TSAMBA LACIWIRI LAKUYENDA KWA TIMOTIO

1 Ine Paulo, mpostolo wa Kristu Jezu mwa kufuna kwa Mulungu, mwakubverana na bzomwe iye akhadaleweratu pakulewa bza moyo omwe ukubwera mwakuphatisa basa Kristu Jezu, 2 ndikunembera iwepo Timotio mwanangu wakufunidwa:

Kudeka mtima kukulu, ntsisi na mtendere wakucokera kwa Mulungu Baba na kwa Kristu Jezu Mbuya wathu, bzikhale nawe.

3 Nimbatenda Mulungu, omwe nimbamucitira utumiki bwakupambulika ninga momwe yadacitira makolo yangu yakale. Inepano nimbacita bzimwebzi na mtima wakusaya kundipasa mulandu ndipo nimbaleka lini kukumbukira bza iwepo m’mipembo yangu yakucita kudandaulira usiku na masikati. 4 Ndikakumbukira bza misozi yako, nimbafunisisa kukuwona kuti ndikondwe. 5 Pakuti ndikukumbukira bza cikhulupiro cako cakusaya cinyengo, comwe yavu wako a Loide adayamba kukhala naco na mai wako a Eunise, ndipo ndina citsimikizo cakuti iwepombo unaco.

6 Thangwe ra bzimwebzi, ndikukukumbusa kuti umbakombezere ninga moto mphaso yomwe udaitambira kucokera kwa Mulungu, pomwe ndidakuikha manja yangu. 7 Pakuti Mulungu alibe kutipasa mzimu wa mantha koma wamphanvu, wa lufoyi na wa makumbukidwe yabwino. 8 Na tenepo, leka kucita manyazi kupalizira bza Mbuya wathu, ne thangwe ra ine omwe ndiri m’kawoko thangwe ra Mbuyayo, koma themba mphanvu ya Mulungu ucibvuma kubonera thangwe ra mafala yabwino. 9 Iye adatipulumusa ndipo adaticemera kuti tikhale wakucena, sikuti thangwe ra mabasa yathu koma thangwe ra kufuna kwace na kudeka mtima kwace kukulu. Mulungu adatilatiza kudeka mtima kumweku mwa Kristu Jezu kuyambira kale-kale. 10 Ndipo tsapano bzawonekera padeca mwa kuwonekera kwa Mpulumusi wathu Kristu Jezu, omwe adapfudza infa ndipo mwakuphatisa basa mafala yabwino, iye adatizimbulira momwe tingakhalire na moyo pabodzi na thupi lomwe lingabvunde lini. 11 Thangwe ra mafala yabwinoya, inepano ndidasankhulidwa kuti ndikhale mpalizi, mpostolo na mpfunzisi.

12 Ndipopa inepano ndikubonerambo na bzinthu bzimwebzi, tsono ndikucita lini manyazi, thangwe nimbadziwa Ule omwe ndikumukhulupira, ndipo ndikutsimikiza kuti iye an’kwanisa kukoya bzinthu bzomwe ndidam’pasa mpaka pa ntsikuyo.* 13 Pitiriza kuphatisisa ciratizo ca mafala yabwino yomwe udayabva kwa ine mwa cikhulupiro na mwa lufoyi, bzomwe bzimbabwera thangwe ra kukhala wakuphatana na Kristu Jezu. 14 Koya bwino bzinthu bzakufunika kwene-kwene bzomwe iwepo udatambira, mwa kutsogoleredwa na mzimu wakucena omwe uli mwa ifepano.

15 Iwepo un’dziwa kuti wanthu wentse wa m’cigawo ca Aziya andisiya, kuphatanidzambo Fijelo na Herimojene. 16 Mbuya alatize ntsisi kwa banja la Oneziforo, pakuti iye adanditsangalaza kazinji kentse ndipo alibe kucita manyazi na ine thangwe ra kumangidwa kwangu.* 17 Ndipo pomwe akhali ku Roma iye adandinyang’ana mpaka kundigumana. 18 Mbuya Yahova adzamulatize ntsisi zace pa ntsikuyo. Ndipo iwepo un’dziwa bwino mabasa yomwe iye adayacita ku Efezo.

