TSAMBA LACIWIRI LAKUYENDA KWA AKOLINTO

1 Ine Paulo, omwe ndine mpostolo wa Kristu Jezu mwakufuna kwa Mulungu, ndiri pabodzi na Timotio m’bale wathu ndipo ndikutumiza tsambali ku gwere la Mulungu lomwe liri ku Kolinto na kwa anyakucena wentse omwe ali ku Akaya:

2 Kudeka mtima kukulu na mtendere wakucokera kwa Mulungu Baba wathu na Mbuya wathu Jezu Kristu, kukhale namwe.

3 Atumbizidwe Mulungu, Baba wa Mbuya wathu Jezu Kristu, Baba wa ntsisi kwene-kwene na Mulungu omwe ambatsangalaza wanthu mu njira iri-yentse, 4 omwe ambatitsangalaza* pa mabvuto* yathu yentse, kuti tikwanise kutsangalazambo wale omwe akugumana na mabvuto ya mtundu uli-wentse, thangwe ifepano tidatsangalazidwambo na Mulungu. 5 Pakuti timbabonera kwene-kwene thangwe ra Kristu, timbatsangalazidwambo kwene-kwene thangwe ra Kristuyo. 6 Tsono penu tikugumana na mayezo,* ni cakulinga cakuti mutsangalazidwe na kupulumusidwa. Penu ifepano timbatsangalazidwa, imwepo mumbatsangalazidwambo. Mtsangalazo umweyu, un’kuthandizani kuti mupirire mabvuto yomwe ifepano timbagumana nayombo. 7 Ndipo cidikhiro cathu kwa imwepo n’camphanvu, thangwe ifepano tikudziwa kuti imwepo mukugumanambo na mabvuto yakundendemerana na yomwe ifepano tikugumana nayo ndipo mun’dzatsangalazidwambo ninga ifepano.

8 Abale, tikufuna lini kuti muleke kudziwa bza mazunzo yomwe tidagumana nayo mu cigawo ca Aziya. Ifepano tidagumana na mabvuto yakunesa kwene-kwene, mwakuti tingadakwanisa lini kupirira mwa mphanvu zathu zokha, ndipo ne tikhakumbukira lini kuti tingadapulumuka. 9 Kulewa cadidi, ifepano tikhakumbuka kuti tingadafa. Bzimwebzi bzidacitika kuti tileke kuthemba mphanvu zathu, koma kuti tithembe Mulungu omwe ana mphanvu zakulamusa anyakufa. 10 Pa ngozi ikulu ya infa, iye adatipulumusa ndipo an’dzatipulumusa. Ifepano tina cidikhiro cakuti iye an’dzapitiriza kutipulumusa. 11 Imwepo mungatithandizembo mwakucita mipembo yakudandaulira kuti pakhale wanthu azinji wakutithandiza na mipembo yakutenda, pakuti bzomwe tidapasidwa mwakudeka mtima ni mtawiro wa mipembo ya wanthu azinji.

12 Pakuti cinthu comwe timbabzitumbiza naco n’cakuti: Ifepano tina mtima wakucena, thangwe pomwe tikhali pakati pa wanthu wa m’dzikoli, maka-maka kwa imwepo, tidalatiza makhalidwe yakucena na yabwino mwakubverana na bzomwe tidapfunzisidwa na Mulungu, sikuti na nzeru za wanthu; koma thangwe ra kudeka mtima kukulu kwa Mulungu. 13 Pakuti ifepano tiribe kukunemberani bzinthu bzomwe mun’kwanisa lini kuwerenga* na kubzibvesesa ndipo ndikudikhira kuti mun’pitiriza kubvesesa bwino-bwino* bzinthu bzimwebzi, 14 ndipo ninga momwe imwepo mwafikira pakubvesesa kuti ifepano ndife thangwe la kubzitumbiza kwanu, imwepo mun’dzakhalambo thangwe la kubzitumbiza kwathu pa ntsiku ya Mbuya wathu Jezu.

15 Tenepo, na citsimikizo cimweci, nin’funa kuyamba kubwera kuna imwepo kuti mukondwe kaciwiri;* 16 thangwe ndikhafuna kupita ndicikuwonani pakuyenda ku Masedoniya, ndipo pakubwerera ndikhafuna kupita ndicikuwonani pomwe, kuti patsogolo pace mudzandiperekeze pang’ono pakuyenda ku Djudeya. 17 Pomwe ndikhafuna kucita bzimwebzi, kodi ndikhalibe kukumbuka bwino-bwino? Ayai, kodi nimbacita bzinthu ninga wanthu wa m’dzikoli pakulewa kuti “inde” ndipo patsogolo pace ndicilewa kuti “ne”? 18 Pakuti Mulungu ngwakukhulupirika, ifepano timbakuuzani lini kuti “inde” ndipo patsogolo pace nkudzalewa kuti “ne.” 19 Thangwe Mwana wa Mulungu Jezu Kristu, omwe inepano, Silvano* na Timotio tidamupalizira kwa imwepo, alibe kukhala “inde” pa nthawe ibodzi-bodziyo acikhala “ne,” koma kwa iye, “inde” adakhaladi “inde.” 20 Pakuti bziribe basa kuti mpsingasi bzomwe Mulungu adalewa, ibzo bzimbakhaladi “inde” thangwe ra Jezu. Na tenepo, thangwe ra iye timbalewa “Ameni” kwa Mulungu, ndipo bzimwebzi bzimbapereka ulemerero kwa Mulunguyo thangwe ra ifepano. 21 Tsono omwe ambatitsimikizira kuti imwepo na ifepano ndife wa Kristu, ni Mulungu ndipo ndiye omwe adatidzoza. 22 Iye adatiikhambo cizindikiro cace. Cizindikiroco ni mzimu wakucena omwe uli m’mitima mwathu, omwe umbatitsimikizira bzinthu bzomwe bzikubwera kutsogolo.

23 Mulungu akhale mboni yangu kuti thangwe lomwe lidandicitisa kuti mpaka pano ndileke kubwerera ku Kolinto, ndakuti ndikufuna lini kuthumizira msunamo wanu. 24 Bzimwebzi bzikuthandauza lini kuti ifepano tikutonga cikhulupiro canu, koma ndife anyabasa anzanu kuti mukhale wakukondwa, pakuti imwepo ndimwe wakulimba thangwe ra cikhulupiro canu.

2 Ndakumbuka bzakusaya kukusunamisani ulendo buno, ndikabwera kumweko kudzakuzungirani. 2 Pakuti inepano ndikadzakusunamisani, kodi mbani an’dzanditsangalaza? 3 Ndanemba bzimwebzi kuti ndikabwera kumweko ndileke kudzasunama na wale omwe nin’funa kudzakondwa nawo, pakuti ndina citsimikizo cakuti bzinthu bzomwe bzin’ndikondwesa, bzin’kondwesambo mwentsenemwe. 4 Inepano ndidakunemberani tsamba lire, pomwe ndikhatsautsika na kuzunzika mu mtima ndicimbacokambo misozi kwene-kwene, sikuti ndikufuna kuti musuname koma kuti mudziwe lufoyi likulu lomwe ndinalo kwa imwepo.

