Paulo akhawadikhirira ku Atena, iye adawawidwa kwene-kwene mu mtima pakuwona kuti mzinda wentseneyo ukhadadzala na bzifanikiso. 17 Tenepo iye adayamba kupfunzisa m’nyumba zakunamatira za Adjuda, na kupfunzisambo wanthu omwe akhanamata Mulungu, mwakuwathandiza kubvesesa bzinembo. Iye akhacita bzimwebzi ntsiku zentse kwa wanthu omwe akhawagumana mu msika. 18 Tsono adziwi winango wanzeru za Apikureu na Estoiko adayamba kunesana na Paulo. Ndipo winango akhalewa kuti: “Kodi munthu wa mbwambwayu akufuna kulewa ciyani?” Ndipo winango akhalewa kuti: “Iye akuwoneka ninga kuti ni mpalizi wa mirungu yacirendo.” Wanthuwo akhalewa bzimwebzi thangwe iye akhapalizira mafala yabwino yakulewa bza Jezu na kulamusidwa kwa anyakufa. 19 Na tenepo, iwo adamuphata aciyenda naye kwa Areyopago* acikalewa kuti: “Kodi tingadziwembo bza cipfunziso cipsa comwe iwepo ukupfunzisaci? 20 Pakuti iwepo ukulewa bzinthu bzomwe mpsacirendo m’makutu mwathu, ndipo tikufuna kudziwa kuti bzinthu bzimwebzi bzikuthandauza ciyani?” 21 Kulewa cadidi wanthu wentse wa ku Atena na alendo omwe akhali kumweko akhamala nthawe yawo acimbalewa na kubvesera nkhani zipsa. 22 Tenepo Paulo adaima pakati pa Areyopagopo acilewa kuti:

“Imwe wanthu wa ku Atena ndawona kuti pa bzinthu bzentse imwepo mumbagopa* mirungu kuposa wanthu winango. 23 Mwa ciratizo pomwe ndikhafamba mu mzinda ndawona bzinthu bzomwe imwepo mumbanamata ndipo ndagumanambo guwa la ntsembe lomwe lidanembedwa kuti: ‘Kwa Mulungu wakusaya kudziwika.’ Tenepo ndikupalizira kwa imwepo bza Mulungu wakusaya kudziwa omwe imwepo mukumunamatayo. 24 Mulungu omwe adakonza dziko la pantsi na bzentse bzomwe bziri m’mwemo, ambakhala lini mu templo yakukonzedwa na manja ya wanthu. Iye ni Mbuya wa kudzulu na pa dziko la pantsi, 25 ndipo ambafunikira lini kutumikiridwa na manja ya wanthu ninga kuti akusaya cinthu, thangwe ndiye omwe ambapasa moyo wanthu wentse, mphuwe pabodzi na bzinthu bzentse. 26 Iye adakonza mitundu yentse ya wanthu kucokera kwa munthu m’bodzi kuti iwo akhale pa dziko lentse la pantsi. Ndipo adakhazikisa nthawe ya bzinthu bzizinji aciikhambo malire ya mbuto zomwe wanthu akhafunika kukhala. 27 Thangwe Mulunguyo akufuna kuti wanthu amunyang’ane, amumpsampsadzire acimugumana, kulewa cadidi iye ali pafupi na m’bodzi na m’bodzi wa ifepano. 28 Thangwe ra iye, ifepano tina moyo, timbafamba ndipo tiripo, ninga momwe adalewera winango mwa anembi wanu kuti: ‘Pakuti ifepano ndifembo wana wace.’*

29 “Na tenepo, pakuti ndife wana wa Mulungu, tin’funika lini kukumbuka kuti Mulunguyo ali ninga oro, prata,* mwala ayai cinthu cakusemedwa mwa luso na mwakubverana na nzeru za munthu. 30 Kulewa cadidi, pa nthawe inango wanthu akhacita bzinthu bzimwebzi mwakusaya kudziwa, tsono Mulungu adalekerera bzinthu bzimwebzi. Koma tsapano iye akuuza wanthu wentse, kuli-kwentse kuti iwo an’funika kukungula. 31 Pakuti iye adakhazikisa ntsiku yomwe akufuna kudzatonga dziko lentse mwacirungamo, mwakuphatisa basa munthu omwe iye adamusankhula. Ndipo iye adalatiza kuti bzimwebzi mpsacadidi mwakumulamusa kwa anyakufa.”

32 Pomwe iwo adabva bza kulamusidwa kwa anyakufa, wanthu winango adayamba kumuseka, tsono winango akhambalewa kuti: “Un’dzatiuza pomwe bzimwebzi pa nthawe inango.” 33 Tenepo Paulo adacoka aciyenda. 34 Tsono wanthu winango adaphatana naye ndipo adakhala anyakukhulupira. Pakati pawo pakhana Diyoniziyo omwe akhali mtongi m’nyumba ya mphala ya Areyopago. Ndipo akhalipombo mkazi munango dzina lace Damarisi pabodzi na wanthu winango.

18 Patsogolo pace, iye adacoka ku Atena ndipo adafika ku Kolinto. 2 Ndipo kumweko adagumana Mdjuda munango dzina lace Akila, nzika ya ku Ponto omwe akhadafika tsapanopa kucokera ku Italiya pabodzi na mkazace Prisila, pakuti Klaudiyo akhadatonga kuti Adjuda wentse acoke ku Roma. Tenepo Paulo adayenda kukawazungira, 3 ndipo pakuti iwo akhacita basa lakundendemerana na lace, iye adakhala kumui kwawoko aciphata basa nawo pabodzi, thangwe wentse akhakonza matendi. 4 Ndipo ntsiku zentsene za Sabudu iye akhambafotokoza nkhani* m’nyumba yakunamatira ya Adjuda, ndipo iye akhakwanisa kucinja makumbukidwe ya Adjuda na Agerego, mwakuti iwo akhakhulupira.

5 Pomwe Sila na Timotio adafika kucokera ku Masedoniya, Paulo adayamba kukhala wakutanganika kwene-kwene na basa lakupalizira fala, acimbacitira umboni kwa Adjuda bwakuti Jezu ni Kristu. 6 Tsono pomwe iwo akhapitiriza kumugaza na kumbamulewa mafala yakupusa, iye adakutumula bzakubvala bzace aciwauza kuti: “Ciri-centse comwe cinkucitikiranico mulandu ngwanu, ine ndine wakucena.” Kuyambira tsapano ndiniyenda kwa wanthu wa mitundu inango. 7 Tenepo iye adacoka kumweko* acikapita m’nyumba ya munthu munango wakucemeredwa Tisiyo Justo omwe akhanamata Mulungu, ndipo nyumba yace ikhali pafupi na nyumba yakunamatira ya Adjuda. 8 Tsono Krispo omwe akhali mtsogoleri wa nyumba yakunamatira ya Adjuda, pabodzi na wanthu wentse wa pamui pace adakhulupira Mbuya. Ndipo wanthu azinji wa ku Kolinto omwe adabva mafalayo adakhulupira acibatizidwa. 9 Kuthumizira bzimwebzi, Mbuya adauza Paulo m’masomphenya usiku mafala yakuti: “Leka kucita mantha, pitiriza kupalizira ndipo leka kunyamala, 10 pakuti inepano ndinawe ndipo palibe munthu omwe an’dzakumenya ne kukucita bzakuipa, thangwe ndina wanthu azinji mu mzinda muno.” 11 Na tenepo, iye adapitiriza kukhala kumweko kwa gole libodzi na minyezi 6 acimbapfunzisa mafala ya Mulungu pakati pawo.

12 Tsapano pomwe Galiyo akhali mtongi wa cigawo ca Akaya, Adjuda adabverana kuti aphindukire Paulo ndipo adamuyendesa ku nyumba ya mphala, 13 acilewa kuti: “Munthu umweyu akupfunzisa wanthu kuti anamate Mulungu mwa njira yakusaya kubverana na lamulo.” 14 Tsono pomwe Paulo akhafuna kuyamba kulewalewa, Galiyo adauza Adjuda kuti: “Bzingadakhala kuti bzimwebzi mpsakuphonyeka ayai mpsakupitana na lamulo, ningadakhala na mathangwe yakukutetekerani. 15 Tsono penu mukupitana thangwe ra mafala, madzina ayai malamulo yanu bzimwebzo mpsanumbo, inepano ndikufuna lini kukhala mtongi wa bzinthu bzimwebzi.” 16 Na tenepo, iye adawacosa pa mbuto yakutongera miranduyo. 17 Na bzimwebzi iwo adaphata Sosisteni mtsogoleri wa nyumba yakunamatira ya Adjuda, ndipo adayamba kum’menya pa nyumba yakutongera miranduyo. Tsono Galiyo alibe kufuna kupitira nkhani zimwezi.

18 Pomwe adamala ntsiku zizinji, Paulo adagonekana na abale acicita ulendo bwa m’madzi mpaka ku Siriya, ndipo akhaperekezedwa na Prisila pabodzi na Akila. Ku Senkereya iye adasenga tsisi lace thangwe ra lumbiro lomwe akhadacita kuna Mulungu. 19 Tenepo pomwe iwo adafika ku Efezo, winango adasala mu mzindamo, tsono Paulo adapita m’nyumba yakunamatira ya Adjuda ndipo adathandiza Adjudawo kubvesesa bzinembo. 20 Napo adam’kumbira kuti apitirize kukhala kumweko kwa nthawe itali, iye alibe kubvuma. 21 Tsono iye adagonekana nawo aciti: “Yahova akabvuma, nin’dzabwerera pomwe kwa imwepo.” Tenepo iye adacoka ku Efezo mwakucita ulendo bwa m’madzi 22 ndipo adafika ku Sezareya. Tenepo iye adayenda kukazungira gwere* ndipo patsogolo pace adayenda ku Antiyokiya.

23 Pomwe adakhala kumweko kwa kanthawe, iye adacoka ndipo adayenda mbuto zakusiyana-siyana za ku Galatiya na ku Frijiya, acimbalimbikisa anyakupfunza wentse.

24 Tsapano Mdjuda munango wakucemeredwa Apolo, nzika ya ku Alexandriya, adafika ku Efezo, iye akhana luso lakulewalewa ndipo akhadziwa bwino Bzinembo. 25 Mwamuna umweyu akhadapfunzisidwa njira ya Yahova ndipo akhana nyongo mwakutsogoleredwa na mzimu wakucena, mwakuti akhalewalewa na kupfunzisa cadidi pakulewa bza Jezu, tsono iye akhandodziwa ubatizo bwa Juwau bokha. 26 Iye adayamba kulewalewa mwakukhwimika mu nyumba yakunamatira ya Adjuda. Pomwe Prisila na Akila adamubva, adamucemera aciyenda naye pa mbali ndipo adamufotokozera cadidi pakulewa bza njira ya Mulungu. 27 Pomwe Apolo akhafuna kuyenda ku Akaya, abale wa ku Efezo adanembera tsamba abale wa kumweko kuti iwo akamutambire bwino Apoloyo. Pomwe adafika kumweko iye adathandiza kwene-kwene wanthu omwe adakhala anyakukhulupira, thangwe ra kudeka mtima kukulu kwa Mulungu. 28 Pakuti iye akhalatiza padeca na citsimikizo centse kuti Adjuda akhali wakuphonyeka. Iye akhacita bzimwebzi mwa kuwalatiza m’Bzinembo kuti Jezu ni Kristu.

