TSAMBA LAKUYAMBA LAKUYENDA KWA ATESALONIKA

1 Ine Paulo, Silvano* na Timotio, tikutumiza tsambali ku gwere la ku Tesalonika, lomwe ni gwere la Mulungu Baba pabodzi na Mbuya Jezu Kristu:

Kudeka mtima kukulu kwa Mulungu na mtendere kukhale namwe.

2 Nthawe zentse timbatenda Mulungu tikambakugumani mwentsenemwe m’mipembo yathu, 3 thangwe nthawe zentse timbakumbukira bza mabasa yanu yomwe mumbayacita thangwe ra cikhulupiro, lufoyi pabodzi na kupirira kwanu thangwe ra cidikhiro comwe munaco mwa Mbuya wathu Jezu Kristu na pamaso pa Mulungu wathu na Baba. 4 Pakuti timbadziwa, imwe abale wakufunidwa na Mulungu, kuti Mulunguyo ndiye omwe adakusankhulani, 5 thangwe pomwe tidapalizira mafala yabwino kwa imwepo, tiribe kundopalizira na mafala yokha, koma tidapalizirambo na mphanvu, mzimu wakucena na citsimikizo centse. Ndipo imwepo mukudziwa momwe tidacitira bzinthu kuti mugumane phindu. 6 Ndipo mwatewezera ifepano na Mbuya, thangwe mwatambira mafala ya Mulungu na kukondwa komwe kumbabwera thangwe ra mzimu wakucena, napo kuti mukhagumana na matsautso mazinji, 7 mwakuti mudakhala ciratizo kwa anyakukhulupira wentse wa ku Masedoniya na ku Akaya.

8 Kulewa cadidi, fala la Yahova lakucokera kwa imwepo, liribe kundobveka ku Masedoniya na ku Akaya kokha, koma cikhulupiro canu kwa Mulungu cabveka kuli-kwentse, mwakuti palibe comwe tingalewe. 9 Thangwe iwo akhapitiriza kulewa bza ulendo bwakuyamba bomwe tidagumana namwe na momwe mudatendeukira kwa Mulungu, mucisiya bzifanikiso bzanu kuti mutumikire ninga akapolo wa Mulungu wamoyo na wacadidi, 10 na kudikhira Mwana wace kucokera kudzulu, omwe adalamusidwa kucokera kwa anyakufa. Mwanayo ni Jezu, omwe akutipulumusa ku ukali bomwe bukubwera.

2 Kulewa cadidi, imwepo abale mukudziwa kuti ulendo bwathu bwakudzakuzungirani bulibe kukhala bwakusaya phindu. 2 Pakuti ninga momwe mukudziwira kuti cakuyamba tidaboneresedwa ticitukwanidwa ku Filipi, koma tidakhwimika mwakuthandizidwa na Mulungu, ndipo tidakuuzani mafala yabwino ya Mulunguyo mwakubonerera kwene-kwene. 3 Pakuti malango yomwe tikukupasaniya yalibe kuphonyeka ndipo tikukupasani lini na cakulinga cakuipa ayai kuti tikupumpseni, 4 m’mbuto mwace, timbalewalewa na imwepo ninga wanthu wakusankhulidwa na Mulungu, kuti tipalizire mafala yabwino. Timbalewalewa lini kuti tikondwese wanthu, koma timbalewalewa kuti tikondwese Mulungu, omwe ambadziwa bzomwe bziri mu mtima.

5 Kulewa cadidi, imwepo mukudziwa kuti tiribe kukupumpsani na mafala yakutapira ne tiribe kufuna kuwoneka ninga wanthu wabwino kuti titambire cinthu kuna imwepo. Mulungu akudziwa bwino bzimwebzi! 6 Ne tiribe kufuna kupasidwa ulemerero na wanthu ne na imwepo ayai na wanthu winango, napo kuti ifepano tingadakupasani mtolo wakuti mumbatisamalire pakuti ndife apostolo wa Kristu. 7 M’mbuto mwace, tidakhala wakuderekha pakati panu ninga momwe ambacitira mai omwe akumamisa na kusamalira mwana wace mwalufoyi. 8 Tenepo, thangwe rakuti timbakufunani kwene-kwene, timbakomedwa kugawana namwe mafala yabwino ya Mulungu na kukupasani moyo wathu na cakulinga cakuti tikuthandizeni.

