TSAMBA LA TIYAGO

1 Ine Tiyago, kapolo wa Mulungu na wa Mbuya Jezu Kristu, ndikupereka kulimba kwa imwe mwentse wa madzinza 12 omwe mudabalalikira m’mbuto zakusiyana-siyana.

2 Mbakondwani abale wangu pomwe mukugumana na mabvuto yakusiyana-siyana, 3 thangwe imwepo mukudziwa kuti cikhulupiro canu cikayezedwa mwa njira imweyi, cimbacitisa kuti mupirire. 4 Tsono imwepo mukapitiriza kupirira,* bzimwebzi bzin’dzakupfunzisani, ndipo imwepo mun’dzaphonya lini m’bzinthu bzentse nakuti palibe comwe mun’dzasaya.

5 Tenepo, penu alipo munthu omwe akusaya nzeru, apitirize kukumbira kwa Mulungu ndipo iye an’dzamupasa, pakuti ambapereka na manja mawiri kwa wentse ndipo ambaperekambo mwakusaya kutombodzera.* 6 Na tenepo, pitirizani kukumbira na cikhulupiro na mwakusaya kupenukira cinthu ciri-centse, pakuti ule omwe ambapenukira, ali ninga mabimbi ya m’nyanza yomwe yambatengedwa na mphepo, yaciyendesedwa uku na uku. 7 Kulewa cadidi, munthu umweyu an’funika lini kudikhirira kutambira cinthu ciri-centse cakucokera kwa Yahova, 8 pakuti munthu umweyu ngwakupenukira-penukira ndipo ngwakusaya kukhazikika m’njira zace zentse.

9 Tenepo, m’bale omwe ngwakunyozeka* akondwe* thangwe tsapano wakuzidwa. 10 Ndipo munthu wakudala akondwe thangwe tsapano wacepesedwa, thangwe nyakudala an’dzafota ninga maluwa ya m’thengo. 11 Pakuti ninga momwe dzuwa limbacokera pabodzi na kupsa kwace licifotesa bzakumera, tenepo maluwa yace yambagwa ndipo kudeka kwace kumbanyembereka. Mwa njira ibodzi-bodziyi, nyakudala an’dzanyembereka pakati pa bzinthu bzace.

12 An’kondwa ni munthu ule omwe ambapirira akakhala akubonera, thangwe Mulungu akadzakomedwa naye, an’dzatambira mabaibai* ya moyo yomwe Yahova adalewa kuti an’dzapasa wentse omwe an’pitiriza kumufuna. 13 Munthu akakhala kuti akubonera, aleke kulewa kuti: “Mulungu ndiye omwe akundiboneresa” pakuti Mulungu angayezedwe lini na bzinthu bzakuipa ndipo Iye ambayeza lini munthu na bzinthu bzakuipa. 14 Tsono munthu ali-wentse ambayezedwa na bzomwe ambakhumba ndipo bzimwebzo ni bzomwe bzimbamukwewa na kumupumpsa.* 15 Patsogolo pace, bzakukhumbabzo bzikakula,* bzimbacitisa munthuyo kuti acite pikado* ndipo pikadoyo ikacitika, imbabweresa infa.

16 Abale wangu wakufunidwa, lekani kupumpsidwa. 17 Mphaso iri-yentse yabwino na yakulungama imbacokera kudzulu kwa Baba wa ceza, omwe ambacinja lini ninga mthunzi omwe umbacinja-cinja. 18 Thangwe ra kufuna kwace, ifepano tidabadwa mwa fala lace la cadidi, kuti tikhale bzisapo bzakuyambirira pa bzinthu bzomwe iye adalenga.

