TSAMBA LAKUYAMBA LA PEDRU

1 Ine Pedru, mpostolo wa Jezu Kristu, ndikunembera wale omwe mbalendo m’dzikoli omwe adabalalikira ku Ponto, Galatiya, Kapadosiya, Aziya na ku Bitiniya. 2 Mwakubverana na bzomwe Mulungu Baba akhadziwiratu pakulewa bza imwepo, iye adakucenesani na mphanvu ya mzimu wakucena, ndipo adakusankhulani na cakulinga cakuti mukhale wakubvera, muciwaziridwa mulopa wa Jezu Kristu:

Kudeka mtima kukulu kwa Mulungu na mtendere, bzithumizirike kwa imwepo.

3 Atumbizidwe Mulungu Baba wa Mbuya wathu Jezu Kristu, pakuti mwakubverana na ntsisi zace zikulu, iye wacitisa kuti tibadwe papsa, ticikhala na cidikhiro ca moyo thangwe ra kulamusidwa kwa Jezu Kristu kwa anyakufa. 4 Mulungu an’dzakupasani utaka bomwe bun’dzamala lini ndipo iye wakukoyerani utakabo kudzulu, 5 pakuti Mulungu akukukhotcererani na mphanvu yace, thangwe muna cikhulupiro, kuti mudzatambire cipulumuso comwe cin’dzawonekera pa nthawe yakumalizira. 6 Thangwe ra bzimwebzi, imwepo mumbakondwa kwene-kwene, napo bzin’funika kuti mubonere na mayezo yakusiyana-siyana mu kanthawe kakucepa, 7 kuti cikhulupiro canu cakuyezedwa comwe n’cakufunika kwene-kwene kuposa oro yomwe ingadzongeke napo kuti yayezedwa pa moto, cidzakucitiseni kuti mutumbizidwe, mupasidwe ulemerero na kulemekezedwa, Jezu Kristu akadzawonekera. 8 Napo kuti mukanati kumuwona, mumbamufuna ndipo napo kuti tsapano mukumuwona lini, imwepo mumbamukhulupira ndipo mumbakondwa kwene-kwene, mucikomedwa mwakuti bwerani mudzawone, 9 kuti mudzapulumuke thangwe ra cikhulupiro canu.

10 Pakulewa bza cipulumuso cimweci, apolofeta omwe adaleweratu bza kudeka mtima kukulu kwa Mulungu komwe kungadadzalatizidwa kwa imwepo, adafufudza bza cipulumuso cimweci mwa nyongo na mwatceru kwene-kwene. 11 Ndipo Mulungu adaphatisa basa mzimu wace wakucena, pakuwauziratu kuti Kristu angadadzabonera ndipo patsogolo pace angadadzatumbizidwa, ndipopa apolofetawo adapitiriza kufufudza kuti adziwe bzomwe bzingadadzacitikira Kristu na nthawe yomwe bzimwebzi bzingadadzacitika. 12 Bzimwebzi bzidazimbulidwa kwa iwo kuti akhabzitumikira lini okha koma akhatumikira imwepo pa bzinthu bzomwe bzidadziwisidwa kwa imwepo na kwa wale omwe adapalizira mafala yabwino kwa imwepo mwakuthandizidwa na mzimu wakucena omwe udatumizidwa kucokera kudzulu. Bzinthu bzimwebzi, ni bzomwe anjo akufunisisambo kubzidziwa.

13 Tenepo, konzekeresani makumbukidwe yanu kuti muphate basa mwa mphanvu, citani bzinthu bzentse mwanzeru ndipo ikhani cidikhiro canu pa kudeka mtima kukulu komwe kun’dzakufikirani Jezu Kristu akadzawonekera. 14 Ninga wana wakubvera, lekani kutengeka na bzikhumbo bzomwe mukhanabzo pa nthawe yomwe mukhadziwa lini bza Mulungu. 15 Koma ninga Nyakucena omwe adakucemerani, khalanimbo wakucena m’bzicito bzanu bzentse, 16 pakuti bzidanembedwa kuti: “Khalani wakucena, thangwe ine ndine wakucena.”