5 Pakuti penu munthu wacita cinthu cakusunamisa, iye alibe kusunamisa ine, koma wasunamisambo mwentsenemwe. Nin’funa lini kulewa bzizinji pa nkhani imweyi. 6 Kutsimulidwa komwe wacitidwa na wanthu azinji, n’kwakukwanira kwa munthu umweyo; 7 tenepo, imwepo mun’funika kumulekerera tsapano na mtima wentse na kumutsangalaza kuti iye aleke kukundidwa na msunamo ukulu kwene-kwene. 8 Na tenepo, ndikukucenjezani kuti mulatize lufoyi lanu kwa iye. 9 Pa thangwe limweri, inepano ndakunemberani kuti ndiwone penu imwepo mumbabvera m’bzinthu bzentse. 10 Mukalekerera munthu pa cinthu ciri-centse, inepano nin’dzamulekererambo. Kulewa cadidi, cinthu ciri-centse comwe ndalekerera munthu, penu ciripo, ndacita bzimwebzo thangwe ra imwepo pamaso pa Kristu, 11 kuti tileke kukundidwa* na Sathani, pakuti timbadziwa bzakulinga bzace.

12 Pomwe ndidafika ku Trowa kuti ndipalizire mafala yabwino yakulewa bza Kristu, udandifungukira mwayi pa basa la Mbuya.* 13 Mtima wangu udaneseka kwene-kwene thangwe ndiribe kugumana na m’bale wangu Tito. Tenepo, ndidagoneka abale wa kumweko ndiciyenda ku Masedoniya.

14 Tsono titende Mulungu pabodzi na Kristu, omwe ambatitsogolera ninga acikunda omwe akunda ku nkhondo ndipo akubwerera. Kudziwa Mulungu kuli ninga mnuntci wabwino ndipo thangwe ra basa lathu, mnunciyo ukumwazika pali-pentse. 15 Ifepano omwe tikupalizira bza Kristu, tiri ninga mnuntci wabwino kwa Mulungu ndipo mnunci umweyu umbafikira wale omwe ali pa njira yakuyenda kukapulumusidwa na wale omwe ali pa njira yakuyenda kukapfudzidwa. 16 Kwa wale omwe akuyenda kukapfudzidwa, ifepano ndife mnuntci wa infa, tsono kwa wale omwe akuyenda kukapulumuka, ndife mnunci wamoyo, wakuyendesa ku moyo. Tsono mbani omwe adathemera kuphata basa limweri? 17 Ifepano ndife wakuthemera, pakuti timbacita lini malonda na mafala ya Mulungu ninga momwe azinji ambacitira, koma timbalewalewa na mtima wentse ninga wanthu wakutumidwa na Mulungu, inde pamaso pa Mulungu ninga ateweri wa Kristu.

3 Kodi mpsakufunika kuti tikuuzeni pomwe kuti ndife yani? Kodi tikufunikira matsamba yakulewa bzabwino pakulewa bza ifepano ninga wanthu winango? Kodi mpsakufunikira kuti imwepo mutinembere matsamba ya mtundu umweyu? Ne letu! 2 Imwepoletu ndimwe tsamba lathu, lakunembedwa m’mitima mwathu, lakudziwika na lakuwerengedwa na wanthu wentse. 3 Pakuti bzikuwonekeratu padeca kuti imwepo ndimwe tsamba la Kristu, lakunembedwa na ifepano ninga atumiki wa Kristu, tsamba lomwe liribe kunembedwa na tinta, koma lidanembedwa na mzimu wakucena wa Mulungu wamoyo ndipo liribembo kunembedwa pa minyala, koma lidanembedwa m’mitima mwanu.

4 Ifepano tina citsimikizo cimweci kwa Mulungu thangwe ra Kristu. 5 Ifepano timbabziwona lini kuti ndife wakuthemera kuphata basa la Mulungu, koma Mulunguyo ndiye adatisankhula kuti tiphate basa limweri. 6 Kulewa cadidi, iye ni omwe adaticitisa kukhala wakuthemera ninga atumiki wa mpangano upsa, sikuti na lamulo lakucita kunembedwa, koma na mzimu wakucena, thangwe malamulo yakunembedwa yambatonga kuti munthu aphedwe, tsono mzimu umbapasa moyo.

7 Kuthumizira bzimwebzi, penu malamulo yakucita kunembedwa yomwe yambabweresa infa, yomwe yadanembedwa pa minyala yadabwera na ulemerero bumwebu, mwakuti wana wa Ajirayeri alibe kukwanisa kunyang’anisa nkhope ya Mozeji thangwe ra ulemererobo, ulemerero bomwe bungadapfudzidwa, 8 kodi malamulo ya mzimu wakucena yakhafunika lini kukhala na ulemerero bukulu kuposa bumwebu? 9 Penu lamulo lomwe limbatonga kuti wanthu aphedwe lina ulemerero, ndiye kuti basa lomwe limbatsogolera wanthu ku cirungamo lin’funika kukhala na ulemerero bukulu kwene-kwene. 10 Kulewa cadidi, ulemerero bwa lamulo budadzamala mphanvu pakundendemezera na ulemerero bwa mpangano upsa. 11 Penu lamulo lakucita kunembedwa lomwe lingadapfudzidwa likhana ulemerero, ndiye kuti mpangano upsa omwe un’dzakhala mpaka kale-kale una ulemerero bukulu kwene-kwene.

12 Pakuti tina cidikhiro cimweci, timbalewalewa mwakutsimikiza. 13 Ifepano timbacita lini bzinthu ninga Mozeji, omwe akhampsinkha nkhope yace na nguwo kuti wana wa Jirayeri aleke kuwona na maso yawo ulemerero bwa lamulo lomwe lingadapfudzidwa. 14 Iwo alibe kubvesesa, pakuti mpaka pano, nguwo ibodzi-bodziyo imbakhala ikalipo pomwe mpangano wakale ukuwerengedwa, thangwe imbacosedwa mwa Kristu yekha basi. 15 Kulewa cadidi, mpaka pano, bzomwe Mozeji adanemba bzikakhala bzikuwerengedwa, mitima yawo imbakhala ikadampsinkha na nguwoyo. 16 Tsono munthu akacinja njira zace kuti anamate Yahova, cinguwoco cimbacosedwa. 17 Yahova ni mzimu ndipo pomwe pana mzimu wa Yahova pana ufulu. 18 Ndipo tentsenefe, omwe tina nkhope zakusaya kumpsinkha, tiri ninga masupedyo yakulatiza ulemerero bwa Yahova. Ifepano timbasandusidwa kuti tikhale ninga Mulungu, ticilatiza mwakubwereza-bwereza ulemerero bwa Mulunguyo, ndendende ninga momwe Yahova omwe ni mzimu akufunira.

4 Tenepo, pakuti tina utumiki bumwebu thangwe ra ntsisi zomwe tidalatizidwa, ifepano timbabwerera lini m’mbuyo. 2 Ndipo tazimbula bzinthu bzakupasa manyazi bzakucitika mwakabisira ndipo tikufamba lini mwa cinyengo ne kupitanisa mafala ya Mulungu, koma timbadziwisa padeca cadidi, ticicitisa mtima wa munthu ali-wentse kudziwa kuti ifepano timbacita bzinthu bzabwino pamaso pa Mulungu. 3 Tenepo, penu mafala yabwino yomwe tikupalizira njakubisika, njakubisika kwa wanthu omwe akuyenda kukapfudzidwa. 4 Kwa wanthu amwewa, mulungu wa dzikoli wampsinkha makumbukidwe ya anyakusaya kukhulupira, kuti aleke kuwona ceza ca mafala yabwino ya ulemerero yakulewa bza Kristu, omwe ni cifanikiso ca Mulungu. 5 Pakuti tikupalizira lini bza ifepano, koma bza Jezu Kristu kuti ni Mbuya ndipo ifepano ndife akapolo wanu thangwe ra Jezu. 6 Pakuti Mulungu ndiye omwe adalewa kuti: “Siyani ceza cibvunike kucokera mu mdima,” iye adabvunika mitima yathu na ceza ca cidziwiso pakulewa bza Mulungu mwakuphatisa basa nkhope ya Kristu.

