TSAMBA LAKUYENDA KWA AGALATIYA

1 Ine mpostolo Paulo, ndikukunemberani tsambali. Ndiribe kusankhulidwa na wanthu kuti ndikhale mpostolo, koma ndidasankhulidwa na Jezu Kristu pabodzi na Mulungu Baba, omwe adamulamusa kwa anyakufa, 2 ndipo abale wentse pabodzi na ine, tikunembera magwere ya ku Galatiya:

3 Kudeka mtima kukulu na mtendere wakucokera kwa Mulungu Baba wathu na kwa Mbuya wathu Jezu Kristu, kukhale namwe. 4 Iye adabzipereka thangwe ra pikado zathu, kuti atipulumuse ku dziko lakuipali mwakubverana na kufuna kwa Mulungu wathu na Baba, 5 iye apasidwe ulemerero mpaka kale-kale. Ameni.

6 Ndikudabwa namwe kuti mwapambuka mwakamfulumize kwa Ule omwe adakucemerani mwakudeka mtima kukulu kwa Kristu, ndipo mwabvuma mafala manango ninga kuti ni mafala yabwino. 7 Sikuti pana mafala manango yabwino; koma pana wanthu winango omwe akufuna kukusoceresani na kuviringiza mafala yabwino yakulewa bza Kristu. 8 Na tenepo, napo m’bodzi wa ifepano ayai anjo wakudzulu acikuuzani bzinthu ninga mafala yabwino, bzomwe mpsakusiyana na mafala yabwino yomwe tidakuuzani, munthu umweyo atembereredwe. 9 Ninga momwe talewera kale, ndikubwerezera pomwe kuti: Ali-wentse omwe an’kuuzani bzinthu ninga mafala yabwino, bzakusiyana na bzomwe mudabvuma, munthu umweyo atembereredwe.

10 Kodi ndikufuna kukondwesa munthu, ayai Mulungu? Penu ndikufuna kukondwesa munthu, ndiye kuti ndine lini kapolo wa Kristu. 11 Pakuti ndikufuna kuti mudziwe abale, kuti mafala yabwino yomwe ndidakuuzani, njakucokera lini kwa wanthu; 12 thangwe ndiribe kucita kubva kwa munthu ne kupfunzisidwa na munthu, koma Jezu Kristu caiyeyo ndiye omwe adandizimbulira.

13 Kulewa cadidi, imwepo mudabva bzomwe ndikhacita pomwe ndikhali m’cipembedzo ca Adjuda, kuti ndikhaboneresa kwene-kwene* gwere la Mulungu ndipo ndikhalidzonga. 14 Ndipo ndikhayenda patsogolo m’cipembedzo cacidjuda, kuposa wanthu azinji wa m’dzinza langu, omwe akhali wa msinkhu wangu, thangwe ndikhali wakubzipereka kwene-kwene pa miyambo ya abereki wangu. 15 Tsono pomwe Mulungu, omwe adandicitisa kuti ndibadwe adandicemera thangwe ra kudeka mtima kwace kukulu, adawona kuti bzikhali bwino 16 kuzimbula Mwana wace mwakuphatisa basa inepano, kuti ndikapalizire mafala yabwino yakulewa bza iye kwa wanthu wa mitundu inango. Pomwe adandisankhulapo, ndiribe kuyenderatu kukakumbira malango kwa wanthu winango; 17 ndipo ne ndiribe kuyenda ku Jeruzalemu, kwa wale omwe adakhala apostolo pomwe ine ndikanati kukhala, koma ndidayenda ku Arabiya ndipo patsogolo pace ndidabwerera ku Damasko.

18 Pomwe padapita magole matatu, ndidayenda ku Jeruzalemu kukazungira Khefa* ndipo ndidakhala naye kumweko kwa ntsiku 15. 19 Tsono ndiribe kuwonana na apostolo winango, kupambula Tiyago yekha, m’bale wace wa Mbuya. 20 Pakulewa bza bzinthu bzomwe ndikukunemberanibzi, ndikutsimikiza pamaso pa Mulungu kuti ndikunama lini.

