TSAMBA LAKUYENDA KWA AEFEZO

1 Ine Paulo, mpostolo wa Kristu Jezu mwakubverana na kufuna kwa Mulungu, ndikunembera anyakucena omwe ali ku Efezo omwe mbakukhulupirika mwakubverana na Kristu Jezu:

2 Kudeka mtima kukulu na mtendere wakucokera kwa Mulungu Baba wathu na kwa Mbuya Jezu Kristu kukhale namwe.

3 Atumbizidwe Mulungu na Baba wa Mbuya wathu Jezu Kristu, thangwe iye watipasa cisimbo ca mzimu wakucena m’mbuto zakudzulu mwakubverana na Kristu, 4 pakuti adatisankhula kuti tikhale wakuphatana na iye* pomwe dziko likhanati kulengedwa, kuti tikhale wakucena na wakusaya cirema pamaso pace mu lufoyi. 5 Pakuti iye adatisankhuliratu kuti tikhale wana wace mwa Jezu Kristu, mwakubverana na bzomwe bzimbamudekera na kufuna kwace. 6 Bzimwebzi bziri tenepo kuti wanthu atumbize Mulungu, thangwe rakuti iye adaphatisa basa mwana wace wakufunidwa kuti atilatize kudeka mtima kwace kukulu. 7 Thangwe ra mwana waceyo timbalomboledwa na kutsudzulidwa, inde pikado zathu zimbalekereredwa thangwe ra mulopa wa mwana waceyo, mwakubverana na kudeka mtima kwace kukulu.

8 Mulungu adatipasa kudeka mtima kukuluku na manja mawiri pabodzi na cidziwiso centse na luso lentse lakuzindikira, 9 mwakuti adatizimbulira cintsintsi cakupambulika ca kufuna kwace. Cintsintsico n’cakubverana na bzomwe bzimbamudekera na bzomwe iye adafuna mu mtima mwace, 10 kuti adzanyang’anire bzinthu ikadzamala nyengo yentse ya nthawe zakuikhidwiratu, acitsonkhanisa pabodzi bzinthu bzentse mwa Kristu, bzinthu bza kudzulu na bza pa dziko la pantsi. Inde, mwa iye 11 tidaikhidwa kukhala anyakudzatambira utaka mwakuphatana naye, ndipo tidasankhulidwiratu mwakubverana na kufuna kwa Mulungu, omwe ambacita bzinthu bzentse bzomwe iye ambafuna mwakubverana na kufuna kwaceko. 12 Adacita bzimwebzo kuti ife omwe ndife wakuyambirira kukhala na cidikhiro mwa Kristu, ticitise kuti ulemerero bwace butumbizike. 13 Tsono imwepo mudadzakhalambo na cidikhiro mwa iye, pomwe mudabva mafala ya cadidi yomwe ni mafala yabwino yakulewa bza cipulumuso canu. Pomwe mudakhulupira, imwepo mudapasidwa cizindikiro mwa iye na lumbiro la mzimu wakucena, 14 lomwe n’citsimikizo ca utaka bwathu, kuti wanthu wa Mulungu adzatsudzulidwe kucokera m’cakulombolera na cakulinga cakuti iye adzatumbizidwe na kupasidwa ulemerero.

15 Ndipopa inembo, kucokera pomwe ndidabva bza cikhulupiro comwe munaco kwa Mbuya Jezu na lufoyi lomwe mudalilatiza kwa anyakucena wentse, 16 ndiribe kusiya kutenda Mulungu thangwe ra imwepo, ndipo ndikupitiriza kukugumani m’mipembo yangu, 17 kuti Mulungu wa Mbuya wathu Jezu Kristu, Baba wa ulemerero, akupaseni mzimu wa nzeru na wakubvesesa bzomwe iye akuzimbula kuti mumudziwe bwino. 18 Iye wabvunika maso ya mtima wanu, kuti mudziwe bza cidikhiro comwe adakucemererani, cuma ca ulemerero comwe wakoyera anyakucena ninga utaka 19 na mphanvu zace zikulu zomwe iye ambazilatiza kwa ifepano anyakukhulupira. Kukulako kumbalatizidwa pa bzinthu bzomwe bzimbacitidwa thangwe ra mphanvu zace zikuluzo, 20 zomwe adaziphatisa basa pa kulamusa Kristu kwa anyakufa, acimucitisa kukhala ku boko lace lamadidi m’mbuto zakudzulu. 21 Iye adamuikha padzulu kwene-kwene kuposa boma liri-lentse, utongi buli-bwentse, mphanvu zentse, ambuya wentse na dzina liri-lentse lomwe lidaperekedwa kwa ali-wentse, sikuti mu nthawe ino yokha basi, koma na mu nthawe yomwe ikubwerayo. 22 Mulungu adaikhambo bzinthu bzentse pantsi pa nzayo za Kristu ndipo adamucitisa kukhala msolo wa bzinthu bzentse m’gwere, 23 lomwe ni thupi lace, lomwe lidadzala na bzinthu bzentse pakulewa bza iye, omwe ambacitisa bzinthu bzentse kukhala bzakukwana.

