TSAMBA LACIWIRI LAKUYENDA KWA ATESALONIKA

1 Ine Paulo, Silvano* na Timotio, tikunembera gwere la ku Tesalonika, lomwe ni gwere la Mulungu Baba wathu pabodzi na Mbuya Jezu Kristu.

2 Kudeka mtima kukulu na mtendere wakucokera kwa Mulungu Baba na kwa Mbuya Jezu Kristu kukhale namwe.

3 Ndife wakukakamizika nthawe zentse kutenda Mulungu thangwe ra imwepo abale. Bzimwebzi mpsakuthemera thangwe cikhulupiro canu cikukhala camphanvu kwene-kwene ndipo lufoyi lomwe mumbalatizana likuthumizirika. 4 Ndipopa ifepano timbasamwirira thangwe ra imwepo pakati pa magwere ya Mulungu, thangwe ra kupirira kwanu na cikhulupiro canu pa mazunzo yentse pabodzi na kubonera komwe mukugumana nako. 5 Bumwebu ni umboni bwakuti Mulungu ambatonga mwakulungama, ndipo thangwe ra bzimwebzi, imwepo mwawonedwa kuti ndimwe wakuthemera Umambo bwa Mulungu bomwe mukububonerera.

6 Pakuti Mulungu ngwacirungamo, iye an’dzapasa nyathwa omwe ambakuboneresani. 7 Tsono imwepo omwe mukubonera na matsautso, mun’dzatambira mtsangalazo pabodzi na ifepano, pa nthawe yomwe Mbuya Jezu an’dzawonekera kucokera kudzulu pabodzi na anjo wace wamphanvu m’moto wakugaka. 8 Iye an’dzalanga wale omwe ambadziwa lini Mulungu na wale omwe ambabvera lini mafala yabwino yakulewa bza Mbuya wathu Jezu. 9 Mbuya an’dzapasa nyathwa wanthu amwewa ndipo iwo an’dzapfudzidwa mpaka kale-kale. Iwo an’dzapfudzidwa pamaso pa Mbuya na ulemerero bwace bwamphanvu, 10 pa nthawe yomwe iye an’dzabwera kuti adzatumbizidwe mwakubverana na anyakucena wace na pa ntsiku yomwe an’dzadabwisa wentse omwe adalatiza cikhulupiro, ninga momwe imwepombo mudacitira pomwe ifepano tidapereka umboni.

11 Na thangwe limweri, nthawe zentse timbakupemphererani kuti Mulungu wathu akuwoneni kuti ndimwe wakuthemera kucemeredwa na iye, ndipo iye acite mwakukwanira bzinthu bzentse bzabwino bzomwe akufuna kucita na mphanvu zace, acicitisambo mabasa yanu ya cikhulupiro kukhala yaphindu, 12 kuti dzina la Mbuya wathu Jezu litumbizidwe na imwepo, mucikhala wakuphatana na iye mwakubverana na kudeka mtima kukulu kwa Mulungu wathu na Mbuya Jezu Kristu.

2 Tenepo abale, pakulewa bza kuwonekera kwa Mbuya wathu Jezu Kristu na kutsonkhanisidwa pabodzi na iye, ndikukukumbirani kuti 2 muleke kuluza makumbukidwe yanu mwakamfulumize, nakuti muleke kudzidzimuka wanthu akalewa kuti ntsiku ya Yahova iri pafupi; bziribe basa penu mafalayo yangawoneke ninga kuti yacokera kwa Mulungu,* yacita kulewedwa na pa mulomo ayai yali pa tsamba lomwe lacokera kwa ifepano.

3 Lekani kupumpsidwa* na munthu mu njira iri-yentse, thangwe ntsikuyo ikanati kufika, pan’dzayamba kuwoneka nyakupandukira Mulungu ndipo munthu wakusaya kubvera malamulo, omwe ni mwana wakupfudzidwa, an’dzazimbulidwa. 4 Iye ni nyakupanduka omwe ambabziikha padzulu pa wentse omwe ambacemeredwa mulungu ayai pa bzinthu bzentse bzomwe bzimbanamatidwa, kuti akhale mu templo ya Mulungu, acimbabziwonesa padeca ninga kuti ni mulungu. 5 Kodi imwepo mwayebwa kuti pomwe ndikhanamwe pabodzi ndikhambakuuzani bzinthu bzimwebzi?

6 Ndipo tsapano imwepo mukudziwa kuti ni mbani omwe akukhala ninga cakuphingiza, kuti iye adzazimbulidwe pa nthawe yace yakuthemera. 7 N’cadidi kuti cintsintsi cakusaya kubvera malamulo ciripo kale, tsono cin’pitiriza kukhala mpaka akadzacoka ule omwe tsapano ali ninga cakuphingiza. 8 Patsogolo pace, nyakusaya kubvera malamulo an’dzazimbulidwa, ule omwe Mbuya Jezu an’dzamupfudza na mzimu wakucokera pa mulomo pace, ndipo an’dzamupfudziratu pa nthawe yomwe iye an’dzawonekera. 9 Munthu wakusaya kubvera malamuloyu akadzawonekera, iye an’dzacita bzimwebzi na mphanvu ya Sathani ndipo an’dzacita mabasa mazinji yamphanvu, bzizindikiro bzakunama, bzinthu bzakudabwisa, 10 cinyengo ciri-centse na kusaya cirungamo kwa mtundu uli-wentse kwa omwe akuyenda kukapfudzidwa. Imweyi in’dzakhala ninga nyathwa kwa iwo thangwe alibe kubvuma lufoyi lacadidi lomwe lingadawapulumusa. 11 Ndipopa Mulungu ambalekerera kuti iwo apumpsidwe acikhulupira bzinthu bzakunama, 12 kuti wentsenewo adzatongedwe thangwe alibe kukhulupira cadidi, koma adakomedwa na kucita bzinthu bzakusaya kulungama.

