TSAMBA LAKUYENDA KWA TITO

1 Ine Paulo, kapolo wa Mulungu na mpostolo wa Jezu Kristu mwakubverana na cikhulupiro ca anyakusankhulidwa na Mulungu na cidziwiso caico cacadidi comwe n’cakubverana na kubzipereka kwa Mulungu, 2 comwe n’cakubveranambo na cidikhiro ca moyo wakusaya kumala omwe Mulungu, omwe anganame lini, adaleweratu kale-kale, 3 tsono pa nthawe yace yakuthemera iye adacitisa kuti mafala yace yadziwike mwakuphatisa basa upalizi bwa mafala yabwino, ndipo inepano ndidasankhulidwa kuti ndiyapalizire mwakubverana na lamulo la Mpulumusi wathu, Mulungu. 4 Ndikunembera iwepo Tito mwanangu caiye mwakubverana na cikhulupiro cibodzi comwe tinaco:

Kudeka mtima kukulu na mtendere wakucokera kwa Mulungu Baba na kwa Kristu Jezu Mpulumusi wathu, ukhale nawe.

5 Ndidakusiya ku Kreta kuti ulungamize bzinthu bzomwe bzikhafunika kulungamizidwa* nakuti ukhazikise akulu m’gwere mu mzinda uli-wentse, mwakubverana na malango yomwe ndidakupasa yakuti: 6 mkulu wa gwere an’funika kukhala munthu wakusaya mathangwe yakumunamizira, mwamuna wa mkazi m’bodzi, akhalembo na wana wakukhulupira, omwe alibe mbiri ya makhalidwe yakuipa* ayai wakusaya kubvera. 7 Pakuti ninga mtumiki wa Mulungu, nyakunyang’anira an’funika kukhala wakusaya mathangwe yakumunamizira, wakusaya kufuna bzace bzokha, wakusaya kukalipa kamangu, aleke kukhala muledzeri, wandewo, ne wakufuna kugumana phindu mwacinyengo, 8 koma an’funika kukhala wakutambira bwino alendo, wakufuna bzabwino, wakukumbuka bwino, wakulungama, wakukhulupirika, wakubziphata, 9 aciteweza bwino-bwino mafala yakukhulupirika pakupfunzisa mwaluso, kuti akwanise kulimbikisa* wanthu na cipfunziso caico na kutsimula omwe ambagaza.

10 Pakuti alipo wanthu azinji wakusaya kubvera, wakulewa bzinthu bzapezi-pezi na wakupumpsa, maka-maka wale omwe ambalimbikira nkhani ya mgwatidwe.* 11 Mpsakufunika kwene-kwene kufunga miromo ya wanthu amwewa, thangwe iwo akupitiriza kupfudza cikhulupiro ca wanthu wentse m’mabanja, mwa kupfunzisa bzinthu bzomwe akhafunikira lini kupfunzisa, kuti agumane phindu mwacinyengo. 12 M’bodzi wa iwo omwe ni mpolofeta wawo caiye, adati: “Wanthu wa ku Kreta ambanama nthawe zentse, iwo ni bzirombo bzakulusa, mbatofu ndipo ambadya kwene-kwene.”

13 Umboni bumwebu n’bwacadidi. Ndipopa, pitiriza kuwatsimula mwamphanvu kuti akhale wakulimba m’cikhulupiro, 14 ndipo aleke kumbatetekera bzidapi* bza Cidjuda na malango* ya wanthu omwe adasiya cadidi. 15 Bzinthu bzentse mpsakucena kwa wale omwe mbakucena, tsono kwa wale omwe mbakupswipa na wakusaya cikhulupiro, palibe cinthu comwe n’cakucena, pakuti nzeru zawo na makumbukidwe yawo mpsakuipa. 16 Iwo ambalewa padeca kuti ambamudziwa Mulungu, tsono ambamulamba mwa mabasa yawo, thangwe iwo mbakunyantsa na wakusaya kubvera ndipo mbakuthemera lini kucita basa liri-lentse labwino.

2 Tenepo, iwepo pitiriza kupfunzisa mwakubverana na cipfunziso cacadidi. 2 Amuna wacikulire an’funika kukhala wanthu wakucita bzinthu mwacikatikati, wakukhwima m’makumbukidwe, wakukumbuka bwino, wakulimba m’cikhulupiro, wa lufoyi na wakupirira. 3 Mpsibodzi-bodzimbo na akazi wacikulire, iwo an’funika kukhala na makhalidwe yomwe yambalemekezesa Mulungu, aleke kukhala wa magunkha, ne wakumwa kwene-kwene vinyu,* koma akhale apfunzisi wa bzinthu bzabwino, 4 kuti apfunzise atsikana kumbafuna azibayawo, wana wawo, 5 nakuti akhale wakukumbuka bwino, wakucena, wakucita mabasa ya pamui,* wabwino, wakubvera azibayawo, kuti mafala ya Mulungu yaleke kulewedwa kuipa.