2 Kuthumizira bzimwebzi, Mulungu adakucitisani kukhala wamoyo pomwe mukhadafa thangwe ra bzakuphonya bzanu na pikado zanu, 2 zomwe imwepo mukhacita pomwe mukhakhala na moyo mwakubverana na dzikoli. Imwepo mukhatsogoleredwa na ule omwe akutonga mphuwe yomwe imbatsogolera wanthu. Mphuwe imweyi, ayai makumbukidwe yamweya, tsapano yakuphata basa kwa wanthu wakusaya kubvera. 3 Inde, tentsenefe pomwe tikhali pakati pawo m’mbuyomu, tikhacitambo bzinthu mwakubverana na bzikhumbo bza thupi lathu, ticicita kufuna kwa thupi na kwa makumbukidwe yathu, ndipo ifepano tikhali wana wakuthemera ukali bwa Mulungu ninga wanthu winangowa. 4 Tsono Mulungu, omwe ngwantsisi kwene-kwene, adatifuna thangwe ra lufoyi lace likulu, 5 acitipasa moyo pabodzi na Kristu, napo pomwe tikhadafa thangwe ra bzakuphonya bzathu; ndipo thangwe ra kudeka mtima kwace kukulu imwepo mudapulumusidwa. 6 Kuthumizira bzimwebzi, Mulungu adatilamusa pabodzi na iye, [omwe ni Kristu Jezu] aciticitisa kukhala naye pabodzi m’mbuto zakudzulu mwakubverana na Kristu Jezu. 7 Mulungu an’dzacita bzimwebzi m’dziko lipsa lomwe likubweralo. Iye an’dzatilatiza kudeka mtima kwace kukulu kwene-kwene, akadzacitira bzabwino ife omwe ndife wakuphatana na Kristu Jezu.

8 Thangwe ra kudeka mtima kukulu kumweku, imwepo mwapulumusidwa thangwe ra cikhulupiro canu. Bzimwebzi bzikhali lini bzakuthemera kwa imwepo, koma ni mphaso yakucokera kwa Mulungu. 9 Ndipo imwepo ne mulibe kupulumusidwa thangwe ra mabasa yanu, kuti paleke kuwoneka munthu wakukhala na mathangwe yakubzikuzira. 10 Pakuti ndife mabasa ya manja ya Mulungu ndipo tidalengedwa mwakubverana na Kristu Jezu, kuti ticite mabasa yabwino yomwe Mulungu adayakhazikisiratu kuti ifepano tiyacite.

11 Tenepo, kumbukirani kuti imwepo ndimwe lini Adjuda, ndipo wanthu omwe adacitidwa “mgwatidwe”* na manja ya wanthu, akhakucemerani kuti “anyakusaya kucitidwa mgwatidwe.” 12 Mumbakumbukirembo kuti pa nthawe yomwe mukhalibe Kristu, mukhali wakutalikirana na Jirayeri, mucikhalambo alendo wakusaya kudziwika m’mipangano ya lumbirolo. Imwepo mukhalibe cidikhiro ndipo mukhalibe Mulungu m’dzikoli. 13 Koma mwakubverana na Kristu Jezu, imwepo omwe kale-kale mukhali kutali, tsapano muli pafupi thangwe ra mulopa wa Kristu. 14 Pakuti iye adatibweresera mtendere, adacitisa kuti mathimu mawiri yakhale thimu libodzi ndipo adapfudzambo mpanda omwe ukhambagawa mathimu mawiriyo. 15 Na thupi lace, iye adapfudza comwe cimbayambisa ciwengo, mwakuti Lamulo lidaperekedwa ninga mitemo, kuti mathimu mawiri yale yakhale yakubverana na iye, aciyakhalisa munthu m’bodzi mupsa na kukhazikisa mtendere. 16 Ndipo adabveranisa wanthu wentsewo kuti akhale thupi libodzi na Mulungu, mwakuphatisa basa muti wakuzunzidwira.* Iye adapfudza ciwengo mwakuphatisa basa thupi lace. 17 Ndipo iye adabwera kudzapalizira mafala yabwino ya mtendere kwa imwepo omwe mukhali kutali na Mulungu na kwa wale omwe akhali pafupi na iye. 18 Thangwe ra ntsembe yace, tentsenefe wa mathimu mawiri timbapemba kwa Baba wakudzulu, pakuti tentse timbatambira mzimu wakucena ubodzi-bodzi.