21 Patsogolo pace ndidadzayenda ku Siriya na ku Silisiya. 22 Tsono wanthu wa m’gwere la ku Djudeya, omwe akhali wakuphatana na Kristu, akhanati kundiwona maso na maso. 23 Iwo akhandobva kuti: “Munthu omwe akhatizunza ule, tsapano akupalizira mafala yabwino ya cikhulupiro comwe iye akhacipfudza.” 24 Tenepo, iwo adayamba kutumbiza Mulungu thangwe ra inepano.

2 Tenepo, pomwe padapita magole 14, ndidayenda pomwe ku Jeruzalemu pabodzi na Barnaba na Tito. 2 Ndidayenda kumweko thangwe ra masomphenya yomwe ndidalatizidwa ndipo ndidakawauza mafala yabwino yomwe ndikhapalizira kwa mitundu inango, koma ndidandocita bzimwebzi pamaso pa abale wakulemekezeka okha, kuti nditsimikize kuti utumiki bwangu bukuyenda lini papezi. 3 Napo Tito omwe akhali pabodzi nande, alibe kungingimizidwa kucita mgwatidwe napo kuti akhali Mgerego. 4 Tsono nkhani imweyi idayamba thangwe ra abale wacinyengo, omwe adapita pakati pathu mwakabisira ninga akazitape, kuti adzonge ufulu bomwe tinabo mwakubverana na Kristu Jezu, na cakulinga cakuti aticitise kukhala akapolo, 5 koma ifepano tiribe kuwabvera ne na pang’onopo, kuti cadidi ca mafala yabwino cipitirize kukhala namwe.

6 Tsono pakulewa bza wanthu omwe akhawoneka ninga wakufunika kwene-kwene, ine ndiribe nabzo basa bzomwe iwo akhali, thangwe Mulungu ambatonga lini mwakuwona nkhope ndipo wanthu omwe akhatsogolera magwereya alibe kundiuza cinthu ciri-centse cipsa. 7 Tsono iwo adawona kuti inepano ndapasidwa basa lakupalizira mafala yabwino kwa wanthu wakusaya kucitidwa mgwatidwe, ninga momwe Pedru adapasidwirambo basa lakupalizira mafala yabwino kwa wanthu wakucitidwa mgwatidwe.* 8 Pakuti ule omwe adapasa Pedru mphanvu zakufunikira kuti akhale mpostolo kwa wanthu omwe adacita mgwatidwe, ndiye omwe adandipasambo mphanvu kuti ndikhale mpostolo kwa wanthu wa mitundu inango. 9 Pomwe iwo adazindikira kuti Mulungu wandilatiza kudeka mtima kukulu, Tiyago, Khefa* na Juwau, omwe akhali ninga mphanda za m’gwere, adaphata Barnaba na inepano na boko lawo lamadidi, aciti: “Bziri bwino kuti imwepo mukapalizire wanthu wa mitundu inango, tsono ifepano, tin’kapalizira wanthu omwe adacitidwa mgwatidwe.” 10 Iwo adandotikumbira kuti timbakumbukire abale wakusauka ndipo inepano nimbalimbikira kucita bzimwebzi.

11 Tenepo, pomwe Khefa* adafika ku Antiyokiya, ndidamutsimula padeca thangwe bzikhawonekeratu kuti iye akhadaphonya. 12 Pakuti pomwe akhanati kufika wanthu omwe akhadatumidwa na Tiyago, iye akhadya pabodzi na wanthu wa mitundu inango, koma pomwe iwo adafika, iye adasiya kucita bzimwebzi ndipo adabzipambula, thangwe akhagopa wanthu omwe akhadacita mgwatidwe. 13 Adjuda winangowo, adacitambo bzinthu mwaciphamaso* ninga iye ndipo napo Barnaba, adaphatanambo nawo pakucita bzinthu mwaciphamaso. 14 Tsono pomwe ndidawona kuti iwo akufamba lini mwakubverana na cadidi ca mafala yabwino, inepano ndidauza Khefa* pamaso pa wentsenewo kuti: “Penu iwepo napo ndiwe Mdjuda ukucita bzinthu ninga wanthu wa mitundu inango, sikuti ninga Adjuda, kodi ungangingimize tani wanthu wa mitundu inangowo kumbacitambo bzinthu ninga Adjuda?”