19 Pomwe Apolo akhali ku Kolinto, Paulo adapita na m’mbuto za mapiri acipolikira ku Efezo. Kumweko iye adagumana anyakupfunza winango, 2 ndipo adawabvunza kuti: “Kodi imwepo mudatambira mzimu wakucena pomwe mudakhala anyakukhulupira?” Iwo adatawira kuti: “Ifepano tikanati kubva kale kuti kuna mzimu wakucena.” 3 Tenepo iye adawabvunza pomwe kuti: “Kodi imwepo mudabatizidwa na ubatizo bwa mtundu wanyi?” Iwo adatawira kuti: “Ubatizo bwa Juwau.” 4 Paulo adatawira pomwe kuti: “Ubatizo bwa Juwau bukhali ubatizo bwa cizindikiro ca kukungula, ndipo iye akhauza wanthu kuti akhulupire ule omwe akhabwera patsogolo pace omwe akhali Jezu.” 5 Pomwe iwo adabva bzimwebzi, adabatizidwa m’dzina la Mbuya Jezu. 6 Ndipo pomwe Paulo adaikha manja yace pa iwo, mzimu wakucena udawafikira, ndipo iwo adayamba kulewalewa bzirewedwe bzacirendo acimbaleweratu mafala yakucokera kwa Mulungu. 7 Wentse pabodzi akhali amuna pafupi-fupi 12.

8 Kwa minyezi mitatu, iye akhambapita m’nyumba yakunamatira ya Adjuda* ndipo akhalewalewa mwakukhwimika na kufotokoza nkhani acimbayeza kuwathandiza kuti abvesese bza Umambo bwa Mulungu. 9 Tsono wanthu winango akhalambisisa kukhulupira ndipo akhambalewa kuipa bza Njirayo pakati pa thimu la wanthu, tenepo iye adacoka pamwepo ndipo adacosambo anyakupfunzawo pakati pawo. Ntsiku na ntsiku iye akhambafotokoza nkhani m’nyumba ikulu ya pa xikola ya Tirano. 10 Bzimwebzi bzidacitika kwa magole mawiri, mwakuti wanthu wentse omwe akhakhala m’cigawo ca Aziya, Adjuda na Agerego adabva mafala ya Mbuya.

11 Ndipo Mulungu adapitiriza kucita mabasa yakudabwisa ya mphanvu mwakuphatisa basa Paulo, 12 mwakuti wanthu akhatenga tunguwo twakupukutira kaluma na mavintala ndipo akhayenda kukakhuya thupi la Paulo, akamala akhayenda nabzo kwa anyakuduwala ndipo anyakuduwalawo akhalimbiratu, ndipo mizimu yakuipa ikhacokambo. 13 Tsono Adjuda winango omwe akhambafamba m’mbuto zakusiyana-siyana, akhambacosa bziwanda, ndipo akhambayezera kuphatisa basa dzina la Mbuya Jezu kuti acose mizimu yakuipa mwakulewa kuti: “Ndikukutonga m’dzina la Jezu omwe Paulo akumupalizira kuti coka.” 14 Pakhana wana 7 wacimuna wa Mdjuda munango, omwe akhali mtsogoleri wa antsembe ndipo dzina lace Sikeva omwe akhacita bzimwebzi. 15 Tsono mzimu wakuipayo udatawira kuti: “Inepano nimbamudziwa Jezu ndipo nimbamudziwambo bwino Paulo, tsono imwepo ndimwe mbani?” 16 Na bzimwebzi, munthu omwe akhana mzimu wakuipayo adawamogera ndipo adayamba kulimbana na m’bodzi na m’bodzi wa iwo acikunda wentsenewo. Na tenepo, iwo adabula m’nyumbamo acithawa uko ali pezi ndipo adapwetekeka. 17 Bzimwebzi bzidadziwika kwa wanthu wentse, kwa Adjuda na kwa Agerego omwe akhakhala ku Efezo. Wentse adabva mantha ndipo dzina la Mbuya Jezu lidapitiriza kutumbizidwa. 18 Wanthu azinji omwe adakhala anyakukhulupira, akhabwera kudzakungula pikado zawo na kulewa padeca bzinthu bzomwe akhacita. 19 Kulewa cadidi, wanthu azinji omwe akhambacita bza matsenga adabweresa mabukhu yawo aciyatentha pamaso pa wanthu wentse. Pomwe iwo adalewenga kobiri za mabukhuyo zidakwana kobiri 50 000 za prata.* 20 Na tenepo, mafala ya Yahova yakhapitiriza kukula mwamphanvu kwene-kwene yacikunda bzineso.

21 Pomwe bzidamala kucitika bzinthu bzimwebzi, Paulo adatsimikiza kupita na ku Masedoniya na ku Akaya aciyenda ku Jeruzalemu. Ndipo iye adati: “Ndikakafika kumweko, nin’funika ndikayendembo ku Roma.” 22 Tenepo iye adatumiza wanthu awiri pa wanthu omwe akhamutumikira, Timotio na Erasto, kuti ayende ku Masedoniya. Tsono iye adapitiriza kukhala m’cigawo ca Aziya kwa kanthawe.

23 Pa nthawe imweyire, padawoneka phiringu likulu thangwe ra Njira ya Mbuya. 24 Ndipo pakhana mwamuna munango wakucemeredwa Demetriyo, omwe akhambakonza tuakacisi tung’ono-tung’ono twakundendemerana na templo ya Artemi ndipo amisiri akhagumana phindu likulu na basa limweri. 25 Iye adatsonkhanisa anzace omwe akhambacita basa libodzi-bodziro aciwauza kuti: “Amunamwe, imwepo mukudziwa bwino kuti ifepano timbagumana kobiri thangwe ra basa limweri. 26 Tsapano imwepo mukuwona na kubva kuti Paulo akupumpsa wanthu azinji kuti acinje nzeru zawo, acimbawauza kuti mirungu yakukonzedwa na manja ya wanthu, ni mirungu lini yacadidi. Ndipo iye akucita bzimwebzi sikuti ku Efezo kokha, koma m’cigawo centse ca Aziya. 27 Kuthumizira bzimwebzi, ndina mantha kuti wanthu aniyamba kulewa kuipa malonda yathu ndipo mulungu wathu wacikazi Artemi ni mkulu. Tsono bzikuwoneka kuti wanthu anileka kulemekeza templo yace ndipo kuposa bzimwebzi, wanthu wentse wa ku Aziya na wa pa dziko lentse ambanamata Artemi, tsono thangwe ra mafala ya Pauloya, iwo an’dzasiya kumulemekeza.” 28 Pakubva bzimwebzi amunawo adadzalidwa na ciya, aciyamba kukuwa kuti: “Mkulu ni Artemi wa ku Efezo!”

29 Na tenepo, mzindayo udadzala na phiringu ndipo wanthu wentse adathamangira pa mbuto yakucitira masenzeka, acimbakwekweta anzace wa paulendo wa Paulo, omwe ni Gayo na Aristako, wanthu wa ku Masedoniya. 30 Tenepo, Paulo akhafuna kupita mkati mwa thimu la wanthulo, tsono anyakupfunza alibe kum’bvumiza. 31 Napo wanthu winango omwe akhanyang’anira phwando na masenzeka omwe akhadziwana naye, adamutumizira mafala yakumudandaulira, yakuti aleke kuikha moyo wace pangozi mwa kuyenda pa mbuto yakucitira masenzekayo. 32 Kulewa cadidi, wanthu omwe akhali pamwepowo winango akhakuwa acimbalewa ibzi ndipo winango akhalewa bzinango, pakuti pakhana phiringu pakati pa wanthu omwe akhali pamwepowo ndipo azinji wa iwo ne akhadziwa lini thangwe ranyi akhali pamwepo. 33 Na tenepo, iwo adacosa Alexandre pakati pa thimulo ndipo Adjuda akham’gwinyira kutsogolo; Alexandreyo adacita cizindikiro na boko lace, thangwe akhafuna kulewa mafala yakubzikhotcerera pakati pa wanthuwo. 34 Tsono pomwe adazindikira kuti iye akhali Mdjuda, wentsenewo pabodzi, adakuwa kwa maora mawiri kuti: “Mkulu ni Artemi wa ku Efezo!”

35 Pakumalizira pace, pomwe munembi wa mu mzindamo adanyamalisa thimu la wanthulo adati: “Wanthu wa mu Efezomwe, mbani wa imwepo omwe an’dziwadi lini kuti mzinda wa Efezo ndiye omwe umbanyang’anira templo ya Artemi mkulu na cifanikiso comwe cidagwa kucokera kudzulu? 36 Pakuti palibe munthu omwe angagaze bzimwebzi, imwepo derekhani ndipo lekani kucita bzinthu mwakuthamanga. 37 Ndipo imwepo mwabweresa amunawa pano omwe ni mbava lini za mu templo ndipo ne ambanyoza lini mulungu wathu mkazi. 38 Na tenepo, penu Demetriyo pabodzi na anzace omwe ambaphatambo basa libodzi-bodziro ana mathangwe na munthu, ziripo ntsiku zomwe nyumba za mphala zimbafungulidwa ndipo alipombo atongi wa cigawo, iwo mbayende akalewe mirandu yawo kumweko. 39 Tsono penu mun’funa bzinango kuposa bzimwebzi, bzimwebzo mukabzifotokoze pa mtsonkhano wakubvumidwa mwa lamulo. 40 Thangwe kulewa cadidi, ifepano tingapasidwe mulandu wakupumpsa wanthu thangwe ra bzinthu bzomwe bzacitikabzi, pakuti tingakwanise lini kufotokoza mathangwe yakubveka yomwe yabweresa phiringuli.” 41 Pomwe adamala kulewa bzimwebzi, iye adauza wanthuwo kuti ayende.

20 Pomwe phiringulo lidamala, Paulo adacemeresa anyakupfunza ndipo pomwe iwo adabwera, iye adawalimbikisa. Pomwe adamala kugonekana nawo, iye adayamba ulendo bwace bwakuyenda ku Masedoniya. 2 Iye adafamba mzinda na mzinda, acimbauza anyakupfunza mafala mazinji yakulimbikisa ndipo patsogolo pace adayenda ku Gresiya. 3 Pomwe adamala minyezi mitatu ali kumweko, iye akhafuna kucita ulendo bwace bwa m’madzi bwakuyenda ku Siriya, tsono pomwe adazindikira kuti Adjuda an’funa kumupha, iye adabwerera ku Masedoniya. 4 Iye akhaperekezedwa na Sopateri mwana wa Piro wa ku Bereya, Aristako na Sekundu wa ku Tesalonika, Gayo wa ku Derbe na Timotio. Ndipo wakucokera m’cigawo ca Aziya, akhali Tikiko na Trofimo. 5 Amuna amwewa adatsogola pa ulendobo, acikatidikhirira ku Trowa. 6 Pomwe zidandomala ntsiku za Phwando la Pau Zakusaya Cakufufumisa, ifepano tidayamba ulendo bwa m’madzi kucokera ku Filipi ndipo pomwe zidapita ntsiku zixanu, ifepano tidagumana nawo ku Trowa, ndipo kumweko tidakhala ntsiku 7.