7 Tenepo, tina cuma cimweci m’bzombo bza dongo, kuti mphanvu yakuposa yacibadwa icokere kwa Mulungu sikuti kwa ifepano. 8 Timbapanikizidwa mwa mtundu uli-wentse, koma sikuti mwakucita kutaziriratu kupfukunyuka; nzeru zimbatimalira, koma sikuti mwakusayiratu kudziwa bzomwe tingacite; 9 Timbazunzidwa, koma timbasiyidwa lini tekha; wanthu ambatigwesera pantsi, koma timbafa lini. 10 Kuli-kwentse timbagumana ngozi ya infa ninga Jezu, bzomwe bzimbalatiza wanthu kuti timbabonerambo ninga iye. 11 Timbakhala na moyo, tsono moyo wathu nthawe zentse umbakhala uli pa ngozi thangwe rakuti timbatewera Jezu. Umu ni momwe timbalatizira wanthu kuti timbabonera ninga momwe Jezu adabonerera. 12 Tenepo, infa ikuphata basa mwa ifepano, tsono moyo ukuphatambo basa mwa imwepo.

13 Pakuti tina cikhulupiro cibodzi-bodzi ninga momwe bzidanembedwera kuti: “Nimbakhulupira Mulungu, ndipopa ndalewa”, ifepanombo timbakhulupira Mulungu ndipopa tikulewa, 14 pakudziwa kuti Ule omwe adalamusa Jezu kwa anyakufa an’dzatilamusambo pabodzi na Jezuyo, acitiyendesa pabodzi na imwepo kuna iye. 15 Pakuti bzinthu bzentsenebzi bzikucitika thangwe ra imwepo, kuti kudeka mtima kukulu kuthumizirike, thangwe wanthu azinji akutenda Mulungu ndipo bzimwebzi bzikucitisa kuti Mulunguyo apasidwe ulemerero.

16 Na tenepo, tikubwerera lini m’mbuyo, napo kuti mathupi yathu yakumala koma unthu bwathu bwa mkati bukukhalisidwa bupsa ntsiku na ntsiku. 17 Pakuti mabvuto yomwe timbagumana nayo njakanthawe ndipo ni mang’ono, yambatibweresera ulemerero bomwe bumbayenda bucithumizirika ndipo m’bwakusaya kumala; 18 pomwe tikunyang’anisisa bzinthu bzakusaya kuwoneka na maso, sikuti bzinthu bzakuwoneka na maso. Pakuti bzinthu bzakuwoneka na maso mpsakanthawe, tsono bzinthu bzakusaya kuwoneka, mpsakusaya kumala.

5 Pakuti tikudziwa kuti nyumba yathu ya pantsi pano yomwe ni tendiri ikadzapfudzidwa,* tin’dzakhala na nyumba kwa Mulungu, nyumba yakusaya kumala kudzulu, yomwe iribe kukonzedwa na manja ya wanthu. 2 Pakuti tikubuula m’nyumba yomwe tikukhalayi, pakufunisisa kubvala yathu yomwe iri kudzulu, 3 kuti tikadzaibvala, tileke kudzakhala pezi. 4 Kulewa cadidi, ife omwe tiri m’tendiri, tikubuula na kutsautsika thangwe tikufuna lini kuikhundula, koma tin’funa kubvala inango, kuti cire comwe cimbafa, cipitidwe m’mbuto na moyo. 5 Mulungu ndiye omwe adatikonzekeresa kuti titambire bzimwebzi, iye watipasa mzimu ninga citsimikizo ca bzire bzomwe bzikubwera.

6 Tenepo nthawe zentse timbatsimikiza ndipo timbadziwa kuti pomwe tikana mathupi yamweya, tiri kutali na Mbuya, 7 pakuti tikufamba mwa cikhulupiro, sikuti mwa bzinthu bzakuwoneka na maso. 8 Tsono timbapenukira lini kuti tikufunisisa kukhala kutali na thupiri, kuti tikakhale na Mbuya. 9 Napo tikhale naye pabodzi ayai tikhale naye kutali, cakulinga cathu n’cakuti ticite bzinthu bzakumudekera. 10 Pakuti tentse tin’dzawonekera pamaso pa mpando wakutongera mirandu wa Kristu, kuti ali-wentse akatongedwe mwakubverana na bzinthu bzomwe iye adacita pomwe akhali m’thupiri, bzabwino ayai bzakuipa.*

11 Pakuti ifepano timbadziwa thandauzo la kugopa Mbuya, tikupitiriza kucitisa wanthu kukhulupira bzomwe timbawapfunzisa ndipo Mulungu ambatidziwa bwino, ndipopa ndikufunambo kuti ndidziwike bwino m’mitima mwanu. 12 Ifepano tikufuna lini kubzitumbiza pomwe kwa imwepo, koma kukulimbikisani kuti mumbalewe bza ife mwakusamwirira, kuti mukwanise kutawira wale omwe ambabzitumbiza thangwe ra mawonekedwe yawo, sikuti thangwe ra bzomwe iwo ali mu mtima. 13 Penu tacita bzinthu ninga anyamsala, tacitira Mulungu, tsono penu tacita bzinthu mwanzeru, tacitira imwepo. 14 Pakuti lufoyi la Kristu limbaticitisa kumubvera, thangwe ifepano tafika pakuzindikira kuti munthu m’bodzi adafera wanthu wentse, thangwe wanthu wentsewo akhali wakufa. 15 Iye adafera wanthu wentse, kuti wale omwe ana moyo, aleke kukhala na moyo kuti ambacite bzakufuna bzawo bzokha basi, koma ambacite kufuna kwa ule omwe adawafera, acilamusidwa.

16 Tenepo, kuyambira tsapano timbawona lini munthu mwakuthupi. Napo kuti tidamudziwa Kristu mwakuthupi, tsapano timbamudziwa lini mwa njira imweyo. 17 Na tenepo, penu munthu ngwakubverana na Kristu, iye ni cirengedwe cipsa; bzinthu bzakale bzapita ndipo pana bzinthu bzipsa. 18 Koma bzinthu bzentse bzimbacokera kwa Mulungu, iye adatithandiza kuti tikhale naye pomwe pa uxamwali mwakuphatisa basa Kristu, acitipasa utumiki bwakuthandiza wanthu kuti akhale naye pomwe pa uxamwali. 19 Bzimwebzi bzikuthandauza kuti Mulungu ambaphatisira basa Kristu kuti athandize wanthu kukhala pomwe pa uxamwali na iye, ndipo ambawapasa lini mulandu thangwe ra bzakuphonya bzawo. Iye adatipasa basa lakuuza wanthu kuti akhale pomwe pa uxamwali na Mulungu.

20 Na tenepo, ifepano ndife aimikiri m’mbuto mwa Kristu, ninga kuti Mulungu akudandaulira wanthu mwakuphatisira basa ifepano. Ndipo ninga anyakupita m’mbuto mwa Kristu, timbadandaulira wanthu kuti: “Khalani pomwe pa uxamwali na Mulungu.” 21 Kristu alibe kucita pikado ndipo Mulungu adamupereka ninga ntsembe thangwe ra pikado zathu, kuti tikhale wakulungama pamaso pa Mulunguyo thangwe ra iye.