15 Ifepano omwe tidabadwa ninga Adjuda, sikuti ninga wanthu wa mitundu inango omwe ambacita pikado, 16 timbazindikira kuti munthu ambawonedwa kukhala wakulungama, sikuti thangwe ra kucita bzomwe lamulo limbalewa, koma thangwe ra kukhulupira Jezu Kristu basi. Tenepo, ifepano timbakhulupira Kristu Jezu kuti tiwonedwe wakulungama thangwe ra cikhulupiro mwa Kristu, sikuti thangwe ra kucita bzomwe malamulo yambalewa, thangwe palibe omwe ambawonedwa kukhala wakulungama thangwe ra kucita bzomwe malamulo yambalewa. 17 Tsono penu ifepano timbawonedwambo ninga wapikado pomwe tikulinga kuwonedwa wakulungama thangwe ra Kristu, kodi bzin’funa kulewa kuti Kristuyo ni mtumiki wa pikado? Ne na pang’onopo. 18 Tsono penu inepano ndikumanga pomwe bzinthu bzomwe ndidagwesa kale, ndikulatiza kuti ndine munthu wakuphonya. 19 Pakuti thangwe ra lamulo, ndidafa kuti nditeweze lamulolo, kuti ndikhale na moyo mwakubverana na bzomwe Mulungu ambafuna. 20 Ndidakhomereredwa pa muti pabodzi na Kristu, tenepo, ndine lini pomwe omwe ndina moyo, koma Kristuyo ndiye omwe ana moyo ndipo iye ngwakuphatana na inepano. Kulewa cadidi, tsapano ndikukhala na moyo mwakubverana na cikhulupiro cangu pa Mwana wa Mulungu, omwe adandifuna, acibzipereka thangwe ra ine. 21 Inepano ndikulamba lini kudeka mtima kukulu kwa Mulungu, pakuti penu munthu ambawonedwa wakulungama thangwe ra kubvera malamulo, ndiye kuti Kristu adafera papezi.

3 Imwe Agalatiya wakusaya nzerumwe! Imwepo mudapfunzisidwa bwino cipfunziso cakulewa bza infa ya Jezu Kristu, kuti adakhomereredwa pa muti. Tsono kodi mbani omwe wakupumpsani kuti mukhale na makumbukidwe yakuipaya? 2 Pana cinthu cibodzi comwe ndikufuna kuti ndikubvunzeni.* Kodi imwepo mudatambira mzimu wakucena thangwe ra kuteweza bzomwe malamulo yambalewa, ayai thangwe ra kukhulupira bzomwe mudabva? 3 Kodi imwepo ndimwe wanthu wakusaya nzeru tenepayu? Pakuyamba mukhatsogoleredwa na mzimu wakucena, kodi tsapano mun’funa kumaliza mwakuthemba wanthu wakuperewera? 4 Kodi kubonera kwentsenekule kudandoyenda papezi? Ndikukhulupira kuti kulibe kuyenda papezi. 5 Kodi ule omwe adakupasani mzimu wakucena na kucita mabasa yakudabwisa pakati panu, adacita bzimwebzi thangwe rakuti imwepo mumbateweza malamulo, ayai thangwe rakuti mudakhulupira mafala yabwino yomwe mudabva? 6 Bziri ninga momwe bzidacitikira na Abalahamu, “iye adakhulupira Yahova ndipo adawonedwa kukhala munthu wakulungama.”

