TSAMBA LAKUYENDA KWA AKOLOSE

1 Ine Paulo, mpostolo wa Kristu Jezu mwakubverana na kufuna kwa Mulungu, ndiri pabodzi na m’bale wathu Timotio, 2 ndipo tikunembera anyakucena na abale wakukhulupirika, omwe ni ateweri wa Kristu ku Kolose kuti:

Mukhale na kudeka mtima kukulu pabodzi na mtendere wakucokera kwa Mulungu, Baba wathu.

3 Nthawe zentse timbatenda Mulungu, Baba wa Mbuya wathu Jezu Kristu tikambakupemphererani, 4 pakuti tabva bza cikhulupiro canu mwa Kristu Jezu na lufoyi lomwe munalo kwa anyakucena 5 thangwe ra cidikhiro comwe adakukoyerani kudzulu. Imwepo mudadziwa bza cidikhiro cimweci, pomwe mudabva bza cadidi ca mafala yabwino 6 yomwe yadafika kwa imwepo. Ndipo ninga momwe mafala yabwino yakuberekera bzisapo yacithumizirika pa dziko lentse, bzikucitikambo bzibodzi-bodzibzi pakati panu, kuyambira pa ntsiku yomwe mudabva mucidziwa bwino-bwino kudeka mtima kukulu kwa Mulungu mwacadidi. 7 Imwepo mudapfunza bzimwebzi na Epafra, kapolo mwanzathu wakufunidwa omwe ni mtumiki wakukhulupirika wa Kristu na nyakuthandizira m’mbuto mwa ifepano. 8 Iye adatiuzambo kuti mukulatiza lufoyi mwakuthandizidwa na mzimu wakucena.

9 Ndipopa kuyambira pa ntsiku yomwe tidabva bzimwebzi, tiribe kusiya kukupemphererani na kukumbira kuti mukhale na cidziwiso caico ca kufuna kwace na nzeru zentse pabodzi na kubvesesa bzinthu bzauzimu, 10 kuti mufambe mwakuthemera ninga momwe Yahova akufunira, nakuti mumukondwese kwene-kwene pomwe mukupitiriza kubala bzisapo pa basa lentse labwino na kuthumizira cidziwiso caico ca Mulungu; 11 ndipo timbakupemphereranimbo kuti mulimbikisidwe na mphanvu zikulu za Mulungu mwakubverana na ulemerero bwace bukulu, kuti mukwanise kulimbikira, kupirira na kukondwa, 12 mucimbatenda Mulungu Baba, thangwe iye wakukonzekeresani kuti mutambire utaka bomwe ni bwa anyakucena omwe ali mu ceza.

13 Mulungu adatipulumusa m’manja mwa mtongi wa mdima, acitiyendesa mu umambo bwa Mwana wace wakufunidwa ndipo 14 thangwe ra iye, tatsudzulidwa mwakuphatisa basa cakulombolera, ticilekereredwa pikado zathu. 15 Iye ni cifanikiso ca Mulungu wakusaya kuwonekayo, wakuyamba kubadwa m’cirengedwe centse; 16 pakuti thangwe ra iye bzinthu bzinango bzentse bzidalengedwa, kuyambira kudzulu na pa dziko la pantsi, bzinthu bzakuwoneka na bzakusaya kuwoneka, mipando ya umambo, atsogoleri, maboma na mautongi. Bzinthu bzinango bzentse bzidalengedwa thangwe ra iye kuti bzikhale bzace. 17 Ndipo iye akhalipo kale pomwe bzinthu bzinango bzentse bzikhanati kulengedwa, ndipo mwa iye bzinthu bzinango bzentse bzidalengedwa, 18 ndipo iye ni msolo wa thupi lomwe ni gwere. Iye ni ciyambi, wakuyamba kubadwa omwe adayamba kumuka kucokera kwa anyakufa, kuti akhale wakuyamba pa bzinthu bzentse; 19 thangwe Mulungu adakomedwa kuti bzinthu bzentse bzikhale bzakukwana kwa iye, 20 kuti thangwe ra iye bzinthu bzentse bzakudzulu na bza pa dziko la pantsi bzikhale pomwe bzakuphatana na Mulungu, pacikhazikisidwa mtendere kucokera pa mulopa wace omwe udayerera pa muti wakuzunzidwira.*