2 Na tenepo, iwe mwanangu, pitiriza kugumana mphanvu kucokera pa kudeka mtima kukulu komwe kuli mwa Kristu Jezu. 2 Ndipo bzinthu bzomwe udabva kwa inepano bzomwe bzidatsimikiziridwambo na mboni zizinji, bzinthu bzimwebzi upfunzise wanthu wakukhulupirika ndipo iwo an’dzakhala wakuthemera kupfunzisambo wanthu winango. 3 Ninga mcikunda wabwino wa Kristu Jezu, khala wakukonzeka kugumana na mabvuto. 4 Palibe munthu omwe ambacita basa la ucikunda acicitambo mabasa* ya ntsiku na ntsiku yomwe wanthu ambacita, thangwe ambafuna kukondwesa munthu omwe adamupitisa basa la ucikundalo. 5 Ndipo napo wale omwe ambacita mapici, palibe ne na m’bodziyo omwe angatambire mabaibai* akasaya kuteweza malamulo ya mapiciyo. 6 Ndipo mulimi omwe ambaphata basa mwa nyongo, ndiye omwe an’funika kuyamba kudya bzisapo bza m’munda mwace. 7 Pitiriza kukumbukira bzinthu bzomwe ndikukuuzabzi ndipo Mbuya an’dzakuthandiza kuti ubvesese* bzinthu bzentse.

8 Kumbukira kuti Jezu Kristu adalamusidwa kwa anyakufa ndipo akhali wa m’dzinza la Davide,* mwakubverana na mafala yabwino yomwe ndikupalizira. 9 Inepano ndikubonera ndipo ndikumangidwa ninga kambowa thangwe ra mafalaya. Tsono fala la Mulungu liribe kumangidwa. 10 Ndipopa inepano ndikupitiriza kupirira bzinthu bzentse thangwe ra anyakusankhulidwa na Mulungu, kuti iwombo adzapulumusidwe thangwe ra kukhala wakuphatana na Kristu Jezu, acidzakhala na ulemerero bwakusaya kumala. 11 Mafalaya njacadidi: Penu tidafa naye pabodzi, tin’dzakhalambo na moyo pabodzi na iye. 12 Tikapitiriza kupirira, tin’dzatongambo naye pabodzi ninga amambo; tikamulamba, iye an’dzatilambambo; 13 tikakhala wakusaya kukhulupirika, iye an’pitiriza kukhala wakukhulupirika, pakuti angabzilambe lini yekha.

14 Pitiriza kuwakumbusa bzinthu bzimwebzi na kuwapfunzisa* pamaso pa Mulungu, kuti aleke kunesana thangwe ra mafala, pakuti bzinthu bzimwebzi bzimbathandiza lini ne na pang’onopo ndipo bzimbadzonga wale omwe ambabzitetekera. 15 Cita bzentse bzomwe ungakwanise kuti ubvumidwe na Mulungu ninga nyabasa omwe alibe mathangwe yakucitira manyazi, omwe ambaphatisa basa bwino mafala ya cadidi. 16 Ndipo tcenkha nkhani zapezi-pezi zomwe zimbaipisa bzinthu bzakucena, pakuti bzimwebzi bzin’dzatsogolera wanthu kufika pakucitiratu bzinthu bzakuipa, 17 ndipo mafala yawo yan’dzamwazika ninga cironda ca njinda. Himeneu na Fileto ni abodzi mwa wanthu amwewa. 18 Amuna amwewa asiya cadidi mwa kulewa kuti kulamusidwa kwa anyakufa kudacitika kale ndipo akudzonga cikhulupiro ca winango. 19 Tsono aliserse yakulimba ya Mulungu ikalipo, ndipo idanembedwa mafala* yakuti: “Yahova ambadziwa wanthu wace,” ndipo padanembedwambo mafala yakuti: “Munthu ali-wentse omwe an’cemera dzina la Yahova asiye bzinthu bzakuipa.”

20 Mu nyumba ikulu mumbakhala lini bzombo bza oro na bza prata* basi, koma mumbakhalambo bzombo bza matabwa na bza dongo. Bzombo bzinango mpsakuphatisira basa lakulemekezeka ndipo bzinango mpsakuphatisira basa lakusaya kulemekezeka. 21 Na tenepo, penu munthu an’tcenkha bzombo bzakusaya kulemekezekabzi, iye an’dzakhala combo cakuphatisira basa lakulemekezeka, cakucena, cakufunika kwa mbuya wace na cakukonzeka kuphatisidwa basa liri-lentse labwino. 22 Tenepo, thawa bzikhumbo bza utswaka ndipo tewera cirungamo, cikhulupiro, lufoyi, mtendere ndipo cita bzimwebzi pabodzi na wale omwe ambacemera Mbuya na mtima wakucena.