7 Kulewa cadidi, imwepo mukudziwa kuti wana wa Abalahamu ni wale omwe ana cikhulupiro. 8 Mulungu adaleweratu m’fala lace kuti wanthu wa mitundu inango, angadadzawonedwa kukhala wakulungama thangwe ra cikhulupiro, tenepo, iye adadziwisiratu mafala yabwino kwa Abalahamu mwa kulewa kuti: “Mitundu yentse in’dzasimbidwa thangwe ra iwepo.” 9 Tenepo, wale omwe ana cikhulupiro, ambasimbidwa pabodzi na Abalahamu, omwe akhanacombo cikhulupiro.

10 Pakuti wentse omwe ambathemba mabasa ya malamulo, mbakutembereredwa, thangwe bzidanembedwa kuti: “Wakutembereredwa ni munthu ali-wentse omwe an’pitiriza lini kubvera bzinthu bzentse bzomwe bzidanembedwa m’bukhu la malamulo.” 11 Kuthumizira bzimwebzi, bzikuwonekeratu padeca kuti palibe munthu omwe ambawonedwa kukhala wakulungama kwa Mulungu thangwe ra malamulo, pakuti munthu wakulungama an’dzakhala na moyo thangwe ra cikhulupiro cace. 12 Malamulo yambathemba lini cikhulupiro, koma “omwe ambacita bzomwe malamulo yambalewa, an’dzakhala na moyo mwakuteweza malamuloyo.” 13 Kristu adatigula, acititsudzula pa temberero la malamulo, acibzicitisa kukhala na temberero m’mbuto mwathu, thangwe bzidanembedwa kuti: “Wakutembereredwa ni ali-wentse wakumanikidwa pa muti.” 14 Bzimwebzi bzidacitika kuti cisimbo ca Abalahamu cifikire wanthu wa mitundu inango mwa Kristu Jezu, na cakulinga cakuti titambire mzimu wakucena, omwe Mulungu akhadalewa kuti angadatipasa thangwe ra cikhulupiro cathu.

15 Abale, ndikulewa mwakuphatisa basa ciratizo ca bzomwe bzimbacitika na wanthu. Mpangano ukakhazikisidwa, napo ucikhala mpangano omwe wacitidwa pakati pa wanthu, palibe omwe angaupfudze ne kuuthumizira. 16 Onani, lumbiroli lidacitidwa kwa Abalahamu na mwana wace. Bzinembo bzimbalewa lini kuti “na wana wace”* ninga kuti mbazinji, koma bzimbalewa kuti “na mwana wace,”* omwe ni m’bodzi yekha, Kristu. 17 Kuthumizira bzimwebzi, ine ndikulewa kuti: Pakuyamba Mulungu adakhazikisa mpangano ndipo pomwe padapita magole 430, iye adapereka malamulo. Tsono malamuloyo, yambapfudza lini mpangano omwe ukhadakhazikisidwa kale na Mulungu pabodzi na lumbiro lomwe iye adacita. 18 Bzingadakhala kuti Mulungu ambapereka utaka thangwe ra lamulo, utakabo bungadathemba lini lumbiro, tenepo, mwakudeka mtima, Mulungu adapereka utaka kwa Abalahamu mwakuphatisa basa lumbiro.

19 Tsono thangwe ranyi malamulo yadaperekedwa? Yadaperekedwa kuti yalatize padeca pikado, mpaka kufika kwa mwana wa Abalahamu omwe adacitiridwa lumbirolo. Mulungu adapereka malamulo kwa anjo ndipo iwo adayalewa mwakuphatisa basa mkhala-pakati wa mpangano. 20 Tsono mpangano ukacitidwa na munthu m’bodzi yekha, pambafunika lini mkhala-pakati. Mpsibodzi-bodzimbo na Mulungu pomwe adacita lumbiro limweri. 21 Kodi malamulo yambapitana na lumbiro la Mulungu? Ne na pang’onopo! Bzingadakhala kuti padaperekedwa malamulo yomwe yangakwanise kupereka moyo, cirungamo cingadabwera kucokera m’malamuloyo. 22 Bzinembo bzimbaleweratu kuti wanthu adaikhidwa m’kawoko ya pikado, kuti lumbiro lomwe lidacitidwa thangwe ra Jezu Kristu, liperekedwe kwa omwe an’khulupira.