19 Imwepo ndimwe lini pomwe alendo, ne nzika zakucokera m’madziko manango, koma ndimwe nzika zinzace za anyakucena ndipo mumbacitambo mbali ya banja la Mulungu. 20 Imwepo mudamangidwa pa aliserse ya apostolo na apolofeta, ndipo Kristu Jezu ndiye mwala wapakhona* wa aliserseyo. 21 Nyumba yomwe ikumangidwayi, mbali zentse n’zakuphatana bwino, ndipo thangwe ra kubverana na Kristu, nyumba imweyi imbakula icikhala templo yakucena ya Yahova. 22 Tenepo, mwakubverana na iye, imwepo na winango mukumangidwa pabodzi, kuti mukhale mbuto yakukhala Mulungu mwa mzimu wace wakucena.

3 Tenepo, ine Paulo, ndiri m’kawoko thangwe ra Kristu Jezu na thangwe ra kuthandiza imwepo omwe ndimwe lini Adjuda. 2 Kulewa cadidi, imwepo mudabva kuti inepano ndidapasidwa udindo bwakukhala nyakunyang’anira kudeka mtima kukulu kwa Mulungu kuti mugumane phindu, 3 nakuti Mulungu adandidziwisa cintsintsi cace cakupambulika, ndipo cintsintsico ni comwe ndakunemberani kale mwacigwatho. 4 Mukambawerenga bzimwebzi, mun’dzakwanisa kuzindikira kuti cintsintsi cakupambulika cakulewa bza Kristu ndikucibvesesa bwino. 5 Kwa mibadwo inango, cintsintsi cakupambulikaci ciribe kuzimbulidwa kwa wana wa wanthu ninga momwe cikuzimbulidwira tsapano na mzimu wakucena kwa apostolo wace wakucena na apolofeta. 6 Cintsintsico n’cakuti wale omwe ni Adjuda lini ndipo mbakubverana na Kristu Jezu, an’dzatambira utaka bomwe Kristu adatambira, acidzacitambo mbali ya thupi. Iwo an’dzatambira bzinthu bzibodzi-bodzi na bzomwe Mulungu adatilumbirira thangwe ra mafala yabwino. 7 Inepano ndidakhala mtumiki wa bzimwebzi, mwakubverana na mphaso yafovolo ya kudeka mtima kukulu kwa Mulungu, komwe ndidalatizidwa mwakubverana na momwe mphanvu yace imbaphatira basa.

8 Ine, munthu mng’onoletu pakundendemezera na munthu mng’ono pakati pa anyakucena wentse, ndidalatizidwa kudeka mtima kukulu kumweku, kuti ndipalizire mafala yabwino yakulewa bza bzisimbo bzakusaya kuleweka bzakucokera kwa Kristu, kwa wanthu wa mitundu inango, 9 nakuti ndithandize wanthu wentse kuwona momwe Mulungu, omwe adalenga bzinthu bzentse, ambaphatisira basa cintsintsi cakupambulikaci, comwe cikhadabisika kwa magole mazinji. 10 Bzimwebzi bziri tenepo kuti maboma na mautongi yomwe yali m’mbuto zakudzulu yadziwe tsapano bza nzeru za Mulungu, zomwe zimbawonekera m’njira zakusiyana-siyana. 11 Bzimwebzi bzikubverana na cakulinga cakusaya kumala, comwe iye adacikhazikisa mwakubverana na Kristu Jezu Mbuya wathu. 12 Mwa iye, ifepano tina ufulu bwakulewalewa ndipo timbakwanisa kufenderera Mulungu mwakutsudzuka na mtima wentse, thangwe ra kukhulupira kwathu Kristu. 13 Tenepo, ndikukukumbirani kuti muleke kubwerera m’mbuyo thangwe ra mabvuto yomwe ndikuyapirira thangwe ra imwepo, pakuti mabvutoyo ni ulemerero kwa imwepo.