19 Dziwani ibzi abale wangu wakufunidwa: Munthu ali-wentse ambafulumize kubvesesa, ambacedwe kulewalewa ndipo aleke kumbafulumiza kukalipa, 20 pakuti ukali bwa munthu bumbabweresa lini cirungamo ca Mulungu. 21 Na tenepo, siyani bzakunyantsa bzentse na cinthu ciri-centse cakuipa* ndipo bvumani mwakubzicepesa* kuti mafala ya Mulungu yomwe yangakwanise kukupulumusani, yabzalidwe mwa imwepo.

22 Ndipo mbacitani bzomwe Fala la Mulungu limbalewa, sikuti kumbandobva basi mucimbabzipumpsa na nzeru zakunama. 23 Penu munthu ambandobva fala acileka kucita bzomwe falalo likulewa, munthu umweyo ali ninga munthu omwe akuwona nkhope yace pa supedyo. 24 Pakuti iye ambabziwona yekha pa supedyo ndipo akandocoka, ambayebweratu momwe iye aliri. 25 Tsono ule omwe ambanyang’anisisa bwino-bwino lamulo lakulungama lomwe limbabweresa ufulu, acipitiriza kucita bzimwebzo, iye an’dzakhala lini nyakubva omwe ambayebwa mwakamfulumize bzomwe wabvabzo koma an’dzakhala nyakucita bzomwe falalo limbalewa ndipo an’dzakhala wakukondwa pa bzinthu bzomwe ambacita.

26 Penu munthu akukumbuka kuti akunamata* Mulungu tsono akukwanisa lini kutonga* lirime lace, akubzipumpsa yekha* ndipo kunamata kwaceko n’kwapezi-pezi. 27 Kunamata* komwe n’kwakucena na kwakusaya kupswipizidwa kwa Mulungu Baba wathu ni uku: Kuthandiza nkhungwa na amamsiwa pa mabvuto yawo, ticipitiriza kukhala wakusaya kupswipizidwa na dzikoli.

2 Abale wangu, kodi imwepo mukulatiza cikhulupiro mwa Mbuya wathu wa ulemerero Jezu Kristu ndipo pa nthawe ibodzi-bodziyo mucimbasankhulana? 2 Wanthu awiri acibwera pa mitsonkhano yanu, m’bodzi wabvala mphete* ya oro ku cala cace na bzakubvala bzakuumira ndipo munangoyo ngwakusauka ndipo wabvala bzakubvala bzakusakala, 3 kodi imwepo mumbalemekeza kwene-kwene ule omwe wabvala bzakubvala bzakuumira mwakumuuza kuti: “Khalani apa pambuto yabwinoyi” ndipo mumbauza nyakusauka ule kuti: “Ima pamwepo,” ayai “Khala pantsi pafupi na cakupondera minyendo yangu”? 4 Penu bzimwebzi bzimbacitikadi pakati panu, kodi bzikulatiza lini kuti mumbawona wanthu winango kukhala wapadzulu kuposa winango, ndipo mukukhala atongi omwe mukutonga mwakuphonyeka?

5 Bveserani abale wangu wakufunidwa. Kodi Mulungu alibe kusankhula wanthu wale omwe ambawoneka kuti mbakusauka m’dzikoli kuti akhale wakudala m’cikhulupiro na kutambira utaka bwa umambo bomwe iye adalewa kuti angadadzapasa wale omwe ambamufuna? 6 Tsono imwepo mumbanyoza wanthu wakusauka. Kodi ni wanthu lini wakudala omwe ambakuboneresani acikuyendesani m’nyumba za mphala? 7 Kodi ndiwo lini omwe ambanyoza dzina labwino lomwe imwepo mumbadziwika nalo? 8 Tsapano, penu imwepo mukubvera lamulo la Mambo* mwakubverana na momwe cinembo cimbalewera kuti: “Umbafune mwanzako ninga momwe umbabzifunira wekha,” mukucita bwino kwene-kwene. 9 Tsono penu mukupitiriza kusankhulana, ndiye kuti mukucita pikado ndipo lamulo liniwonesa* padeca kuti ndimwe wanthu wa mulandu.