23 Tenepo, pomwe cikhulupiro cikhanati kufika, ifepano tikhanyang’aniridwa na malamulo ndipo akhatiikha m’kawoko, pomwe tikhadikhirira kuzimbulidwa kwa cikhulupiro. 24 Tenepo, malamulo yadakhala ninga mtsogoleri wathu wakutifikisa kwa Kristu, kuti tiwonedwe kukhala wakulungama thangwe ra cikhulupiro. 25 Tsono pakuti cikhulupiro cafika, tin’funikira lini pomwe malamulo kuti yatitsogolere.

26 Kulewa cadidi, mwentsenemwe ndimwe wana wa Mulungu, thangwe ra cikhulupiro canu mwa Kristu Jezu. 27 Pakuti mwentsenemwe mudabatizidwa mwa Kristu, mwakhala ninga Kristuyo. 28 Palibe Mdjuda ne Mgerego, kapolo ne munthu waufulu, mwamuna ne mkazi, pakuti mwentsenemwe ndimwe m’bodzi mwakubverana na Kristu Jezu. 29 Kuthumizira bzimwebzi, penu ndimwe wa Kristu, ndimwedi wana* wa Abalahamu, wakutambira utaka mwakubverana na lumbiro.

4 Tsapano ndikukuuzani kuti: Nyakutambira utaka akakhala kamwana, iye ambasiyana lini na kapolo, napo kuti iye ni mbuya wa bzentse. 2 Tsono iye ambanyang’aniridwa na omwe ambanyang’anira pa muipo, mpaka pa ntsiku yomwe idaikhidwiratu na pai wace. 3 Mwa njira ibodzi-bodziyi, pomwe ifepano tikhali wana, tikhalimbo akapolo wa nzeru za m’dzikoli. 4 Tsono pomwe nthawe yakuikhidwiratu idakwana, Mulungu adatumiza Mwana wace, omwe adabadwa kwa mkazi ndipo akhatsogoleredwa na malamulo, 5 kuti alombole wale omwe akhatsogoleredwa na malamulo mwakucita kuwagula, kuti Mulungu atitenge, ticikhala wana wace.

6 Tsapano pakuti ndimwe wana wace, Mulunguyo watumiza mzimu wa Mwanace m’mitima mwathu ndipo mzimuyo umbakuwa kuti: “Aba,* Baba!” 7 Imwepo ndimwe lini pomwe akapolo, koma ndimwe wana, ndipo penu ndimwe wana wa Mulungu, iye an’dzakupasanimbo utaka.

8 Na tenepo, pomwe imwepo mukhamudziwa lini Mulungu, mukhali akapolo wa mirungu yakunama. 9 Tsono pakuti tsapano imwepo mwadziwa Mulungu, ayai tilewe kuti mwadziwidwa na Mulungu, thangwe ranyi mukucita pomwe bzinthu ninga wana, bzomwe mpsakusaya kuthandiza na bzakusaya phindu ndipo mukufuna pomwe kukhala akapolo wa bzinthu bzimwebzi? 10 Imwepo mumbakumbukira kwene-kwene ntsiku, minyezi, nyengo na magole. 11 Ndikugopa kuti nyongo yomwe ndidacita kwa imwepo ingayende papezi.