23 Kuthumizira bzimwebzi, tcenkha nkhani zakupusa na zakusaya basa, thangwe un’dziwa kuti bzimwebzi bzimbacitisa kuti wanthu ayambe kunesana. 24 Pakuti kapolo wa Mbuya an’funika lini kunesana na wanthu, koma an’funika kudekera mtima* wanthu wentse, akhale wakuthemera kupfunzisa ndipo an’funikambo kukhala wakubziphata akacitiridwa bzakuipa, 25 wakupfunzisa mwakuderekha wale omwe ambalamba bzomwe iye ambalewa kuti pinango Mulungu angawapase mtima wakukungula,* omwe ungawacitise kudziwa cadidi caico. 26 Mwa njira imweyi iwo angakwanise kuzindikira, acipulumuka pa diwa la* Dyabu, thangwe iwo adaphatiwa na moyo kuti ambacite bzomwe Dyabuyo ambafuna.

3 Tenepo, dziwa kuti ntsiku zakumalizira zin’dzakhala zakunesa na zakugopswa. 2 Pakuti wanthu an’dzakhala wakubzifuna okha, wakufunisisa kobiri, wakusamwa, wakubzikuza, wakunyoza, wakusaya kubvera abereki, wakusaya kutenda, wakusaya kukhulupirika, 3 wakusaya lufoyi, wakusaya kufuna kubverana na anzawo, wakulewa kuipa anzawo, wakusaya kubziphata, waukali, wakusaya kufuna bzabwino, 4 wakuphindukira anzawo, wakusaya kufuna kubva bzakulewa bza anzawo, wakubzithusa kwene-kwene, wakufuna kumbabzikondwesa okha m’mbuto mwa kukondwesa Mulungu, 5 wakubziwonesa ninga kuti mbakubzipereka kwa Mulungu, tsono ambacita lini bzinthu mwakubverana na kubziperekako. Wanthu amwewa uwatcenkhe. 6 Pakati pawo pambawoneka amuna wakupumpsa, omwe ambapita mwacinyengo m’nyumba za akazi wakutepa na wapikado acipumpsa mitima yawo. Akazi amwewa ni akapolo wa bzikhumbo bza mitima yawo. 7 Ndipo napo kuti ambapfunza nthawe zentse, iwo ambafika lini pakudziwa cadidi caico.

8 Ninga momwe Jane na Djambere adagazira Mozeji, iwombo akupitiriza kugaza cadidi. Wanthu amwewa ana makumbukidwe yakuphonyeka kwene-kwene ndipo Mulungu adawalamba thangwe akufamba lini mwakubverana na cikhulupiro. 9 Napo bziri tenepo, iwo aniyenda lini patali, thangwe kupusa kwawo kun’dzawonekera padeca kwa wanthu wentse, ninga momwe bzidacitikira na amuna awiri wale. 10 Tsono iwepo wateweza bwino mapfunziso yangu, bzicito bzangu, bzakulinga bzangu, cikhulupiro cangu, kupirira kwangu, lufoyi langu, kulimbikira kwangu, 11 kuteweredwa m’mbuyo kwangu na mabvuto yangu, ninga yomwe ndidagumana nayo ku Antiyokiya, ku Ikoniyo na ku Listra. Inepano ndidapirira mabvuto yamweya ndipo Mbuya adandipulumusa pa bzentsenebzi. 12 Kulewa cadidi, wentse omwe an’funa kukhala na moyo wakubzipereka kwa Mulungu mwakubverana na Kristu Jezu, an’dzagumanambo na mabvuto. 13 Tsono wanthu wakuipa na wacinyengo an’dzayenda aciipiratu, iwo an’dzapumpsa wanthu ndipo an’dzapumpsidwambo na winango.

14 Na tenepo, pitiriza kuteweza bzomwe udapfunzisidwa na bzomwe udatsimikizira kuti n’cadidi ucibzikhulupira, thangwe ukudziwa wanthu omwe adakupfunzisa bzinthu bzimwebzi. 15 Pakuti kuyambira uli mwana, iwepo wadziwa mabukhu* yakucena yomwe yangakucitise kukhala munthu wanzeru, zomwe zingakuthandize kuti udzapulumuke thangwe ra kukhulupira Kristu Jezu. 16 Bzinembo bzentse bzidafuliziridwa na Mulungu ndipo mpsakuthandiza pa kupfunzisa, pa kutsimula, pa kulungamiza bzinthu na pa kulanga mwakulungama, 17 kuti munthu wa Mulungu akhale wakuthemera na wakukonzeka kucita basa liri-lentse labwino.