21 Kulewa cadidi, imwepo omwe kale-kale mukhali kutali na Mulungu, mukhali anyamadulanthaka wace, thangwe mukhaikha makumbukidwe yanu pa bzinthu bzakuipa, 22 koma tsapano Mulungu wakhazikisa pomwe mtendere na imwepo, mwakuphatisa basa thupi la ule omwe adabzipereka acifa kuti iye akuwoneni ninga wanthu wakucena, wakusaya ulema na wakusaya mathangwe pamaso pace. 23 Iye an’dzacitadi bzimwebzi mukapitiriza kukhala na cikhulupiro cakukhazikika pa aliserse yakulimba, mucileka kusoceresedwa pa cidikhiro ca mafala yabwino yomwe mudabva, yomwe yadapaliziridwa mu cirengedwe centse ca pa dziko la pantsi. Ine Paulo ndakhala mtumiki wa mafala yabwinoya.

24 Tsapano inepano nimbakondwa pa mabvuto yomwe nimbagumana nayo thangwe ra imwepo, ndipo ndikubonera ninga momwe Kristu adabonerera, tsono nin’pitiriza kupirira kubonerako kuti ndithandize thupi la Kristu, lomwe ni gwere. 25 Ndakhala mtumiki wa gwere limweri mwakubverana na udindo bomwe Mulungu adandipasa, kuti ndipalizire fala la Mulungu mwakukwana kuti imwepo mugumane phindu. 26 Falalo likuphatanidza cintsintsi cakupambulika comwe cikhadabisidwa kuyambira kale-kale na kwa mibadwo yakale-kale. Koma tsapano cikuzimbulidwa kwa anyakucena wace, 27 ndipo Mulungu wakomedwa kudziwisa anyakucenawo ulemerero bwa cuma ca cintsintsi cakupambulikaci, comwe cikudziwisidwa kwa mitundu ya wanthu, comwe ni Kristu omwe ngwakuphatana na imwepo na cidikhiro comwe munaco cakudzapita mu ulemerero bwace. 28 Ifepano timbapalizira bza iye ticicenjeza na kupfunzisa wanthu wentse na nzeru zentse kuti tipereke wanthu wentse kwa Mulungu ali wakulimba mwauzimu mwakubverana na Kristu. 29 Na thangwe limweri inepano ndikuphata basa na nyongo mwakubverana na mphanvu yace yomwe iri mwa ine.

2 Ndikufuna kuti mudziwe bza nkhondo ikulu yomwe ndikumenya thangwe ra imwepo, thangwe ra wale omwe ali ku Laudiseya kuphatanidzambo wentse omwe akanati kundiwona maso na maso.* 2 Cakulinga cangu n’cakuti mitima yawo itsangalazidwe ndipo akhale wakuphatana mu lufoyi, kuti akhale na cuma centse comwe cimbabwera thangwe ra kubvesesa kwawo bzinthu mwakusaya kupenukira, acikhalambo na cidziwiso caico ca cintsintsi cakupambulika ca Mulungu, comwe ni Kristu. 3 Cuma centse ca nzeru na ca cidziwiso cidabisidwa mwa iye. 4 Inepano ndikulewa bzimwebzi kuti paleke kugumanika munthu wakukusoceresani na mafala yakupumpsa. 5 Napo kuti ndiri lini namwe mwakuthupi, ndinamwe pabodzi mwauzimu, ndipo ndikukondwa pakuwona kuti mumbacita bzinthu mwakulinganizika ndipo muna cikhulupiro camphanvu mwa Kristu.

6 Tenepo, pakuti mwakhulupira Kristu Jezu Mbuya wathu, pitirizani kufamba mwakubverana na iye 7 ninga momwe mudapfunzisidwira, ndipo khalani na mizi yakuzika mwa Kristu, wakukhazikika mwa iye, wakulimba m’cikhulupiro, mucimbatenda Mulungu nthawe zentse .