14 Ndipopa ndikugodama kwa Baba, 15 omwe ambacitisa kuti banja liri-lentse la kudzulu na pa la dziko la pantsi likhale na dzina. 16 Nimbapemba kwa Mulungu kuti mwa ulemerero bwace bukulu, akulimbiseni mtima mwakuphatisa basa mphanvu ya mzimu wace, 17 nakuti mwa cikhulupiro canu, Kristu akhale m’mitima mwanu na lufoyi, mucikhala wakuzika na wakulimba pa aliserse, 18 na cakulinga cakuti imwepo pabodzi na anyakucena wentse, mukwanise kudziwa kufupika, kutalimpha, kukula, kuzika 19 na lufoyi la Kristu lomwe limbaposa cidziwiso, kuti Mulungu akupaseni makhalidwe yace yentse.

20 Kwa ule omwe angakwanise kucita bzinthu bzikulu kwene-kwene kuposa bzomwe timbakumbira ayai kukumbuka, mwakubverana na mphanvu yace yomwe ikuphata basa mwa ifepano, 21 kwa iye kukhale ulemerero mwakuphatisa basa gwere pabodzi na Jezu Kristu ku mibadwo yentse mpaka kale-kale. Ameni.

4 Ine Paulo, omwe ndiri m’kawoko thangwe ra Mbuya wathu, ndikukudandaulirani kuti mukhale na moyo mwakubverana na momwe mudacemeredwera 2 na kubzicepesa kwentse, wakuderekha mucimbapirirana mwa lufoyi, 3 mwa kucita nyongo yakuti mupitirize kukhala wakuphatana mwauzimu na kukhala mwa mtendere pakati panu. 4 Liripo thupi libodzi na mzimu wakucena ubodzi, ndipo napo cidikhiro comwe mudacemeredwera ciripombo cibodzi; 5 Mbuya m’bodzi, cikhulupiro cibodzi, ubatizo bubodzi; 6 Mulungu m’bodzi omwe ni Baba wa wanthu wentse. Iye ali padzulu pa wentse ndipo kucokera kwa wentsewo, iye ambacita bzinthu kwa wentsene.

7 Ali-wentse wa ifepano watambira kudeka mtima kukulu kwakucokera kwa Mulungu, mwakubverana na momwe Kristu adapimira mphaso ya fovoloyi. 8 Pakuti bzidanembedwa kuti: “Pomwe adakwira kudzulu, adatenga wanthu ninga akapolo ndipo adapereka amuna ninga mphaso.” 9 Tsono kodi mafala yakuti “iye adakwira” yan’funa kulewa ciyani? Yan’funa kulewa kuti pakuyamba iye akhadabuluka pa dziko la pantsi. 10 Ule omwe adabuluka pa dziko ni m’bodzi-bodzi na omwe adakwira kudzululetu kuti bzentse bzikwanisike.

11 Ndipo iye adapereka winango ninga apostolo, winango ninga apolofeta, winango ninga apalizi ndipo winango ninga abusa na apfunzisi, 12 kuti athandize anyakucena kufamba mu njira yakuthemera, acite basa lakutumikira nakuti alimbise* thupi la Kristu, 13 mpaka tentse tifike pakukhala wakuphatana mu cikhulupiro na mu cidziwiso caico ca Mwana wa Mulungu, ticifika pa msinkhu wa munthu mkulu, msinkhu omwe Kristu adafika. 14 Tenepo, tileke kukhala pomwe ninga tuwana mwakumbandotengeka-tengeka ninga kuti tikugwinyidwa na mabimbi na wakutengeka-tengeka kuyenda uku na uku na mphepo iri-yentse ya bzipfunziso bzakunama, thangwe ra kucenjera kwa wanthu pa bzomwe ambacita kuti apumpse anzawo. 15 Koma timbalewe cadidi, tikule m’bzinthu bzentse mwalufoyi mwakubverana na Kristu, omwe ni msolo. 16 Thangwe ra iye, thupi lentse ndakuphatana na lakulumikidzidwa bwino ndipo limbabveranisa nfundo zentse zomwe zimbapereka bzinthu bzakufunikira. Ciwalo ciri-centse cikaphata bwino basa, cimbathandizira kuti thupi likule bwino licilimba mu lufoyi.