7 Pa ntsiku yakuyamba ya mdzinga pomwe tidatsonkhana pabodzi kuti tidye cakudya, Paulo adayamba kufotokoza nkhani kwa wanthu omwe akhali pamwepowo thangwe mangwana yace iye angadacita ulendo, tenepo iye adafotokoza nkhaniyo mpaka pakati pa usiku. 8 Ndipo m’cipinda capadzaulu comwe tikhadatsonkhanaco, mukhana mibvuniko mizinji. 9 Mulumbwana munango wakucemeredwa Eutiko omwe akhadakhala pa janera, adaphatidwa na tulo twamphanvu pomwe Paulo akhafotokoza nkhaniyo, pakuti tuloto tukhali twamphanvu, iye adagwa kucokera pa nyumba yacitatu yapadzaulu ndipo pomwe wanthu adayenda pomwe pakhana iyepo, adamugumana akhadafa. 10 Tsono Paulo adapolika, acifika pomwe pakhana iyepo ndipo adamugonera, acimukumbatira ndipo adalewa kuti: “Lekani kucita thupo, iye ana moyo.” 11 Tenepo iye adakwira aciyenda pomwe m’nyumba yapadzaulu ire, ndipo pomwe adafika, adayamba kudya.* Iye adapitiriza kuceza nawo kwa nthawe itali mpaka pomwe kunja kudacena ndipo patsogolo pace iye adabula aciyenda. 12 Tenepo iwo adatenga mulumbwanayo ndipo akhakomedwa kwene-kwene thangwe rakuti iye akhana moyo.

13 Pomwe tidapakira mwadiya, tidayenda mpaka ku mzinda wa Aso, tsono Paulo adayenda na minyendo. Ni mu mzinda umweyu omwe tingadakatenga Pauloyo pa mwadiya, ninga momwe iye akhadatiuzira. 14 Na tenepo, pomwe iye adatigumana ku Aso, ifepano tidamutambira ndipo tidam’pakiza m’mwadiya ticiyenda ku Mitilene. 15 Mangwana yace, tidafamba ulendo bwa m’madzi mpaka tidakafika m’mphepete mwa ntsuwa ya Kiyo. Pa ntsiku yaciwiri yace, tidakatsama pa ntsuwa ya Samo ndipo mangwana yanzace tidadzafika ku Mileto. 16 Paulo alibe kufuna kuima ku Efezo, thangwe akhafuna lini kumala nthawe m’cigawo ca Aziya pakuti iye akhafuna kufika mwakamfulumize ku Jeruzalemu pa ntsiku ya Phwando la Pau Zakusaya Cakufufumisa.

17 Na tenepo, pomwe akhali ku Mileto, iye adatuma wanthu kuti ayende ku Efezo kuti akacemere akulu wa m’gwere kuti adzagumane naye. 18 Pomwe iwo adafika, iye adawauza kuti: “Imwepo mukudziwa bwino momwe inepano ndidacitira bzinthu pakati panu, kuyambira ntsiku yakuyamba yomwe inepano ndidaponda m’cigawo ca Aziya. 19 Ndidatumikira Mbuya ninga kapolo, mwakubzicepesa* kukulu na misozi pabodzi na mayezo yomwe yadabwera thangwe ra bzinthu bzakuipa bzomwe Adjuda akhandicitira, 20 ndipo ndiribe kusiya kukuuzani bzinthu bzomwe mpsakufunika,* ne ndiribe kusiya kukupfunzisani padeca napo nyumba na nyumba. 21 Koma ndapereka umboni bwakukwanira kwa Adjuda na kwa Agerego, bwakuti iwo an’funika kukungula acitendeukira kwa Mulungu, nakuti an’funikambo kukhulupira Mbuya wathu Jezu. 22 Tsapano mwakubvera mzimu wa Mulungu, ndikuyenda ku Jeruzalemu, napo kuti ndikudziwa lini comwe cin’kandicitikira kumweko, 23 tsono comwe ndikudziwa, n’cakuti mzimu wakucena umbandiuza mu mzinda uli-wentse, kuti kumangidwa na matsautso bzikundidikhirira. 24 Na tenepo nimbawona lini moyo wangu kukhala cinthu cakufunika kwa inepano, tsono comwe ndikufuna, ni kumaliza kuthamanga kwangu pabodzi na utumiki bomwe ndidatambira kwa Mbuya Jezu. Utumiki bumwebu, ni kupalizira mwakukwanira mafala yabwino ya kudeka mtima kukulu kwa Mulungu.

25 “Tsapano ndikudziwa kuti palibe ne na m’bodzi wa imwepo omwe ndidamupalizira bza Umambo, omwe an’dzawona nkhope yangu. 26 Tenepo, ndakucemerani kuti mukhale mboni lero, kuti ndine wakucena pa mulandu wa mulopa wa wanthu wentse, 27 pakuti ndiribe kuleka kukuuzani bzomwe Mulungu an’funa kudzacitira wanthu. 28 Khalani tceru na imwe mwekha ndipo khalanimbo tceru na mabira yentse yomwe mzimu wakucena udakupasani ninga anyakunyang’anira, kuti muuse gwere la Mulungu lomwe iye adaligula na mulopa wa Mwana wace caiye. 29 Inepano ndikayenda, ndikudziwa kuti wanthu winango omwe ali ninga mbwaya za m’thengo,* an’dzabwera aciphatana namwe, ndipo an’dzasamalira lini mabira mwakudeka mtima, 30 ndipo pakati panu pan’dzawoneka amuna omwe an’dzalewa bzinthu bzakuphonyeka, kuti apumpse anyakupfunza kuti akhale ku mbali yawo.

31 “Na tenepo, khalani mudapenya ndipo kumbukirani kuti kwa magole matatu, usiku na masikati, ndiribe kusiya kucenjeza m’bodzi na m’bodzi wa imwepo na misozi. 32 Ndipo tsapano, ndikukusiyani m’manja mwa Mulungu pabodzi na m’fala la kudeka mtima kwace kukulu, fala lomwe lingakulimbikiseni licikupasani utaka pakati pa anyakucena wentse. 33 Inepano ndiribe kusirira prata,* ne oro ne bzakubvala. 34 Imwepo mukudziwa bwino kuti inepano ndidaphata basa na manja yanguya kuti ndigumane bzinthu bzomwe bzingadandithandiza pa moyo wangu pabodzi na wale omwe ndikhaphata nawo basa pabodzi. 35 Inepano ndakulatizani kuti mwakuphata basa na nyongo mwa njira imweyi, mun’funika kuthandiza wale omwe mbakutepa, mucimbakumbukira mafala ya Mbuya Jezu yakuti: ‘Kupasa kumbabweresa cikondweso cikulu kuposa kutambira.’”

36 Pomwe adamala kulewa bzinthu bzimwebzi, iye adagodama pabodzi na wentse, acipemba. 37 Tenepo, wentse adayamba kulira kwene-kwene ndipo adakumbatira Paulo acim’mpsompsona mwa lufoyi, 38 pakuti iwo akhadasunama maka-maka na bzomwe iye akhadawauza kuti angadadzawona lini pomwe nkhope yace. Patsogolo pace, iwo adam’perekeza mpaka kukapakira xitima ya m’madzi.*

21 Pomwe tidakwanisa kusiyana nawo, tidapakira xitima ya m’madzi* ticiyenda mpaka ku Kosi. Mangwana yace, tidayenda ku Rode, pomwe tidadzacoka kumweko, tidayenda ku Patara. 2 Pomwe tidagumana xitima ya m’madzi yakuyenda ku Fenisiya, tidapakira xitimayo ticiyenda. 3 Pomwe idayamba kuwonekera ntsuwa ya Xipre, ifepano tidapita na kumadzere kwace ticiyenda mpaka ku Siriya, ndipo tidapita na ku Tiro thangwe xitimayo ikhafuna kubulusa mitolo. 4 Kumweko tidanyang’ana anyakupfunza ticiwagumana ndipo tidakhala nawo mu ntsiku zakukwana 7. Tsono mwakutsogoleredwa na mzimu wakucena, iwo adauza Paulo mwakubwereza-bwereza kuti aleke kukaponda ku Jeruzalemu. 5 Tenepo pomwe nthawe yakuti tiyende idakwana, tidanyamuka ticipitiriza na ulendo bwathu. Ndipo wentse pabodzi, kuphatanidza akazi na wana, adatiperekeza mpaka kunja kwa mzinda. Ndipo tidagodama pa gombe ticipemba, 6 pomwe tidamala, tidagonekana nawo. Na tenepo, ifepano tidapakira xitima ya m’madzi ndipo iwo adabwerera m’mii mwawo.

7 Ifepano tidamaliza ulendobo kucokera ku Tiro mpaka tidafika ku Pitolomaida. Kumweko tidamusana na abale ticikhala nawo ntsiku ibodzi. 8 Mangwana yace tidanyamuka ticikafika ku Sezareya ndipo kumweko tidakapita m’nyumba ya mpalizi Filipi, omwe akhali m’bodzi wa amuna 7 wale ndipo tidakakhala naye kumweko. 9 Mwamuna umweyu akhana wana wace wacikazi anai wakusaya kulowodwa,* omwe akhambalewa mapolofesiya. 10 Tsono pomwe tidakhala kumweko tuntsiku pang’ono, mpolofeta munango wakucemeredwa Agabo adabwera kucokera ku Djudeya. 11 Iye adabwera pakhana ifepanopo ndipo adatenga bande la Paulo acibzimanga minyendo na manja yace, acilewa kuti: “Mzimu wakucena walewa kuti: ‘Mwenekaciro banderi an’dzamangidwa tenepayu na Adjuda mu Jeruzalemu, acidzam’pereka m’manja mwa wanthu wa mitundu.’” 12 Tsapano pomwe tidabva bzimwebzi, ifepano pabodzi na wale omwe akhali pamwepowo tidayamba kumudandaulira kuti aleke kuyenda ku Jeruzalemu. 13 Tsono Pauloyo adatawira kuti: “Thangwe ranyi mukulira, thangwe ranyi mukuyeza kutepesa bzomwe ndatsimikiza kucita?* Dziwani ibzi: Inepano ndidakonzeka kumangidwa ayai kufa mu Jeruzalemu thangwe ra dzina la Mbuya Jezu.” 14 Pakuti tiribe kukwanisa kumuletsa, tidasiya kumudandaulirako ticiti: “Kucitike kufuna kwa Yahova.”

15 Pomwe zidapita ntsiku zimwezire, tidakonzekera ticiyamba ulendo bwakuyenda ku Jeruzalemu. 16 Anyakupfunza winango wa ku Sezareya adayenda nafe pabodzi ndipo adakatifikisa pamui pa Menasoni wa ku Xipre, omwe ni m’bodzi wa anyakupfunza wakuyambirira. Ndipo tidakhala kumweko ninga alendo. 17 Pomwe tidafika ku Jeruzalemu, abale adatitambira mwakukondwa. 18 Paulo adayenda pabodzi na ifepano kukagumana na Tiyago, ndipo akulu wentse akhalipombo. 19 Ndipo iye adamusana nawo aciyamba kuwauza bzinthu bzentse bzomwe Mulungu akhadacita pakati pa wanthu wa mitundu inango pa basa lakupalizira lomwe iye adacita.