13 Tenepo, ifepano ndife wakungingimizika nthawe zentse kutenda Mulungu thangwe ra imwepo, abale wakufunidwa na Yahova, pakuti kuyambira paciyambi, Mulungu adakusankhulani kuti mupulumusidwe mwakucenesedwa na mzimu wace na thangwe ra kukhulupira kwanu cadidi. 14 Iye adakucemerani kuti mudzapulumusidwe thangwe ra mafala yabwino yomwe ifepano timbayapalizira, kuti mukhale na ulemerero bwa Mbuya wathu Jezu Kristu. 15 Tenepo abale, pitirizani kukhala wakulimba muciphatisisa mwamphanvu bzinthu bzomwe mudapfunzisidwa, kucokera m’mafala yakulewedwa na pamulomo ayai m’matsamba yomwe ifepano tidayatumiza. 16 Kuthumizira bzimwebzi, Mbuya wathu Jezu Kristu pabodzi na Mulungu Baba wathu, omwe adatifuna acitipasa mtsangalazo wakusaya kumala na cidikhiro cabwino, thangwe ra kudeka mtima kwace kukulu, 17 atsangalaze mitima yanu na kukulimbikisani kuti nthawe zentse mumbacite bzinthu bzabwino na kumbalewambo bzinthu bzabwino.

3 Pakumalizira abale, pitirizani kumbatipempherera kuti fala la Yahova lipitirize kumwazidwa mwakamfulumize nakuti lipasidwe ulemerero ninga momwe bzikucitikira pakati panu, 2 nakuti tipulumusidwe m’manja mwa wanthu omwe ambapweteka anzawo na wakuipa, pakuti ni wanthu lini wentse omwe ambakhala na cikhulupiro. 3 Tsono Mbuya ngwakukhulupirika, ndipo iye an’dzakulimbikisani acikukhotcererani kwa nyakuipa. 4 Kuthumizira bzimwebzi, pakulewa bza imwepo, tina citsimikizo centse mwa Mbuya kuti mukuteweza ndipo mun’pitiriza kuteweza malango yathu. 5 Mbuya apitirize kutsogolera mitima yanu kuti mufune Mulungu nakuti mupirire thangwe ra Kristu.

6 Tsapano abale, mu dzina la Mbuya wathu Jezu Kristu, tikukupasani malango yakuti mufundukire kutali na m’bale omwe ambabvera lini ndipo ambateweza lini bzomwe tidakupfunzisani. 7 Pakuti imwepo mukudziwa momwe mungatitewezerere thangwe ifepano tiribe kukhala wakusaya kubvera pakati panu, 8 ndipo tiribe kudya cakudya ca munthu ali-wentse fovolo.* M’mbuto mwace, tidaphata basa mwamphanvu na mwa nyongo usiku na masikati, kuti tileke kukhala mtolo kwa ali-wentse wa imwepo. 9 Sikuti tiribe ugo bwakutambira cinthu kwa imwepo, koma tikhafuna kukhala ciratizo kwa imwepo kuti mutewezere. 10 Kulewa cadidi, pomwe tikhanamwe pabodzi, ifepano tikhambakupasani malango aya: “Penu munthu an’funa lini kuphata basa, alekembo kudya.” 11 Pakuti ifepano tabva kuti winango wa imwepo pakati panu akubvera lini, akuphata lini basa ndipo akupitira nkhani za wene. 12 Kwa wanthu amwewa, ifepano tikuwapasa malango na kuwacenjeza mwa Mbuya Jezu Kristu, kuti iwo an’funika kuphata basa mwa nyongo ndipo aleke kupitira nkhani za wene, acimbadyambo cakudya comwe aciphatira basaco.

13 Tsono imwepo abale, lekani kusiya kumbacita bzabwino. 14 Tsono penu alipo omwe akubvera lini mafala yathu yomwe tayanemba mu tsambali, muikheni cizindikiro munthu umweyo, mucileka kumbacita naye bzinthu kuti iye abve manyazi. 15 Tsono lekani kumuwona ninga nyamadulanthaka, koma pitirizani kumupasa malango ninga m’bale.

16 Mbuya wa mtendere akupaseni mtendere nthawe zentse na mu njira iri-yentse. Mbuya akhale namwe mwentsenemwe.

17 Ine Paulo, ndikupereka kulimba, ndanemba tsambali na manja yangu caiyo; ndipo cimweci ni cizindikiro cangu. Nimbanemba tenepa m’matsamba yangu yentse.

18 Kudeka mtima kukulu kwa Mbuya wathu Jezu Kristu kukhale na mwentsenemwe.