6 Pakuti tikuphata basa pabodzi na Mulungu, tikukudandaulirani kuti muleke kubvuma kudeka mtima kwace kukulu, muciluza cakulinga ca kudeka mtimako. 2 Pakuti iye ambati: “Pa nthawe yakubvumizika ndidakubva ndipo pa ntsiku ya cipulumuso ndidakuthandiza.” Ona! Ino tsapano ni nthawe yakuthemera. Ino ni ntsiku yacipulumuso.

3 Ifepano tikucita lini cinthu ciri-centse comwe cingakalipise* munthu, kuti utumiki bwathu buleke kukhala na mathangwe. 4 Koma mwa njira iri-yentse, timbalatiza kuti ndife atumiki wa Mulungu mwakupirira bzinthu bzizinji, matsautso, kusaya bzinthu, bzineso, 5 kumenyedwa, kuikhidwa m’kawoko, kucitiridwa phiringu, kuphata basa lamphanvu, kusaya kugona na kusaya cakudya. 6 Ndipo ifepano timbalatizambo kuti ndife atumiki wa Mulungu mwakukhala na moyo wakucena, wacidziwiso, wakupirira, wakudeka mtima, wa mzimu wakucena, wa lufoyi lakusaya cinyengo, 7 mwakumbalewa cadidi, mwakuthemba mphanvu ya Mulungu na kunyamula bzifuzo bza nkhondo ya cirungamo ku boko lamadidi* na lamadzere,* 8 pa nthawe ya ulemerero na yakunyozedwa, pa nthawe yakulewedwa bzakuipa na yakulewedwa bzabwino. Timbawonedwa ninga wanthu wacinyengo, napo kuti timbalewa cadidi, 9 ninga wanthu wakusaya kudziwika, napo kuti timbadziwika, ninga kuti tasala pang’ono kufa,* koma onani, tina moyo, ninga wanthu wakupasidwa nyathwa* napo kuti tiribe kuperekedwa kuti tikaphedwe, 10 ninga wakusunama koma wakukondwa nthawe zentse, ninga wakusauka koma wakudala kwene-kwene, ninga wakusaya cinthu, koma tina bzinthu bzentse.

11 Timbalewalewa namwe mwakutsudzuka imwe abale wathu wa ku Kolinto, ndipo timbakufunani* kwene-kwene. 12 Ifepano timbakufunani kwene-kwene, tsono imwepo mumbatifuna lini kwene-kwene. 13 Tenepo, ndikulewalewa namwe ninga wana wangu, imwepo mun’funika kumbatifuna kwene-kwene.

14 Lekani kumangidwa pa djoki libodzi na anyakusaya kukhulupira. Kodi pana kubverana kuponi pakati pa cirungamo na kusaya kubvera malamulo? Ayai pana kubverana kuponi pakati pa ceza na mdima? 15 Kuthumizira bzimwebzi, kodi pana kubverana kuponi pakati pa Kristu na Beliyali?* Ayai pana kubverana kuponi pakati pa munthu wakukhulupira na wakusaya kukhulupira? 16 Ndipo pana kubverana kuponi pakati pa templo ya Mulungu na bzifanikiso? Pakuti ifepano ndife templo ya Mulungu wamoyo, ninga momwe Mulunguyo adalewera kuti: “Inepano nin’dzakhala pakati pawo ndicifamba pakati pawo. Ine nin’dzakhala Mulungu wawo ndipo iwo an’dzakhala wanthu wangu.” 17 Yahova akuti: “‘Cokani pakati pawo, siyanani nawo ndipo lekani kukhuya cinthu cakupswipa’”; “‘ndipo inepano nin’dzakutambirani.’” 18 “‘Inepano nin’dzakhala Baba wanu ndipo imwepo mun’dzakhala wana wangu wacimuna na wacikazi,’ walewa tenepo Yahova Wamphanvu-zentse.”

7 Abale wakufunidwa, pakuti Mulungu adatiuza bzinthu bzimwebzi, mbatibziceneseni pa bzinthu bzomwe bzimbapswipiza thupi na mzimu, ticikhalambo wakucena pa kugopa Mulungu.

2 Tibvumeni m’mitima mwanu. Tiribe kucitira munthu cakuipa, tiribe kupumpsa munthu ne kukhulukha munthu. 3 Ndikulewa lini bzimwebzi kuti ndikupaseni mulandu, pakuti ine ndikhadalewa kale pakuyamba kuti imwepo muli m’mitima mwathu, kuti tidzafere pabodzi, ticidzakhalambo na moyo pabodzi. 4 Inepano nimbalewalewa namwe mwakutsudzuka kwene-kwene ndipo nimbasamwa kwene-kwene thangwe ra imwepo. Mtima wangu walimbikisidwa ndipo ndikukondwa kwene-kwene m’matsautso yathu yentse.

5 Kulewa cadidi, pomwe tidafika ku Masedoniya, tiribe ne na kupumako, koma tidapitiriza kubonera mu njira iri-yentse. Kunja wanthu akhaticitira phiringu ndipo mkati tikhakhala na mantha. 6 Koma Mulungu omwe ambatsangalaza wale omwe adasunama, adatitsangalaza na kufika kwa Tito; 7 ndipo sikuti thangwe ra kufika kwace kokha, koma thangwe rakuti iye adatsangalazidwambo na imwepo. Pakuti iye wandifotokozera kuti mukufunisisa kundiwona, msunamo wanu na thupo lomwe munalo kwa ine, mwakuti bzimwebzi bzathumizira cikondweso cangu.

8 Pakuti napo ndidakusunamisani na tsamba lomwe ndidakutumizirani lire, nimbadandaula lini na bzimwebzi, napo kuti pakuyamba ndikhadandaula (pakuti ndidawona kuti tsambalo lidakusunamisani, koma kwa kanthawe kakucepa), 9 tsapano, ine ndikukomedwa kwene-kwene, sikuti thangwe ra kusunama kwanu, koma thangwe rakuti kusunamako kwakucitisani kuti mukungule. Pakuti imwepo mudasunama mwakubverana na kufuna kwa Mulungu ndipo mulibe kuluza cinthu ciri-centse thangwe ra bzomwe tidakunemberanibzo. 10 Pakuti kusunama mwakubverana na kufuna kwa Mulungu, kumbacitisa munthu kukungula kuti adzapulumuke ndipo ambadandaula lini na bzimwebzo; tsono kusunama mwakubverana na kufuna kwa dziko, kumbabweresa infa. 11 Onani kuti kusunama mwakubverana na kufuna kwa Mulungu, kwakucitisani kuti mufunisise kucita bzinthu bzabwino, kubzicenesa, kuipidwa na bzakuphonya bzomwe mudacita, kugopa Mulungu, kufuna kukungula, kutumikira Mulungu na mtima wentse na kukonzesa bzakuphonya bzanu. Imwepo mudacita bzinthu bzentsenebzi mwakuthemera, kuti mumalise bvuto limweri. 12 Napo kuti ndidakunemberani tsamba, ndiribe kulinemba thangwe ra ule omwe adaphonya, ne omwe adaphonyeredwa, koma ndidakunemberani kuti ndiwone penu mungadalatiza pamaso pa Mulungu kuti mukufunisisadi kutibvera. 13 Na thangwe limweri, ifepano timbatsangalazidwa.