17 Ndipo mukakumbira cinthu kwa Baba omwe ambatonga mwakusaya tsankhulo mwakubverana na mabasa ya munthu ali-wentse, mbacitani bzinthu mwakumugopa pa nthawe yomwe mukukhala ninga alendo m’dzikoli. 18 Pakuti imwepo mukudziwa kuti mulibe kupulumusidwa ku mkhalidwe wanu wakusaya basa omwe mudatambira kwa makolo* yanu yakale na bzinthu bzakudzongeka ninga prata na oro, 19 koma mudapulumusidwa na mulopa wakufunika kwene-kwene wa Kristu omwe uli ninga mulopa wa bira wakusaya cirema ne nthontsa. 20 Kulewa cadidi, iye adadziwika pomwe dziko likhanati kulengedwa, tsono iye adawonekera pa nthawe yakumalizira thangwe ra imwepo. 21 Thangwe ra iye, mumbakhulupira Mulungu omwe adamulamusa kwa anyakufa acimupasa ulemerero kuti mukhale na cidikhiro mucikhulupira Mulunguyo.

22 Tsapano, pakuti mwabzicenesa thangwe ra kubvera cadidi, mucikhala na lufoyi la pa ubale lakusaya cinyengo, mbafunanani na mtima wentse. 23 Pakuti mudabadwa papsa, sikuti na mbeu yomwe imbabvunda, koma na yomwe imbabvunda lini kucokera m’fala la Mulungu wamoyo omwe an’dzakhala mpaka kale-kale. 24 Pakuti wanthu wentse ali ninga mauswa, ndipo mawonekedwe yawo yali ninga dziluwa la m’thengo; mauswa yambafota ndipo dziluwa limbagwa, 25 tsono fala la Yahova, lin’dzakhala mpaka kale-kale. Ndipo fala limweri, ni mafala yabwino yomwe yapaliziridwa kwa imwepo.

2 Tenepo, siyani bzakuipa bzentse, cinyengo, njiru na mtundu uli-wentse wa magunkha. 2 Ninga tcece lomwe limbafunisisa mkaka wa mai wace, imwepombo funisisani fala la Mulungu lomwe liri ninga mkaka wakusaya kusanganiza kuti mukule mucidzapulumuka. 3 Citani bzimwebzi, thangwe mwadziwa kuti Mbuya ngwakudeka mtima.

4 Pomwe mukufendera kwa iye omwe ali ninga mwala wamoyo omwe wanthu adaulamba, koma Mulungu adausankhula ucikhala wakufunika kwa iye, 5 imwepo ninga minyala yamoyo, mukumangidwa ninga nyumba yauzimu kuti mukhale thimu la antsembe wakucena na cakulinga cakuti mupereke ntsembe zauzimu zakubvumizika pamaso pa Mulungu mwa Jezu Kristu. 6 Pakuti cinembo cimbati: “Ndikuikha mu Ziyoni mwala wakusankhulidwa, wakufunika kwene-kwene wa pakhona pa aliserse ndipo ali-wentse omwe an’dzakhulupira mwalayo an’dzasunama lini.”

7 Tenepo, iye ngwakufunika kwa imwepo, thangwe mumbaukhulupira. Tsono kwa wale omwe ambakhulupira lini mwala omwe amisiri wakumanga nyumba adaulamba, udadzakhala mwala wakufunika wapakhona,* 8 ndipo udadzakhalambo “mwala omwe un’dzacitisa wanthu kukhukhumudwa na tsendwa lomwe lin’dzacitisa wanthu kusunama.”* Iwo akukhukhumudwisidwa thangwe akubvera lini fala la Mulungu. Wanthu ninga amwewa, bzin’dzawamalira tenepoyo. 9 Tsono imwepo ndimwe dzinza lakusankhulidwa, thimu la amambo omwe ni antsembe, ndimwe mtundu wakucena wakusankhulidwa na Mulungu kuti mukhale wanthu wace kuti mudziwise kuli-kwentse bza kudeka mtima kwa Mulunguyo. Iye wakucemerani ku mdima, kuti mupite mu ceza cakudabwisa. 10 Pakuti pakuyamba mukhali lini wanthu wa Mulungu, koma tsapano ndimwe wanthu wace; ndipo mukhalibe kulatizidwa ntsisi, koma tsapano mwalatizidwa ntsisi.