20 Pomwe adamala kubva bzimwebzi iwo adayamba kutumbiza Mulungu. Tsono iwo adamuuza kuti: “M’bale Paulo, imwepo mukudziwa kuti pana Adjuda azinji omwe adakhala anyakukhulupira ndipo wentsenewo ambacita nyongo yakuteweza Lamulo. 21 Tsono iwo abva nung’u-nung’u pakulewa bza imwepo, kuti mukupfunzisa Adjuda pakati pa wanthu wa mitundu inango bzinthu bzakupitana na Lamulo la Mozeji. Mwakuwauza kuti aleke kucitisa wana wawo mgwatidwe* ne kuteweza miyambo yomwe idakhazikisidwa. 22 Tsono ticite ciyani na nkhani imweyi? Pakuti mwakusaya kupenukira iwo ati adziwe kuti imwepo mwabwera. 23 Na tenepo citani bzomwe tinkuuzanibzi: Tina amuna anai omwe adacita lumbiro kuti aliteweze. 24 Tengani amuna amwewa mukabzicenese pabodzi na iwo mwakuteweza mwambo, ndipo mukapagali bzentse bzakufunika kuti iwo akasenge tsisi lawo. Tenepo wentse an’dzadziwa kuti bzomwe iwo akubva pakulewa bza imwepo m’cadidi lini. Ndipo an’dzawona kuti imwepo mukufamba mwakuthemera nakuti mukupitirizambo kuteweza Lamulo. 25 Pakulewa bza anyakukhulupira wakucokera m’mitundu inango, ifepano tidawatumizira tsamba lakulewa bzomwe tidabverana bzakuti iwo an’funika kutcenkha bzinthu bzakuperekedwa ntsembe ku bzifanikiso, mulopa, bzirombo ayai bzifuwo bzakufa mwakucita kuponyongoledwa,* pabodzi na upombo ayai uputa.”*

26 Na tenepo, mangwana yace Paulo adatenga amuna wale acibzicenesa pabodzi na iwo mwakuteweza mwambo. Ndipo iye adakapita mu templo kuti akalewe kuti ni lini pomwe ntsiku za mwambo wakucenesedwazo zingadamala na nthawe yomwe angadadzaperekera ntsembe m’bodzi na m’bodzi wa iwo.

27 Pomwe ntsiku 7 zire zikhayenda kukamala, Adjuda wa ku Aziya adawona Paulo mu templo. Na tenepo iwo adayambisa phiringu pakati pa thimulo ndipo adayenda kukamuphata, 28 ndipo akhambakuwa aciti: “Amuna wa mu Jirayeri, tithandizeni! Mwamunayu ndiye omwe akupfunzisa wanthu wentse kuli-kwentse, bzinthu bzakunyoza mbumba yathu, malamulo yathu na mbuto ino. Kuthumizira bzimwebzi iye wabweresa Agerego mu templo ndipo waipisa mbuto ino.” 29 Iwo adalewa bzimwebzi thangwe akhadawona Trofimo wa ku Efezo ali pabodzi naye mu mzindamo, na tenepo iwo akhakumbuka kuti Paulo akhadamubweresambo mu templomo. 30 Mzinda wentse udadzala na phiringu, ndipo wanthu azinji adabwera acithamanga kudzaphata Paulo acim’kwekwetera kunja kwa templo, ndipo mwakusaya kucedwa misuwo idafungidwa. 31 Pomwe iwo akhafuna kumupha, mtsogoleri wa thimu la anyankhondo adauzidwa kuti mzinda wentse wa Jeruzalemu ukhali pa phiringu. 32 Mwakusaya kucedwa, iye adatenga acikunda pabodzi na akulu-akulu wa anyankhondo, ndipo adapolikira komwe kukhana thimu la wanthuko. Pomwe wanthuwo adawona mkulu wa acikunda pabodzi na acikundawo, iwo adalekeza kumenya Paulo.

33 Na tenepo mkulu wa acikundayo adafendera pafupi, adam’phata, ndipo adatonga kuti iye amangidwe na makorenti mawiri. Patsogolo pace, adabvunza wanthuwo kuti iye akhali yani nakuti n’ciyani comwe iye akhadacita. 34 Tsono wanthu winango pa thimupo akhambakuwa acimbalewa ibzi, ndipo winango akhambakuwa acimbalewa bzinango. Pakuti akhabvesesa lini cadidi cace ca phiringulo, iye adatonga kuti Paulo ayendesedwe ku kwarteli. 35 Pomwe iye adafika pa ntsikada, acikunda adacita kumunyamula thangwe rakuti wanthuwo akhadakalipa kwene-kwene ndipo akhafuna kum’phata. 36 Ndipo thimu la wanthulo likhapitiriza kumutewera licimbakuwa kuti: “Mupheni.”

37 Pomwe Paulo akhadasala pang’ono kupita m’kwartelimo, iye adabvunza mkulu wa acikundayo kuti: “Kodi mungandibvumizembo kuti ndikuuzeni cinthu cinango?” Iye adati: “Kodi iwepo umbalewalewambo Cigerego? 38 Kodi iwepo ndiwe lini mwamuna ule wa ku Edjipito omwe adayambisa phiringu lakupandukira boma ndipo udatenga akapondo 4000 uciyenda nawo m’dambo?” 39 Na tenepo, Paulo adatawira kuti: “Kulewa cadidi, ndine Mdjuda nzika ya ku Tarso mzinda wakudziwika bwino wa ku Silisiya, ndaphata minyendo, ndikukumbirambo kuti ndilewelewe na wanthuwa.” 40 Pomwe Paulo adabvumizidwa kulewalewa, iye adaima pa ntsikada ndipo adacita cizindikiro na boko lace kuna wanthuwo. Pomwe wanthuwo adakhala zii, iye adayamba kulewalewa nawo m’cirewedwe ca Cihebereu aciti:

22 “Amunamwe, abalemwe na akulu-akulu, tetekerani kuti ndikufotokozereni bzomwe bzidacitika.” 2 Pomwe iwo adabva kuti iye akulewalewa nawo mu cirewedwe ca Cihebreu, wentse adakhala zii, tenepo iye adati: 3 “Ndine Mdjuda wakubadwira ku Tarso wa ku Silisiya, wakupfunzisidwa na Gamaliyeli mu mzinda muno. Ndidapfunzisidwa mwakubverana na mapfunziso yamphanvu ya makolo yathu yakale yakulewa bza Lamulo ndipo ndikhanamata Mulungu na nyongo ninga momwe mwentsenemwe lero mukucitira. 4 Ndikhaboneresa wale omwe akhatewera Njira imweyi mpaka kufa, ndipo ndikhamanga amuna na akazi kubodzi ndiciwaikhisa m’kawoko. 5 Ndipo Mkulu wa ansembe pabodzi na mtsonkhano wentse wa akulu angacitire umboni bzimwebzi. Ndipo iwo adandipasambo matsamba yakuti ndiyende nayo kwa abale wa ku Damasko ndipo inepano ndikhayenda kumweko kuti ndikawamange ndiciwabweresa ku Jeruzalemu kuti adzapasidwe nyathwa.

6 “Tsono pomwe ndikhayenda kumweko ca ku masikati ndipo ndikhadasala pang’ono kufika ku Damasko, mwadzidzidzi ceza cakucokera kudzulu cidabvunika pomwe pakhana inepo, 7 tenepo ndidagwa pantsi ndipo ndidabva fala likundiuza kuti: ‘Saulo, Saulo, thangwe ranyi iwepo ukundiboneresa?’ 8 Inepano ndidatawira kuti: ‘Kodi ndimwe yani Mbuya?’ Iye adatawira kuti: ‘Ndine Jezu waku Nazareti, ule omwe iwepo ukumuboneresa.’ 9 Amuna omwe akhali pabodzi na inepano, akhawona cezaco tsono alibe kubva mafala ya ule omwe akhalewalewa na inepanoyo. 10 Pa nthaweyo inepano ndidabvunza kuti: ‘Mbuya n’ciyani comwe nin’funika kucita?’ Ndipo Mbuyayo adatawira kuti: ‘Lamuka, ndoko ku Damasko ndipo kumweko un’kauzidwa bzentse bzomwe iwepo un’funika kucita.’ 11 Tsono pakuti ndikhakwanisa lini kuwona cinthu thangwe ra ulemerero bwa cezaco, ndidafika ku Damasko mwakucita kuphatidwa boko na wanthu omwe ndikhanawo pabodzi.

12 “Na tenepo, mwamuna munango wakugopa Mulungu mwakuteweza Lamulo, dzina lace Ananiya, akhana mbiri yabwino pakati pa Adjuda wentse wakukhala kumweko, 13 ndipo adafika kwa ine. Iye adaima pafupi na inepano acilewa kuti: ‘M’bale wangu Saulo, yamba pomwe kuwona!’ Pa nthawe ibodzi-bodziyo ndidadjiguma ndicimuwona iye. 14 Ndipo iye adati: ‘Mulungu wa makolo yathu yakale wasankhula iwepo kuti udziwe bzomwe iye ambafuna na kuti uwone nyakulungama ucibva mafala yakucokera pa mulomo pace. 15 Thangwe iwepo un’dzakhala mboni yace kwa wanthu wentse pa bzinthu bzomwe wawona na kubva. 16 Ndipo tsapano ukudikira ciyani? Lamuka ubatizidwe ndipo un’dzakhala wakucena ku pikado zako thangwe ra kucemera dzina lace.’

17 “Tsono inepano ndidabwerera ku Jeruzalemu ndipo pomwe ndikhapemba mu templo ndidawona masomphenya. 18 Ndipo m’masomphenyamo ndidawona mbuya akundiuza kuti: ‘Leka kucedwa, bula mu Jeruzalemu mwakamkulumize thangwe iwo an’dzabvuma lini umboni bomwe iwepo un’dzapereka pakulewa bza ine.’ 19 Tsono inepano ndidatawira kuti: ‘Mbuya, iwo akudziwa bwino kuti m’nyumba zakunamatira zakusiyana-siyana, inepano ndikhafungira m’kawoko na kupfumbula wale omwe akhakhulupira imwepo. 20 Ndipo pomwe Sitefano akhaphedwa, ule omwe akhacitira umboni bza imwepo, inepano ndikhalipo ndipo ndikhabverana na bzomwe iwo akhacitabzo ndicimbakoya bzakubvala bzakunja bza wanthu omwe akhamuphawo.’ 21 Tsono iye adalewa pomwe kuti: ‘Ndoko thangwe inepano ninkutuma kuti uyende kwa wanthu wa mitundu wakukhala m’mbuto zakutali.’”

22 Tenepo wanthuwo adatetekera mafala yentse yomwe iye adalewayo. Patsogolo pace iwo adakuwa na mphanvu kuti: “M’pfudzeni munthu umweyu pa dziko la pantsi thangwe iye an’themera lini pomwe kukhala na moyo!” 23 Pakuti iwo akhambakuwa, akhambathusa bzakubvala bzawo, ndipo akhambamwaza mpfumbi m’dzaulu, 24 mkulu wa acikunda adatonga kuti Paulo apitisidwe mu kwarteli ndipo adalewambo kuti iye an’funika kupfumbulidwa acimbabvunzidwa mibvunzo kuti adziwe thangwe ranyi wanthuwo akhambakuwira Paulo kuti aphedwe. 25 Tsono pomwe iwo adam’manga kuti ayambe kumupfumbula, Paulo adabvunza mkulu wa anyankhondo omwe akhadaima pamwepo kuti: “Kodi Lamulo limbabvumiza kupfumbula nzika ya ku Roma pomwe ikanati kutongedwa?” 26 Pomwe mkulu wa anyankhondoyo adabva bzimwebzi, iye adayenda kwa mkulu wa acikunda ndipo adakamuuza kuti: “N’ciyani comwe mun’funa kucitaci? Munthuyu ni m’Roma.” 27 Na tenepo mkulu wa acikundayo adafenderera Paulo acimubvunza kuti: “Ndiuze, iwepo ndiwe nzika ya Roma?” Iye adatawira kuti: “Inde.” 28 Mkulu wa acikundayo adalewa kuti: “Inepano unzika bwangu ndidacita kubugula na kobiri zizinji.” Paulo adati: “Tsono ine ndidacita kubadwa nabo.”

29 Tenepo mwakusaya kucedwa, amuna omwe akhafuna kumubvunza mibvunzo na kumuboneresawo adafunduka acimusiya, ndipo pomwe mkulu wa acikunda adabva kuti Paulo akhali nzika ya Roma iye adabva mantha kwene-kwene na kuwona kuti akhadamumanga na makorenti.