9 Abale, imwepo mukukumbukira bza basa lomwe tidaphata mwa mphanvu na mwa nyongo. Ndipo ifepano tikhaphata basalo usiku na masikati kuti tileke kukhala mtolo kwa imwepo, pomwe tikhakupalizirani mafala yabwino ya Mulungu. 10 Imwepo pabodzi na Mulungu ndimwe mboni, za momwe tidakhalira wakukhulupirika, wakulungama na wakusaya mathangwe yakutilewera kuipa pomwe tikhanamwe. 11 Ndipo imwepo mukudziwa bwino kuti ifepano tikhapitiriza kukucenjezani, kukutsangalazani na kupasa malango ali-wentse wa imwepo ninga momwe pai ambacitira na wana wace, 12 kuti mupitirize kufamba mu njira yomwe Mulungu ambakomedwa nayo, ule omwe adakucemererani ku umambo na ulemerero bwace.

13 Ndipopa timbatenda Mulungu nthawe zentse, thangwe pomwe mudatambira mafala ya Mulungu yomwe mudayabva kwa ifepano, mulibe kuyatambira ninga mafala yakucokera kwa wanthu, koma ninga mafala yakucokeradi kwa Mulungu, yomwe yakuphatambo basa kwa imwepo anyakukhulupira. 14 Pakuti imwepo abale mudatewezera magwere ya Mulungu yakuphatana na Kristu Jezu yomwe yali ku Djudeya, thangwe mudabonera m’manja mwa wanthu wa kwanu caiwo, ninga momwe iwombo akuboneresedwera m’manja mwa Adjuda, 15 omwe adapha napo Mbuya Jezu Kristu na apolofeta ndipo akutizunzambo. Kuthumizira bzimwebzi, bzomwe iwo akucitabzo bzimbakondwesa lini Mulungu ndipo mpsabwino lini kwa munthu ali-wentse. 16 Pakuti iwo akufuna kutiletsa kupalizira wanthu wa mitundu inango kuti adzapulumuke. Mwa njira imweyi, iwo ambapitiriza kuthumizira pikado zawo. Tsono ukali bwa Mulungu bwawabwerera.

17 Abale, pomwe tidasiyana na imwepo kwa nthawe yakucepa, (mwakuthupi sikuti na mu mtima) tikhafunisisa kukuwonani maso na maso,* ndipo tin’cita nyongo kuti tikwanise kucita bzimwebzi. 18 Ndipopa tikhafunisisa kudzakuzungirani, inde, ine Paulo, ndidayezera sikuti kabodzi kokha, koma kawiri kentse; tsono Sathani adatcinga njira yathu. 19 Kodi n’ciponi cidikhiro cathu, cikondweso na mabaibai pamaso pa Mbuya wathu Jezu pa nthawe yomwe an’dzabwerera kuti adzakhale na ifepano? Kodi ndimwepo lini? 20 Kulewa cadidi, imwepo ndimwe ulemerero bwathu na cikondweso cathu.

3 Tenepo, pomwe tikhakwanisa lini kupirira, tidawona kuti bzikhali bwino kubakakhala tekha ku Atena; 2 ndipo tidatuma Timotio, m’bale omwe ni mtumiki* wa Mulungu pa basa lakupalizira mafala yabwino yakulewa bza Kristu. Tidamutuma kuti adzalimbise* cikhulupiro canu na kukutsangalazani, 3 kuti munthu ali-wentse pakati panu aleke kutepa* na matsautso yamweya. Pakuti imwepo mukudziwa kuti palibe comwe tingacite, kuti tileke kugumana na matsautso yamweya.* 4 Thangwe pomwe ifepano tikhali pabodzi na imwepo, tidakuuzaniletu kuti tin’dzagumana na matsautso, ndipo bzacitika ninga momwe mukudziwira. 5 Ndipopa pomwe ndidawona kuti ningadakwanisa lini pomwe kupirira, ndidatuma Timotio kwa imwepo kuti ndidziwe bza kukhulupirika kwanu, kuti pinango Dyabu* angakhale kuti wakuyezani, ndipo basa lathu lomwe taliphata na nyongo lingakhale kuti layenda papezi.

6 Tsono Timotio wafika tsapanopapa kucokera kumweko, ndipo iye watiuza mafala yabwino yakulewa bza kukhulupirika kwanu na lufoyi lanu. Iye walewa kuti mukupitiriza kutikumbukira nthawe zentse ndipo mukufunisisa kutiwona ninga momwe ifembo tikufunisisira kukuwonani. 7 Ndipopa abale, ifepano tatsangalazidwa thangwe ra imwepo na kukhulupirika komwe mukukulatiza napo kuti tikusaya bzinthu bzinango ndipo tikugumana na matsautso. 8 Thangwe ifepano timbatsangalazidwa,* imwepo mukapitiriza kukhala wakulimba ninga ateweri wa Mbuya. 9 Kodi tingatende tani Mulungu thangwe ra imwepo na cikondweso cikulu comwe tinaco pamaso pa Mulungu wathu thangwe ra imwepo? 10 Usiku na masikati timbakupemphererani mwakudandaulira kuti tikuwoneni maso na maso,* nakuti tikuthandizeni pa bzomwe mukufunikira kuti mulimbise cikhulupiro canu.