12 Abale, inepano ndikukudandaulirani kuti: Khalani ninga ine, thangwe inepanombo ndikhali ninga imwepo. Imwepo mulibe kundicita cakuipa ciri-centse. 13 Koma imwepo mukudziwa kuti ndidakhala na mwayi wakukupalizirani mafala yabwino paulendo bwakuyamba thangwe ndikhaduwala. 14 Napo kuti utenda bwangu bukhali ninga mtolo kwa imwepo, mulibe kundipsipira mata thangwe ra kunyantsidwa nande, koma mudanditambira ninga anjo wa Mulungu, ninga Kristu Jezu. 15 Kodi kukondwa kwanu kule kuli kuponi? Pakuti ndikutsimikiza kuti bzingadakwanisika, mungadakolowola maso yanu, mucindipasa. 16 Kodi tsapano ndakhala nyamadulanthaka wanu thangwe rakuti ndakuuzani cadidi? 17 Iwo akucita nyongo kuti mukhale kumbali yawo, sikuti na cakulinga cabwino, koma an’funa kukufundusani kwa inepano kuti muwatewere. 18 Na tenepo, nthawe zentse mpsabwino kuti munthu ambacite nyongo yakuti mukhale kumbali yace na cakulinga cabwino, sikuti ndikakhala ine ndiripo basi. 19 Wana wangu, ndikubva pomwe kuwawa thangwe ra imwepo, kuwawa ninga kwa mkazi omwe an’funa kubereka ndipo nin’pitiriza kubva kuwawako mpaka pomwe imwepo mun’dzalatiza makhalidwe ya Kristu. 20 Inepano ndikhafuna kuti pa nthawe ino ndikhale namwe kuti ndilewelewe namwe m’njira yakusiyana, thangwe ndikubvesesa lini bzomwe bzikucitika na imwepo.

21 Ndiuzeni imwepo omwe mumbafuna kubvera malamulomwe, kodi mumbadziwa lini bzomwe malamuyo yambalewa? 22 Mwa ciratizo, bzidanembedwa kuti Abalahamu adabereka wana wacimuna awiri. M’bodzi na mtumiki wace wacikazi ndipo munangoyo na mkazi wace waufulu. 23 Tsono mwana wa mtumiki wace wacikaziyo, adabadwa ninga momwe wana wentse ambabadwira, koma mwana munangoyo, omwe akhali mwana wa mkazi wace waufulu, adabadwa thangwe ra lumbiro. 24 Nkhani imweyi ina thandauzo lakuyezezera, thangwe akazi awiriwa akuimira mipangano miwiri. Mpangano wa pa Phiri la Sinai, omwe umbabereka wana kuti akhale akapolo ndipo mpangano umweyu ni Hagari. 25 Hagari ambaimira Sinai, phiri la ku Arabiya ndipo ntsiku zino akundendemerana na Jeruzalemu, pakuti iye pabodzi na wana wace ali pa ukapolo. 26 Tsono Jeruzalemu wakudzulu, ali ninga mai wathu ndipo iye ni mkazi waufulu.

27 Pakuti bzidanembedwa kuti: “Kondwa mkazi ngomwawe, omwe ukanati kubereka mwana. Kuwa mwakukondwa iwe mkazi omwe ukanati kubva bzakuwawa bza pakubereka, thangwe wana wa mkazi wakusiyidwa, mbazinji kuposa wana wa mkazi omwe ana mwamuna wace.” 28 Tenepo abale, imwepo ndimwe wana wakubadwa thangwe ra lumbiro ninga momwe akhaliri Izaki. 29 Tsono ninga momwe bzikhaliri pa nthawe imweyire kuti wakubadwa ninga momwe wanthu wentse ambabadwira adayamba kuzunza wakubadwa mwa mzimu, ni momwembo bziriri ntsiku zino. 30 Na tenepo, kodi bzinembo bzimbalewa ciyani? Thamangisani mtumiki wacikaziyu na mwana waceyu, thangwe mwana wa mtumikiyu an’dzatambira lini utaka pabodzi na mwana wa mkazi waufuluyu. 31 Tenepo abale, ndife lini wana wa mtumiki wacikazi, koma wana wa mkazi waufulu.

5 Kristu adatitsudzula kuti tikhale na ufulu bumwebu, na tenepo, khwimikani ndipo lekani kubvuma kumangidwa pomwe pa djoki la ukapolo.