10 Munthu akateweza malamulo yentse koma nkuphonya lamulo libodzi lokha, ndiye kuti wanyoza malamulo yentse. 11 Pakuti ule omwe adalewa kuti: “Leka kucita upombo ayai uputa,” adalewambo kuti: “Leka kupha munthu.” Tenepo, penu iwepo un’cita lini upombo ayai uputa koma unipha, ndiye kuti wanyoza lamulo. 12 Mbalewalewani na kucita bzinthu ninga wanthu omwe an’dzatongedwa na lamulo la wanthu waufulu.* 13 Pakuti munthu omwe ambacita bzinthu mwakusaya ntsisi, an’dzatongedwa mwakusaya kubveredwambo ntsisi. Munthu wantsisi, bzinthu bzin’dzamufambira bwino pakutongedwa.*

14 Abale wangu, kodi bzina phindu lanyi munthu acilewa kuti ana cikhulupiro, pomwe ambalatiza lini mabasa yace? Kodi cikhulupiro cimweci cingamupulumuse? 15 Penu abale ayai mpfumakazi ana usiwa* ndipo alibembo cakudya cakukwanira pa ntsikuyo, 16 tsono m’bodzi wa imwepo acilewa kuti: “Ndoko mwa mtendere ndipo ukhale na bzakubvala na cakudya ca ntsiku iri-yentse,” koma ne kum’pasa bzomwe iye akufunikira kuti akhale na moyo, kodi bzimwebzi bzingakhale na phindu lanyi? 17 Bzimwebzi mpsakundendemeranambo na cikhulupiro, thangwe cikhulupiro cikasaya mabasa n’cakufa.

18 Tsono winango angalewe kuti: “Iwepo una cikhulupiro ndipo inepano ndina mabasa, ndilatize cikhulupiro cako cakusaya mabasa, ndipo inepano nin’dzakulatiza cikhulupiro cangu mwa mabasa yace.” 19 Kodi iwepo ukukhulupira kuti kuna Mulungu m’bodzi yekha basi? Ukucita bwino kwene-kwene, tsono madimonyo yambakhulupirambo bzimwebzo ndipo yambatetemera. 20 Bulutuwe, kodi un’dziwa lini kuti cikhulupiro cakusaya mabasa yace ciribe phindu? 21 Kodi Abalahamu kholo lathu lakale alibe kuwonedwa kukhala wakulungama thangwe ra mabasa yace, pomwe adapereka mwana wace Izaki pa guwa la ntsembe? 22 Wawona kuti cikhulupiro cace cidafambira pabodzi na mabasa yace ndipo cikhulupiroco cidakhala cakulungama thangwe ra mabasa yace. 23 Ndipo mafala ya cinembo yadakwanisika, yomwe yambati: “Abalahamu adakhulupira Yahova ndipo iye adawonedwa kukhala munthu wakulungama,” ndipo adadzacemeredwa kuti xamwali wa Yahova.

24 Kodi wawona kuti munthu ambawonedwa kukhala wakulungama thangwe ra mabasa sikuti thangwe ra cikhulupiro cokha? 25 Mwa njira ibodzi-bodziyi, kodi Rahabi omwe akhali puta, alibe kuwonedwa kukhala wakulungama thangwe ra mabasa yace, pomwe adatambira bwino amuna omwe akhadatumidwa, aciwauza kuti abwerere na njira inango? 26 Kulewa cadidi, ninga momwe thupi lomwe liribe moyo* liriri lakufa, cikhulupirombo cikasaya mabasa n’cakufa.