11 Abale wakufunidwa, ndikukucenjezani ninga alendo wakusaya kukhalisa m’dzikoli, kuti mupitirize kutcenkha bzikhumbo bza thupi bzomwe bzikulimbana namwe. 12 Pitirizani kukhala na makhalidwe yabwino pakati pa wanthu, kuti pomwe akukunamizirani kuti mumbacita bzinthu bzakuipa, iwo akhale mboni zakuwona na maso bzicito bzanu bzabwino, acitumbiza Mulungu pa ntsiku ya kuzondera kwace.

13 Thangwe ra Mbuya, bverani utongi bwentse bomwe budaikhidwa na wanthu ndipo mbabveranimbo mambo,* thangwe ni mkulu kuposa imwepo. 14 Mbabveranimbo atongi omwe adaikhidwa na mamboyo, kuti apereke cirango kwa anyakucita bzakuipa acitumbiza wale omwe ambacita bzabwino. 15 Pakuti Mulungu akufuna kuti mwakucita bzabwino, munyamalise wanthu wakusaya nzeru omwe ambalewa mafala yakupusa. 16 Khalani wanthu waufulu, tsono lekani kuphatisa basa ufulu bwanubo ninga thangwe lakucitira bzinthu bzakuipa, koma khalani ninga wanthu wakutumikira Mulungu. 17 Lemekezani wanthu wentse ndipo funani abale wanu wentse; gopani Mulungu ndipo lemekezani mambo.

18 Anyabasa ambabvere azimbuya* wawo na ulemu bwentse, sikuti kokha wale omwe mbabwino na wakudeka mtima, koma na walembo omwe mbakunesa. 19 Pakuti munthu akapirira pomwe akuzunzidwa acigumana na mabvuto thangwe ra kubvera Mulungu, Mulunguyo an’dzakomedwa na bzomwe akucitabzo. 20 Kodi pana phindu lanyi kupirira pomwe mukumenyedwa thangwe ra kucita bzinthu bzakuipa? Tsono penu mun’pirira mabvuto thangwe ra kucita bzabwino, Mulungu ambakomedwa na bzimwebzi.

21 Kulewa cadidi imwepo mudacemeredwera bzimwebzi, thangwe napo Kristu caiyeyo adakubonererani ndipo adakusiirani ciratizo kuti mutewere nzayo zace mwakukhulupirika. 22 Iye alibe kucita pikado ndipo pamulomo pace palibe kucoka mafala yakunama. 23 Pomwe akhatukwanidwa,* iye akhabwezera lini. Pomwe akhabonera, iye akhakhumbza lini, koma akhabzisiya m’manja mwa Ule omwe ambatonga mwacirungamo. 24 Iye adanyamula pikado zathu m’thupi mwace pa muti wakuzunzidwira, kuti tikhale ninga wakufa ku pikado,* ticikhala na moyo kuti ticite bzomwe mpsakulungama. Ndipo “imwepo mudapozedwa na bzironda bzace.” 25 Pakuti mukhali ninga mabira yakutaika, koma tsapano mwabwerera kwa makabusa omwe ambanyang’anira moyo wanu.