11 Ndipo ifepano timbacita mipembo kuti Mulungu, Baba wathu caiyeyo, pabodzi na Mbuya wathu Jezu atifungulire njira kuti tibwere kuna imwepo. 12 Kuthumizira bzimwebzi, Mbuya akuthandizeni kuti lufoyi lomwe munalo kwa winango na mwanzace na kwa wanthu wentse, lithumizirike ninga momwe ifepano takulisirambo lufoyi lathu kwa imwepo. 13 Mwa njira imweyi, iye an’dzacitisa kuti mitima yanu ikhale yakulimba, yakusaya mulandu na yakucena pamaso pa Mulungu Baba wathu, pa nthawe yakuwonekera kwa Mbuya wathu Jezu pabodzi na anyakucena wace wentse.

4 Pakumalizira abale, ninga momwe mudatambirira malango kucokera kwa ifepano yakulewa bza momwe mungacitire bzinthu kuti mukondwese Mulungu, ndipo ndibzo bzomwe mukucita kale, tikukukumbirani na kukudandaulirani mu dzina la Mbuya Jezu, kuti mupitirize kucita bzimwebzi mwakuthumizirika. 2 Pakuti mukudziwa malamulo yomwe tidakupasani mu dzina la Mbuya Jezu.

3 Pakuti Mulungu akufuna kuti imwepo mukhale wakucena, mucitcenkha upombo ayai uputa.* 4 Ali-wentse wa imwepo adziwe momwe anganyang’anirire thupi lace kuti akhale wakucena na wakulemekezeka. 5 Ndipo lekani kukhala ninga wanthu omwe ambadziwa lini Mulungu, omwe ambafuna kwene-kwene bza kugonana.* 6 Palibe munthu omwe an’funika kupitirira malire mpaka kufika pakucitira bzakuipa m’bale wace pa nkhani imweyi, pakuti Yahova an’dzalanga wentse omwe ambacita bzinthu bzimwebzi, ninga momwe tikhadakuuzirani kale na kukucenjezani mwa mphanvu. 7 Pakuti Mulungu alibe kuticemera kuti tikhale wakupswipa, koma wakucena. 8 Tsono munthu omwe an’lamba kubvera malamulo yamweya, akulamba lini kubvera munthu, koma akulamba kubvera Mulungu omwe ambakupasani mzimu wace wakucena.

9 Tenepo, pa nkhani yakulewa bza kufuna abale, tin’funika lini kucita kukunemberani, pakuti imwepo mudacita kupfunzisidwa na Mulungu kuti mumbafunane. 10 Ndipo imwepo mukucitadi bzimwebzi kwa abale wentse wa ku Masedoniya. Ndipo tikukulimbikisani abale, kuti mupitirize kucita bzimwebzo mwakuthumizirika. 11 Ndipo citani nyongo kuti mukhale mwa mtendere, mucileka kupitira nkhani za wene, muciphatambo basa na manja yanu ninga momwe tidakuuzirani, 12 kuti wanthu wa kunja awone kuti muna makhalidwe yabwino, mucileka kusaya cinthu.

13 Kuthumizira bzimwebzi, abale, tikufuna kuti mudziwe pakulewa bza wale omwe adagona mu infa, kuti muleke kusunama ninga momwe ambacitira wale omwe alibe cidikhiro. 14 Pakuti penu timbakhulupira kuti Jezu adafa acilamusidwa kwa anyakufa, timbakhulupirambo kuti Mulungu an’dzalamusa wale omwe adagona mu infa mwakubverana na Jezu, kuti akhale naye pabodzi. 15 Pakuti ifepano tikukuuzani bzimwebzi mwakubverana na mafala ya Yahova, kuti wamoyofe, omwe tin’dzakhala pa nthawe yakuwonekera kwa Mbuya, tin’dzakhala lini patsogolo pa omwe adagona mu infa. 16 Pakuti Mbuya wathu an’dzabuluka kucokera kudzulu, iye an’dzakuwa mwa mphanvu na fala la mkulu wa anjo, ndipo an’dzaphatirira cimbututu ca Mulungu, ndipo omwe adafa mwakubverana na Kristu ndiwo an’dzayamba kumuka. 17 Patsogolo pace, ife omwe tasala na moyofe, tin’dzatengedwa pabodzi na iwo m’mitambo kuti tikagumane na Mbuya kudzulu, ticikakhala naye pabodzi mpaka kale-kale. 18 Tenepo, pitirizani kutsangalazana na mafala yamweya.