30 Tsono mangwana yace, pakuti iye akhafuna kudziwa cadidi comwe Adjuda akham’pasira mulandu, iye adamucosa ndipo adatonga kuti mkulu wa antsembe pabodzi na wentse wa m’nyumba ya mphala atsonkhane. Na tenepo iye adabweresa Paulo acimuimisa pakati pawo.

23 Pomwe Paulo adanyang’anisisa wanthu omwe akhali m’nyumba ikulu ya mphala,* iye adalewa kuti: “Amunamwe, abalemwe, inepano ningalewe pamaso pa Mulungu* kuti mtima* wangu ukundiuza kuti mpaka lero inepano ndiribe kucita cinthu cakuipa.” 2 Na bzimwebzi, Ananiya mkulu wa antsembe adauza wanthu omwe akhali pafupi na iye kuti am’menye pa mulomo. 3 Tenepo Paulo adamuuza kuti: “Mulungu an’dzakumenya, munthu wacinyengowe.* Iwepo wakhala pantsi kuti unditonge mwakubverana na Lamulo tsono wekha-wekhawe ukuphonyera Lamulo pakuuza munthu kuti andimenye. Tsono bzomwe ukucitabzi mpsabwino ayai ne?” 4 Wanthu omwe akhali pamwepowo adati: “Kodi iwepo ukutukwana mkulu wa antsembe wa Mulungu?” 5 Tsono Paulo adati: “Abale, ndikhadziwa lini kuti ni mkulu wa antsembe. Pakuti bzidanembedwa kuti: ‘Leka kulewa kuipa mtongi wa wanthu wako.’”

6 Tsapano pakudziwa kuti wanthu winango akhali kumbali ya Asaduki ndipo winango akhali kumbali ya Afarizeu, Paulo adalewa mwakukuwa mu nyumba yakutongera mirandumo kuti: “Amunamwe, abalemwe, inepano ndine Mfarizeu mwana wa Afarizeu. Inepano ndikutongedwa thangwe ra cidikhiro cakulamusidwa kwa wanthu wakufa.” 7 Pomwe iye adalewa bzimwebzi, Afarizeu na Asaduki adayamba kunesana ndipo thimu la wanthulo lidagawanika. 8 Thangwe Asaduki akhalewa kuti anyakufa an’dzalamusidwa lini ndipo kulibe anjo ne mzimu, tsono Afarizeu akhabvuma bzentsenebzi.* 9 Na tenepo padawoneka baludya likulu ndipo anembi winango omwe akhali kumbali ya Afarizeu adalamuka aciyamba kugaza mwamphanvu kuti: “Tikuwona lini cakuphonyeka kwa munthu umweyu, tsono penu mzimu ayai anjo alewalewa na iye  . . .” 10 Pomwe kunesanako kudathumizirika, mkulu wa acikunda adagopa kuti Paulo angadaphedwa na wanthuwo, na tenepo iye adatuma acikunda kuti ayende akamucose pakati pawopo aciyenda naye ku kwarteli.

11 Tsono usiku bwace, Mbuya adabwera, pomwe pakhana iyepo acimuuza kuti: “Khala wakukhwimika! Pakuti ninga momwe wandicitira umboni bwakukwanira ku Jeruzalemu, iwepo un’funikambo kukandicitira umboni ku Roma.”

12 Pomwe kudacena, Adjuda adapangana bzakuti aphe Paulo ndipo adalumbira mwa kucita kubzitemberera kuti angadadya lini ne kumwa cinthu akasaya kumupha. 13 Akhalipo amuna wakupitirira 40 omwe adalumbira kuti an’cita bzimwebzi. 14 Amuna amwewa adayenda kwa atsogoleri wa antsembe na kwa akulu acikalewa kuti: “Ifepano tacita lumbiro mwa kubzitemberera kuti tingadadya lini mpaka kupha Paulo. 15 Na tenepo imwepo pabodzi na wanthu wa m’nyumba ya mphala, mukauze mkulu wa acikunda kuti abwere naye kwa imwepo ninga kuti mukufuna kubvesesa bwino-bwino nkhani yace. Tsono akanati kufika ifepano tin’dzakhala wakukonzeka kumupha.”

16 Na tenepo, pomwe mwana wacimuna wa mpfumakazi ya Paulo adabva bzomwe iwo akhapanganabzo, iye adayenda ku kwarteli ndipo adakapita m’mwemo acikauza Paulo bzomwe adabvabzo. 17 Na bzimwebzi iye adacemera mkulu wa anyankhondo m’bodzi acimuuza kuti: “Tenga tswakali ndipo ndoko nalo kwa mkulu wa acikunda, pakuti iro lina mafala yakuti likalewe.” 18 Tenepo iye adatenga tswakalo aciyenda nalo kwa mkulu wa acikunda acikalewa kuti: “Paulo nyankawoko ule wandicemera acindikumbira kuti ndibwerese tswakali kwa imwepo thangwe rakuti iro lina mafala yakuti likuuzeni.” 19 Mkulu wa acikundayo adaphata boko tswakalo aciyenda nalo pambali ndipo adakalibvunza kuti: “N’ciyani comwe un’funa kundiuza?” 20 Tswakalo lidati: “Adjuda abverana kuti akukumbireni kuti mangwana mudzabwerese Paulo ku nyumba ya mphala ya adjuda, ninga kuti iwo an’funa kudziwa bzizinji bza iye. 21 Tsono lekani kubvuma bzomwe iwo akufuna thangwe amuna wakupitirira 40 abverana kuti am’phate ndipo iwo alumbira mwakucita kubzitemberera kuti anidya lini ne kumwa cinthu pokha-pokha akamupha; tsapano iwo mbakukonzeka ndipo akudikhirira kuti mubvume mkumbiro wawo.” 22 Mkulu wa acikundayo adauza tswakalo kuti: “Leka kuuza munthu ali-wentse bzomwe iwepo wandiuzabzi.” Patsogolo pace adamuuza kuti ayende.

23 Ndipo mkulu wa acikundayo adacemeresa akulu awiri wa anyankhondo, aciwauza kuti: “Konzekeresa acikunda 200, amuna 70 wakupakira makavalo na amuna 200 wakunyamula madipa, kuti ayende mpaka ku Sezareya pa nthawe 9 za usiku.* 24 Ndipo ubweresembo kavalo kuti Paulo akwire, kuti ayende mwakukhotcerereka kwa mtongi Felisi.” 25 Ndipo iye adanemba tsamba lomwe likhana mafala yakuti:

26 “Ine Klaudiyo Liziya, ndikunembera tsambali imwepo, wakulemekezeka mtongi wa Cigawo Felisi, ndikuti: Tambirani kulimba wangu! 27 Mwamunayu adaphatidwa na Adjuda ndipo akhadasala pang’ono kumupha, tsono inepano ndidabwera mwakamkulumize na thimu langu la acikunda ndipo ndidamupulumusa, thangwe ndidabva kuti iye ni nzika ya ku Roma. 28 Tsono pakufuna kudziwa mathangwe yomwe iwo akumupasira mulandu, ndamuyendesa kunyumba yawo ya mphala. 29 Inepano ndawona kuti iye akhapasidwa mulandu pa nkhani zakubverana na malamulo yawo, tsono ndiribe kumugumana na mulandu uli-wentse wakuthemera kufa ayai kuikhidwa m’kawoko. 30 Na tenepo, pakuti ndauzidwa bzinthu bzinango bzomwe iwo an’funa kucitira munthuyu, inepano ndikumutumiza mwakamkulumize kwa imwepo wakulemekezeka ndipo ndikutonga kuti wanthu omwe akumupasa mulanduwo adzalewe pamaso panu mulandu waceyo.”

31 Tenepo acikundawo adatenga Paulo usiku ninga momwe adauzidwira ndipo adayenda naye kwa Antipatride. 32 Mangwana yace acikunda omwe akhadapakira makavalo adayenda na Paulo ndipo anyankhondo winangowo adabwerera ku kwarteli. 33 Pomwe anyakupakira makavalowo adafika ku Sezareya adapereka tsamba pabodzi na Paulo kuna mtongi wa Cigawo. 34 Tenepo pomwe mtongi wa cigawoyo adawerenga tsambalo, adabvunza kuti iye akhali wa cigawo ciponi ndipo adauzidwa kuti akhali wa ku Silisiya. 35 Na bzimwebzi, iye adalewa kuti: “Inepano nin’dzatetekera mulandu wako mwatceru akafika wanthu omwe akukupasa mulanduwo.” Ndipo iye adatonga kuti Paulo afungiridwe pa mui pa mambo* Herode.

24 Pomwe zidapita ntsiku zixanu, mkulu wa antsembe Ananiya na akulu winango pabodzi na munthu munango wakucemeredwa Teritulo* adafika ndipo adafotokozera mtongi wa cigawo mathangwe yomwe akhapasira mulandu Paulo. 2 Pomwe Teritulo adapasidwa mpata wakuti alewelewe, iye adayamba kulewa nkhaniyo kuti:

“Ifepano tikuwona kuti tiri pa mtendere thangwe ra imwepo ndipo tikuwonambo kuti bzinthu bzikucinja. 3 Imwe Wakulemekezeka a Felisi, ifepano nthawe zentse na mbuto zentse tikuzindikira bzimwebzi ndipopa tikukutendani kwene-kwene. 4 Tsono kuti tileke kukumalirani nthawe ikulu, tikukumbira kuti mutibvesere mu kanthawe kakucepa, thangwe ra kudeka mtima kwanu kukulu. 5 Ife tawona kuti munthu umweyu akubweresa phiringu* pakati pa wanthu, akupumpsa Adjuda wentse pa dziko lentse la pantsi komwe kuna wanthu ndipo ni mtsogoleri wa thimu lakucemeredwa Nazareti. 6 Iye adayeza kupswipiza templo ndipopa ifepano tidamuphata. 7 —— 8 Mukamubvunza, mun’kwanisa kuwona mwekha bzinthu bzentse bzomwe ifepano talewabzi.”

9 Ndipo Adjuda adathandizirambo mafalaya acitsimikizira kuti bzinthu bzimwebzi bzikhali bzacadidi. 10 Pomwe mtongi wacigawoyo adatekenyesa msolo kuti Paulo alewelewembo, Pauloyo adatawira kuti:

“Inepano ndikudziwa kuti imwepo ndimwe mtongi wa wanthuwa kwa magole mazinji, na tenepo, ndine wakukonzeka kulewalewa kuti ndibzikhotcerere pamaso panu. 11 Imwepo mucifufudza mwekha mungawone kuti palibe kupita ntsiku 12 kucokera pomwe ndidayenda kukanamata ku Jeruzalemu, 12 ndipo amwewa alibe kundigumana ndikunesana na munthu ali-wentse mu templo ne kuyambisa phiringu m’nyumba zakunamatira ayai ku mbuto iri-yentse mu mzindamu. 13 Napo tsapano, iwo angakwanise lini kukupasani umboni pa bzinthu bzomwe akundinamizirabzi. 14 Tsono inepano ndikubvuma kuti nimbatumikira Mulungu wa makolo yangu yakale mwakubverana na njira yomwe iwo akuicemera kuti cipembedzo cipsa, thangwe nimbakhulupira bzinthu bzentse bzomwe bzimbagumanika mu Lamulo na m’mabukhu ya Apolofeta. 15 Ndipo inepano ndina cidikhiro kwa Mulungu, cidikhiro comwe wanthu awa anacombo, cakuti kun’dzakhala kumuka kwa anyakufa, wakulungama na wakusaya kulungama. 16 Thangwe ra bzimwebzi, inepano ndikucita nyongo kuti ndipitirize kubzibva* wakusaya mulandu pamaso pa Mulungu na wanthu. 17 Pomwe yadapita magole mazinji, inepano ndidabwera ku Jeruzalemu kuti ndidzapereke mphaso kwa wanthu wa mtundu wangu na kuperekambo ntsembe kwa Mulungu. 18 Pomwe inepano ndikhacita bzinthu bzimwebzi, iwo adandigumana ndiri wakucena mu templo mwakubverana na mwambo ndipo iwo alibe kundigumana ndina thimu la wanthu ayai ndikuyambisa phiringu. Tsono kumweko kukhana Adjuda winango wakucokera m’cigawo ca Aziya 19 ndipo iwo akhafunikambo kukhala pano kuti alewe mulandu omwe inepano ndinawo penu anayodi mathangwe yakundipasira mulandu. 20 Ayai abvunzeni wanthu omwe alipanowa alewe okha kuti ni mulandu wanyi omwe adandigumana nawo pomwe ndikhadaima pamaso pa wanthu omwe akhali m’nyumba ikulu ya mphala, 21 kusiya mafala mabodzi yokha yomwe ndidalewa mwakukuwa pomwe ndikhali pakati pawo yakuti: ‘Inepano ndikutongedwa lero pamaso panu thangwe ra kukhulupira kuti wanthu wakufa an’dzalamusidwa.’”