3 Mu njira ibodzi-bodziyi, imwe akazi, mbabverani azibayanu kuti penu winango wa iwo ambabvera lini mafala ya Mulungu, atengeke okha, sikuti na mafalayo, koma na makhalidwe yanu, 2 thangwe ra kuwona na maso yawo makhalidwe yanu yabwino, pabodzi na ulemu bukulu. 3 Kubzidekesa kwanu kuleke kukhala kwa kunja ninga kumanga tsisi, kubvala bzinthu bzakubzidekesera bza oro ayai bzakubvala bzakuumira, 4 koma kukhale kwa unthu bwakubisika bwa mu mtima bwakudekesedwa na bzinthu bzakusaya kupfudzika bzomwe ni mzimu wakuderekha na wakugwa mpfuwa bzomwe mpsakufunika kwene-kwene pamaso pa Mulungu. 5 Pakuti ni momwe akazi wakale-kale omwe akhadikhirira Mulungu akhabzidekesera, ndipo akhabvera azibayawo, 6 ninga momwe Sara akhabvera Abalahamu acimucemera kuti mbuya. Imwepo mun’dzakhala wana wace, mukapitiriza kucita bzomwe mpsabwino na kuleka kukundidwa na mantha.

7 Mpsibodzi-bodzimbo imwe amuna, pitirizani kukhala na akazi wanu ninga momwe mumbawadziwira,* alemekezeni ninga combo cakusaya kulimba kuti mipembo yanu ireke kuphingizidwa, pakuti mun’dzatambira nawo pabodzi moyo omwe Mulungu an’dzakupasani thangwe ra kudeka mtima kwace kukulu.

8 Pakumalizira pace, khalani na makumbukidwe mabodzi,* mbabveranani ntsisi, khalani na lufoyi la pa ubale ndipo khalanimbo wakubzicepesa. 9 Lekani kubwezera cakuipa na cakuipa ayai kutukwana na kutukwana, m’mbuto mwace mbalewani mafala yabwino, pakuti mudacemeredwera bzimwebzi kuti mudzasimbidwe.

10 Pakuti “omwe an’funa kukondwa na moyo na kukhala na ntsiku zabwino, an’funika kuletsa lirime lace kulewa bzinthu bzakuipa na miromo yace kulewa bzinthu bzakunama. 11 Aleke kucita bzakuipa ndipo acite bzabwino, alinge mtendere ndipo apitirize kukhala naye. 12 Pakuti maso ya Yahova yambanyang’anisa wanthu wakulungama ndipo makutu yace yambabva kudandaula kwawo, tsono Yahova ambawenga wanthu omwe ambacita bzinthu bzakuipa.”

13 Kulewa cadidi, mbani angakuciteni bzakuipa mukacita nyongo yakucita bzabwino? 14 Tsono napo imwepo mucibonera thangwe ra kucita cirungamo, imwepo mun’dzakondwa, na tenepo, lekani kugopa bzomwe iwo ambagopa* ne kukhala na thupo. 15 Bvumani m’mitima mwanu kuti Kristu ni Mbuya ndipo ngwakuthemera kulemekezedwa,* ndipo nthawe zentse khalani wakukonzeka kuti mutawire munthu ali-wentse omwe an’kubvunzani bza cidikhiro comwe munaco ndipo citani bzimwebzo mwakubzicepesa na ulemu bukulu.

16 Khalani na mtima wakucena pamaso pa Mulungu, kuti pomwe akukulewani mafala yakuipa, iwo acite manyazi thangwe ra khalidwe lanu labwino ninga ateweri wa Kristu. 17 Pakuti bziri bwino kubonera thangwe ra kucita bzinthu bzabwino, penu Mulungu an’bvumiza, m’mbuto mwa kumbacita bzinthu bzakuipa. 18 Pakuti Kristu, munthu wakulungama, adafera pikado za wanthu wakusaya kulungama kabodzi kokha mpaka kale-kale na cakulinga cakuti awatsogolere kwa Mulungu. Iye adaphedwa na thupi lanyama, acilamusidwa na thupi lauzimu. 19 Ndipo na thupi lauzimulo, iye adakapalizira mizimu yomwe ikhali m’kawoko, 20 yomwe iribe kubvera pomwe Mulungu akhadikhirira mwakupirira mu ntsiku za Nowa, pomwe cingalawa cikhamangidwa, comwe cidapulumusa pa madzi wanthu ang’ono-ng’ono wakukwana 8.