6 Mwa njira ibodzi-bodziyi, pitiriza kucenjeza alumbwana kuti akhale wa makumbukidwe yabwino, 7 ndipo khala ciratizo pa mabasa yentse yabwino mu njira iri-yentse. Pfunzisa bzinthu bzakucena na mtima wentse, 8 mwa kuphatisa basa mafala yabwino* yomwe palibe munthu omwe angayagaze, kuti anyakugaza anyale acisaya kuwona cinthu cakutilewera kuipa. 9 Akapolo ambabvere azimbuya wawo mu bzinthu bzentse, ayeze kumbawakondwesa acileka kumbawatawira mafala yakuipa, 10 ndipo aleke kumbawabera koma ambalatize kuti mbakuthemera kukhulupiridwa na mtima wentse, kuti mu njira iri-yentse, adekese cipfunziso ca Mulungu Mpulumusi wathu.

11 Thangwe kudeka mtima kukulu kwa Mulungu kudawonekera, kucibweresa cipulumuso kwa wanthu wa mitundu yentse. 12 Kudeka mtimako kumbatipfunzisa kuti tilambe bzinthu bzakuipa na bzikhumbo bza m’dzikoli kuti tikhale wanthu wa makumbukidwe yabwino, wakulungama na wakubzipereka kwa Mulungu pakati pa wanthu wa m’dzikoli.* 13 Pomwe tikudikhirira kukwanisika kwa cidikhiro cathu cakukondwesa na kuwonekera kwa ulemerero bwa Mulungu Mkululetu na Mpulumusi wathu, Jezu Kristu, 14 omwe adabzipereka yekha kuti atitsudzule* ku bzinthu bzentse bzomwe bzimbabverana lini na lamulo, acicenesa wanthu kuti akhale wanthu wace wakupambulika na wa nyongo pa mabasa yabwino.

15 Pitiriza kupfunzisa bzinthu bzimwebzi, kuwacenjeza* na kuwatsimula mwa mphanvu kwene-kwene. Leka kulekerera kuti wanthu akunyoze.

3 Pitiriza kuwakumbusa kuti ambabvere maboma na atongi, acikhala wakukonzeka kucita basa liri-lentse labwino. 2 Aleke kulewa kuipa munthu ali-wentse ndipo alekembo kukhala wandewo, koma akhale wakukumbuka bwino na wakuderekha kwa wanthu wentse. 3 Thangwe ifembo kale-kale tikhali wanthu wakusaya nzeru, wakusaya kubvera, tikhadasoceresedwa, tikhali akapolo wa bzikhumbo bzakusiyana-siyana na wa bzinthu bzakundokondwesa ife tekha, tikhacita bzinthu bzakuipa, tikhali wanjiru, wakunyantsa ndipo tikhambawengana winango na mwanzace.

4 Tsono pomwe Mpulumusi wathu Mulungu adalatiza kudeka mtima kwace kukulu na lufoyi kwa wanthu, 5 iye adatipulumusa, sikuti thangwe ra mabasa yakulungama yomwe tidacita, koma thangwe ra ntsisi zace. Iye adatipulumusa pomwe adatisambisa na madzi yomwe yadatipasa moyo aciticitisa kukhala wanthu wapsa mwakuphatisa basa mzimu wakucena. 6 Iye adatithululira mzimuyo na mtima wentse mwakuphatisa basa Jezu Kristu Mpulumusi wathu, 7 kuti pambuyo pakuwonedwa kuti ndife wakulungama thangwe ra kudeka mtima kwace kukulu, tikhale anyakudzatambira utaka mwakubverana na cidikhiro ca moyo wakusaya kumala.

8 Mafalaya njakukhulupirika ndipo inepano ndikufuna kuti uwauzisise bzinthu bzimwebzi, kuti wale omwe ambakhulupira Mulungu, aikhe makumbukidwe yawo pa mabasa yabwino. Bzinthu bzimwebzi mpsabwino na bzakuthandiza kwa wanthu.

9 Tsono iwepo tcenkha nkhani zakupusa na kufuna kudziwa bza madzinza ya makolo yakale-kale, kunesana na kupopotezana thangwe ra Lamulo, pakuti bzinthu bzimwebzi mpsakusaya basa na bzakusaya kuthandiza. 10 Munthu wakuyambisa mgawano umutcenkhe, ukamutsimula* kawiri, 11 ucidziwa kuti munthu umweyo wapambuka pa njira, akucita pikado ndipo akubzipasa yekha mulandu.

12 Ndikatuma Aritema ayai Tikiko kuna iwepo, ucite bzentse bzomwe ungakwanise kuti udzandigumane ku Nikopoli, thangwe ndakumbuka bzakukakhala kumweko mpaka nthawe ya mphepo kumala. 13 Thandiza Zena omwe ambadziwa bwino Lamulo ule pabodzi na Apolo, kuti iwo akhale na bzentse bzakufunikira pa ulendo bwawo. 14 Ndipo abale wathu an’funikambo kupfunza kucita mabasa yabwino, kuti ambathandize pakafunika thandizo mwakamfulumize, nakuti aleke kukhala wakusaya phindu.*

15 Wentse omwe anande pabodzi akupereka kulimba. Undiperekerembo kulimba kwa wale omwe ambatifuna m’cikhulupiro.

Kudeka mtima kukulu kukhale na mwentsenemwe.