5 Tsapano abale, pakulewa bza nthawe na nyengo, bzin’funika lini kuti ndikunembereni cinthu. 2 Pakuti imwepo mukudziwa bwino kuti ntsiku ya Yahova in’dzafika ndendende ninga mbava usiku. 3 Pomwe an’dzakhala akulewa kuti “mtendere na mkhomeko!” pa nthawe imweyoletu iwo an’dzapfudzidwa. Bzimwebzi bzin’dzawacitikira mwadzidzidzi ninga kuwawa komwe mkazi ambabva pakubereka ndipo iwo an’dzapulumuka lini. 4 Tenepo abale, imwepo muli lini mu mdima, kuti ntsikuyo ingadzakufikireni mwakudzidzimusa ninga mbava, 5 pakuti mwentsenemwe ndimwe wana wa ceza na wana wa masikati. Ndipo ndife lini wana wa usiku ne wa mdima.

6 Tenepo, mbatilekeni kugona ninga momwe winango ambacitira, koma mbatipitirizeni kukhala tceru na wakukumbuka bwino. 7 Pakuti wale omwe ambagona, ambagona usiku, ndipo wale omwe ambaledzera, ambaledzera usiku. 8 Tsono ife omwe ndife wana wa masikati, mbatipitirizeni kukhala wakukumbuka bwino, ticibvala cakukhotcera pa nkhombe cacikhulupiro na lufoyi, ndipo tibvalembo cidikhiro ca cipulumuso ninga kapaseti.* 9 Pakuti Mulungu alibe kutisankhula kuti atipase nyathwa, koma adatisankhula kuti tidzapulumusidwe thangwe ra bzomwe Jezu Kristu Mbuya wathu adacita. 10 Iye adatifera, kuti penu tidapenya ayai tidagona* tikhale na moyo pabodzi na iye. 11 Tenepo, pitirizani kumbalimbikisana* na kumbapasana mphanvu ninga momwe mukucitiramu.

12 Tsapano abale, tikukukumbirani kuti mumbalemekeze omwe ambaphata basa na nyongo pakati panu, omwe ambakutsogolerani na kukupasani malango mwa Mbuya. 13 Ndipo mbawadekerani mtima kwene-kwene na kuwalatiza lufoyi thangwe ra basa lawo. Khalani mwa mtendere pakati panu. 14 Kuthumizira bzimwebzi, tikukukumbirani abale kuti mupase malango anyakucita bzakusaya kulongosoka, mutsangalaze anyakusunama, muthandize anyakutepa mucipirira na wanthu wentse. 15 Khalani tceru kuti muleke kubwezera cakuipa na cakuipa, koma nthawe zentse mbacitiranani bzabwino, ndipo mbacitiranimbo bzabwino wanthu wentse.

16 Mbakondwani nthawe zentse. 17 Mbapembani nthawe zentse. 18 Mbatendani m’bzinthu bzentse. Pakuti kumweku ni kufuna kwa Mulungu mwa Kristu Jezu. 19 Lekani kuthima moto wa mzimu wa Mulungu. 20 Lekani kunyozera mafala ya polofesiya. 21 Onesesani bzinthu bzentse; ndipo tsimikizirani kuti cabwino n’ciponi muciciphatisisa. 22 Tcenkhani bzakuipa bza mtundu uli-wentse.

23 Mulungu caiyeyo wa mtendere akuceneseni mwakukwana. Tsono abale, khalani wakusaya mulandu na wabwino mu njira zentsene za makhalidwe yanu yomwe mumbayalatiza pa moyo wanu na m’thupi lanu, mpaka pa nthawe yakudzawonekera kwa Mbuya wathu Jezu Kristu. 24 Omwe akukucemerani ngwakukhulupirika ndipo an’dzacitadi bzimwebzo.

25 Abale, pitirizani kumbatipempherera.

26 Mbamusanani mwakumbakumbatirana.*

27 Ine ndikukuuzani mwa Mbuya kuti tsambali liwerengedwe kwa abale wentse.

28 Kudeka mtima kukulu kwa Mbuya wathu Jezu Kristu kukhale namwe.