8 Khalani tceru kuti munthu aleke kukucitisani kukhala akapolo mwakuphatisa basa nzeru za wanthu na mapumpso, bzomwe bzimbacokera ku miyambo ya wanthu na bzinthu bza m’dzikoli sikuti kwa Kristu, 9 omwe adadzala na makhalidwe ya Mulungu. 10 Thangwe ra iye imwepo mumbasaya lini cinthu ciri-centse ndipo iye ni msolo wa maboma yentse na mautongi. 11 Pakuti muna cikhulupiro mwa Kristu, imwepo mwacitidwa mgwatidwe sikuti omwe wanthu ambaucita, koma mwasiya kucita bzikhumbo bza thupi lanu la pikado. Umweyu ndiye mgwatidwe wa ateweri wa Kristu. 12 Pakuti imwepo mudaikhidwa m’thenje pabodzi na iye mucibatizidwa mwakundendemerana na ubatizo bwace, imwepo mwalamusidwambo kwa anyakufa pabodzi na iye thangwe ra kukhulupira kwanu mphanvu za Mulungu, omwe adamulamusa.

13 Kuthumizira bzimwebzi, napo kuti mukhadafa mu pikado zanu ndipo mukhalibe kucitidwa mgwatidwe pa thupi lanu, Mulungu wakupasani moyo pabodzi na iye ndipo mwakudeka mtima kwace watilekerera pikado zathu zentse. 14 Ndipo adapfudza tsamba lakunembedwa na manja lomwe likhana malamulo yomwe yakhabverana lini na ifepano. Iye adalicosa mwakulikhomerera pa muti wakuzunzidwira.* 15 Mwakuphatisa basa muti wakuzunzidwirayo, iye adakhundula maboma na mautongi, aciyawonesa padeca kuti wayakunda ndipo akhambafamba nayo ninga anyam’kawoko.

16 Tenepo, munthu aleke kukutongani thangwe ra bzomwe mumbadya na kumwa, kugumanika m’maphwando, kusekerera kubadwa kwa mwezi ayai ntsiku ya Sabudu. 17 Bzimwebzi, bzikuimira bzinthu bzomwe bzingadabwera, tsono cadidi cace ciri mwa Kristu. 18 Lekani kubvuma kuti munthu ali-wentse omwe ambakomedwa na kubzicepesa kwa cinyengo na kunamata anjo akutaziseni kutambira mabaibai. Wanthu amwewa ambandongingimira pa bzinthu bzomwe ambawona ndipo iwo ambasamwa na makumbukidwe yawo yakusaya basa, 19 ndipo wanthu amwewa ambapitiriza lini kukhala wakuphatana na msolo, ule omwe ambapasa thupi lentse bzomwe lin’funikira, acilicitisambo kukhala lakuphatana, ndipo thangwe ra iye Mulungu akucitisa thupi lentse kukula.

20 Penu imwepo mudafa pabodzi na Kristu thangwe ra nzeru za dzikoli, tsono thangwe ranyi mukupitiriza kucita bzinthu ninga kuti mukali mbali ya dzikoli mwa kumbabvera malamulo yakuti: 21 “Leka kuphata, leka kulawidza, leka kukhuya?” 22 Pakuti bzinthu bzimwebzi ni bzomwe bzimbadyedwa bzicimala, mwakubverana na malamulo pabodzi na bzipfunziso bza wanthu. 23 Malamulo yamweya yambawoneka ninga kuti yambapereka nzeru, koma yambathandiza lini wanthu kutcenkha kucita bzikhumbo bza thupi lawo. Bzimwebzi bzimbacitika thangwe wanthu ambasankhula okha momwe anganamatire Mulungu. Iwo ambabzicepesa mwacinyengo ndipo ambaboneresa mathupi yawo.

3 Tenepo, penu imwepo mudalamusidwa pabodzi na Kristu, pitirizani kulinga bzinthu bzakudzulu, kule komwe Kristu adakhala ku boko lamadidi la Mulungu. 2 Pitirizani kuikha makumbukidwe yanu pa bzinthu bzakudzulu, sikuti pa bzinthu bza pa dziko la pantsi. 3 Pakuti imwepo mudafa, ndipo moyo wanu udabisidwa mwa Kristu mwakubverana na Mulungu. 4 Kristu omwe ni moyo wathu akadzawonekera, imwepombo mun’dzawonekera naye pabodzi mu ulemerero.