22 Pakuti Felisi akhadziwa bwino pakulewa bza Njira ya Mbuya iye adaimisa nkhaniyo acilewa kuti: “Inepano nin’dzatonga nkhani yanuyi akadzabwera Liziya, mkulu wa acikunda.” 23 Tenepo iye adauza mkulu wa anyankhondo kuti Paulo an’funika kubakafungiridwa m’kawoko acipasidwambo ufulu bunango nakuti abvumize axamwali wace kuti ambamubweresere bzinthu bzomwe iye angafune.

24 Pomwe zidapita ntsiku zingasi, Felisi adabwera pabodzi na mkazi wace Drusila omwe akhali Mdjuda. Na tenepo iye adacemeresa Paulo ndipo akhamutetekera pomwe akhafotokoza bza kukhulupira Kristu Jezu. 25 Tsono pomwe Paulo adayamba kulewa bza cirungamo, kubziphata na kutongedwa komwe kukubwera, Felisi adabva mantha ndipo adalewa kuti: “Tsapano ndoko, ndikadzawona mpata, nin’dzakucemeresa pomwe.” 26 Pa nthawe ibodzi-bodziyo iye akhadikhirira kuti Paulo angadamupasa kobiri ndipopa akhambamucemera kawiri-kawiri acimbaceza naye. 27 Tsono pomwe yadapita magole mawiri, Felisi adapitidwa m’mbuto na Porsiyo Festo ndipo thangwe rakuti Felisi akhafuna kukondwesa Adjuda, iye adasiya Paulo m’kawoko.

25 Na tenepo, pomwe Festo adakhazikisidwa ninga mtongi wa cigawo ca Djudeya, padapita ntsiku zitatu, ndipo iye adacoka ku Sezareya aciyenda ku Jeruzalemu. 2 Ndipo atsogoleri wa antsembe pabodzi na amuna wa udindo pakati pa Adjuda, adauza Festo mathangwe yomwe akhanayo kuna Paulo. Tenepo iwo adayamba kukumbira mwakungingimiza Festo 3 kuti awabvere kuti atumize Paulo ayende ku Jeruzalemu. Tsono iwo adalewa bzimwebzi thangwe akhafuna kuphata Pauloyo pa njira kuti amuphe. 4 Na tenepo, Festo adatawira kuti Paulo an’funika kupitiriza kufungiridwa ku Sezareya, nakuti Festoyo angadabwerera kumweko mwakusaya kucedwa. 5 Ndipo iye adati: “Mbayende na inepano wale omwe ambatsogolera pakati panu, kuti akafotokoze penu mwamunayu adacitadi bzinthu bzakuphonyeka.”

6 Tenepo pomwe zidapita ntsiku 8 ayai 10 ali ku Jeruzalemu, Festo adayenda ku Sezareya. Mangwana yace iye adakhala pa mpando wakutongera mirandu ndipo adacemeresa Paulo. 7 Pomwe Paulo adapita, Adjuda wakucokera ku Jeruzalemu adaima m’mbali mwace mwakumuzungulira, ndipo adayamba kumbamunamizira mirandu mizinji yakuipa, tsono akhakwanisa lini kupereka umboni bwa bzinthu bzimwebzi.

8 Na tenepo, Paulo adatawira mwakubzikhotcerera kuti: “Ndiribe kucita cinthu cakupitana na Lamulo la Adjuda, ayai kusaya kulemekeza templo ne kuphonyera Seza.” 9 Pakuti Festo akhafuna kukondwesa Adjuda, iye adatawira Paulo kuti: “Kodi iwepo un’funa kuyenda ku Jeruzalemu kuti ukatongedwe pamaso pangu thangwe ra bzinthu bzimwebzi?” 10 Tsono Paulo adatawira kuti: “Inepano ndidaima patsogolo pa mpando wakutongera wa Seza, ni pompano pomwe inepano nin’funika kutongedwera. Ndiribe kucitira Adjuda cinthu cakuipa, ninga momwe imwepo mukubvera. 11 Penu ndinayedi mulandu ndipo ndacita cinthu comwe n’cakuthemera kufa, ndinilamba lini kufako, tsono penu mulandu omwe akundilewera amunawa ngwakusaya kubveka, palibe omwe ana mathangwe yakundipereka kwa iwo pakufuna kuwakondwesa. Ndikukumbira kuti ndikatongedwe na Seza!” 12 Tenepo, pomwe adamala kulewalewa na thimu la anyakupereka malango, Festo adatawira kuti: “Iwepo wakumbira kuti ukatongedwe na Seza, uniyenda kukatongedwa na Sezayo.”

13 Pomwe zidapita ntsiku zing’ono-ng’ono, mambo* Agripa pabodzi na Berenise adayenda ku Sezareya kuti akamusane na Festo. 14 Pakuti iwo angadamala ntsiku zizinji ali kumweko, Festo adafikisa nkhani ya Paulo kwa mambo kuti:

“Pana munthu munango omwe Felisi adamusiya m’kawoko. 15 Ndipo pomwe ndikhali ku Jeruzalemu, atsogoleri wa antsembe na akulu-akulu wa Adjuda adandibweresera nkhani zakulewa bza iye, ndipo adandikumbira kuti iye apasidwe nyathwa. 16 Tsono ine, ndidawatawira kuti mtemo wa Roma umbabvumiza lini kupereka munthu wakupasidwa mulandu uko anati kugumana maso na maso na ule omwe akumupasa mulanduyo, kuti akhale na mpata wa kulewambo mbali yace. 17 Tenepo pomwe iwo adafika, mangwana yace, mwakusaya kucedwa, inepano ndidakhala pa mpando wakutongera mirandu ndipo ndidacemeresa munthuyo kuti abwere. 18 Pomwe anyakumupasa mulanduwo adaima kuti alewelewe, iwo alibe kulewa cinthu ciri-centse cakuipa cakubverana na bzomwe inepano ndikhawadikhirira. 19 Iwo akundonesana na iye pa nkhani za kunamata Mulungu pabodzi na bza munthu munango wakucemeredwa Jezu omwe adafa kale, tsono Pauloyu akulimbikira kulewa kuti munthuyo akana moyo. 20 Pakuti ndikhadziwa lini cakucita na kunesana kwawoko, inepano ndam’bvunza iye penu angadafuna kuyenda ku Jeruzalemu kuti akatongedwe nkhani yaceyo kumweko. 21 Tsono pomwe Paulo adakumbira kuti abakapitirize kufungiridwa pakudikhirira bzomwe Agusto Wakuyamba* alewe, inepano ndidatonga kuti iye afungiridwe mpaka pomwe ningadadzamutumiza kwa Seza.”

22 Na tenepo, Agripa adauza Festo kuti: “Inepano ndikufuna kumubva ndekha munthuyu.” Ndipo iye adati: “Mangwana mun’dzamubva.” 23 Ndipo mangwana yace, Agripa na Berenise adafika mwakusamwa kwene-kwene ndipo adapita m’nyumba yakutongera mirandu pabodzi na akulu-akulu wa acikunda na amuna wakulemekezeka wa mu mzinda. Tenepo Festo adatonga kuti Paulo abweresedwe. 24 Ndipo Festo adalewa kuti: “Mambo Agripa pabodzi na mwentse omwe muli pano, mukuwona munthuyu, Adjuda wentse adandikumbira ku Jeruzalemu na kuno mwakukuwa kuti munthu umweyu an’funika lini pomwe kukhala na moyo. 25 Tsono inepano ndazindikira kuti munthuyu alibe kucita cinthu cakuthemera kuti afe, tenepo pomwe iye adakumbira kuti akatongedwe na Agusto Wakuyamba, inepano ndam’tumiza. 26 Ndipopa, inepano ndiribe ciri-centse cakuti ndinembere Mbuya* wangu pakulewa bza iye. Tenepo, inepano ndamubweresa kwa imwepo mwentsene, maka-maka kwa imwepo Mambo Agripa, kuti imwepo mukamala kumufufudza, inepano ndiwonembo cinthu cakuti ndinembe. 27 Thangwe ine ndikuwona kuti bziri lini bwino kutumiza nyam’kawoko, mwakusaya kulewambo mathangwe ya mulandu wace.”

26 Agripa adauza Paulo kuti: “Ukubvumizidwa kulewalewa mbali yako.” Tenepo Paulo adafuthula boko lace aciyamba kulewa kuti:

2 “Mambo* Agripa, ndikukomedwa kuwonekera pamaso panu kuti lero ndifotokoze mwa kubzikhotcerera bzinthu bzentse bzomwe Adjuda akundinamizira. 3 Maka-maka thangwe rakuti imwepo mumbadziwa bwino miyambo yentse ya Adjuda na bzinthu bzomwe bzimbacitisa kuti iwo anesane. Ndipopa ndikukumbira kuti munditetekere mwatceru.

4 “Kulewa cadidi, momwe moyo wangu ukhaliri kucokera pa ubwana bwangu, pakati pa wanthu wa mtundu* wangu na mu Jeruzalemu, umbadziwika bwino kwa Adjuda wentse. 5 Iwo ambandidziwa kucokera kale-kale ndipo ambadziwambo kuti inepano ndikhali Mfarizeu mwa kuteweza miyambo yakunesa ya cipembedzo cathu ndipo iwo acifuna, angakhale mboni za bzimwebzi. 6 Tsono tsapano ndikutongedwa thangwe ra cidikhiro comwe ndinaco pa bzomwe Mulungu adaleweratu kwa makolo yathu yakale. 7 Ndipo madzinza yathu 12 yakudikhirirambo kuwona kukwanisika kwa bzomwe Mulungu akhadaleweratubzo mwa kumucitira utumiki bwakupambulika mwakusaya kulekeza usiku na masikati. Ndipopa inepano ndikutongedwa thangwe ra cidikhiro cimweci Mambo.