Kuthumizira pa mtsangalazo wathu, tikukomedwa kwene-kwene thangwe ra kukondwa kwa Tito, pakuti mwentsenemwe mwamulimbikisa. 14 Pakuti ndidamuuza mwakusamwirira pakulewa bza imwepo ndipo ndiribe kucita manyazi; tsono pakuti bzentse bzomwe tidakuuzani bzikhali bzacadidi, bzidawonekambo kuti bzentse bzomwe tidauza Tito mwakusamwirira bzikhali bzacadidi. 15 Kuthumizira bzimwebzi, lufoyi lace likulu kwa imwepo limbathumizirika, akambakumbukira bza kubvera kwanu na momwe mudamutambirira mwa ulemu. 16 Inepano ndikukomedwa thangwe rakuti ningakukhulupireni pa bzinthu bzentse.

8 Tsapano abale, tikufuna kuti mudziwe bza kudeka mtima kukulu komwe Mulungu adakulatiza ku magwere ya ku Masedoniya. 2 Pomwe akhagumana na mabvuto makulu thangwe ra mayezo, iwo akhali wakukondwa kwene-kwene ndipo adalatiza kuti akhali wakupasa, napo kuti akhabonera. 3 Pakuti iwo adacita bzimwebzi mwakubverana na bzomwe akhanabzo, inde, ndikuwacitira umboni bwakuti iwo adapereka bzizinji kuposa bzomwe akhanabzo. 4 Mwakufuna kwawo, iwo adatikumbira mwakubwereza-bwereza kuti tiwapasembo mwayi wakupasa na mtima wentse, acicitambo mbali pa utumiki bwakuthandiza anyakucena. 5 Ndipo iwo adacita bzizinji kuposa bzomwe tikhadikhirira, inde, mwakufuna kwa Mulungu, iwo adabzipereka na mtima wentse pa basa la Mbuya ndipo adatitumikirambo. 6 Tenepo, tikulimbikisa Tito kuti amalize basa lomwe adaliyamba pakati panu, lakutambira bzakupereka bzomwe mukucita na mtima wentse. 7 Pakuti ndimwe wakudala pa bzinthu bzentse ninga m’cikhulupiro, kudziwa kulewalewa, cidziwiso, nyongo pa bzinthu bzentse na lufoyi lomwe ifepano timbakulatizani. Tenepo, khalanimbo wakudala pa nkhani yakupereka mphaso na mtima wentse.

8 Ndikukutongani lini, koma ndikulewa bzimwebzi thangwe ra nyongo yomwe winango ambailatiza, nakuti ndiwone penu lufoyi lanu ndacadidi. 9 Pakuti imwepo mukudziwa bza kudeka mtima kwa Mbuya wathu Jezu Kristu, napo kuti iye akhali wakudala, adakhala wakusauka thangwe ra imwepo, kuti imwepo mudale thangwe ra kusauka kwace.

10 Pa nkhani imweyi, nzeru yangu njiyi: Kuteweza bzimwebzi n’kwaphindu kwa imwepo, pakuti papita gole libodzi kucokera pomwe mudayamba basali, ndipo mulibe kundoyamba kokha, koma mudalatiza kuti mukufunisisa kulicita. 11 Tenepo, malizani basa lomwe mudaliyamba mwakubverana na bzomwe munabzo, mukacita tenepoyo mun’dzalimaliza ninga momwe mukhafunira pakuyamba. 12 Kupereka na mtima wentse kumbakondwesa Mulungu, thangwe iye ambafuna kuti munthu apereke mwakubverana na bzomwe anabzo. 13 Pakuti inepano ndikufuna lini kuti winango alulidwe ndipo imwepo mulemedwe; 14 koma ndikufuna kuti pakhale kundendemerana, kuti bzizinji bzomwe munabzo pa nthawe ino, bzithandize pa bzomwe iwo alibe, nakuti bzomwe iwo anabzo, bzithandizembo bzomwe imwepo mulibe, pacikhala kundendemerana. 15 Ninga momwe bzidanembedwera kuti: “Omwe akhana bzizinji, bziribe kumuwandira ndipo omwe akhana bzing’ono-ng’ono bziribe kumucepera.”

16 Atendedwe Mulungu thangwe rakuti Tito ambakucitirani thupo ninga momwe ife timbakucitiranimbo, 17 pakuti iye adabvuma bzomwe tidamuuza ndipo akufunisisa kucita bzomwe tidamukumbira, ndipo iye akubwera kumweko mwakufuna kwace. 18 Ifepano tikumutumiza pabodzi na m’bale munango omwe ambatendedwa na magwere yentse, thangwe ra basa lakupalizira mafala yabwino. 19 Mpsimwebzi lini bzokha, koma iye adasankhulidwambo na magwere kuti akhale mwanzathu wa paulendo pomwe tikugawira mphaso ya kudeka mtima, kuti ulemerero buyende kwa Mbuya na kulatiza kuti ndife wakufunisisa kuthandiza winango. 20 Tenepo, tikutcenkha kuti wanthu aleke kutilewa kuipa thangwe ra bzakupereka bzaufulu bzomwe tikusamalirabzi. 21 Pakuti timbasamalira bzinthu bzentse mwakukhulupirika, sikuti pamaso pa Yahova yekha basi, koma na pamasombo pa wanthu.

22 Kuthumizira bzimwebzi, tikuwatumiza pabodzi na m’bale wathu, omwe nthawe zizinji adalatiza kuti ngwakubzipereka kwene-kwene ndipo kubzipereka kwaceko tsapano kwathumizirikiratu thangwe rakuti iye ambakukhulupirani. 23 Tsono penu alipo omwe an’funa kudziwa kuti Tito ni yani, iye ni mwanzangu omwe nimbatumikira naye pabodzi kuti tikuthandizeni; ndipo penu alipo omwe an’funa kudziwa bza abale omwe anaye pabodziwo, iwo ni apostolo wa m’magwere na ulemerero bwa Kristu. 24 Tenepo, alatizeni kuti mumbawafuna, ndipo citisanimbo kuti wanthu wa m’magwere awone thangwe lomwe limbaticitisa kulewa bza imwepo mwakusamwirira.

9 Tsapano, pakulewa bza utumiki bwa anyakucena, bzin’funika lini kuti ndicite kukunemberani, 2 thangwe inepano nimbadziwa kufunisisa kwanu kuthandiza ndipo nimbalewa bzimwebzo kwa abale wa ku Masedoniya mwakusamwirira, kuti papita kale gole libodzi, abale wa ku Akaya adakonzeka kukuthandizani. Ndipo nyongo yanuyo, yacitisa azinji wa iwo kufunambo kuthandiza. 3 Tsono ndikutumiza abalewa, kuti mafala yomwe timbalewa bza imwepo mwakusamwirira yakuti ndimwe wakukonzeka kuthandiza, yaleke kuwoneka ninga yakunama, nakuti mukhale wakukonzeka ninga momwe ndidakuuzirani. 4 Bzingadakhala kuti ifepano tabwera pabodzi na abale wa ku Masedoniya ticidzakugumanani kuti mukanati kukonzeka, ifepano tingadanyala thangwe rakuti timbakukhulupirani, ndipo imwepo mungadanyalambo. 5 Ndipopa, ndawona kuti bzikhali bwino kulimbikisa abale kuti abwere kumweko ifepano tinati kufika, kuti adzakuthandizeni kutsonkhanisa mphaso zomwe mukupereka na mtima wentse, zomwe mudalewa pakuyamba kuti mungadapereka, kuti tikabwera tidzagumane kuti zaperekedwa kale na mtima wentse, sikuti mwakucita kungingimizika.

6 Tsono pa nkhani imweyi, omwe an’bzala pang’ono, an’dzabvunambo pang’ono ndipo omwe an’bzala bzizinji, an’dzabvunambo bzizinji. 7 Ali-wentse acite ninga momwe watongera mu mtima mwace, sikuti mwakudandaula ne mwakukakamizika, thangwe Mulungu ambafuna munthu omwe ambapereka mwakukondwa.