3 Abale wangu, ni mwentse lini omwe mun’funika kukhala apfunzisi, thangwe mukudziwa kuti kutongedwa kwathu kun’dzakhala kukulu kwene-kwene kuposa kwa wanthu winango. 2 Pakuti tentsenefe timbaphonya* kazinji kentse. Penu munthu ambaphonya lini m’mafala, ndiye kuti iye ni munthu wakulungama ndipo angakwanisembo kutonga thupi lace lentse. 3 Tikamangirira bzingwe ku mulomo wa kavalo kuti atibvere, timbakwanisa kutonga thupi lace lentse. 4 Onanimbo xitima za m’madzi,* napo izo n’zikulu ndipo zimbagwinyidwa na mphepo yamphanvu, izo zimbagonyolesedwa na kacinthu kang’ono kakufambisira kuti ziyende komwe nyakufambisayo akufuna.

5 Mpsibodzi-bodzimbo na lirime, iro n’kaciwalo kang’ono-ng’ono ka thupi, koma limbabziikha kwene-kwene. Ndokumbukirani momwe kamoto kang’ono-ng’ono kangagasire thengo likulu kwene-kwene. 6 Lirimembo ni moto. Ndipo pakati pa bziwalo bzentse bza thupi lathu, lirime ndakudzala na bzinthu bzakusaya kulungama, pakuti iro limbapswipiza thupi lentse, licipfudza moyo wa munthu ndipo liri ninga Gehena.* 7 Pakuti mtundu uli-wentse wa bzirombo bza m’thengo, mbalame, bzirombo bzakukwawa na mimba na bzirombo bza m’madzi, bzingafuwidwe ndipo bzimbafuwidwa na wanthu. 8 Tsono palibe munthu omwe angakwanise kufuwa lirime, iro ndakunesa kulitonga, limbadzonga ndipo ndakudzala na veneno yakupha.* 9 Na lirimelo timbatumbiza Yahova Mulungu Baba wathu, ndipo na lirime libodzi-bodziro timbatemberera nalo wanthu omwe adalengedwa “m’cifanikiso ca Mulungu.” 10 Pamulomo pabodzi-bodzipo pambacoka mafala yakusimba na yakutemberera.

Abale wangu, bziri lini bwino kuti bzimwebzi bzimbacitike tenepa. 11 Kodi mcera ubodzi umbacosa madzi ya munyu* na yakusaya munyu?* 12 Abale wangu, kodi muti wa mkuyu ungabale miolivera? Ayai muti wa miolivera ungabale nkhuyu? Mwa njira ibodzi-bodziyi, mcera wa madzi ya munyu ungacose lini madzi yakutapira.

13 Kodi alipo munthu wanzeru na wakubvesesa bzinthu pakati panu? Penu alipo, munthu umweyo an’funika kukhala na khalidwe labwino, lomwe limbalatiza kuti ambacita bzentse mwakuderekha komwe kumbacokera mu nzeru. 14 Tsono penu mu mtima mwanu mwadzala na ntcanje na kufuna kuposa winango, lekani kubzikuza thangwe mukacita tenepo mun’khala wanthu wakunama. 15 Imweyi ni nzeru lini yakucokera kudzulu koma iyo nja pa dziko la pantsi, yaucirombo na yaudimonyo. 16 Pakuti pomwe pana ntcanje na kufuna kuposa winango, pamwepo pambakhalambo kusaya kubverana na bzakuipa bza mtundu uli-wentse.

17 Tsono nzeru yakucokera kudzulu, cakuyamba njakucena, patsogolo pace njamtendere, yakukonzeka kubvuma* na yakukonzeka kubvera, yakudzala na ntsisi na bzisapo bzabwino, yakusaya tsankhulo na yakusaya cinyengo. 18 Wanthu omwe ambakhala pa mbverano wabwino na winango, ambabweresa mtendere ndipo bzimwebzi bzimbacitisa kuti iwo acite bzinthu mwacirungamo.