8 “Thangwe ranyi winango wa imwepo mukukumbuka kuti mpsakusaya kukwanisika kuti Mulungu alamuse wanthu wakufa? 9 Inepano caiye ndikhadatsimikiza mu mtima mwangu kucita bzentse bzomwe ningadakwanisa kuti dzina la Jezu wa ku Nazareti lireke kumwazika. 10 Ndipo bzimwebzi ndibzo bzomwe ndidacitadi mu Jeruzalemu, ndidafungira anyakucena azinji mu kawoko, thangwe ndikhadabvumizidwa na atsogoleri wa antsembe kucita bzimwebzi, ndipo pomwe iwo akhafuna kuphedwa inepano ndikhathandizirambo. 11 Ndipo kazinji kentse ndidawaboneresa m’nyumba zentse zakunamatira za Adjuda, mwa kuwangingimiza kuti asiye bzomwe akhakhulupirabzo; pakuti ndikhadakalipa nawo kwene-kwene, ndidafika pa kuwatewera m’mbuyo mpaka kufika m’mizinda ya kutali.

12 “Ntsiku inango inepano ndikhayenda ku Damasko thangwe ndikhadabvumizidwa na atsogoleri wa antsembe kuti ndikacite bzibodzi-bodzibzo kumweko. 13 Mambo, pomwe ine ndikhali mu mseu pa nthawe ya kumasikati, ndidawona ceza comwe cikhabvunika kwene-kwene kuposa dzuwa cakucokera kudzulu ndipo cidabvunika inepano pabodzi na wanthu omwe ndikhanawo pa ulendobo. 14 Tentse tidagwa pantsi ndipo pamwepo ndidabva fala mu cirewedwe ca Cihebereu lakundiuza kuti: ‘Saulo, Saulo, thangwe ranyi iwepo ukundizunza? Iwepo ukubziboneresa wekha mwa kumbathusa minyendo yako kumbuyo ninga ng’ombe yomwe inkuthusa-thusa minyendo kuti imenye mtcamu wa mbuya wace.’ 15 Tsono inepano ndidabvunza kuti: ‘Kodi ndimwe mbani Mbuya?’ Ndipo Mbuyayo adatawira kuti: ‘Ndine Jezu omwe iwepo ukumuzunza. 16 Tenepo lamuka uyime. Inepano ndawonekera kwa iwepo kuti ndikusankhule ninga mtumiki na mboni ya bzinthu bzomwe wawona na bzomwe nin’dzakuwonesa pakulewa bza inepano. 17 Ndipo inepano nin’dzakupulumusa kwa wanthu amwewa na kwa wanthu wa madzinza yanango ya komwe ndikukutuma 18 kuti ukafungule maso yawo, na kuwacosa mu mdima aciyenda pa ceza na kuwacosambo m’manja mwa Sathani aciyenda kwa Mulungu, kuti iwo alekereredwe pikado acitambira utaka pabodzi na anyakucena thangwe ra kukhulupira inepano.’

19 “Na tenepo Mambo Agripa, inepano ndidabvera masomphenya ya kudzulu yomwe ndidawonayo. 20 Tsono ndidafikisa mafalayo kuyambira kwa wanthu wakukhala ku Damasko, patsogolo pace ku Jeruzalemu, na kwa wanthu wa m’cigawo centse ca Djudeya pabodzi na kwa wanthu wa mitundu inango kuti iwo an’funika kukungula acitendeukira kwa Mulungu mwa kucita mabasa yakulatiza kuti akunguladi. 21 Ndipopa Adjuda adandiphata mu templo ndipo akhafuna kundipha. 22 Tenepo, pakuti Mulungu akundithandiza, ndikupitiriza mpaka lero kucitira umboni kwa wana na kwa akulu-akulu kubodzi, ndipo ndikulewa lini bzinthu bzakusiyana na bzomwe Apolofeta na Mozeji adalewa kuti bzingadacitika, 23 kuti Kristu angadadzabonera ndipo ninga wakuyamba kulamusidwa ku infa, iye an’dzapalizira kwa dzinza iri, pabodzi na kwa madzinza manango na kuperekambo ceza.”

24 Tsono pomwe Paulo akhafotokoza bzinthu bzimwebzi mwakubzikhotcerera, Festo adalewa mwakukuwa kuti: “Paulo, iwepo ukupenga! Kupfunza kwako kwene-kwene kukukupengesa!” 25 Tsono Paulo adatawira kuti: “Wakulemekezeka a Festo, inepano ndikupenga lini, ndikundolewa mafala ya cadidi na yanzeru. 26 Kulewa cadidi, imwe mambo omwe inepano ndikulewalewa namwe mwakutsudzuka, mukudziwa bwino bzinthu bzimwebzi; pakuti ndikutsimikiza kuti palibe cinthu ne cibodzi comwe imwepo mulibe kucidziwa, thangwe bzinthu bzimwebzi bziribe kucitidwa mwacintsintsi. 27 Mambo Agripa, kodi imwepo mumbakhulupira Apolofeta? Ine nin’dziwa kuti mumbakhulupira.” 28 Tsono Agripa adatawira Paulo kuti: “Mu kanthawe kakucepa iwepo ungacinje makumbukidwe yangu ndicikhala Mkristau.” 29 Pamwepo Paulo adatawira kuti: “Penu mu kanthawe kakucepa ayai mu nthawe ikulu mkumbiro wangu kwa Mulungu ngwakuti wentse omwe akundibvesera lero, sikuti imwe mwekha, akhale ninga ine kupambula makorentiya.”

30 Tenepo mambo adalamuka ndipo mtongi na Berenise pabodzi na amuna wentse omwe akhali pamwepo adalamukambo. 31 Ndipo pomwe iwo akhacoka, adayamba kulewalewa okha-okha kuti: “Munthu umweyu alibe kucita cinthu ciri-centse cakuthemera kufa ayai kumangidwa.” 32 Tenepo Agripa adauza Festo kuti: “Munthuyu angadatsudzulidwa bzingadakhala kuti iye alibe kukumbira kuti akatongedwembo na Seza.”

27 Tsapano pomwe bzidatsimikizika kuti tin’funika kucita ulendo bwa m’madzi bwakuyenda ku Italiya, Paulo pabodzi na anyam’kawoko winango adaperekedwa m’manja mwa mkulu wa anyankhondo dzina lace Juliyo, wa m’thimu la acikunda lakucemeredwa Augusto. 2 Tidapakira Xitima ya m’madzi* ya ku Adramitiyo yomwe ikhafuna kuyenda kukatsama m’magombe yakusiyana-siyana ya m’cigawo ca Aziya. Ifepano tidayamba ulendo bwathu ndipo tikhali pabodzi na Aristako wa mu mzinda wa Tesalonika, ku Masedoniya. 3 Mangwana yace tidatsama ku Sidoni, ndipo kumweko Juliyo adadekera mtima* Paulo, mwakuti adamubvumiza kuyenda kwa axamwali wace kuti akamuthandize.

4 Kumweko ifepano tidapakira pomwe xitima ya m’madzi ticipita na m’mphepete mwa ntsuwa ya Xipre yomwe ikhatikhotcerera ku mphepo yomwe ikhacokera komwe ifepano tikhayenda. 5 Patsogolo pace tidapita na pa nyanza pakati pa Silisiya na Pamfiliya ndipo tidakatsama ku gombe la Mira ku Lisiya. 6 Kumweko mkulu wa anyankhondoyo adawona xitima ya m’madzi yakucokera ku Alexandriya yomwe ikhayenda ku Italiya, ndipo iye adatipakizisa m’mwemo. 7 Pomwe zidapita ntsiku zizinji tikufamba pang’ono-pang’ono, tidafika mwakuneseka ku Kinido. Pakuti mphepo idatitazisa kupitiriza kufamba na mbali imweyire, tidapita na ku Salimoni kuti ntsuwa ya Kreta imbatikhotcerere ku mphepoyi. 8 Napo kuti tikhafamba mwakuneseka m’mphepete mwa ntsuwayo, tidafika pa mbuto inango yakucemeredwa Magombe Yabwino Yakutsamisira Xitima za m’Madzi, yomwe ikhali pafupi na mzinda wa Lazeya.

9 Pakuti ikhadapita nthawe itali ndipo kucita ulendo bwa m’madzi kukhali kwakugopswa thangwe nthawe ya kubzimana kudya* ikhadapita kale, Paulo adawacenjeza 10 kuti: “Amunamwe, ndikuwona kuti bziri lini bwino kuti tiyende, thangwe tikayenda xitimayi ingamire, tingaluze mitolo ndipo ifepano tingafe.” 11 Tsono mkulu wa anyankhondoyo m’mbuto mwa kubvera bzomwe Paulo adalewa, iye adabvera nyakufambisa xitima na mwenekaciro xitimayo. 12 Pakuti gombero likhali lini lakuthemera kuti tikhale kumweko minyezi yentse ya conziyo, azinji adabverana na nzeru yakuti tiyende na cidikhiro cakuti tikafike ku Fenike, limweri ni gombe la ku Kreta lakutsamisira xitima za m’madzi, lomwe likhadanyang’anisa kumabvadzuwa ndipo likhadafunguka ku mbali ya madidi na ku mbali ya madzere. Iwo akhafuna kuti nthawe ya conziyo ikatimalire kumweko.

13 Pomwe mphepo ya ku suli* idayamba kupepedza pang’ono-pang’ono, iwo adakumbuka kuti tsapano bzomwe akhafuna bzin’citika, tenepo iwo adapfuwa ndangula aciyamba kufamba na m’mphepete mwa ntsuwa ya Kreta. 14 Tsono mwakusaya kutenga nthawe, conzi camphanvu cakucemeredwa Eurakilo* cidabwera kucokera ku ntsuwako. 15 Conzico cidamenya xitimayo mwakuti tidatazira kupitiriza kuyenda kutsogolo ndipo tidasiya kucapako ticitengedwa na conzico. 16 Tenepo tidafamba m’mphepete mwa ntsuwa inango ing’ono yakucemeredwa Kauda kuti tikhotcerereke, tsono napo bzikhali tenepo, tidaneseka kwene-kwene kupfuwa mwadiya* mng’ono omwe ukhali m’mbuyo mwa xitimayo. 17 Pomwe adamala kupakiza mwadiyayo mu xitimamo, iwo adayamba kumanga xitimayo na bzingwe kuti ilimbe, ndipo pakugopa kuti xitimayo ingatcerere mu mcenga wa Sirte,* iwo adatereza bzingwe bzakumangira cinguwo ca xitimayo ndipo thangwe ra bzimwebzi xitimayo idayamba kugwinyiwa na mphepo. 18 Pakuti tikhamenyedwa kwene-kwene na conzi camphanvuco, mangwana yace wanthuwo adayamba kutaya mitolo m’madzi kuti xitimayo ipepukidwe. 19 Ndipo pa ntsiku yacitatu iwo adathusa m’madzi bzingwe bza xitimayo.

20 Kwa ntsiku zizinji dzuwa na nyenyezi bzikhawoneka lini ndipo conzi camphanvu* cikhatimenya, pakumalizira pace cidikhiro cathu cakuti tingadapulumuka cidayamba kumala. 21 Pomwe iwo adamala nthawe itali ne kudya cinthu, Paulo adaima pakati pawo acilewa kuti: “Amunamwe mungadabvera malango yangu yakuti tireke kucoka ku Kreta kule, tingadabonera lini tenepa ndipo ne tingadaluza lini bzinthubzi. 22 Tsono napo bziri tenepo, inepano ndikukuuzani kuti khwimikani, thangwe palibe ne m’bodzi wa imwepo omwe anifa, koma xitima yokhayi ndiyo yomwe iniluzika. 23 Usiku bwapitabu, anjo wa Mulungu wangu omwe inepano nimbamunamata wawonekera kwa inepano 24 ndipo wandiuza kuti: ‘Leka kugopa Paulo, pakuti iwepo un’funika kukawonekera kwa Seza ndipo kuthumizira bzimwebzi Mulungu an’pulumusa iwepo pabodzi na wanthu wentse omwe unawo pa ulendobu.’ 25 Na tenepo khwimikani amunamwe, pakuti ndikukhulupira Mulungu kuti bzin’citika ndendende ninga momwe ndauzidwira. 26 Tsono xitima yathuyi in’lubzika pafupi na ntsuwa inango.”