21 Bzomwe bzidacitika mu ntsiku zimwezire, tingabzindendemezere na ubatizo bomwe tsapano bukukupulumusani (sikuti mwa kucosa tsuzu la m’thupi koma mwa kukumbira Mulungu mtima wakucena), mwa kulamusidwa kwa Jezu Kristu. 22 Iye ali ku boko lamadidi la Mulungu, thangwe adayenda kudzulu, ndipo anjo, utongi na mphanvu bzimbamubvera.

4 Pakuti Kristu adabonera m’thupi, imwepombo bzikonzekereseni kuti mumbakumbuke ninga iye, thangwe munthu omwe ambabonera m’thupi, ambakhala wasiya kucita pikado, 2 kuti pa nthawe yomwe iye an’pitiriza kukhala na moyo, aleke kucita kufuna kwa wanthu, koma kufuna kwa Mulungu. 3 Pakuti m’mbuyomu, imwepo mukhacita bzinthu bzomwe wanthu wa m’dzikoli ambacita, ndipo pa nthawe imweyo, mukhana khalidwe lakupasa manyazi, mukhakhumba kucita bzakuipa, mukhambaledzera, mukhambacita maphwando yakusaya kuthemera, mukhamwa kwene-kwene ndipo mukhanamata bzifanikiso. 4 Iwo ambabvesesa lini thangwe lomwe mudasiira kucita nawo bzinthu bzakuipabzi, ndipopa ambakulewani kuipa. 5 Tsono wanthu amwewa, an’dzatawira mulandu kwa Jezu Kristu, omwe adakonzeka kudzatonga wanthu wamoyo na wakufa. 6 Ndipopa mafala ya Mulungu yadapaliziridwambo kwa wanthu wakufa, kuti napo iwo atongedwe mwakuthupi mwakubverana na kawonedwe ka wanthu, adzakhale na moyo mwauzimu, mwakubverana na kawonedwe ka Mulungu.

7 Tsono kumala kwa bzinthu bzentse kwafendera, tenepo, khalani wanzeru na wakupenya, mucimbapemba. 8 Kuposa bzentse, mbafunanani na mtima wentse, thangwe lufoyi limbampsinkha pikado zizinji. 9 Mbatambiranani mwakusaya kung’ung’udzika. 10 Mwakubverana na luso lomwe* ali-wentse adatambira, liphatiseni basa pakutumikira winango ninga nyakunyang’anira omwe adatambira kudeka mtima kukulu kwa Mulungu, komwe kumbalatizidwa mu njira zakusiyana-siyana. 11 Penu munthu ana luso la kulewalewa, aliphatise basa pakulewalewa fala la Mulungu; penu munthu akutumikira, atumikire mwakuphatisa basa mphanvu ya Mulungu, kuti Mulunguyo atumbizidwe pa bzinthu bzentse mwa Jezu Kristu. Pakuti ulemerero na mphanvu mpsace mpaka kale-kale. Ameni.

12 Abale wakufunidwa, lekani kudabwa na mayezo yakuwawa yomwe mukugumana nayo, ninga kuti ni cinthu cacirendo comwe cikukucitikirani. 13 M’mbuto mwace, pitirizani kukhala wakukondwa pomwe mukugumana na mabvuto ninga yomwe Kristu adagumana nayo, kuti mudzakomedwe mucidzakondwa kwene-kwene pa nthawe yakuwonekera kwa ulemerero bwace. 14 Penu imwepo mukutukwanidwa thangwe ra dzina la Kristu, ndimwe wakukondwa, pakuti mzimu wa Mulungu na ulemerero bwace bziri pa imwepo.