4 Kodi nkhondo na kumenyana bzomwe bzikucitika pakati panu bzikucokera kuponi? Kodi bzikucokera lini ku bzikhumbo bzanu bza thupi bzomwe bzikumenyana m’thupi mwanu? 2 Imwepo mukufunisisa koma mulibe, mukupitiriza kupha wanthu na kusirira, tsono mukugumana lini bzomwe mukufuna ndipo imwepo mukupitiriza kumenyana na kucita nkhondo. Kuthumizira bzimwebzi, imwepo mulibe thangwe mumbakumbira lini Mulungu. 3 Ndipo mukambakumbira mumbatambira lini thangwe mumbakumbira na cikhumbo cakuipa, kuti muteweze bzikhumbo bzanu bza thupi.

4 Imwe anyakucita upombo ayai uputa,* kodi mun’dziwa lini kuti kukhala pa uxamwali na dziko n’kubziikha pa unyamadulanthaka na Mulungu? Tenepo, ule omwe ambafuna kukhala xamwali wa dziko, ambakhala nyamadulanthaka wa Mulungu. 5 Ayai, kodi mukukumbuka kuti cinembo cimbalewa papezi kuti: “Mzimu omwe uli mwa ife ukupitiriza kukhala na bzikhumbo bza ntcanje”? 6 Na tenepo, kudeka mtima kukulu komwe iye adatipasa, n’kukulu kwene-kwene, ndipopa bzinembo bzimbati: “Mulungu ambakomedwa lini na wanthu wakubzikuza, koma iye ambalatiza kudeka mtima kwace kukulu kwa wanthu wakubzicepesa.”

7 Na thangwe limweri, bverani Mulungu koma gazani Dyabu ndipo iye an’dzakuthawani. 8 Fendererani Mulungu ndipo iye an’dzakufendereranimbo. Cenesani manja yanu imwe anyapikadomwe ndipo cenesani mtima wanu imwe anyakupenukiramwe. 9 Bvani ntsisi, dandaulani ndipo lirani. Kuseka kwanu kusanduke kulira ndipo kukondwa kwanu kusanduke msunamo. 10 Bzicepeseni pamaso pa Yahova ndipo iye an’dzakukuzani.

11 Abale, lekani kumbalewana kuipa. Munthu omwe ambalewa kuipa m’bale wace, ayai kutonga m’bale wace, ambakhala akulewambo kuipa lamulo na kutonga lamulolo. Tsono penu iwepo umbatonga lamulo, ndiye kuti ndiwe mtongi, sikuti nyakuteweza lamulolo. 12 Alipo Nyakupereka lamulo na Mtongi m’bodzi yekha basi, ule omwe ambakwanisa kupulumusa na kupfudza. Tsono iwepo ndiwe mbani kuti utonge mwanzako?

13 Tsapano, tetekerani imwe omwe mumbalewa kuti: “Lero ayai mangwana tiniyenda ku mzinda ule ndipo tin’kakhala kumweko gole libodzi, ticikacita malonda ndipo tin’kaphata kobiri.” 14 Imwepo mumbalewa bzimwebzi napo mukudziwa lini kuti moyo wanu un’dzakhala tani mangwana, thangwe imwepo muli ninga pfulere* lomwe limbabwera mu kanthawe kakucepa ndipo limbanyembereka. 15 M’mbuto mwace mumbalewe kuti: “Yahova akafuna, tin’dzakhala na moyo ndipo tin’dzacita ibzi na bzire.” 16 Na tenepo, tsapano imwepo mumbabzikuza ndipo mumbasamwa na moyo wanu, tsono kusamwa kumweku n’kwakuipa kwene-kwene. 17 Tenepo, penu munthu an’dziwa kucita cinthu cabwino tsono iye akucicita lini, akucita pikado.