5 Tenepo, citisani bziwalo bza thupi lanu kukhala bzakufa ku bzinthu bza pa dziko la pantsi, bzomwe ni uputa ayai upombo,* bzinthu bzakupswipiza, kalanga kakusaya kuphatika, bzikhumbo bzakuipa na umbombo, komwe ni kunamata bzifanikiso. 6 Mulungu an’dzakalipa thangwe ra wanthu omwe ambacita bzinthu bzimwebzi. 7 Imwepo mukhambacitambo bzinthu bzimwebzi m’mbuyomu. 8 Tsono imwepo mun’funika kusiya bzinthu ibzi: Ukali, ciya na kuipa, ndipo pa mulomo panu paleke kucoka mafala yakupusa na nkhani zamaika. 9 Lekani kumbanamizana. Khundulani unthu bwakale na bzicito bzace, 10 ndipo bvalani unthu bupsa, bomwe thangwe ra cidziwiso caico bukukhalisidwa bupsa, mwakubverana na cifanikiso ca ule omwe adabulenga. 11 Mukacita bzimwebzi, pan’dzakhala palibe Mdjuda, Mgerego, wakucita mgwatidwe, wakusaya kucita mgwatidwe, mulendo, Msita,* kapolo ayai munthu waufulu; pakuti Kristu ni bzinthu bzentse ndipo ali mwa wentse.

12 Ninga wakusankhulidwa na Mulungu, wakucena na wakufunidwa, latizani* lufoyi na ntsisi, kudeka mtima, kubzicepesa, kuderekha na kupirira. 13 Pitirizani kupirirana na kulekererana na mtima wentse, napo penu munayo mathangwe yakukhalira wakukalipa. Ninga momwe Yahova adakulekererani na mtima wentse, imwepo mucitembo bzibodzi-bodzibzo. 14 Kuthumizira pa bzinthu bzentsenebzi, latizani* lufoyi, pakuti limbaphatanidzisa wanthu mwamphanvu kwene-kwene kuposa cinthu ciri-centse.

15 Ndipo bvumani kuti mtendere wa Kristu utonge mitima yanu, pakuti mudacemeredwa ku mtendere umweyu m’thupi libodzi. Tenepo, mbatendani nthawe zentse. 16 Bvumani kuti fala la Kristu liphate basa mwa imwepo ndipo likupaseni nzeru zentse. Pitirizani kumbapfunzisana na kumbalimbikisana* na masalimo, kutumbiza Mulungu, nyimbo zauzimu zakuimbidwa mwakutenda, mucimbaimbira Yahova na mu mtima. 17 Ciri-centse comwe mun’cita, m’mafala ayai m’bzicito, mumbacite bzentse m’dzina la Mbuya Jezu, mucimbatenda Mulungu Baba mu dzina lace.

18 Akazimwe, mbabverani azibayanu thangwe bzimwebzi mpsakuthemera pamaso pa Mbuya. 19 Amunamwe, pitirizani kumbafuna azikazanu ndipo lekani kumbacita nawo bzinthu mwa ukali.* 20 Wanamwe, mbabverani abereki wanu m’bzinthu bzentse, pakuti kucita bzimwebzi kumbakondwesa Mbuya. 21 Imwembo abereki, lekani kumbakalipisa wana wanu kuti iwo aleke kusunama. 22 Imwepo akapolo, mbabverani azimbuya wanu wa pantsi pano m’bzinthu bzentse, sikuti kokha pa nthawe yomwe iwo akukuwonani kuti mukondwese wanthu, koma na mtima wentse na mwakugopa Yahova. 23 Ciri-centse comwe mukucita, ciciteni na mtima wentse ninga kuti mukucitira Yahova, sikuti wanthu, 24 pakuti mukudziwa kuti mun’dzatambira utaka kucokera kwa Yahova ninga mabaibai yanu. Tumikirani Mbuya wanu Kristu ninga akapolo. 25 Kulewa cadidi, ule omwe ambacita bzinthu bzakuipa, an’dzabwezeredwa bzinthu bzakuipa bzomwe adacita, thangwe Mulungu alibe tsankhulo.