17 Tenepo, ine ndikukuuzani na kukucenjezani mwa Mbuya kuti lekani kufamba pomwe ninga momwe ambafambira wanthu wa m’dziko, omwe ambacita bzinthu mwakubverana na nzeru zawo zakusaya basa. 18 Makumbukidwe yawo yali mu mdima ndipo iwo ali kutali na moyo omwe ngwa Mulungu, thangwe iwo an’funa lini kudziwa Mulunguyo thangwe ra kuuma mitima kwawo. 19 Pakuti tsapano iwo akukwanisa lini kusiyanisa cabwino na cakuipa, iwo ambabzipereka okha ku khalidwe lakupasa manyazi kuti akhumbe kwene-kwene kucita bzinthu bzakunyantsa bza mtundu uli-wentse.

20 Koma imwepo mulibe kupfunza kuti Kristu an’funika kukhala tenepo, 21 kulewa cadidi, imwepo mudabva bza iye ndipo mwapfunzisidwa thangwe ra iye mwakubverana na cadidi comwe ciri mwa Jezu. 22 Imwepo mwapfunzisidwa kuti mun’funika kusiya unthu bwanu bwakale, bomwe bukhabverana na bzicito bzanu bzakale, bomwe bukhapswipizidwa na bzikhumbo bzanu bzakusoceresa. 23 Ndipo pitirizani kukhala wanthu wapsa mu mphanvu yakutsogolera makumbukidwe yanu, 24 mucibvala unthu bupsa bomwe budalengedwa mwakubverana na kufuna kwa Mulungu m’cirungamo caico na m’cikhulupiro.

25 Tenepo, pakuti tsapano mwasiya kunama, mbalewani cadidi kwa winango na mwanzace, pakuti ndife bziwalo bza thupi libodzi. 26 Kalipani, koma lekani kucita pikado; ndipo lekani kukhala mudakalipa mpaka dzuwa kumira; 27 lekani kum’pasa mpata Dyabu.* 28 Nyakuba aleke kuba pomwe; koma aphate basa labwino mwamphanvu na manja yace, kuti akwanise kugumana cinthu cakupasambo munthu wakusauka. 29 Mafala yali-yentse yakubvunda yaleke kucoka pamulomo panu, koma yali-yentse yomwe njabwino kuti yalimbise wale omwe akukutetekerani mwakubverana na bzomwe iwo akufunikira. 30 Ndipo lekani kusunamisa mzimu wakucena wa Mulungu, omwe iye adakuikhani nawo cizindikiro cace mpaka pa ntsiku ya kudzatsudzulidwa kwanu thangwe ra cakulombolera.

31 Musiyiretu kukoya cakumtima, ukali, ciya, kupopota, mafala yakupusa pabodzi na bzakuipa bzentse. 32 Koma khalani wakudeka mtima mucimbabverana ntsisi, ndipo mbalekereranani na mtima wentse ninga momwe Mulungu adakulekererani na mtima wentse mwa Kristu.

5 Tenepo, tewezerani Mulungu ninga wana wace wakufunidwa, 2 ndipo pitirizani kumbalatizana lufoyi, ninga momwe Kristu adatifunira* acibzipereka thangwe ra ife* ninga mphaso na ntsembe yakununtcira kwa Mulungu.

3 Upombo ayai uputa,* bzinthu bzakunyantsa bza mtundu uli-wentse na umbombo bzileke kulewedwa pakati panu, thangwe bzimwebzi mpsakuthemera lini kwa wanthu wakucena. 4 Lekani kumbalewa bza khalidwe lakupasa manyazi, mafala yakupusa ayai nthabwala zakutukwana, bzomwe ni bzinthu bzakusaya kuthemera. M’mbuto mwace, mbatendani Mulungu. 5 Pakuti imwepo mumbadziwa bzimwebzi na kubvesesa bwino kuti, anyakucita upombo ayai uputa,* wanthu wakupswipa, wanthu wa umbombo bzomwe bzimbathandauza kunamata bzifanikiso, an’dzapita lini mu Umambo bwa Kristu na bwa Mulungu.