8 Kuthumizira bzimwebzi, Mulungu angakwanise kukulatizani kudeka mtima kwace kukulu, kuti nthawe zentse mukhale na bzinthu bzakukwanira pa moyo wanu, nakutimbo mukhale na bzinthu bzizinji bzakucita pa basa liri-lentse labwino. 9 (Ninga momwe bzidanembedwera kuti: “Iye ambapereka mphaso zizinji na mtima wentse ndipo iye ambapasa anyakusauka. Cirungamo cace cin’dzapitiriza mpaka kale-kale.” 10 Tsono Ule omwe ambapereka mbeu zizinji kwa anyakubzala na kuwapasa pau kuti adye, an’dzakupasani mbeu zakuti mubzale ndipo an’dzakupasani na mtima wentse, acithumizirambo bzisapo bza cirungamo canu.) 11 Mulungu akukusimbani kwene-kwene kuti mukhale wakupasa mu njira zakusiyana-siyana ndipo wanthu an’dzatenda Mulungu, thangwe ra mphaso zanu zomwe tin’dzapereka kwa winango; 12 thangwe utumikibu bun’thandiza lini pa bzakusaya bza anyakucena okha, koma bun’citisambo wanthu azinji kutenda kwene-kwene Mulungu. 13 Ndipo mwakupereka mphasoyi, mun’dzalatiza kuti ndimwe wanthu wa mtundu wanyi, ndipo iwo an’dzatumbiza Mulungu thangwe rakuti imwepo mukucita bzinthu mwakubverana na mafala yabwino yakulewa bza Kristu, thangwe ndimwe wakupasa kwa iwo na kwa wanthu wentse. 14 Iwo an’dzakupemphererani, acilatiza kuti ambakufunani thangwe ra kudeka mtima kukulu komwe Mulungu adakulatizani.

15 Atendedwe Mulungu thangwe ra kutipasa mphaso yafovolo yomwe tingakwanise lini kuifotokoza.

10 Ine Paulo, omwe winango wa imwepo ambalewa kuti ndine wakutepa ndikakhala pakati panu, koma wakukhwimika ndikakhala ndiri kutali na imwepo, ndikukudandaulirani mwa kubzicepesa na kudeka mtima kwa Kristu. 2 Ndikudikhirira kuti ndikadzafika kumweko, wale omwe ambakumbuka kuti tikufamba mwakubverana na dzikoli, an’dzakhala acinja, kuti ndireke kudzawatsimula mwamphanvu. 3 Pakuti napo moyo wathu ngwakundendemerana na wa wanthu wentse, ifepano tikumenya lini nkhondo mwakutewezera makumbukidwe ya m’dzikoli. 4 Pakuti bzifuzo bzathu bza nkhondo, mpsakucokera lini m’dzikoli, koma ni bzifuzo bzamphanvu bzomwe Mulungu adatipasa, bzomwe bzimbakwanisa kupfudza bzinthu bzakuzika kwene-kwene. 5 Pakuti tikupfudza makumbukidwe yakunama na cakuphingiza ciri-centse comwe cimbacitisa kuti wanthu aleke kudziwa Mulungu, ndipo tikunyang’anira makumbukidwe yentse ninga nyam’kawoko, kuti yabvere Kristu, 6 ticikhalambo wakukonzeka kupasa nyathwa munthu ali-wentse wakusaya kubvera, malinge mulatize kuti ndimwe wakubvera pa bzentse.

7 Imwepo mumbawona bzinthu mwakubverana na mawonekedwe yace. Tsono penu alipo omwe ambatsimikiza kuti ngwa Kristu, akumbukire pomwe nfundo iyi: Ninga momwe iye ngwa Kristu, ifembo ndife wa Kristu. 8 Inepano ningadacita lini manyazi, napo ningadasamwa mwakupitirira malire pang’ono thangwe ra utongi bomwe Mbuya adatipasa kuti tikulimbikiseni, sikuti tikugweseni. 9 Pakuti nin’funa lini kuti mukumbuke kuti nimbakutumizirani matsambaya kuti ndikugopsweni. 10 Pakuti winango wa imwepo ambati: “Mafala ya m’matsamba yace njakuthandiza na yamphanvu, tsono akakhala alipo, iye ngwakutepa ndipo mafala yace nja zii.” 11 Tsono wanthu amwewa adziwe kuti bzomwe timbalewa m’matsamba yathu, ndibzo bzomwe tin’dzacita tikadzabwera kumweko. 12 Pakuti tin’funa lini kundendemerana ne kubzindendemezera na winango omwe ambabzikuza. Iwo alibe nzeru thangwe ambafuna kundendemerana ndipo ambabzindendemezera okha-okha.

13 Tenepo, ifepano tin’samwa lini na bzinthu bzomwe bziri kunja kwa malire yomwe tidapasidwa, koma tin’samwa mkati mwa malire yomwe Mulungu adatiikhira, yomwe yakuphatanidzambo imwepo. 14 Kulewa cadidi, tikupitirira lini malire ninga kuti imwepo muli kunja kwa malire yathu, pakuti ndife omwe tidayamba kufika kumweko kudzakuuzani mafala yabwino yakulewa bza Kristu. 15 Ifepano tikusamwa lini kunja kwa malire yomwe tidapasidwa ayai kusamwira basa lomwe munthu munango adacita na nyongo, koma tin’funa kuti cikhulupiro canu cipitirize kukula ndipo bzomwe tidacita bzipitirize kuthumizirika mkati mwa malire yathu. Tenepo, tin’dzacita mabasa mazinji, 16 pakupalizira mafala yabwino m’mphimpha zakutali na imwepo, kuti tileke kusamwira gawo lomwe munthu munango adapalizira kale. 17 “Tsono omwe an’samwa, asamwe mwa Yahova.” 18 Pakuti omwe ambabzitumbiza yekha, ambabvumidwa lini, koma ule omwe ambatumbizidwa na Yahova.

11 Napo kuti nimbawoneka ninga tsiru, koma ndikufuna kuti mumbapirire nande ndipo imwepo mumbandipiriradi! 2 Pakuti ndina ntcanje na imwepo, ntcanje ninga ya Mulungu,* pakuti inepano ndidakuuzani kuti mumange banja na mwamuna m’bodzi yekha basi, kuti ndikuperekeni kwa Kristu ninga dende lakucena. 3 Koma ndikugopa kuti munthu angadzonge makumbukidwe yanu ninga momwe nyoka yakucenjera idapumpsira Eva, mucileka kutewera Kristu na mtima wentse, mucisiyambo kukhala wakucena ninga momwe iye akufunira. 4 Inepano ndikulewa bzimwebzi thangwe kumweko kucibwera munthu omwe akupalizira Jezu munango wakusiyana na omwe timbapalizira, ayai mucitambira mzimu munango wakusiyana na omwe mudatambira ayai mafala yabwino yakusiyana na yomwe mudatambira, imwepo mungabvumiretu mafala yaceyo. 5 Thangwe ndikuwona kuti palibe cinthu comwe cikutsimikizira kuti ndine mng’ono kuposa apostolo wanu, omwe ambacita bzinthu ninga kuti mbabwino kwene-kwene. 6 Napo kuti ndiribe luso lakulewalewa, bzin’funa lini kulewa kuti ndiribe cidziwiso, pakuti tidakulatizani kale padeca kuti tina cidziwiso pa bzinthu bzentse.