2 Tetekerani! Ine Paulo, ndikukuuzani kuti mukacita mgwatidwe,* Kristu an’dzakhala alibe phindu kwa imwepo. 3 Ndipo ndikukumbusambo mwamuna ali-wentse omwe an’cita mgwatidwe kuti an’funika kuteweza malamulo yentse. 4 Imwepo omwe mukucita nyongo yakuti mukhale wakulungama thangwe ra kuteweza malamulo, mucipambuka kwa Kristu, mun’dzabvumizidwa lini kutambira kudeka mtima kwace kukulu. 5 Tsono mwakutsogoleredwa na mzimu wakucena, ifepano tikudikhira na mtima wentse cirungamo comwe cimbabwera thangwe ra cikhulupiro. 6 Pakuti kwa Kristu Jezu, bziribe basa kucita mgwatidwe ayai ne, koma cikhulupiro comwe cimbaphata basa thangwe ra lufoyi ndico comwe n’cakufunika.

7 Imwepo mukhathamanga bwino, tsono kodi mbani omwe wakutazisani kupitiriza kubvera cadidi? 8 Mtundu umweyu wa cipfunziso ulibe kucokera kwa Ule omwe adakucemerani. 9 Cakufufumisa cing’ono-ng’ono cimbafufumisa ufa bwentse bwakumunyidwa. 10 Ndikutsimikiza kuti imwepo, omwe ndimwe wakubverana na Mbuya, mun’dzakumbuka lini m’njira inango; tsono ule omwe an’kuboneresani bziribe basa kuti ni yani, an’dzatongedwa mwakubverana na bzicito bzace. 11 Pakulewa bza ine abale, penu ndikadapitiriza kupalizira kuti wanthu ambacite mgwatidwe, thangwe ranyi ndikupitiriza kuzunzidwa? Pa nkhani imweyi, mwala wakukhukhumudwisa wa muti wakuzunzidwira* wacosedwa. 12 Ndikhafuna kuti amuna omwe ambakuboneresaniwo abzisunule okha.*

13 Abale, imwepo mudacemeredwa kuti mukhale wanthu waufulu, tsono lekani kuphatisa basa ufulu bumwebu kuti mucite bzikhumbo bza thupi la pikado, m’mbuto mwace, ali-wentse akhale kapolo wa mwanzace mwa lufoyi. 14 Pakuti malamulo yentse yambakwanisika na* mafala yakuti: “Umbafune mwanzako ninga momwe umbabzifunira wekha.” 15 Tsono imwepo mukambalumana na kudyana, cenjerani kuti muleke kupwetekana mwekha-mwekha.

16 Pitirizani kufamba mwakutsogoleredwa na mzimu wakucena, mukacita tenepo, mun’dzakhumba lini kucita bzinthu bzakuthupi bziri-bzentse. 17 Thupi limbabverana lini na mzimu wakucena, ndipo mzimu wakucena umbabveranambo lini na thupi, pakuti bzinthu bziwiribzi bzimbagazana, ndipopa imwepo mumbacita lini bzomwe mukufuna. 18 Kuthumizira bzimwebzi, penu mumbatsogoleredwa na mzimu wakucena, ndiye kuti mumbatsogoleredwa lini na malamulo.

19 Tsono mabasa ya thupi yambawonekera padeca ndipo ni upombo ayai uputa,* bzinthu bzakupswipiza, khalidwe lakupasa manyazi,* 20 kunamata bzifanikiso, kucita bza mizimu,* ciwengo, ndewo, ntcanje, ukali, kusaya kubverana, kupambulana, kupanduka, 21 njiru, kuledzera, maphwando yakuipa na bzinthu ninga bzimwebzi. Pa bzinthu bzimwebzi, ndikukucenjezaniretu ninga momwe ndidakucenjezerani kale pakuyamba pale, kuti omwe ambacita bzimwebzi an’dzapita lini mu Umambo bwa Mulungu.

22 Tsono mzimu wakucena umbabala bzisapo bzomwe ni lufoyi, cikondweso, mtendere, kupirira, kudeka mtima, ubwino, cikhulupiro, 23 kuderekha na kubziphata, ndipo palibe lamulo lomwe limbaletsa bzinthu bzimwebzi. 24 Kuthumizira bzimwebzi, wale omwe ni wa Kristu Jezu, adakhomerera pa muti mathupi yawo, kusirira na bzikhumbo bzawo.