5 Tsapano tetekerani wanthu wakudalamwe, lirani ndipo dandaulani thangwe ra mabvuto yomwe yati yakugwereni. 2 Cuma canu cabvunda ndipo bzakubvala bzanu bzadyedwa na mcenje. 3 Oro yanu na prata* yanu yacita fuluju. Ndipo fuluju imweyi in’dzakhala umboni bwakulatiza kuphonya kwanu ndipo in’dzadya thupi lanu. Bzinthu bzomwe mudakoya bzin’dzakhala ninga moto mu ntsiku zakumalizira. 4 Onani! Anyabasa omwe adabvuna m’minda mwanu, akupitiriza kulira thangwe imwepo mulibe kuwapasa kobiri zawo* ndipo Yahova wa anyakhondo wabva kulira kwawo kwa kukumbira thandizo. 5 Imwepo mwakhala na moyo wabwino kwene-kwene pa dziko la pantsi mucimbakondwa. Imwepo mwadya, mucinenepa ninga ng’ombe yakunenepa yomwe ikudikhirira ntsiku yakuphedwa. 6 Imwepo mwapasa mulandu munthu wakulungama mucimupha, pa thangwe limweri iye ambakugazani.

7 Tenepo, pirirani abale mpaka kuwonekera kwa Mbuya. Onani bzomwe mulimi ambacita. Iye ambadikhirira bzisapo bzace bzakufunika kwene-kwene bzomwe bzin’coka pa mataka ndipo ambadikhirirambo mwakupirira kugwa kwa nvula yakuyamba na nvula yakumalizira. 8 Imwepombo khalani wakupirira ndipo limbikisani mitima yanu thangwe nthawe yakuwonekera kwa Mbuya yafendera.

9 Lekani kumbang’ung’udzirana abale, kuti muleke kutongedwa. Onani! Mtongi ali pa msuwo. 10 Abale na mpfumakazi, khalani ninga apolofeta omwe adalewalewa mu dzina la Yahova, iwo adabonera mu njira zakusiyana-siyana ndipo adapirira. 11 Onani! Wanthu wale omwe adapirira mabvuto timbawawona kuti mbakukondwa.* Imwepo mudabva bza kupirira kwa Djobi ndipo mudawona bzomwe Yahova adamupasa, ndipo mudawonambo kuti Yahova ngwa lufoyi likulu na wantsisi.

12 Kuposa bzentse abale wangu, lekani kulumbira, ne kulumbirira kudzulu ayai dziko la pantsi, ndipo lekanimbo kulumbirira cinthu ciri-centse. Koma mukalewa kuti “Inde” akhaledi inde ndipo mukalewa kuti “Ne” akhaledi ne, kuti muleke kutongedwa.

13 Kodi alipo pakati panu omwe akubva kuwawa? Mbapitirize kucita mpembo. Kodi alipo munthu omwe akukondwa pakati panu? Mbaimbe masalimo. 14 Kodi alipo omwe akuduwala pakati panu? Mbacemere akulu wa gwere ndipo iwo an’dzamupempherera acimudzoza mafuta mu dzina la Yahova. 15 Ndipo mpembo wakucitidwa na cikhulupiro un’dzapoza nyakuduwalayo ndipo Yahova an’dzamupasa mphanvu. Kuthumizira bzimwebzi, penu iye wacita pikado, an’dzalekereredwa.

16 Na tenepo zimbulani pikado zanu mwa kumbauzana na kupemphererana kuti mupozedwe. Mpembo wakudandaulira wa munthu wakulungama una mphanvu kwene-kwene.* 17 Eliya akhali munthumbo ninga ifepano, tsono pomwe iye adapemba na mtima wentse kuti kuleke kubvumba, kulibedi kubvumba kwa magole matatu na minyezi 6. 18 Pomwe iye adapemba pomwe, nvula idabvumba kucokera kudzulu, ndipo mbeu zidamera, zicibala bzisapo.

19 Abale wangu, penu m’bodzi wa imwepo wapumpsidwa acisiya cadidi, ndipo munthu munango wamuthandiza kuti abwerere, 20 dziwani kuti omwe an’bweza nyakucita pikadoyo m’njira yace yakuphonyeka, akumupulumusa ku infa ndipo akufucira pikado zizinji.