7 Ayai kodi ndidacita pikado pomwe ndidabzicepesa kuti imwepo mukuzidwe, pomwe ndidadziwisa na mtima wentse mafala yabwino ya Mulungu kwa imwepo fovolo? 8 Ndidatambira thandizo kwa magwere manango ndipo bzimwebzi bzidakhala ninga kuti ndaba kucokera kwa iwo na cakulinga cakuti ndikutumikireni. 9 Pomwe ndikhanamwe ndicimbasaya bzinthu bzinango bzakufunikira, ndiribe kunesa munthu ali-wentse, thangwe abale wakucokera ku Masedoniya adandipasa bzentse bzomwe ndikhafunikira. Ndidacita ciri-centse kuti ndireke kukhala mtolo kwa ali-wentse ndipo nin’dzapitiriza kucita bzimwebzo. 10 Pomwe ndikali mteweri wa Kristu, palibe comwe cingandiletse kusamwirira bzimwebzi ku Akaya kwentse. 11 Thangwe ranyi ndiribe kutambira cinthu ciri-centse cakucokera kwa imwepo? Kodi ni thangwe rakuti nimbakufunani lini? Mulungu an’dziwa kuti nimbakufunani.

12 Tsono inepano nin’pitiriza kucita bzomwe ndikucitabzi kuti ndinyamalise wale omwe ambasamwa, acimbalewa kuti mbakundendemerana na ife, thangwe ra udindo bomwe anabo. 13 Wanthu amwewa ni apostolo wakunama, anyabasa wacinyengo omwe ambanamizira kukhala apostolo wa Kristu. 14 Bzimwebzi mpsakudabwisa lini, thangwe napo Sathani caiyeyo ambanamizira kukhala anjo wa ceza. 15 Tenepo mpsakudabwisa lini kuti atumiki wacembo ambabzisandusa atumiki wacirungamo, tsono cimaliziro cawo cin’dzakhala cakubverana na mabasa yawo.

16 Ndikukuuzani pomwe kuti: Lekani kukumbuka kuti ndine tsiru, tsono napo penu mumbakumbuka tenepoyo, ndibvumeni ninga tsiruyo kuti ndireke kubzikuza kwene-kwene. 17 Bzomwe ndikulewalewabzi ndikulewa ninga momwe ambalewalewera wanthu wakubzikuza na wakubzithemba kwene-kwene, ndikulewalewa lini mwakutewezera ciratizo ca Mbuya, koma ninga momwe ambalewalewera wanthu wakusaya nzeru. 18 Pakuti wanthu azinji akubzikuza na bzinthu bza m’dzikoli, inepano nin’dzabzikuzambo. 19 Imwepo mumbakumbuka kuti ndimwe wanthu “wanzeru,” koma mumbalekerera wanthu wakusaya nzeru. 20 Kulewa cadidi, imwepo mumbapirira wale omwe ambakucitisani kukhala akapolo, omwe ambapamba bzinthu bzanu, omwe ambabzikuza na ali-wentse omwe ambakukwantsani.

21 Mpsakupasa manyazi kwa ife kulewa bzimwebzi, pakuti mumbatiwona ninga kuti ndife wakutepa.

Penu winango ambacita bzinthu mwakukhwimika, inembo nimbacita bzinthu mwakukhwimika, napo kuti winango ambandiwona ninga tsiru. 22 Kodi iwo ni Ahebereu? Inembo ndine Mhebereu. Kodi iwo ni Ajirayeri? Inembo ndine Mjirayeri. Kodi iwo ni wana wa* Abalahamu? Inembo ndine mwana wa Abalahamu. 23 Kodi iwo ni atumiki wa Kristu? Inepano ndikutawira ninga nyamsala, ndipo ndalatiza mwa njira zakusiyana-siyana kuti ndine mtumiki wa Kristu kuposa iwo. Ndaphata basa kwene-kwene, ndapita m’kawoko kazinji kentse, ndamenyedwa ulendo bwakusaya kulewengeka ndipo kazinji kentse ndikhakhala pa ngozi ya infa. 24 Kaxanu kentse ndidapfumbulidwa mitxamu 39 na Adjuda. 25 Ndidamenyedwa na mpsimbo katatu kentse, ndidabomedwa na minyala kabodzi, ndidalubzika na xitima ya m’madzi* katatu kentse, ndipo ntsiku ibodzi ndidamala usiku bwentse na masikati yentse m’nyanza; 26 ndipo maulendo mazinji ndidakhala pa ngozi za m’mikulo, pa ngozi za akambowa, pa ngozi za wanthu wa mtundu wangu caiwo, pa ngozi na wanthu wa mitundu inango, pa ngozi mu mzinda, pa ngozi mu dambo, pa ngozi mu nyanza, pa ngozi na abale wacinyengo, 27 pa basa la mphanvu, usiku buzinji ne kugona, njala na nyota, nthawe zizinji kusaya cakudya, mphepo na usiwa.*

28 Kuthumizira bzimwebzi, pana bzinthu bzinango bzomwe bzimbandicitisa thupo ntsiku zentse, nimbacita thupo na magwere. 29 Mbani omwe ngwakutepa inepano ndicisaya kukhalambo wakutepa? Mbani omwe ambakhukhumudwa inepano ndicisaya kusunama?

30 Penu nimbabzikuza, nimbabzikuza pa bzinthu bzomwe bzimbalatiza kutepa kwangu. 31 Mulungu na Baba wa Mbuya Jezu, Ule omwe an’themera kutumbizidwa mpaka kale-kale akudziwa kuti ndikunama lini. 32 Ku Damasko mtongi wa cigawo omwe akutongedwa na mambo* wa ku Areta, adaikha alindiri ku mzinda wa Damasko kuti andimange, 33 tsono adandiikha m’citundu acindicosa na pa janera ya mpanda wa mzindayo, ndipo ndidapulumuka m’manja mwawo.

12 Nin’funika kusamwa. Tenepo, nin’dzalewa bza masomphenya yomwe Mbuya adandilatiza na mafala yomwe adandiuza, napo kuti kucita bzimwebzi kulibe phindu kwa inepano. 2 Inepano nimbadziwa munthu omwe ni nyakupfunza wa Kristu, omwe magole 14 m’mbuyomu, adatakulidwa aciyendesedwa kudzulu kwacitatu. Penu adatengedwa na thupi lace ayai penu alibe kutengedwa na thupi lace, inepano nin’dziwa lini, koma Mulungu ndiye akudziwa. 3 Inde, inepano ndikumudziwa munthu umweyu. Penu adatengedwa na thupi lace, ayai penu alibe kutengedwa na thupi lace, inepano nin’dziwa lini, koma Mulungu ndiye akudziwa. 4 Iye adatengedwa aciyendesedwa m’paraizo ndipo adabva mafala yomwe yangalewedwe lini, ndipo palibe lamulo lomwe limbabvumiza munthu kuyalewa. 5 Inepano nin’dzasamwa thangwe ra munthu umweyo, sikuti thangwe ra inepano, koma nin’dzandosamwa thangwe ra kutepa kwangu. 6 Napo ningadafuna kusamwa, ningadakhala lini wakusaya nzeru, thangwe ningadakhala ndikulewa cadidi. Koma ndikutcenkha kucita bzimwebzi kuti paleke kuwoneka munthu wakunditumbiza kwene-kwene kuposa pa bzomwe ambawona na kubva kwa ine. 7 Thangwe rakuti nimbatambira mafala yakudabwisa mazinji, bzin’funika lini kuti munthu ali-wentse anditumbize mwakunyanyira.