25 Penu tikukhala mwakubverana na mzimu, mbatipitirizenimbo kufamba mwakubverana na mzimuyo. 26 Mbatilekeni kukhala wakubzikuza, wakuyambisa mapici pakati pathu na kumbacitirana njiru.

6 Abale, penu munthu wapambuka aciyamba kufamba m’njira yakuphonyeka mwakusaya kuzindikira, imwepo omwe ndimwe Akristau wakukhwima mwauzimu, yezerani kumuthandiza munthuyo mwakuderekha. Tsono pakucita bzimwebzo, samalani kugopera kuti mungayezedwembo. 2 Pitirizani kutakulirana mitolo, mukacita bzimwebzi mun’dzakhala mukuteweza lamulo la Kristu. 3 Penu munthu akubziwona kuti ngwakufunika pomwe n’tenepo lini, akubzinamiza yekha. 4 Tsono ali-wentse awone momwe mabasa yace yaliri, akacita tenepo, an’dzakhala na mathangwe yakukondwa thangwe ra mabasa yaceyo, sikuti mwakubzindendemezera na munthu munango. 5 Pakuti ali-wentse an’dzanyamula mtolo wace.

6 Kuthumizira bzimwebzi, ali-wentse omwe akupfunzisidwa Fala la Mulungu, agawane bzinthu bzentse bzabwino na omwe akumupfunzisayo.

7 Lekani kupumpsika, Mulungu angapumpsidwe lini. Pakuti comwe munthu an’bzala, ndico comwe an’dzabvuna; 8 thangwe ule omwe an’bzala mwakubverana na thupi, an’dzabvuna bzinthu bzakuipa, mwakubverana na bzikhumbo bzace bza pikado, tsono ule omwe an’bzala mwakubverana na mzimu wakucena, an’dzabvuna moyo wakusaya kumala kucokera ku mzimuyo. 9 Tenepo, mbatipitirizeni kucita bzabwino, pakuti tin’dzabvuna pa nthawe yace tikasaya kuneta. 10 Tenepo, mbaticitireni wanthu wentse bzabwino tikakhala na mpata, koma maka-maka abale wathu wa m’cikhulupiro.

11 Ndakunemberani tsambali na manja yangu ndipo mungazindikire bzimwebzo thangwe maletraya n’makulu-makulu.

12 Wentse omwe akufuna kubziwonesa kuti mbabwino pamaso pa wanthu winango, ni omwe akukungingimizani kuti mucite mgwatidwe.* Iwo akucita bzimwebzi kuti aleke kuzunzidwa thangwe ra muti wakuzunzidwira* wa Kristu. 13 Pakuti napo omwe adacita mgwatidwe ambateweza lini malamulo, koma iwo ambafuna kuti mucite mgwatidweyo, kuti iwo akhale na thangwe lakubzikuzira thangwe ra imwepo.* 14 Tsono inepano nin’bzitumbiza lini pa cinthu ciri-centse, koma nin’bzitumbiza thangwe ra muti wakuzunzidwira wa Mbuya wathu Jezu Kristu, pakuti thangwe ra iye, nimbawona kuti dziko ndakufa ndipo dziko limbandiwonambo ninga wakufa. 15 Pakuti cakufunika n’kukhala pomwe munthu mupsa, sikuti kucita mgwatidwe ayai ne. 16 Mtendere na ntsisi bzikhale kwa wentse omwe akuteweza mafalaya, inde, Jirayeri wa Mulungu.

17 Kuyambira tsapano, paleke kugumanika munthu wakundiboneresa, thangwe thupi languli lina bzipsazi bza cizindikiro cakuti ndine kapolo wa Jezu.

18 Abale, kudeka mtima kukulu kwa Mbuya wathu Jezu Kristu kukhale namwe thangwe ra makhalidwe yabwino yomwe mukuyalatiza. Ameni.