6 Lekani kubvuma kuti munthu akupumpseni na mafala yapezi-pezi, pakuti Mulungu an’dzapasa nyathwa anyakusaya kubvera thangwe ra bzinthu bzimwebzi. 7 Ndipopa, lekani kumbacitambo nawo bzimwebzi; 8 pakuti, pakuyamba imwepo mukhali mu mdima, koma tsapano ndimwe ceza mwakubverana na Mbuya. Tenepo, fambani ninga wana wa ceza. 9 Pakuti cisapo ca ceza, ni ubwino bwentse, cirungamo na cadidi. 10 Pitirizani kutsimikiza kuti mpsiponi bzinthu bzakubvumizika kwa Mbuya. 11 Lekani kucita pomwe mabasa ya mu mdima yomwe yambabala lini bzisapo; m’mbuto mwace, latizani padeca kuti mabasayo njakuipa. 12 Pakuti bzinthu bzomwe iwo ambacita mwacintsintsi, mpsakupasa manyazi napo kubzilewa. 13 Bzinthu bzentse bzimbazimbulidwa na ceza, pakuti bzinthu bzentse bzomwe bzimbazimbulidwabzo bzimbakhala ceza. 14 Ndipopa bzidanembedwa kuti: “Muka, iwe omwe ukugonawe, lamuka kwa anyakufa ndipo Kristu an’dzakubvunika.”

15 Tenepo, khalani tceru kuti muleke kufamba ninga wanthu wakusaya nzeru, koma ninga wanthu wanzeru, 16 mucimbaphatisa bwino basa nthawe yanu,* thangwe ntsikuzi zaipa. 17 Na thangwe limweri, lekani kukhala atsiru koma pitirizani kuzindikira kufuna kwa Yahova. 18 Ndipo lekani kuledzera na vinyu, thangwe imbacitisa munthu kukhala na makhalidwe yakuipa, koma khalani wakudzala na mzimu wakucena. 19 Imbani pabodzi masalimo, nyimbo zakutumbiza Mulungu na nyimbo zauzimu, muciimbira Yahova nyimbo zakumutumbiza na mtima wentse. 20 Nthawe zentse mbatendani Mulungu wathu na Baba thangwe ra bzinthu bzentse mu dzina la Mbuya wathu Jezu Kristu.

21 Ali-wentse ambabvere mwanzace thangwe ra kulemekeza Kristu. 22 Akazi ambabvere amuna wawo ninga momwe ambabvera Mbuya, 23 thangwe mwamuna ni msolo wa mkazace ninga momwe Kristu aliri msolo wa gwere na mpulumusi wa thupiro.* 24 Tenepo, ninga momwe gwere limbabvera Kristu, akazi an’funikambo kumbabvera amuna wawo pa bzentse. 25 Amunamwe, pitirizani kumbafuna akazanu ninga momwe Kristu adafunira gwere, acibzipereka thangwe ra gwerelo, 26 acilicenesa mwa kulitsuka na madzi yomwe ni Fala la Mulungu, 27 kuti gwerelo likhale lakudeka m’maso mwace, lakusaya nthontsa, ne matsinya ayai bzinthu bzinango bzakundendemerana nabzo, koma likhale lakucena na lakusaya cirema.

28 Mu njira ibodzi-bodziyi, amuna ambafune akazi wawo ninga momwe ambafunira thupi lawo. Mwamuna omwe ambafuna mkazace, ambabzifunambo yekha. 29 Pakuti palibe munthu omwe adawenga kale thupi lace, koma ambalidyesa acilisamalira bwino ninga momwe Kristu ambacitirambo na gwere, 30 thangwe ndife bziwalo bza thupi lace. 31 “Na thangwe limweri, mwamuna an’dzasiya pai wace na mai wace, acidzaphatana na mkazi wace ndipo awiriwo an’dzakhala thupi libodzi.” 32 Cintsintsi cikulu cakupambulika comwe ndikulewaci, cikulewa bza Kristu na gwere. 33 Tenepo, munthu ali-wentse ambafune mkazace ninga momwe ambabzifunira iye yekha; ndipo mkazi ambalemekezembo kwene-kwene mwamuna wace.

6 Wanamwe, mbabverani abereki wanu mwakubverana na Mbuya, pakuti kucita bzimwebzi n’cirungamo. 2 “Mbalemekeza pai wako na mai wako,” limweri ndiro lamulo lakuyamba ndipo limbabweresa cisimbo ici: 3 “Kuti bzinthu bzikufambire bwino, ucikhala na moyo utali pa dziko la pantsi.” 4 Imwembo abereki, lekani kumbakalipisa wana wanu, koma mbawalerani mwa kuwalanga na kuwapfunzisa* mwakubverana na kufuna kwa Yahova.