27 Pomwe zidamala ntsiku 14, usiku bwace tikhagwinyidwa uku na uku na mphepo pa nyanza ya Adriya, ndipo pakati pa usiku anyakufambisa xitimawo adayamba kukumbuka kuti tikhadasala pang’ono kufika kunja. 28 Tenepo iwo adapima kuzika kwa nyanzayo ndipo adawona kuti zikhali metro 36, tsono iwo adafamba pomwe pang’ono acipima ndipo adawona kuti zikhadasala metro 27. 29 Pakuti akhagopa kuti xitimayo ingakasunthe minyala, iwo adathusa ndangula zinai za kumbuyo kwa xitimayo acimbafunisisa kuti kucene mwakamfulumize. 30 Tsono anyakufambisa xitimawo akhafuna kuthawa, tenepo iwo adabulusa m’madzi mwadiya mng’ono ule acikhala ninga kuti akufuna kubulusa ndangula za kutsogolo kwa xitimayo. 31 Paulo adazindikira bzimwebzi ndipo adauza mkulu wa anyankhondo pabodzi na acikundawo kuti: “Amunawa akasaya kupitiriza kukhala mu xitima muno, imwepo mun’pulumuka lini.” 32 Na tenepo, acikundawo adagwata bzingwe bzomwe akhadamangira mwadiya mng’onoyo ndipo adausiya uciyenda.

33 Pomwe kukhayamba kucena, Paulo adauza wentse kuti adye ndipo iye adalewa kuti: “Lero mwafikisa ntsiku 14 mukudikhirira ndipo mukanati kudya cinthu ciri-centse. 34 Na tenepo, ndikukulimbikisani kuti mudye ciri-centse ndipo bzimwebzi bzin’kuthandizani kwene-kwene, thangwe palibe ne na m’bodzi wa imwepo omwe aniluza napo tsisi libodzi la mu msolo mwace.” 35 Pomwe adamala kulewa bzimwebzi, iye adatenga pau acipemba kwa Mulungu pamaso pa wentse ndipo adainyedza aciyamba kudya. 36 Tenepo wentse thupo lawo lidamala ndipo adayambambo kudya. 37 Ndipo tentse mu xitimamo tikhalipo wanthu wakukwana 276. 38 Pomwe iwo adadya acikhuta, adataya tirigu m’madzi kuti xitimayo ipepukidwe.

39 Pomwe kudacena, iwo alibe kukwanisa kuzindikira dzikolo, tsono adawona mbuto inango yomwe ikhana mcenga ndipo adakumbuka kuti bzicikwanisika akaimise xitimayo pamwepo. 40 Na tenepo, iwo adagwata bzingwe bzakumangira ndangula acizilekera m’madzi ndipo pa nthawe ibodzi-bodziyo adatsudzula bzingwe bzakumangira ng’ombo. Pomwe adafuthula nguwo ya kutsogolo ya xitimayo, iwo adayenda pa mbuto yomwe ikhana mcengayo. 41 Na tenepo pomwe iwo adakamenyesa ku mcenga omwe ukhali pamwepoyo, xitimayo idatcerera ndipo idadjima kutsogolo kwace icitazira kutekenyeka; tsono idayamba kusweka kumbuyo kwace thangwe ikhamenyedwa na mabimbi. 42 Na bzimwebzi, acikundawo adakumbuka bza kupha anyam’kawokowo kuti paleke kuwoneka anyakuthawa. 43 Tsono mkulu wa anyankhondo akhafunisisa kupulumusa Paulo, ndipopa adawaletsa kucita bzimwebzo. Ndipo iye adalewa kuti, wale omwe ambadziwa kuyantca ayambe ndiwo kumogera m’madzimu kuti ayende kunja, 44 ndipo iye adalewambo kuti winangowo atewere mwakuphatirira matabwa, ndipo winango aphatirirembo bzinthu bzinango bzakubaduka bza xitimayo. Tenepo wentse adafika pa ntsuwapo na moyo.

28 Pomwe tidapulumukapo tidazindikira kuti ntsuwayo ikhacemeredwa Malta. 2 Ndipo wanthu wa pa ntsuwapo* adatidekera mtima kwene-kwene. Iwo adaphatiza moto thangwe kukhabvumba na kudjedjera ndipo tentse tidatambiridwa bwino. 3 Tsono Paulo adatenga nkhuni aciziikha pa moto, ndipo kunkhuniko kudacoka nyoka ya veneno* thangwe ikhabva kutentha ndipo idamuluma iciphatirira kuboko lace. 4 Pomwe wanthu wa pa ntsuwapo adawona nyoka ya venenoyo iri lerere ku boko lace, adayamba kumbauzana kuti: “Kulewa cadidi munthu umweyu ni kambowadi, thangwe napo iye wapulumuka m’nyanza, Cirungamo* ciribe kum’bvuma kuti umweyu apitirize kukhala na moyo.” 5 Na tenepo, iye adakunkhumulira nyokayo pa moto ndipo pomwe adalumidwapo palibe kucitika cinthu. 6 Tsono iwo akhakumbuka kuti iye angadagwera ayai kufa. Pomwe iwo adadikhirira kwa nthawe itali ndipo adawona kuti palibe cinthu cakuipa comwe cidamucitikira, adacinja makumbukidwe yawo ndipo adayamba kulewa kuti iye akhali mulungu.

7 Pafupi na pamwepo pakhana minda ya munthu munango omwe akhanyang’anira ntsuwayo wakucemeredwa Pubiliyo, iye adatitambira bwino ndipo adakhala nafe ntsiku zitatu. 8 Tsono pai wace wa Pubiliyo akhaduwala ndipo akhadagona thangwe akhadafesuka ndipo akhana dizenteriya.* Tenepo Paulo adayenda kukawawona ndipo adapemba aciikha manja yace pa iwo ndipo adawapoza. 9 Pomwe bzimwebzi bzidacitika, wanthu winango wa pa ntsuwapo omwe akhaduwalambo adabwera kuna iyeko ndipo akhapozedwa. 10 Ndipo iwo adatilemekezambo mwa kutipasa bzinthu bzizinji. Ndipo pomwe tikhafuna kuyamba ulendo bwathu bwa m’madzi, iwo adatipasa bzentse bzomwe ifepano tikhafunikira.

11 Pomwe idapita minyezi mitatu, tidacoka na xitima ya m’madzi* yomwe ikhana cizindikiro ca “Wana Wacimuna wa Zeu.” Xitimayi ikhali ya ku Alexandriya ndipo ikhadakhala pa ntsuwapo kudikhirira kuti minyezi yentse ya conzi ipite. 12 Ndipo tidatsama pa gombe lakutsamisira xitima za m’madzi la ku Sirakuza ticimala ntsiku zitatu tiri kumweko. 13 Pomwe tidacoka kumweko, tidafika ku Rejio. Mangwana yace conzi ca ku suli* cidayamba kumenya, ndipo mkati mwa ntsiku ziwiri tidafika ku Puteyoli. 14 Kumweko tidagumana abale ndipo iwo adatingingimiza kuti tikhale nawo pabodzi kwa ntsiku 7, patsogolo pace tidayenda ku Roma. 15 Pomwe abale wa kumweko adabva bza ifepano, adabwera pa msika wa Apiyo na ku Nyumba Zitatu zakutambirira alendo kuti adzagumane nafe. Pomwe Paulo adawawona, iye adatenda Mulungu ndipo adalimbikisidwa. 16 Pakumalizira pace tidadzafika ku Roma, ndipo Paulo adabvumizidwa kumbakhala yekha acimbalindiridwa na mcikunda m’bodzi.

17 Pomwe zidapita ntsiku zitatu, iye adacemeresa amuna wa udindo pakati pa Adjuda. Pomwe iwo adabwera acitsonkhana iye adawauza kuti: “Amunamwe, abalemwe, napo kuti inepano ndiribe kuphonyera mbumba, ne kuphonyera miyambo ya makolo yathu yakale, inepano ndidamangidwa ku Jeruzalemu ndiciperekedwa m’manja mwa Aroma. 18 Pomwe adamala kundibvunza, iwo akhafuna kunditsudzula, thangwe ndikhalibe mulandu wakuthemera kuphedwa. 19 Tsono pomwe Adjuda adalamba kuti inepano nditsudzulidwe, ndidakumbira kuti ndikatongedwembo na Seza. Inepano ndidacita bzimwebzi sikuti ndikhana mathangwe yakulewera kuipa mbumba yangu. 20 Ndipopa inepano ndakucemeresani kuti ndikuuzeni kuti ndamangidwa na makorentiya thangwe ra cidikhiro comwe Ajirayeri anaco.” 21 Iwo adamutawira kuti: “Ifepano tiribe kutambira tsamba liri-lentse la kucokera ku Djudeya lakulewa bza iwepo ndipo palibe mwanzathu na m’bodziyo omwe adabwera kucokera kumweko kudzatiuza ayai kulewa cinthu cakuipa pakulewa bza iwepo. 22 Tsono ifepano, tawona kuti bziri bwino tibve makumbukidwe yako, thangwe kulewa cadidi, comwe tikudziwa n’cakuti thimu limweri limbalewedwa kuipa kuli-kwentse.”

23 Na tenepo, iwo adapangana ntsiku yakuti adzagumane naye pomwe, ndipo adabwera azinji pamui pomwe iye akhadafikira. Ndipo kucokera macibese mpaka usiku, iye adawafotokozera nkhani yentse mwakucitira umboni bwakukwanira pakulewa bza umambo bwa Mulungu. Iye adacita bzimwebzi mwakuphatisa basa Lamulo la Mozeji na mabukhu ya Apolofeta pakufuna kuti iwo atokonyedwe mitima kuti akhulupire Jezu. 24 Wanthu winango adayamba kukhulupira bzomwe iye adalewabzo ndipo winango alibe. 25 Tsono pakuti adanesana okha-okha, iwo adayamba kucoka, tenepo Paulo adalewa mafala yakuti:

“Mzimu wakucena udalewa cadidi kuna makolo yanu yakale mwakuphatisa basa mpolofeta Zaiya 26 kuti: ‘Ndoko kuna wanthuwa ukalewe kuti: “Imwepo mun’dzabvadi, tsono mun’dzabvesesa lini, kuwona mu’dzawona, koma mun’dzazindikira lini bzomwe mukuwonabzo. 27 Thangwe wanthuwa mitima yawo njakuuma. Iwo adabva na makutu yawo, koma alibe kucita bzomwe adabvabzo. Adafunga maso na makutu yawo kuti aleke kubva ne kuwona cinthu ne kuzindikira na mitima yawo, acitendeuka kuti inepano ndiwapoze.”’ 28 Tsono dziwani kuti mafala ya momwe Mulungu an’dzapulumusira wanthu, yatumizidwa kwa wanthu wa mitundu inango; ndipo mwakusaya kupenukira iwo an’dzayatetekera.” 29 ——

30 Na tenepo, Paulo adapitiriza kukhala kumweko magole mawiri pa nyumba yomwe akhambacita kulugari, ndipo akhambatambira na manja mawiri wentse omwe akhambayenda kukamuwona. 31 Iye akhawapalizira bza Umambo bwa Mulungu na kuwapfunzisa bza Mbuya Jezu Kristu mwakusaya mantha na mwakusaya kuphingizidwa.