4 Azimbuyamwe, mbacitirani akapolo wanu bzinthu bza cirungamo na bzakuthemera, pakudziwa kuti imwepombo muna Mbuya kudzulu.

2 Limbikirani kucita mipembo ndipo pakucita bzimwebzi, pitirizani kukhala tceru mucimbatenda. 3 Pa nthawe ibodzi-bodziyo, mbatipemphereranimbo kuti Mulungu atifungulire njira yakuti tipalizire fala lace na kudziwisa cintsintsi cakupambulika cakulewa bza Kristu, comwe cidandicitisa kuti ndimangidwe na makorenti ndiciikhidwa m’kawoko muno, 4 nakuti ndilewelewe mwakubveka bwino ninga momwe bzin’funikira.

5 Pitirizani kufamba mwa nzeru pakati pa wanthu wakusaya kukhulupira, mucimbaphatisa basa bwino nthawe yanu.* 6 Mafala yanu nthawe zentse yan’funika kukhala yabwino na yakuikhidwa munyu kuti mudziwe momwe mungatawirire munthu ali-wentse.

7 Tikiko m’bale wangu wakufunidwa, mtumiki wakukhulupirika na kapolo mwanzangu mwa Mbuya, an’dzakuuzani bzinthu bzentse pakulewa bza ine. 8 Ndikum’tuma kwa imwepo, kuti mudziwe kuti tiri tani nakuti adzatsangalazembo mitima yanu. 9 Iye an’bwera pabodzi na Onezimo, m’bale wangu wakukhulupirika na wakufunidwa omwe adacokera pakati panu, ndipo iwo an’dzakuuzani bzinthu bzentse bzomwe bzikucitika kuno.

10 Aristako nyam’kawoko mwanzangu akupereka kulimba, ndipo Marko m’bale wace wa Barnaba akuperekambo kulimba (pakulewa bza Marko, imwepo mudatambira kale malango yakuti mudzam’tambire akadzakuzungirani), 11 pabodzi na Jezu, omwe ambacemeredwambo kuti Justo, ndipo amwewa ali m’thimu la wanthu omwe adacita mgwatidwe. Amwewa okha ndiwo anyabasa anzangu pakuthandizira umambo bwa Mulungu ndipo iwo ni mtsangalazo ukulu kwa* inepano. 12 Epafra, kapolo wa Kristu Jezu omwe ni m’bodzi wa imwepo, akuperekambo kulimba. Iye nthawe zentse ambacita nyongo yakukupemphererani kuti mukhale wakulimba mwauzimu, nakuti muleke kupenukira bzentse bzomwe Mulungu ambafuna. 13 Inepano ndikumucitira umboni bwakuti iye akuphata basa na nyongo thangwe ra imwepo, abale wa ku Laudiseya na ku Hiyerapolisi.

14 Luka omwe ni dotolo wakufunidwa pabodzi na Dema, akupereka kulimba. 15 Mundiperekerembo kulimba kwa abale wa ku Laudiseya, kwa Ninfa na kwa gwere lomwe limbatsonkhana pamui pace. 16 Ndipo tsambali likawerengedwa kwanuko, citani makonzedwe yakuti likawerengedwembo ku gwere la ku Laudiseya, ndipo mukakumbire tsamba lomwe ndalitumiza ku gwere la ku Laudiseyako, kuti liwerengedwembo pakati panu. 17 Ndipo muuzeni Arikipo kuti apitirize kuphata basa na nyongo, kuti akwanirise utumiki bomwe adatambira kwa Mbuya.

18 Ine Paulo, ndikupereka kulimba wangu mwakucita kunemba na manja yangu. Pitirizani kukumbukira kuti ine kuno ndidamangidwa na makorenti. Kudeka mtima kukulu kwa Mulungu kukhale namwe.