5 Imwe akapolo, mbabverani azimbuya wanu wa pantsi pano na mtima wentse, mucimbawalemekeza na kuwagopa ninga momwe mumbacitira na Kristu, 6 sikuti kokha pa nthawe yomwe mukuwonedwa* kuti mukondwese wanthu, koma ninga akapolo wa Kristu mucimbacitambo bzomwe Mulungu ambafuna na mtima wentse.* 7 Akapolo, mbatumikirani mbuya wanu na mtima wentse ninga kuti mukutumikira Yahova sikuti wanthu. 8 Pakuti imwepo mukudziwa kuti cinthu ciri-centse cabwino comwe munthu an’cita, an’dzabwezeredwa na Yahova, bziribe basa penu ni kapolo ayai munthu waufulu. 9 Imwepombo azimbuya, pitirizani kucitira bzibodzi-bodzibzi akapolo wanu mwakusaya kuwagopswa, pakuti Mbuya wawo na Mbuya wanu ali kudzulu, ndipo iye alibe tsankhulo.

10 Pakumalizira, pitirizani kulimbikisidwa mwa Mbuya kucokera mu mphanvu zace zikulu. 11 Bvalani bzifuzo bzentse bza nkhondo bzakucokera kwa Mulungu, kuti mukwanise kulimba pa mapumpso ya Dyabu; 12 thangwe tikumenyana lini na wanthu* ninga ife, koma na maboma, utongi, atongi wa dziko lentse la mdimayu na mphanvu ya mizimu yakuipa m’mbuto zakudzulu. 13 Na thangwe limweri, bvalani bzifuzo bzentse bza nkhondo bzakucokera kwa Mulungu, kuti mudzakwanise kukhala wakulimba pa ntsiku yakuipa, kuti mukamala kukonzekera bwino-bwino mukwanise kukhala wakulimba.

14 Tenepo, khalani wakulimba, mumange cadidi m’ciuno mwanu ninga bande,* mucibvalambo cirungamo ninga cakukhotcerera pa cifuwa, 15 ndipo bvalanimbo ntsapato ku nzayo zanu kuti mukhale wakukonzeka kuyenda kukapalizira mafala yabwino ya mtendere. 16 Kuposa bzentse, tengani cakukhotcera cikulu ca cikhulupiro, comwe mun’dzathimisira naco misewe yakugaka ya nyakuipayo.* 17 Ndipo bvumanimbo kapaseti ya* cipulumuso pabodzi na xipada ya mzimu, yomwe ni fala la Mulungu. 18 Pomwe mukucita mipembo ya mtundu uli-wentse na kudandaulira pa nthawe iri-yentse, pitirizani kupemba mwakutsogoleredwa na mzimu wakucena. Kuti bzimwebzi bzikwanisike, khalani tceru nthawe zentse ndipo citirani anyakucena wentse mipembo yakudandaulira. 19 Ndipemphererenimbo kuti ndikafuna kulewalewa, yandibwerere mafala yakuthemera kuti ndikwanise kulewalewa mwakukhwimika, pakudziwisa winango cintsintsi cakupambulika ca mafala yabwino. 20 Mulungu ndiye omwe adandituma kuti ndipalizire mafala yabwinoya, ndipopa ndidamangidwa na makorentiya. Ndipempherereni kwa Mulungu kuti ndikwanise kulewa mafala yabwinoya mwakusaya mantha na momwe bzin’funikira.

21 Tikiko, m’bale wathu wakufunidwa na mtumiki wakukhulupirika wa Mbuya, an’dzakudziwisani momwe bzinthu bziriri kwa inepano na momwe inepanombo ndiriri. 22 Ndikumutuma kwa imwepo kuti adzakudziwiseni momwe ifepano tiriri nakuti adzatsangalazembo mitima yanu.

23 Abale wentse akhale na mtendere, lufoyi pabodzi na cikhulupiro cakucokera kwa Mulungu Baba na kwa Mbuya Jezu Kristu. 24 Kudeka mtima kukulu kwa Mulungu kukhale na wentse omwe ana lufoyi lacadidi kwa Mbuya wathu Jezu Kristu.