15 Tenepo, ndikufuna lini kuti ali-wentse wa imwepo abonere thangwe ra kupha munthu, kuba, kucita bzakuipa ayai kupitira nkhani za wene. 16 Tsono penu munthu akubonera thangwe ra kukhala Mkristau, aleke kucita manyazi, koma apitirize kutumbiza Mulungu, mwakukhala na moyo ninga Mkristau. 17 Pakuti yafika nthawe yakuikhidwiratu yakutonga mulandu, ndipo kutongako kuniyambira pa nyumba ya Mulungu. Tsono penu kutongedwako kuniyamba na ifepano, kodi bzin’dzawamalira tani wale omwe ambabvera lini mafala ya Mulungu? 18 “Penu nyakulungama akupulumuka mwakubonerera, kodi n’ciyani cin’dzacitikira munthu wakuipa na wakucita pikado?” 19 Tenepo, wale omwe akubonera thangwe ra kucita bzomwe Mulungu ambafuna, apitirize kubzipereka kwa Mulengi wakukhulupirika pomwe akucita bzabwino.

5 Tenepo, ine mkulu* mwanzanu, mboni yomwe idawona na maso kubonera kwa Kristu na ulemerero bomwe bun’dzazimbulidwa, ndikucenjeza akulu pakati panu kuti: 2 Usani mabira ya Mulungu yomwe yali m’manja mwanu. Mbatumikirani ninga anyakunyang’anira, sikuti mwakukakamizika, koma na mtima wentse pamaso pa Mulungu, sikuti thangwe ra kufuna kugumana phindu koma mwa kufuna kwanu; 3 sikuti mwakupondereza mabira ya Mulungu, koma khalani ciratizo kwa mabirayo. 4 M’busa mkulu akadzawonekera, imwepo mun’dzatambira mabaibai yakulemekezeka yakusaya kumala.

5 Mu njira ibodzi-bodziyi, imwe alumbwana, mbabverani akulu-akulu. Tsono mwentse mbacitiranani bzinthu mwakubzicepesa,* thangwe Mulungu ambakomedwa lini na wanthu wakubzikuza, koma ambadekera mtima wanthu wakubzicepesa.

6 Bzicepeseni pamaso pa Mulungu Wamphanvu-zentse,* kuti iye adzakukuzeni pa nthawe yakuthemera, 7 pomwe mukumutulira thupo lanu lentse, thangwe iye ambakukonkhobzani. 8 Khalani wanzeru ndipo khalanimbo tceru! Thangwe nyamadulanthaka wanu Dyabu, akufamba-famba ninga mphondolo yomwe ikulirima,* yomwe ikunyang’ana munthu kuti imukhudyule. 9 Limbanani naye, mucilimbisambo cikhulupiro canu, pakudziwa kuti abale wanu pa dziko lentse la pantsi, akugumanambo na mabvuto mabodzi-bodziya. 10 Tsono mukabonera kwa kanthawe kakucepa, Mulungu wakudeka mtima kwene-kwene, omwe adakucemerani kuti mudzatambire ulemerero bwace bwakusaya kumala pabodzi na Kristu, an’dzamalizisa kukupfunzisani. Iye an’dzakulimbikisani, an’dzakupasani mphanvu na kukuthandizani. 11 Mphanvu n’zace mpaka kale-kale. Ameni.

12 Silvano omwe ni m’bale wakukhulupirika, wandithandiza kukunemberani tsambali. Ndiribe kukunemberani bzinthu bzizinji, tsono ndanemba kuti ndikulimbikiseni na kukudziwisani kuti Mulungu, adakupasani kudeka mtima kwace kukulu. Tenepo kuphatisiseni mwamphanvu. 13 Mpfumakazi yomwe iri ku Babiloniya, yomwe idasankhulidwambo ninga imwepo, ikupereka kulimba, ndipo mwanangu Marko akuperekambo kulimba. 14 Mbamusanani mwalufoyi.*

Mtendere ukhale namwe mwentse omwe ndimwe anyakupfunza wa Kristu.