Tsono kuti ndileke kubzikuza mwakunyanyira, ndaikhidwa munga m’thupi, omwe ni anjo wa Sathani kuti ambandikwantse nthawe zentse, kuti ndireke kubzikuza mwakunyanyira. 8 Tenepo, ndidadandaulira katatu kentse Mbuya, kuti andicose mungayo. 9 Tsono iye adandiuza kuti: “Kudeka mtima kwangu kukulu n’kwakukwanira kwa iwepo, pakuti mphanvu yangu imbakhala yakukwana ukatepa.” Tenepo, mwakukomedwa kwene-kwene inepano nimbasamwa thangwe ra kutepa kwangu, kuti mphanvu za Kristu zipitirize kukhala pa ine ninga tendi. 10 Tenepo, nimbakomedwa pa kutepa, pa kutukwanidwa, pa kusaya bzinthu, pa mazunzo na pa mabvuto thangwe ra Kristu. Pakuti ndikatepa, ni pomwe nimbakhala wamphanvu.

11 Inepano ndikulewalewa ninga tsiru thangwe ra imwepo, tsono mungadalewa bzabwino pakulewa bza ine, inepano ningadalewalewambo lini mwa njira imweyi. Napo bziri tenepo, ndine lini mng’ono kuposa apostolo wanu mu njira iri-yentse. 12 Kulewa cadidi, imwepo mudawona umboni bwakuti ndine mpostolo, pakuwona momwe ndidapiririra, pakuwona bzizindikiro, bzakudabwisa na mabasa yamphanvu yomwe ndidacita. 13 Cinthu cibodzi comwe cacitisa kuti musiyane na magwere manango, n’cakuti inepano ndiribe kukukumbirani cinthu ciri-centse. Kodi ndidaphonya? Penu bziri tenepo, ndikukumbira kuti mundilekerere.

14 Onani! Buno ni ulendo bwacitatu bomwe ndakonzeka kuti ndidzakuzungireni, koma nin’dzakukumbirani lini cinthu ciri-centse basi. Pakuti ndikubwerera lini bzinthu bzanu, koma ndikubwera kudzakuwonani. Thangwe bzimbadikhiridwa lini kuti wana akoye bzinthu kuti adzathandizire nabzo abereki wawo kutsogolo, koma abereki ndiwo ambafunika kukoyera wana wawo bzinthu. 15 Pakuti inepano nin’dzaphatisa basa bzinthu bzangu bzentse ndipo nin’dzabzipereka na mtima wangu wentse thangwe ra imwepo. Penu inepano nimbakufunani kwene-kwene, kodi imwepo mun’funika kumbandifuna pang’ono? 16 Tsono napo kuti ndiribe kukukumbirani cinthu ciri-centse, imwepo mumbalewa kuti inepano “ndakupumpsani” ndipo ndakuphatani mu “diwa.” 17 Kodi inepano ndatenga bzinthu bzanu mwakuphatisa basa wanthu omwe ndikhawatuma kwa imwepo? 18 Ndidakumbira Tito na m’bale munango kuti adzakuzungireni. Kodi Titoyo adakutengerani bzinthu bzanu? Kodi ifepano timbacita lini bzinthu mu njira ibodzi-bodzi? Kodi ifepano timbafamba lini pa njira ibodzi?

19 Pinangopentse imwepo mukukumbuka kuti tikulewa bzimwebzi kuti tibzikhotcerere, koma n’tenepo lini. M’mbuto mwace, ifepano ndife ateweri wa Kristu ndipo tikulewa cadidi pamaso pa Mulungu. Abale wakufunidwa, bzentse bzomwe timbacita, timbabzicita kuti tikulimbikiseni. 20 Pakuti ndikugopa kuti pinango ndikadzafika kumweko, nin’dzakugumanani lini ninga momwe ndikhafunira, ndipo kwa imwepombo nin’dzakhala lini ninga momwe mukufunira, koma nin’dzagumana ndewo, ntcanje, kuipidwa, kupopotezana, kusaya kubverana, magunkha, kubzikuza na phiringu. 21 Pinango ndikadzabwera pomwe, Mulungu wangu an’dzandicitisa manyazi pakati panu, ndicidzalira thangwe ra wanthu azinji omwe adacita pikado koma alibe kukungula pa bzakunyantsa bzawo, uputa ayai upombo* bwawo na makhalidwe yawo yakupasa manyazi yomwe akhacita.

13 Aka n’kacitatu komwe ndikubwera kudzakuzungirani. “Nkhani iri-yentse, in’funika kutsimikiziridwa na mboni ziwiri ayai zitatu.” 2 Napo kuti ndiri lini namwe pabodzi, koma bziri ninga kuti ndinamwe pabodzi kaciwiri. Ndipo ndikukucenjezaniretu pakulewa bza wanthu omwe adacita pikado m’mbuyomu na mwentsenemwe, kuti ndikadzafika kumweko, nin’dzacitira lini ntsisi anyakuphonya. 3 Mwakucita bzimwebzi, nin’dzalatiza kuti Kristu akulewalewa mwakuphatisa basa inepano, ndipo Kristuyo ngwakutepa lini pakati panu, koma akulatiza mphanvu zace zikulu. 4 Kulewa cadidi, iye adakhomereredwa pa muti thangwe ra kutepa, koma adakhala na moyo thangwe ra mphanvu za Mulungu. Tenepo, ifepanombo ndife wakutepa pabodzi na iye koma tin’dzakhala naye pabodzi thangwe ra mphanvu za Mulungu zomwe zikuphata basa kwa imwepo.

5 Pitirizani kubziyeza kuti muwone penu mukana cikhulupiro cakulimba. Pitirizani kubziyeza kuti muwone kuti ndimwe munthu wa mtundu wanyi. Kodi mun’dziwa lini kuti Kristu ngwakuphatana namwe? Kupambula penu ndimwe lini wakubvumidwa. 6 Inepano ndikudikhirira kuti imwepo mun’zindikira kuti ifepano ndife lini wakusaya kubvumidwa.

7 Ifepano timbapemba kwa Mulungu kuti imwepo muleke kucita cakuipa ciri-centse, sikuti tiwoneke ninga kuti ndife wakubvumidwa, koma kuti imwepo mucite bzabwino napo winango ambawona ninga kuti ndife lini wakubvumidwa. 8 Pakuti ifepano tingacite lini cinthu mwakupitana na cadidi, koma timbathandizira cadidico. 9 Kulewa cadidi, nthawe zentse ifepano timbakomedwa tikakhala wakutepa koma imwepo mukukhala wakulimba, ndipo timbakupemphererani kuti mukwanise kucinja bzomwe mukufunikira kucinja. 10 Ndipopa ndikunemba bzimwebzi pa nthawe yomwe ndiri kutali na imwepo kuti ndikadzabwera kumweko, ndileke kudzaphatisira basa mwakuphonyeka mphanvu zomwe Mbuya adandipasa kuti ndidzakulimbikiseni sikuti kukugwesani.

11 Pakumalizira, abale, pitirizani kukomedwa, kucinja bzinthu bzomwe mukufunikira kucinja, kutsangalazidwa, kukhala na makumbukidwe mabodzi, kukhala wanthu wa mtendere kuti Mulungu wa lufoyi na wa mtendere akhale namwe. 12 Mbamusanani na kumpsompsonana kwa pa ubale. 13 Anyakucena wentse akupereka kulimba.

14 Ndikupemba kuti kudeka mtima kukulu kwa Mbuya Jezu Kristu, lufoyi la Mulungu na mzimu wakucena omwe tentsenefe tidatambira, ukhale namwe.