4 Kristu Jezu an’dzatonga wanthu wamoyo na wakufa, akadzawonekera padeca pa nthawe yomwe an’dzatonga mu Umambo bwace. Ndikukuuza pamaso pa umweyo, Kris­tu Jezu na pamaso pa Mulungu kuti: 2 Palizira fala la Mulungu ndipo cita bzimwebzi mwakamfulumize pa nthawe zabwino na zakunesa; tsimula, cenjeza dandaulira ndipo cita bzimwebzi mwakupirira pabodzi na luso lentse lakupfunzisa. 3 Pakuti in’dzafika nthawe yomwe wanthu an’dzalamba mapfunziso yacadidi, ndipo mwakubverana na bzikhumbo bzawo, iwo an’dzabzinyang’anira apfunzisi kuti ambadzawapfunzise bzinthu bzakuwadekera m’makutu mwawo.* 4 Iwo an’dzasiya kutetekera cadidi kuti ambatetekere nkhani zakunama. 5 Tsono iwepo phatisa basa luso lako lakukumbuka pa bzinthu bzentse, pirira mabvuto, pitiriza kupalizira mafala yabwino,* ndipo cita basa lako la utumiki mwakukwana bwino.

6 Pakuti inepano ndiri ninga ntsembe ya cakumwa yomwe ikuthululidwa pa guwa la ntsembe, ndipo nthawe yakutsudzulidwa kwangu yafendera.* 7 Ndamenya nkhondo yabwino, ndathamanga pa mapici mpaka kuphampha, ndipo ndakhala na moyo wakubverana na cikhulupiro. 8 Tsapano Mbuya omwe ni mtongi wacirungamo, wandikoyera korowa yomwe nja wanthu wakulungama ndipo iye an’dzandipasa ninga mabaibai pa ntsikuyo. Sikuti iye an’dzapasa ine ndekha, koma an’dzapasambo wentse omwe akudikhirira na mtima wentse kuwonekera kwace.

9 Cita bzentse bzomwe ungakwanise kuti ubwere kwa ine mwakamfulumize. 10 Pakuti Dema adandisiya thangwe iye akhafuna kwene-kwene bzinthu bza m’dzikoli* ndipo adayenda ku Tesalonika, Keresenti adayendambo ku Galatiya ndipo Tito adayenda ku Dalamasiya. 11 Ndasala na Luka yekha basi. Tenepo pakubwera, ubwere pabodzi na Marko pakuti iye ambandithandiza pakutumikira Mulungu. 12 Tsono ndatuma Tikiko kuti ayende ku Efezo. 13 Pakubwera, undibwereserembo kapote wangu omwe ndidamusiya ku Trowa kumui kwa Karipo pabodzi na mipukutu, maka-maka mipukutu ya khanda ire.

14 Alexandre misiri wakukonza bzinthu bza mkuwa ule, adandicita bzinthu bzakuipa kwene-kwene. Yahova an’dzamubwezera mwakubverana na bzomwe iye adacitabzo. 15 Ndipo iwepombo ucite naye mphole, thangwe iye adagaza kwene-kwene mafala yathu.

16 Pomwe ndidabzikhotcerera kakuyamba pamaso pa atongi, palibe omwe adakhala ku mbali yangu, koma wentse adandithawa. Mulungu aleke kuwabwezera pa bzomwe adacitabzo. 17 Tsono napo bzikhali tenepo, Mbuya adakhala kumbali yangu ndipo adandipasa mphanvu, kuti mwakuphatisa basa inepano, mafala yakulewa bza Jezu Kristu yapaliziridwe mwakukwana nakuti wanthu wa mitundu yentse abve mafalayo, ndipo inepano ndidapulumuka mkamwa mwa mphondolo. 18 Mbuya an’dzandipulumusa pa bzinthu bzentse bzakuipa, acidzandiyendesa ku Umambo bwace bwa kudzulu. Iye apasidwe ulemerero mpaka kale-kale. Ameni.

19 Undiperekere kulimba kwa Pris­ka na Akila pabodzi na kwa banja la Oneziforo.

20 Erasto wasala ku Kolinto, tsono ndasiya Trofimo akuduwala ku Mileto. 21 Cita bzentse bzomwe ungakwanise kuti ubwere, pomwe nthawe ya mphepo ikanati kufika.

Ebulo, Pudeni, Lino, Klaudiya pabodzi na abale wentse akuperekambo kulimba kwa iwepo.

22 Mbuya akusimbe thangwe ra mzimu wakubzipereka omwe umbaulatiza. Kudeka mtima kwace kukulu kukhale nawe.